رواية هدية الشيخ رضا الفصل الثاني 2 بقلم أوتار حزينه
ناصر
نار شبت بيه من وره عمله الردي ناهي جان
بودي اذبحه بكاعه لان نزل من قدرنا هوايه بس
ااخ ابن عم الشيخ ومااكدر اسويله شي
رجعنا من يمهم مكسورين الخاطر
كلت بغضب
«بويه شلون انطيت اختي ليله هديه للشيخ
عباس رد بقهر وهو يعاين لابويه يمشي جدامنا
وظهره مكسور
«اسكت يناصر وعوفه
ترا البي كافي،،،
«ولك عباس شلون اسكت شلون والله راح نصير علج بالحلوك بين العربان على فگر وانطو بنتهم هديه للشيخ حتى نكبر براسه ويصير براسنه
خيير
طبينا للدار گلوبنا موجره من الصار
امي اول ماشافتنا حجت
بقلق
«شبيكم يمه عبالك احد غاثكم
محد رد عليها راحت لابويه وسالته
«ابو عباس شبيك صاير شي يم بيت الشيخ
«ماكو شي حبيبه تعالي اكعدي يمي اريدن احاجيج
بكلمه
«جيتك عيني
«وين بنتج ليله والبنوات وجهالهن
« تعشن وراحن كلمن لغرفتها
ابويه،،، سكت ونزل راسه للحظه
وبعدين رفعه وحجه
«ام عباس اسمعي الحجي الي
صار بمضيف الشيخ
«احجي ابو عباس مو قلبي وكع
صاير شي موزين
«لا يالحبيبه ،،،،،،بس صار امر وانه
حجيت،،،،،،،، حجايه وانطيت كلمه
لشيخ رضا وكدام الاوادم كلها
«اي وشنو الكلمه
ابويه عاين النا واشوف الوجه انطعن وصار احمر
دم والعيون غوركت كال بصوت
مخنوك
«ام عباس انه انطيت بنتي
ليله هديه للشيخ رضا
امي صفنت بذهول علي وبعدين علينا
كالت
« ابوكم شكاعد يحجي شنو كرم اختكم للشيخ
رضا وشلون صار هالشي وصدك
هو هو سوه هيج
«يمه اضطر يسوي هيج لناهي الجلب
حرج ابويه بكعده الشيوخ لان
ماجاب شي وابويه من خجله من الكاعدين
كرم اختي للشيخ رضا
«وولك انت شكااعد تحجي شنو كرمها وشنو انطاها
هديه وشلون تسووي هيج ياعلوان شلون
هانت عليك بنتك الوحيده تنطيها
لواحد مزوج اثنين وعنده
كوم بنات
ابويه ماراد ساكت ومنزل راسه امي كامت تبجي
وتردد
«ماااقبل والله ماانطيها اله شبيكم انتو ولكم
الشيخ جبير عمره راح يصير بالاربعين وهي توها
عشرين سنه ومزوج بدل الوحده اثنين
وبنته دعاء بكبر ليله
«شااسوي ام عباس اكلج حرجني النذل قهرني
ومااعرف شلون طلعت من حلكي هالكلمه
«مااعرف ابو عباس روح كله ماقبلت امها ولا هي
ارجع بكلمتك معه بنتي ماانطيها له
حتى لو جان شيخ الشيوخ
شعندي اني هي هالبنيه
اذا اريد ازوجها
انطيها لواحد من عمرها من.ط واحد مزوج
وعنده كومه بنات
على صياح امي اجني نسوانه وليله ابويه
رد بغضب
« تريديني اارجع بكلمتي الكلتها للشيخ وكدام
الشيوخ تخبلتي انتي شلون تريدني اسوي
هالشي شتريد اطيح من عيونه هو
والي حجيت كدامهم
ليله
طلعت من غرفتي اسمع امي تصيح رحت للهول
وكفت وگلبي هبط من سمعت ابويه منطيني هديه للشيخ رضا مشيت للباب
اجني ورايه نسوان اخوتي نعيمه سالت
«خير شبيها عمتي تصيح
اسمع امي تتعارك ومو قابله على الصار شافوني ابويه نزل راسه نعيمه سالت
«خير شصاير
امي صاحت بغضب
«ولجن يااخير تعالن شوفن عمجن شمسووي
منطي ليله هديه للشيخ رضا
«شنووو
نسوان اخوتي صاحن بذهول
امي كملت وهي تبجي
«تعالي يالمسعده شوفي ابوج شسوه كرمج
لشيخ وباعج برخص
ابويه صاح بيها
«هنااااء بسج عااد تلومين بيه كاعد اكلج
ماادري شلون طلعت الجلمه من حلكي ولج والله
خلاني بموقف يكسر الظهر وكرمتها اله
« واني مو قابله وبنتي ماتروح اله واذا جبرتها
وجبرتني على هالشي اخذها واروح لاهلي
« ااكسر رجليج اذا سويتي هالشي واريد من الله
تكسرين جلمتي او تسودين وجهي
كدام الشيخ واهله
النار اشتعلت بين امي وابويه لان اول مره يغلط
عليها هل الغلط ردت علي بصياح
«سوويها ياعلوان بنتي ماتروح اله لو اعرف اتطلك
منك
« بسسسج عاد وااعقلي تره البيه كافيني
ااعرف بروحي شسويت وكااعد اكلج ماعرفت ارده
بغير بهل الشي شااسوي قهرني بفگري
ومجان عندي غير بنتي
اهديها للشيخ
ابويه كال هالكلام وكعد يبجي دمعتي
نزلت من شفت قهره اخوتي كعدو يمه وكالو
«بويه الي تريده سوي بس لاتقهر روحك
«مااريد اسوي هيج ولكم شلون بيه كلت كلمه
كال كدامكم جاي بعد ثلاث ايام واخطبها ليله شتريدون اروح اگله لااا شيخ رجعت بكلامي وماعندي حرمه لك
امي كعدت تبجي وتندب حظي وحظها ابويه عاين
الي شافني ابجي وبعدين الها
كال ورة لحظه
«لاتبجن ارجع بكلمتي ولا تظلن تبجن وتقهرن
بروحجن
كام لحيله ومانشوفه غير يوكع من طوله صرخنا
كلنا اخوتي گضوا ومددو على القنفه
عباس صاح
«مي ولجن جيبن مي
كمت الطم على وجهي لان صار فد
مرة لا يرفع ايد ولا رجل اخوتي غسلو
اله وشربو مي كعد بس وجهه صار اصفر كركم
«يابه شبيك يوجعك شي
« ابو عباس شيوجعك گلي
امي تسال بي مايرد عليها عباس صاح
«ولك ناصر،، جيب السياره
خلي نودي للمستشفى على السريع
اشر بايده وكال
«لااا مااروح خلوني اتمدد شويه وانه اصيرن
زين
« يابه خلي نوديك خاف صار بيك شي
«مابيه شي وليدي لاتخاف بس خلوني
انامن شويه
من شفت ابويه بهل الحاله دموعي كامت تصب صب واختنكت من القهر وظليت اعاين علي شلون
تمدد على الجودليه ونام بهدومه
امي كعدت يمه تبجي من
قهرها عليه وعلي
وتردد
« حسبي الله ونعم الوكيل عليك ياناهي
مايجي من وراك غير بس الاذيه والقهر
ظلينا كلنا كاعدين يمه ابجي بصوت ناصي
وخايفه علي كلش لان صار فد مره وره مشوار امي
اشرت لاخوتي ونسوانهم وكالت
بصوت ناصي
«نام روحو وخلوني يمه
«اي شي يصير صيحنا
«ماكو شي ان شاء الله
ردت على عباس اشر للكل وطلعو من يمنا
ظليت يمها اعاين اله بخوف كملت وياي
« روحي يمه نامي مابي شي ابوج
«يمه خاف يصير بي شي من القهر
صفنت علي دمعتها تنزل ماتمسحها ردت
بصوت مخنوك
«لاا ماكو شي لاتخافين
سكتت واشرت اليه روحي
كمت اعاين اله مشيت من يمهم افكر بالسمعته
رجعت لغرفتي كعدت افكر بالصار
معقوله هذا مصيري اروح لواحد
اكبر مني بهوايه مزوج مرتين
وعنده بنات كومه
دموعي تنزل ماامسحها صافنه وعبالك واحد
ضربني براسي من السمعته ابويه
انطه كلمه واعرفه بعد مستحيل
يرجع بيها
كمت من مكاني افتر بالغرفه روحي تلوب ومااعرف
شلون راح تفض هالسالفه طلعت تمشيت للهول
بس ابويه بي شفته نايم
والوجه صاير اصفر
صفنت علي مقهوره وممروده روحي علي
طلعت من يمه رحت للمطبخ ادور امي باب الخارجي جان مفتوح رحت اله وكفت من سمعت حجي
جان عباس اخويه وناصر وياهم
امي الي كالت وهي
تبجي
«شلون يمه انطيها اله مو تعرفو جبير واكبر منها
بهوايه شناقصها لاختكم حتى تنزل على
ضره
«يمه محد قابل من عدنا بس شنسوي شنهي
الي بأيدنا ابويه انطه للشيخ عگب ماحرجه
ناهي النگس وتعرفين انتي بعد مستحيل
يرجع بكلمته الكالها جدام الكل
امي كامت تبجي بصوت ناصر كمل
«كافي يمه ابويه طاح علينا شتريدين انتي هم
تطيحين علينا
«ولك يمه ماجاي استوعب اختك تروح اله
«يمه الشيخ رضا مايعيبه شي غير عمره وهم مو مبين علي انتي مو شايفته تراه شباب واليشوفه
يكول علي مو مزوج ولا مخلف
امي ماردت ناصر كمل
«يمه هو احسن من غيره رجال شيخ وابن خير
واختي راح ترتاح يمه شمدريج الي
راح يجيها مايظلمها ويأذيها
على الاقل شيخ رضا
نعرفه وربينا سوه ويا ونعرف اخلاقه
وانه متاكد ليله راح ترتاح يمه ويخاف الله
بيها لان بنت عمه علوان
عباس رد علي
«مااعرف يا ناصر انه مو راضي وخاف احجي
والقهر يزيد على ابويه انت شفته شصار بي
من امي حجت ويا طاح علينا وصار فد مره
ناصر رد علي
«مال نرفض مانكدر بعد ابوك انطه كلمه والشيخ
قبل اختنا وراح يجي بعد ثلاث ايام
ويعقد عليها
«ضربه بافادك ياناهي جيه الشر من اجيت
ولفيت وي رجعه الشيخ اذيتنا من حسبي الله
ونعم الوكيل عليك
طلعت من سمعت بجي امي شافوني
وظلون صافنين عليه مشيت ليمهم وكلت
بغصه
«انه موافقه على الشيخ بس لاتبجين يمه
امي زادت بالبجي وغطت وجهها بشيلتها
رحت ليمها عباس كال بقهر
«ياخيه مااعرف شاكول تربطت ايدنا من ابوج
كال هالكلام
«لاتقهرون ابويه انا موافقه علي
رديت بدموع كعدت يم امي تبجي وانه
وياها عباس كال
«بس كافي بجي راح اروح للشيخ واكله انه
مو موافق انطيك اختي
«شكاعد تسوي انت والله ابويه يتخبل عليك بس
تسويها من وراه
ناصر انهد بي كلت بسرعه
«لااا ياخويه لاتروح انه موافقه ماريدك تكسر
كلمه ابويه ولاتقهره خلي مرفوع راسه يم الشيخ
واهله ولاتنزله ابد
عباس سكت يعاين عليه بقهر نزل راسه وره دقائق
ناصر كام وكال
« مااريد اي شي يصير بابويه كافي علي ناهي
العار قهره وحرك دمه مانجي احنا هم ونقهره
بالزايد خاف يروح من ايدينا وذيج
الساعه الندم راح ياكلنا
محد رد علي امي بس تبجي وتعاين عليه بقهر
كال ورة لحظه
«اروح اشوف ابويه ظل بالي علي
امي كامت ويا وراحو لجوه ظلينا ساكتين انه
واخويه عباس الي كال وره مشوار
« تدرين ليش اسمج ليله
عرفت غير الموضوع حتى يهون عليه السمعته،،هزيت راسي باي
ابتسم بس مقهور كمل
«بذاك اليوم من اجيتي
جانت ليله سوده كلش والنجم يضوي بالسما وامي تعسرت بولادج هوايه
اسكتت وظليت اسمعه
شلون يحجي ويعاين،،،للسما
«جنت صغير وكاعد انه واخوتي ناصر وحسين ونبجي عليها لان جنا نسمع صوتها
وهي تتوجع،،،نشوف ابويه يروح ويجي يمنا ينخي
بالله وآل البيت ،،،،ويدعي ادكوم بالسلامه
سمعنا صوتج وره مشوار عرفناها جابت طلعت مريه اتبشرنا بجيتج للدنيا،،،ابويه من فرحته كام يبجي
وسجد لله يشكره ورأسن سماج
ليله لان،،،،صدك جانت ذيج الليله
حلوه وصافيه وكبرتي ويانا،،، وانتي عزيزه علينا
وعدالج مو اختنا لا بنتنا،،،،
عزيزه علينا،،، ولو تريدين ارواحنا ترخص
لج
عيوني غوركت،،،من سمعت كلامه
جاوبته،،،
«اسم الله على روحك اخويه
انه اروحلكم فدوه
سكت يفكر وصافن كال ورة مشوار
«اسمعيني زين ليله الشيخ رضا نعم الرجال
ومابي اي عيب الجبير قبل الصغير تهابه وتحترمه
لان هو فارض احترامه على الكل وتحبه الناس
لان طيب وكريم وايده سخيه للمحتاج
والفقير وانتي ياخيتي اذا الله راد
وصرتي اله اعرفه راح يخاف
الله بيج ويخليج بعيونه
سكتت مارديت كمل
« ظلت يمج عاد توافقين علي انه وياج
ماتوافقين انه هم وياج ومااعوفج
وحدج
سكتت مارديت علي نزلت راسي وصفنت
للسما كام من يمي وكال
«كومي خيه لاتظلين وحدج بهل الليله وفكري
زين بالصار واي قرار تاخذي انه وياج
صفنت علي وجهه صاير دم هو ناصر وابويه
كلهم مبين عليهم القهر والحزن كلت
هذا حالهم جدامنا من حجه ناهي
وحرجهم جدام الكل
شصار بيهم وشلون كدرو يتحملون الموقف
كمت ويا وكلت بغصه
« انا موافقه علي بس انت لاتقهر روحك
ياخويه
صفن عليه وبين علي التأثر كملت
«مااريدك لا انت ولا ناصر وابويه تقهرون روحكم
وتنزولون راسكم كدام الشيخ وربعه الي
راد ابويه يمشي عليه وانفذه
من طيب خاطر
ذب حسره سمعتها صوتها دار وجهه مني وعاين
لبيت الشيخ وكال
« عفيه بيج اريد ارفع راسي واكسر خشم
ناهي الي بسالفته هاي نزل ضره على اخته وكسر
ركبتها بس حيل بي وابو زايد هو جابها
لروحه والها
اجت بالي حرمته اعرفها گويه وعرمه كلش ويا ما
سمعت بيها عامله العمايل بمرته الثانيه
الله يرحمها خفت وخليت خوفي
جوه گلبي
الصار زرع بيه خوف
من الجاي بس
ماحجيت شي اخويه كام وكال
« يله بويه كومي نامي راح يطلع الفجر وحنا مو
نايمين
كمت ويا وطبينا لجوه رحت لغرفتي وتمددت بفراشي صفنت على السكف
ماكو نوم من عيوني،،،ظليت اتكلب بالفراش
مخنوكه ومقهوره من الصار وره وين
سمعت صوت ابويه يكول يالله كمت رحت
للباب فتحته شويه شفته جاي من الحمام وامي ويا
فرحت من شفته كايم ويمشي رجعت لفراشي
كعدت هناك وحمدت ربي هو ماصار
بي شي وكام للصلاه رجعت تمددت اغفي
واكعد تالي من التعب والتفكير نمت،،وطولت
بنومتي وماحسيت الا امي تكعدني
على الريوك
.........
مر اول يوم الكلام نفسه انعاد ناس ادكول اقبلي بي
شيخ وماقاصره شي وناس ادكول شلون تاخذه
وهو اكبر منها بهوايه وكلمه ابويه جاان
لازم تمشي لاان كلنا نعرفه
ماراح يتراجع عنها
امي ظلت مو راضيه تعاين عليه بقهر ودمعتها
بعيونها لجن ساكته حتى ماتكسر كلمته
وهم خافت لايصير بي
شي من القهر
ثاني يوم مر نفس اول يوم وبالثالث الصبح
بيت الشيخ دزولنا خبر هم جايين
علينا العصر گلبي هبط وصار وجع بمعدتي
امي تغير وجهها بس ماحجت
شي حضرت ضيافه هي والبنات اجني
وره صلاه العصر تلكتهن هي ونعيمه
وطببتهن للغرفه الخطار
ارتبكت وتوتر من جيتهن علينا ولا حسيت
بفرحه شي مغصوبه علي شلون
افرح بي ماادري زهره طبت وكالت
«ولج ليله ام الشيخ وخواته جني
يردن يشوفنج كومي زهبي حالج حتى تروحين
الهن
گلبي هبط بعد اكثر من سمعت هالكلام هي
حست بيه اجت ليمي كعدت وكالت
« خايفه موو
هزيت راسي باي ردت عليه
«مااعرف شاحجي بس اكلج ان شاء الله تشوفين
الخير بهل الزواج
« انه مااريد ازوج يازهرة بس قبلت بي حتى
مايظل ابويه يقهر بحاله خفت لايصير
بي شي ونخسره كلنا
«اعرف والله بس شسوين خيه عمي انطه
كلمه وانتي تعرفي بعد هاهي يقفل ومايترجع عنها ابدا
هزيت راسي باي كامت طلعت لي فستان
بسيط وكالت لي
البسي ورتبي روحج ولاتتاخرين
عنهن
اي
رديت بدون واهس طلعت من يمي بدلت بس
اتصفن واحس ثگل حار بمعدتي عفت شعري كصيبه ومالعبت بي خليت طاك نعيمه اجت
كالت
«يله ليله تاخرتي عليهن
مارديت مشيت وياها للديوانيه توتر وخوف بگلبي
من هالشوفه طبت هي وانه وراها شفت
ام الشيخ وبناتها الاثنين
عيونهن صارت عليه
عيوني راحت لامي كامت واجت عليه وكالت
تعالي يمه سلمي على الشيخه وبناتها
مشيت وياها كامن وهن يعاينن عليه من فوك
لجوه الشيخه هلت بيه
« هلا يمه هلا بعروس ابني
تقدمت واخذتني لحظنها روحي اختنگت
ومااعرف شصار بيه سلمت بصوت طلع گوة
عليها وعلى بناتها انتبهت بنتها صفاء
بس تضحك وهن كلهن
عبالك فرحانات بزواج ابنهم
ردت ارجع الشيخه حجت
«وين يمه تعالي اكعدي يمي خلي اشوفج
واملي عيوني بجمالج
عاينت لامي هزت براسها كعدت يمها منزله راسي
احس بنظراتهن عليه
«اللهم صل على محمد وآل محمد
حقه ابوج ،،،،مايطلعج من كبرتي
انه اتذكرج،،،، من جنتي صغيره
حلوه وعلى الكبر محلوه زايد
«چا مو كلت يايمه ليله كلش حلوه
«اي يمه حياه كلتي وطلعت صدك
عروس ابني حلوه
«تسلمين ياشيخه ،،،
«هاي شنو ام عباس شنو شيخه احنا
حنصير اهل وماأقبل ادكولين شيخه صيحيني ام رضا وبعدين انه زعلانه عليج
«يا ليش شيخه ماعاش الي
يزعلج
«ام رضا خيه جا اجي من السفر ماتمرين علي
وتشوفيني
«بهاي حقج ام رضا بس والله
التهيت بأبو عباس شوي ماله خلق
«لا اسم الله عليه شماله
«مو ذاك اليوم ،،،،من اجيتوو
«نعيمه اسكتي مو وكتها
امي ردت بنتره لان عرفت شتريد تحجي
والشيخه لكفتها كالت
«اسمعيني زين ام عباس انه دريت
بالصار ،،،بكعده الزلم والله شاهد عليه لا انه ولا الشيخ رضينه بالي صار بس شنسوي هذا ناهي والكل تعرف ،،،،،ومن هدها زلمتج تراها هديه
غاليه علينا وراح نخليها بعيونه
ومانقصر وياها بشي
امي فكت شويه من سمعت كلام الشيخه الي
كملت
«خيه هديتكم غاليه علينا وقبنلها لان مايرد
الكريم غير اللئيم وابني انتي تعرفي مايحتاج
ازكي يمج او يم احد شيخ والكل تعرفه
من هو وابن منو زلمه حك
ويخاف الله كلش
وهو دزني انه وخواته حتى نسال
ليله هي موافقه علي اذا اي تفرح گلبي وكلبنا
كلنا واذا لاا محد راح يجبرها على
شي الامر الها بالاول والاخر
امي عاينت عليه صفنت عليها ابويه اجه بين
عيوني اكول لاا يفشل وي الشيخ
واسود وجهه كدامه وكدامه
ربعه
نزلت راسي امي كالت
«شيخه بنتي الكم ابوها انطاها ومانطلع عن شوره
ابدا
«خيه خل اسمعها من بنتج
ردت عليها بهدؤ وكملت وياي
«انتي شدكولين ليله موافقه علي للولدي لو لاا
حرب بداخلي صارت اريد اكول لاا ابويه
بين عيوني اي ازوج واحد اكبر مني بهوايه ومزوج
قبلي اثنين وعنده كومه بنات رفعت عيوني
زهره صارت كدامي هزت راسها
باي لاراديا سويت مثلها
وعيوني مغوركه
«الحمد لله والشكر بردتي گلبي يمه وفرحتي
خواته
ردت عليه كمت من يمهن فد مره صايره زهره
وياي طلعت سمعتها كالت
« ام عباس باجر ان شاء الله نعقد الهم
رحت لغرفتي جسمي كله يرجف وماجاي
استوعب الصار كلشي صار بسرعه بسرعه كعدت
زهره رجعت ليمهم تردد
«وج هذوله غير مستعجلين ماصدكت كلتي اي
تريد تعقد باجر
وره ساعه طلعن من يمنا امي اجت هي ونسوان
اخوتي ليمي كعدن كالت
«مااعرف ليش گلبي ارتاح لكلام الشيخه شفتها
حبيتج يمه هي وبناتها وكالت الا اسويلها
عرس مو صاير بالولايه ومااقصر
وياها بشي
«اي ليله كالت شتريد نسوي الها بيها خير وتدلل
زهره كملت وره امي وانه ساكته وصافنه عليهن
نعيمه كالت
«عمه شفتيها من سالتي على حرمته ام دعاء موافقه
لو لاا على زيجته الثالثه شلون تبسمت
باستهزاء
«اي شفتها هي مو صلح وياها يمه وحده تكره اللخ
وهالزيجه تريدها الشيخه حتى تكسر خشمها
مره ثالثه وهم يريدون ولد للشيخ
الكل سكت من امي ردت هالرد كملت وهي
تعاين اليه
«يمه عقدج باجر وكلشي محضري حتى البدله
جابيتها الج صفاء من بغداد وراح يعقدون يمنا
والحفله يمهم بدارهم
شاريد احجي لعابه بايدهم صرت الكل تخطط
وتنفذ وانا بس ساكته لا حول ولا قوه لي
بس اهز براسي
ابويه اجه وعرف بالصار هو واخوتي ماحجه شي
بس جنت اشوفه مهموم ومقهور مابين له
انه مقهوره من الصار
بلعت قهري وكتمت حزني مانمت ولا كدرت اغفى
كعدت راسي فد مره يوجعني ماكلت غير شي
قليل امي ونسوان اخوتي حسن
بيه بس مابيدهن شي
يسونه اليه
العصر اجني خوات الشيخ واخذني انه واهلي
لبيتهم طبيت ماااعاين لاحد اسمع السلام واحس
العيون تريد تاكلني اكل الهلاهل اشتغلت
انتبهت بيتهم متروس نسوان تلكتني ام الشيخ
وجدته شافتني تبتسمت وباركت لي
مشيت من يمهن سمعت كلام
من رحت للغرفه الجوه
« يا،،، هاي شكد حلوه ،،وبيضه
وشوفن العيون شكبرها،،،
صلوات علي النبي،،،وينها ووين
حليمه،،،،هاي گمر وراح تخبله للشيخ
«والله وكعد حظها لبنت علوان
وصارت مرت الشيخ
الكلام الاخير زرف گلبي وقهرني كلش گضيت ايد
امي بخووف طبيت شفت بنات اثنين
صفاء كالت الهن
« هاي مرت اخويه،،،اريدج تطلعيها گمر
« هي گمر ،،،ماشاء الله ومن راح ارتبها
محد راح يعرفها ابد
« ههه اي اريدج شنو تطلعيها لعابه اريد الكل
يشوف احنا شاخذنا ملكه جمال وشيخه النسوان
« ههه ادللي عمري
اسمع امي تقره عليه ايات وخايفه عليه من الحسد
كعدت ونسيت نفسي ظليت بس افكر
بهل اليوم وشراح يصير بي
مر الوقت مااعرف شلون انتبهت وره وين
اني مكمله تسريحه ومكياج
الشعر نازل على طوله ومسرح لجوه
والمكياج نازك بس الشفه حمرة طوخ صفاء واكفه
يمي وتنطي تفاصيل لام الصالون كملنا
وكالت
«يله هسه البسي الفستان لان ماظل شي للعقد
طللعن من يمي ظلت بس امي والبنات لبست
فستان ابيض الصدر تور شفاف ومقسم
علي من الخصر وينزل للركبه
كلوش
«ووج ليله طلعتي تخبلين عمه شوفيها شلون
تغيرت وصار بعد احلى
امي تعدل بالشال فوك راسي وتبجي مخنوكه
واختنكت وياها كالت
«اريد افرح بيج يمه بس مقهوره لان زواجج صار
هيج بساع بساع
دمعتي نزلت نعيمه مسحتها وكالت
«لاتبجين ليله فال مو زين
االباب اندك زهره راحت اله فتحته طبت حياه
وصفاء شافني صفنن عليه وابتسمن
جرن صلاوات وكالن
«صلاوات على النبي طالعه تخبلين اليوم راح تنصابين بالعين من وره جمالج
الشيخه طبت وهم جرت صلاوات من شافتني
كالت بفرح
«يله يمه امشينا الزلم التمت يمنا والسيد اجه
عاينت لامي بخوف اجت ليمي گضت ايدي
وكالت بخنكه
«يله يمه امشي
مشيت وياها ارجف من قهري ودمعتي بعيوني
كعدوني بكوشه ماشفتها شنو هي ولا شفت اي تفاصيل من التجهيزات السوها اليه عيوني مغوشه
ومنزله راسي احس العيون عليه
واسمع همسات النسوان
وره مشوار اخذوني للباب كعدوني يمه
وخلوه طشت مي بي ورد وهيل بين اصابعي
فتحو القران بين ايدي صفاء كله سوته وتعلم
بيه السبد بده يعقد اسمع واردد وراه
بصوت ناصي فتح الباب
وكال
علي صوتج بنتي حتى يسمعون الكل
گوه عليت صوتي سال
انتي موافقه على الشيخ رضا بن علي
اجه بين عيوني ابويه وكسره نفسه هو
واخوتي كلت
« اي موافقه
رديت وغمضت عيوني بقهر دمعتي نزلت
نزلت الشال على وجهي مااريد احد يشوفني
سمعت هوسه الزلم وره مشوار وعرفت تم عقدنا
«كومي يمه اكعدي بمكانج
الشيخه لزمتني وكعدتني انه وامي والبنات ،،،
بصف حبوبه الشيخ الي حضنتني
بوستني ،،،وحجت بفرح
« مبروك يمه وشايفين كل الخير
ماارد امي ترد بمكاني كاعده مااعاين لاحد
مخنوكه ولا عبالك عروس واليوم عقدي
الفرح بعيون الكل الا عيوني
انه الجانت مغوركه وكاتمه
دمعتي گوة
فض العقد وره ساعه والنسوان كامن يرجعن
لبيوتهن من فرغ البيت صفاء اجت وكالت
«تعالي وياي
«وين اروح
سالتها اعاين لامي ضحكت وكملت
«تعالي وانتي تعرفين
«يمه تعالي وياي
«هههه لاااا خاله تضل امشي بس انتي
عاينت لامي بتوسل هي والبنات اشرن
روحي مشيت وي صفاء اخذتني للمضيف مال بيتهم
فارغ مابي احد ريحه البخور تارسه
الجو كالت
«اكعدي هنا اريد اطكلج صور وحدج
«هاا يعني وين اكعد
«هنا بهذا المكان
كعدتني ووخرت الشال من شعري عدلته
ونثرته على جتفي
طكت اكثر من صوره وكالت بضحك
«ضلي هنا هسه اجيج
«عفيه صيحي امي
«عوفج من امج هسه وخليج يمي
اشرت على روحها خربانه ضحك راحت من
يمي وسدت الباب وراها ظليت افر
براسي وگلبي يدك بسرعه
وره لحظه باب الخارجي انفتح طبت هي
مبتسمه وكالت
تفضل شيخ
گضيت الورد بقوه من عرفته هو راح
يطب عليه
رضا
وره مافضيت العقد
ورحت وي الزلم للمضيف
كعدت وي ضيوفي ،،،، وره ساعه الكل راح لحاله
ظل بس حيدر ابن عمي يمي وكم واحد من اهلنا جهاز دك برسايل جانن من صفاء فتحتهن
سالني
«شيخ شوكت تاخذ
«قريب مااطول ان شاء الله
رديت علي وبعدين عاينت الهن صفنت من شفت
بنيه عبالك حوريه مو بشر كاعده منزله
راسها وتعاين لورد بايدها
«شيخ اترخص انه
رفعت عيوني من حجه وياي هزيت راسي
باي كام من يمي وبقيه الولد ترخصو وراحو ويا
جهازي دك جانت صفيه فتحت الخط
ضحكت كالت
«شيخ تعال حتى تلبس الحلقه لمرتك الحلوه
جبتها الك بالمضيف حتى تاخذ راحتك وياها
ابتسمت من كالت هالكلام كلت
«ولا تكعدين راحه ولج
«هههه شفت الصور مو
كمت وكلت
«اي شفتهن
«ههه تعال شوفها على الطبيعه احلى
بكل خطوه جنت اخطيها للمضيف مال بيتنا
جنت احس بفرحه وعبالك واحد ان يگلي انه
راح اشوف الخير على وجهه ليله بنت
عم علوان امي جانت واكفه بره
ومبتسمه اجت عليه حبتني
من خدي وكالت
«مبروك يمه وشايف كل الخير
«تسلمين شيخه
رديت عليها كملت بفرح
«تعال وشوفها لعروستك
طبت قبلي وراها مشيت صفيه يم ليله
مبتسمه شافتني كامت تهلهل لي ابتسمت الها
اجت عليه حبتني وكالت
«مبروك خويه الله يرزقك منها الولد الي تريده
«امين
رديت وعيوني راحت للكاعده ومنزله راسها
امي راحت الها ماادري شحجت وياها
كامت وماتعاين اليه ظليت واكف بمكاني
وانه اتمعن بشكلها امي اشرت لاختي طلعن من
يمي مبتسمات دارت وجهها عليهن وبعدين عاينت عليه صفنت بالعيون وسيعه كلش
والخلقه تخبل يلالي المي
بلعومها من حسنها
بلحظه مااعرف شصار
بگلبي كام يدك
بسرعه
نزلت راسها من شافتني صافن عليها مشيت الها
وكفت من انتبهت رجعت ليوره وعدالك
خافت مني كلت
وره لحظه
«مبروك ليله وان شاء الله مااقصر وياج
بشي
ماردت ولا عاينت علي لمحت دمعه نزلت
على الخد عكدت حواجبي وكلت
بگلبي
«هاي انجبرت عليه
مشيت الها عاينت عليه
بعيون مغوركه الوجه صار احمر دم وزادها جمال
خليت مسافه بينا وسالت
«ليش تبجين احد جابرج عليه
بسرعه هزت راسها بلااا كملت
«اكيد ليله
دارت وجهها مني ماردت مديت ايدي وكضيت
خدها رجعت راسها ليوره وعاينت
لي بخوف كلت
«سالتج ردي عليه
عيونها بعيوني ومااعرف شسوت بحالي گلبي
حسيته مو الي صار وشعور احتلني
واول مره اجربه واحس
بي
«موش مجبوره
كلمتين طلعن من حلكها وخلتني اصفن علي
كلشي حلو بيها وماجنت متوقعها هيج
العيون لونهن عسلي
بدل ماتدور وتبحث علي الروايات خليها علي تليفونك وحمل تطبيقنا
