رواية في حجر الافعي الفصل الرابع 4 بقلم شمس العراقيه

رواية في حجر الافعي الفصل الرابع 4 بقلم شمس العراقيه

هاجر 

ـ ضلت نمارق يومين وبعدها راحوا الله وياهم هواي ضجت وراها تونست وياها رغم جفصاتها وقسواتها بالكلام نمارق شخصيتها حلوه ونفس الوقت مو حلوه 

أمل ـ والله هل نمارق ما ينكدر إلها عبالي فقيره صايره وكحه وحجايه  

هاجر ـ اي هي من يومها هيج 

ـ شبيج وجهج مكلوب شنو ضجتي عليها 

ـ تمنيت عندي أخت تكسر عليه وحدتي نمارق حسبت اخت وصديقه وبنت عم رغم مدلله بس أبداً ما تكبرت ولا بالغت بدلال عمي الها وكاسره خاطري ضايعه بين عمتي ليلى وعمي صائب

ـ لاينكسر خاطرج بس ؏ نفسج يمه محد بحال احد عدها ابوها بظهرها متشوفينه شكثرر يحبها ويخاف عليها رغم امها مو يمها بس ما مخليها تشعر بهل الشيء الله يسعدها ويه ابن عمج انس كون يقدر نعمته وما يتبطر عليها 

ـ بس اللي فهمته منها ما تريد تتزوج وما موافقه عليه معقوله عمي صائب وبيت جدي يجبرونها ؏ الزواج منه 

ـ وليش عيني متوافق شبي، شو ولد مثل الورده ودارس بالخارج وتعبان ؏ روحه صحيح امه وكحه وعرمه ولسان وما تنجرع بس عندهم امكانيه احتمال يطلعها بيت لوحدها الظاهر هي اللي تتبطر ؏ نعمتها شوفي اني احبها واعزها بس الدلال مطلع عينها والزواج ستر وغطا ياريت يتقدملج بدالها بس قسمه ونصيب والكاتبه الله يصير 

ـ هاا يمه مبين تريدين تخلصين مني شنو ثكلت عليج 

ـ لا يمه شتثكلين أنتِ شمعة البيت شعدنا غيرج بس البنيه هم ؏ الكلب والزواج ستر الها والاهل يرتاحون من همها والله يكتب الچ النصيب الزين ورجال يحبج ويخاف الله بيج 

ـ بس أبتسمت الها بداخلي لهيب وجمره راكده بصدري مخنوكه خنك احس مثل الحبل ملتف ؏ ركبتي معقوله وكعت بحبك لهل الدرجه وصلت مشاعري لاعماق روحي 

" طلعنا أنه وأمي وملثمين نزلت اللثام وامشي بصف امي الكاع مالتهم بيها كم واحد مطشرين الظاهر يسگون الزرع بهل الاثناء اجتت سيارتهم ونزلوا منها اثنين وكفنا نشتغل انه وامي بكاعنا وهما بعيدين عنا عين ع امي وعين عليهم ركزت نظري واحد واكف على صفحه وصافن بأتجاهنا اكيد هو 

" فزيت ؏ صوت ابويه حسيت گلبي وكف اخذت نفس وكملت شغلي لبدت بصف امي خفت يحس عليه رغم ماكو شي بس انه خوافه لابعد حد 

صباح ـ شلونجن 

أمل ـ شتشوف أنتِ نشتغل ونعمر اللي خربوا الما يخافون الله كومه خسرنا فلوس حسبي الله عليهم 

ـ كولي الله يا مره شنسوي ماكو حل ثاني علمود نخلص من الطلايب ويه صكبان وولده خاف وحده من نسوانهم تحاجيجن دربالجن تردن السلام امل ما اوصيج طرديهن كبل ويا ويلج مني اذا حاجيتي وحده منهن 

ـ اللي تريده يجرالك 

هاجر ـ يحجون بقساوة عليهم كلبي يوجعني حبيتهم رغم ما شايفتهم بس هو شفته وريتني ما شفته ساعة السوده المصخمه اخذ عقلي دوم افكر بيهم واحب اعرف اخبارهم ومن ينذكر طاريهم يفز كلبي . 

يارب اذا بي خير قدمه والبي شر بعده عني وصفي عقلي

مر كم يوم وحياتي بين شغل البيت وبين اساعد امي بالزرع والحلال جنت واكفه ؏ المرايا اعدل حجابي شفت قلم الكحل مالت امي خليت شوي بعيني وفزيت ؏ صوت نورس تصيح عليه 

نورس ـ وين صرتي يالمكموعه يلة عاد اريد املي قبل لاترد امي من البستان وتضل تحجي عليه فضيناا عاد 

هاجر ـ اجييت أجييت طلعت عليها شلونج نورس بوزت وكلبت وجهاا

خير شبيج كلبتي وجهج بوجهي 

ـ من شاف أحبابه نسى أصحابه شفناج اليوم وشفناج البارحه ويه هذولاك الناس ضحك وسوالف وتمشون بكيفكم بالزرع وانه طوفت سفينتي هيج ولج بعتي صداقتنا بنتج عمج اللي بس بالعطل تذكرج وتسأل عنج

ـ حقج والله اعذريني والله هي حبابه ياريتج اجيتي يمنا متاكده بس تكعدين وياها مره وحده تحبينها ما اعرف ليش ما تودينها 

ـ هيج من الله ما احبها وبعدين اخذتج مني بالجذب مسألتي، المهم عوفينا من سيرتها هسه امشي وعندي الج مرسال ما انطي الج اذا ما اطلع روحج يالخيانه يالبذاته 

ـ خليت إيدي ؏ كلبي وتمتمت مرسال شنو 

ـ مسويه روحج غبيه وتضمين العندج 

ـ شقصدج شضامه يمعوده 

ـ هاا متأكده 

ـ اي متأكده وهالمرسال خلي الچ

ـ بس المرسال جايي من مكان بعيد يعني يصير ارجعه وهو كاطع الدرب من بعيد وسفه عليج يا هجوره؟

ـ مشيت كدامها سويت روحي ما مهمته لأمر المرسال لن نمارق حذرتني ما اجيب طاري لاي احد من عربنا افضح روحي بس هاي مو اي احد هاي نورس صديقه عمري وما اظن تكسر بيه لا كلام نمارق مو صح 

ـ شبيج أجتج الجمده وشردتي غاد خايفه تحجيلي 

ـ من شنو اخاف قابل شمسويه شو كمتي تخربطين بسوالفج نورس 

ـ مع الاسف عليج خايفه. من عندي وانه صديقه عمرج وبير أسرارج وبعدين انه جنت موجوده من اجه ويسأل وعرفت غايته لن الفطير عيونه ولهفته من يحاجيج فاضح روحه بدون ما يحجي، الحب ما ينضم يا هاجر الحب يظهر ؏ ملامح الوجه وأنتي صار ايام مختفيه وتتهربين من كل بنات العرب لن اعرفج خوافه 

امشي نتمشى ونروح يم النهر وناخذ راحتنا بالسوالف لن اهنا الحياطين الها اذان

ـ مشينا وكلبي يطبل لوحده لزمت ايدها واحنه نمشي امانه الله ما اريدن احد يعرف لن الصار غصب عن كلبي ولحد الان ماكو شي مجرد نظرات عابره 

ـ شبيج هاجر والله ازعل منج وفلا احاجيج بعد وادري بس نظرات لن مناف يخاف عليج وما يريد اذيتج وصاني ادير بالي عليج 

ـ جاوبتها بلهفه شوكت شفتي وحجيتوا 

ـ من أمس ويكولج لو اعرف عربنا كلها ضدي تصيرين حرمتي وما اجوز منج 

ـ هو هيج كال اسمه مناف لعد يا زين اسمه مسحت دمعتي اللي ما اعرف يمتى نزلت اي نورس شنو المرسال 

طلعت ورقه من صدرها وخلتها بجف ايدي قريتي 

ـ وسفه عليج وليش اقراه قابل اليه لو الج هاي خصوصيات ومالي دخل بيها واذا الكم نصيب الله يجمعكم بالحلال وكل هذا واوصيج عينج عينج الناس من نظره العين تكشف المستور دربالج هاجر والله ساعة اجه طلعت بي كش رزايل وطرد وخطيه كعد يقنع بيه وحيل يخاف عليج ويمشي ويوصي 

ـ اعذريني حقج عليج ابتسمت وكعدنا يم النهر اني كعدت على جانب لوحدي وكعدت اقراها واول كلمه احبنج من زمان اشوفنج وكل مره ابتعد عن عربكم بس عيونج نكعن بكلبي هنا كربني صوبج رغم دكم بس احبهن ما اعرف اعبر عن مشاعري تجاهج يا بنت الناس بس انه رايدج بالحلال وما اجوز منج الا تصيرين حرمتي شحلاتج وشحلات طولج يالحلوة . 

ـ دمعت عيوني وصفطتها وضميتها بنص روحي هذا يحبني من زمان يا ترة من متى شايفني معقوله من تصير الطلايب يمرون بعربنا بسيارتهم جان يشوفني وانه مو داريه عن هالحب 

نورس ـ ضميها زين وتعالي لاتبقين عازله نفسج 

هاجر ـ اجييت يمها وسحبتني من ايدي وين تردين بيه 

ـ امشي اكو حطب متروك امي مره كالتلي عليه بصوب البساتين اريده لتنور خلصنا حطب يعني الجماعه يصيرون كبالنا بلكت الله وتشاوفون 

ـ لا نورس ما اخاطر هالمخاطره انه حاطه رويحتي بجفوف ايديه ما اروحن وامي ما تقبل اوصل الكاع لن ولدهم كبالنا وابويه حذرنا تريد تبليني خلينا يمعوده على نظره لاتخليني اتندم ساعة حجيتلج 

ـ هواي حجيتلي لما هو يجي ويحجي انه ما ادري امشي لاتضلين خوافه ماكو احد كلهم بالخضره من يقرأ ويكتب وبعدين احنه نروح نجيب حطب ونرد 

ـ ضلت ترطن برأسي طاوعتها ومشيت وفعلاً جان ماكو طير الطاير جوله بس سيارتهم كبالنا ويمها ثلاث زلم يعني اكيد اخوانه عرفوا ما معقوله ما كشفوا اي عبالج كلها مثلج نمارق ونورس والله يدري منو بعد. 

" كامت تجمع الحطب وانه واكفه اراقب الها رغم ما مسوين شيء بس مامرتاحه كلبي يطبل سمعت صوت ماعز والتفت حلالهم قريبه على كاعنا متعمد يخليها تجي لهنا يلة نورس خل نعاود فدوة خفي ايدج 

ـ اي ثولتيني ترة كلشي ما مسوين شبيج فاضحه نفسج بنفسج استقرري ركدي بكاعج وصمخ اي والله الحب مو مال هيج شكولات طوكعه ومن النمله تخافين 

ـ تحجي وانه خايفه بس اريد ارجع وفزيت ؏ صوت خشن انداريت بخوف هو اي هو واكف ومبتسم وبيده العصا يطرد بالحلال مالتهم 

مناف ـ شلونج ينبت 

هاجر ـ روح منا روح 

ـ تطرديني وسفه عليج اي عليمن تطلعين ابوج منو 

ـ لا اسويلي مشكله روح الله يخليك 

ـ ماشي رايح وصلج المرسال 

ـ هزيت رأسي وأبتسمت اي وصل بس انه من خوفي عليك طردتك من كاعنا مو تاخذ على نفسك 

ـ لا يمعوده تفداج الكيعان واهلها يلة رويحتي انه رايح 

ـ اخذهن ورجع الكاع مالتهم وضليت اباوعله لحد ما اجه واحد من اخوانه وشكله يحجي عليه بس لا صارتله مشكله يلة خل احير بروحي ندهتني بكفتي شكرا نورس

ـ العفو خيه يلة ساعديني خل نرد قبل لا احد يحس علينا 

ـ عاونتها بعدني ما شايله وياها واجه ناجح يتمشى صوبنا بلعت ريكي وباوعتلها اخوج شجابه بس لا شافنه 

ـ وين شافنه صار نص ساعه من راح الزلمه شوفي حتى راح بعيد ناحية الكاع مالتهم سوي روحج طبيعيه احم هلا خويه هلا ناجح 

ناجح ـ لا هلأ ولا مرحبا ولا بارك الله بيجن شعدجن لوحدجن تفترن ورا البساتين 

نورس ـ يعني متشوف نجمع الحطب شوفة عينك 

ـ لا اشوف مو اعمي بس ليش وحدتجن ما جان تكولن طلعتن خطيف كصف لعمارجن يلة كدامي مره ثانيه اذا المح طول وحده منجن هين احشش رجليها حش 

هاجر ـ مشينا وكظه الطريق علينا غلط وفشار غسلنا غسل وصلنا البيت وافتركنا وهو باوعلي بنظره حقد شبيك هيج تعاين لي جن كاتله ابوك 

ناجح ـ لاااا ، يلةةة انكلعي لبيتكم 

هاجر ـ رايحه وماله داعي الغلط والفشار انت مو ولي امري وتحاسبني عندي اب وام هما يتحكمون بيه واني رحت ويه اختك عاونتها احنه صديقات وحده تعاون الثانيه شنو جديدين عليك ما تعرفنااا قابل 

ـ بصياح لاااااا 

ـ ماله داعي تصيح اخذتنا بالهرج دفعني وانطخيت بركن الحايط دخل وركع باب بيتهم قوي الا فززني شبي هذا تخبل خبال اي والله طايره روحه لن ما اباوعله انت وين وانه وين. 

" دخلت لكيت امي راجعه وجاي تسوي الغده وتبجي شبيج يمه منو وياج 

أمل ـ أبوج توالني الغلط كدام النساوين فشلني كدامهن 

ـ ليش شبي شصاير احجيلي

ـ سعاد خطيه اليوم جايه لاهلها لن ابوها مريض وجانت جايه ويا اخواتها للخضره وشفناها وسلمنا عليها وكعدنا نحجي ونسولف واجه ابوج اخذني سحل من كدامهن 

ـ سعاد زوجة حناش مره كلتيلي عنها من عربنا 

ـ اي هي خطيه صارلها شكثر ما جايه اليوم عمتها جابتها هي وحماها اشهاب جابوها على ابوها مريض وموات 

ـ الله يصلحه ويهدي ماله داعي كل هذا وسعاد شعليها المسكينه غير انه هي تكون زوجة حناش شنو جريمه لو ذنب ما يغتفر 

ـ هذا حال كل وحده تكون نصيب واحد من عربهم تكون منبوذه طول عمرها ومحد يود وجودها والله على خلاف من الاجداد هما وياهم ما تخلص هالقوانه حسبي لله ونعم الوكيل باللي كان السبب انه هم صوجي طاوعت ام رياض ورحنا سلمنا عليها شكد فطيره ورعنه 

هاجر ـ تحجي وحجايتها دكن وزن بنص عقلي كل كلمه منها عنهم وعن عربنا تنخل كلبي نخل انه شورطني بهل العشك طحت طيحة البهيمه.  

" قررت ابتعد عن هالدرب لن ماله نهايه وسبحان الله صار موقف سعاد وامي جن يعلمني شنو مصيري وشنو نهايتي وانه وحيده اهلي يمه غير اموتن وراهم.؟؟ 

_____

إشهاب 

ـ نشتغل ومناف بغير عالم باله مشغول ويشتغل بدون واهس لن طول الوقت عيني تراقبه ما اريده يوكع بدرب العشك لن ما وراه بس الدم عربنا وعربهم واحد يثرد بدم الثاني احنه وياهم ؏ خلاف من الاجداد . 

كعدنا أستراحه امجد روح للبيت جيب المواجيل 

امجد ـ تامر خويه 

إشهاب ـ كعدت بصفه ليش تجيب العين عليك انه شحجيت وياك مو كتلك دربالك

مناف ـ ما مسوي شيء بس عيني تشوف طولها وتريد مني ادير بالي خيي وكع الكلب بحبها مو بيدي انه من زمان اشوفنها بس كلت احتمال مجرد وحيده عجبتني حالها حال هالنسواين اللي اشوفهن بس يوم عن يوم تعشش بكلبي اكثر حبيتها من النظرات 

ـ بنت منو 

ـ اذا كتلك متصدك وتنصدم واحتمال تكوم تحجي عليه 

ـ كول 

ـ بنت الحجي صباح ابو هاجر 

ـ لا يا طايح الحظ شورطك متكولي 

ـ تورطت وخلاص، انه عندي امل بوكتها سعاد حناش من اخذها مو جانت من عربهم ووافقوا صحيح سالفه دخلت سيم وجيم وجرت ايام وسنين يلة وافقوا بس بالاخير حصلها واخذها وما خذلها ولا خذل گلبها 

ـ وتزوج عليها أربع نسوان !! وهيي اللي عافت أهلها وابوها وامها وكل عشيرتها علمود حناش هذا واحد يستاهل هيج تضحيه وبنت حجي صباح اذا اخذتها صدك حياتها تصير اتعس من سعاد لن عدكم المره مثل العبيد 

ـ مستحيل اصير مثل حناش كلبه ميت وقاسي وما عنده قطره رحمه مستحيل اكون مثله او اتشبه بي 

ـ بنت الحجي صباح تباعد عنها لاتسويلنا طلابه ويه ابوها البنت وحيدة اهلها خاف الله بيها وانت وهي تعرفون نهاية هالعشك شنو، ولو تبصم بالدم ما تحصلها شيل هالتخيلات من راسك المتبن 

ـ الله كريم 

إشهاب ـ ما مصدكه بس شسويله حرت وياه الزمه وادكه هو زلمه شكده شكبره عيب من الاوادم، خلصنا شغلنا وردينا البيت توجهت لغرفتي تسبحت وصليت وتمددت 

أندك الباب صحت منو 

رحمه ـ انه خويه جبتلك الزاد 

ـ تفضلي خويه ليش تعبتي رويحتج 

ـ لا صدك جذب انت خيي والله اللكمه متفوت اذا انت ما تاكل تفضل ومد ايدك مركه للحم يحبها كلبك طابخه صايره فتيت عليك بالف عافيه 

ـ الله يعافيج خويه 

ـ من تخلص ابويه يكولك خل يجيني عنده حجايه وياك

ـ ان شاءلله بس ما عرفتي شنهي حجايته 

ـ علمود سعاد توديها لبيت اهلها ابوها مريض 

ـ خير ان شاءلله، راحت وسميت بسم الله كملت وشلت الصينيه وتلكتني سعاد رافعه خمارها وجهه مزورك هاي شصاير بخلقتج 

ـ اخوك الله يصلحه، انطيني عنك 

ـ اخذتها ومشت بعدني ما ماشي طلع حناش ليش هيج مزورك حرمتك حرام عليك يا رجال خاف الله بنسوانك ترة مو بهايم عندك 

ـ من تزوج تعرف ضيم الحرمه شلونه وهاا اذا وديتها لبيت اهلها بلغ اهلها بعد ما تصيرلي حرمه خل يشبعون بيها وتنسى عندها خلفه لو تتعلك من هدب عيونها متشوف ولد من ولدها 

ـ بس سعاد مالها ذنب ابوها مريض يعني اللي تتزوجك تنسى عندها اهل الله وعباده ما يرضون بعمايلك السوده

ـ هذا العندي 

ـ مشه مستعجل وراح للمشبج مال الحيايا مالته ناقص عقل فلا يصير برأسك خير، توجهت المضيف لكيت ابوي كاعد ومصلح بصفه الله بالخير ها بويه داز عليه 

ـ اكيد عرفت ليش دزيت عليك 

ـ اي بويه وحجيتله سوالف حناش وكام يضرب على رجليه يعني اذا وديتها ما ترجع ما يقبل شلون بهل الحاله 

ـ من يومي ما رضيت ﻋلى زيجه بس شسويله عناد المطايا وهسه الرجال واصل فراش الموت وسعاد كطعت نفسها عليه، وديها وما عليك خيولي كم يوم وارجع جيبها خليها عليه شنو على كيفه 

إشهاب ـ تأمر بويه وفعلاً تجهزت وامي عسله اجت ويانا واخذتها بيت اهلها امي عسله نزلت وانه نزلت سلمت عليهم وابوها المسكين تشكر من عندي الشكر لله عمي خلوها يمكم كم يوم واعاود اخذها سعاد ابتسمت وفرحت كسرت خاطري ورجعنا انه وامي عسله واول مره نضل لوحدنا كسرت الصمت وكالت 

عسله ـ ما ناوي تستقرر تضل هيج 

إشهاب ـ ليش شبيه 

ـ ما ابالك وحيده نزوجها الك

ـ لا ما ابالي الله وايدج تلكين اليه حرمه 

ـ وليش انه الكالك ومنو يكول ترضى تزوج من عربنا احتمال تريد بدويه من اصلك واصل امك شنو نسيت نفسك انت ابن البدويه 

ـ لا ما نسسيت، بس انتي لاتنسين انه اصلي نفس اصل ولدج أخواني وابونا واحد، انه مو بدوي بس امي بدويه 

ـ لا تعيش بأوهام امك اللي رسمتهن بعقلك انت ابن البدويه وبس وزواج امك من صكبان نزوه وانت صرت غلطه لدرجه بس خلصت اخذتك وشردت لاهلها لن متعلمه على اصلها وعيشتها واهلها 

ـ ليش رجعتوني لعد 

ـ انه ما وافقت ؏ رجوعك ولا أخوانك أبوك هو اللي قرر واجه اخذك من حضن امك وحرمك منها لاتحملنا الذنب الذنب ذنب امك اللي ما عرفت تحافظ ؏ نفسها 

ـ وكفت السياره للحظه ردت اكلبها بالكوه تماسكت أعصابي 

ـ شغلها وخل نوصل بخير وسلامه 

أشهاب ـ ما جاوبتها بعد شغلتها ووصلنا البيت نزلت وركعت الباب بقوة غمضت عيني بقوة وفزيت على دكه الجام مناف فتح الباب وصعد هاا خيرك مسبتشر علومك 

ـ والله علومي كلها خير 

ـ اعلمنا بيها وش هي 

ـ يا اخي من تحجي بدوي شحلاتك 

ـ محد يحبني احجي بدوي متشوفني اتجنب بعض الكلمات هسه ما علينا شعندك 

ـ شفتها وحجيت وياها يا اخي العشك بالهزيم والخوف شحلاته لهفته متنوصف حذر خايف كلبك يدك روحك مشغوله هيج اتمنى بس بيها اضل منشغل وهايم بخوفها

ـ اي لما تجيب علومها وتنزل رأسها بالطين وتروح بالرجلين هذاك الوكت خل العشك يفيدك ويفيدها يمتى أتوب وتعقل وتجني عقل انه شنو رطنت وحجيت وحذرت شو ما تأخذ كلام، تأفف وصفن كفخته على رأسه هذا شغله وضربته على كلبه هذا عوفه ما وراه بس شلعان الكلب 

ـ هم عشگت بحياتك 

ـ لا والله 

ـ عليك الله 

ـ لاتحلفني ميحتاج 

ـ وصلت لهل العمر ما يوم وحده هزت گلبك الطيب الحنين ما عشكت ولا مره ولا مره 

ـ ولا مره كافي تلح بالسالفه 

ـ ليش ما عشكت شناقصك تراك شحلاتك 

ـ كلبي مو فارغ !! 

ـ مو فارررغ ما فهمت مو تكول ما عشكت فهمني 

ـ يلة انزل وكافى تلغي شكثر ترطن لخاطر الله 

ـ ما اجوز منك الا تحجيلي منو سعيده الحظ تارسه هالكلب انه مو حجيتلك 

ـ اهوووو يا مناف شكد لحوح يلة انكلع من يمي مشه وهو يضحك وفرحان ما اعرف شنصحك وخايف عليك وعليها لازم اشوفلي حل الهم اثنينهن يبقى هيج يدمر روحه ويشيل خطيتها وكون بشيء نصير بشيء ثاني 

" دخلت الغرفه بالعاده ننجمع بيها كلنا انه واخواني حناش منجطل وصافن بالسكف والحيه بحضنه وامجد يلاعب بيها من بعيد عوفها لاتلدغك 

أمجد ـ يكول ما تلدغ احد بس سعاد اذا ترجع تفرغ سمها بيها ما اعرف شلون درسها وحفظها الدرس 

مصلح ـ كلهن الحيايا مالته ما يصيرين مثل مالت الحراسه يا اخي تعدال مية جلب شرسه ونبها وذكيه تكول بيها جن 

مناف ـ يا خوفي حناش تاليته ونهايته ؏ هالحيايا المربيهن هذن ما يتأمن ولا ينوثق بيهن 

امجد ـ سكتوووا هسه يهدها علينا ويخلي طشارنا ماله والي واحد يركع الثاني بس تدرون شحلاتهن بالمشبج بس الواحد يضل صافن ويمعن نظره بيهن

مصلح ـ اكعد واسكت ولا تكرب صوب المشبج لاتصير طعم الهن ، كوم شوف الغده وين صار ترى انسلكنا من الجوع ادري نمتن وحدتهن بكد البغل شغل عمل كوم شوفهن لا انه اكوم انعنع عظامهن عظمه عظمه 

أشهاب ـ امجد راح الهن واني ما شاركت بس اتسمع لحديثهم وعاينت لحناش طالت صفنته نهض ولافها على ايده ودخل امجد وياه ايه بنت حناش الجبيره شايله الصينيه خلتها كدام ابوها ضل صافن عليها واشرلها تكعد 

ايه ـ تأمر بويه 

حناش ـ اخذيها ورجعيها للمشبج 

مصلح ـ وين ترجعها شمعرفها تريدها تموت كل عقلك حناش جيبها انه اوديها وارجعها المشبج 

حناش ـ لاحد يتدخل مالكم شغل يله كومي 

إشهاب ـ باوعت النا بتوسل ودمعتها ترست عيونها ما ردت اتدخل بس خفت عليها نهضت وجريتها صوبي كوم انت رجعها عوف البنت بحالها لاتعاقبها بذنب مالها بي 

حناش ـ وانت ليش تتدخل شكووو حاشرررر خشمك ياخيييي انت شكوووو احد كالك انت مصلح اجتماعي توزع نصائح وما عاجبك العجب والظلم ما ترضى بي منو انت متكولييييي منو انت 

إشهاب ـ عمها 

بضحك ـ عمها عمها اي صدك انت عمها من متى صرت عم شو ما عندي علم 

مصلح ـ حناش كااااافي مصختها شنو هالحجي على سالفه متسوى تمالخون بينكم 

حناش ـ اللي يفك حلكه الف هالحيه واخلي يجرع الموت انلصمواااا، يلةةةة عوف البنت وما الك شغل بخلفتي وهاي اخر مره اشوفك تتدخل بشيء ميخصك 

أشهاب ـ جريتها وطلعتها برى روحي عمي روحي يم اخوانج واخواتج 

ايه ـ بس عمي وابويه شلون اخافن منه

ـ كتلج روحي ولاتخافين ما عليه بيج، راحت وهو ؏ وكفته تعديته وكعدت اريد اكل يلة مدوا ايدكم سموو 

ما احس الا الصينيه انشالت وانركعت والاكل ترس المكان دفرني بخاصرتي حسيت شلع كليتي من مكانها وانكطع النفس عني التموا اخواني حواليه يركضون وخايفيين بالكوه ردتلي روحي 

مصلح ـ الله لا يوفقك يا حناش عساك الرديه والعوجه طايح الحظ كوم خويه كوم ارتاح بغرفتك

إشهاب ـ لا خليني ارتاح واكوم عوفوا لاحد يحاجي ويرجع عليكم بسببي الظاهر محملني ذنب لن اخذت حرمته لاهلها سكتووا وانه ضليت اجر بالنفس اجني اخواتي رحمه ورسل نظفن الغرفه ويباعن عليه رحمه كامت تبجي لاتخافين خويه ما بيه شي 

رحمه ـ الله يحفظك لشبابك يا خويه 

إشهاب ـ راحت وشوي ودخل ورفع أصبعه بتهديد قوي

حناش ـ قسم بالله اذا حشرت نفسك بين مشاكلي ويه نسواني ما تلوم الا نفسك شايف نفسك شوفه ولك انه برمشة عين امحيك من خلك الله بس شايل خاطر لابوي هو المانعني وكاسر ايدي ورجليه والا جان من زمان دفرتك ورى امك للبدو وخلصت منك 

ـ ما جاوبته ولا نطقت اي حرف خله ومشى كمت لغرفتي بقيت ايام عازل نفسي وما اختلطت بيهم وحتى الاكل رحمه تجيبلي وابويه صار عنده علم وصوته وصياحه يوصلني للغرفه 

" اندفع الباب ودخل ابويه بهيبته وعيونه حمر وكال 

صكبان ـ يتجازون حدهم وياك وتضل ساكت وشايل همك بكلبك لا بويه ما ارضاها ؏ نفسي انه ما جايز منك 

من باجر ازوجك وبيتك وحلالك لوحدك !!! 

          الفصل الخامس من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال