رواية بين الحب والأسر الفصل الثالث عشر 13 بقلم أمل مهدي

 

رواية بين الحب والأسر الفصل الثالث عشر 13 بقلم أمل مهدي

قد تشرق الشمس يوما

لتملئ الدفئ شطأني

وتذوب جليدا 

انساه....الدهر في داخلي 

ونساني

امل

++++++++++

شهد.....

سراب اكعدي.....اكعدي

....شتردين عوفيني مو جمعه اليوم

.........سراب اكو واحد جاي من وسام

اكعدي

فزيت وصفنت ابوجه شهد...عبالي دا احلم

.....شنو وسام اشبي

.......اصحي اكو اسير جاي يعرف وسام....

لبست روب على دشداشتي وربطت شعري على هوسته

ونزلت اركض .....

دخلت للاستقبال مذهوله حتى ما غسلت وجهي

....السلام عليكم

قاسم......تعاي بابا سراب

اتقدمت يم ابويه كعدت واني مشخصه عيوني عليه

يطلع عمره بدايه الخمسين مختلط ويه سواد شعره شيب هوايه وجه سمح وخطوط قهر السنين تاركه اثر

على كصته ووجه

مربوع ولابس دشداشه وفوگه ستره

وويا ولد شاب بالعشرين

........ما شاء الله حقه بس يحجي بيج بويه

الله يحرسج الشبابج

قاسم.....الله يحفظك يابه

.........اني ساكته اريده بس يحجي احس روحي بعدني نايمه ودا احلم

.......اني ابو علي اول ما تاسرنه سويه وظلينه اسنين ابنفس المكان

وسام ومحمد وآنه

وتعاهدنه ياهو اليطلع يوصل اخبار الثاني لاهله

صرنه عائله وجنت اشوف بي علاوي ابني

وللتفت على الولد الويا وبتسم

وسام ولد خلوق وحباب ومبين 

ابن عز ودلال

بس والله رجال 

اني متأمل الكا جدامي

وحجالنه كلشي من اول ما تأسر لحد لحظة نقله الغير معسكر

وهاي آخر مره اشوفه توادعنه وراح

الله شاهد حبيته مثل ابني

ب٩٣ تفاركنه وبعد ما شفته ولا سمعت خبر عنه

هو يحجي واني دموعي ما بطلت

ابكل كلمه اتخيله اشلون كان عايش

وشنو عانه وقاسه من الم

ابو علي يحجي واني صور تمر كدامي 

يعني صار ٦ سنوات من تفاركو

اشلون خلصهن هسه هو وين

ومن كال احنه آخر وجبه اجينه

نزلت دموعي ايست من رجوعه

رجعتلي خيبة الامل والافكار السوده

٦سنوات شنو المر عليه بعد 

فتره اخذت اجازه ارتاح تعبت نفسيتي من التفكير

من بعداكثر من سنتين رحت للشقه مال وسام 

وكفت بالباب اريد افتح الباب واخاف ادخل احس المكان صار مهجور فتره طويله ردت ابتعد حتى اعيش النفسي مو الغيري بفجوة فراغ استسلمت لقدري انه ما النه نصيب نلتقي بيوم 

بس من حجالي ابو علي الاسير على وضعه ومعاناته من تاسر

رجعلي الحنين اله

احنه اثنينه ما النه ذنب حكم علينه القدر

دخلت الشقه عباره عن طبقه بيضه من التراب امغطيته كلهه والعناكب معشعشه بكل زاويه بيه

صدت عيني على الكيتار معلك بالحايط وناسج العنكبوت عليه شبكه جبيره

انقهرت وبده ظميري يأنبني حسيت خنته الوسام من هملت المكان الجمعنه

باحله لحظاتنه

مسحت الستريو وشغلته 

وبدلت ملابسي وبديت انظف ٤ ساعات لمعته للشقه واني استمع 

ام كلثوم احس وسام ديغنيلي

هو من جنه نجي سوه جان يندمج ويه اغانيه الحافظه ويغنيلي وصوته كان حلو

اليوم عشت ويا ذكرياتي وهوايه مرات

اوعه على نفسي افكر بصوت

مسموع

بدون شعور

كعدت على الكرسي واباوع 

لجدران الصاله يرادله صبغ

راح مديل هذا اللون دنكت

لزمت اصبعي وافر بالحلقه

متفتر صارت ضيقه كنت دائما

انزعه واشوف حروف اسمائنه

وتاريخ خطوبتنه هسه صارت

ضيقه متنزع

للعصر كملت قفلت الشقه وطلعت

رجعت للبيت

تلكتني شهد تبجي

.....سراب الحكي

......نشف دمي ياستار ولج شكو

.....بابا تخربط وامي وعباس جيرانه

ودو على المستشفى

ليش ما خابرتي رائد

خابرنا كال راح اطلع للمستشفى كدامكم

ظليت الوب اشو اتاخرو

دك التليفون 

....الو منو سراب

....اي ...اشلونه ابويه

.....ابويه لازم ينام بالمستشفى گلبه 

تعبان 

....منو راح ينام ويا

......اني وامي راح نبقه يمه محتاجين افراش والدوه مالته راح يجيج ليث انطيهيا

...ماشي.....شهد رافد وين

....من طلع اصبح مندري بي

اتصلت على بيت عمي محد يرد

اوف يا رافد بعدك ما ازوجت عفتنه

حضرت الغراض وكعدت انتظر 

اني ما اكدر ما اشوفه لابويه

اشلون..عيب من ليث

اندكت الباب 

فتحته اتفاجات بامي عقيل متجيله

وطببه جوه 

ليث.....متحملت هبط ظغطه انقهرت على الوالد فجبناهه 

اطمأنيت على امي ووصيت عقيل عليهم ولبست ورحت ويا ليث

للمستشفى...

ما اكدر اعوف رائد وحده

صعدت ويا بالسياره

وشغل وطلع

.......اشكرك ليث سوينه عليك زحمه

عطلناك عن اشغالك

.....يحجي بثكل مو مثل كل مره

لا عادي اشلون اعوفكم

اتصلت عليج كالو مجازه اليوم

....التفتت عليه عرفت اشبي

اي مجازه

......باوعلي بطرف عينه كانه يكلي وين جنتي

....اني ما اهتميت

.....بالخمسه اتصل عليج رائد ما موجوده بالبيت

.....درت وجهي على الجامه كلت ابكلبي هذا شيريد 

اي كان عندي شغل

......اذا عندج شغل ليش يكولون كلهم انت بالدوام

.....ليث وين اتريد توصل

........وكف السياره لان وصلنه ولتفت عليه.

اريد اوصل يمج...وين جنتي وابوج متخربط .....وفوك الخمسه ياله راجعه للبيت

.....الزم حدك ما من حقك تحاسبني

ولهنا وارجع ومشكور على مساعدتك

فتحت الباب اخذت الغراض ونزلت

ودخلت المستشفى

ليث....

كاعد على مكتبي واباوع اكو فواصل بين الغرف جام فاشوف كلشي خارج مكتبي

انتبهت الرائد يحجي ويه رهام وعيونهم تلمع يمكن ديعلمه على شغله بس امبين نظراتهم اعجاب رائد خوش ولد ويستاهل وريهام هم

حبابه 

.....دك التليفون

....نعم اتفضل

....اشلونك يمه بلكت رائد

....خير ام رائد شكو 

....ابو رائد اتخربط ومحد عدنه 

رافد ماكو وسراب بالدوام فدوه خليلحكنه للمستشفى

....اي اي روحو جاين وراكم

...اخذت السويج وطلعت..رائد 

امشي 

...وين والشغل

...عوف كلشي ابوك بالمستشفى

.....شنو اشبي ابويه

....دمشي ما ادري

رهام ظلت واكفه وتباوع هم اتفاجات

وصلنه المستشفى لكينى حاطيله الاوكسجين وديسوله فحوصات

ركضنه على الطبيب 

رائد....خير دكتور اشبي

.......اظاهر الربو بده ياثر على كلبه 

راح يبقى ويانه فد يومين فحوصات

انسويله يجوز يحتاج قصطره

رائد .... دكتور يعني ما بي شي

....ازمة ربو حاده شنو يدخن

...اي دكتور

....اممم

....يمه مابي شي ابويه اطمئني

يمه الله يخليج راح انت تتخربطين كافي بجي

اميره.....هلمره غير كل مره ابوك موزين يا رائد خايفه عليه

ليث....لا ما بي غير العافيه ام رائد

واحنه نحجي وكعت وركضنه للطبيب وعلكوله مغذي كالو هبط ضغطه 

حتاجينه بطانيه والدوه مال ابويه 

لازم انجيبه

ليث ...انت ابقه اني اجيبه واجيكم

رائد...لحظه خلاتصل على سراب 

افهمهه

...دكيت على البيت

...الو هلو شهد وين سراب

.....ما جايه بعدهه

...شنو...ليش وين راحت غير بالدوام

.....ما ادري

......زين بعدين اتصل

ليث ...اني سمعت باوعت الساعتي

الساعه ٥ وين ممكن اتكون 

واكف ويه رائد وعقلي يودي ويجيب...

طلعت بره المدير مالته صديقي

اتصلت عليه

وبحجة الصك خلص بعده لان

معاملتي ادري يمه

واعتذر المدير وكال ست سراب مجازه

من اداوم اسبوع اليجي تعال اخذه

كانت صدمه 

حاولت اخفي غضبي بس مكدرت كلبي وجعني

ولما اجت ويايه للمستشفى كمت احجي عسى هيه من وحده اتكول وين جانت بس من شفته ما اهتمت

واجهتهه وسالته مباشر

بس الفاجاني

ردهه

رجعت الشقتي ضايج وين جانت اني لازم اعرف ...

رائد.....

ظليت بالمستشفى اني وسراب

كابلنه ابويه وكعدنه

للعشره بليل اجانه رافد اخذته بره بالحديقه

رائد.....انت وين جنت

.......يعني وين جنت اشتغل

......لك رافد عليه تمشيهن....اذا من هسه امكابل عمك ومتدري اهلك ميتين عايشين من تزوج اشلون

....الصبح كله اشتغل والعصر اخذت بيت عمي ازورهم الكاظم...هسه. ارتاحيت

احجي عدل وياي لصير حيوان 

اشو ما فديوم اخذت امك وابوك ازورهم شنو صاير حنين

لك الغريب يركض ويانه بسيارته

وانته اتخم متكول يحتاجون السياره

....... هاي اشلون بلوه ما اخلص

من محاسبتكم اني صوجي اجيت

.......اي ارجع..ما دام ما مهتم ارجع

.....زين لعد هاك السويج

واني رايح

رجع للبيت... رافد دائما مو حمل مسؤليه

ومن خطب لبنى بده يبتعد عنه اكثر

بقى ابويه بالمستشفى يومين

وطلع للبيت بس تعبان ووجه اصفر

كال الطبيب كلبه ديضعف ابسبب الربو

وهلمره حكمنه عليه بقطع الجكاير

نهائيا

رافد.....

عمي انطانه الطابق الفوك اخذنه اكبر غرفه وصبغته ورتبته ديكورات

ما انكر هواي ساعدتني لبني 

ذهب غير المحبس والحلقه ما اشترت 

من غير التجهيزات الباقيه والملابس نص اني ونص هيه

سراب

انطتني مبلغ واني زيدت من شغلي اشتريت الغرفه وكملت كل شي

ورائد وابويه كالو حفلة العرس علينه

سراب......

التهيت بابويه الحمد لله صحته اتحسنت وحددنه موعد عرس رافد

اليوم الحنه ذبح ابويه وسوه عزيمه جبيره

بالشارع كراسي وكعده وبعد العشه حفله

ابو عزام وام مهدي وصلاح 

اجونه وطبعا ابراهيم وشيماء من قبل اسبوع يمنه

كانت عزيمه ضخمه

واصدقائه والشباب سوله 

حفله حلوه

هوايه ناس حتى منعرفه اجوي

ثاني يوم الزفه ومقررين نطلع منا 

وناخذه العروس من بيتهم للفندق

ومن الفندق يجونه ٣ ايام يمنه وبعدين يرحون ابيت عمي

ليث الزفه صارت ابسيارته وامي ورائد وياهم اني بقيت يم ابويه

لان تعب بهاي اليومين 

ليث ابحكم وكفته ويانه بالعرس 

شفته هوايه....

وكان يتعمد يحجي يسالني او يطلب مني اشياء اثناء العزيمه والحفله

اتكلم ويا عادي بس ابد ما انطيته وجه 

اليوم اجتني اريج فرحانه

اريج.....مروان اتقدملي مره ثانيه

......صدك والله....الف مبروك

........هاي شنو غير تعرفين وافقت لا

........اكيد اتوافقين مو عنستو اثنينكم من وره ابن عمج

........اي بس

........شنو بس اخاف اهلج هم ما يقبلون

........ههههه لا هلمره شمروني شمر عليه اخاف انام على كلبهم

.......الحمد لله... الله يتمم على خير

مو متعزميني اطيح حظج والله

.......يمه اشلون ما عزمج هو غير انتي اول وحده تحضر

خلي اروح ليروح يعاقبني علي

.....كمت بوسته مبروك مقدما

اجاني الفراش 

....ست سراب المدير يريدج

......اي عيني جايه

دز علينه المدير وجتمع بينه واخبرنه بايفاد التكريت وهل مره

يومين ونرجع ونطلع ٧ مدراء الشعب والمدير العام 

وطلعنه سيارتين احنه الموظفات دائما سوه والسايق 

اني قبل يوم خابرت شيماء وكلتله خلي ابراهيم يجي عليه ابات يمكم

الايفاد يغير من روتين الوظيفه صحيح شغل بس عباره عن سفره

وصلنه موقع العمل وتواقيع وتسليم

وجيب وودي الى ان صار الغده

كاعدين ناكل

واسمع من ورايه واحد كال

.....يابه السلام عليكم

الكل التفت....

والمدير كام وتلكا

ليث.....لا لا ميصير اكعد استاذ

وسلم عليهم كلهم 

....اشلونج ست سراب

......اهلا الحمد لله

طبعا

سمعت جايين وكلت والله ما ترحون الا تباتون ابمضيفنه

ابو علي ...

المدير...تسلم ليث شغل عدنه اليوم وباجر

ليث....اي وشنو هسه انتظركم وباجر

من الصبح تجون

تره ها الشيخ يزعل وباوع عليه مبتسم

طلعنه همه ناحيه نص ساعه عن مركز المدينه 

وفتنه ابسياراتنه للبستان 

تلكانه ابو عزام ورحب بينه

ودخلونه للمضيف واني اكلني بالسلام وسال عن اهلي ... وعن ابويه

بعدين كال

......ليث يابه اخذ البنات البيتنه 

فرغونه غرفه الاستقبال

وتلكني سروه وام عزام 

ترحب بينه وفرحانات

سراب....شنو هاي بعدج ما مزوجه 

سروه....

لا تزوجت وصارفتره مريضه 

وهنا يم اهلي

.....ها سلامتج

اجونه شيماء وعمته ام مهدي

ووركاء وصارت كعده تخبل

وجابولنه العشه وكعدنه كلنه على سفره وحده وابد ما قصرو

كمت اريد اغسل لفت انتباهي

خيال رجال طويل بالمطبخ يحجي ويه شيماء وهي تكله اي اي فهمت

وضحكت

التفتت عليه جايه بتجاهي كالت 

تعاي سراب اشويه نطلع بره 

مشيت وياهه افترينه وره البيت حديقتهم كلش حلوه وتارسيه اضويه احجي ويه شيماء وسمعت

واحد. من ورانه كح

التفتت لكيته ليث

....السلام عليكم

.....اهلا...وعبست وجهي ردت ادخل

.......من رخصتج سراب اريد احجي وياج

....باوعت الشيماء كالت هسه اجي

كلتله ابقي لتروحين شيماء

ليث......روحي ام ذرغام

.....باوعت عليه خزرته

......كال اني اعتذر يجوز اتعديت حدودي ذاك اليوم

.......ممم......

......گولي شي اشو سكتي

....يعني شتريدني اكول 

.......اني ما قصدت شي بس اتاثرت من شفت الوالد متخربط وما عرفت شأگول

اريدج تعرفين انتي تهميني

وكمله ...واهلچ

كاله وهو يجر نفس

بعدين باوعلي وبتسم

يعني صفه كلبج من ناحيتي

......عادي ما عندي شي وياك

.....زين ممكن نرجع اصدقاء

...باوعتله ...ممكن اذا اصرفت ويايه 

كصديق

......لا يابه تعلمنه الدرس ما نزعلج بعد ههه

....ضحكت على حجيه

ترخصت ورجعت يم البنات

ثاني يوم طلعنه للموقع وابو عزام 

الكل واحد حطله صندوك تمر وعنب من بستانهم بسيارات الدائره الكانت دبل قماره

رائد.....

صارت بيني وبين ريهام نظرات 

وكلام اعجاب ...ببساطتها وبرائتها

دخلت كلبي

حبيته ..وكمت اخاف عليه من كم واحد يشتغلون ويانه

حريص اخلي تعامله ويايه وويه ليث فقط

كان اكو ولد اسمه حسين يشتغل ويانه مكانه اصلا بلاستعلامات اشوفه كام يتقصد يدخل يم البنات

نبهت فاطمه كلتلهه لا يدخل يمكم

اجيت ثاني يوم لكيته واكف اباب

السكرتاريه ويحجي ويه ريهام

.....حسين اشعدك اهنا

......ليش ممنوع

........اي ممنوع تدخل يم البنات

رجاءا ارجع المكانك 

.....منو انت وتنطيني اوامر

.....ما انطيك اوامر 

.......بس البنات ما ياخذون راحتهم

.......شنو احنه ابيت كاعدين لو شركه

طلع وهو ما عاجبه ويفر بايده

ما اهتميت واكدت على البنات لا تسمحوله يكعد يمكم

الموضوع عده

ونسيته اصلا 

سراب......

رافد من ازوج ابتعد اكثر يجي كل

اسبوع ينطي كم فلس ويروح

شويه شويه حتى الفلوس المتفقين

عليه كامت اتقل...

احاسبه يظل يصيح ويسكتني 

واخاف يسمع ابويه وهو صحته 

موزينه

اتحملت اني علاجه واكثر مصاريف البيت

ماريد رائد يتعارك ويه رافد وتوصل الابويه

ايام تمر واني اخذ امي واروح اسوك كلشي كل اسبوع

ابويه جان مايقبل وحده اطب السوك وشيل مسواك هو متكفل كلشي

اليوم اجانه رافد هو ولبنى وتغدو يمنه

ومن بين الحجي عرفت رافد يسوك البيت عمي وهو شايل مسؤليه

البيت

انقهرت ليش هو عمي محتاج حتى 

رافد يصرف عليه بعدين سياره 

ابويه تشتغل الهم ....

لبنى زينه وفطيره بس متفيد وهيه بنت محمد وفوزيه

ودزيت على رافد ...

سراب.....صار اسبوع من خابرتك هسه جيت

رافد.....اهوووو والله اتمللون الواحد

شكو سراب اشعندج دازه عليه

سراب....امشي فوك ابغرفتي ما ريد ابويه يسمع

رافد.....امشي اشوف تاليه

.......سديت الباب هسه معليه بيك تسوك العمك وشايل بيتهم وجيه ما تجينه الا وين ووين

وارد السياره قليل وميكفي دوه ابوك

ومصاريف البيت

.....واني ما الحك هم تصليح وهم بانزين وبيتين ابركبتي

....اول شي انت واحد غبي عمك 

نايم ابراسك انت مسؤل عن مرتك وبس

.....سراب ما اكدر عمتي الخاتون اطلع الصبح تتلكاني بقائمه واني عايش يمهم شسوي

حاجي مرتك تحجي ويه امه

تره همه فرضو عليك تكعد يمهم 

والا هاي غرفتك

بعدين مرتك عدهه راتب وهو ما محتاج اجارات وخير

من الله

محتاجيك رافد مدالحك على مصرف البيت وعدنه ادويه ما معقوله تشتغل وتنطي العمك

.....لبنى حامل ...

.....ابتسمت يعني راح يصير عدنه حفيد؟

الف مبروك

....سكت 

......اشو اشوفك ما فرحان شنو ما مرتاح

.......لا وجر حسره...ليش ما فرحان

بديت اجزم رافد ما طا يقهم وعلى ساعه ينفجر

اجتني اريج وعزمتني على المهر

ورحت للحفله ولكيت هوايه من صديقاتنه معزومات وخواته واهله عرفتني عليهم ناس كلش كبار واخلاق ودخل مروان باناقته هيبه ولبسه النيشان وسط الهلاهل وقطعو الكيك

التفت بطريقه عفويه وشافني

كنت كاعده واباوعلهم ببتسامه

ضحك.... واشرلي اجي يمهم كمت 

كعدني بصف اريج واخذو ويايه صور

اريج ومروان اني كنت السبب بتعارفهم وجمعتهم ....وربطهم حب نظيف والحقيقه الاثنين يستاهلون السعاده

بديت اروح للشقه مثل قبل انظفه وارتبه ولما تهجم عليه ذكرياتي اطلع وارجع لروتين حياتي

ليث هوايه يجي للدائره مالتنه

يجي يكعد يمي يشرب الكهوه ويروح

كمت الاحظ نظراته من يزورني

وتعامله وياي كاصدقاء ودائما 

يطرق بكلامه الى انتظاري وبقائي

الوسام

مره كنت كلش مخنوكه وردت اطلع

من الداىره ولاكيته ابوجهي

...خير وين رايحه

.....والله هاجه من روحي

......ههههه صدك والله....امشي ويايه

.....وين لا يمعود تعبانه اروح للبيت

.......شسوين بالبيت

.......انام حتى ارتاح

......امشي ويايه ما تتندمين

.....يله

اخذني المكان حلو مطعم على الشط مغلق وانيق

راح اشويه واجه طلع اموصيهم على موسيقى هادئه يشغلون

جابلنه عصير 

وما اعرف حسيت محتاجه افضفض وحجيت كلشي بداخلي مخاوفي

وهمومي الزادت عن حده

همي وهم ابويه وهم البيت وهسه هم رافد ...

وكان يسمعلي مره ...ويهديني مره

ومره يدورلي على حلول

ارتاحيتله

وتكررت الطلعات ويا 

وكل مره كان يوديني المكان غريب

وجديد

ويبالغ بهتمامه بيه

كمت اهرب من تعبي يمه من خنكتي

وتفكيري 

وبيوم صدمني من بعده مذكر يوم المستشفى

.....سراب ظلت ابنفسي اعرف وين جنتي ذاك اليوم

....هههه شنو اضن بيه سوء

قصدك اشك بسلوكي

......سكت اكتفه يباوعلي

......كول شنو بلله رسمت ابالك عني

جنه طالعين بحديقه على دجله اني كاعده على مصطبه وهو واكف اكبالي 

يدخن وايده بجيبه

ظل يباوعلي بنظره ما عرفت تفسيره

ذب الجكاره سحكه بحذائه وتقدم بتجاه الجرف خطوتين ونطاني ظهره

......بالعكس كمية الوفاء العندج

مستحيل تخليني افكر بيج غلط

بس

.......شنو بس كمت وكفت كدامه

خفت ابداخلي ... خالد زوج اخته

واخاف سامع شي ولو اني شعندي ويا

شنو ليث احجي

.......لمن عرفت انتي ممداومه خفت

......ليش خفت

......راسا غير الموضوع

خفت ايصير شي على ابوج وانت ما موجوده

ا .......لا انت تكذب عليه مو هذا الردت تحجي

.....درت وجهي اباع للمي واحچي بكلبي

اخخخخخ لو تدرين ياسراب ليش خفت 

صار سنين تابعچ مثل ظلج 

.......اليوم شنو قصتك بس تصفن اكو شي ليث حاجيني

.....لا ماكو شي يله اوصلج 

رجعت للبيت وابد ما راحت من بالي نظرة ليث وصفنته

اكو شي بس شنو لازم اعرف

اني حاسه بهتمامه بيه بس 

اكو شي لازم اعرفه

نايمه بغرفتي واسمع امي اصيح

فزين باوعت للساعه ٤ الفجر

نزلت اركض لاكيت رائد على الدرج

ابويه 

ما انسه منظره ابذاك اليوم فاتح اعيونه وجسمه ينفض ونفسه

مخنوك يلاكف بالهوه لزمت ايده 

ابجي انخبصت

رائد كان اشطر مني ركض على عباس جيرانه يحضر السياره

ورجع شال ابويه هو وعقيل

ابونه جان طويل بس ضعيف المرض

عصره عصر

واني حطيت عبايه على راسي

وصعدت وياهم 

وصل للمستشفى باخر نفس

دخلو العنايه المركزه اوكسجين واجهزه على صدره اباوعله من باب الجام وابجي

ساعه واشوف ليث اجه 

وبعده عمي محمد ورافد ولاول مره اشوف رافد منهار يبجي ويريد يدخل يمه يكعد والسستره منعته

حوالي الساعه عشره وعه ابويه

وفتح عينه والطبيب تبشر خير

وكال استقرت حالته راح نبدي ويا تحاليل وكمنه ندخله واحد وره الثاني حتى لا يتعب

وطلعت التحاليل والفحوصات

القلب والكبد والراتين تعبانات بختصار يعني منتهي ابويه

رحت للبيت بدلت ملابسي وقفلنه البيت والكل اجه يمه ما اريد انفاركه.... هذاالكافح والتعب من اجلنه...هذا خيمتنه وملاذنه

ابو كلب الطيب الدللنه وما حرمنه من شي فد يوم

لليل اتوقفت الاجهزه وجهاز القلب دك الانذار

ركضو الممرضين والطبيب على الغرفه واحنه هم تراكضنه على الباب

ولمن شفنه جهاز الصعقه الكهربائيه للقلب يجهزو عله صوتنه بالصراخ

امي تصيح قاسم لا تعوفنه وشهد

اصيح بابا لا تعوفني منو الي غيرك ورائد ورافد حالتهم حاله... عقيل الكعد بالكاع منهار يلطم على وجه يصيح واني حرت اهدي منو واطبطب على كتف منو

واني يابه من يهديني من يسندني بعدك منو يكلي انت ابني الجبير

معتبرج

وغمضت عين احن أب ....عاندته

السنين وما طخلهه راس تعب وشگه 

وما مد ايده الا الرب العالمين يطلب منه انحنه ظهره وفقد صحته 

وهو يحامي علينه من الوكت

           الفصل الرابع عشر من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال