رواية بين الحب والأسر الفصل الثاني عشر 12 بقلم أمل مهدي
رائد.....
دكت الباب ودخلت
ريهام......صباح الخير استاذ
....صباح النور ...تره اني لا استاذ ولا شي شهادتج مثل شهادتي
....ابتسمت ميخالف تبقى رأيسي
.....هيه ابتسمت واني على واهسه ابتسمت
صدك حقج
......استاذ ذني الاوراق الوصيت فاطمه عليهن
.......اي شكرا...مكلتيلي اشلونه الشغل
......زين وبسيط كلش
.....ها الحمد لله....مثل ما كتلج
اشتحتاجين اني موجود
.....تسلم استاذ...تسمحلي
ويه ما طلعت دخل ليث باوعلهه
وباوعلي....واني بعدني مبتسم
احس من احاجيه بسعاده
.....خير تبين غركت ومحد سمه عليك
.....لا شنو القصه
.....ها رائد احجيلي المفيد
.....والله ماكو شي..كله صار شهر من اتعينت
.... والله عيونك حجت ..بس يله
انشوف تاليه
...اشعدك اليوم
...ما عندي شي
....لعد خابر على رافد خلرتب طلعه حلوه
ليث اكبر مني ب٦ سنوات بس اشوفه ينطلق بالطلعه ويانه خصوصا
ويه رافد يكله اني وياك انسقطه للآداب
خابرت رافد لكيته كاعد بالبيت والهم
كاتله ...بس كتله ليث يريدك
كام لبس واجاني
خلص الدوام واحنه طلعنه بكوفي على الشط تعشينه سمج وكعده حلوه
وراهه طلعنه نفتر ابغداد
ليث....اصار من موضوع خطبتك
........بعده الوضع على ما هو عليه
.......ليش ابوك ما قنع
.......لا يكول روح بس اني معليه بيك وذب سويج السياره
.....ههههه يعني تروحلهم ابطرك روحك
رائد.....رافد اتزوج كم شهر يمهم وبعدين شيل يمنه
....عبالك ما فكرت بيه بس عمك
واحد املعب ما قبل
ليث.....اني اشوف ما بيه شي تعيش يمهم وهمه هم حقهم بنتهم الوحيده
......تكدر تقنع ابويه؟
...... احاول اذا انت مقتنع
.....والله ياريت ابويه يقدرك
ويحبك
....ماشي وفر السياره على بيتنه
وصلنه
دخلنه بلاستقبال ...واني صحت ابويه
....يابه ليث يمنه يريد يسلم عليك
...اي بابا جاي
كومته شهد ولبسته دشداشته
وراحلهم
ابو رائد
...السلام عليكم...اشلونك عمي ليث
....كام وكف اهلا عمي وصافحه
اشلون صحتك
......الحمد لله اهلك مناك اشلونهم بيت عمتك
.....والله عمي كلهم ابخير
وكعد اسوالف وضحك وصدك قنع ابويه بكعدتي يم عمي
ليث وابو وعمامه ناس مترابطه ابعضه بينهم محنه واحترام ويعتبر هذا الشي عادي ما يدري بدكة عمي
وشلون عاش ابويه من ورى
حددنه يوم الجمعه موعد الخطبه
وبلغت شيماء وابراهيم يجونه
ورحت البنى للمدرسه مالته
واخذته للصايغ وشتريتله محبس وحلقه هيه اختارتهن
ردت اشتريله فستان للخطبه ما قبلت
لبنى هواي مساعدتني بس هم ما تكدر توكف ابوجه ابوهه
واجه يوم الجمعه
ورحنه ٣ سيارات ابويه وجيرانه ابو عباس ورافد وعقيل بسيارتنه
وبراهيم وامي واني وشهد ابسيارته ورائد وليث والسيد ابسيارة ليث
وصلنه بيت عمي وكعدو وقرو الفاتحه وامي كلبت الدنيا بلهلاهل والجكليت وعقدلنه السيد
واني كمت بست ايد ابويه وبوست عمي وفتريت عالكل
ورحت على لبنى كانت كلش فرحانه
لبسته الحلقه والمحبس وبسته من راسه
اميره.....
اهلهل واطش الجكليت
وفرحانه بس غصه بكلبي اخاف
افكر بيه وتنزل ادموعي اول واحد من ولدي يخطب وافرح بي بس فرحتي ناقصه لمن شفت فوزيه
تهوس وتركص البتهه
احاول اضم حصرتي ولمن اجه رافد شبكني وبوسني نزلت ادموعي
باوع بعيني وما سالني اكتفه حضني لان يعرف بيش افكر
رافد احلى ولدي شكد سراب حلوه
هو احلى منه بس دومه يمشي
عكس ما نريدله حتى زواجه
اختار العمرنه ما فكرنه اناسبه
ونحط ايدنه بديه
كاعده اكبال الباب مال الاستقبال
واشوف كبالي قاسم يجامل الناس
مجبور على محمد ما يريد يكسر بخاطر رافد هاي فرحته
الاولى
ليث......
احبه بس ما اعرف اشلون اوصللهه
كل الطرق الفكرت بيه من يمه مسدوده
من اول ما شفته صاعده سيارتي
بالغلط بعرس مهدي
وهي صوره ونطبعت ابكلبي بالاول عجبتني ولمن ابراهيم سولفلي عن
انتظاره الخطيبه حقيقتا حسدته
انسانه بهذا الجمال والمركز الوظيفي هوايه مغريات حواليه
اليردوهه واحد احسن من الثاني بس هيه ابد رزنه وعاقله وشخصيه مثال للمرأه اليحلم بيه كل رجال
كل ما اقترب منه اتعلق بيه اكثر
وهواي مرات حسيته قرت نظراتي
وكامت تتحاشاهن
صادقت اخوانه واكذب اذا اكول ما مرتاح الصداقتهم رغم اثنينهم اصغر مني
بس همه ينحبون وعشرتهم اتونس
اني رغم سافرت ودرست بره بس ما عندي اصدقاء مقربين
وما ظليت اهوايه بين عمامي من رجعت من الخارج فتحت شركة المقاولات ومن سفر السفر بين المحافظات عندي صداقات عمل
نساء ورجال على مدى ٥ سنوات
بس مقربين ما عندي
غير اخوان سراب
ادور الاعذار حتى اقترب منه ذاك اليوم خليته تجي ويايه بعزيمة الدكتوره
اني اكدر اعزمه ونكعد سويه استاذه ودكتوره وما عده اي اعتراض
بس جان عاچبني اطلع وياها واكيد ترفض اذا عزمته فجبته ابهذا العذر....
كلامه خيب آمالي من كالت ابقى انتظر وما فارقه عندي سنيني
الدضيع
هنياله لعد اشكد اتحبه
وما ناسيته
رحنه ابخطبة رافد اباوعله من بعيد
اكتفيت بلسلام واسرق النظرات
بعيد عن عيون اهلهه
ابوهه هواي يحترمني ويقدرني واخوانه ما ريد
اغير نظرتهم عني
وسام........
ايام تمشي واحنه نصنع يومنه بنفسنه نتمشه نشتغل ونقره وتجينه ايام الملل ينهي الحياة بينه
بين فتره واخرى
كان يجون معممين
ياخذونه محاضرات دينيه
بيه فايده انه
اي مناقشات كلام نعترض بي عليهم
يكولون علينه بعثيه
فاحنه كافين خيرنه شرنه
اني وياسر هوايه امور نتشابه بيه
بس هو شاب فقير خلص عمره يكد ويشتغل يصرف على اهله كل همه اشلون اهله عاشو من بعده
هواي مرات من يحجيلي عن وضعه
افكر اشلون جنت متبطر سياره واصدقاء وونسه ولعب من اطلب فلوس ما ينطوني ١٠٠ لو ٢٠٠ تجيني ١٠٠٠الف بالايد شاريد يجيني بنفس اليوم
واني حارك اعصاب ابويه
يألمني اشوف ياسر وهو يحجي اشلون يخلصه مشي من المصطر البمركز
الرمادي الى بيتهم بلاطراف لان ما حصل شغل وماكو ابجيبه كروه يصعد بي سياره
وهواي ذكريات يحجيه اليه بسخريه
لو بنت عمه المتاكد زوجوهه لان اصلا عمه ما عاجبه حال ابن اخو الفقير شكم مره سمعه يكول انطيه يموته جوع
من بعد ما لكيت الرائد
هوايه اتحسنت نفسيتي
هنا المعسكر جبال وخضار من بعيد
لان المنطقه شمال ايران
بس ...
قاعاتنه عباره عن جملونات كبيره
بيه اسره ٣ طوابق واحنه كل اسير كاتب اسمه على مكانه الينام بي المي قليل
يجي دنكر واحنه كل واحد عنده تنكه خاصه بي اسمه مكتوب عليه
ياخذ حصته من الماي
مره ما انسه هاي الحادثه ابد اجونه اسره جدد. ووزعوهم على القاعات
شويه وسمعنه هوسه وبجي وما فهمنه شنو
ثاني يوم كالو هذا اسير من سلمو التنكه مال الماي قره الاسم لكا اسم ابو الكان اسير بهذا المعسكر
ونهار الولد وملخ روحه
مأسآتنه محد يحس بيه غيرنه
هذا المعسكر تحت اشراف عراقين
من المعارضه (ما اريد اذكر الاسم)
يجون مرات معممين ياخذونه محاضرات
وهواي من الاسره اثرو على عقولهم اوتنظمو وياهم
وطلعو خارج المعسكر ومارسو حياتهم بصوره طبيعيه وهمه ذوله الزوجو من الايرانيات وصارو معارضين الحكم صدام
هوايه صار حجي واشاعات على انه صدام ما يريدنه بعد
ومحد يرجعنه البلدنه
والعراق بسبب الحصار رجع للقرون الوسطى
وعايش الشعب تحت خط الفقر والمجاعه
هذا الكان يوصلنه من اخبار العراق
رسمونه صوره مخيفه عن بلدنه
ما انكر ايام كآبه صابتني من الموضوع ورجعت النقطة الصفر
افكر بسراب واهلي ومصيري
بس احنه الثلاثه واحد يواسيي الثاني
سيارة مال ركاب وكلنه صاعدين بيه
ابويه وامي وحسام وسامر وحتى عمي ومرته ما ادري وين رايحين وفجأه ابويه صاح اوكف
اريد انزل
وسام....بابا اشو صحراء وين تنزل
عزيز....هو اهنا اريد
افتخار .....لزمت ايده عزيز لا تعوفنه
عزيز....ضحك كله ما عليج شي ولدچ وياچ
نزل وسد الباب وباوع عليه وكال
بابا وسام دير بالك على امك
ومشت السياره
امي كامت تبجي ...واني التفتت
ما شفت ابويه بعد
ياسر.....اكعد وسام اشبيك
فزيت مرعوب كانه مو حلم وصوت ابويه ابراسي....يكلي دير بالك على امك
زين اني وين وامي وين حتى ادير بالي عليه
ياسر...هاك اشرب مي اشجنت تحلم
يمعود خوفتني اتون جنت
شربت مي وغسلت وجهي ايدي ترجف وصافن
اهلي صاير عدههم شي اكيد
الرائد.....شنو ما اروح للمكتبه شبيكم
واحدكم جنه بومه ومكابل
الثاني...
ياسر....غير وسام امظلمه فوك ما هيه ظلمه يول كوم تره طافره الدنيه من عيني
وسام......تدرون الموت اشرفنه من هاي العيشه محبوسين على ياذنب
عمرنه هذا وشبابنه الديضيع
لويش
المن انحاسب ومنو مسؤل
سراب حبي وروحي واحلامي
الجنت ابنيه وياهه منو مسؤل عن هدمهه
امي التكول يوميه وسام اذا صار عليك شي اموت
اشلون حاله هسه
وما عرف من احسبهن سنين طويييييله
تدري سيدي
.....هم كال سيدي انت ما تبطل
.....تدري لو مزوج بهذيج السنه جان هسه ابني عمره ١٢ سنه
دخلت هنا عمري ٢٢ عمر بكامله مر واحنه اراوح بمكانه
الللللله هوايه
ولتفت على ياسر...كان يستمعله ودموعه تنزل بسكته
لك احجي مو هوايه ونزلت ادموعه
والله هوايه حتى الصبر مل من عدنه
قريت كتب لو اخذ شهاده بيهن هسه عندي
الدكتوراء
تمشيت بهذا المعسكر حتى حفظته
لويشدون عيوني هم افره فر
مو سيادة الرائد جاوبني...هلمره ما علق لان جان يبجي
منو باك عمرنه
كلي منو العلى حق ومنو الباطل
واحنه اسلام لو شنو......
ونهار...كام يبجي بصوت عالي
سراب ...ااااااااخ ياسراب
حتى بالحلم متجيني...
اكيد خالد النذل هسه اخذهه
هو نقلني لان اخذته منه تتوقعون يعوفه بعد الصار بيه
سراب بعدج بنت روحي ليش
احس روحي خلصانه وما عندي روح
ياسر.....يبجي كافي وسام لا زيد همنه
لك ياسر ...كلي ليش احنه هنا
حرب وخلصت
اريد واحد يجاوبني يا اسلام
شنو الذنب السوينا
لو يعدمونه احسن المن يصرفون علينه اكل وشرب
المن باقين
الرائد.....كافي كوم اويايه
كانو يمنه كاعدين اسرى نعرفهم ابنفس قاعتنه
كانو يسمعوني لان صوتي عله ويوصلهم همه هم كل واحد حط ايده على عيونه ونزلت ادموعه
الكل يعيش هاي المأسات سنين
عمرهم واحلامهم وامنياتهم ماتت
بطريق الانتظار
ياسر....
كومته وهو مهدود حيله
وسام.......ابويه يمكن مات
التفتو عليه اثنينهم
الرائد.....يمعود صلي على محمد
انت صاير اهوايه اتفكر
وسام......شفته بالحلم يوصيني على امي
ياسر......دنك يول اني كلبي خلصان
لا ازيده عليه
الرائد.....غسل عمي وسام وتعال نطلع
(قل لن يصيبنا الا ما كتب الله لنا)
فوض امرك لله اشبدينه قدرنه هذا
امشي انصلي ركعتين لوجه الله
وعسى الفرج قريب
في معسكر آخر
ابو علي....شتكول هسه وسام رد لاهله لا
محمد.......واللهي بس الله يدري
جا هيه سنه سنتين ..طبينه شعرنه اسود وهسه مشيبين
بس لو رد يروح لاهلنه؟
ابو علي ....انت لو طلعت تروح
محمد ....اي بعلي اروح جا غيرهيه امانه وحطيتوهه بهركبه...وضرب على علباته
ابو علي....چا يروح
محمد.....انه مدري اشمالني اهيس
تعبان مدري امصخن
ابو علي....شو خل اشوفك...بويه صاير نار ...كوم امشي وياي
خل اوديك للممرض
محمد ...چا انه حتى عيوني مغوشات
ياخويه ابو علي مدري اشمالني
خاوي
ابو علي...كومه يرجف مشى كم خطوه ووكع
محمد...محمد خويه ... الحكولي
الرجال وكع التمو عليه وشلنا ركضنه بي للطبابه نومته على السديه
واكلب بي ماله حس
محمد خويه اشصارلك
اجه الطبيب يركض حط السماعه
حركه منا منا
باوعلنه وكال البقيه بحياتكم
ابو علي....لا لاخويه لا تموت
محمد صدك سويته دحاجني
كوم خايب كوم موكتك....
اصيح ..يا خويههههه
مو وكتك ياخويههههههه ليش عفتني
لحظة اعلن الطبيب خبر وفات محمد كانت مو بس مفاجأه
حسيت فاجعه ووكعت على راسي
اسنين ما تفاركنه چا هسه لو رديت من الاسر اروح لاهله شكلهم
النهار كله يحجي ببهيه مرته اولده الخمسه وما يعرف السادس بنيه لو ولد
رجال فلاح فقير ما يندل غير كاعه
والهور شوف الدنيه وين فرته وبعدته عن اهله ومات ابكاع غرب
الاسير اليموت يدفنو بمدينة قم بمقبره بجانب قبر السيده معصومه
عليه السلام
اجو وبلغوني ان همه قامو بواجبه
تغسيل وتكفين على اكمل وجه وقبره في المكان المخصص للاسرى
من بعد الدفنه كل الاسره اجو عزوني وسويناله فاتحه بيناتنه
عباره عن ختم للقرآن وناس صلتله
وناس تترحمله وقسم يهدوله تسابيح
ابو علي......
تعلمت على محمد
وعلى سوالفه من عافني احس روحي غريب
كاله ..امانه وواحد حمله للثاني
چا لو الله فرجلي اروحن لاهله
وانه ابلغهم...
امشي بساحة المعسكر مهموم
مخنوك من كلشي هواي ناس مثل حالنه واعرفهم بس علاقتي بمحمد غير ...
كان بنفسه يشوف اهله وحتى هاي ما حصله
اليأس احتل روحي وسيطر عليه شعور الموت اخاف ما اوصل لاهلي واموت غريب هنا
هوايه ناس تجي ازورنه اكثرهم عراقيين بس ما نعرف شنو شغلهم
قسم تباوع الحقد بعيونهم
وقسم لا زينين وينطونه امل بالعوده
لاهليتنه
من بعد كم شهر اجانه مسؤل ما اعرف شنو وويا حمايه كان يحجي عراقي
افتر علينه وشاف وضعنه واكلنه
وطمنه راح نرجع نتبادل الاسرى
ورجعكم لبلدكم وراح انكون وجبات
وحسب الوضع والاسبقيه
كلهه فهمناهه بس شغلة الوضع
ما فهمناهه
وفرحنه وصار عدنه امل واليطلع من عدنه يوصي الثاني ويحفظ اسماء الباقين
لان ما يسمحونه ناخذ ورقه وبيهه اسماء او عناوين
يعني يفتشونه تفتيش دقيق
وبالفعل من بعد اسبوعين اخذو
وجبه من عدنه اكثر من ٢٠٠ اسير
والباقين يعلقون آمالهم بالراحو
وبدت المعسكرات تقل بيه الاعداد
واحنه انام على حلم الحريه
ونصحى
على امل يجي واحد ويصيح باسمنه
ابو علي.....
واكفين بالساحه ويصيحون بلاسماء
كل واحد علاكته ابايده الطلع اسمه
يتمشه للباب ياخذو والما تطلع اسمائهم
يرجعون القاعاتهم والخيبه والالم
تارسه صدورهم
وبلحظه سمعت اسمي
حسين فالح جاسم فزيت نعم
والفرحه غمرة روحي بهلحظه تمنيت محمد وياي ودعت اصدقائي بلاحضان وطلعت فتشوني
وصعدونه الباصات
حوالي ٢٠ ٢٥ باص ونطلقت تمشي
مرينه ابمدينه بطريق
انباوع العالم اشلون عايشه واحنه
بلا حياة
اتوقف عمرنه ونسرق من اجل اهداف سياسيه
ما انه بيه لا ناقه ولا جمل
اكثر من ٥ ساعات الطريق ياله
وصلنه الحدود واحنه بعدنه ما مطمنين راح نطلع من سجنه
وكفت الباصات واحنه ننتظر احد يجي
مقابيلنه المعبر العراقي الشلامچه
ومن بعد اقل الساعه
تقدمت سياره بيه اثنين لابسين يلكات
مال الصليب الاحمر وبصدرهم باچات
اشرونه ننزل.....والكل بكل سرعته
وكأن الوقت يداهمنه وماالحك
استقبلونه...مادين اديهم ويضحكون فرحانين الفرحنه
ومشينه
للاراضي العراقيه
اللللله يا تراب العراق نزلت ادموعي
وسجدت شكر لله وشلت راسي
وابوس بالتراب واشمه
اي والله هاي ريحة وطنه...افيش
افيش يا ترابنه ..حتى ريحتك غير شكل
وصلنه معبرنه المسافه حوالي ١٠٠ متر اخذناهه ركض ومشي سريع
استقبلونه بلجانب العراقي
حرس يرحبون بينه
واليحضن وليصافح
كانو امحضرينه منشأت عراقيه ونطلقن
داخل الاراضي العراقيه
وكفونه بستراحه جبيره وقدمونه اكل
جنه ميتين جوع بس ناسين حتى الاكل
وراهه مشت بينه المنشأت المعسكر
ظلينه بهذا المعسكر اسبوع
ارتاحينه وقدمونه الاكل وكانو بغاية الكرم ويانه
وهواي اسأله سالونه
ومن بعد الاسبوع اجانه ضابط
تحمدلنه على السلامه ووزعولنه مبلغ بسيط قيمته ٥٠٠٠٠ الف عراقي
وكال كلمن راح انوصله
المحافظاتنه
قسمونه حسب محافظاتنه ونقلونه
بالمشئآت
وصلت الديوانيه الدنيه مغرب ودوني للفرقه الحزبيه االبمنطقتنه
وهناك بس كلت اسمي عرفوني
ابو علي واخذوني على اهلي طبيت بالشارع وويايه واحد من الفرقه
كلشي متغير الشارع متبلط وكفني يم بيت ما عرفته
طلع بيتنه باني ولدي طابقين وصابغينه
دكيت الباب...
طلع ابني عرفته هذا مالك... وهو ما عرفني لان عفته ٦ سنوات عمره صاير رجال اطول مني
من عرفني شبكني ويبوس بيه
ويصيح يمه الحكي
ابوي رجع
على حسه طلعو خوانه وام علي
ولتمو عليه
بويه يا بويه
لحظات والشارع كله اجاني والعالم تباركلي وتهني
اخواني وكرايبي اشكد استقبلوني
بفرحه وترحيب
واني مستغرب المكان اولادي متغيرين
اطفال ازغار جابوهم ابحضني كالو ذوله احفادك
بناتي مزوجات ومخلفات واولادي
٣ منهم مزوجين واولادهم تارسه البيت
هنا تحس اشكد فاتتك احداث فرح
وحزن ولمه حلوه
بس الحمدو لله رجعت وصرت بنص بيتي
ايام والناس ازورني فرحانين برجعتي
واحجيلهم اشلون جنه عايشين
وشلوت مرت السنين علينه
ومحمد المات بين اديه لا وصى ولا لحك حتى
يشاهد
علي....يابه لعد لو شفت المر علينه
شتكول
ابو علي....ماكو اصعب من الحبسه
وانتظار المصير على الزلمه
علي ....يابه لو شايف حرب بوش اسوت بالعالم
وشگت ناس استشهدت هنا
وعلى حدود الكويت والبلكويت ما رجع
الجندي والضابط
النجه من القصف اجه مهزوم
من غير حالنه لا كهرباء لا ماي لا غاز
والطيارات الامريكيه تقصف بينه
والمجاعه الصارت
انه وحسن بطلنه وشتغلنه بفرن الصمون مال ابو نعيم البراس الشارع
وامي تخبز للعالم بالبيت
مرت علينه ايام بس الله يعلم بيه
وهاي الحمد لله
تزوجنه وخلفنه
وانته الله فرجلك ورجعتلنه
ام على.......ابو علي اني ناذره اذا جيت انسجل للحج اني وياك
وانشالله على هاي السنه
بخير وسلامه اروح
ابو علي.......
انشاالله
امحمليني امانه اروح اوصله وحده البغداد ووحده للهور مال العماره
وراهه يصير خير
علي......اي يابه انه اخذك والسياره حاضره
وسام.....
المعسكر الاحنه بي ملتزمين ادارته واحد من الاحزاب المعارضه لحكم صدام ....
اجانه واحد مسؤل بيده دفتر جلاده احمر ويكتب كلشي بي وويا حرس ايراني واخبرنه راح ترجعون البلدكم بس شي من بعد شي
فرحنه ونسينه وجعنه ...اجدد الامل بنفسي ورجعت اروح للمكتبه واضحك واكعد ويه الحواليه
نسيت الحلم والخوف ...
بدت الوجبات تنسحب وحده وره اللاخ ..
يعني معقوله اسمي ميطلع وياهم
زين ليش
لا اني لا ياسر لا الرائد هم يعتبر
معاق
يوميه. كمت اكعد كبال الباب الرئيسيه ...ماخذ الركن ما اتحرك منه الا يصير اليل ارجع للقاعه
واهس صار بيه مال انتظار
رغم بين وجبه ووجبه مرات شهر او اكثر
واكيد اكو غيرنه بغير معسكرات
هم ياخذون منهم
التفكير شل عقلي ابويه امي اخواني سراب
خلص بعد ما اكدر اصبر اريد ارجع...
ياسر.....يول الشمس ما حمستك
كوم ندخل جوه
وسام .....كاعد وعينه على البوابه الفاصله بين الجملونات
.....روح واجي وراك
ياسر......لك الرائد ما بين اليوم دكوم
يخوي اروحله
وسام.....اشبيك ياسر اجي وراك ليش اتلح
واحنه نحجي
نفتحت الباب ودخلو حرس..
وكف وسام....عن بعد منهم وياسر ابصفه
ودخلن سيارات ونزلومنهن اثنين
ووكفو والحرس داير ما دايرهم
وطلعت الاسرى كلهه التمت وصارت هوسه
سكتونه وبدو يصيحون بلاسماء
اني وياسر واكفين بالمقدمه
ونسمع
ياسر....
اشوف وسام شاد كل انتباهه ويه الاسماء
اخذو حوالي ٣٠٠ اسير واحنه انباوع
بعدين المسؤل كال هاي أخر وجبه
ننتظر انشالله على اتفاق جديد
وسام....
متحملت كان عندي امل يصيحون اسمي وياهم ...لا وفوكاهه ماكو بعد تبادل
عدم آمالي هذا اليحجي
جيتت عليه
ولزمته من ركبته
انهاريت ما حسيت اشدااسوي
التمو عليه الحراس وضربوني
وصارت ضربه منهن بصفحة راسي وره اذني اليسرى
اغمه عليه وبعد
ماحسيت بشي
بدل ماتدور وتبحث علي الروايات خليها علي تليفونك وحمل تطبيقنا
