رواية الشيهانة والعاصوف الفصل الرابع 4 بقلم ياسمين
﷽
الشيهانة والعاصوف ــ
#بقلمي ياسمين
وانا بروحي حزن ديرة
وملامح خوف وحرب چذبه،
وحلم تايه ونهر ثالث حفر خدي
غريب بگاع متلمني
چم ليله
اذب دموعي ع المامش ولا ادري.
لاتنسوني بتصويت وتعليق عالفقرات من اناملكم الحلوة 🥰🥰🥰
٠
٠
الاكثم
ركنت السيارة بكراج تابع لمحلاتنا التجارية ونزلت
بداخل سوق محتلينه والدي واعمامي الثلاثة من سنين بداية مشروع والدي بهذا البلد لحد هذا اليوم واخذوا طريق معيشتهم بالتجارة الي تدر عليهم ذهب ماشاء الله
عمي عبد الاله تابع طريقة الوالد بالتجارة واستغل قطعة ارض بوقتها جدتي اهدتها اله بولادة اول صبي الهم سموه قيصر الي صار فيما بعد صديقي وخويي رغم تقلبات اخلاقه الشاذة عن طباعي ببعض الامور نختلف بيها اني وياه بس هالشي مااثر على صداقتنا اني وياه ابد من هالناحية
المهم استلم عمي مبلغ الارض وزاد عليه وكدر صديق والدي الحجي نواف يساعده مثل مساعد والدي بشغلة الترخيصات وطلعله بوقتها بطاقة يشتغل عليها وحتى تتسهل اموره نصحه يشتري عقار حتى تصير اقامته ماعليها غبار
وفتح محل لتجارة الاقمشة النسائية اشترى بوقتها كافة الاصناف من الهند مخصوص بعد ماسافر بنفسه واشرف عالبضاعة بذاته، ولان دخل السوك شي جديد وبضاعة متعوب عليها صار محله مستهدف لامهات البيوت البسيطة والعوائل اصحاب النفوذ
مجرد استقرت اموره هناك قنعه والدي ينقل عائلته لهناك بعد ما حصل من هالتجارة خير من الله بس جدي بوقتها رفض قراراتهم نتبعهم احنا العائلتين
والظاهر جان خايف لا تبعدهم الغربة عنهم لهذا بقوا مشتتين مابين البلدين
عمي ابو قيصر
اجاه على باب الرزق اربع اولاد وبنات اثنين
اكبرهم قيصر
وراه بكر
وجيهان
وفهد
ومناف
ورؤى
وعمي عبد المجيد
صار عنده 6 ولد اكبرهم ولده القاسم
وعمي ابراهيم ماعنده خلفة سبحان الله رغم ماكو سبب بس هاي ارادة رب العالمين
باقي عماتي الخمسة تربن بحضن جدتي وتزوجن بعمر صغير المتعارف عليه بذاك الوقت، وبقى بيت جدي وجدتي الجبير مفتوح لبناتهم وولدهم واحنا احفادهم
وبقوا والدي وعمي على تواصل وسفر مستمر بين البلدين رغبة واشتياق للوطن الام وحاجة للبلد المحتضن من سنين
لحد ماتوفوا جدي وجدتي الله يرحمهم بعد سنين طويلة الا انتقلنا لعجمان الامارات وتبعوه عمامي الباقين بعد ما قسموا الورث بالتراضي
بوقتها اشتركوا عمامي عبد المجيد وابراهيم بالجزء الاكبر من ورثهم وفتحوا محل ذهب بعجمان بنفس السوك الي جمع والدي وعمي نواف
واستمروا تقريبا سنتين مو اكثر وراها اعلنوا ان التغت الشراكة بينهم وسلم عمي عبد المجيد
"ابوالقاسم" لعمي ابراهيم حصته على داير مليم
ماعرفنا السبب لحد هذا اليوم مجرد اجتمعوا بينهم الاربعة وتم الاتفاق بينهم بالتراضي وصار السمعناه
عادة بينهم تعلمنا عليهم سر بينهم مايطلع لكائن من يكون ويندفن بينهم
بقى فترة طويلة من شغل لشغل ومن مشروع لمشروع ساعة يكول نجح وساعة يكول خسر لحد اليوم الي فاجانا بيه واقترح على والدي يدخل شريك وياه بتجارة الاقمشة
مانطيت رد فعل غير السكتة رغم اني بيدي مسؤولية التجارة والدفتر والصادر والوارد مشترك بيني وبين شهم بس حدودي وية الوالد واخوته اكو بيها هواي خطوط حمرة ممنوع نتجاوزها ورغم تعدينا الثلاثينات بعمرنا بالذات اني وشهم بس كدامهم مالنا كلمة بعد كلمتهم
نزلت مترجل لداخل الاسواق ارتب بغترتي واتصل علية عمي ابو قيصر جاوبته ارخم من خامة صوتي
_ الله محيي الصوت وراعيه امرني عمي
_ الله يحفظك وليدي ويحييك انته وين بالضبط
_ اني قريب منكم
سكت ثواني وحجى
_ وليدي بالنسبة للاشكال الي بينك وبين عمك
لتخلي كلامك بيه تجريح حتى لو كان عندك دليل ضده احتراما لوالدك وهم حتى نفهم الكلام نقطة نقطة منكم
خليته يكمل كلامه كتله مستغرب
_ عمي ابو قيصر معقولة انت ماعرفتني لحد هسة لو شنو القضية بالضبط،
واذا كلامي بيه دليل شلون تطلب اواجهه بيه وانتم مخلين شروط على لساني لايزل واني مايوم زليت وياكم، والكم قدر وحشيمة غصبا علية
بس الحق ينكال لو على گص اللوزة صح لو اني غلطان
سكتت اسمع رده وصلني استغفاره بقلة حيلة وحجى
_ فاهم عليك وليدي بس عمك موفطن وطايش مع الاسف عليه خلانا كدامكم بهيج موقف عالعموم تعال وهالله هالله بعمامك وابوك اذا طلب يحاججك داخل المحل لاتجاوبه احنا متفقين وياه نجتمع ببيتي ونشوف حل واذا شفته استرعن اسكت عنه وليدي ماوصيك بعد
_ صار عمي تامرني امر
_ مايامر عليك ظالم وليدي الله يحفظك لشبابك
سديت الموبايل منه متفهم منه اختصار الشد والجذب بالكلام وية عمي ابراهيم بالمواجهة الجاية
ماراغب اوصل لهاي المرحلة ولا اريد اوصل ومن البداية مارغبت شراكته ويانا بس هو بوقتها
اصر اصرار موطبيعي والوالد الله يطول بعمره وافق لان يعزه كلش ولان اصغر اخوته ماعترض وبوقتها هو استلم مشتريات البضاعة وحمولتها لداخل المحل
لحد ما يوم دققت بالحسابات وعدد محمول البضاعة لكيت اكو نقص رجعت اني وشهم دققنا وجردنا وهم نفس الخلل... هناا شكيت بيه وصارحت الوالد بالموضوع كالي لاتتدخل بعد لهنا وحدك واني احلها
ماعرفت بعدين شلون صاروا بس من يومها عمي ابراهيم ماطابت سيرتي اله وصار يدور المواجهة وياي عالزلة حتى يبين اني غلطان او متبلي عليه بالاصح... حاولوا وياه عمامي تنسد السيرة وحسب الفهمته هو رافض الا ينفتح النقاش على اساسها اضطروا يطاوعوه ويحددون نجتمع ببيت واحد من عمامي ونفضها
سبحان الله رغم عمامي عبد المجيد وعبد الاله يتوالمون بالعمر همة والوالد ومتقاربين بالسنين بس عمي ابراهيم جان اصغر حتى اخواته سبحان الله مابين عليه الكبر رغم هو بنهاية الاربعينات بس تشوفه تحس روحه خضرة
وجان يحاول بكل طريقة يقلد الوالد حتى بزواجه بالثانية قلده بيها واخذ من اقارب امي ام شهم بس سبحان الله ماكتبله رب العباد يخلف منهن اثنيهن وهو هم تحسه مامهتم ممتع روحه بروحه ومامخلي بلد بنفسه ولا حاجة لو شكد يكون سعرها
واقرب مثال هية المزرعة الي اشتراها بذاك السعر، عزمنا جم مرة بيها ورحنا لمة شباب بس كعدة تسوى وتستاهل بس بعيدة شوية عن مكان سكنا
وصلت للمحل لكيت الوالد كاعد بالمكتب عكازته بيده وعمامي تلاثتهم يمه من شافوني رفعت ايدي للسلام
ردوا كلهم الا عمي ابراهيم يخازر مخازر
تجاهلته ودنكت على جفوف عمامي احتراما الهم دعولي بالحفظ والسلامة وراها شاركتهم الكعدة بعد ما ارخصوني سالني عمي ابو القاسم عن السفرة الجاية يمته موعدها علمود البضاعة
كتله
_ منتظر قيصر يفرغ من حمولة بضاعته المخزونة وراها نسافر سوية
كالي
_ متى ماحددتوا موعد السفر خابرني قبل بساع لان اريد القاسم يسافر وياكم ويشوف بضاعة الذهب ويسال عنها هناك شلون الاسعار والنوعية
_ صار عمي بدون متبلغ احنا هذا الناوين عليه وقاسم سبقك بالكلام وياي ترة
هز راسه وحجى محتار
_ اعرف وليدي بس اخوك مجتبى شلع كلبي واريده يتعلم كار التجارة ويستغل غياب اخوه بالسفر للبضاعة ويضبط المهنة
اني تعبت ومرات مابيه حمل للمعامل وية الزباين يرادلهم خلك وسعة صدر وهذا مايصمخ يريد يبقى صايع وية جماعته واخوه القاسم ماخلى من الحجي وياه وحتى ضرب ضربه بس ماينفع وياه
وكفت اطلب چاي الي واجدد الهم كتله اطمنه
_ مجتبى خليه علية اني احجي وياه وان شاء الله يقوى عوده ويريح كلبك من هالناحية ترة بعده مراهق يريد يشوف من الدنيا شوية الا يقنع من ذاته
_ الله كريم يبوك اني شريد غير كله الهم هذا وهم يعين اخوه ضال هالولد يراكض من البضاعة للمحل ومن المحل للبضاعة لوحده
كاله الوالد
_ الله يحفظه الك سبع القاسم مايرجح عن كفة اخوته وولد عمه
كاللهم عمي ابو قيصر بشفته ابتسامة
_ خلونا من هذا الموضوع وخلي نحجي بالاهم
الشباب لازم نزوجهم بعد كبروا ودخلوا الثلاثين واحنا بعمرهم كلمن ابنه بطوله
اجه الچايجي بيده الصينية يقدملنا چاي ، هاي نوعية الچاي يسويها مخصوص النا هنا بالسوك يعرفنا بالاسم بصراويين ونحبه ثخين ومهيل
كعدت وياهم اشرب اسمع لحجيهم باول رشفة من استكان الچاي عمي ابراهيم صاح بيه بنتر وكاله
_ شنو هذا الجاي مسويه شييييله منااا ماينشرب
العامل انصدم واستحى دنك عالاستكان وگاله
_ اسف عمي بس انتم متعودين هيج تشربوه
مخلاه يكمل دفعه وكعه للكاع كمت ادفعه عنه دفعني وكاله متعصب
_ قصدك اني اتبلى عليك مو هذا التقصده .... دفعته ليضرب العامل وعمامي لزموه من ايده يهدوه وهو يشيل روحه ويركعها
_ ماااا يدخل بعد لهناااا واحش رجليه حش اذا اجه بعد للمحل
عمامي حاولوا وياه يصلي عالنبي ويهدئ وهو فتالة اشتغلت ماطفت اخر شي باوعلي وصاح
زيح عن دربي انته مسوي روحك خير كدامهم وانت حية من تحت تبن
باوعت لوالدي رافع حاجبي اشرلي بعيونه اسكت عنه زحت عنه متكتر وكعدت اشرب چاي لازم روحي كوة اني موقليل شر ابد بس اعرفه سوى هالفتالة من لاشي طيش منه على سالفة الحساب يدور ثارات وياي
صيح بنص المحل وعربد وخلى وطلع
عمي ابو قيصر صفك ايد بايد وحجى
_ لا حول ولاقوة الا بالله العلي العظيم اني مااعرف يمته يعقل عالبني ادم
بسرعة غير ابوي الموضوع كدامي حتى مايطوخ الحجي على اخوهم.... حافظهم عالغيب وادري بيه متحفظ كلش بخوتهم وما يرغبون التنغص بالكلام
لا هو ولا عمامي حتى كدامنا احنا ولدهم
ماتاخروا دقايق وطلعوا يتعكزون كلمن لمحله والوالد قريب اذان الظهر يروح يصلي بجامع السوك وراها يرجعون يرتاحون برنامج يومي روتيني متعودين عليهم والخير والبركة بولدهم لزمنا عنهم المسؤولية
وشلنا عنهم الباقي
طلعت برة المحل اوصي العامل يسويل اركيلة مدام المحل فرغ وعيني على السوك يروش بالعالم بينا وبين محلاتهم مسافات متقاربة الحمدلله الله منعم علينا وكل محل من محلاتنا افتتحنا افرع بمناطق بعجمان متفرقة
والهدف الجاي الناوي عليه هو افتتاح اضخم محل واكبر للاقمشة بابو ظبي بس يردالها ذيج الحسبة ومخمخمة عالمستريح ولان مرفوضة عدنا نسلمه بيد عمال اذا مو واحد من رعية الحلال فوكاهم ما نامن باحد ومانرغب نجازف بهالشي
وماعدنا غير حل واحد ينتقل واحد بينا احنا الولد للسكن هناك ويراقب حلالنا عن قرب شهم رفض اقتراحي من الاساس ماقبل اناقشه بيه وما عرفت السبب منه، وكرم وآسر موظفين حكوميين والحارث ضابط بالجيش وخلدون ناوي يفتح محل گيم والعاب بلايستيشن من يوم يومه متولع بالالكتورنيات رغبته بعيدة كل البعد بمعرفة تجارة الاقمشة وتقي مااكدر اعتمد عليه بعده صغير وعوده طري وهالسنة هو غنوة باخر مرحلة بالاعدادية وراهم طريق طويل علما يكملون دراستهم
صفنت بداخلي ماعندي غير شهم ارجع اقنعه واشوف اسبابه شنو بلكت اقنعه بالنهاية اني طالع من الخطة والدي كال شوف اليلزم التجارة واني بظهركم بس رفض اقتراح اني اسافر واسكن هناك
خمنت لاكثر من سبب اهمهن بيتنا مابيه رجال اذا اني سافرت منو يبقى قريب الوالدة وغنوة
الوالد برنامج حياته وية والدتي وام شهم اسبوع هناك واسبوع هنا والحارث بدوامه يتاخر بالشهر الا ينزل ومرات اذا الوضع متعسف يبقى بدوامه اكثر من شهر الا ينزل والبيت اني متحمل مسوؤليتهم زايدتهم وناقصهم وحتى مشاويرها للوالدة اني متكفلها
صار العصر دخل شهم للمحل شكله من بعيد ماله خلك شمر روحه عالتخم وشمر غترته على صفحة مخنوك كتله بقلق
_ خيرك شهم دخلت لاسلام وكلام مو عوايدك يخوي
دنك يعصر براسه دايخ وحجى
_ انطيني من يمك بطل مي ريكي نشف
رحت للثلاجة طلعلته بطل ماي انطيته اخذه صكه كله والباقي طشه على وجهه
مبين صدك دايخ انتظرته يحجي ماحجى ماسالته بعد خليته براحته
سلمته المفاتيح والدفتر وطلعت حتى يلزم دوره
وصلت لباب المحل ما ارتاحيت رجعت عليه كتله بقلق
_ شجرالك شهم احجي لاتشغل بالي بيك
هز راسه وحجى مخنوك
_ ماكو شي بس شغلة نويت عليها وخايف لا ماتصير
ابتسمت اطمنه وكتله
_ انا اخوك.... وهيج واصلة بيك المواصيل ودايخ بامرها لعد وين اني رحت عنك
ابتسم يدخن جكارة وحجى متالم
_ انته بالذات مااكدر احجيلك..... باوعتله مستغرب
ارتبك وكال
_ قصدي ما اريد اشغل بالك فوك العندك اخذ راحتك حبيبي اني هسة ارتاح بس ادخن جكارة واشرب استكان جاي اكعد وزن
ضربته بجتفه بخفة وابتسمت
_ براحتك ويمته ماتريد تحجيلي كلي ، ترة ماكو شي وماله حل
طفاها بالمنفضة وحجى
_ الله كريم تهون
تركته وطلعت اتمشى خارج السوك للكراج ركبت سيارتي متوجه للبيت وسويت اتصال بغنوة جاوبتني تلهث
_ هاا يابة شلونك
_ زين الحمد لله ليش تلهثين وين جنتي عن موبايلج
_ يابة الدرج هلكني علما وصلت والموبايل سمعته من بعيد كلت خاف مالحك بيك اعرفك متصل من الرنة مخصوص وكحت هلكانة كتلها مبتسم
_ وشمخلية من نغمة ست غنوة
_ اممم رومانسيات وكذا تحجي قصة حبي الك
_ لعد شخليتي لعريس المستقبل يابة اذا من هسة طبقتيهن علية
حجت منحرجة مني لان اول مرة اشاقيها بهيج موضوع
_ مااتزوج يابة ابقى يمكم انته وامي وابوي والحارث شعندي بالزواج وانتم مالين عيني ونظرها
_ ديلة هاك استلم اريد اشوف يا هو الينطيج بعد واني جنت اريد حجة عليج حتى تكابلينا وتكعدين
ضحكت مستحية كتلها
_ هسة شجيبلج وياي قبل لا اوصل مابيه اطلع واخذج مرة ثانية تشترين مدام قريب انزل واجيبلج طلباتج
شهكت متذكرة وحجت
_ صدك يابة نسيت اكلك صديقاتي عزمتهن على عصرونية بالحديقة باجر نراجع دروسنا وهم نتونس واريد كيك من الحلواني حباب
_ خلي طلبيتج لباجر اوصيلج عليها هسة شتردين نمنميات الج
_ لعد جيبلي نسكافيه هاي العلبة الجبيرة لان خلصت العندي واريد كارتونة مكعبات الشكولاة هم خلصت وية النسكافيه وجيبلي قمر الدين وياك
_ تمام بعد شتردين مو اوصل وتكليلي يابة تذكرت شغلة
_ ههههه لا ماعندي شي كلهن عندي
_ يلة اودعناج
_ الله وياك
نزلت عالترابي للسوبر ماركت اشتريت الها طلباتها وطلعت عالتبليط مسافة قليلة وتبين السرايا من سياجها المنطقة هادئة الحمدلله واهلها وناسها كلمن حاير بعيشته محد اله دخل بالثاني
نزلت عالترابي مرة ثانية واستداريت لجهة الكراج انفتحت البوابة اتوماتيكيا دخلت ركنتها ودخلت من باب الكراج الداخلي عالحديقة الجانبية للسرايا
عيني بساعتي تذكرت الحارث اليوم يجي اتصل بيه من الصبح بلغني والوالدة هسة الكاها محضرة مالذ وطاب لجيته تنتظر نزوله يوم يوم
دخلت لجوة البيت من التكييف بارد نزعت غترتي ودخلت للمغاسل غسلت ايدي ورجلي وطلعت للمطبخ ومثل مامتوقع الوالدة تطبخ وية مليكا العشى.... مليكا مدبرة منزل عايشة عدنا من سنين اجتنا من جانت صغيرة مراهقة تحبها الوالدة لان خدومة وامينة وصاحبة مبسم مريحة ونعتبرها منا وبينا
دنكت عالوالدة وبوست اديها ردت السلام وعيونها قلقة
_ اكلك يمة اشو اتصل على اخوك مايجاوب ماشفته خاف صار عليه شي
_ لاتخافين جاي بالطريق اتصل بيه الصبح كالي الشبكة هناك تعبانة ويطلع ورة الظهر لجاي يعني منا وهيج يدخل السرايا.. حجيتها وعيني بساعتي احسب الوقت
ردت اصعد الدرج اجت وراي كالتلي
_ اكلك يمة هم حاجاك اخوك على شغلة بت خالك لو نسى السالفة من اساسها
وكفت اسمعلها كتلها
_ فتح وياي الموضوع وكتله مستحيل ابوي يوافق واحنا قبلك اخوتك الكبار مامرتبطين يكلي لعد ارتبط وخلصني زين هو شنو اخلصه الفكرة عن الزواج اني مامخليها ببالي وابنج مخلي حمامته مثل مايكول هو تحت جنحه من سنين حاجزها اله وفاضح روحه وفاضحنا
اكله انطي صبر يكلي صبري خلص شلون افهمه هسة هذا شغلته صعبة وابوي راسه والف سيف مايخطبله من خوالي عناد بيه
صعدت جم درجة وكتلها متذكر
وحتى هذا شهم مو خالي نية ومبين مرتب امره
ولدج يتمعشگون واني طايح بنصهم
( صيغة الجمع المذكورة بكلمة ولدج هم يعتبرون الطرفين ماكو تفرقة بين الام عن ابنها بالضرة او الشريكة الثانية متعايشين تحت سقفين مبني باسس صحيحة للعائلة السليمة بدون تنغيص ومشاكل بالذات ان ام شهم وام الاكثم من النسوان القديمة العاقلة ماكو بينهن دوافع غيرة واللذي منه)
صعدت لغرفتي غسلت وبدلت طلعت انشف بشعري وبراسي الف فكرة اولها مواجهة اليوم وية عمي كدام الكل لازم اخلص من هالسالفة وتفض لان راسي بلش يصدع من ورة فصوله
لبست دشداشة رصاصية تصميم اماراتي ولفيت الغترة بطريقة بصراوية "جراوية" لبست ساعتي وتعطرت ونزلت
واني نازل شفت الحارث بنص الصالة حاضن امي ويكلها
_ اشتاقيتلج ناهد وكلبي عطشان ومفرفر عليج ابتسمت لمداهره وياها ضربته تانبه على سوالفه
وحجت
_ ادري بيك ماخذ راحتك ابوك مو هنا.... هاي لوشايفة كدامك ماحجيت هيج
شفت غنوة بيدها جيس بسكويت مملح تاكل منه
وتضحك حضنها ورجع اخذ منه صم اكله لگمة وحدة وكال لامي
_ تعبان يمة وميت جووع الدرب هلكني
كتله مشتاقله
_ ياا هلا ومرحبا بهالصوت نازل من يومين وهسة ذكرت اهلك
شبكني وحجى يستميل خاطري
_ شسوي غير حمامتي هم تريد حصه مني لو انتم ماخذيني كفالة كاملة واني مادري
الله وكيلكم مقسوم تلث اقسام مدري اربعة مكان شغلي وشقتي وحمامتي بصفحة والبيت الجبير بصفحة
هاي عدا عماتي يومية تخابرني وحدة منهن تعال غداك يمي لو عشاك يمنا واذا جازفت ورحت لازم ثاني يوم مجاز مايتركني لمن تطلع روحي وهنة شابعات مني تمطگ لكدام علبو تشبه ابوك بشبابه
ضحكنا عليه كالتله امي
_ ههههههه غير حنينات عليك لو موزين يسون ويدللنك
اخذ جنطته وصعد كاللها يداهرها
_ انتي ابقي بهاي سوالفج ابقي تاليها اجيج وجايب اربع نسوان منهن كلمن حاطها بصفحة واخليج مناحر وية الجناين
هزت ايدها على سوالفه وراحت للمطبخ تشوف الطبخ كعدت بصف غنوة خليت ايدي على جتفها بستها من راسها وانبتها
_ ليش تاكلين من هذا موجاي العشى وتنحرمين منه
_ هذا تباشير للعشى يابة مثل مايكولون احماء
_ اليسمعج يكول عظامة راح تاكلين الاخضر واليابس كدامج
_شسوي لعد يابة هاي كلما اكل لكمتين اشبع بس من يجي تقي اكل بعناده لان مايخليلي وهو سريع
_ هههه ذكرتيني بيه المسكين وصاني اتصل بيه من يجي الحارث يتعشى هنا حتى يفلت من الكعدة وية ابوي يكلي حصرة عليه الزم موبايلي الكاه طاكني بخزرة شيريدنا طلاب وكاعدين قصاص كدامه
طلعت موبايلي اريد اتصل بيه سمعت صوته بالحديقة يهش بالدجاج يضربهن بحصو يخلي طشارهن ماله والي
طلعت امي بيدها الچفچير مالت الطبخ مستغربة عبالها صوت جلاب هجمت على طيورها من سمعت صوته طلعتله اسمعها تتعارك وياه
_ولك تقي بيش طالب طيوري تفزع بيهن ضاعت عليك بيبان السرايا لو تعودت تفزعهن الا تجي
كاللها يقشمرها
_ يمة شفت جلب يتصيد عليهن من بعيد وطردته
كولي تقي موخوش ادمي
_ يا يا وينه ولك الجلب اشو ماهوة
طلعت لبرة اباوعلهم وتبعتني غنوة اسمعه يكللها
_ ولى راح..... هسة الا تفطنتي عليهن احمدي ربج لحكت عليهن......... بعدينـ.....
كالتلها غنوة بعناده
_ يمة جذاب والله ماكو كل جلب بس هو يعيل بطيورج ويضربهن حتى يصيحن وياخذ البيض مالتهن
غمزلها رادها تسكت ماسكتت زادت مانقصت بعناده
كالتله امي تتاكد منه
_ ولككك تقي صدك تحجي واني اكول ليش الدجاج كاطع البيض طلعت انته تاخذهن
_ هاي شبيج يمه صدكتيها بسرعة ترة هية هم تجذب ومرة كسرت بيضاتج بالغلط شمرتني بطابوكة وانكسرن تالي غطتهن بالتراب حتى ماتشوفيهم
التفتنا كلنا لغنوة لكيناها تاشرله بعيونها من شافتنا كالت لامي تضيع سالفتها
_ موقصدي والله صارت بالغلط....... بس هو لا متعمد وحتى البيض يخليهن بجيوبه اذا تردين اتاكدي منه من يطلع وشوفي بعينج
حسيت امي من صفنت عليهم داخت المسكينة بمنو تصدك بيهم كلمن يحجي بصفحة بيهم تالي عطت بيهم
وكتلهم ادخلوا الجو موت حر وراها تفاصلوا دخلنا كام ياشرلها بيده بسيطة وكالي يهز بيده
_ اخوي وحزام ظهري عزمتني عزيمة مانساها الك طول عمري
_ هههههه ها ولك تهددني
_ شهددك والله لو شايفني شلون احاجيه اليكول كاعد بتحقيق اخذله صفنة ساعتين الا كالي روح وحتى من حجاها نسيت عليمن اروح كطع روحي بالجواب الله وكيلك والعباس كفيلك
ضحكت عليه شلون يحلف بثقة
( لهجة تقي واخوتي الباقين اخذوها منا وتعلموا اللهجتين بطلاقة والدي جان حريص يدمجهم بالمجتمع العراقي البصري وزياراتهم للبصرة جانت طويلة خصوصا بوقت العطل جان يستغل هالشي
وجان بكل جلسة ديوان يشدد حضورهم خمستهم
يتفطنون على الاوضاع والاعراف من كل جانب
كدر خلال سنوات عمرهم يغذيهم على منهجية عوائلنا واساليب حياتنا وحفزهم يتعلمون لكنتنا بتشجيع منه كذلك عقيدتنا بحب آل البيت عليهم السلام شي منتهين منه
شهم وكرم وآسر بقوا متحفظين على لهجة بلدهم الام ويستعملوها باوقات تحتاج منهم مثل وظايفهم لاسر وكرم اما خلدون فـ متذبذب واكثر شي ميال للهجة اهل عجمان
اما تقي فـ هذا داخل بعراقة البصرة واهلها للنخاع مايسولف بغيرها ابد
تركته يداهر بغنوة وكعدت اتصفح موبايلي لكيت من ضمن الاشعارات المكتومة رسايل لبشرى
استغفرت بداخلي شكد عنيدة هالبنية وعدها طولة بال دخلت عالرسايل لكيتها ناشرة اشعار غزل لصفحتي وراها كاتبة "بلهجة اماراتية بحت"
_ اكثم اذا ماباتجاوب ايي لمحل شغلكم واشوفك ولاتكول ماحذرتك
صعدت للرسايل هم دازة اشعار غزل ومنها كاتبته بيدها طلعت من الصفحة من سمعت صوت الاذان كمت استغفر وداخلي يدعي بالستر الها ولاختي ولبنات امة محمد
مهما يكون صعبة بمجتمعنا هيج فصول ومانتقبلها
نهائي....... ياما وصلت الدم للركب وفصول وكعدات وعشاير من ورة هيج امور
والكارثة بشرى مو اي بنية تصير بنت عمي نواف صديق والدي الروح بالروح اصغر بنية ببناته والباقيات الله يستر عليهن كلهن متزوجات الا هاي المستورة طايشة ومبين من عمر غنوة مراهقة ماتحسب لتصرفاتها
نزل الحارث لابس گلبية يرفع باكمامها كتله واني اتمشى لبرة
_ خلونا نروح للمسجد نصلي وراها نجي نتعشى
طفر ابو بطن ورانا حجى
_ اكلك اكثم اني ميت جوع خلينا نصلي هنا اخيك
والله الدرب يكطع النفس
زنخه الحارث من ياخته وطلعه ويانا كاله
_ لاتصير طايح حظ وامشي هسة مانتاخر واندار على غنوة جانت متشمتة بنظراتها على تقي
_ غنوة نجي نلگى العشى مصبوب وخلن سفرة بالكاع مانريد عالطبلة اخيج ترة تلعب روحي منها
_ صار بعيني
علما رحنا صلينا ورجعنا لكينا الوالدة مجهزة كلشي
صينية المفطح تفتح النفس للاكل وتشريب بصفه والتمن وحبشكلاته عليه وياها مرك وسمج شوي ولبن خاثر وطرشي وخضروات نعمة من كريم
الجماعة صرفنوا ارداناتهم للاكل ووكعوا عالمفطح مواچيل هو وتقي وتخموها بلبن الخاثر احنا كملنا ورجعنا يمهم وهمة يكرطون عظام كالتله غنوة تنغز لتقي لان ياكل بشراهة
_ دكافي مو خلصتها للصينية ارحم العظام خطية
_ معليج من اكل من سفرتج عود احجي
اجت الوالدة انبتها على حجايتها وكالتله
_ معليك بيها يمه اكل الف عافية
صم ايده وضربها ببطن جفه الثاني عود بعنادج
اجه الحارث ينشف ايده ووجهه المنشفة وكعد ويانا يشرب جاي من ايد مليكا سلمت عليه تعاتبه بلغتها ليش ماسال عنها كاللها يبررلها
_ حقج عليه ملوكة مرة ثانية بس اوصل اترك امي الي ماسوتلي كل فايدة واجيج واسلم عليج بعد شتردين
ابتسمت مقتنعة بتبريره وراحت مصدكة كالتله امي متخردلة
_ هاي عليمن ولك.... بس لاتقصدني
شرب چاي وكاللها
_ لا اقصد على امي الثانية..... اثنينجن مامحصل منجن كل فايدة
كامت غنوة تشيل السفرة وية مليكا وتقي يساعدهن
كالتله تضحك
_ هسة غير نفتهم عليمن اسمك ماراضي علينا
باوعلها مقلص عيونه وعدل كعدته عالتخم رافع رجل ومنزل رجل
_ يعني بربج يمة من اخذتي هالرجال ماعرفتيله زاغور مافهمتي وين نقطة ضعفه لهالرجال لاتقنعيني ابوي مابيه نقطة ضعف عد وحدة بيجن
اروح لامي فاطمة تضحك وتخلصها عليه اسكت وعيب..... اجي يمج مخلصت
لمتابعة باقي الرواية زوروا قناتنا على التليجرام من هنا
