رواية سمرة الفصل الثاني 2 بقلم وسام الفراجي

رواية سمرة الفصل الثاني 2 بقلم وسام الفراجي

قبل ما طبينا للغرفة فكرت تفكير شيطاني كلت لازم اخربط نفسي و الي يصير يصير واخرب كل تفكيراتهم واحلامهم بلكي الله ويودوني مستشفى والله يسهلي اشرد منهم وشيصير خلي يصير احسن ما يكولون تزوجها منغولي .. 

(ملاحظة.. كلمة منغولي ما تعبر عن رأيي وانما في القصة هكذا )

جاي يهوسون حتى يطببونه للغرفة اني غمضت عيوني لزمت راسي سويت نفسي دايخة وجان اشمر نفسي عالكاع ..

اني وكعت تمثيل بس من خوفي التمثيل هذا صار عبالك صحيح لان وكعت ع راسي صحيح وتعورت صحيح صارت هوسة واني مغمضة عيوني .. 

صوت زلم وخروا عنها وخروا خلي تتنفس 

وزلم انوب شيلوها للسيارة نوديها للمستشفى القريبة الي هنا

واسم صوت ام دوحي تكوللهم..

 مابيها شي مابيها شي شيلوها للغرفة هي تصحى هاي لان مرتبكة وخايفة عادي كل النسوان هيج ..

بكلبي اكول كلها النسوان الا انتِ لان زلّامية 

خفت لا يشيلوني للغرفة عاد واورط نفسي بالزايد حدما اسمع صوت زلمة يكلهم كل عقولكم ملتمين فوكاها شيلوها عمي للمستشفى متشوفوها شلون صارت صفرة .. 

اني شمرت نفسي كل حيلي بحيث الي يشوفني يكول ميتة واسمع الزلمة يكلهم راح تموت وتبتلون بيها ..

صرت احط ايدي ع وجهي و أون بصوت لان ماكدرت اضبطها واني فاقدة ..

وحدة لزمت الفستان واثنين شالوني واني عندي فضول وين شالوني بس مكدر افتح عيوني انكشف وصرت أون شمروني بالسيارة ومشوا بية بسرعة والسايق يكول للي يمه شوفها خاف ماتت ويردله لا جاي تتنفس كبل فوتوني للمستشفى وبالسدية ركض حدما اجت الدكتورة وفحص عالسريع وحطت ايدها ع كصتي وفحصتني انوب وكالتلهم عدها هبوط حطولها مغدي

العالم مستغربة مريضة وبملابس عرس وفستان فالعالم صابها فضول ماشايفين هيج يريدون بس يعرفون القصة 

حطولي المغذي وكالولهم لازم تخلصه يلا تطلع ..

وصلت ام حودي بالسيارة الي ورانه .. جان تكلها دكتورة هاي عروس شنو يخلص مغذي شنو انتظروا نريد نخلص هالعرس

دكتورة ريم : واذا عاروس يعني مو بشر ! لازم تخلص المغذي واذا تريدون تشيلون المغذي ع مسؤوليتكم ماعليه اني .. 

ام حودي : ننتظر شنسوي امشوا امشوا خلي نكعد برا نتنفس هنا كلها ريحة علاجات ومرضى تخنك الريحة ..

اخذتهم وراحت والله معرف منو وياها اصلا .. 

خليتهم الما يفرغون المكان .. 

شفت دكتورة ريم .. 

صحتلها دكتورة دكتورة 

ـ ها

ـ باليستر ع عرضج اريد اطول اكبر وقت ممكن (هي تفاجئت من كلامي ) 

ـ ليش مو انتِ عروس واليوم المفروض يوم مختلف وهالحالة هاي مفروض مستحية منها لان الكل ديحجي عروس متخربطة واجت للمستشفى 

ـ دكتورة قصة طويلة بس اكلج ترا مغصوبة ع هالزواج واني ماريده لان منغولي واهلي جبروني عليه .. 

بهاللحظة لمحت ام حودي مددت راسي ع سدية وصرت أون وفهمت الدكتورة وصارت تشوف المغذي الي بيدي تتلافه الموضوع .. 

ام حودي : ها دكتورة بشري 

دكتورة ريم : عدها هبوط قوي ولازم تاخذ مغذي وتظل اقل شي هنا ساعتين ..

ام حودي : دكتورة الله يخليج يا ساعتين غير الدنيا ملتمة وعرس وخبصة 

دكتورة ريم : خالة شنو بيدي عليج المريض هيج يتطلب ليش جبتوها غير تتعالج 

ام حودي : طلعيها طبها مرض حيشاج

دكتورة ريم : اطلعها بس توقعين انتِ بمسؤوليتج طلعت خاف يصير شي انتِ تبتلين بيها اني براء من اي شي يصيبها.

صار بيها توقيع ومسؤولية خافت ام حودي وكالت لا يابه شوقع هو اني اعرف اوقع شمدريني شيصير بيها 

يلا يابه نصبر شنسوي صاحت واحد من الموجودين وكالتلهم جيبونا شي بارد نشربه بهالحديقة بين مايخلص المغذي 

عافتنا ام حودي وراحت هي وشلتها ..

مباشرة اجت الدكتورة كالتلي انتبهيلي زين صح راح ادخل نفسي بمشكلة بس اني عندي هدوم وياي بجنطتي لأن مرات خفر ليلي روحي لذيج الغرفة بدلي فستانج واطلعي من الغرفة هاي طبيعي ولفلفي نفسج حتى ميعرفوج .. 

بدون تفكير سرعت للغرفة وخايفة تطب هاي السعلوة بس الفستان مكدرت افتحه وهاي دكتورة ريم راحت لغرفة الممرضات حتى تبعد نفسها عن الشبهة .. 

فتت للغرفة غرفة بيها ميز وبيها جنطتين سديتها وردت اقفلها ماتنقفل .. 

ردت انزع الفستان مكدرت الا واحد وياي 

حاولت يمين يسار مايقبل ينزع الا واحد يفتح السحاب الي ورة ويرفعه وياي ..

بالله شلون مشكلة هاي انوب .. ردت انزعه بأي صورة حتلو يتشكك بس بدون فائدة ..

فتحت باب الغرفة بس حك عيوني تا اشوف بعد محد حس عليه بعدهم بالحديقة لو شصار ..

ماكو احد الظاهر بعدهم مو منتبهين ..

طبت ممرضة منقبة للغرفة اني فزيت وهي متفاجئة كالتلي

ـ شعندج هنا منو انتِ؟

ـ هلا بيج اني من طرف دكتورة ريم

ـ شو فستان ومدري شنو دخت اريد افتهم

ـ ماكو شي تفهمك دكتورة ريم 

سدت الباب وراحت لدكتورة ريم تفتهم شديصير تحسبني اسرق شي من غراضهم ..

مدري عاد شحجتلها دكتورة ريم ..

بهاللحظات هاي الدكتورة ريم تعبالي اني بدلت ونزعت وطلعت وكاعدة بغرفة الممرضات يتمضحكن واذا اجه مراجع وحدة منهن تروحله ..

فحسيت الدكتورة تحاول تبعد شبهة حتى من يجون ويشوفوها ماكو تكول جنت مو يمها

طبت منى اختي سريع وخايفة تدورلي وتصيح وين العروسة الي تخربطت ممكن تكولولي وين صارت وين هي ..

وكتها جان غلط كلش هسة راح تلم الدنيا كلها عليه عالصوت وطبعا هي كلشي متعرف وشنو صاير ..

جاية لان واصلها خبر متخربطة لا امي اجت لا رشا لان يكرهوني لو بالنار محتركة هم ما يهز شعرة منهن 

سديت الباب بخوفة وحذر وصرت اسمع اصوات زلم نسوان وتداخلت الاصوات ومعرف عليه لو شلة ثانية لو شنو القصة زين وين اختل وين اضم روحي واني لابسة فستان عرس شكبره مكدر اضم روحي لان يبين لو اختل مدري وين خرب بحظي انوب لطش الفستان 

ختلت ورا البردة كلشي مبين اصلا وواضح ياربي شهالمصيبة بس لا احد يفوت للغرفة انوب دكتورة ريم كل عقلها هسة اني طلعت ورحت شيخليني لهسة ..

واني افتر ادورلي شي مكان اضم روحي بي سمعت صوت ام حودي تصيح ع ممرضات وينها العاروسة الي تخربطت هنا وين راحت ادري مستشفى لو مدينة العاب وتضيع .. 

ردتلها دكتورة بصوت عالي اني ما احرس بمرضاكم بيج خير اوكفي يم مريضج مو تشربين ببسي وتاكلين كيك حضرتج بالحديقة وتريدين نحرس مريضج .. 

خاص ب #وسام_الفراجي 

جان تكول دوروها هنا بالغرف هاي اكيد موجودة وصرت اسمع صوت واحد ديتحرك قريب الباب وسمعت فتحوا باب الغرفة الثانية .. 

ماظل عندي اي فرصة غير اختل ورا الباب لعل وعسى ما ابين والصوت يقترب ويقترب ويقترب ..

اني شعر راسي وكف من الخوف جان ينفتح الباب الي يم غرفتي ويصيح عمة ماموجودة تكلهم افتحوا الغرف الي يمكم .. 

سمعت طركعة مشي ع باب غرفتي .. 

تحركت يدة الباب ..

            الفصل الثالث من هنا 

لمتابعة باقي الرواية زوروا قناتنا على التليجرام من هنا