رواية في حجر الافعي الفصل الثالث 3 بقلم شمس العراقيه

رواية في حجر الافعي الفصل الثالث 3 بقلم شمس العراقيه

صباح الخيرات النشر صار بين يوم ويوم باجر ماكو نشر 

إشهاب 

ـ نشتغل ويه أبوي واعاين الشغل وياه ومصلح وياي وكعد يدخن جكاره جريتها منه وطفيته تريد تبلينا متشوف الرزق شلون مطشر جمره من جكارتك وحده تمحي كل الرزق خلص شغلك وبعدين دخن محد مانعك 

" من بعيد لمحت اختي رحمه اجتي رغم مخمره بس عرفتها من طولها جنها شطب رمان هاي رحمه اجت خيرها. 

مصلح ـ تلكي حناش متمالخ ومتعارك هو ووحده من نسوانه ولازمها دك بالشطب واجت علينا لو على ابوي 

إشهاب ـ طاح صبغه اي والله شكو شايل خطايا بنت الناس اجت وصلت اليمنا بالكوة تجر النفس على كيفج بويه تريحي وبعدين احجي رفعت خمارها ومصلح عاط بيها 

مصلح ـ نزلي لا امعط ركبتج 

رحمه ـ يمعودين الحكوو حناش تعارك هو ومناف وأمجد وتوالهم الغلط والكفخ وانه اخافن السالفه تكبر لن ما يتفاهم وهذول فقره واحد منكم يلحكه يحاجي 

مصلح ـ هاي سالفتج عبالي واحد مات عابت هالجهره وبلت خابصه روحج وجايه مناك لهناك يلة انكلعي يلةةة 

إشهاب ـ روحي خويه هسه انه الحكج فركت بيدها ونزلت رأسها ومشت شبيك توليتها الغلط البنت خافت واجت علينا وكلنا نعرف حناش زارع الخوف بالكل شو شما اشوف انت تطلع انكس منه 

مصلح ـ يمعود يموتن على المشاكل وحدتهن بكد البغل يبخصن الجو عالخالي بلاش واذا حجه عليهم اكيد مسوين مكسوره وهو يريد مصلحتهم. 

إشهاب ـ خوش انه رايح اشوفهم وانت كمل الشغل 

مصلح ـ لا تعاركه ترة صاير فرد مره يعارك ذبان وجهه من يوم ما اخذوا الكاع هو شاخط ؏ الاخير وما يتحاجى حجايه وحده. 

إشهاب ـ يحجي وعيني عليهم أمي عسله عافت شغلها وراحت الهم وابوي يحجي ويه الزلم رايح اشوفهم صوته هرج الدنيا مو وكته مشيت وصلتهم صايرين ناحية البساتين وامي تفازع بيهم وهو ثاير وعصبي شكووو شبيكم فضحتونا 

حناش ـ اسأل المطايا وين جانوا عبالهم ما اعرف سوالفهم المكسره اليوم دواكم مو عند ابوي لا والله عندي اعيد تربيتهم من جديد 

إشهاب ـ شبيك كاب عليهم ترة مو جهال هما زلم كل واحد بكد الحايط عيب عليك شنو تعيد تربيتهم وشكوو تعارك كدام خلك الله اكو بيت وفضوا مشاكلكم 

حناش ـ اني مو هامني احد وهل الزوج اذا ما تعدلوا اعيد تربيتكم مرتن ثانيه اذا رجليكم خطت خطوة ناحية عربهم ما تلمون الا نفسكم والحاضر يعلم الغايب اي واحد منكم يوصل هذيج العرب اتغسل بدمه الظاهر نسيتوا انه اخوكم الجبير وصايرين فلت مسربتينن طايحين الحظ عبالكم ما اعرف سوالفكم المكسررره 

إشهاب ـ عافنا ومشه ناحية ابويه شمسوين من طلابه شبي وياكم، ساكتين وامي كبت بيهم وامجد ينافخ ومزعوج 

عسله ـ تستاهلون شمأخذكم لعربهم الكشره نشوف بيهم يوم اسود من وعينا ع الدنيا والطلايب بسبتهم اسمعوا كلمته وامشوا عدل وانت طلع نفسك ولا تتدخل لاتخرب عقولهم حناش اخوهم الجبير وادرى بمصلحتهم. 

إشهاب ـ كالت العندها ما اهتميت لن اعرفها ما تود وجودي بينهم مشت هزيت رأسي هاا ماكو واحد يحجيلي ساس السالفه شنهي علامكم اعلموني 

أمجد ـ مناف عاشك وحيده من عربهم 

إشهاب ـ بعده ما مكمل السالفه أنكفخ على رأسه من مناف 

مناف ـ يا عشك تريد تفضحنا انت، دومك تجفص بأم السالفه، اشهاب خويه السالفه وما بيها انه وامجد رحنا لعربهم وبالطريق حناش صادفنا طلع الاخ مراقبنا 

اشهاب ـ وشمأخذكم لعربهم 

مناف ـ هيج نفتر 

اشهاب ـ بس 

امجد ـ جذاب والله 

إشهاب ـ امجد روح يم مصلح عاونه بالشغل ولاتلوص بالحجي كدام الباقين لسانك ابلعه وانثبر بكاعك وصير صاحب نخوه واحفظ ماي وجهك يلة غربل منا

امجد ـ تأمر خويه 

إشهاب ـ مشه وانداريت ؏ مناف شنهي سالفتك أنت 

مناف ـ ما عندي سالفه ترة طولتوها وهي قصيره وحناش هواي تمادى والله بزعنااا حتى النفس نطلب طلابه مو عيشه هاي 

ـ بقلة صبر عوفناااا من حناش هسه اللي كاله أمجد صدك

ـ ماكو هيج شي ولو اكو انه أول الناس احجيلك 

ـ دربالك ؏ رويحتك وأنتبه لكلبك وتصرفاتك أنت مو صغير واعلمنك ورجلك لاتخطي عربهم بدون شيء حناش يشتري الطلايب وياهم بدم كلبه ونعرف ابوي واكف بصفه، طبطبت ع اكتافه ومشيت وكال 

ـ اكو وحيده من عربهم صار كم مره اشوفنها 

ـ أنداريت عليه شيلها من عقلك قبل لا تدخل كلبك وهسه عاود البيت لاتشوف وجهك لحناش لن الظاهر فهم النغمه

ولهيج محتم ودمه فايررر فهمت عليه يا مناف 

ـ فهمت خويه مثل ما تامر ومشكور 

ـ الشكر لله يلة عاود البيت طبطبت على أكتافه ورجعت لشغلي لكيته كاعد ويه ابوي ويحش برأسه عليهم وابويه بسرعه يندفع باوع لامجد وكام كفخه بالكاله اللي لابسها ؏ راسه 

امجد ـ تمون بويه 

صكبان ـ وأكسرر رأسك هم من يمتى انه عندي ولد يوكفون ويه النساوين مو عيب انه هيج ربيتكم من طاح صبغكم واحد ورى الثاني يلة انلكع من كداميي. 

إشهاب ـ راح للبيت دكها مشي وكملنا شغلنا وتوجهنا للبيت ومن نزلنا 

صكبان ـ اذبحوا ذبيحه وخل يشون الجهال خل يشبعون

إشهاب ـ تامر بويه، مصلح جاب الذبيحه وخلصانها وانه كملتها وكسرتها واجن اخذنها والجهال انطيتهم وركضوا فرحانين كعدت يم التانكي اغسل ايدي وتوضيت اجه مناف الوجه مغندب خير احد حاجاك بعد 

مناف ـ لا السالفه انسدت من كاعها 

ـ لعد شبيك 

ـ ما بيه 

ـ فكر زين مناف 

ـ الله كريم . 

إشهاب ـ مشه وكلبي ما مرتاحله اخاف عليه يوكع روحه بطلابه احنه بغنى عنا مبين عليها هاويها عيونه فاضحته 

كملت ودخلت غرفتي جريت سجادتي صليت والحمدلله وطلعت للخرايب اتغدى انه غرفتي معزوله عنهم امي ما تود وجودي والبيت كله جناين من يومي غرفتي وحمامي لوحدي، وصلت احمم 

عسله ـ فوت ماكو احد 

إشهاب ـ كاعدين كلهم كعدت بعد مسافه عنهم وحناش مخلي ولده اربعه يمه ويسولف وياهم مناف كاعد منعزل وامجد طلع من الغرفه ركض ع ابويه باس ايديه وابويه حضنه شكد قاسي بس حنين، فرشوا السفره الزلم بس والنسوان بالمطبخ ولا وحده تجي حتة الاكل مصلح ومناف جابوا وامي عسله تباوعلي وكالت 

عسله ـ ما تكرب تمد ايدك لو يرادلك عزيمه 

صكبان ـ يلة بويه اشهاب سم 

إشهاب ـ سم الله عدوك ، تقربت كلنا انجمعنا ويه ابويه على سفره وحده وامي عسله ما تاكل بس تباوع وتوزع اللحم وزعتلهم كلهم وعبرتني وابويه خزرها وشال لحمته خلاها كداميي لا بويه خلها الك اني اشبع من انت تشبع 

صكبان ـ اكل بويه عليك بالف عافيه 

أشهاب ـ اكلت وسكتت تعودت عليها من يومها ما تودني ولا تريدني بينهم وجارع المر وساكت وحاسبها مثل امي رغم امي محد يجي بمكانها . 

" خلصنا وجابوا الجاي شربت الاستكان وترخصت وتوجهت لغرفتي وهما عفتهم كاعدين وشوي لحكني مناف هاا خويه. 

مناف ـ خويه اعذرها هي من يومها هيج طبعها واليوم لما الذبيحه ما ناكل بالخرايب ناكل بالمضيف بلا ما تحصل هالمغثه منها وصدكني من كمت ابويه كام يحجي عليها وحتى حناش ابو الطلايب مارضه وكام يحجي 

إشهاب ـ لا يمعود ولا يهمك عادي وتعودت عليها لايضل بالك روح تريح ورانا شغل روح ارتاح وانه هم اناملي هالساعتين طبطبت على اكتافه ومشه وانه انجظعت على فراشي وانرسمت بخيالي صورتها الله يسرلج يا يمه .

_____

نمارق 

ـ أثرم السلطه واساعد عمتي إبتهال بتجهيز العشه وتباوعلي وتبتسم هاي شبيها ضربتني بخفة ايدها وضحكت وكالت 

إبتهال ـ اي يا نمارق من يكول يجوز يسويها البخت وتصيرين جنتي 

ـ جنتج

ـ اي شكو بيها بنت حمايه وابن عمج الوحيد منو الجن غير هل الابن عم امهاتجن ما بيهن خير خلفن اخ الجن ؏ الاقل عدجن ابن عم والصراحه أنتِ عاجبتني خوش بنيه وحبابه وذكيه وشيريد انس بعد جمال ودلال. 

ـ لا عمه ويني وين الزواج بعدنا ؏ هالموضوع مو وكته 

ـ ليش مو وكته أنتِ بالغه بعد شكوو وبس يرجع نفاتحه بالموضوع ويصير خير واني متأكده أنتِ هسه طايره من الفرح بس تتعززين كدامي عادي عادي اني عمتج وحسبة أمج 

ـ ما جاوبتها وعوجت حلكها ما اعرف شكالت بينها وبين نفسها كملتها وعفتها ؏ الكاونتر ومشيت وصاحت وراي 

ـ شبيج شمرتيها هالشمره تودني امدح من عندج 

ـ رايحه يم بيبي 

ـ تعالي ساعديني وين تروحين 

ـ هسه ادزلج وحده من البنات، عفتها تحجي وسمعت سيرة أمي اللهم الصبر، كعدت يم بيبي وطلعت اضرب من عمتي تمسح ؏شعري وتقرأ المعوذات شبيج بيبي احد كالج اني بيه جن 

الحجيه ـ اسم الله عليج بنيتي والله يا صائب نمارق كبرت صارت مره وعليها العين لو الله يهداك وترجع نجوى هم والله ما يصير تضل بيت امها ورجال غريب عنها الشرع حرمه عليها 

صائب ـ يمه هذا القرار اتخذته من زمان ولاتفتحونه كل شوي اني اعرف بقرارتي ومصلحة بناتي ورجلها مو شاب علمود يخلي عينه ؏ بنتي وامها يمها ليش تخلون كلبي كوه يلعب واني مرتاح وما اريد احرمها من امها واسويلي مشاكل 

ـ خلص سكتناا ما اعرف شمسويتلك ليلى هيج خاضع الها وما ترفضلها طلب اخ ياالبخت 

نمارق ـ بيبي ضاجت واني ما شاركت بالموضوع صار العشه واجه عمي سلمت عليه صبن وتعشينا رادت تعوف المواعين عليه غسلت وكعدت بصف بابا تجاهلتها عيونها صارن بكصتها تريدني حقل تجارب بنت اللذين غسلي وطبخي اني امي ما خلتني اشتغل شوكت يكوم بابا 

" طلعنا صعدت السياره بس بابا وعمو ضلوا واكفين يم الباب يحجون وأنشغل بالي يارب مو موضوع الزواج هسه بابا متفهم وواعي ليش تخربون عقله بسوالفكم هاي وين ما تروح بكبرك كومة عظام استغفرالله غير لو يعوفه 

وأخيراً اجه وطلعنا لبيتنا الحمدلله ما فتح الموضوع وياي عفته يقفل الباب ورحت الغرفتي غيرت ملابسي وشغلت التلفزيون بقيت أباو؏ أفلام واجه بابا نصيت صوته هاا بابا محتاج شي 

صائب ـ لتبقين سهرانه وراج مدرسه وقتي تلفونج وباجر اذا ما رحتي ازعل منج علمود بالعطله أخذج بيت عمج صباح تغيرين جو ألاجواء الريفيه حلوة ونفتر بالبساتين ونصيد

ًـ الله ذكرتني بالاجواء الاحبها ماشي تدلل دام هيج هسه يخلص الفلم وانام وباجر اروح المدرستي وما يكون الا خاطرك طيب كمت بسته وهو باسني من رأسي وتوجه لغرفته رجعت كملت الفلم خلص وتمددت وتذكرت هاجر والله اشتاقيت الها من زمان عن سوالفها الحلوة اروح اغير اجواء وترتاح نفسيتي من الخنكه والوحده العايشتها

الروتين المعتاد رحت المدرسه واجبات ودروس وتعب وحر الى أن اجه نهاية الأسبوع يوم الخميس رجعت من المدرسه بالـ ١٢ سبحت وتمددت ما اعرف شكثر نمت واجه بابا جايب اكل جاهز حضرته وكعدنا نأكل سوه 

صائب ـ خلصي ورتبي المطبخ وجهزي جنطتج وشغلاتج 

علمود نطلع مُباشرةً لن يلة نلحك ورانا طريق طويل 

نمارق ـ حاضر بابا، كمت بكل نشاط نظفت المطبخ ورحت حضرت ملابسي وشغلاتي اللي احتاجهن عطري وهالسوالف والنواعم واخذت ملابس جديده وبيهن صغرن عليه اخذتهن لهاجر تحب ملابسي وشغلاتي كملت وتجهزت لبست فستان صيفي وشعري ظفرته وشمرت الشال بدون دنابيس

" طلعت لكيت بابا كاشخ اخذ السويج وطلعنا الهم وبالطريق نزل اشترى حلويات وحبشكلات لن هما فواكهه ما شاء الله عدهم بساتين ومسواك من برى زراعه وكلشي متوفر عدهم 

" بعد مشوار طويل وصلنا الهم ما حسيت بالحر لن التبريد مشتغل وبابا طول الطريق ينزل يجيبلي عصائر بارده ومثلجات ما خلاني احس بالجو نزلنا واستقبلنا عمو صباح واخذني بحضنه كبل جر الطلي لا عمو والله ما يحتاج 

صباح ـ الغاليه اجتنا تساهلين الغنم كلها نورتينا بويه يلة تفضلوا استريحوا 

نمارق ـ دخلنا البيت اني دائماً اجي عليهم بس اكثر شيء بالعطل الكاع نظيفه والفراش يلمع كعدت وعم جاب النا ماي وين العمه امل وهاجر شو ماكو 

صباح ـ بالكاع راحن يشتغلن هسه اخذج الهن 

نمارق ـ خوش شربت الماي بقيت كاعده شوي كمت نزلت الاغراض خليتهن بالغرفه وبابا وعمو واكفين يم الحلال ويحجون بينهم 

صائب ـ يلة بابا نمارق امشي ويانا 

صباح ـ بس عمي ما جايبه شيء تلبسينه فوك ملابسج وضبطي حجابج العرب مليانه زلوم 

نمارق ـ بابا والله فساتني مستور عفيه حباب ما بيه اغيرهن ابتسم لي ولزمت ايده وطلعنا نتمشى وعمو جن ما مرتضي تجاهلت واني أتمعن بالمناظر الحلوة وريحة الاشجار وصوت العصافير بين البساتين شفت بنات يملن ماي من النهر تذكرت مره اجيت ويه هاجر وغطست بالنهر خلتني اعلن التوبه 

" شفت الخرفان مالت عمو صباح كعدت وكابلتهن هاي كل ما اجي عليهم اعيد كل لحظه حلوة اعيشها بيت عمي 

بابا يضحك عليه ويصورني واني اركض وراهن عمو صباح يهز بيده ويضحك واني مستمتعه وياهن شفت هاجر وعمه امل وياهن نسوان يحشون الحشيش ويشتغلن ومثلمات عفت الخرفان وهما يحجون بينهم 

صائب ـ يا كاع تعاركتوا علمودها بس لا هاي اللي كبالنا 

صباح ـ اي بينا شارع هذولاك هما كبالنا ونسوانهم وسيارتهم اخذوها غصب عني هي وزرعها حسبي الله ونعم الوكيل عليهم 

صائب ـ خليك بعيد عنهم ناس صاحبين مشاكل يمعود دام هيج فضت هذا احسن حل وحلالك عينك عليه لايروح الزرع والكاع مالتهم وتصير الك مشاكل انت شعندك ما تكولي العميان ما مأكله وجهك شو بس هاجر لاتصير صعب الطباع 

صباح ـ لا فضت على خير الله يبعدنا عنهم خير شر. 

نمارق ـ عفتهم يحجون وتمشيت والاجواء تخبل وكلها تشتغل بالزرع مالتها امشي بالشارع لوحدي وركضت ناحيتهن وصلتهم وحضنت هاجر اشتاقيتلج 

هاجر ـ وأني اكثر شجابج نورت عربنا والله واني اكول اليوم العرب منوره وجوها صافي حتى هواها يفتح النفس لن نمارق نورتها شلونج شخبارج حبيبه 

نمارق ـ بعد روحي شلونج عمه سلمت عليها وعلى النسوان اللي وياها اخواتها وجيرانهم ام رياض 

ام رياض ـ شجابج للكاع والزرع هسه البكك يأكل رجليج الحلوه جنج لوز شحلاتج ضبطي شالج يمه نازل كبالنا زلوم العرب الكبالنا عيب يمه 

نمارق ـ عدلت شالي تعالي احجيلي اخذتها وكعدت بنص الحشيش واكطع واضحك وياها بس حسيت بيها شيء باوعت عليهن ورجعت باوعتلي شبيج هاجر شو نفسج عالي 

هاجر ـ كلبي 

نمارق ـ شبي بس لا حبيتي كلت هيج كبل سدت حلكي عزاا نسيت هنا موجودات اي سولفيلي الله منو ولج 

هاجر ـ نصي صوتج وباوعي وراج بس باوعي بدون ما يحسن عليج وانه اكولج 

ـ تمام رفعت رأسي هنا ملتهيات يشتغلن نهضت باوعت وراي وشفت كومه زلم يشتغلون منو هذول 

ـ كعدي ولج عيب كافي تباعين 

ـ ياهو منو هو جرتني وغطست بالحشيش هاا كولي 

ـ ما تعرفينه هما أخوانه كومه اني كوه لمحت طوله وصعب هو وين وانه وين كل واحد من ديره بينا بحر من دم 

ـ ليش خطيه 

ـ علمود الكاع من زمان هالسالفه وبينا طلايب ما متصافين تعرفينها اكيد 

ـ اي اعرفها بس قسمه احتمال مكتوب الج قسمتج هو 

ـ ما اتوقع ولج بالجديد كلبي كام يدك واليوم من فات بالكاع مالته ابتسم من بعيد اخذ كلبي معقوله هذا هو الحب

ـ ما اعرف والله اني كارهه الحب وسيرته من ورة بابا وماما ودافنه نفسي بدراستي كلبي ما داك لاحد علمود اكولج اعرف بهل السوالف بس دام تعرفين صعب شورطج وخليتي كلبج يدك بهل السرعه شنو ما اكو زلم غيره 

ـ الحب ما يعرف وقت وسرعه شمدريني يلة خل نكوم لاتحس علينا امي هي بدون شيء بس تخوز بيه ورايه ورايه حتى ما خلتني اباوعله زين بس تجر بيه وراها مثل الطلي. 

ـ ضحكت والله عليج سوالف امشي خل نتمشى واخليج تشوفينه جريتها وكمت اني وياها ونتمشى وعمه امل تصيح ورانا طنشتها امشي نركض اني وياها ونضحك 

ـ خرب بيومج ولا احد يكدرلج اليوم اكل كتله مرتبه عشاي نعال مكطع امشي خل نرجع هما اصلا راح يرحون شوفي بس سوي روحج ما تباعين باعي صفح شوفي صعدوا اغلبهم بالسياره هما ونسوانهم 

ـ باوعت شنو هذول كومه وينه هو كفختني ونزلت رأسي اي شكوو شبيج خل نباوع الهم غير تعرفيني عليه حلو عاد يسوى هالركضه بعيدين ما يبيون واضح جرتني ورجعنا لعمه امل وخلت الحشيش على ظهر هاجر وهي كذلك واني اباوع الهن مشيت وراها وافتل بشالي وبابا وعمو صباح يفترون بالكاع ويحجون عبرناهم انقهرت على هاجر ادري خوما دابه شايله حشيش على ظهرها

وصلنا البيت وجابوا الصيد وكعدوا يششون واني غيرت ملابسي وانطيت الجبتهن لهاجر وفرحت بيهن وكالت بلهفه 

هاجر ـ باجر اذا رحنا الكاع البس هذا الثوب يجنن نمارق شكرا هواي انه اخيط هواي بس ما يطلعن حلوات مثل مالاتج الجاهزات 

نمارق ـ الف عافيه، كمت اني وياها ساعدنا العمه امل وصبينا العشه وتعشينا برى والجو يخبل والقمر منور الكعده ونسولف وخلصنا وفرشنا على القريوله وحده بصف الثانيه وكعدنا نسولف عن الدراسه وعن امي وعمه امل تسألني عنها لما نامت وخلتنا اني وهاجر وخطيه تريد احد ينصحها صفنت وجاوبتها شوفي دامج بالبدايه احتمال مجرد اعجاب ما واصلة مرحلة الحب لن الحب الحقيقي يرادله وقت وانتي تعرفين العلاقه متوتره بين العربين اهلج واهله ناس مختلفين واللي اعرفه عنهم طبيعية عيشتهم اصعب واعقد من عدكم مو صح 

ـ اي صحيح نسوانهم كل الاوقات لابسه خمار ولبس محتشم الصراحه مو هلكد اعرف عنهم امي ما تحجيلي هواي 

ـ شلج بهيج حب وناس متخلفه يمعوده ابتعدي الف متر بلكي ياخذج انس وتخلصيني منه 

ـ لا ما اريده مبقيته الج صدك مبروك سمعت بس يرجع من الخارج تزوجون 

ـ الله لا يكولها ما شايفته رجالي أبداً ولا ابالي موضوع الزواج نهائي دام بابا عايش وما مقصر وياي ومعيشني عيشة الاميرات شسوي بالرجال 

ـ هم صدك يلة خل انام اخاف امي تكعد وتضل تحجي علينا نحصل رزاله زينه منها 

ـ شكثر تخافين من امج عفيه دقيتني مو لهل الدرجه خلي كيان وشخصيه لنفسج 

هاجر ـ ام كيان نامي نامي لا يجيج طراك يهف شمرت المخده وضحكت ونامت وضلت صافنه على النجوم واني رحت بالعالم اللي توني داخله اله بخطوات مليان خوف ودكات كلبي ما تستقر بمكانها يمكن كلام نمارق هو الصح ابتعد الف متر يمكن هذا مجرد اعجاب اي اعجاب هو اني شفته كم مره شجاني انجبحت هالجبحه جن ما شايفه زلم بس هو مستحيل اخلي الاعجاب يصير حب هذا هو 

            الفصل الرابع من هنا 

لمتابعة باقي الرواية زوروا قناتنا على التليجرام من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال