رواية بين الحب والأسر الفصل الواحد والعشرين 21 بقلم أمل مهدي

رواية بين الحب والأسر الفصل الواحد والعشرين 21 بقلم أمل مهدي

ياسر.....

ما انصدمت من شفت طفل ابحضنه...الصدمني 

طلع اخويه سيف مزوجه ..انصطرت 

اشلون تاخذ اخوي واني متفق وياهه على الزواج

اختنكت....احس البيت كبس على كلبي....الاحبه صارت مرت اخويه

اشلون

ااااخ ياوسام....اريدك هساع محتاجك بس انته تفهمني

هشام....ياسر هذا التليفون تفضل

دكيت الرقم وايدي ترجف

..الو

.....نعم اتفضل

....اذا ممكن وسام كولوله ياسر

وسام

.......هلو ياسر حبيبي لحكت تشتاقلي

ولك

همزين خابرت اني جنت رايدك بموضوع كلش مهم

.......ساكت ياسر

.....خير ياسر شنو شفته وصدمك

مثل حالي

.....منين ابدي من امي اللكيته ميته

لو من....وخنكته العبره

وسام......شنو احجيلي انته ما تنهد ابسهوله....واني هسه احسك مهدود

احجيلي بداعت امك المرحومه

......لكيته زوجة اخوي

اني ما هامني تتانيني لو لا ...الهمني الكاهه ماخذه اخوي

.....لا تهتم ياسر ...الفاتن ١٦ سنه

اتريد نلكه الناس مثل ما عفناهم

المهم اريدك تجي يمي

.......ليش

.....الاسبوع الجاي زواجي

......شايف الخير خويي الحمد لله وفتلك هلسراب

.....اسكت راح اموت امي متقبل اخذه

وتكلي ارجع منين ما جيت

......لا بربك

.....ياسر راح اتخبل اريده واريد امي 

شلون دبرني

......تزوج سراب وامك مسيرهه ترضه

....هو هم هيج ..اريدك تجي ياسر

....الله كريم اجيك بيوم الحنه

...انشالله انطيني رقمك

سد التليفون

حسام ....امشي ما دام العرس اتاجل 

حجزتلك يم دكتور*****

بالحارثيه

نمر ناخذ سراب ويانه

ميهم انمر 

رحنه والدكتور شرحتله حالتي

وشلون انظربت على هذا المكان

والصداع

اخذلي اشعه

وفحصني بجهاز خاص بالعيون

اتضح عندي خثرة دم اثر نزف

فوگ عصب العين اليسرى لازم عمليه 

حتى يسحبون الدم ويعالجون العصب لان يجوز صار تليف بالعصب

مال العين

اما العين اليمنى اللتهاب ويعالجو

وبعد العمليه راح احتاج نظارات

كلشي اتوقعت بس عمليه يعني 

بالراس ما اجت على بالي

ما انكر خفت وسراب شبعت بجي

اشلون وليش وشفت من الم وعذاب 

ظلت تلوم

حسام.....شنو سراب بدل ما تهدي

سراب.....ما اتحمل يتأذه تعرف شنو عمليه وبراسه

حسام....لا تخافين اني مستحيل اخلي يتاذه بعد

وسام لا تهتم مستعد اسفرك

واصرف عليك من المليون للمية مليون...لا تنقهر

وخابر عمه

.....الو اشلونك عمو جليل

.....ياهله بابا اشلونك وشلون وسام

......اسالك عن عمو خليل اشلون صار

....زين تخلص فترة النقاهه ونرجع انشالله

....انشالله... عمو راح ادزلك فحوصات اريد تعرضه على طبيب

وسام مريض وحتمال عمليه ابراسه

....لا عمو اشبي 

....والله عمو اعيونه حتى اجيبه واجي

سراب....واني رجلي على رجله ما اعوفه

حسام ...ميهم لازم انطلع جوازات

الكم من باجر

وسبوع الجاي نزوجكم

سراب ...

اسبوعين ما شفنه الراحه دفع حسام افلوس حتى نعقد محكمه بدون موافقات وقدملنه على جوازات

وقدمنه كل التقارير الطبيه حتى نكدر نحصل فيزه للعلاج

ونسافر

ليث.....

اترخصت وطلعت ابويه حطني بموقف ...ما ادري شأوصفه

ام عزام....تلكته ها يمه شو جيت وحدك

ليث......اني ذاك اليوم مو كتلج ما ريد ازوج

ابوي يخطب سحر بدون شوري اشلون

زعطوط جاهل كدامكم وتفصلون

وتلبسوني

ام عزام......يمه بنت عمك والسنه تكمل صيدله

وين تلكه مثلهه

ليث......ماريده لا هيه ولا غيرهه

دخل ابو عزام......سمعه

ولشوكت...

اظل تابع وحده تدري بيه مو الك

ليث.....ظل متفاجأ

معقوله سلوى تكول لابويه ؟

انه مو ابوك وذني شيباتي التارسات راسي

اذا ما اعرف شكو براس ابني وبيش يفكر 

من نظرة عيونك اليتبعنه عرفت

كافي حس على روحك

هيه التتنه واحد غايب سنين

وتفني شبابهه 

برايك ليش ....غير تحبو...

اوعه على حالك اوليدي شوف عمرك اشكد

اليوم قرايت الفاتحه والخميس النيشان

وبعد شهرين اتزوج

ولا ازيد ولا تعيد هذا أخر كلام

واياك ليث تخجلني ويه عمك

ليث.... دنك راسه مستسلم

كلامك على راسي يابه

وسام.....نزلت الصبح محد بالبيت

صنطه...

اجيت على غرفة امي لكيته اصلي

ادنيت عليه والله مشتاقله صارله

كم يوم متحجي ويايه

كعدت يمه وحطيت راسي ابحظنه

كانت تقره قرأن 

ما اتوقفت...بس حسيته تقره وتناشغ

مثل واحد يبجي

أخر شي صدقت وسدت القرأن

خلت ايده على راسي

وسام....تعبت من التفكير 

اريدج ترضين عني لا تخليني بحيره

زواجي من سراب امر محتم مثل الموت ما افرضه عليج اريدج تفهمين

اني ما اكدر اعيش من غيره

ولا اكدر اعيش وانت زعلانه 

عليه

جريت ايدهه بسته 

لو تدرين ماما شمرت عليه من ايام وجوع وذله

حتى ايست ارجع واشوفكم

ماما باجر اليوم الانتظرته١٦ سنه

اريدج ويايه

لان بس تطلع الفيزه اسافر للعلاج

افتخار.....روح ازوج الله وياك

الله يسعدك

بس لا تجيبه يمي 

ولا تراويني وجهه

وگامت وعافتني

يأست واني اقنعه امي صعبه

من زمن ابويه كلمته وحده

سراب ما قبلت اسوي حفله لان سنة ابويه لسه ١٠ اشهر صارله

اكتفيت بزفه من الصالون اخذني

وسام ويايه اريج وشهد بس

..حسام وولد عمي جليل وولد خالي كلهم ويايه وعوائلهم

والرائد واخو جاي ويا 

وياسر ...الغايبه ضحكته

وسام...صافحني وبوسني واني اباوع بعيونه افهمه ويفهمني من نظره

.....هونه ياسر اخلص علاجي وارجعلك

ياسر ...افرح يخوي لا تفكر اليوم عرسك 

وام مهدي وامي وشيماء وشهدولبنى كلهم اجوي

حجز حسام مطعم بالاعظميه الصاله بما فيه من اكل

وسام

الكل حضر من اقاربي وحسام جاب فرقه

والكل يركصون اجو يفرحون الفرحي

الا امي وسامر واسيل زوجة سامر

ما اجو تمنيت امي يحن كلبه ولو بس تحضر وتروح بس لا

كانو ضد فرحتي

اخذت سراب

ايدي بايده وعيوني تباوعله بلهفه

هذا اليوم كان لازم قبل ١٦ سنه نحتفل بي بس القدر كان اله رأي

آخر

تقدم الرائد ..الف مبروك الله يسعدكم

ديري بالج عليه متدرين حتى الحيطان اهناك عرفت قصتكم

كتب بكل حايط شعر لو اسمج

سراب......اطمئن عمو اني من زمان شايلته حلم بعيوني واداري عليه

شحال الله رجعه 

وسام......سراب الرائد اعتبره اخوي الجبير وياسر التؤام مالتي ياما ساعدوني وداروني 

ياسر.......عجل انته عفتنه يخوي

لا تفكر بذيج الايام

الله رجعك وجمعك ويه بنت الحلال

الما تخلت عنك 

عيش يخوي وارتاح

ذاك الكابوس انسا

الرائد....مثل ما كال ياسر انسو الماضي وعيشو الجاي وانت ياسر 

اشتحتاج اني موجود مثل قبل

ام مهدي وامي وشهد وشيماء 

كاعدين على ميز واحد 

نزلو الاكل اشكال والوان 

رغم العرس مختصر على الكرايب

بس كان فخم ابشكل حسام

كان فرحان بوسام 

خلصو الاكل وبدت ازفه

ام مهدي هلهلت وهوست السراب

وتقدمت ولبستهه سوار ذهب

وطشت الجكليت 

ام مهدي حنينه وطيبه وتحب سراب

الكل طلع وصعد سيارته

واحنه حسام زفنه بسيارته

طلعت ايدي بايده والفرحه تارسه صدري ...

هذا وسام ابصفي وهذا حلمي وامنيتي 

وحياتي.... البدت من هسه

الكل راح بعد ما وصلونه الباب العماره

احنه صعدنه للشقه وويانه حسام ورواء

وتلكتنه ام عمر جارتنه اباب الشقه هلهلت وطشت علينه الجكليت

حسام كان مجهزنه كلشي اكل وحلويات وفاكهه

حسام ورواء

شويه كعدو وراحو

افتريت بالشقه كانه مو هيه رغم زغيره حسام كالبه كلب. والغرفه والاثاث كلش انيق ومتناسق

وسام....

قفلت الباب

بعدني محتفض بالستريو رغم حسام جابلي جهاز ديفدي يشتغل قرص

صوره وصوت وكل اغاني ام كلثوم ويا ...اختراعات جديده ظهرت بعز ما جنه عايشين بالظلام

الستريو احن اله

شغلت الاغنيه 

( هذه ليلتي)

هذه ليلتي....وحلم حياتي

بين ماض من الزمان ....وآتي

الهوى انت كله....والاماني

فملئ الكأس بالاماني.....وآتي

بعد حين يجدد الحب ....ثارا

والعصافير تهجر ....الاوكارا

وديارا كانت قديما...ديارا

فترانا كما نراها.....سفارا

سوف تلهو بنا الحياة

وتسكر...

فتعالى احبك الان اكثر

.......

وجيت على سراب حضنته من وره ظهرهه

على صدري

اغنيله مثل قبل ونتمايل

ويه كل نغمه

هاي بنت روحي هسه احس روحي

رجعتلي

درته عليه

اباوع انت احلى من قبل ١٦ سنه

لو اظل للصبح اگلج احبج ما توفي

ربع حبج البگلبي

شنو السر الخله روحي مشدوده بروحج

اريد اشبع منج ماكو

كلشي بيه يريدج 

عيوني ما تقبل ترمش كدام جمالج

واخذ ايدي

وحطه على صدره

وگلبي شوفي مبتهج يدك باسمج

وروحي خلص ما عاد تتحمل... 

سراب...

خليت اصبعي على شفايفه

خليلي شي اگوله بهاي ليلتنه

....گولي يا روح روحي

,,

....اريد هاي الليله مميزه انعيشه

بكل دقايقه وثوانيهه

.....تعالي لعد كافي حجي سنين واني اتحلم بتفاصيلج خليني اعيش هاي الليله بكل لحظاته

انطيني نفسج خليني اعوض حرماني منج

وبده يجردني من كلشي

حتى من روحي الستسلمت

وتعانقت ويه روحه

وعشنه احله لحظاتنه 

امتزجت انفاسنه بلهفه بشوك

ما حسينه احنه اثنين

تعانقنه

وغمضت عيني بس اسمع همس

وسام...شنو هذا الجمال احمدك ربي

حفظته وصارت من نصيبي

ليث....

اليوم المهر مالتي تنازلت عند رغبت اهلي ورضيت ما ريد اكسر كلام ابوي واخجله واصير عاق

سحر بنت عمي وخوش بنيه بس كلبي ما يرف على اي مره غير سراب 

اشلون اطلعه من كلبي وعقلي

عقدنه وبين لمة اولاد عمامي وخوالي دخلت ولبسته النيشان

وكل ما تجي عيني بعينه اتخيل سراب وارجع اغض نظري

كملت وطلعت بسرعه

للحديقه الخلفيه اريد اكعد وحدي

ورثت جگاره ونزويت بالظلمه

ادري اليوم عرسهم هيه ووسام

وگلبي مشتعل نار

سلوى.....ها ليث اشبيك

ليث....ماكو شي ...بنتره

سلوى.....اني ادري ليش تلوب

ليث.....اريد ابقه وحدي ممكن سلوى

سلوى.....لا خويه ما اكدر اشوفك هيج واسكت

داويه بسحر من تتقرب منه راح تحبه بنت عمنه ومثقفه وصيدلانيه

واهم شي تحبك وفرحانه بيك

ليث....هز راسه ياكد كلامه

سلوى...يله تعال لاتخلي احد ياخذ باله ورانه شمات

راح للمضيف والكل وكف مهني كلهم اقارب

ماكو غريب

ابو عزام.....كاعد وعينه على ليث

يتألم لحاله بس هيج احسن حل 

حتى ينسه

دخل خالد والكل وكف يسلم

واجه يم ليث حضنه الف علخير ابن عمي اتمنالك السعاده

ليث ....ابتسم وسواله مكان يمه

خالد .....اشلونك

ليث.....ماشي...افكر اكلو لو لا

خالد.....كول ليث اشوف حجي بعيونك

ليث......ههههه اليوم زفته 

خالد....غابت ضحكته ودنگ اي 

تشوف الخير

وانت شبيك

ليث....حبيت اگلك بس

خالد....انت هسه تمشي صح

لا تخليه عثره بدربك

خلي البلكلب للكلب والعقل بيدك

هو اليمشيك

ليث......استمعله مامتفاجا لان سلوه

اكيد كلتله بقصد تبعده عنه

......اني داافكر اطلع خارج العراق

.......متفاجأ....شنو ومنصبك وعائلتك

.....اصفي كل شي....الوضع مو زين

امريكا دتهدد تدخل العراق

والامور كلهه مخربطه 

ليث.....تتوقع صدك يسوهه ويحتلونه

خالد .....هاي شبيك اكو دول دفعت فلوس حتى يسقط صدام

واذا راح صدام يخرب العراق

ليث.....والله شكلك

خالد ....عندي اصدقاء بالاردن اسوي

شغل وياهم اريد

واني اساوي تقاعدي وافضه

ليث......اذا هيج اهنيك مقدما

سراب....

كعدنه على حس الباب اندكت 

....اكعد وسام هاي امي اجت....صباح الخير

......صباح الخير يا وجه الخير

....يله كوم اني راح افتح الباب

جريت دشداشه من الكنتورلبسته

وطلعت...منو

......اني يمه سراب

......فتحت الباب اخذت من ايده

يوم اشجابج مناك اليجاي قابل ما عدنه ريوك

......لا ماما حبيبتي لازم اشوفج موبس اريككم

......ضحكت اني بالف خير

....يمه عساج بنص الخير حبيبتي وحضنتني وبوستني

.....منو جابج

.....رائد جوه اباب العماره يله خلي اروح

.....يوم عفيه ظلي اشويه هسه وسام يصيح رائد يصعد

.....لا يمه ميصير

وسام.....اشلونج خاله 

.....هله يوم الف مبروك

....اشكرج خاله تعالو تريكو ويانه

هسه انزل اصيحه الرائد

.....لا لا يمه اخذو راحتكم يله مع السلامه

....الله وياح....وسديت الباب

اجاني وسام وحضني معقوله صحيت منذاك الكابوس الاسمه اسر

مدا اصدك

.....لا حبيبي صدك واني يمك وبين اديك

وسحبت ايده يله نتريك حتى اسبحك بيدي

.......ابتسم وكعد كدامي على الميز

خليت الكاهي والكيمر والعسل والصمون والزيتون

وكعدت اكبالله اسويله لكم واوكله

......ههههه اكلي انت اني آكل

....معليك زوجي واريد ادلله

خلصنه ريوك اخذته للحمام

اسبحه ونشاقه بالوغف مال الصابون

وتالي طلعه اثنينه سابحين

.....سراب وين صار خالد؟

.....فاجأني بسؤاله ارتبكت وهو يباوعلي

.....شتريد منه

.......شبيج بس اريد اعرف هم شفتي بعد ما تاسرت

....... خلينه عايشين بسعادتنه ليش تذكره هذا ماضي واني ما اريد اي 

صله انه بالماضي

اي بس اكيد تعرفين اخباره انتو نفس الدائره

صار بمنصب مدير الهيئه

واني قبل فتره رقوني مدير عام 

بس لان اداوم هناك رفضت

حتى لا اشوفه

وسام.....زعلتي

سراب.....لا بس ما اريد اي شي يعكر صفو سعادتنه

الفات من عمره هوايه اريد اعيش ايامي وياك يوم احلى من يوم كافي

الراح

متدري اشكد اتعذبت وانت بعيد الكل يلومني لان منتظرتك

خصوصا من يعرفون اهلك فصخو خطبتي منك

من غير اليجي يخطب وارفضه

وابويه يتعارك ويايه 

الكل فقد الامل انو ترجع بس اني وهذا المكان

على مدى ال١٦ سنه جنت اجي واحجي ويه الحيطان وابجي 

وسام اهوايه احتاجيتك وما لكيتك

وسام.....

اتقدم واخذني بحضنه

خلص كافي اني اجيت وكل شي

راح يصير مثل ما تردين واكثر

سراب.....

رفعت راسي اني ماريد غيرك

اني دا احس هسه بديت اعيش

جنت ميته كل احساس ما عندي

بالسعاده

٤ ايام ما طلعنه من الشقه اجونه امباركين اريج ومروان وتعرفو على وسام وخاله سعد وزوجته ووحسام 

اورواء

كل يوم يجينه حسام محمل اكل وحلويات ولوازم 

بيت ابد ما عافنه 

احنه بوسط شهر ١٢ من سنة ٢٠٠١

سفرنه بعد ١٠ ايام

ما انكر القلق العايشته من العمليه

واني اشوف الخوف بعيون وسام

.....سراب اني ما خايف من العمليه خايف افقد بصري وبعد ما اشوفج

......لا حبيبي لا تخاف لو مو ضامنين نسبة النجاح ما وافقونه

خلي ايمانك بلله جبير

....گومي اروح انزور الكاظم حتى مناك امر اشوف محل ابويه

طلعنه للكاظميه المغرب زرنه الامام

وصلينه ودعيت الله تنجح العمليه ويكوم وسام بالسلامه

اني كلتله خليني كاعده بالحضره اقره قرأن وانته روح

وسام

كمل وطلع للمحل 

مال الصياغه مالتهم كان كاعد بي سامر

....السلام عليكم 

سامر.....وعليكم السلام...وبين عليه انزعج

.....اشلونك سامر وشلون ماما

...... زينين

اباوع للمحل ما شاء الله ولو هو من زمن ابويه عامر

كعدت شفت سامر منزعج ولا رحب بيه حسيت كانه غريب

.....شبيك سامر كانه وجودي زاعجك

.....لا ليش شعندي وياك

......من تحجي باوعلي لا تعاملني مثل الغريب

....شبيك وسام هذا مكان رزق مو مال كعده وسوالف

......ها تتحذر مني

لك سامر نسيت اني اخوك الچبير

تخاف احسد المحل لو ابوكك

سامر....ههه ضحكة استهزاء 

هذا كله مالي وحلالي مثل ما هو الك والحسام

بس اگول ياحيف

طلعت من المحل متعصب

لاكاني ابوجهي ابو احمدصديق

ابويه ومحله ابصفنه.

.... هذا منو وسام 

ياهله الحمد لله على سلامتك

اشلونك

ولتمو عليه اصدقاء ابويه يتحمدولي

ويسلمون عليه

وسامر يباوع من الجامه

رجعت للامام زرت مره ثانيه من قهري شكيت وحسرتي بكلبي

رجعت اخذت سراب ورجعنه

للشقه

رائد....

يمه اريد اخطب يصير

اميره.....صلوات على النبي صدك؟

ليش 

....يعني سنويه ابويه ما طالعه

.....لا يمه هي شهر وانشالله ادور

السنه

.......اكو بنيه ويايه بالدوام اعرفه 

مجرد خطبه ونلبس الحلقات

......اي يمه خير انشالله وديني الهم

اشوفه اتعرف على اهلهه

رائد..... اليوم العصر اوديج

اميره اخذت شهد ويايه ورحنه 

على بيت ابو سامي 

ناس بسطاء مرتبين

اميره....طلعت ابنيه حلوه قدمتنه

العصير

انت ريهام ما شاء الله

ريهام ..... ابتسمت خجل ودنكت 

اشلونج خاله

.....هله بيج حبيبتي

عيني ام سامي اني ام رائد زميل ريهام بالشغل

حجالي عن بنتكم الله يحفظه

واني اليوم جايه اخطبه اله

ام سامي.....ياعيني دوم يحجي بي ابو سامي ولد معدل وحباب

اكول لابوهه وانشالله اردلكم الخبر

اميره....اتمنه ما تتاخرون علينه

حبيبه

ام سامي.....انشالله خير

اترخصنه وطلعنه

تلكانه ....رائد ها يمه بشري

اميره....انشالله خير كم يوم 

يردونه الخبر

ثاني يوم ابو سامي

.....السلام عليكم

رائد....كمت وگفت اهلا عمي عليكم السلام

......عمي رائد البارحه داز امك علينه

.....اي عمي الي الشرف اتقدم واناسبكم

.....عمي الله شاهد انت عزيز عليه واني منطيك بس اطيني مجال يومين اخذ راي ريهام

واردلك الجواب

.....صار عمي براحتك على راسي

سراب.....

اخذنه تكسي ورجعنه للشقه

وسام مو على بعضه ساكت

وشارد كانه مو يمي

لزمت ايده...وسام شبيك

.....اللتفتلي....مهموم شد على ايدي

بقوه

ماكو شي

.....لعد اضحك

....غرغرت الدمعه بعينه ما جنت اتوقع احد من اهلي يتغير عليه

احنه ما جنه عائله مفككه ولا بينه مشاكل

سامر بالذات جنت احبه واللعب ويا

ليش اتغير

....ليش اصار بينكم

.....اليوم شفت سامر يعاملني مثل الغريب 

......حبيبي لا تهتم

كعدت ابصفه وخليت راسي على كتفه

اني اسفه لان بسببي صارت مشاكل بينك وبين امك

.....يعني لو جنتي تعرفين امي ما موافقه ما تزوجيني

حتى لو اهلي ما موافقين ازوجك

اني مصره ومقرره ما اخون عهدك ووعدك 

ورسالتك الدزيته الي اذكرني جنت

.....يارساله

.......مكتلك الرساله الدزيته وانت بلاسر جابه اليه مروان زوج اريج

لان وكفت الحرب محد امسلمهن

وكفت وسحبته من ايده

يله كوم انام

.....ابتسم ابمكر ومشه ويايه

حسام.....

دك الباب....فتحه وسام

.....السلام عليكم اشلونهم العرسان

.....تلكينا اني ووسام

وعليكم شنو انت ما تجينه الا اجيبنه شي

حسام.....انقهر عليكم بعدكم جدد

شسوي هههه

تعالو اكعدو افهمكم

....عيني وسام هذي تذاكر الطائره

وهاي الفيزه

الموعد قبل راس السنه باسبوع

راح يتلكاكم عمو جليل هو حاجزلكم وكلشي امحضر

وشال مبلغ١٢ مليون كال هاي تاخذوهه وياكم للعلاج 

ونبقى على التليفون اذا تحتاج

اكثر هم احولك

اني ما اكدر اعوف المحلات

سراب وياك وعمي واذا كدرت

اجي وراك ....زين

وكف وسام وحضنه ...تمنيت سامر وامي يوكفولي مثلك

حسام.....ميخالف روح وارجع وكلشي يصلح...

             الفصل الثاني والعشرين من هنا 

لمتابعة باقي الرواية زوروا قناتنا على التليجرام من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال