رواية سمرة الفصل الرابع 4 بقلم وسام الفراجي
عثرت بصوندة مي ووكعت وصحت كدام امي التفتت عليه وصاحت
ـ الله الله وكع الشر ان شاء الله كومي بنتي كومي!
الشغلة الي نقذتني هي لبسي لأن مافكرت امي ولا لحظة ولا احتمال صفر بالمية اني اكون هيج لابسة ..
الله ينجّي حظها دكتورة ريم وين ما تروح ويفك كربتهت ..
حطيت ايدي ع نقابي خاف واكع خاف تحرك او طلع شي من وجهي وعدلته ولميت رجليه بس وكعت ع ركبة رجلي احسها توجعني
آني انبلع لساني خفت تعرفني مع العلم وكعت ع ركبة رجلي و اذتني بس ما ردت تكشفني حتلو بوكتها مضروبة طلقة مكدر اسولف وياها مو زين ماعرفتني من صحت ..
يحجون وياي واني ماسويت اي ردة فعل بس لازمة ركبة رجلي وماريد احجي شسوي شسوي وانقذ نفسي من هالموقف هذا ..
كلت خلي يحسبوني خرسة احسن شي ..
امي رجعت كعدت ع طارف الرصيف وتباوع عليه شيصير لان تعبانة من المشي تدورلي افترت الشوارع علمود تلزم بنتها وتفضحها عود هاي امي والله مرات اشك هاي امي ..
ايدي كفوف لابسة ووجهي كامل متغطي وحذاء الدكتورة كبير عليه يعني مبركعة بالكامل ..
صرت اسوي تأشيرات بيدي حتى يتفهمون اني خرسة ..
اكلهم .. "أبا أبا" عود اني خرسة بس خشنت صوتي كل حيلي
ومعرف اسولف جان وحدة منهن كالت خطية يمكن خرسة وتريد ناخذها للطوارئ ومتأذية من الوكعة ..
ايابه شورطني وحجيت عود حتى اكحلها عميتها راح يرجعوني لنفس المكان والله دكتورة ريم صدك تنجلط عاد اذا رجعت
كلت بكلبي يا ارجع شفهمها هسة واكلها ماريد اروح
اشرتلها بيدي يعني لا لا واكلها " أبا أبا " يعني لا تاخذيني
شورطني اني شوازاني انوب مثلت دور الخرسة ومخلصتها عليهم أبا أبا ..
هو اني سوالف ومايفهموني
الحلوة انو امي متكدر توكف هواي .. شافتني مطولة وكعد ليغاد عني بس ظلت تباوع ...
والا لو ظالة واكفة والله تعرفني وتسحلني سحل ..
التمت عليه 3 نسوان وياهن بنات بگدي و امي وياهن بس ماتعرفني ..
يحجن وياي خوما بيج شي حبيبتي اوديج للطوارئ ؟
واني مادة ايدي ع رجلي وافرك بيها بلكي شوي تصير زينة
و اني ما حركت ساكن .. ساكتة ملصومة لصم بيهن شافني مااحجي عافني وراحن ..
امي شافتني ما اردلها عافتني وتكول وهي تمشي
" لا تسوي زين شر ما يجيك "
بنية ما اعرفها مدت ايدها عليه وكالت عيب منا الزلم كومي واكعدي ع جانب الطريق استر .. رفعتني ..
كعدت ع رصيف وثوبي الاسود انترس تراب .. لزمته انظف بي واضرب بي بيدي ابعد التراب ..
عافوني كلهم وراحوا واني هيج ماظل بية نفس شلون تجاوزت هالسالفة شخلصني منها بإعجوبة ..
كمت وصرت اتمشى والناس مو واضحة ملامحها بس كلت شلي علاقة بيهم اطلع من هالمستشفى عبالك سجن وكلشي سهل ..
طلعت القوس مال باب المستشفى عبالك طالعة من جهنم بس اكو ناس عند الباب خصوصا ابو الهمر ارجف رجيف منه لا يحجي وياي واني اصلا لا اعرفه ولا يعرفني بس هيج اني جبانة ..
تمشيت و بهاللحظة اكو ولد يبيع شربت وبارد ببداية باب المستشفى شفت امي راحت عليه تريد تشتري مدري شنو واني ردت اروحله لأن ميتة عطش ومن شفت امي انداريت للجهة الثانية اريد اسحب نفسي بدون محد يدري وابعد عن هالبشر هاي الي تريد تاكلني ..
امشي و امشي واني ما اعرف وين رايحة ..
بعدت عن المستشفى مو بعيد هواي ..
شفت محل كلت بلكي الاكي عنده مي بارد شوي بعدين تذكرت ما شايلة ولا ربع ..
اريد ارفع النقاب اتنفس شوي والله اختنكت ..
مديت ايدي ع نقاب ارفعه وصفنت شبيه اني غير بعدني قريب المستشفى شكد ثولة اني
اظل اختنك ولا احد يعرفني عاد خلصت من كل هالخطر وبالتالي يعرفوني
كلت اروح والله يدبرها مشيت مشيت وحذاء الدكتورة جبير عليه...
الي اعرفه رجلين الدكتورات نازكة شو هاي حذائها يطبن بي رجليني اثنينهن ...
بس هم خلف الله عليها نطتني اياه ..
باوع لكيت محل بالجهة الثانية طبيت للمحل لكيت منى كدامي ..
سكتت وابو المحل واكف ينتظرني احجي شريد اشتري
والله ثم والله كلبي مشتاك لمنى بوقتها كلبي هيج يسوي عليها و اني الفطيرة صرت اباوعلها زين رغم مو كلش مبينة من النقاب لان الوحيدة الي جانت شوي بيها حنية عليه وصرت اباوعلها لان حسيت هاي اخر مرة اشوفها بيها لان مدري بالوكت وين يشمرني ..
اشترت وراحت واني صافنة عليها .. حدما سمعت صوت ابو المحل خالة رايدة شي شنو هاي ع راسج مو هيج ينلبس النقاب رافعته من نافوخج مدري بقراصة مدري بشنو ..
هو ميدري هاي تسريحة عرس وشعري منفوش ..
كتله عمو اذا تحب تنصح وتآجر بية انطيني بطل مي بارد خليني ارتوي لان ماشايلة ولا ربع دينار ..
هز ايده وراح جابلي بطل مي .. اخذته ورحت لزاوية المحل وانطيته ظهري ورفعت النقاب وشربت مي وهو بارد كلش واني عطشانة يبو رجعت عليه روحي ..
جان اسمع صوت منى اريد ارجع مو من هاي اعتذر منك تعبتك .. كبل نزلت النقاب ..
خليت عيوني طالعة جان ابو المحل كلي نقاب وكحل ومدري شنو والله مدري شلون رهمتيها
كتله خالي الله يعين مرتك شكد تسولف وتدخل ..
كالي حسافة المي البارد بيج
طلعت وصرت امشي و امشي اريد ابعد اكبر مسافة
حذاء الدكتورة جبير عليه جان وتعبني ..
امشي وافكر بمستقبلي وين راح يكون وشلون ورطة وشلون تجرأت وسويت كل هذا ماجاي اصدك ..
افكر وامشي افكر وامشي .. حدما عبرت من سيارة كوريلا بيضة باوعت عالسايق ردت اكله تاخذني ببلاش لابعد مكان ابعدني من هالديرة وهو انتبه عليه اريد احجي .. بعدين ترددت وعفته ومشيت لان شفته مثل المو صاحي مدري شبي شواربه ثخينة ومحلق من الجوانب صفر وهو جبير ميلوك اله هالشي عرفته عاد ملطلط ..
مشيت وافكر لو سيارة هسة وتشمرني والله يسوي فضل ..
من عبرته وشافني بحلكي سالفة ..
هو شغل سيارته وصار يمشي بيها ع كيفه حدما وصلني وفتح جام الباب الي ب اتجاهي وكلي ..
ـ تحتاجين شي ؟ اساعدج بشي
.. بصراحة جنت خايفة منه اولا وثانيا مترددة ماشايلة ولا ربع بجيبي بس بنفس الوقت كلت لازم استغل هالفرصة ويبعدني شوي مكان المشي رجلي راحت ..
سكتت وماصديت اله وظليت امشي بس بداخلي اكول بلكي يكولها مرة ثانية لان اول مرة لازم واحد يثكل لا بحسبونها خفيفة وحركات ..
بعدين ظل يمشي بسيارة وياي وكلي ..
ـ اي مكان تريدي تدللي واذا ماعندج مكان عندي !
جنت مترددة ومااعرف شنو نيته او يريد يوصلني صحيح لله .. وخايفة لان ما شايلة ولا ربع
كتله ..
ـ اصعد بس ما شايلة ولا ربع
ـ عادي اصعدي اذا تريدي اني انطيج فلوس
ـ لا شكرا بس ابعدني منا يرحم موتاك
ـ ليش اكو شي
ـ ماكو شي بس ابعدني
ـ هاي مرة من المرات كبل 7 سنين ..
ـ عمو عوف القصص هسة والمغامرات والله بزعانة روحي امشي اخذني خارج المنطقة اريد اشوف وين يصفى بية الدهر ..
صار يمشي واني افكر مستقبلي المجهول ..
بعدما سويت هيج لا اكدر ارجع لأهلي ولا لاهل حودي شلون ادبر حياتي اكلي لبسي مكاني ما ادري
شلون اتصرف بهاليل وين ابات ..
السايق يرفع عينه ع مراية يشوفني وينزل عينه وكل شوي اكول ارزله واتعوذ الشيطان اكول خلي يمشي شوي يبعدني احسن ..
جان يكلي ..
ـ شبيج عمو صافنة احسج مهمومة (كلاوجي يريد يفتح موضوع ابو الاحاسيس)
ـ ماكو شي عمو امشي بطريقك اخذني وبس
ـ وين اخذج غير اعرف ؟
ـ امشي استمر اشمرني بأبعد مكان ممكن توصله
ـ ليش عمو صاير شي
ـ هيج اريد ابعد عندك مشكلة ؟
ـ لا بس اريد مصلحتج اذا ماعندج مكان تروحيله آني عندي مكان انتِ بنت ميصير بهالوقت طالعة بدون مكان وين تظلين بالليل
ـ شكرا ماريد
ـ اذا تريدي باتي بي ليلة ليلتين ماعندي مشكلة بيت شوي مخربط بس زايد عليج
ـ لا ماريد
ـ بكيفج هذا الي يسوي زين
سكت السايق وظل يسوق واني لمت نفسي ليش رفضت وليش رديت بهالاسلوب هذا يجوز يريد الخير ولو شكله مو شكل واحد وراه خير بس شسوي يعني
انتظرته يفتح موضوع حتى اكله ع البيت وهو ساكت ..
وكت الي اريده يسكت يحجي
وكت الي اريده يحجي يسكت
شهالحظ هذا الشايلته .. أيست منه كتله
ـ عمو عمو
ـ هاا
ـ وديني للبيت الي كلتلي عليه!
ـ والله انتم النسوان راح تخبلوني ساعة تتسول بيها تروح للبيت ماتقبل بس اسكت عنها تقبل تمشون بالعكس
ـ هسة شكتلك وعصبت تمام لا توديني
ـ انتِ اهلج وين ؟
ـ موجودين (لان حسيت اذا اكله ماكو يستغلني وياخذ راحته وهو مايدري كل مشاكلي من اهلي )
ـ ليش ماتروحين الهم ؟
ـ شنو محكمة توديني للبيت لو لا
ـ اي اعصابج رايحين للبيت ..
طريق يمكن ربع ساعة عن البيت وخلصها عليه يحمه كل شوي بقصة شكل صار سبايدر مان واني بزعانة روحي ..
وكفت السيارة صرت اباوع من باب السيارة يمين شمال حتى اعرف يابيت ..
نزل هو وظليت اني .. كلي
ـ انزلي شبيج
ـ وينه البيت
ـ دنزلي حتى تشوفي
نزلت كلي
ـ هذا الباب رصاصي صح قديم بس ماشي حاله هو مابي احد متروك ..
فتت صحيح فارغ وراد يفوت وراي كتله
ـ وين عمو العالم شتكول علينا اذا شافتك
ـ رايح يا عمو نظفي زين واكعدي بي متروك هذا البيت و عوذ باجر امرلج اشوف اخبارج
ـ ماشي الله وياج هاج مفتاح البيت اقفلي من تطبي حتى تشوفين شكد امان اني
شمرلي المفتاح وراح هو واني ما صدكت حتى افتح النقاب واتنفس شوي نزعته وشميت هوى كل قوتي اوف شطيب ..
قفلت الباب ورحت غسلت وجهي من المكياجات والخبصة الي بوجهي وماكو لا صابون لا تايت بمي بس احس وجهي سبورة مال صف مو وجه ..
كملت وفتت ادور بالبيت ..
فارغ صحيح وقديم مبين البيت فتت عالمطبخ لكيت بي مواعين وكشور ليمون وزلاطة ومدري شنو مو قديمة هواي مشمورة بالمطبخ يعني مو مال بعيدة هواي مال اكل قبل 3 ايام 4 ..
تعجبت شنو هاي وليش بعدين كلت ممكن ساكنين بي قبلي شعليه اني .. #وسام_الفراجي
فتت جوة ريحة تكتل و شفت دواشك بيها وفراش يلعبن النفس وسخات جدًا ومتربنات ..
المهم كلت اهم شي لكيت بيت يسترني هاي انظفها ع كيفي ..
رحت ع وحدة من الغرف نظفتها ورتبتها وكلت هاي اخصصها انام بي دام نظفت ..
تمددت شوي وصرت افكر شنو صار وليش هيج انكلبت حياتي بيومين وهاي الاحداث اذا احجيها لاي شخص يكلي مستحيل هيج صار ..
حسبي الله بيج يا ايناس وحوبتي ان شاء الله تطلع بيج اول وتالي ..
لفيت النقاب وحطيته جوة راسي لان مخدة ماكو ومن التعب ما حسيت على روحي الا نايمة بسابع نومة ..
فزيت بتالي الليل ع صوت زلم تقريبا الساعة 3 بالليل !
فتحوا الباب البرا رغم قفلته بيدي شلون انفتح مدري ..
بس حسيت عنده نسخة ثانية من المفتاح والا شلون فتحه ..
كلت يجوز هذولي سابقا جانوا هنا
ميعرفون اني هنا مثلا
صرت افسر تفسيرات وانطي اعذار هواية ..
صحت اني
ـ منو هنا ؟ شو ماكو رد بس صوت ضحك زلم سوة مو مال زلمة واثنين
ـ منو ؟ محد يرد بس يحجون بيناتهم ويضحكون ..
لزمت النقاب مالتي عالسريع وحطيته ع راسي
ردت اطلع من الغرفة وخايفة انوب اكول خاف شياطين او حرامية انوب البيت فارغ .. خاص بـ #وسام_الفراجي
اسمع واحد بيهم يكلهم اليوم مانجمع فلوس من كل واحد اليوم لكينه لبوة ببلاش ..
ضحكوا كلهم وواحد منهم يكول اني اول واحد والثاني يكله لا اني اجرب قبلكم ..
كلت شجاي يقسمون ذولي شنو شجاي يصير
طلعت راسي من الباب لكيتهم بالغرفة الثانية مو بالاستقبال
رحتلهم للغرفة الثانية اتمشى بحذر واباوع يمين يسار وطببت راسي
ـ منو انتم ؟ (واحد يباوع للثاني ويضرب ايد الثاني ويضحكون)
ـ ليش لابسة نقاب بتخافين سرج ببير مانكول عنج
صديقهم الثاني شايل بطالة بيده حطهن بالكاع واجه يتمشى عليه وهم يصيحوله لا خلي يجي الشايب مالتنه وهو يمشي عليه مايردلهم ..
لمتابعة باقي الرواية زوروا قناتنا على التليجرام من هنا
