رواية الشيهانة والعاصوف الفصل الثالث 3 بقلم ياسمين
شايف من يجن كلهن...
لابيك التگوملهن، ولابيك الترتبهن
حزنك، خوفك، والضياع الـبيك
گلي شلون متحملهن
كيناز....
اقتباس يمثلني
الحياة دار اختبار لقدراتنا
ليس هناك احد يتمتع بمناعة ضد ما يمر به في الحياه من احداث سلبية، ولكن هناك من يتصفون بالقدره على التعامل معها والتفكير باشياء اخرى تغير مجرى ما حدث لهم،
لانهم مؤمنون بأن الحياة ليست ربحا وخسارة، انما هي دار اختبار، يفلح فيها من يدرك معنى وقيمه وجوده فيها،
اضاءة: الحكماء هم الذين يؤمنون بان المشكلات_ عاده ما تكون مؤقتة ، والوقت هو العلاج الوحيد، والمحن ما هي الا انابيب اختبار لقدراتنا
٠
٠
تركنا بابا وطلع واني كلشي مافاهمة منهم هاي من صفحة تبجي وبسام من صفحة مايدري بهوى دارنا واني بنصهم مثل الاطرش بالزفة شلت زيوني خاف من وضعهم ورحنا للمطبخ ندورلنا اكلة منا منااقنعه
عادة صايرة بينا كلما نشوفها تحمى بينهم نتركهم ونشوفلنا اكلة ناكلها
ادري بيها بعدين تصفى
سويت لفة جبن وجاي وكعدنا اني وياه بحافة باب المطبخ متسلط عالطارمة عركة على ضحكة خلصنا لفاتنا واخذته اغسله ايدناته ورجليه وصخات من اللعب
بقيت العب وياه لمن تعب ونعس هودتله على رجليه ولزمت كتابي اقرة واكتب لحد ما اجه الليل وبابا ماكو
بلش يشتغل عندي انذار القلق ليكون صار عليه شي
هالفترة صاير حتى يختنك واخاف من لمضة فقده كلش منو عدنا غيره اسم الله عليه..... نضيع وراه
لحد ماصارت الـ11بالليل الا سمعت صوت الباب انفتح ركضت اشوفه وهو يدخل باوعلي بنظرة مافهمتها تقرب مني ومسح على راسي ودخل
تبعته اساله
_ الله يساعدك بابا اسويلك عشى خاف جوعان ؟؟
نزع قميصه تعبان وهز راسه مايكدر يحجي اشرلي بيده على مكانه..... يعني افرشيلي
ركضت للغرفة لكيت جوانا مغطية حتى راسها هاي الثانية حتى ماضاكت لكمة ونامت جفي على وجهها
جبتله فراش للصالة علما دخل للحمام وطلع نام هلكان
كعدت اقرة بالطارمة لورة نص الليل حسبتها بداخلي على هاي قرايتي اجيب نجاح بدون درجة عالية
بس خلصت نمت بفراشي وعدلت نومة زيوني شكد عبث بنومته
ثاني اليوم الصبح كعدني بابا بنفسه لكيته حتى مبدل باوعت للساعة توها صايرة 7:00
_ يلة بابا كومي حتى بدربي اوصلج وراي كومة شغل
مالحك بعد
كمت على حجايته غسلت وجهي وبدلت عالسريع مشطت شعري صاير كفشة لان قصير
لازم مشطي بيدي حتى يبقى سرح
طلعت للمطبخ لكيت جوانا محضرة الريوك النا عيونها منفخة من النوم شكد نامت البارحة
كعدت بصفه اتريك كاللها
_ جهزوا ملابسكم واخذوا المهم المهم بس،
راح اسدد دين ابو الايجار واتفاهم وياه وارجع
كتله بفضول
_ وين راح نروح بابا وليش بس ملابسنا ناخذها
جاوبني وهو يشرب چاي
_ مانكدر نشيل كل هذا ويانا والسيارة مالتنا صغيرة زين تشيل ملابسنا واصلا غراضنا راح يتكفل بيهن ابو كرار يعرض الحاجة الزينة الزينة للبيع ويحول الي فلوسهن
باوعت لجوانا مانطت رد فعل كتله بخوف
_ بابا وين راح نروح قصدي وين نسكن بالضبط
حجاها ووكف بالباب يلبس حذائه
_ نروح لعمكم هناك ننتقل.... بعد ماترهمنا عيشة بغداد
حسيت روحي اختنكت باللكمة من حجى هيج وكفت مدمعة وكتله بقهر
_ لعد وماما... بابا شلون نزورها بعد لو تريدنا نتركها وحدها هناا
من كتله هيج باوعلي صفن عليه ثواني وطلع مخنوك سمعت شهكات جوانا كتلها ودموعي على خدي
_ جوانا حبابة قنعيه لبابا شلون نتركها لماما ونروح... بعدين بيت عمو مو بالبصرة لو اني متوهمة
حجت تبجي صوتها رايح
_ كتله والله كتله شلون تريدنا بهالسهولة ننتقل لهناك فوكاها مرة عمج مسمومة ماتنجرع شنو الجابرنا نعيش هناك ونتحملها.....
كعدت مكرفصة كدامها اتامل اكو حل اوصيغة تغير قراره
_ وشكالج هاا.... بلكت اذا حجينا اني وياج وياه يوافق شتكولين!!
هزت راسها بتعب وحجت
_ مستحيل بعد يوافق ابوج مقرر ومخلص فضينا روحي امتحني وخلي نخلص اني تعبت من الحجي
عافتني وكامت ردت اطلع امسح بدموعي دخل بابا مرة ثانية كاللها من الباب
_ بابا جوانا.... اذا جمعتي ملابسكم وغراضكم روحي انتي واخوج لبيت ابو كرار..... هاي دنيا مانعرف العالم ونحرزها علما اخلص واجيكم
_ تمام بابا
بس طلع تبعته امشي بصفه مخنوكة ركبنا السيارة كتله احاول وياه
_ بابا........ مارد عليه.... كملت
_ حباب بابا خلينا ننتقل مو مشكلة بس مو للبصرة
المكان بعيد كلش
جاوبني بهدوء يقنعني
_كنوزة بابااتي ترة اني الي راح اسويه لخاطرجن انتن بناتي وبس.... وبسام ورقته احتركت بالنسبة الي
بس انتن خطيتجن برگبتي اذا صار عليجن شي
اني يابابا ماضامن عمري شوفة عينج صالب نفسي ومحملها فوك طاقتها علمود اوصلجن بر الامان
_ اسم الله عليك بابا لاتحجي هيج فدوة
_ الامانة امانة الله والعمر مابقى بيه من الاول حتى نترجى منه بالتالي اذا رحنا للبصرة هناك حياة جديدة وسمعة جديدة بعد مااخوج بهذل احوالنا
وخلى سمعتنا بالحضيض
هناك نسكن ببيت عمكم فترة فرغولنا غرفة عدهم الناس علما اشوف امر الله شنوو وراها نتصرف
دنكت عيني عالجام متحكمة بدموعي كوة كدامه
_ يعني باابا.... ماراح نرجع لهناا... قصدي شلون نزور ماما بعد
وصلني كدام باب الثانوية وحجى مبتسم يطمني
_ ان شاء الله اخذكم ونزورها.. بس خلي بالاول اامن عليكم وراها الف حلال يحلها
هزيت راسي ونزلت كالي قبل لا اروح
_ اذا كملتي ابقي جوة بالحديقة عندي كم شغلة افضها واجيج..... تمام بابا
_ تمام..... دخلت لجوة ادور رقم قاعتي البنات جانت توها تدخل والي تراجع مادتها والي تسولف وتضحك
واني صافنة بالوجوه خايفة من الجاي يصير بينا
سدرة ماموجود اسمها بقاعتي تاملت اخلص امتحاني وانتظرها بالحديقة اسلم عليها واودعها نهائي،
علما بلش الامتحان وكملت سلمت ورقتي وطلعت كعدت بالحديقة انتظرها ماطولت ربع ساعة شفتها تصيحلي اشرتلها بس وصلت يمي حضنتها استغربت
ابتسمت وكتلها
_ همزين شفتج عبالي ماكدر اشوفج بعد
_ ليش وين رايحة وشصار على قضيتكم !!
_ ماصار شي.... بابا اختصرها علينا وقرر ننتقل من بغداد بكبرها
كعدت وياي عالمسطبة وحجت مصدومة
_ عزة كيناز تحجين صدك لو تتشاقين
_ لا والله احجي صدك... بابا صدمنا البارحة بقراره خلانا مفهين وهسة جاي ياخذني واحتمال اليوم نطلع من البيت نهائي
_ لاتكوليها عفية زين ليش تنتقلون برة المحافظة جان اخذتوا بغير منطقة مواحسللكم
ردت اجاوبها سمعت بابا صاحلي من بعيد اندارينا عليه سوية وكفت وياي حضنتها عالسريع وكتلها
_ راح اشتاقلج سدورة انتبهي على نفسج زين وكلما تدرسين مادة العربي اذكريني بالطاري وضحكت
ابتسمت بدموع وحجت حاضنتني
_ صدمتيني كنوزة... ليش هيج حتى وداعج خايب مثلج شجاج
بوستها وطلعت وصلنا للبيت ردت افتح الباب كالي
_ اختج واخوج ببيت ابو كرار روحي يمهم باباتي اني راح ابقى انتظر ابو الايجار علما يوصل
واشوف المصيبة وين راح
هزيت راسي ورحت لبابهم دكيت الباب عدة مرات طلعلي كرار بذاته وجهه معقوج من شافني ابتسم وفتح الباب على كبره
_ ياهلا ومرحبا بكنوزة ادخلي اختج جوة
غلست عن السلام ودخلت لجوة اشرلي عالصالة موجودين نزعت حذائي ودخلت لكيت خالتي ام كرار كاعدة هية وبناتها وجوانا تمسح بدموعها وزيوني بحضنها كاعد يلعب
سلمت عليهم وكعدت منحرجة من نظراتهن موبالعادة ادخل بيوت جوارين ونكعد هيج كعدة زيوني اجه شبكني بوسته سالتني خالتي جوعانة اشرتلها لا ماريد
دقايق قليلة سمعنا صوت كرار يصيح لامه كامت وعينها مني مبتسمة... استغربت هاي شبيها
رفعت عيني لاخواته بيهن كدي واكو اصغر مني لكيتهن يتهامسن وعينهن عليه
الحمدلله والشكر عائلة شاخطة بس يبصبصن
عابت شكد قليلات ذوق حجيتها بكلبي كامن يضحكن بصوت ناصي ومن حسن شكلهن نشاز كامن من يمنا
هزيت ايدي عيني وراهن كالتلي جوانا
_ خلصتي امتحانج؟؟
_ اي خلصت ...... اكلج ذني شبيهن بس يباوعلي
رادت تجاوبني دخلت امه علينا كالتلي
_ اكلج حبيبة ماتكومين وياي محتاجتج بشغلة
_ ايي خالة صار...... كومت زيوني وتبعتها مستغربة اخذتني للمطبخ لكيت كرار واكف يم الباب واخواته لازمات باب المطبخ الداخلي الظاهر منتظرات فد حدث غريب
من شافني تحمحم وخزرهن شردن وحجى بحضور امه
_ كنوزة عيني انتي اكيد تعرفين بقرار ابوج والخطر الي محاوطكم صح لو اني غلطان
ماجاوبته كال مكمل
_ اييي فتعرفين انتم راح تنتقلون نهائي لغير محافظة اقصد يم عمكم..... وحك شعره مرتبك حجت امه تكمل عنه
_ ايي حبيبة مقصد كلامه لكرار نخطبج من ابوج ونخفف الحمل عنه وهم كرار يحبج ويصونج ويقدرج
باوعتلهم مصدومة حسيتهم لطموني على عيني
كتلهم مفهية
_ ما فهمت يعني شنوو؟؟ وبابا وينه مافهمت؟؟
كمز يقنعني واني مدولغة بسالفتهم
_ ابوج حجى وياه ابوي بس هو رفض
قاطعته امه بخزرة معدلة وحجت تعدل على كلامه
_ بنيتي قصده لكرار ابوج هسة عقله مو براسه من القلق عليكم واحنا ردنا نضرب عصفورين بحجر واحد، هم ابوج يخف حمله بوحدة منجن وهم كرار يحبج من زمان ويموت عليج
قاطعتها انهي المهزلة الاني بنصها
_ ومنو كاللكم اني موافقة وشنو الجابرني اتحمل فراك بابا وزيوني..
كالي يقنعني
_ ليش متوافقين ياعيني ترة والله اني احبج وراح ادللج دلال مصاير بعدين اهلج موبعيدين هنة جم ساعة احنا بمحافظة البصرة وكلما ردتي واشتاقيتي الهم اخذج بيدي الهم لمن تشبعين منهم بس انتي اقنعيه وكليله هالكلام
هزيت راسي رافضة اريد اطلع كالي متجاهل رفضي
_ فكري عدل كنوزة ترة والله هناك تضلين حظ المكفخة لمرة عمج
انداريت مصدومة لكلامه منين عرف هالحجي ربطت كعدة جوانا وياهن اكيد خارطتلهن الخمير والفطير العوبة
رجعت عليه عيني بعينه كتله
_ اذا هاي من اولها عيار ينعاف تاليها
راد يحجي قاطعته متنرفزة
_ وبالنسبة لعرض المهزلة مالتك اني وية بابا بقراره واذا بابا فكر يتراجع اني مااخليه مستحيل اتركهم وارتبط بيك بعد كلامك هذا
تركته ورجعت يم جوانا عيوني بكصتي سالتني شبيه ماجاوبتها
انتظرنا بابا علما فض الوضع وصاحلنا طلعنا،
امه ماطلعت ورانا مبين ضاجت مني وهو مالمحته مثلهم
صعدنا السيارة بسام جان بالصدر راكب هزيت ايدي عليه يسوي المصايب ويكعد على تلها
شفنا بابا سلم عليهم ووصاه عالغراض وطلعنا من المنطقة كلها وهاي جانت اخر شوفة الي لبغداد مااعرف يمته اجي وازور ماما بعد
غوربت الدنيا وية لحظة دخولنا البصرة
سيارة بابا تعبانة كل ساعتين تحمى وينزل يبردها ماعرف شلون وصلتنا ومادگت بينا الناقصة
نزل كدام بيت عمو شكله من برة عالكد هو وعائلته ماعرف شلون راح نصير بيه وياهم
الي سمعته من بابا... عمو وزوجته وبناته يشتغلون بييت الحجي كال مسافرين لغير بلد من يجون للبصرة عمه والبنات يروحن قبلهم يجهزن البيت وينظفنه وعمو حارس عالبيت والداير مدايره
دوامه لو ليلي لو نهاري
قبل لاننزل بلحظات انفتح الباب وطلع علاوي ابن عمي كبران عمره 10سنين تقريبا لو اكبر اجه على ست بنات خطية وراه اجت السابعة اكبر من زيوني بسنة ماشايفيها ابد
بس علاوي اخر مرة شفته بيها من سنين من جانت ماما عايشة اجو زيارة ومروا علينا..
نزلنا واحنا نسمع سلام عمو وية بابا تقربنا منا بوسناه حضني لصدره وباسني براسي ونفس الطريقة وية جوانا
دخلنا لجوة لكينا البنات وعمة بالمطبخ سلمنا عليهن ودخلنا هلكانين تعب، زيوني موت رجليه كد مانام عليهن وكعد
كعدنا شوية وراها كمنا للحمام نغسل بالسرة من كد التعب اريد بس الزم المخدة وانام
قدمولنا عشى هالمقسوم اكلنا شوية وبطلنا بس زيوني شوية كثر مبين ميت جوع خليته لمن شبع ردت اكوم اشيلها ماخلتني نورس اخذتها مني
عمة كميلة من شافتنا تعبانين صاحت لنور كالتلها
_ افرشوا للبنات بغرفتكم الليلة وعمج وابن عمج فرشولهم برة الاستقبال وباجر يرتبون امورهم يستقرون بيها دور لمن الله يسهلها وياهم وباوعتلنا بنظرة احسها ماطايقة جيتنا بس ساكتة غصب عنها
دنكت اني وجوانا مستحين من ردها كمنا بسكتة لكينا البنية تنزل بالنضدة ساعدناها اني وجوانا وفرشنا النا كلنا مبين بس هاي الغرفة عدهم للبنات وغرفتهم ينامون بيها دخلت نهى اختهن الاصغر والثالثة كالتلنا اني وجوانا
_ اكلجن عيني امي تكول خلي يجن ياخذهن غراضهم لايضيعن ونبتلي يلة عيني كومن
طفرنا اني وجوان رحنا نشيلهن من الطارمة مخليهن يم باب الحوش صحنا لعلاوي جان شايل صينية چاي ياخذها للاستقبال صاير تصميمها براني تطلع برة البيت الا توصلها معزول نهائي عن البيت
( قديما جانت بيوت العرب تكون هيج ويسمون الاستقبال ضيافة او مضيف واعتقد مازالت بعض البيوت محتفظة بهاي التصاميم ببيوتها)
راح واجه اخذهن يسحل بيهن قبل لاندخل همستلي
_ الله يفضها على خير من هسة لازمة كلبي من مرة عمج والله لتلعب بينا افلاك مو فلك واحد
مارديت عليها اريد بس الزم المخدة وانام
بالنسبة الي ماوعيت على عقلية عمتي كميلة ولا اعرف شنو اليبدر منها بس جوانا تتذكر فصولها شسوت بماما باعتبار جانوا زواجهم ببغداد ومسقط راسهم بيها وجانوا جوارين بنفس الفرع ورة ماخلفوا
نهاد بكرهم الا شالوا للبصرة يدورون باب رزق لمعيشتهم
وراها سمعنا اجتهم نسرين وحبلت بعدها اجتهم الثالثة نداء
وتسطرن وراها
نورس
نور
نهى
الا اجاهم علاوي
وحبلت باخير بنية سموها
رقية كسروا بيها حرف النون واخيرا او احتمال خلصت الاسامي بهذا الحرف واضطروا يسموها رقية
رجعنا للغرفة لكيناهن يتهامسن ومن دخلنا سكتن ولان نهى بيها عادة الطفرة وجينات عمة غالبة عليها كالت مستغربة
_ اكلجن بنات اريد اسالجن سؤال بسيط عادي لو تزعلن
كالتلها جوانا
_ اسالي مانزعل قابل ضلت عالسؤال حتى نضوج
كالت متشجعة
_ ايي مو ردت اسالجن هنا تلبسن حجاب مثلنا لو تبقن هيج مفرعات
تمددت بفراشي اقنع بزيوني ينام ويبطل حركة تاركة جوان تجاوبها مالي خلكهن عود من اصحالهن استلمهن كالتلها
_ وشنو يعني اذا بقينا بلا حجاب !!... يعني اذا انتن تلبسن لازم نسوي مثلجن؟!!
ردت عليها مستهجنة ردها
_ ايي لعد شبيها ماتتحجبن مو كبرتن وصرتن نسوان لو عاجبجن ماشيات بحل شعرجن كدام الزلم
_ اجيت اكوم اهد بلساني لزمتني جوانا من تحت البطانية اهدئ وكالتلها بنبرة جافة
_ اول شي لبس الحجاب شي شخصي مااسمحلج لا انتي ولا غيرج يفرضه علينا
احنا يمته مانقتنع نلبسه مايحتاج سؤالج واستفسارج من الاساس حتى تتدخلين بينا
بقن وحدة تباوع للثانية رادت نهى تحجي طفرت مقاطعتها
_ اكلج عيني ترة الدرب من بغداد لهنا كطع كلوبنا بحيث هسة اسولف وياج واحس حلكي اعوج من التعب خلينا هسة ننام والصباح رباح نتناقش بموضوعج تمام عيني
سكتت ماحجت والحمدلله من حسن على دمهن وطلعن همست لجوانا بعين مغمضة ومفتحة كتلها
_ اكلج اني مو اتذكر مرة كلتي امهن ماجانت تلبس حجاب شتغير ولبسته هية وبناتها
جاوبتني وهية تتثاوب منعسة
_ الي سمعته من ماما الله يرحمها من انتقلت لهنا الوضع وشغلها ببيت الحجي فرض عليها تلبسه باحتشام والظاهر مشت عادة عليها وعلى بناتها لان بناتها الكبار قبل ليتزوجن هم جانن يخدمن ببيت الحجي لحد ما اجت قسمتهن وراحن
_ اكلج جوانا ردت اكلج مدام النية مكشوفة والوجوه واضحة مامتقبلينا بنصهم اكوول لو تحاجين بابا يجيب غراض مطبخ مستعملة ونعزل عنهم لمن الله يفرجها شتكولين
انتظرت ردها ماجاوبت... رفعت راسي اشوفها لكيتها تشخر دغيتها بيدي ماحجت غطيت زيوني هم نايم وغفيت وياهم مافزيت غير والشمس داخلة علينا من الشباج حمستنا حمس فزيت العرك غاسلنا زيوني ماهوة وجوانا فراشها ماهوة
كمت وعيني عالساعة بـ 10الصبح هاي شكد نايمة اني شلت الفراش رجعته للنضدة الغرفة نظيفة مبين نايمات وكاعدات وماحسيت بيهن
طلعت للصالة فارغة حكيت شعري هاي وين عباد الله راحوا
توجهت للمطبخ لكيت نور تطبخ وكدورها عالنار تركض منا ومنا هاي عود هية بكدي وهيج تطبخ
من شافتني ابتسمت وصبحت عليه رديت عليها اريد اطلع للطارمة اشوف زيوني وينه كالتلي تجاوبني
_ طلع هو واختج وريكته ويانا همين جان جوعان
_ تسلمين تعبتج
_ تعبج راحة........ وهية تحجي شالت كدر البزل شكبر صفته بالسنك بيه رجلين ومغطينه بجرجف وكاونتر تعبان وملحقه مركون على صفحة وثلاجة ومجمدة هم عدهم بس شكلهن قديمات مو جدد
سالتني وهية تحمس للتمن دهن وبصل روايح اله
_ اسويلج ريوك لو تنتظرين الغدة منا وجاي نصبه
جاوبتها منحرجة من سؤالها
_ لا اني اسوي بس دليني عالغراض
اشرتلي بيدها عالخبز والثلاجة بيها اجبان وفورت الچاي الي خلته بصينية هو والشكر والكلاص
سوت جم شغلة وبيدها طبخ تفتر من كدر لكدر شكد نادرة
ومبين اسلوبها حلو من سؤالها مو مثل نهى طفرة
كعدت تريكت وهية طبگت كدورها وكمل وصارت تنظف المطبخ وترتبه مبين من همتها ايدها ماخذة عالشغل
واني اكل دخل زيوني بيده وردة صفرة جابها يضحك فرحان
_ كنووو شوفيي هاية ولدة "وردة" عنده صعوبة شوية بحرف الراء
اخذتها منه اشمها وشبكته ماخذة هديته برحابة صدر
_ تخبل الوردة منين جبتها
اشرلي بديناته لبعيد وتعابير وجهه تكلي عابر قارات ومحيطات حتى يجيبها الي
_ بعييييييييييد مناااااااااك اكو هواييي وفتح ايده على وسعهن وحجى الوح اجيب بعددددد الج
لزمته قبل ليروح خايفة عليه وكتله
_ لاا لتروح انتظرني اكمل ريوك ونروح سوية وباوعت لنور كتلها
عادي اذا ما عندج شي تاخذينا بمهمة استطلاع عالمكان لو عندج شغل
_ شالت جودليات مفروشة عالارض شرتهن بسياج الطارمة وحجت لا ماعندي شي خلصت خلي اشمر على روحي طاسة ماي ونطلع
_ يلة لعد ننتظرج
علما خلصت طلعنا احنا وياها نتمشى ولان اجينا دنيا ظلمة ماشفت شي من التعب
الي لاحظته اول ماطلعنا بيت عمو باطراف منطقة زراعية وبساتين وبعد امتار عاليمنى شارع ترابي
يفصل بينهم وبين بيت الحجي،
من بعيد وهو شكله ضخم وجبير بيه بوابة خارجية ومسيج بالكامل سالتها عن عمة كميلة والبنات وينهن لعد كالتلي
_ راحن لبيت حجي حاتم يجهزنه ابنهم الي متوظف هنا اتصل بابوي كاله جهز البيت اليوم جاي زيارة، وابوي اخذ عمي وراحوا للسوك هم يشوفون الوضع واسعار السوك شلونها
باوعتلها مستغربة كتلها
_ زين هو ليش ما ساكن وية اهله ليش عايش هنا وحده
_موو كتلج وظيفته هنا يداوم بالجيش واصلا هو مايجي لهنا الا اذا اكو مناسبة يحضرولها لو كعدة مهمة لشيوخ ووجاهات معروفة يجتمعون بمضيف الحجي اذا اكو مشكلة يحلوها واذا مناسبة يحضروها واذا عزة لا سامح الله يجتمعون ويروحون بشكل وفود للمعني نفسه
سكتت استمعلها عبرنا الشارع الترابي ورحنا من جهة البوابة الخلفية للبيت بيها حديقة خلفية جبيرة وكعدات حلوة واشجار فواكه همين عالاطراف موسمية ماشاء الله مخضرة وشايلة ثمرها،
لمحت جوانا من بعيد تفتر بمكانها وتحجي منفعلة من سمعت صوت زيوني لاحظتنا وانطتنا ظهرها ثواني ورجعت علينا تتصرف طبيعي شكلها جانت تبجي بس اتغاضيت اسالها متعودة عليها كل فترة تدخل بفترة بجي وتسكت من كيفها
جوانا بيها طبع مو بسهولة تتكايف ولا بسهولة تتعايش، تستمر بالحياة وهية ناقمة ماتعرفها عليمن واذا اسالها ماتخلص عدها لا الاسباب ولا المسببات متعبة كلش لهيج بطلت اسالها لان اذا انفتح عدها صندوق الشكاوي ماينسد لمن تكرهني عيشتي
كعدنا بجلسة كراسي منبهرين بالمكان ومستحلينه وعيني تراقب زيوني ليسوي اذية او يتعور
سالتها جوانا بفضول كالتلها
_ اكلج نور ردت اسالج عن شغلة بس اوعديني تبقى سر بيناتنا عليج الله
كالتلها
_ لا مااكول اساليني
ابتسمت تتاكد منها وكالتلها
_ اي حلفيلي ماتحجين ويبقى سر بينا تلاثتنا
_ يابة والعباس ابو شارة ماكول احجي وفضيني
ضحكنا على يمينها كنالها سلام الله عليه منين جبتي هاليمين
_ اي غير حتى تحجي مو طكت مرارتي من الفضول
دنكت تحجي دنكنا وياها حجت بهمس مرتبكة
_ ردت اسالج من باب الفضول على اهل بيت الحجي صدك خلفته بس ولد وكلهم ممتزوجين لو معلومتي غلط
باوعتلها رافعة حاجبي الظاهر اختي من قلة حيلتها تريد تنيشن على واحد بيهم وماتعرف شلون
من شافتني مركزة بعينها عدلت صيغة سؤالها مرتبكة اكثر وحجت
_ اااا يعني هيج سالتج من باب الفضول وما منه وهم سمعت بالصدفة نورس طايرة من الفرح اسمعها تكول لنهى
(اليوم وليف الروح يلفي لهنا) والضحكة تارسة وجهها
باوعت لنور مستغربة كالتلها بتاكيد وهزت ايدها
_ يمعودة هاي تحلم وتخربط بكيفها واصلا ابن الحجي يحب بت خاله حسب السمعته وميت عليها وهم شايفتها من تجي لهنا بمناسباتهم تنكرط كرط من الجمال تردين استاذ حارث يتركها زيباوع لنورس جنها جكمة
رجعت لورة معتفسة ملامحها كالتلها
_ مافهمت هو اسمه الحارث نفسه الي راح يجي اليوم؟؟
_ اي عيني نفسه وعنده اخو اكبر منه اسمه الاكثم واخت من امهم وابوهم وباقي اخوانه من ابوهم من مرته الخليجية خلفتله خمسة بعين العدو
ورفعت اصابعها الخمسة بوجهنا بطريقة تضحك وكملت
شنو من زلم كل واحد بيهم اجثل وصنديد ماخذين طول ابوهم وضخامة امهم
بس ام الاكثم والحارث زوجته الاولى ناعمة تخبل بياض وعيون وملامح مو مثل زوجته الثانية ماتجي لحلاتها ذرة والي سمعته من امي تكول بزمانات اهلهم جانوا مجاورين ناس اكراد وبينهم زاد وملح مو مثل جورة هسة مايعرف بجاره جوعان لو عطشان لزمت ام الحجي حاتم خطبتها اله وتزوجوا وهو كل عمره 18 سنة لو شوية اكبر حسب الاتذكره من سوالف ابوي وامي من يتناقشون عنهم مرات كدامنا وفعلا كعدت مرته وياهم بس خطية ماخلفت بسرعة عكس حمواتها ولان ماخذة الجبير ماخلت عمتها لا طبة عرب ولا دكتور بوكتهم وسبحان الله ماكو سبب يمنع حملها
ويكولون الحجي بزمانه جان نادر وسبع وياكل الكاع اكل بندارته وهمته ، ليش ما ورة شهور من زواجه التقى بشاب مثل عمره اماراتي الجنسية جان يجي بشغل وية ابوه للعراق وتعارفوا صاروا صدقان وبينهم زاد وملح كلما يجي للعراق يشيل ضيافته هو وابوه لحد مايرجعون لبلدهم هالحجي بالسبيعنات،،
اهله للحجي بزمانهم جانوا يشتغلون بالميناء
الي ماصارله كم سنة من تم انجازه والمباشرة بيه بشغل البواخر لحد ما تعدت السنتين كدر يجمع مبلغ محترم من شغله وبكعدة شبابية صارح صاحبه بحيرته شلون يشغل هالمبلغ ويستثمره
يكول ابوي هنا اقترح عليه صاحبه يبلش بتجارة الاقمشة كار ابوه بالمهنة كاله خير من الله وبلد الامارات لباس ذواق بلبس الدشاديش الامارتية جانوا يسموها "الكندورة"
وفعلا ورة سنة جمع الفلس عالفلس وساعده صاحبه بشغلة السفر وراح وياه للامارات يجرب حضه
زوجته جانت حامل بشهورها الاولى توها شايلة
الحجي بلش هناك تجارته ومنها وانفتحت عليه ابواب الرزق صار يكرف بالفلوس كرف وبين فترة وفترة يجي للبصرة لاهله يشوف مرته وابنه الاكثم
يگول ابوي حسب السامعين منا ومنا انه الجماعة مقنعيه ياخذ اقامة ويستقر هناك وحجي سمعناه علساس عارضين عليه يتزوج بتهم حتى تصير اقامته مشروعة اكثر وبيهم يكولون لا هو حبها وخذاها
المهم ورة فترة اجه لاهله كاللهم راح اتزوج جان بوقتها عمر الاكثم تلث سنين
طفرت ضايجة كتلها
_ ومرته شسوت لاتكليلي بقت وياه
هزت ايدها وحجت
_ لعد منين جابت الحارث من فطر الحايط غير منه
وخاف عبالج نسوان قبل مثل هسة لاعيني تبقى وياه عالحلوة والمرة لو ياخذ عشرة عليها وهمين تلكيه قنعها بحجايتين ودندشها ذهب وفلوس رضاوة اكيد تسكت ماتعترض
رجعت لورة متجتفة وكتلها
_ والله لو يصوغني ذهب ماارضى ياخذ علية شنو هية جكليته كلساع ينضاك من مرة
هزت ايدها مرة لخ وباوعتلي تستهزي
_ هو منو هذا اليصوغج ذهب غير نعرفه بيا دربونة ونلكاه عمي اني اخذه وخلي ياخذ علية مية مو وحدة بس كون شرط فرض مثل الحجي حاتم
قاطعتنا جوانا مركزة بكلامنا وكالتلها
_ فضينا نور وتالي شصار؟؟
_ ايي حبيبة الصار جيب الحچي وودي حچي كدر الحجي حاتم يتزوج الثانية على سنة الله ورسوله وكعدها بسكن لوحدها هناك
وجاان العروس تحبل من ليلتها
صعد الضغط عد ام الاكثم ونقلوها للمستشفى من الحرگة
كمزنا اني وجوان بنفس الوقت
_ عزة بعين العدو ان شاء الله
_ هههههههه هاي شبيجن انصرعتن عمي اشاقة كومن اجه وكت الغدة هسة امي والبنات رجعن والله يخزني بس يلگن البيت درياهة
ركضت شلت زيوني على كلبي وكتلها بفضول اركض وراهن
_ لعد يمته تكملين قصتهم النا
من نصير وحدنا اسولفلجن بس لاتكولن للبنات اني حجيتلجن تالي تطلع اسرار دولة مايصير نشهر بيهم
بس وصلنا لكيناهن بعدهن ماجايات مدينا بساط الغدة وجوانا حضرت صينية لابوي وعمو وا
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
