رواية بين الحب والأسر الفصل الحادي عشر 11 بقلم أمل مهدي

 

رواية بين الحب والأسر الفصل الحادي عشر 11 بقلم أمل مهدي

عندما يقع اسمك على مسمعي

شعور غريب يهزني 

فيض من المشاعر تتوقد داخلي

ترتعش نفسي

ويشتعل وجداني

وترغمني على ترك. كل من حولي

واذهب حيث انت

انسى العالم عندما اكون معك

وانفصل عن حياتي دونك

امل

+++++++++++++++

سراب.....

فكرت لازم اقنع ابويه يخطب الرافد صحيح عمي محمد ظلم ابويه وأكل حقه

بس همه ما الهم ذنب بافعال عمي محمد بعدين رافد رجال وهو يتحمل

نتيجه اختياره

اليوم جمعه صحت رائد شويه اله هم تأثير على ابويه واني وامي اتفقنه سويه نحاجي ابويه ...

صباح الخير يابه..

كان ابغرفته متمدد على سريره

هله بابا صباح النور

رفع راسه..شافنه دخلنه سويه.....

ابتسم كال خير جاييني ملتمين فصاله هداده

ضحكنه ...

رائد......ماعاش ابو رائد اليوكف ضدك انت الحنين الطيب انته

خيمتنه اشما كبرنه انظل زغار ومحتاجينك

وباس راسه

.....غرغرت الدمعه بعيني احسه يقرانه يعرفنه ابشنو انفكر

قاسم ....كولو بابا تردوني اروح اخطب الرافد

سراب.......

يابه رافد رجال وهو ختار عوفه يجرب ويتحمل نتيجة اختياره

ليش 

نظلمهم حتى لبنى ما اله ذنب تره

رائد......اني اشوف نخطبه اله

وهو وياهه يتجازون

وبعدين البيت الحقك بي اول وتالي

يصير اللبنى وهيج الله رجعلك حقك

قاسم.....يعني رافد امفكر بالبيت 

وعلى هاي ياخذ بنت محمد...!!

سراب......لا يابه اصلا هو ايكول طلعونه من مشاكلكم اني احبه وهيه تحبني

لا يم البيت ولا الورث

اميره.......قاسم احنه ابلياك مانسوه شي انت الخير والبركه مالتنه 

ورافد يحبه البنى اني وياك بس من

اشوفه يخابر بليل انقهر عليه وهذا وليدنه حتى لو ماراضين خلينه نخطبه اله ونفضه

.....ماشي اروح ويا واخطبه

سراب......

لعد ما دام هيج شنو رأيكم اليوم

هم جمعه وهم كلنه ملتمين

لان اني احتمال اسبوع الجاي عندي ايفاد الكركوك

ابقه كم يوم

قاسم......بابا رائد اتصل على عمك وكله اليوم العصر جايك

....صار يابه

......خلي اروح ابشره الرافد نايم...صعدت ودخلت غرفته دومه هوسه

الملابس ابجهه وغراضه امطشره

....اوف يا رافد اشوكت تبطل هاي الفوضى

كعدت يم راسه كلت خلي اشويه احرك دمه بس هو ماخذنه بالهوسه والصياح

رافد....رفودي.....

....شكو من الصبح عوفيني انام

اتكأت على المخده مالته واحجي

كوم لبنى انخطبت

.......شبيج بابا حلمانه قبل ٣ ساعات سديت التليفون منه

دكوم اني اباوع يمي

جان ايكشف راسه من جهة رجليه

اتفاجأت وجريت الغطه من يمي لكيت رجلي

خرب يومك ..صار ساعه احجي ويه رجليك لك اكو واحد ينام بالعكس

هههههه

رجليه توجعني من كد ما ادوس ابريك...

خليتهن على المخده يالله شويه ارتاحيت

.....دا اشوفك هوايه تشتغل هلايام

......اذا جايه تحاسبيني اسالي امج دااسوك والسياره ذيجيه كلشي مبيهه

امحافظ عليه اكثر من روحي

......لا ما احاسبك

اني جايه ابشرك ابويه وافق يخطبلك لبنى

.......صدك سراب....

اي والله هههه

رفع جسمه من الفراش ما مصدك

سراب لا تكذبين عليه

....اتريد اهلهل حتى اصدك

...كام من مكانه وشالني ويركض بيه بالغرفه

......لك رافد نزلني ....لك امخبل راح اوكع

...نزلني يضحك وفرحان ميعرف شيسوي

شبكني الله يبشرج ابخبر من وسام

بوسني ابراسي 

...الله يرجعه الوسام ان

شالله..

لج انت مو اخت ...انت كنز ..لا اغله بعدشنو

......هههه لا رجعني اخت احسن 

كعد بالگاع تربع يضحك

تدرين اطلع يوميه اشتغل حتى الم فلوس اكول بلكت تفرج عاد عندي فلوس الذهب

......لعد واني وين رحت انشالله نساعدك كلنه ونزوجك

يله كوم حضر نفسك العصر اروح

عليهم

رافد....خل ابشر الحب خطيه افرحها

اول...وغمزلي

الو لبنى حبيبتي... اشلونج

العصر جايين نخطبج

.....صدك رافد عمو وافق

ياعمري

.....حبيبتي بس نعقد ما نتاخر 

اني دااشتغل اجمع نيشانج

.....رافد اني كلشي ما اريد اشو ذهب عندي وفلوس هم عندي

اريدك انت وبس

.....ميصير لازم اقدملج مثل كل البنات ولو اني على كد حالي

ولو بيدي امشيج على الذهب والله

......رافد شنو هلحجي اني وياك

واحد والمهم انعيش سويه

سراب.....

طلعنه العصر كلنه سويه ورحنه بيت عمي

اول مره اشوف بيت عمي وادخله

بيت كبير والمنطقه مالته راقيه الاثاث ارقه شي السياره

موديل حديث امجودره بالكراج الحديقه كبيره وبيه مرجوحه 

مزينه بالورد واشجار النارنج والبرتقال ....

البيت رغم بناءه قديم بس حالته جيده

وجبير ياخذ ٣ عوائل

حقه ابويه ينقهر بيت ومحلات ثلاثه 

اكلهم عمي الظالم ... ولو ما ادري عمي لو جدي الظلم ابويه

تلكونه من الباب بالهله والمرحبه

وضيفونه وحسيت فرحانين بجيتنه

وطلعتنه لبنى باناقته وسلمت علينه

واحد وره الثاني

وباست ايد ابويه....

حجه ابويه ويه عمي على الخطبه بدون اي مقدمات

ورد عمي عليه

....قاسم انت اخوي لو اشما صار بينه وابنك ابني بس هاي بنتي الوحيده ما اكدر افاركه

قاسم...... كل بنيه مصيره تتزوج خما اظل امكابلتك اليوم رافد باجر يجي غيره ياخذه

........صح كلامك ولهذا يكعد يمي اشو بيت وجبير

ياخذون قاط الفوك الهم

......اشلون يعني اكعيدي تاخذه يمك

.....شسميه سميه اني ما فارك بنتي

وغير هلشرط ما عندي

شجيبون وشتحطوله ما احچي الاهذا الشرط

رافد.....باوع البنى يستفسر

ولبنى ...تباوعله بتوسل ان يوافق

رائد.....عمو عوفهم همه يقررون

ويختارون

محمد......لا عمي اني منطيكم.... بس اهنا تتزوج بنتي..... ابيته

وانتو بعد ابكيفكم

قاسم.....باوع الرافد باسف

يله يابه احنه نترخص

ورجعنه وذاك اليوم حرك التليفون على لبنى رافد رزاله وعرك وهيه بس تبجي حتى ابويه انقهر عليه

ثاني يوم طلعت للدوام ... اول ما وصلت كال المدير اجتماع .... وبلغنه ...عدنه مشروع ٤٠ بيت تابع المنشأه بكركوك

اروحله

يومين

حضرتلي جنطه زغيره مال ملابس السفر طريق طويل

ايكون مزعج ومتعب 

طلعنه سيارتين مال الشركه احنه ٧ 

موظفين ٣ بنات واربعه رجال عدا السواق

المدير حاجزنه باسم الشركه بفندق وصلنه ساعه ٧ المغرب

كال المدير اصعدو ارتاحو ونزلو 

حتى نتعشى...

اني واسراء ونغم مديره بالماليه

حاجزنه سويت.... اشويه

ارتاحينه.... نزلو البنات ....اني كلتلهم 

جيبولي عشه وياكم تعبانه كلش

ما نزلت....

ثاني يوم طلعنه سويه للمشروع

مجمع سكني اقتصادي ازغير بايدي عراقيه

خلصنه يومنه اجتماعات وتواقيع وكشوفات على المباني... عطشت وسألت وين الگه مي 

كالو بالكافتريا

رحت اتمشه  

واتفاجأ بليث وويا اثنين يمشي ويضحك وياهم

تلاگينه وجه ابوجه ...هو هم اتفاجأ

ست سراب...

اشر للولد الويا

روحو اجي وراكم

وتقدم بتجاهي...ست سراب

اشو هنا

......اهلا استاذ ليث

اني جايه موفده من الشركه مالتنه للمشروع 

....ها اشلونج اشلون الاهل

......الحمد لله انت شعندك هنا

......اني واحد من ثلاث شركاء بهذا المشروع

........زييييين

......شنو وين نازلين هسه

......احنه بفندق....يومين ونرجع

استاذ كريم مديركم جاي...؟؟

....اي طبعا

ها تمام...

مد ايده يصافحني اني مو من طبعي اصافح احد بس ما ردت اخجله

صافحته ...

....هاي احله صدفه مرة عليه ويبتسم

اني هم بادلته البتسامه وسحبت ايدي ورجعت حتى نسيت المن

رحت

رجعنه للفندق جوعانين 

كعدنه على ميز واحد وتغدينه

اسراء.....تروحن للسوك

نغم.....اي ياريت

.....اني تعبانه ما اكدر

اسراء ....هيه سفره ونحسبت عليج

شنو ما اكدر

اخر شي قنعوني

وصلنه السايق وكال انتظركم بالكهوه

دخلنه السوك چان كلش چبير اشتريت ملابس الي والشهد وهدايه الابويه وامي ورافد 

ورائد وحتى هدايا الشيماء واولاده

تونسنه كلش

رجعنه للفندق لكينه استاذ كريم المدير كاعد بالصاله

كال معزومين على عشاء عمل 

ساعه ونزلن بدون تأخير

انغام.......اهوووووالله تعبانه

.....لعد اني شكول راح اموت من التعب

صعدت سبحت وبدلت وسرحت شعري

اسراء ونغم ثنينهم مزوجات ومحجبات اكبر مني بس اني مو محجبه ولا مفكره اتحجب ولا احد

مناقشني بهذا الموضوع

سرحت شعري هو اصلا سرح واسود احبه دائما مفتوح

نزلنه وطلعنه كلنه للمطعم الكان بداخل الفندق

استقبلنه واحد من الولد الكانو ويه ليث

هنا عرفت ليث صاحب الدعوه

لان دائما يترددعلى الدائره

وتربطه

علاقات قويه ويه موظفينه

فمكانت مفاجاه الي

كعدنه على طاوله وحده وكان ليث مقابيلي بكامل اناقته

ليث بادر وحجه 

.....استاذ كريم اقدملك شركائي مهندس هافال ومهندس هولير

المدير...اهلا وسهلا...واني اقدملك

ابو علي تعرفه ومهندس مهند وعلي

وست نغم وست اسراء وست

ليث....ست سراب هاي اقاربي 

المدير.....ها طلعتو اقارب

.......اي بيناتنه نسب

اهلا وسهلا اتفضلو

ليث اسمر وطويل وشكله حلو

من لابس القاط عبالك عارض ازياء

وبدت المناقشات بين المدير وبينهم

العرفته ذوله الويا اكراد مقاولين هولير وهافال داخل وياهم بهذا المشروع.... جابو الاكل 

والكل ياكل ويتبادل الكلام كان گاعد مقابيلي شريك ليث هافال عينه ما نزله مني كنت الهي روحي بالاكل واتحاشى نظراته

وكل اشويه يوجهلي سؤال حتى 

الموظفين الويايه وليث انتبهو

اخر شي سالني 

....انته مزوج ست سراب لو بعدك

.....اكتفيت ارفع ايدي واراوي الحلقه

ما رديت عليه ولا باوعتله من كد ما زعجني

اباوع الليث يخزر ويباوعله...

ضجت...حتى الاكل عفته وترخصت منهم وكمت للحمام

من فتت من يمهم سمعت ليث يكله الهافال 

.....ياخي ضوجته

هافال.....لك ليث كرايبك حلو اريده

.....شنو تريده غير مخطوبه

بعد ابتعدت ما سمعت شي وصلت للحمام

واني اغلط ويه نفسي

طاحظك اشلون لج اويايه طلع الاكل من خشمي...غسلت

وعدلت شعري ورجعت

كعدت انتظر يكملون وبتعدت عن هافال حتى لا يزعجني

ظل يسولف ويه الموظفين ويضحك وعينه عليه

ساعه وفض العشاء ورجعنه للفندق وطول الطريق سوني تصنيف المدير وابو علي همه كبار بالعمر بيني وبينهم ميانه

المدير.....لك عينه رادت تطلع من مكانه 

ابو علي... اي هو غير كطع روحه

اسراء....خلي ايولي عبالك ما شايف بنات اشكد عينه فارغه

المدير.....ها سراب شتكولين اشو ساكته

نغم.....سواله صدمه من كعد اكباله بعد ما نطقت هههه

واني ابتسم على شقاهم...

باجر طالعين المشروع ثاني ونرجع بليل البغداد

هذا اخر ايفادنه

دخلت بيتنه الساعه ٧ وصلنه السايق كل وحده البيته

وباجر ما اداوم ...المدير كال ارتاحو

وصلت تلكتني شهد باخبار البيت

شكال رافد وشحجه ابويه ما ادري اشلون انحله الهاي المشكله

رائد.......

رائد شغلي ابشركة ليث ماشي تمام

شركه جبيره وراس ماله قوي وعدهم مشاريع ابكل المحافظات

ليث معارفه فوك يعني منافس قوي للمقاولين ونشط ما يهمه وين ما يكون المشروع يروحله من غير 

يدخل شريك ابعض المشاريع الكبيره بحكم السيوله العنده 

يحترمني وقربني اله وخلاني بمكان

تقريبا ادير الشركه من يغيب 

كان السايق مال الشركه رجال يطلع

ابكد ابويه يحبه ليث لان حتى اهله يعرفو

اجاني اليوم

......استاذ رائد اختك اتخرجت من المعهد واريده تشتغل ويانه شتكول يقبل استاذ ليث

.....جيب اوراقه عمي واني اقدمهن الهه ...واحسبه اشتغلت ويانه

.....والله ما جازيكم انت واستاذ ليث

......عمي انت صرت من عدنه وبينه الشركه تاسست على ايدك

....تسلم عمي الله يجبر ابخاطرك

ثاني يوم جابلي الاوراق خليتهن بالمجر جان عندي شغل ومخبوص

التهيت 

ومر عليهن شهر نسيتهن ولا هو حجه وذكرني

استاذ ليث بكركوك يتابع مشروع هناك صارله اكثر من شهر واني ادير ابمكانه عمل الشركه 

صار يومين من اجه واليوم دنراجع

بعض الاوراق وبالصدفه اوارقه صارت گدامي

شگد عيب من ابو سامي والله زحمه هسه شيگول عني

ودخلت على ليث

وكتله كال خل تجي 

وخليه ابمكان زين ابو سامي يستاهل

رحت بلغته وظل يشكر

ثاني يوم داومت ريهام اجت ويه ابوهه...

جنت يم ليث طلعت منه لكيت ابو سامي وويا بنته

......عمي رائد هاي ريهام جبته

.....اي عمي تفضلو وياي المكتبي

اجتي وكعدت بالكرسي القريب من مكتبي وابوهه مقابيله

خجلانه ترفع راسه وتنصي

صوته ناعم وهادئه ...عيونه قضيه الوحدهه وخدوده المكتسيه بحمار

الخجل والارتباك زايده انوثه وجمال

محجبه ولابسه تنوره طويله

اني مو من عادتي اباوع بس نظره وحده

انطتني كل هاي التفاصيل

تفضلو...تفضل عمي

ريهام...... انت شتعرفين حاسبه

طابعه

.....حاسبه اعرف وطباعه اتعلم عادي

......جيد راح اداومين بمكتب السكرتاريه ...موجوده فاطمه راح اتعلمج

واذا واجهتي اي مشكله اني موجود

راتبج حاليا٤٠٠ وقابل للزياده مستقبلا

هاهيه

شتكول ابو سامي

هاي هيه عمي تسلمون

يله لعد وقعيلي على ذني الاوراق

والف مبروك

ابو سامي اشكرلي من استاذ ليث

....يوصل عمي اخذ راحتك

تعاي ويايه ريهام....هذا مكتبج وهنا فاطمه علميه كلشي زين

.....زين

...رفعت عينه بخجل واخيرا وباعتلي ...اشكرك

ابتسمت ابوجهه

رافد....

روحي طافره اعصابي نار محتار بامري ...لبني ما اكدر اعوفه كلبي وياهه

ومنا ابويه الرافض اسكن ويه عمي

وبصراحه اني هم رافض

بس الحل وين ما ادري....

عبرت كم يوم ورحت العمي وحاولت 

اقنعه يعوف كعدتي وياهم

وفهمته البيت معتمد نصه عليه اني لازم سيارة ابويه واشتغل واسوك

ما اقتنع

بالعكس عرض عليه يشتريلي سياره

من اكعد يمهم

.....عمي محمد واحد انتهازي رغم كلشي عنده بس اكتشفت ابوده ياخذ كلشي من ابويه ما ادري غيره لو شنو

لبنى اتعينت معلمه ابمدرسه كمت اكدر اشوفه بره البيت لان هاي الفتره خففت من روحاتي الهم

بليل ما انام اذا ما نتخابر 

متعلقه ابشكل بيه واني هم ومتحمله 

عصبيتي وهوستي

سراب......

كاعده على مكتبي ...وندك الباب

ليث....ممكن ادخل

.....ابتسمت ووكفت اهلا ليث تفضل

.....اشلونج 

.....الحمد لله.....شنو اليوم يمنه

......شسوي احب هاي الدائره والبيه

ناس مو مضيافين

......هههه لا تفضل هسه انضيفك 

رفعت التليفون طلبت كهوه اليه واله

......كملت مشروع المجمع السكني

......بقه شي بسيط ويكمل

هافال وهولير قايمين بي ....سراب ممكن اطلب منج طلب 

.....اباوعله لازم فنجان الكهوه ويحجي ابثقه

تفضل ...اذا اكدر ليش لا

.....عندي صديقه دكتوره كانت مسافره بره واجتي من يومين واريد اعزمه واريدج ويايه اشوفه واكفه بس اني وهيه نكعد....

......صفنت ابوجه...اي ما بيه شي 

بس وين تعزمه

.....اكيد ابمطعم....بالشيراتون

....ماشي بس خليه على غده

.......اي ..اي اكيد واني من هسه اشكرج راح اتعبج 

......لا ماكو تعب 

اترخص وراح

اتصل عليه الخميس يمر ياخذني

واتفقنه على المكان

ورحت وكفت بالشارع...لحظات

وطبكت سياره عاليه يسموهه ليلى علوي

ومضلله...فتح الباب 

ليث....هلو سراب اتفضلي اصعدي

.......اتقدمت وصعدت متوقعتك تجي بهيج سياره

......ليش اصلا هاي سيارتي الخاصه

وذيج سيارة الشركه

........ها

......اذا مصير زحمه عليج اريد امر 

على محل الورد وتختاريلي باقه حلوه

....اي ماشي 

واخذني بالكراده محل الورد ونزلت ويا

.....يله اختاريلي

.......يعني ما اعرف انتو اصدقاء لوشنو نوع العلاقه البينكم

.......صفن ابوجهي ليش يعني شعليه الورد

....لا اشلون كلشي مرتبط بالوانه

......ابتسم وكال لعد قراري صحيح من ردتج تجين ويايه اني كلشي ما اعرف عن هذا الموضوع

واعتقد اصدقاء رهميلي

.....وبديت اختار الورد الابيض +

البنفسجي وضفت اصفر والباقي كملته صاحبة المحل

حسيت على نفسي واني مندمجه ويا ومرتاحه للحديث عن الورد

وهو متخوصر وتارك سترته وره ايديه وواكف مبتسم يستمع اليه بهتمام

انطه الفلوس واخذنه الباقه وطلعنه لفندق الشيراتون دخلنه المطعم كان 

غايه بالروعه والفخامه 

جلسنه على طاولتنه ننتظر ونتكلم عن المشاريع والبناء وكل ساعه يباوع الساعته 

بديت اجزم هاي الضيفه يمكن حبيبته الليث بس استحى من سألته

اجه النادل وجابلنه المنيو 

كله ليث جيبلنه عصير وبعدين نطلب

بهلاثناء

اتقدمت أمرأه مربوعه تطلع بالخمسينات من عمره انيقه الى ابعد حد تبتسم

بسرعه كام وكف ليث واستقبله

بكل احترام وصافحه

وقدمني اله

.......اقدملج ست سراب...اهلا وسهلا

........دكتوره مكارم اهلا دكتوره اشرفنه بحضرتج

شال الورد وقدمه اله 

كعدنه كنت كلش مرتبكه هاي صدك دكتوره والله عبالي غير شي

طلبنه اكل 

كانت الجلسه حلوه لان الدكتوره انسانه رائعه مثقفه

وكبار وكانت ادرسه من كان بلندن

ونشأت بينهم صداقه كونهم من نفس البلد

وساله عن زوجه واولاده اظاهر كان صديق للعائله

اني اكتفيت بس اسمعلهم وابتسم

وهمه يذكرون كل موقف

ويباوعلي ويحجيلي عنه

ظلينه تقريبا للاربعه كعده. اتونست اهوايه وياهم

وتعرفت عن قرب من ليث جنت اشوفه مغرور متكبر ثكله ورزانته اوحتلي بهاي الصوره

وكفنه وترخصت الدكتوره وتشكرت على الدعوه وصافحتني وكالت

........اتمنالج السعاده وديري بالج على ليث اياج ازعلي 

وصافحته......ونفس الشي كالت دير بالك عليه امبينه حبابه والله يسعدكم

طلعنه وراهه للسياره مالته ودعناها

واحنه هم صعدنه سيارتنه

ليث.....اشو ساكته ضجتي

......هزيت راسي بلا...بس اني بداخلي كلش ضجت

....انت ليش ما كلتله اني صديقه وبس

اصور ضنت غير شي

...ما ادري 

انت ليش للآن لابسه الحلقه رغم اهله عفوج من هذا الارتباط

.....اكتفيت بالسكوت

...تحبي

متخافين من يجي يرفضج

ويأيد اهله

......قبل كنت اخاف من مسألة العمر والسنين التمشي افكر هوايه

هسه لا

......ليش

......لان خلص مشه العمر واني هسه

دخلت الثلاثينات

..... يعني شنو صرتي مضطره

........لا اكيد...بس حاله هو مواحسن من حالي

.......تحبي

....ابتسمت تصور هو للآن يحبني

لو احتمال ازوج مثل بعض الاسره

.....ما ادري يبقى هو رجل واحلى سنين شبابه ديعيشه هناك

قهرني بكلامه وذكرني بالاحتمال يجوز ازوج هناك

بعد ما رديت ابد

.......وصلنه للمكان الانزل بي وكف السياره ولتفت ونتجه اليوره ليش لعد امضحيه ابشبابج

........ما ادري اني كل الاعرفه لازم انتظره ما ريد اخون الوعد البينه

ما مفكره بعمري

.....ولنفرض ما اجه

......التفتت عليه بنظره حايره تعتقد

ما يرجع

.....ما اعرف بس مجرد فرض

فتحت الباب ونزلت

وباوعتله

.......كال اني آسف يجوز ضوجتج

.....عادي هواي يفتحون ويايه هلموضوع بس راح وكت اتراجع

يله مع السلامه

......اشكرج مره ثانيه

رجعت للبيت واني ما اعرف اشبيه

ضايجه لو شنو اصلا اتونست اليوم

ليش مخنوكه ما ادري

يمكن اذكرت وسام....رغم عايشه على حبه وامل رجوعه

بس بديت اتحاشه الذكرى مالته حتى اكدر اعيش بسلام

             الفصل الثاني عشر من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال