رواية بين الحب والأسر الفصل الثامن عشر 18 بقلم أمل مهدي

 

رواية بين الحب والأسر الفصل الثامن عشر 18 بقلم أمل مهدي

الگلب اليكتله العشگ

لازم نلفه بعلم

***********

سراب .....

صار شهر من گال مروان راح يجون

اسرى

وين اروح 

اتصل على مروان ...وميشيل السماعه

هههه اظاهر ملتهي ويه اريج

معقوله يجي وحسام ما يگول 

لا مستحيل اني موصيته 

يارب تعبت ..ليوين حد صبري وصبره

دكيت على حسام للمحل

....الو....

حسام.....الو تفضلي

......اني سراب...اشلونك حسام

.....اهلا سراب اشلونج

.....موزينه الانتظار دمرني محد اجاكم خابركم

.....لا ليش صاير شي سامعه شي

......واحد بالصليب الاحمر يكول راح يجون ٢٥٠٠

.....يمعوده شبعنه من هذا الحجي

...لا هذاثقه وكلامه اكيد

.....الله يسمع منج ما عرفتي اشوكت

.....لا والله هلايام وبس كالولي

....الله كريم..

اذا عرفتي شي انطيني خبر

.....وانت همين عيني حسام

...تمام مع السلامه

سديته منه واني مطمئنه

حسام حباب وعندي ثقه بي

ولو كلمة افتخار ما شيه على

راس الكل

صارت سولتي بالشقه كل اسبوع اروح انظفه وارتبه

سنين متروكه تحتاج هوايه شغل

ترميم على صبغ 

الله كريم بس كون يرجع 

احاجي نفسي 

لورجع اغير كل هذا الاثاث صار قديم

والله لاسعدك سعاده يا وسام اعوض

كل الحرمان الشفته

وارجع بلحظه اخاف

راح يرجع هو باوج عنفوانه وشبابه

واني هسه ٣٥ عمري معقوله نفس حبه الي يجوز كبرت مراح يصير عندي اطفال

راح يقبل بيه ما يفكر مثل ما هاي الناس اتفكر

دوامه من الافكار اصعدني فوك

وترد تنزلني جوه

باوعت من البرده للسماء

مغيمه

مثل حياتي

وبارده...شتاء ٢٠٠١ كان بارد يثلج

كل ذره من احساسي 

الصار باهت ما بيه روح

لفيت حجابي واخذت جنتطي

وقفلت باب الشقه وطلعت

لاكتني جيراني ام عمر مره جبيره شقته بصف شقة وسام

.....ها يوم اشلونج

....اهلا خاله انت اشلونج شخبارج

هاي بعدج تجين للشقه

....شسوي خاله كلبي مينطيني

.....الله يساعدج يوم..انشالله يفرجله

الخطيبج وترجعون مثل قبل

....اشكرج خاله تسلمين

اتمشيت اشويه 

عصر والعالم كلهه تسوك وتشتري

امشي واباوع على المحلات شفت ملابس اطفال زغار عجبني اشتري لامير

رغم زغير بعده بس من يجونه ما يوكع من ادينه لان ما شايفين طفل

اشتريت كم قطعه

من المحل وطلعت 

عثرت ابطفله شكد حلوه ...وكفت

بوسته ....ضحكتلي

فجأتا كمت احب الاطفال

اجت امه اخذته وهيه تبتسم بيده 

سله ممليه چكليت وتوزع ..

گالت مدي ايدج واخذي... وطلبي مرادج

.....هههه اخذت جكليته 

هيه امنيه وحده ماريد غيرهه

.....انشالله تتحقق....واخذت بنته وراحت

التفتتلي...

...كالت افتحيه تلكين الرد بيه

استغربت شنو الرد ...فتحته

(ولسوف يعطيك ربك فترضى)

دمعت عيني واني اقرأ الايه

الحمد لله...الحمد لله

اخذت تكسي راجعه للبيت

دخلت لكيت بيت خالي يمنه

سلمت وكعدت سوالف خالي ومرته وحتى ماهر حلوه

.....خالي سراب يكولون كل الاسرى

راح يجون

.....منو كلك خالو قصدي منين سمعت

......والله خالي هذاواحد اعرفه بحرس الحدودعلى ديالى يكول

جرت منشأت شايله اسرى من الحدود بتجاه بغداد

هاي قبل يومين

اميره......وين الله وسام وياهم

سراب..... سكتت 

......ها بس تره الحكومه ما توديهم لهاليتهم گبل

.......لعد شنو خالو

......ياخذوهم اسبوع اكثر يمهم

وبعدين يودوهم لاهلهم

فخالي انشالله خطيبج وياهم

رائد.......همه هسه شبقه بيهم نفسيتهم ادمرت 

.....خالي شيسون علوى يردوهم عاد واحدهم يموت يم اهله 

سراب.....الحجي ياذيني غيرت الموضوع

خالو رحتو طبيب لو بعدكم

.....اي د**** بالحارثيه وسواله تحاليل باجر يطلعن ناخذهن ونرجع

مناك

رائد.....مستعجلين ظلو كم يوم

ماهر.....مناك المحل محد بمكان ابويه واني امتحانات اريد اخلص هلسنه

حتى اباشر بمشروعي لان حضرنه 

المكان وجهزنا

رائد....عاشت ايدك

ماهر.....حتى ناوي افتح ورشه تصليح

للسيارات اتحتاج تصليح 

حتى اشتريهه واصلحه وابيعه

رائد...وانته تفهم بالتصليح

ماهر......طبعا دراستي ميكانيك

ومارس همات

من اول سنه جامعه ابيع واشتري هنا ابغداد

رائد...عفيه عليك

لازم نرجع وحتى نيران عدهه امتحانات

شهد....خالو تعالو بالعطله اريد نيران تبقى يمنه كم يوم

.......انشالله خالي ماهر يجيبه وره

الامتحانات

ضحكت وجريته من ايده يله نيران تعالي فوك ابغرفتي

صعدن الدرج

وعين عقيل لحكتهن

ومنا ماهر يباوع الشهد ويبتسم

ليث...

سلوى لمي الموضوع ولا تكبري

واياج اجيبين اسم سراب بالنص البنيه معليه برجلج

وحتى رافضه الوضيفه العرضه عليه

عيب لا اشهرين بيه

سلوى....انت اصلا نفس خالد عينك هم عليه عبالك ما ادري

بس لو يموت خالد ما ارجع

ليث.....

راح اعديه الج هلمره المره الثانيه

افرك حلكج

لج بابا افهمي ما تلوين ذراعه بزعلتج

خالد مدير هيئه تدرين شكم موظفه بيه

لو عنده سوالف نسوان جان ما شفتي.....اعقلي وارجعي البيتج

٣ عندج وواحد بالطريق

كافي اخبال

باجر اني راجع من الصبح الكاج حاضره

سلوي.....ما ارجع يعني ما ارجع

حتى ما اجه صالحني لو يرجعني

ليث....يطبج مرض 

ظلي لمن توصلج ورقة طلاكج

طلعت بره رحت للمضيف اني باجر راجع

اشلون بمشكلة خالد وسلوى

وهاي اخاف اجيب سيرة سراب

وصير مشكله من ماكو

السلام عليكم اشلونك يابه

بست راسه وكعدت

همزين محد يمه 

يابه اني باجر راجع احجي ويه سلوى. ارجعه البيته

ابو عزام....انت ششوف كلامه بي صحه لو لا

ليث.....يابه هاي ماخذته الغيره

تره سراب اتموت على خطيبه ومتانيته 

اني اخوانه اعرفهم وكلشي حاجيلي

......احجي وياهه باجر ارجعه

اني رحت الخالد وشفته يكول مثل ما طلعت ترجع

تره حتى عيب من ام ذرغام لو سمعت هيه وبراهيم

.......خلص. باجر تاخذه

....واذا ما رضت

......مالك علاقه باجر وديه البيته

... تمام يابه الله يخليك انه

ثاني يوم كعدت اتريك 

لكيته هيه وجهالهه متحضره وكالبه

وجه دتريكهم

....صباح الخير

....ام عزام...هله بهصباح يمه تعال اكعد اتريك

.....هله بيج يمه..

.....شنو يمه عبرت الثلاثين ما تريدلك مره جاهل

..... يمه مو وكته اني كل يوم 

بمحافظه يازواج

.....يمه بنت عمك سحر راح تكمل صيدله

ويوميه الخواطيب جايه

واني وكفته الك

......شنو توكفيه الي هو حجز

عوفي البنيه وعوفيني...انه من اريد

ازوج اكلج

گام وباس راس امه

يمه ادعيلي ارتاح

ولا ضوجين

سلوى....

ها حاضرين حتى اروح

...اي

...الغراض

..بلسياره

..عاشت ايدج...يله يمه ..يابه اودعناكم

طلعنه سلوى يمي ..وجهالهه بلوره

.....التفتت...شبيج كالبه الچهره

سلوى....مابيه شي..

اخوي يرخصني الخاطر ال**يه

ما تجيه حجايه

......شوفي انت لليوم عايشه بجو اهلج

وهذا الخلاج ما تفهمين خالد

اطوري ..لا اظلين تغارين وتتعاركين

تره المثل خالد شايف وطالع ما تاثر

بي هاي السوالف بالعكس

ينهزم منج للحياة العايشه

سلوى.....جاوبني بصراحه انته تحبه

ليث.....التفتت عليه وخزرته متحسف 

حتى ترتاحين اجاوبج....

اتمنيته بيوم من الايام...بس سراب ما ابالها بس خطيبه ومستعده تنتظره العمر كله

فشيليهه من عقلج

ولتهي بحياتج

انت بغداد مو بلبستان شويه اطوري اتغيري

وصلته البيته ..وطلعت للشركه اشوف هذا الغضب حسين شمفين

بالشركه

عقيل....

ظليت جوه محتار اصعد لو لا

نيران هوايه عجبتني من رحت ويه امي للديوانيه ما جنت اتوقع هيج بيت خالي

بيتهم ٤٠٠ متر ابمنطقه حلوه اول ما دخلنه

تلكتنه بنيه حلوه لابسه تراك وبيده كتاب اتبين طالبه

وضافره الشعر وراهه گصيسه

بعدين عرفت اسمه نيران بنت خالي ابو ماهر

طول اليومين تباوعلي بخجل وما صار بينه غير السلام

عجبتني ودخلت كلبي

اليوم من شفته جايتنه فرحت

وقررت...

دكيت الباب...

شهد ....فوت عقيل

عقيل.... ها شنو تقرون لو ...ما عرفت احجي جنت محرج ردت 

بس اشوفه

شهد ..... لا منقرا

عقيل......راح اجيب موطا اجيبلكم

واباوع على نيران ضحكت

شهد .... ...موطا بهذا البرد صدك تحجي عقيل

.....او والله نسيت راح اجيب شاميه وكرزات شتكولون

شهد.....شتكولين نيران

.......كيفكم

نزلنه بلهول علكنه التلفزيون وكعدنه

ثلاثتنه والكرزات والشاميه.. جان اكو فلم اجنبي طالع اسمه العراب على اذاعة الشباب

شويه واجه رائد وماهر جانو طالعين ورجعو

كعدو يمنه

خلص الفلم وكلمن راح لفراشه

سراب.....

طلعت الصبح للدوام

صايره مالي واهس بكلشي

راتبي خير من الله

وتلحكه مكافئآت

اصرف واللبس وانطي لامي وشايله مصرف شهد

وهم اضم منه 

عندي رصيد بسيط ضامته للمستقبل

بس كل هذا مو بعيني

كل شي بحياتي باهت ماله اي معنى

اول ما وصلت

دك اتصال عليه المدير

...الو.... اتفضلي يمي ست سراب

....حاضر استاذ

دخلت ..صباح الخير

....صباح النور ...تحضريلي

مشروع كركوك بسرعه.باجر طالعين 

نسلمه صار شهر من كمل

......استاذ اني اعتذر ما اكدر اروح

......حاولي سراب اصلا انت كلشي

راح تقومين بي

هنه يومين خلي نخلص

باجر انت واسراء وابو علي وباسم

رجاءا بلغيهم

ما اريد اي تاخير....مفهوم

.....صار استاذ

رجعت المكتبي 

ابد مو وكته اني بياحال على اعصابي عايشه

منين طلعلي هذا الايفاد

امري لالله...حضرت اوراق المشروع كلهه وبلغت الموفدين

دققت كلشي تمام هذا شغل قبل شهر كامل

رجعت للبيت

اتصل عليه ابو علي للبيت كال انت على طريقنه

باجر بالخمسه اصبح انمر عليج لا تجين

كلت الحمد لله

طلعنه الغبشه الطريق حلو وهوى الصبح ينعش الروح

يسولفون ويضحكون الا اني مالي 

نفس

وصلنه المشروع وشغل للاربعه خلصنه قرر المدير ما نبات فرجعنه

بس واحدنه ميت من التعب

بطريق الرجعه السايق جان مشغل

الراديو وتطلع ام كلثوم

(طال انتظارك مليت)

طال انتضارك....مليت

ناري بضلوعي...وحطيت ايدي على خدي...وعديت

كل ثانيه بغيابك ولا جيت

الدنيه ليل وجو بارد والتعب بالروح مو بس تعب الجسم من العمل

نزلت دموعي بصمت كلمات الاغنيه 

تحفر بگلبي حنين وعتب لايامنه

وصلوني اول وحده لان منطقتي اقرب للطريق العام

جنت مرهقه حد الانهيار كارهه كل

شي بلحياة

كل انسان يعيش من اجل هدف

واني عايشه على الذكريات

دخلت اخذت حمام حار لان احس بردانه

وتعشيت ونمت

ونبهت ما ريد احد يكعدني واني اصلا

اخذت اذن من المدير ما اداوم 

باجر

رائد.....

اطورت العلاقه بيني وبين ريام

نظرات ورسائل ومن يصير مجال 

احجي وياهه 

ابوهه رجال أدمي ويحبني واني

صعب اتقدمله وابويه ما صار هوايه من توفه

حبيته وبادلتني المشاعر

دخل علينه ليث.. واحنه نسولف بمكتبي

...السلام عليكم

....عليكم السلام اهلا ليث

هيه ردت خجلانه اهلا استاذ

اني تسمحولي...

ليث....شنو القصه رائد اذا عاجبتك

متخطبه

......جريت حصره بعد تطلع السنه مالت الوالد

.........واذا السنه مطالعه شيصير لمن يجي واحد ياخذه عود اتحرك

.....لا انشالله متروح

....ها افهم من كلامك مصارحه

.......اي وتعرف وضعي

......الله يهنيكم

.......اسويت على حسين

......تعهدو اهله بلخساير وهو ماكو

يكولون ما ندري وين هج

.....كذابين تلكيهم ضامي

.....ابن عمه يكول اجانه صاعد سياره سوبر 

قبل شهر اثاري يبوك وعايش ابراسي

.....الحمد لله عرفته

...اي والله ...اشلونهم الاهل 

.....والله زينين

.....شنو اشبيك هلايام احسك عصبي

وضايج

.......مشاكل بلبيت وهذا حسين ومحد مرتاح لا تگول

.......ليث انت ليش متتزوج

......ما فارغ مشوفني من مكان المكان

....مي خالف ازوج حتى بنهاية يومك ترجع البيتك تلكه زوجه طفل يتلكونك يخففون عنك التعب

.....صفن اشويه....الله كريم

خالد....

هواي تزعجني نظرة الاتهام الي اشوفه بعيون سراب

احسه تتهمني اني المسؤول عن

المصير العايششته

ممكن اتحمل جزأ منه

بس اني ما وكفت ابطريقهم بالعكس 

حتى اني بتعدت حتى ما اشوفهه بيوم بالدائره

بعد كل هاي السنين

مازالت بنفسي من اشوفه كل مشاعري تتوجه الهه من بين النساء كلهه هيه الوحيده الدخلت گلبي

وتربعت بي

بس هيه حبت وسام

يجوز لو ما ظاهر وسام بذيج الفتره

كان صارت الي

دك التليفون..

....الو ...عليكم السلام ياهلا

.....اشلونك خالد شخبارك

.......والله بخير

........انت مو ردت مني معلومات عن تبادل الاسرى

........اي الله ويدك اشعندك گولي

........وصلو ١٠٠٠ اسير اليوم دخلو معسكر ابو غريب

وبعد راح تجينه وجبتين يطلعون ١٥٠٠

.....يا الله هذا الخبر الزين...متعرف الاسماء

......لا اكو تحفظ على الاسماء

منا لاسبوعين يبينون....زين انطيني اسم كرايبك بلكت اكدر اعرف شي

.......والله اكون ممنون

اسمه(وسام عزيز ابراهيم )

....ما شي انتظر مني اتصال

.....الله وياك

سديت التليفون 

اريد افرحه حتى لو على حساب

نفسي ما اعرف تانيب ظمير لو

شنو

بس اتمنه اثبتله اني. مستحيل ااذيه

رغم كرهت وسام بس مو سافل

واذيهم

انتظر واشوف....

رجعت البيت وتفاجأة تلكوني الجهال ..

هلو بابا وليد وهيثم والزغير ايهاب 

شلته ابوس بي صافحني ابو الوليد

هلو بابا

وهيثم...هلو باباتي هله بعزوتي

دخلت 

خالد.....السلام عليكم..

اقتربت شويه وعيني بعينه..اشلونج

سلوى ... زينه

خالد.....اشتاقيتلكم

سلوى.....من هاي اجيت خابرت

خالد....لا تفتحين اي موضوع سلوى تعبان

سلوى.....لا ما افتح اي موضوع تتغده

....جوعان اسبح واجي

سلوى..

تغدينه واشوفه شلون يلعب ويه ولده

ويسولف وياهم

رغم امبين عليه تعبان كاعد ويسمعلهم مره

ويشاقيهم مره

خالد صحيح ما يتنازل كلمته وحده

ولا من النوع

اليحجي هوايه

بس دائما احس عنده اسرار باعدته عني

ما اعرف كل شي عنه قبل الزواج

وبعد ما تزوجني هم عازلني عن عالمه البره 

حتى لما سكنه بغداد 

عايشه بعزله عن الناس 

ما عدى ...

صديقه عماد اعرف عائلته ويعرفوني

بينه زيارات وكم مره طلعنه طلعه 

عائليه سوه

دك التليفون

خالد....الو اهلا عليكم السلام

......يابه واصل كرايبك ضمن ١٠٠٠ وهسه بابو غريب

......الله يبشرك بالخير اشلونه شفته

.......من بعيد شفته بس مبين مريض

.....اشلون عرفت

......من مشيته واحد ويا لازمه

وشكله تعبان

ولو همه كلهم وجوهم تعبانه

خالد......مشكور حبيب اني ممنون منك

سديت التليفون 

واني الف شغله خطرت ابالي 

يعني حتى بعد سنين الأسر هو شباب شبي مريض....

دكيت على البيت مال سراب

......الو السلام عليكم

اميره......هلا عليكم السلام 

.....اذا ممكن ست سراب اني من الدائره

......ما موجوده اسفه يمه

.....زين زين يله شكرا

سديته....

ما مقسومله تفرح

جنت ناوي اليوم احي المات

وكفر عن الجنته اديه بساعة غضب

ورثتلي جكاره

شنو ممكن بي ليش مريض...

شغل بالي

سراب....

اميره.....متكعدين من البارحه نايمه

اكعدي يمه

خابرو عليج من الدائره

.....توني كاعده والنعاس بعيوني 

جسمي متكسر وتعبانه

منو اتصل 

......شمدريني واحد ...وكلتله ما موجوده

......باوعت للساعه يمه الساعه ٣ حتى

الدوام خلص

اوي شسويله غير مجازه اليوم حتى 

بالاجازه مخلصانه

كمت غسلت وكاعده اتريك

شهد....سراب محتاجه ملزمه وشغلات من السوك عفيه ادري

بيج تعبانه

......حضري نفسج وره ما اخلص اروح للسوك

خالد....

دكيت المغرب هم ما موجوده 

شنو الفلم

اخاف عرفت جاي يله باجر اخابره بالدائره

سلوى....

خالد اجه ليث..

......السلام عليكم

......اهلا ليث اشلونك شخبارك

....بخير انت اشلونك 

....والله مسؤوليه وتعب وهاي ماشيه

......هاااا

خالد ....سلوى جيبينه الجاي بالحديقه

تعال نكعد بالحديقه 

.خالد....ليث هم عندك اتصال بسراب

.......تفاجأ من سؤاله....ليش

.......سراب خطيبه رجع ضمن الاسره الجايين

.....سكتت المفاجأ لجمتني شنو يعني قابل جانت اليه حتى هسه حسيته راحت مني...

......اشبيك ابو الشباب اشو سرحت

وين رحت

.....ماكو شي انت شمدريك

......عندي ضابط دائما اوصي

واليوم خابرني وبلغني وصلو الاسره معسكر ابو غريب

.....سراب تدري

....لا

.....ليش ما كلتلهه

.....اتصلت على بيته ما موجوده

......خالد اسألك سؤال وجابني بصراحه

اجت سلوى وقدمت الجاي

خالد شكرا

سلوى.....شنو اشو سكتو ..اسرار

دوله ما تردون اسمعكم

خالد.....اللتفت عليه مبتسم تره

ليث يريد يسال وانتي اجيتي

ليث......هههه يعني اكوحجي مو يمج

سلوى يخص الشغل لا يروح بالج لبعيد...

سلوى ....ها لعد اروح اني اخذو راحتكم

خالد.....كول شنو سؤالك

......شنو بينك وبين سراب؟

خالد......كاعد رجل على رجل ونفخ

الدخان مال الجكاره ليفوك وباوع للسماء

كانه يغوص بنظره للماضي...

يستعيد بعض من ذكرياته ...

قبل ١٧ سنه 

دخلت الدائره بنيه زغيره وحلوه وبريئه حبيته

وحاوطته بهتمامي وحافظت عليه من كل العيون

وداريته مثل واحد يداري بنته

بحيث الكل انتبه هاي البنيه اتخصني 

بس هيه ما كانت منتبهتلي

اول واحد لفت انتباهه بضرف شهر كدر ياخذه مني

كان عماد دائما يكلي اتقدمله 

حلوه وزغيره وصايره حديث الدائره

بس اني جنت باعده عن الكل

ما اخلي موظف يوصل للشعبه الهيه بيه

وما حسبت للجنود المستخدمين ابدائرتنه

السبب الوحيد الخلاني ما اتقدم الخطبته هو العمر كان عمري ضعف

عمره

دللته وردته تحس بهتمامي وتحبني

ماردت افرض نفسي عليه

وسام جان منسبي بالواسطه يمنه

بلحظه غضب وانتقام مني رحت

بلغت عنه 

واذا بيه ينقلو للجبهه وصار وتأسر

ولهذا يومنه سراب 

حاقده عليه ولو متكول بس كم مره صادفته اشوف هاي النظره بعينه

هذا كل البينه ....تكدر اتكول 

ثار قديم

وهسه دااحاول اقدمله فرحه تتمناهه عمره كله

بلكت اكفر عن ذنبي

ويرتاح ظميري

وهم مدترهم هههههه 

ليث....بعدك تحبه

.....ما اعرف ...

بس جنت اتمنه اكمل وياها

رزانته ذكائهه ثكله عفويته كل هذني جذبني حتى جمالهه.....مميز

هواي كانو عينهم عليه بس ولا واحد

كدرياخذ منه كلمه او ابتسامه او حتى 

يجذب انتباهه غير وسام

هاي كل قصتي ويه سراب...

            الفصل التاسع عشر من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال