رواية في حجر الافعي الفصل الثاني 2 بقلم شمس العراقيه

السلام عليكم متابعيني الغالين 🤍

هاجر

ـ كاعدين اني ونورس نملي من النهر وما نسمع الا صوت رشاش والطيور تتطاير من بين البساتين يارب دخيلك وج كومي يمصخمه لايلوحنا طشار ونروح بيها، نورس كامت وعثرت وانجبحت ؏ وجهها وجيعه شجاج انثولتي وثولتيني وياج انطي درب

نورس ـ وج انخلست اخاف تجيني طلقه تايهه ويروح شبابي فدا العربان وطلابيهم الما تفض غضب على روسهم يوميه طلابه مابيهم واحد يفضها ونخلص والله شابت گلوبنا يوميه طلابه

ـ دتمشي هسه مو وكت لغوتج ما نعول نوصل بخير شلنا الجدوره ورجعنا بيها فارغين خل نفلت برواحنا سالمين عود نرد نترس ماي من تهد الطلايب .

" واحنه نمشي فاتت من يمنا سياره بيكم ومبين مو من عربنا مليانه زلوم كلها مشمغه ملثمه وبيدهم سلاحهم ونثروا التراب علينا عمونا عمي ، نثرت ربطتي وصحت وراهم مطيروين كصفكم الله وخلصنا من طلايبكم عوذه حتى عوذه هم لفيتوا على عربنا وما وراكم بس الطلايب

ـ وج لسانج غضب ؏ يومج لا يرجعون ينخلونه نخل برشاشتهم ما تشوفيهم شلون محزمين وناثرين الشر ترى عربهم شرانيين وما عدهم لا ذمه ولا ضمير عادي يمطلونا اني وياج ولا جنهم.

ـ امشي نولي كبل لا تحمى، سرعنا خطواتنا وصار صوت الطلق بفلس يارب سترك وفاتت سياره بيها ثلاث زلم السايق خفف السياره وضل يعاين النا والبصفه ضربه ؏اجتافه وسرع سياقته ومشوا

ـ هذول هم من عربهم مبين مو مثل هذولاك سياقتهم حلوة ما عمونا بالتراب

ـ مدري هسه شلج بيهم خل نوصل بسلامه مبين علكت وانه اخافن ؏ ابوي لاتصير طلابه جبيره يارب استر

؛ وصلنا ولكينا امي وخالاتي وام نورس كاعدات ويدعن تفض ع خير ويفترن مخبوصات هنا شافنا هجمن علينا ودك غلط ومكافخ.

أمل ـ من خفت عمارجن نمتن يم النهر ربعجن من يمت ردن لو صاير شيء عليجن شنكول شنصخم نكون بطلابه نصير بطلابتين يا صخام الوجه، امشن انكلعن من خلقنا

هاجر ـ مشينا من كدامهن كعدنا ؏ صفحه وحده تباو؏ الثانيه ونتتظر الطلابه تفض ؏ خير ومر وكت واجه ابوي وخوالي وزلم من العرب وشيوخ معكله نزل ابوي مزعوج ويصيح

ـ كاعنا شنهووو غصب ما بايكين من احد عينك عينك جاسمونها بيها هذا مو حل عادل اكلوا حقنا وتكولون فضت الطلابه لا والله ما فضت وكياعينا الاراضي خذها اخذها لو يضل يوم من عمري حقي ما اتنازل عنا جا هي وليه

الشيخ ـ يا ابو هاجر احنا جاسمنا الكاع جفييان شر وما نريد الطلابه تصير طلايب وما نريد الدم يسيح بالكاع الله وعباده ما يرضون بهذا العمل هما ما عدهم ذمه ولا ضمير وما يفهمون بالحجي چا انت شمالك ما شفت حناش شسوا ايده والرشا*ما يهاب ولا يحترم احد

ـ الصوج المن لابوهم معكل وخابص روحه وهو جايب ولده بكد الدود وشايلين السلا*ويخوفوني بيهم عود ولدي حزام ظهري من كبر يطمني اذا اتفاخر بزلمه كل احترام ومنطق ما عنده

هاجر ـ ضلوا يحجون واللي فهمته قاسمين الكاع كل واحد ماخذ نص وبين الكاعين مسوين حد مثل شارع بين الكاعين ومحد يعبره واذا صارت والحلال والغنم او الهوش راحت ؏ الكاع الثانيه تصير طلابه جبيره يعني مختصر الطلابه الاثنين يكونون كد الكاع (الارض ) وكلمن يجفي شر الثاني وهيج وفضوا الطلابه مالت الكياعين الاراضي الزاعيه بس هذا كله ابويه ما مقتنع ولا راضي بالجسمه واعصابه فايره ويتوعد الهم بالشر والله يستر من القادم !!

" __________________

أشهاب

ـ مجموعين ومجيد (حناش) دمه فاير ما ينطي درب الواحد يحجيله حجايه خل نعرف ساس السالفه تهجع بمكانك

مجيد ـ انه بالنص ما ارضى لو الكاع كلها لو ما اخذنها يضحكون علينا ياخذون نص وينطونه الباقي وحتى مو نص عدل نصها لغفوها ولد الخايبه المغانيث

صكبان ـ مجيد جفي شرك عن العرب ما ناقصين طلايب الاوادم ما يردون تكبر السالفه وجبيرهم وافق ؏ الجسمه وانه وافقت لن ما اريدن السالفه تكبر ويتركب الحك عليه وانه اخافن عليكم لا واحد منكم يصيبه مكروه

مجيد ـ الكاع كاعنا من يوم يومها شصار وصارت كاعهم

اشهاب ـ الكاع كاعهم وهذا الشيء نعرفه ونحرفه !! ابوي باوعلي جن ما مرتضي ؏ جلمتي تقرب مجيد وكال

مجيد ـ لا بالله وانت شمدريك بالكيعان وهل السالفه كلها

أنت بالاساس جنت ويه الشريفه امك من هجيتوا للبدو

اشهاب ـ من جاب طاري أمي الدم صعد برأسي ضربته برأسه خليت الدم يرش منه ونمت عليه خنكته بين ايديه ويفازعون بينا واني ناوي ؏ موته هالخسيس اذبحك واتغسل بدمك اذا تجيب طاري شرف امي وتندسه بحلك الوسخ امي ما ينجاب طاريها لا والله واللي رفع الكون دون عمد احرك الاخضر واليابس واطمك بحفره وانت حي

صكبان ـ اشهاب عوفه عوفه گاااافي تخبلتواااا

اشهاب ـ رفعني ابويه من عنده وهو وجه ازرك ويطالب النفس طلابه نفضت التراب من الملابسي والشر بين عيوني باوعتلهم كلهم اذا اكو احد اباله حجايه ؏ امي ويندس شرفها خل يكولها هسه علمود ادفنه بكاعه .

عفتهم وطلعت برى أحتركت حرك الكواويد

أسماعيل ـ عمي ابو عرب

اشهاب ـ عوفني أسماعيل رحمه لاهلك، عافني وبقيت لوحدي احمس قهري جارعه من سنين طويله هو منو يسلم من شركم عاد امي حتى وهي شردت منكم ما سلمت ولا تهنت الله يسرلج وين ما تكونين.

أنا أبن البدويه يجمعني بيهم بس الأب أخواني من ابويه مجيد اخويه الجبير بيهم نصيحله حناش، متزوج أربع نسوان سعاد زوجته الجبيره وديان وسراب وأثيله وعنده خلفه خير من الله

وبعده ماجد هذا المثقف دارس ومتزوج بالولايه ما نشوفه بس بالعيد مو دائماً .

وبعده مصلح متزوج زوجته أميمه عنده خلفته بس بنات وكلهن حلوات وشعرهن أصفر وراه ومناف هذا أعزب وبعده أمجد المدلل والعزيز والغالي .

والبنات عندي ستة أخوات عروبه وياقوت وخلود ورحمه ورحيل ورساله اربع متزوجات وأثنين كاعدات .

_____________

نمارق

_ فتحت عين وحده باوعت الساعه بالـ الوحده ونص فاتنني الدوام شيخلصني من بابا يضل يهلهل عليه اليوم كله.

نفضت الغطا بملل جريت التلفون أمي متصله بالعشرين مره تجاهلتها كمت غسلت وسويتلي لفه جبن وكعدت اكل ورجعت أتصلت جاوبتها نعم !!

ليلى ـ شو هيج تردين ؏ أمج أحجي عدل أني أمج ولج

نمارق ـ أعرف أنتِ أمي، اختصري شتردين

ـ طالعه ؏ أبوج مالكم مزاج تحجون ويه البشر مثل الاوادم شايفيين الناس بعين صغيره أنتوا وبس

ـ تحجين هسه لو تفتحين السيره اللطيفه الخفيفه عن بابا

ـ أبوج رجع لو بعده

ـ بعده تعرفين موعد رجوعه ليش تسألين

ـ كلت يجوز اليوم ما طلع لدوام

ـ لا طلع تعرفينه من يومه ملتزم بدوامه وهسه عندج اسئله ثانيه

ـ نمارق أمي شو هيج تحاجيني أني امج حبيبتي لاتطبعين نفس أطباع أبوج، أنت ما الج دخل بالمشاكل البينا خليج نمارق بنتي الاعرفها

ـ يمه أني تغيرت وهواي هم من يوم رحتي واخذتي نجوى وياج وعفتيني من يوم تزوجتي وما سألتي عني

عليج الله اكو ام تأخذ وحده من بناتها وتعوف الثانيه تتتلو؏ وراها

ـ أنجبرت وأبوج خلاني بوسط هالخيار الصعب لو أنتِ لو نجوى

ـ ليش ما أختارتيني بدال نجوى تعرفيني روحي معلكه بيج ونجوى حبيبة وصديقه بابا ليش عفتيني

ـ نجوى صغيره وتحتاج رعاية أنتِ كبرتي وعليج الاعتماد وأني لو بيدي أثنينكم اخذهم بس اب..

ـ قطعت الخط بوجهه وقفلت التلفون وشمرته ؏ الثلاجه وعفت اللفه ؏ الميز ورجعت شغلت التلفزيون بالاستقبال وكعدت أباو؏ فلم بي نوع من الحب والرومانسيه!!

" أنفتح الباب عرفته بابا لن معارك هو والباب سمعت صوت شمرته العلاكه ؏ الميز تجاهلت ووصل لعندي بقيت مستمره أباوع الفلم لحد ما كال

صائب ـ شُنــــو هالخربطه تأكلين وتشمرين ؏ الميز ومنو ينظف وراج

نمارق ـ اني هسه يخلص الفلم وأنظف

ـ ماشي وليش ما رايحه لمدرستج أني مو وقتت تلفونج ليش كعدتي ورجعتي طفيتي عناداً بيه متروحيين بيمن تعاندين أنتِ

ـ ما اعند بإحد بس مالي واهس

ـ وليش ما الچ واهس شناقصج شو كله حاضر وطلباتج أوامر شتردين بعد

ـ باوعتله بنص عيونه أريد أميييي تكدر تجيببها

ـ گاااافي عاد أمج راحت والله سهلها اني وياها ما اتفقنا وأنفصلنا شنو اول اثنين ينفصلون

ـ لا مو أول اثنين بس ما فكرتوا بعواقب هالانفصال فكرتوا بس بنفسكم وبالاخص انت مشيت ورى حبيبتك السابقه كلت هيج واجاني كف وبقيت لازمه خدي مصدومه

ـ هالمره عليتي صوتج بوجهي ضربتج كف مره ثانيه يا نمارق اهري جلد هري وانعل والديج بنت الزفره امشي ولي حضريلنا سم نتسممه امشييييي

ـ عبرته ورحت المطبخ جايب دجاج وتمن جهزته بالماعون وطلعت اللبن رتبت الاكل ؏ الميز وطلعت هو صار بوجهي لزمني من ايدي منعني

ـ تعالي اكلي وياي اعرف بيج ما مأكله لفتج ع النص عايفتها يلة بابا

ـ يحاول يرضيني فلتت ايدي منه حابه ابقى لوحدي من اجوع اني اكل عن إذنك، عفته ودخلت غرفتي احس نار مشتعله بنص صدري لهيب ما يطفئ مو كادره اتعود ؏ الوضع البيت يخنك اخ منج يمه اختاريتي حياتج وعفتي الباقي برأسي .

" نمت بوسط جربايتي وحضنت مخدتي ودفنت رأسي بيها وأتهربت من كلشي بقيت صافنه بوحدتي وبالكف اللي حصلته من بابا الحنين واول مره يسويها ويقسي عليه هو احن اب استاذ ومدير مدرسه بنفس الوقت افشل اب بإدارة اسرة ما كدر يحافظ ع هالاسرة وبسرعه تنازل وضع كل الخيارات كدام ماما حتى بدون ما يعارض ولا يعارك حتى رغم هو الغلطان بس جان هواي يحبها بس الحب لوحده ميكفي....

كثرت صفناتي لحد ما غفيت .

" يوم عن يوم أسبو؏ عن أسبو؏ شهر عن شهر بدأ هالفراغ يمتلئ بديت أتعود تلاشت صورة أمي من مخيلتي وبابا رغم أغلاطه بدمار هل العائله كان الداعم الوحيد بحياتي هو يدرسني ونطلع نتونس سوه ناكل بمطاعم ونطلع بيت جدو ما حسسني اني ثكيله عليه ولا فد يوم تعاجز من طلب طلبته منه يمكن الكف اللي ضربه اليه خلاه يتندم ويحس روحه هو السبب الأولي .

مرت السنين وتعودت ؏ حياتي أدرس وأجتهدت بدراستي وبالعطله اروح يم بيت عمي خلدون صحيح بناته وكحات بس اني اروح بيبي الانسانه الارتاح بحضنها

" جنت نايمه بغرفتي وفزيت ؏ صوت صراخ ومجادله بالكلام وأستغربت الصوت أمي !!! شجابها شذكرهـا

نفضت الفراش وفتحت الباب لكيتها تحجي ويه بابا بعصبيه من شافتني ضلت صافنه بملامح وجهي تقربت وحضنتي وتبجي وتلمس وجهي واني ابرد من الثلج اي شعور تجاهه ما باقي فعلا امي تلاشت

ليلى ـ نمارق حبيبتي ليش متغيره هالكثر وكبرانه وملامحج متغيره شنو ما اشتاقيتي اليه باوعيني بنتي

نمارق ـ طبعاً أكبر قابل ابقى الطفله طالبة ابتدائيه اللي عفتيها ترى الزمن يمشي والوقت سريع ماكو حال يبقى ؏ حاله، شعندج جايه كلت هالكلمه وبابا باوعلي بنظرة عدم رضا !!

ليلى ـ أجييت أخذج تعيشين يمي تعبت وأني اعاني من فراكج خلاص اني طلعت لبيت لوحدي واستقليت وجهزتلج غرفه الج ولاختج نجوى كلش حلوة وراح تحبينها

صائب ـ لا تحاولين مستحيل هالشيء يصير قبل سمحتلج تاخذين نجوى كلت أم وكلبها محترك ع بناتها بس هسه ترجعين تأخذيهن اثنينهن لاااا لهنا حدددددج

ليلى ـ اني بنتي واريدها تعيشششش يميييي انييييي امهاااا بناتي من حقي اني ولو هالكثر هاماتك بناتك جان عرفت تحافظ ع هالعائلة

ـ لاترجعينا للمربع الاول العندي حجيته وهسه ياريت تفضلين وتاخذين رجلج الواكف يم الباب ينتظرج عيب من العالم شيكولن علينا

ـ انت هذا الحارك دمي رجلي

ـ طلعيييييي براااااا بيتي وما الج بنت عندي نمارق تنسينها مثل ما هي نستج خللااااااص انتي طلعتي من حياتنا وكلشي انتهى شرجعج هسه ليكون حنيتي

نمارق ـ يحجون بينهم بس بمكابره والحب مالي عيونهم بالاخص بابا يحجي ودمعته بطارف عينه ومخنوك لدرجه يحجي ويترجف موقفه دمرني من كال كلمته ماما نزلت رأسها وتقربت بوستني ومسحت ؏ شعري

ليلى ـ جان بنفسي أخذج تعيشين يمي وما اخليج بعازة أم ولا تشعرين بالوحده ولا اخليج تكرهيني بس الزمن نفذ حكمه عليه دربالج ؏ نفسج ماما

نمارق ـ نزلت نفسها شالت جنطتها ومسحت دموعها وبابا صد وجهه عنها انطاها ظهره وهي ضلت صافنه عليه وأستغفرت وتوجهت ناحية الباب ومن سدت الباب بابا فز وخله أيده ؏ گلبه وباوعلي بنظره حزن عفته ورجعت لغرفتي حزينه ؏ وضعه دامك بعدك تحبها ليش خنتها أكثر من مره ويه ماضيك اللي دمرك ياما أنطتك فرص علمود تنقذ هالزواج من الفشل وانت كلهن نقضتهن علمود تلبي رغباتك وهدمت بيت كامل وشتتنا اني واختي .

" للعصر كعدت ولكيت عمي صباح موجود فرحت بشوفته سلمت عليه عمو هاجر شلونها عمه امل والله مشتاقتلهم جيبهم فد يوم وياك .

صباح ـ كلهم بخير ان شاءلله نجي فد يوم اي صائب شصار بموضوع ليلى خوما ناوي تنطيها نمارق ترة البنت كبرت وما يصير تعيش بيت بي رجال غريب كلنا ندري بيك تحبها وما ترفض الها طلب وحتى نجوى غلط تبقى يمها بس شسويلك

صائب ـ نجوى وافقت عليها جانت صغيره ونفس الوقت شفت ليلى شسوت عليها تبقى ام وهذن بناتها بس نمارق لا مستحيل اوافق تروح تسكن يمها وحتى نمارق ما تروح مو هيج بابا .

نمارق ـ أي بابا

صباح ـ اذا تضوجين تعالي وياي اهناك تتونسين وتغيرين جو وهاجر تفرح بيج.

نمارق ـ لا عمو غير مره ان شاءلله من رخصتكم اروح اسويلكم جاي، كمت وعفتهم يحجون جهزت الجاي واخذته وقبل لا اوصل سمعتهم يحجون

صباح ـ البنت كبرت ولو عندي ولد اخذها لأبني بس تعرف الوضع والافضل أنس من يرجع من الخارج نفتح الموضوع وياه ما بيها شي ابن عمها الوحيد والزواج ستر وغطا وتأمن عليها يم ابن أخوك

صائب ـ اني ما اعرض بنتي لزواج اله يريدها هو يجي يخطبها بنفسه بنتي مو رخيصه عندي ولا مستثقل وجودها بحياتي مستحيل افرط بيها شنو هالحجي صباح مبين متأثر بكلام اهل مرتك والمجمتع اللي عايش بي وفارين عقلك

ـ اهل مرتي ما الهم شغل اني احجي من صالحك وصالح بنتك الى متى تبقى هيج انت طول الوقت بالدوام وما ترجع انت والـ ٢ ما يصير بنيه مثل التفاحه بهل القصر لوحدها شنو انت متفكر متشوف بالدنيا شجاي يصير بيها ما سوالف ومصايب هذا عقلك شغله لو بس يم ليلى يشتغل عشره ع عشره.

ـ سد هالموضوع منا لوكتها الله كريم خل يخلص دراسته ويرجع ولكل حادثاً حديث اسكت لاتسمعك ما اريدها تفكر غير تفكير هي اللي مصبرتني ؏ هالعيشه.

نمارق ـ ايديه يرجفون ونص الجاي وكع بالصينيه رجعت رتبت الصينيه وصبيت جديد ودخلت الاستقبال قدمت الهم عمو صباح ضل صافن بوجهي وبابا غمرني بحضنه ويمسح ؏ شعري بحنيه

صباح ـ البنات زينة الحياة والله عندي هاجر تعادل الدنيا بما فيها حيل غاليه والله يحفظلك نمارق وتفرح بيها

صائب ـ تسلم ويفرحك كلبك

نمارق ـ ضلوا يحجون واني بالي مو يمهم بالي يم بابا اخاف يلين لكلام لعمو صباح ويقتنع بفكرة الزواج من انس ابن عمي خلدون رغم هو ولد ما بي عيب والكمال لله بس رجال شهم ودارس وتعبان ع نفسه ومثقف بس اني احس نفسي مو جاهزه لزواج ولا عمري مناسب اكون زوجه وام بيت واطفال بعدني صغيره الظاهر مثل ما كال بابا عقلية عمو صباح متأثره بالناس والمجمتع العايش بي

" قرر عمو يروح حاولنا وياه يبقى ؏ العشة ما اقتنع

صباح ـ ما اكدر عندي زرع وحلال ولازم اكابله غير مره وطلايب العرب الجبيره متفض

صائب ـ شلك بالسكنه بالعرب بيع العندك واشتري بيت اهنا وافتح الك مشروع وامن حياتك وحياة عائلتك يوميه مشكله ومخلي ايدك ؏ كلبك عمي هذول ناس ميخافون الله ابعد عن الشر وغنيله

ـ لا يمعود وين اعوف كاعي وزرعي وتعبي لمخانيث لا خويه شتحجي انت مو صباح يتنازل عن حقه.

ـ الله يجفيك شرهم دربالك لاتحتك بيهم خلكم بعيدين عنهم

ـ ان شاءلله حبيت اشوفكم واطمئن عليكم يلة استودعناكم

صائب ـ الله وياك يا هلا بيك سلملنا

نمارق ـ رجعت لميت الكطوف مال جكاير والنفاضات والاستكانات واني طالعه لكيت بابا صافن عليه تهربت من نظرته ما اريده يفتح الموضوع وياي.

صائب ـ بابا نمارق عود تجهزي نروح بيت عمج خلدون

نمارق ـ ان شاءلله ، كملت شغلي ورحت غرفتي تجهزت وطلعت لكيته يحجي ويه بيبي ويضحك معقوله حجه وياها لا ما اظن شبسرعه هو بعده ما راجع من الخارج لا بابا ما يقتنع بكلام عمو صباح اشيل الفكره من راسي احسن شيء .

" قفلنا البيت وطلعنا اني وبابا لبيت عمي خلدون عمي.

ومتجاهله اللي سمعته لن متأكده بابا ما يفرط بيه!

________________

هاجر

ـ يم النهر نورس تغسل ملابس وانه اغسل بصط الناس تصعد للقمر وانه وياج تغسل جنب النهر فرش، وفرشات وجودليات

نورس ـ يمعوده مو رحت بيت اقاربنا بالولاية يغسلن على السطوح والماي تقطر والزوليه ما تنظف اذا مو ماي جثير شحلاتها هسه نشمرها بنص الماي وتطلع تلج جديده وتلهث لهث من النظافة.

ـ بهاي صدكتي انه هم من اروح بيت عمامي كلهن يغسلن على السطوح وخطيه مايهم تقطر شيسون كل واحد وواقعه شكل وهما مهما يكونون احسن من عدنا

ـ شبيج تحنين وتونين على ريحة الولايه خبلتيني وياج ارضي بقسمتج وبسج عاد لو عندج وليف بالولايه وكلبج ضل معلك هناك سولفي ما اكولن لاحد انه سرج حفري وطمري

ـ لا يمعوده جفيني شرج يا حبيب تحجين عنه سكتي لايسمعنج الحبايب وعبالهن صدك عفتها كمت لفيتها وشمرتها بالماي واجفص عليها برجليه واكمز ونورس تضحك عليه وفزينا على هورن سياره نزلت ثوبي واندارينا اني ونورس خير سياره بيكم بيها اثنين نزل منها واحد لابس شماغ احمر ودشداشه لون بيجي تقرب مسافه وكال

مناف ـ يا بنت الناس حجي صباح وين نلكاه

هاجر ـ ومنو انتوا تسألون عنا خيررر شنو من طلابه هالمره

ـ ليش عرفيتنا احنا منو

ـ ليش اكو غيركم من العرب الجبيره

ـ اي صحيح نباهتج عاليه ليش انتِ تعرفين الحجي صباح

نورس ـ نفضت ايديها خيررر الحجي صباح يكون ابوها وجيرانه شعدكم جاييين وشو اخذت راحتك بالحجي وبعدين اللي اعرفنه الرجال يسأل رجال مثله مو جاي ع الحريم

ـ ؏ كيفج خيتي احنه هم حسبة اخوانج مجرد سألنا يلة رايحيين

هاجر ـ يحجي وياها بس عيونه ناحيتي احس نخلني نخل بنظراته ما شالهن من عندي مشه وصاحبه ما مرتضي حسيت وضعهم مو طبيعي التفت عليها بس لا علمود الكاع مالت ابوي

نورس ـ عوفج من الكاع شفتي نظراته شلون يعاين الج تكول عاشكج عمي انه من يمي غرت احجي وياه وهو ولا يمي اخذت ع نفسي مالت وبلت.

هاجر ـ سكتييي يمعوده الله ياخذج لسانج مسنيه كصري صوتج، رجعت اغسل بيها صاحت وحده من البنات وكالت

ـ خير منو هذول وشعدهم شرادوا منجن ولجن

نورس ـ شيردون قابل هم متعرفين تحجين مجرد سألوا عن دربهم وراحوا

ـ واكو واحد ما يندل دربه

ـ وانه شمدريني ترديني الحكه اسأله

هاجر ـ سكتييي عوفيها تحجي وتسكت لاتشنعنا بالعرب وامي وامج يعلكنا بالبنكه والله، ضحكت وغمتني، كملنا ورجعنا البيت واني هلكانه وتعبانه كبل تمددت ميته تعب

امل ـ هاا يمه خلصتي غسل الجودليات والبصط

ـ اي يمه خلصت، تمددت وحتى ما تغديت للعصريات رحنا اني وامي نشرناهن ورجعنا وبطريقنا مرت سيارتهم ولمحته نفس الشخص ونفس لبسه عاين النا ومشوا سريع خطف كلبي بسرعة سيارتهم، نغزني خليت ايدي على گلبي وامي كالت

أمل ـ يارب استرنا هذول شعدهم لافين العرب الله يجفينا شركم يا ولد صكبان

هاجر ـ وصلنا البيت ودخلنا الغرفه وأمي ترتب النضده اكولن يمه العرب الجبيره فضوا طلابتهم علمود الكاع

ـ ما معلوم ناس تكول فضت ناس تكول حناش ما يجوز منها وما يرضى بالقليل واحد شراني وما سأل عن احد وصاحب مشاكل وما وراه بس المصايب خبيث وما يخاف الله يشتري الطلايب بدم كلبه.

ـ دام هيج تعرفونه واحد راعي طلايب وما يخاف الله ابويه ليش ما يعوفهم احسن ما ترجع الطلايب تنعاد من جديد وياهم

ـ اذا هما عناد أبوج اعند منهم يريد يخلي رأسه برأسهم من ورى هالكيعان والاراضي والله اخافن عليه دمه حار وهو لوحده وخوالج فقره لا يحلون ولا يربطون ناس ما الهم بالطلايب لن يعرفون عربهم ما يهابون احد وناس كوايه وتخيلي ابوج واحد وهما عشيره صكبان مخلف من نسوانه الا بزعان وكل واحد تكول حايط هذا الباب ما يدخله كلهم يشبهون ابوهم

ـ خوفيتني وبديت اخافن على ابوي منهم

ـ لعد انه ما خايفه شايلة هم ابوج صبح ومسيه

ـ الله يحفظه ان شاءلله صدك يمه هذا حناش شكبره

ـ شكبره بكد البغل ابن العود لـ صكبان نسخه من ابوه متزوج اربع نسوان ويسولفون عنه جهاله ما ينعدون اغلبيتهم ولد.

ـ ما شاء الله شنوو من عائله هاي

ـ الله يبعدنا عنهم نسمع عنهم ولا نكرب الهم وبعدين شنهي اسئلتج عنهم شو اخذج الواهس وتسألين علامج

ـ يمه شبيج ما تعرفيني فضوليه وانتِ تحجين بيهم حسيتهم ناس يخوفون وشايفين نفسهم هيج حبيت اعرف عنهم فضول لا اكثر

ـ اي فضولج ضمي بگلبچ احسن الج هالمره سألتيني مرتن الثانيه ما تسألين اي بشر عنهم ربي يبعدهم عنا هما وطلايبهم ما وراهم بس وجع الرأس

هاجر ـ اي تأمرين يمه سكتت وياريتني ما سألت ضلت تخوز بيه واني وملامح وجهي بسرعه افضح روحي لميت ثوبي وطلعت من يمها رحت المطبخ وصفنت بكلامها تكول حناش ابنهم الجبير وضخم ومتزوج اربع نسوان يعني هذا الشفته اليوم وسألني مو هو ، هو صحيح جان طويل بس مو ضخم مثل ما سولفت امي.، انه شبيه مهتمه لأمره وكمت اسأل شجاج هاجر جن ما شايفه زلم اهمداچ نفضت رأسي من الافكار وبديت اجهز العشه

يتبع.. ... ان شاءلله وضحت الكم بعض الاحداث وما ضل شيء مبهم وبخصوص الاسماء هم وضحت ومع مرور الوقت بالاحداث راح تفهمون كل حدث وبخصوص التنزيل أول أسبو؏ التنزيل يومي بين ما تنفهم احداث الروايه الكم ونفس الوقت تصعد المشاهدات وينجمعون القراء الاعزاز لن تطبيق الواتباد ما يرسل اشعارات دائما وبعد اسبوع نستمر ع التنزيل بين يوم ويوم والسلام عليكم 🤍👍🏻

الفصل الثالث من هنا

لمتابعة باقي الرواية زوروا قناتنا على التليجرام من هنا