رواية الشيهانة والعاصوف الفصل الثاني 2 بقلم ياسمين
✨ وطلع كل الرسمته اوهام بأوهام ✨
مساء النور غوالي لاتنسوني بتعليقاتكم المميزة + تصويتاتكم الحلوة عالرواية 🫂🧡💕
اقتباس..... جوانا
يمر وقت طويل على فقدك لشخص حتى يظن الجميع انك تجاوزت ذلك، لا احد يعرف انك مازلت عالق في ذلك اليوم وتلك الساعة تحديدا...
الساعة التي شعرت حينها ان كل شيء حلم لايصدق
٠
٠
اجيت للدنيا على راس اخوي بسام اكبر مني بسنة ونص او سنتين، ومثل اغلب البيوت العراقية البيت جان عالكد والعيشة عالكد والرزق بالقطارة
وماجان اكو توعية او نضج فكري تمنع عقلية المراة العراقية تستعمل وسائل منع حمل اذا اكو مسببات قاهرة بحياتهم وغيرها من المطبات الي تعيشها الاسر المتعففة بمعيشتهم
فـ اصبح قانون عرقي اجتماعي بهذا البلد سائد عالاغلبية اذا مو الكل
( الطفل يجي ويجي رزقه وياه )
من فترة الحمل للولادة للرضاعة هو بعناية الام ومن يجي للدنيا ويبلش يزحف هنا هو يصير بعناية الله ؏
منا لمن يكبر وينتبه لاقرانه هو بحسرة ابسط الامور الي المفروض تتوفرله
الجنطة الملابس المطارة الحلويات الي يبيعها عمو ابو نصير اتذكر من العيد للعيد الا تصير بيدي فلوس واكدر اشتري الي بنفسي
بولادتي بين التعب على امي واتذكر جنت صغيرة جانت تدخل للحمام وتطلع متخربطة وتبجي منتهية
مرة مرتين تازم وضعها كلش بوقتها اجه بابا يركض من شغله واخذها للدكتور وية جارتنا ام هيثم من رجعت جانت بيده كومة علاجات
فهمت بعدين عدها الام بكليتها يضرب على ظهرها ومثانتها لدرجة تدرر دم
بوقتها الدكتور منعها من الحمل وفعلا نفذت كلامه وبقت مستمرة على علاجها من يخلص تجدده بعد ما كدرت تدبر فلوسه بشغلها بالبيت باعت قطعة ذهبها واشترت ملابس نوم وداخليات لنسوان المنطقة يجن يشترن منها على اقصاد لو دين وهيج هيج تلملمت
بابا جان اغلب الايام يروح للمسطر لو يحصل شغل لو ماكو ومشت الايام والسنين على هالمنوال لحد ما صار عمري 12 سنة تقريبا
انتقلنا لغير بيت ايجار ثاني وصرت ايدها الثانية بالبيت اساعد وانظف واطبخ وحتى مرات اتسوك اذا ماتلحك وعدها مثلا جارات المنطقة يشترن منها ماتكدر تترك رزقها وتسد الباب اروح اني بدلها
وهنا حبلت امي بكيناز من شافت نفسها تحسنت وصارت احسن رغم بابا ماقبل عليها جان خايف عليها بس هية اصرت على رايها وكالتله مقتنعة هية مابيها شي والدكتور مايفتهم ومن هالحجي
من ثكل حملها بكيناز بلشت تتعب وتنتكس كومة، بابا احتار بيها لايكدر يلومها ولا يكدر يفتر بيها للدكاترة ماعنده هيج امكانيات
لزمت طلعلته فلوس من عدها جانت مصمدتهن اله يشتري سيارة تمشي الحال حتى يترك المسطر ويشتغل تكسي بيها راحوا للدكتور ورجعوا بعلاجات اكثر من قبل وهالمرة الدكتور متعارك وياهم لان حبلانة وعالتشخيص تحدد عدها بداية فشل كلوي
منااا لمن ولدت ماما كيناز بسلامة احنا عيونا متعلكة بالسما دك رجل بابا الها وكاللها لهنا وتتوقفين بعد مابيه لا اخسرج ولا عندي امكانية للدكاترة والعلاجات
ورة شهور كدرت تجمع منه ومنها الناقص من المبلغ واشترى سيارة على كد فلوسهم
بوقتها جان بسام بمرحلة مراهقة صعبة اول شغلة دك بيها رجله ترك الدراسة رغم اتذكر بواجي امي وتوسلها اله يشيل الفكرة من راسه
بس عجزت كدام عناده
ابوي وامي ناس فقرة كلش جان بوقتها همهم العيشة وبس محد بيهم شدد عليه لو فرض بالقوة يرجع لدراسته
امي ماجانت تسولف كلشي لابوي يجي تعبان وهلكان وجهه اسود من التعب ماتزيدها عليه تحاول هية تحل وتلملم امورنا قدر امكانها
من حجت لابوي ماهتم كاللها مشكلته بس الصار على هذا رده بسام تراجعت حتى اخلاقياته وصار يصاحب وين الشلة السكط اخذ منهم النذالة والحقارة والعربدة صار يومية يسويلنا طلابة بالحي يوم متعارك وية جار.. لو يوم ضارب مار عابر الفرع
صار بابنا كلساعة يندك ابنكم هيج سوة وابنكم هيج اندك بينا
امي تعبت كد ماتتعذر عنه وتبررلهم، من شافوا اهل المنطقة ماكو نتيجة تردعه عنهم كامت تتجفى شره وتتغاضى عن اذيته الهم
شوية شوية صار يطلع الصبح ويرجع متاخر بالليل
لحد ماصار يبات برة البيت وابوي من يجي يحتار منو يساله عنه ومن اي نقطة يدوره
حاول وياه عدة مرات باللين والغصب والسياسة يترك جماعته ويطلعه يشتغل بالتكسي ماقبل وكاله حجاية لسة اتذكرها
(سوالف الفكريات ذني مايمشني خليها الك كراوي التكسي التعبانة)
من بعدها صار مانشوفه بالايام صحيح جنت افرح من يغيب لان جان ياذيني ويضربني على اتفه الاسباب حتى كيناز الطفلة ماتخلص منه
عكس امي تخلصها بواجي وادعية ونذورة منا لمن يرجع جانت تكول اتخيله يموت ومحد داري عنه
مشت بينا الايام والسنين بدون ماحس بعمري الي يمشي. دخلت جامعة واني شايلة مسؤولية عائلة كاملة اخذ محاضرات منا وارجع ركض للبيت منا
اطبخ واغسل وانفخ عكس صديقاتي الي جانن وياي بالاعدادية كلهن عاشن حياتهن بدون تنغيص وعاشن قصص حب وبيهن ارتبطن وتزوجن واني مكاني راوح محد كلبني
واكو بيهن ماكملن جامعة من الاعدادية وتزوجن وكونن عائلة لحد ماشوية شوية تقلصت حلقة الصداقة بينا وصفيت لوحدي وية نوال
امي بهاي السنين كلش اثر عليها الفشل الكلوي تعبت من كثرة العلاجات الي تاخذها وجسمها صار يوم عن يوم يتورم والنفس بلش يضيك عدها بين فترة وفترة
لحد ماوصلت سن الاربعين انصدمنا بحملها حتى هية انصدمت مثلنا عبالها ماتشيل بعد مطمنة طلع المانع الي جانت تاخذه منتهي صلاحيته
بوقتها تبندنا من الصدمة اصلا عافيتها عالاخير والسنين الاخيرة صارت لاتهش ولاتنش بالبيت كله اني شايلته بروحي
حاول وياها بابا تسقطه رفضت كالتله بيه روح وبيه روح خليها على الله لحد ماخلصت فترة حملها من ورة المرض هية نايمة بالفراش لو للحمام
هنا اني متخرجة وكيناز عمرها عشر سنين جانت روحها بامي ورغم صغر عمرها بس جانت ماتخلي امي تلحك تصيح وتطلب خادمتها وقايمة بيها بدون ملل
واني مثل متعودت وتربيت قايمة بالبيت وطلباته،
من بعد حملها تركت شغلها ببيع الملابس الداخلية وبقينا على شغل بابا بالتكسي نمشي بيه امورنا ايجار وية عطلات السيارة الي تعبت وصارت مصاريفها نص بنص وية البيت ومرات تاخذ تصليح اكثر ونبقى عالفتافيت لاكثر من شهر نخلصها بتيتة وطماطة لو مثرودة صفرة لحد ماولدت ماما زين
وشكد جنا شايلين همها بالولادة بس جانت سهلة وماطولت من جابته رجعناها للبيت مورمة اكثر من قبل وتتنفس كوة
جنا متعودين عليها وعلى اعراضها وجانت حتى تتقيء مرات بس عالعلاج تصير احسن شوية
لحد خامس يوم بنفاسها كعدت من الفجر ترضع زيوني واتذكر رحت اسويلها حليب تشربه شفتها كعدت كيناز من نومها عبالي تريد منها شي تركتها ورحت للمطبخ
شفتها واني راجعة نزعت كلادتها الفضة من ركبتها وانطتها الها كالتلها البسيها الج هاي
واني اخليلها الحليب بصفها كالتلي بتعب
_ ادري بيج تعبتي وياي وصرنا حمل على جتافج بس هية هاي الدنيا والمقدر ومكتوب مامنه مهروب
خاف يصير شي واترككم انتبهي على اخوتج لاتاخذج الدنيا منهم بيوم من الايام وتتركيهم
ذولة امانتي يمج واشرت على كيناز وزيوني
ماخليتها تكمل متعودة من سنين عمري يومية توصيني بنفس الوصايا وتشدد علية هم
وصتني على ابوي انتبه اله وتمنت تشوف بسام متخرج مثلي عالاقل وراها غيرت الموضوع وضحكت وتشاقت ويانا ومن رادت ترتاح وتنام وصت كيناز على زيوني
كالتلها زين الج ديري بالج عليه ومن اليوم ورايح انتي بدالي تنتبهين عليه وتداريه بعيونج
حضنتها وبوستها تمسح بدموعها ورجعت نامت لحد ماكشف الصبح
طلعت كيناز لدوامها وهية على نومتها هية وزيوني بابا سالني شيجيب نواقص ومسواك للبيت وصيته شيجيب وطلع
لحد ماشفتها تاخرت بالنوم مو بالعادة هلكد تبقى
رحت اكعدها ماكو هزيتها حاولت وياها ماكو مالها نفس ماحسيت بروحي بعد واني فاقدة كدامها
ولا عرفت شلون اتجمعن جارات المنطقة علينا شالوها للغسل واني مكابلة فراشها والطم
بوقتها ما بجيت بس على فقدها بجيت خايفة من كومة شغلات خطرت ببالي
اولها اشيل حمل اكثر من الشايلته هسة وتركتني بكل برود واني جنت احسها مصدر امان الي حتى لو مرات اتكرضم كدامها اني تعبت ومليت من عيشتنا بس ماجنت اقصد تتركني وتروح تخليني وحدي وياهم
مامعقولة تحملني شي فوك طاقتي وتروح بهالسهولة تعبت اني مابيه هلكد احمل قهر وضيم
زيوني بنص الفاتحة مادريت عنه شصار بيه ومنو تحمله يوصلني مرات صوت بواجيه ويسكت مايطول، جارات المنطقة ماقصرن قامن بالواجب واكثر احسن من خالاتي اجن للفاتحة مثل الخطار عزن مثلهن مثل الغرب وصبحن ثاني يوم كلمن مشت لمحافظتها ماتاخرن
حتى ماسالن شنو نريد وشنحتاج كلمن يصيح ياروحي ثالث يوم الفاتحة كمت للغرفة متكسرة شفت كيناز كاعدة مستندة عالحايط تغفي بمكانها وزين بحضنها مخليه ممة الحليب بحلكه يرضع منها
هسة الا تفطنت حالتها ماتذكر يمته اجت من الدوام ولا شلون عرفت بامي توفت بس مبين من حالتها هية جانت لازمة زيوني طول ايام الفاتحة عرفت بعدين منها مانطته لوحدة من النسوان ابد تساعدها بيه تحملته وحدها
ورة ما خلصت الفاتحة كلمن رجع لبيته ولحياته
عرفت بعدين من بابا بسام طارده من اول يوم الفاتحة يكول فشلني من اجت شلة عربنجية بحجة يعزون ويكومون بالواجب لا شكل لا اخلاق ولا اسلوب اول ماداخلين الفاتحة مسويلهم عركة وية واحد من الجوارين جان يساعد بتقديم الجاي والماي وكايليله اطلع احنا نقوم بالواجب مثل الطردة اله
حجاية منه وحجاية منهم متعاركين وكوة العالم مخلصتهم تالي بابا طاردهم كلهم فضا للنزاع وضال بسام يهدد ويوعد بذاك
دمعت عيونه من حجى بيه وكالي
_ المفروض يصير عكازتي بهيج موقف اسنده ويسندني يصبر علية مو يسويلي فضايح اني بغنى عنها
من يومها انفلت بالزايد اذا جنا شاكين بيه يكبسل صار يشرب حتى مخدرات واذا جنا مانشوفه بعيونا
صار يجي عيني عينك وبطالة العرك بيده
مرة مرتين طرده بابا وما جاب نتيجة واصلا بابا ياخذه ليل ويرده ليل وذاك يجي بالصدف لو من بابا ماموجود
تخلص فلوسه يجي ياخذ شغلة تنباع بسعر زين من البيت وفن واحد يحجي وياه ايده والضرب مايرحم بشر
صرنا علج تسولف بيه العالم واهل المنطقة وبدل ماجان اسمنا بيت ابو بسام صار يصيحلونا بيت المكبسلجي
اكثر من مرتين اندك بابنا للخطبة يجن النسوان تشوف حالنا ووضعنا ومن توصل مرحلة يسالون عنا ونسال عنهم يبطلون من ذاتهم ماعرف سببه سمعة اخوي لو حظي الفكر نايم مايقبل مايصحى
بلشت روحي تبزع وقابليتي صارت صفر اريد اعيش مثلي مثل البنات اريد اتزوج واخلف اريد ادخل واطلع واشتري الي بنفسي بدل حبسة الگبر بالبيت
نفسي صارت تطلب ابسط الامنيات واحقها لروحي
وكلما اردد هالشي بيني وبين نفسي صرت انقم على عيشتنا اكثر واكثر
حقدت عالمسؤولية الشايلتها الهم واني بالاساس مامضطرة اشيلها
كيناز بعدها صغيرة بداية مراهقتها والعمر كدامها واني عمري بلش بالخسران صرت افضفض لنوال من قهري وهية تواسيني لحد مايوم قنعتني باسلوبها انه تشوفلي حل لوضعي
وصارت بين جية والثانية تحجيلي عن واحد صديق حبيبها اسمه مهند ابن عالم وناس واخلاق ومؤدب
يريد يرتبط ويدور بت حلال وامه تريد تخطبله كرايبه وهو رافض لان مايحب يرتبط بالطريقة التقليدية وراغب يتزوج عن حب
انشديت الموضوع وحجتلي رؤوس اقلام عنه وعن احواله المادية جذبني الموضوع كتلها ماعندي مشكلة نرتبط خلي يتقدم واني على ضمانتج موافقة
ضحكت وكالتلي تستهزي
_ هو شنو موافقة على ضمانتي غير تشوفيه يشوفج
تتعرفين عليه يتعرف عليج........ ترة انتي مو بالعصر الحجري حبي شوية فتحي عيونج وياي
صفنت على كلامها مبهوتة يعني شنو مافهمت !!
كالتلي بهمس لتسمعنا كيناز
_ يعني نشوف فد طريقة تلتقين بيه وتكعدون بفد مكان سوية واحد يشوف الثاني وتتعرفون على بعض وراها احجوا بالزواج ياعيني قابل ابقى للدوم اعلم بيج
انسطرت بكلامها صافنة عليها
ماخلتني حتى افكر وحجت
_ لاتصفنين هواي حبي ترة عادي...
لتستغربين القبلج والبعدج تزوجن بسهولة وانتي باقية مكانج دورين الي يجي ويدك بابج ترة ماكو بعد هيج وانتي بكيفج بعد
كامت تلبس جنطتها تريد تطلع وكملت
_ وترة يكون بعلمج صديقاتنا كلهن تزوجن بنفس الطريقة واكثر بعد واذا انتي متسوين نفسهن مراح ترتبطين بحياتج فـ كليلي من هسة انطيه ضوء اخضر تلتقين بيه لو يشوف غيرج
جاوبتها خايفة ليروح من ايدي وماحصل هيج فرصة بعد
_ اي موافقة............ اقصد ماعندي مشكلة نتعرف بالاول وراها نرتبط....... حجيتها واني افرك بيدي قلقة، عمري ماجازفت هيج مجازفة ولاسويتها بيوم وطلعت وية ولد التقي بيه بالسر
بس شسوي مضطرة...
وفعلا راحت وكدرت بعد اسبوع ترجعلي خبر التقي بيه بنفس اليوم بمتنزه الزوراء خلتني اشيل روحي واركعها لا مجهزة نفسي ولا مستعدة.. وحتى ماعندي عذر الي اطلع بيه من البيت وبابا من قبل وفاة امي شال مسؤولية المسواك على عاتقه
يعني ماعندي حجة قوية اطلع بيها من البيت
والمصيبة الاكبر كيناز لماحة تلكفها وهية طايرة ومنا هية ماتطيق نوال بس تعرف تخزيني وتسويلها عرس علية
من حجيتلها الي بالي انطتني فكرة ناجلها للصبح من تروح كيناز للمدرسة واخذ زين وياي مايفتهم تاخذه قريب منا تلهيه بالالعاب علما اشوفه ويشوفني واذا رجعت ولكيت بابا كدامي اتحجج بزين ماله خلك واكله اخذته للمستوصف
دبرنا كلشي وثاني يوم تم كلشي حسب الاصول
لحد مالتقيت بيه شاب شكله مقبول واجتماعي واسلوبه يشد من كلمة السلام عليكم
اخذني بالسوالف والاسئلة اخذ لدرجة وترني
ماطولت وياه اقل الساعتين ورجعنا بين مسافة الطريق للبيت حسيت روحي اقتنعت بيه
بس واحنا بالطريق راجعين نوهت نوال بكلامها انه هالموعد مو كافي ولازم انطي من نفسي شوية واطلع وياه اذا رغب نكمل اما اذا قافلة ورفضت فـ اكيد راح يشوف غيري
اخذت الدرب سكتة ماكدرت حتى ارد عليها
خايفة ومترددة لا ارفض التقي بيه بعد وتضيع مني فكرة الارتباط كلها واصلا قسمتي بالزواج شحة
كلش
واذا وافقت خاف نيته وياي يضحك علية ويقشمرني بوعود وكلام ماله صحة وهم يضيع عمري فوك الضاع مني
وصلت لمنطقتنا وهية راحت اشتريت لزيوني من المحل بالدين جلب يريد علج واني ماشايلة فلوس نوال هية تكفلت بالكروة روحة واني شلتها بالرجعة هم انعم الله عليها البنية تساعدني
بس وصلت ونزعت ملابسي رحت للمطبخ اسوي مركة بتيتة سهلة متاخذ وقت اقل من ساعة
علما اجت كيناز وتغدينا بس دخلوا للغرفة هية وزيوني ماطولت وطلعت يمي تسالني باستفسار
_ اكلج جوان شنوو جنتوا طالعين اليوم؟؟
واني اغسل اماعين جاوبتها ببرود
_ منو كال طالعين؟؟
_ زيوني كالي طلعتوا واشتريتيله علج وركبتوا سيارة همين
باوعتلها مقطبة حواجبها مستغربة رجعت انظف الطباخ وكتلها
_ وشبيج هيج معفوسة عيني .... اي طلعنا للمستوصف جبت لزيوني خافض حرارة شوية حرارته صعدت الصبح
_ بس جان زين قبل لا اطلع ماحسيت عنده حرارة
شمرت المنشفة بالسنك وكتلها روحي طالعة
_ اكلج هو تحقيق لو تحقيق فضيني شتردين هسة
_ ماريد شي بس استغربت موعادتج تطلعين بدون متكولين
تركتني ودخلت للغرفة احسها مامصدكتني
حضي خلى زين لسانه المكطوم يسطرهن الها
مرة الايام وتعدت بالاسبوع ماشفت نوال بعد
رجعت لروتين حياتي اكنس انظف ارتب اطبخ امسح مسلسل متكرر بالاسود والابيض صرت متشبعة بيه الوحدة صارت تلازمني اكثر من قبل واني اسمع جارة بالمنطقة اليوم زوجت ابنها لو وحدة بالفرع الثاني زفت بتها
واهازيج الزفة ترن على مسامعي مثل جرس الانذار كلما اصفن لعمري الي يركض ركض بدون ماحس بيه
يمته يجي يومي مثلهن واطلع من هالبيت الگبر
يوم بعد يوم صار طاري الزواج بداخلي حسرة مكبوتة لو امنية الطفل الي يملي حضني صار حلم بالنسبة الي
ورة اسبوع زارتني نوال بيومها جابتلي مرسال منه الي ماجان بوقتها اكو موبايلات متوفرة نكدر نشتريها ومو الكل عنده هاي الامكانية
فتحته وقريت عالسريع
سلام معسول بخط ايده وكلمة عيوني مكتوبة بنهاية كل جملة وكاتب انه ماناسي موعدنا الاول ومعشعشة بدماغه من افترقنا لحد الان
اخر سطر طالب اتعطف عليه واتصل بيه عالموبايل يسمع صوتي لان مشتاق يتعرف علية اكثر واكثر
رفعت عيني باوعتلها مستغربة سلمتني موبايل بكيس صغير جواب لاستغرابي من الصدمة شفته وضميته لتشوفني كيناز وتسالني عنه
من دخلت كيناز للغرفة كالتلي تهمسلي مبتسمة
_ اكلج حبي الظاهر الاخ وكع ومحد سمى عليه من يوم الي التقيتوا وهو يسولف بيج صرعنا صرع عليج
ابتسمت منتشية واخيرا اكو انسان معجب بيه
_ وطبعا اصر يتعرف عليج اكثر وطلب مني اجيبلج هذا الجهاز افتحي الموبايل من تصيرين لوحدج واتصلي عليه ترة مخلي بيه رصيد واسمه موجود بالقائمة شوفي كلامه وادرسي وضعج وياه وبعدين ارسي على بر تمام حبي
هزيت راسي وكلبي يركض احس نفسي طايرة فوك الغيم
ط
علما خلصت زيارتها وراحت ضميتهن تحت الكرويتة علما تفضى الغرفة واضمهن لتشوفني كيناز
كدرت بعدين الكى فرص مو فرصة وحدة واحاجيه وبكل مرة جنت اتصل بيه جنت اتخردل واضيع اكثر واكثر
يوم بعد يوم حبيت صوته كلامه اسلوبه وتعلقت بيه حجالي عن عائلته واخوته ونسوان اخوته حجالي عن شغله ودراسته ونوهلي يريد يكمل بالخارج ويعادل على شهادته
وطموحه يعيش بارقى مستويات المعيشة الي صعبة تتحقق هنا
كلام جان لاول مرة اسمعه من اول انسان دخل بحياتي بهاي الصورة بحيث جان بكل اتصال يرفعني من هذا المستنقع لاعالي السما
الروتين اليومي الي جنت اشوفه حبل خانكني
تحول مثل العسل على كلبي اخلص شغلي منا واستغل غياب كيناز بالدوام واطلع زيوني بالباب واروح اتصل بيه وكلما يخلص رصيد هو يعبي
لحد ماطلب مني نلتقي مرة ثانية ووافقت، التقينا ببعض وهالمرة جان الاحراج اقل وتواعدنا مرة ثالثة ورابعة لحد ماصرنا واحد متعلق باللاخ ومستحيل يمر يوم اذا مانسمع صوت بعض ونحجي بمستقبلنا كالعادة
الى ان مر على علاقتنا شهرين احنا مثل عصافير الحب وفجاة بدون انذار كطع اتصاله بيه
اتصلت بيه مرة ومرتين مغلق
حاولت بغير وقت احصله ماكو لحد ما مر اسبوع كامل جزعت وصارت دمعتي بطرف عيني مشتاقتله بوقتها تعنيت متحججة للمحل اشتري نواقص للبيت وطفرت لبيت نوال اسالها عنه ليش اختفى
وهنا صدمتني صدمة عمري من كالتلي مسوي حادث
اجيت اوكع على طولي لو ما لازمتني دخلتني للطارمة وغسلت وجهي وشربت ماي بارد وحجتلي تطمني الحادث مومثل مامتوقعة وانه خدوش وكسور بسيطة تتعالج وية الوقت
_ زين ليش قافل خطه ماحصله
_ حبي ناس طابة وناس طالعة وين يتصل بيج ورجليه مجبرة مايكدر يتحرك ويكوم
انطيه مجال للرجال خلي يجر نفس يشتاقلج شوية صارلج شكد وياه انتي وهيج انبلعتي عليه الظاهر انتي الوكعتي مو هوة هههههه
استحيت من كلامها وكمت اريد اروح هم صحيح شجاني هيج استخفيت عليه هسة شتكول علية
سلمت عليها ورجعت اخذت من محل خالة انتظار معجون بالدين بابا بعدين يسددها ورجعت لكيت كيناز متخصرة الي ناوية على تحقيق خزرتها وزمخت بيها قبل لتحجي
_ حجاية وحدة مااسمعلج ترة البيه كافيني افتهمتي لولا دفعتها ودخلت لجوة خليتها تدردم علية شلون تاخرت
ماتاخر هو يومين وشفت رسالته بالبريد كاتبلي مشتاقلي وهالمرة مايريد اتصال ولازم نشوف بعض ونتفق على حل لعلاقتنا حتى يتقدملي
مو كلمات جانن فراشات ترفرف بمعدتي ومشاعري فاضت على ملامح وجهي كلها بالسعادة ماعرفت شلون خلص الوقت واجه الليل وكدرت اختلي بنفسي بالبيتونة فوك واراسله رغم الدنيا جمر بس ماحسيت بس راسلته جاوبني بلهفة وبين كلمة والثانية يكلي مشتاقلج
اصر علية يتصل وبس هو يحجي واذا اريد احجي اكتبله انطيته موافقة اتصل علية
حجالي شصار وياه وشلون اتاذى بالحادث وكلي هو مصارح والدته عني وامه كايلتله نشوفها حلوة لولا مدام اختيارك ابتسمت مطمنة لاصراره وهو يكلها
گمر اربعطش چنتج بس خلي اندل عنوان بيتهم وانتي روحي اتاكدي بنفسج
ماطولت وياه اكثر من نص ساعة خايفة لا بابا لو كيناز يحسون بيه ونزلت على كيف بعد ماانطيته اسم المنطقة والفرع وحتى رقم الباب
٠
٠
كيناز
بفترة امتحانات الابتدائية اصرن علينا مدرساتنا نجي نحضر وناخذ دروس اضافية للمواد رغم التربية انطتنا اجازة اقل الشهر ندرسها بالبيت بس للذمة والضمير وحتى يضبطن امورنا بالمواد اصرن علينا نجي نراجع واشتغلنا امتحانات من هاي الي تحبها كلوبنا بحيث ارجع للبيت راسي مسطور
اذا اخذ غفوة صغيرة تصير حسرة علية من ورة زيوني مايخليني انام يبقى يگن فوك راسي الا اكعد لو مرات يشتهي نلعب سوية مايقتنع من اطرده يكوم يبجي ويفحط وهنا اني غصبا علية اكعدله وانفذ طلباته
مرات تحاول وياه جوانا وتصيحله تلعب وياه بس هو الا اني مايقبل بيها والحلو بالموضوع من يشوفني تعبانة مايقبل بغير لعبة الحرامي والشرطي
لازم نطارد بالبيت ونخلصها تفحيط بودي ابجي من التعب بس بعدين اجتني فكرة اختل عنه بزاوية بالبيت لو بالكنتور مالت ماما واخذلي غفوة واخليه هو يدورني لمن يكوم يبجي ويايس مايلكاني
الحمدلله خلصت فترة المراجعة واجه موعد الامتحانات بوقتها اخوي بسام جان وضعه غريب وجوده ملازم البيت مو بالعادة منه
بس ماهتمينا خلصها لو نايم لو كاعد بنهاية الفرع
وكلما ارجع من الامتحان الكاه واكف بالباب يخازر
غلست عنه ادري بيه لو بيده يبطلني ويكعدني بالبيت بس يعرف بروحه بس يحجي ابوي يطرده
قبل يوم من الامتحان القبل الاخير رجعت لكيت شلة شباب واكفين يم بابنا صايرة هوسة وعياط للضالين
والمنطقة كلها طالعة تتفرج
بقيت واكفة مكاني لابيه اتحرك من الخوف ولا اكدر ادخل بنصهم تقربت مسافة عنهم لمحت الجوارين واكفين سد عالباب وعمو ابو كرار يدفع بيهم هو كرار ابنه
وذولة يشيلون ارواحهم ويركعوها يكلوله
لو تخلينا ندخل ناخذه سحل لو تسلموه النا
تصنمت من الخوف والرهبة شصاير وهيج هايجين على بيتنا صعدت اصوات العالم الي يطلب منهم يهداون والي كام يصلي عالنبي والي يحجي بحرمة البيت وفشلة وعيب يداهمون البيت
وذولة ولا طخوا
اخر شي توسلولهم وباسوا حتى روسهم يتركون الباب ويجون وياهم لبيوتهم يتفاهمون وياهم عرفت من الزلم الواكفة بابنا ابوي ماموجود لان جان طلعلهم
بس دخلوا جوة البيت اشرلي كرار بعيونه ادخل عالسريع وبعيونه نظرة مافهمت معناها شنو
بس دفعت الباب ودخلت لكيت جوانا بالغرفة حاضنة زيوني حيل وتبجي منهارة وبسام فوك السطح يروح ويرجع علينا متوتر
بس شافتني صاحت تبجي
_ تعالي كيناز تعالي ولج مصيبة وطاحت على روسنا
تعالي وكابليني شلون نحلها هسة هاي
تقربت منها رجليه خدرن من الهبطة كعدت كدامها اريد اسالها شكو لساني مايساعدني يتحرك يبس بلهاتي
زيوني ترك حضنها من الخوف واجه لحضني شبكته كتلها خايفة
_ شكو جوانا الله يخليج لتخوفيني
لطمت على رجلها وصاحت منهارة دموعها غاسلة وجهها
_ ولج اخوج سواله مصيبة شكبرها.......... ولج كاتله واحد مدميه واصل للموت وهسة اهله عرفوا المتورطين واخوج من ضمنهم يردون يصفون ثارهم وياهم واحد واحد
رجعت لطمت على رجلها تناشغ كاتلها القهر
هو من سمعها دخل علينا دفرها صاحت بيه واني من الخوف حضنت زيوني ليدفرنا وتلوحه ضربة
كامت هية تصرخ وزيوني يصرخ دور زاد مانقص عليها كطعها تكطع يريدها تسكت ماتقبل لابيه اكوم ادفعه عنها واترك زيوني مجلب بيه هم خايف
من الصوت باخر نفس عندي شلت زيوني طلعته للصالة اسكته اريد ارجعلها ماخلاني حاضني مفرفح
ماعرف شلون دفعته وخلصت روحها منه لمن طلعته كام يدفر بالباب ماخلى بيه شي صاحي يكلها اسكتي وهية تدعي عليه
من الرهبة والصدمة كمت ابجي بسكتة اريد بابا خلي يجي يحلها بس ماندله وين يشتغل
وبرحمة سماوية تنزلت علينا اندك الباب واخيرا ومن سمع صوته الا بطل دفر بالباب وركض خايف للسطح
عباله همه
عرفته من شردته لفوك صدك متورط بالتهمة
ركضت شايلة زيوني اشوف منو عرفته من ايده المتعوبة باابا يحاول يفتح طلاكة الباب من فوك
ركضت اتلكاه جانت بيده علاگة مسواك
بس دخل عرفته من ملامحه واصله خبر من بداية الفرع وجاي يشوف شكو
من شفته بجيت وحضنته من الخوف نشتكيله اني وزيوني ماكدر يوكف طاقة ماعنده حضنا ودخل لجوة شمر روحه عالكرويتة مايكدر حتى يحجي ويسال شكو
طلعتله جوانا تبجي مدماية من الضرب واني ركضت اجيبله ماي خفت عليه ليصير بيه شي
اسمعها تكله
_ بابا موتني شوف جسمي كطعني تكطع الحقير النذل
جبتله ماي بارد اشرلها بيده صبر
بدل ماتدور وتبحث علي الروايات خليها علي تليفونك وحمل تطبيقنا
