رواية بين الحب والأسر الفصل العاشر 10 بقلم أمل مهدي

 

رواية بين الحب والأسر الفصل العاشر 10 بقلم أمل مهدي

اليوم لجنه عدنه جايه وجرودات نهايه سنه ومخبوصين والمدير كل ساعه داز عليه نقدم كشوفات 

العام كله ولازم ادقق واني متعوده 

اشتغل بسرعه

اتصل المدير عليه وكال لا طلعين الا يخلص الاجتماع اخاف احتاج شي

دخل المدير للاجتماع واني انتظر 

كاعده ابمكتبي واراجع اوراق وادققهن 

اتصل عليه 

.....الو سراب جيبيلي صور الصكوك

........نعم استاذ

........اخذتهم ودخلت قاعة الاجتماع ...السلام عليكم

.......ردو كلهم عليكم السلام

كانو ٨ ثلاثه منهم لجنه والباقين من دائرتنه

قدمت صور الصكوك للمدير.....

واني مدنكه 

...واجاني صوته

......شلونج ست سراب

..... انتبهت هذا الصوت اعرفه رفعت راسي والمفاجأه استاذ خالد....

اهلا استاذ اشلونك

........الحمد لله انت اشلونج الاهل اشلونهم

.... والله بخير استاذ......

اجاوبه والمفاجاه امبينه على وجهي

المدير مالتي كال

شنو تبينون معرفه

جاوبه استاذ خالد وكله

اي كرايب وهم كانت موظفه عندي من كنت بالهيئه........

اها

ترخصت وطلعت.....

اختنكت ...هم خالد هذا الجابه على اللجنه 

ضجت خلص الدوام والموظفين بدو يطلعون ما عدا كم موظف الهم علاقه بلاجتماع

واني كاعده وايدي على خدي

كل اشويه المدير يخابرني يطلب شغله

أخر شي طلعو همه و٣ ما صدكت 

اخذت جنطتي واريد اطلع

لاكاني استاذ خالد اباب غرفتي

مكدرت ما ارحب بي بس مو مال كعده

...... اتفضلي اوصلج

لا استاذ عندي خط

....... اشوف ما مرتاحه الشوفتي

...... لا بالعكس شعندي وياك 

......بعدج شايله ابكلبج عليه

......سكتت اشويه وباوعت المشكله ما اكدر اكذب

......خلص عرفت جوابج...بس عندي شي راح تفرحين من تسمعي

......باوعتله وكانه قريت افكاره

......شي يخص وسام؟

.......اي

عن قريب راح يتم تبادل للاسرى

واعتقد راح يسدون ملفهم للنهايه يعني خلص الكل راح يجي

......ارسمت على وجهي ابتسامه وبلهفه جاوبته

........يعني تقريبا اشوكت؟

........باوعلي ابنفس نظرته القديمه

مركز بوجهي....سكت اشويه

....قريب كلش وراح ابنفسي اتابع الموضوع اول ما يتم التبادل انطيج خبر

وبعدين عرفت وسام ابمعسكر ب***گ شمال العاصمه طهران 

.....صدك وبعد شعرفت؟

.......هذا كل العرفته

.....اتحرك يمشي للخروج واني ويا

ويحجي..... اني اي خبر اسمع راح اتصل عليج زين

.......اكون شاكره استاذ

......لا شكريني هذا واجبي اتجاهج

ولتفت كل جسمه عليه وكال

انت عزيزه عندي قبل ومازلتي

صدقا اتمنه يرجع وسام وتنجمعون

حسيت من اسلوبه اكو ندم لو تانيب ظمير

لو نظراته من يباوعلي 

بسرعه ادير وجهي 

.......ظليت ساكته معرفت شجاوب

.....هسه ما تردين اوصلج

......ضحكت لا استاذ اشكرك الله وياك

......مع السلامه وسلميلي على الاهل

......يوصل سلملي استاذ على الجماعه ابتكريت

......يا تكريت غير انتقلت اهنا

وشغلي ابغداد.....!!!!

اتمنه ازورينه انت والاهل راح تفرح سلوى 

....انشالله

راح خالد واني الامل اجدد ابنفسي 

فرحانه اتخيل وسام يرجع واتلكا

واحجيله وابجي بحضنه اشكد اتالمت وتعذبت بفراكه

ثاني يوم رحت الشقتنه فرحانه نظفته من التراب وافتر واتكلم ويه حيطانه وكانه يسمعوني

راح يرجع وسام ......راح يرجع

تسمعوني راح نرجع من جديد انعيش الحب والفرح

اه يا نور عيوني اشصار بيك وشفت وشلون راح اتكون من ترجع

تغير شكلك لو نفسه  

مرت سنوات اهوايه افراكك مرمرني

وسام

احجي فرحانه وكانه بلحظه راح تنفتح الباب ويدخل

ومن فرحتي قررت اروح العمي ابو وسام وابشره ....

عمي كان زين ويايه ويعرف اشكد وسام جان يحبني

بس مع الاسف ولا مره وكف ويايه ضد عمتي افتخار

قفلت الشقه وطلعت اجرت تكسي للكاظميه

اتمشه للمحل لكيت محلهم امعزل 

وعلي امعلكين لافته نعي

ياستار منو مات ...

قريت النعي ...عزيز 

عمو ابو وسام

لا اله الا الله

صدقا انعصر كلبي قبل عشرة ايام 

مكتوب التاريخ

حيل انقهرت مهما صار عمو زين 

كان ويايه ويحب وسام اهوايه

دخلت على المحل جارهم هم صايغ 

وعرفت كان يعاني من الصرطان من كم سنه رغم عمره مو كبير ومرتاح بس سبحان من يسبب الاسباب

اخ يا وسام اذا تجي وتعرف ابوك اتوفه اشراح يصير بحالك

اميره......

شبيج سراب جنج باجيه مدري امدلغمه

.......يوم عمو ابو وسام مات

......يا يمه الى رحمة الله...هاي اشوكت 

.....صار ١٠ ايام يمه انقهرت هوايه علي

......هذا امر الله.... خطيه ما شاف ابنه

ابويه كان بالحديقه من دخل سمعنه

قاسم......منو مات

اميره......ابو وسام خطيه توفه

قاسم........لا حول ولا قوة الا بالله

منين عرفتي بابا عدج اتصال بيهم

سراب ....لا يابه بس اليوم جنت بالكاظميه وشفت النعي على محلهم ومعزلين

قاسم......الله يرحمه

سراب.......مات وما شاف وسام ونزلت ادموعي

اميره......يمه عليمن تبجين اشما سمعتي خبر وبجيتي اشبيج

سراب......اتخيل وسام لو رجع وسمع ابو ميت شيصير ابحاله

قاسم ...

كلشي ما يصير كومي غسلي وجهج

يابويه هسه هو منو يكول يرجع 

يكولون هوايه من الاسره اتزوجو ايرانيات هناك

سراب.....

شاغت روحي ..التفتت لابويه منين 

سمعت يابه...

يكولون واحد اسير راجع هوايه هناك ازوجو وطلعو من المعسكرات وعايشين ومخلفين هم حقهم يردون يعيشون حياتهم

......وسام ما يسويه اكيد ورجعت ابجي

.......رجعت بجت هسه هاي شلون طلابه

اميره......وانت الا تكول ياقاسم مو 

تدري بيه متانيته......

.....شدري هاي بطرانه ما تدري شكو ماكو ...عمي لو يردوهم جان جابوهم من خلصت الحرب

سراب.....يابه اشبيك ويايه ليش تقهرني فوك ضيمي

قاسم.......بابا انت عزيزه عليه امعزت روحي واني دا احضرج الهيج يوم 

وسام اتاسر قبل ١٠ سنوات يعني هسه اشكد صار عمره اشمدرينه اصار ما صار يمه 

اني اتمنه يرجع وتعيشون احله عمر بس اشبيدي اخاف عليج لا تنكسرين

واني مو يمج

......ليش دائما اتخوفني

......انت فقيره اخاف عليج من الوكت

واني هلتشوفيني رجل هنا ورجل بالكبر

.....يابه اسم الله عليك ليش اتخوفني عليك اني بلياك انتهي

.....لا بابا انت قويه والدليل على هذا هسه معتمد عليج اكثر من رائد ورافد ...

رافد.....

هههههه سمعت اسمي اكيد ابويه ديحجي عليه

اميره .....هههه 

قاسم ......مو تعرف نفسك

رافد......فدوه اروحلك اني حجي 

هسه شمسوي مو اشتغل واتسوك للبيت ..وحط ايده على حلكه

واطب ساكت واطلع ساكت

شمسوي يا يابه

...تره اني حباب

قاسم ......اي كلش حباب

سراب ...هههههه والله ضحكتني واني مقهوره

رافد.....اضحكي يمعوده منو مات

اميره.....هذا منو رافد لو غيره

سراب ......ايام تمشي وماكو خبر عن تبادل الاسرى ولا خابرني خالد مثل ما وعدني

وشغلة الاسره الزوجو ايرانيات تاكل 

ابكلبي المن اسال وين اروح

كاعده ابمكتبي واللوب

ما ريد اتصل على خالد ولا اكلفه ابشئ نظراته اتخوفني واحسه لليوم 

رايدني خلي بعيد احسن

وقررت اشوف مروان ابن عم علي

اني من انقلت ابتعدت اشويه عنهم الا كنا تربطنه خوش صداقه

سراب .....مرحبا

علي.....رفع راسه لك هله و مرحبا

يابههههه الجلب العضج شحتنا

سراب.....ههههههه شحتو لو كتلتو

علي........اثنينهن شنو هاي ست سراب امشرفه شعبتنا

......اشلونك علي

.....اشلونچ لچ اريج

لا تاكلني حاصل فاصل..يابه حقكم عليه

غير ملتهيه ...غركانه بالشغل والله

هسه معلينه

....شخباركم

علي ......زينين انت اشلونچ

سراب ....والله ابنص الخير ولتفتت على اريچ

ولچ شنو بعدچ واكف حالچ

اريج......شسوي غير صديقتي سراب

سراب ....هههه لا يا حقيره.... وينه مروان

اريده ابشغله

علي......ها طلعت جايه على مروان

سراب.....لا لتصير مكروه صحيح عندي شغله بس والله مشتاقه للكعده وياكم

اريج.....مروان ملتحق الوحدته بعد

يومين ينزل

سراب......اكيد.. يجي للدائره عليج مو

اريج......اي اكيد

سراب ......لعد ضروري اشوفه عفيه

اريج.....ماشي

رافد.....

لبنى اخذت عقلي حبيته اريده

بس ابويه اشلون

بعدين ابويه اله حق بالبيت والخير العايشين بي واني اوله بي

لازم الكه طريقه اقنع ابويه

استمرت روحاتي البيت عمي وهوايه

مرات احس عمدا عمي يتركنا اني ولبنى الوحدنه صارت علاقتنه قويه

وحبتني وتعلقت بيه

كمت ما اكدر انام اذا ما احاجيه بالتليفون بليل

عرفت عمي مادي ابشكل وعده نوع من البخل عكس ابويه اشكد حالته ضعيفه بس ابد مو بخيل واليكرمه 

يقابله بالاكثر مثلا العرس مال مهدي

اخذلهم طلي وامي اخذت النسوانهم وام مهدي قطع قماش غاليه غير الهدايه الشيماء وولده

اذكر شهرين يجمع افلوسهن ابويه نفسه طيبه ويساعد اصدقاءه باليكدر عليه

مره عرفت يجمع من وارد الشغل مال التكسي يضمه العائلة شيخ عبد الله العدمو وصادرو الجامع مالت ابو

يجمع كل كم شهر ٥٠ دينار ويوديه المرته العايشه يم اخوهه

وهوايه ناس جان يساعدهم

من ضمنهم جيرانه ابو محمد ايام حرب ايران والله حتى امي متدري الا امهم اجتي كالت كل اسبوع يسوكلهم لان يعرف

ابو محمد بالجبهه وراتبه قليل وعنده كوم جهال

عكس عمي بخيل الا على بنته

امغركه ذهب وفلوس

بس الصراحه امربيه خوش تربيه

وهيه ماادري عليمن طالعه لا بخيله ولا خبيثه بالعكس حتى فقيره 

اشوفه

وبيوم ابويه دخل مستشفى على اثر نوبة ربو حاده وكلبه تعب

وهنا استغليت الموقف اصالحي رحت بيت عمي مقهور واحجي بمرض ابويه

وكلت البنى قنعي اهلج تجون لابويه 

يتحمدوله على سلامته حتى يتصالحون

وبلكت وراهه نحجي بموضوعنه واخطبج

واذا ما اجانه عمي اني تعذريني بعد ما اجيكم

وصدك اول ما طلع ابويه للبيت اجونه بيت عمي 

وكانت مفاجاه 

رائد.....اهلا عمي اتفضل...يابه عمي محمد وعائلته اجونه

....منو...

محمد.....يا الله السلام عليكم اشلونك خويه ابو رائد

قاسم......عليكم السلام اهلا

محمد .....الحمدلله على سلامتك 

ولتفت اشلونج ام رائد شلونج بابا سراب

وبده يسلم علينه واحد واحد وكذلك فوزيه بوست امي وسراب

اميره ......ما شاء الله هاي لبنى 

شلونج يوم

لبنى...خجلانه سلمت على امي وابويه وسراب

ضلو سوالف امي وفوزيه ورائد وابويه وعمي محمد واني اتبادل النظرات ويه لبنى

ظلو يجي ساعتين وترخصو وراحو

....اني ارتاحيت بلكت الزعل يروح واخذ لبنى

قاسم......صافن

اميره.......اشبيك صافن 

قاسم......والله متفاجأ من زيارة محمد شعجب اجانه

اميره......تبقون اخوان والدم يحن

قاسم.........جان حن من زمان

رافد.......يابه احس عمي متغير 

حتى من رحتلهم تلكوني وفرحو

بيه

قاسم......باوع على رافد 

بس رافد ما فهم نظرته شنو

سراب ....حسيت رافد عنده شي ويه لبنى

خليته دخل غرفته واجيت ورى

......ممكن ادخل

......ليش انت ما دخلتي....

......اوف من اللسانك ....سؤال وجاوبني بصراحه

.........كولي ست سراب

..........اشعدك ويه لبنى

.......التفت وختفت معالم وجهه

يعني شعندي شنو هلسؤال

........رافد مو عليه شفت نظراتكم

وبتساماتكم

.......وشنو يعني حرام بنت عمي واني اولى بيه من الغريب

....يعني اكو

........اي ومتفقين اخطبه

.......عزه بعينك رافد...وابويه

......احنه معلينه ابخلافاتهم لبنى 

حتى تختلف عن عمي ومرته وتحبني واحبه 

.......سكتت فعلا لبنى امبينه هادئه

وعاقله بس اشلون ابأبويه وعمي

يعني انت دائما تروح الهم

........اي وعمي كلفني كم شغله رحت ويا ويا لبنى

اصلا احس همه موافقين بس ابويه اشلون افتح الموضوع ويا

.........اياك تفتحه هسه ابونه مريض 

من يصير زين الله كريم

بعدين تعال انت منيلك فلوس تتزوج

.......الله يسهل خلي بس اخطب والله كريم

اجاني مروان للمكتب مالتي

السلام عليكم

......اهلا عليكم السلام اشلونك استاذ مروان

......الحمد لله انت اشلونج شخبارج

.....والله بخير ..شنو ماكو بوادر خطبه زواج

......لا والله ابن عمه الصگط موجود ونزوج مو بالحيف

......شنو يعني ما وافقو

....شتحجين طلعلي بلسلاح ويتهادد

......وانت اسويت

.....شسوي ما اكدر اعوفه واهلي شالو اديهم مني

...الله يسهل امركم

اگولك

صدك راح يجون الاسرى

.......اي حتى بلاخبار انطوهه رجع الصليب الاحمر يتفاوض

وانشالله خير

يعني اشوكت ما عرفت 

لا والله بعدين هيه راح اصير وجبات

مو الكل يجي سويه 

......ها ...زين شنو هذا الخبر اكو اسرى اتزوجو هناك

........اممممم كولي خايفه على وسام 

لا مزوج وضاربج بوري هههه

.......هههههه اني واثقه منه وفي اليه بس...

........بس الضروف اهناك منعرفه شنو وحتمال البشر تغيرت افكاره وحاله ....كلشي اتوقعي....يعني تره عمر ابكامله فاتهم اهنا

.......يعني متعرفون منو اتزوج ومنو ظل

.......احنه الاسره اليجون ناخذ المعلومات منهم وصدكي لو سامع اسمه اجي عليج كبل تره على بالي

انت....

......انقهرت اكثر كلشي ما استفاديت

وظليت اتابع الاخبار وكلبي يوكع اذا اسمع اسير جاي

من بعد شهر قررت ازورهم بيتهم اعزيهم وهم اعرف بلكت اكو خبر

عن وسام يعرفو ولو حاسه ام وسام

يمكن راح تطردني

اخذت تكسي ونزلت ابابهم ..اباوع نفس البيت نفس المنطقه كلشي ما متغير غير النخله البابهم كلش كبرانه

وحامله عثوك تمر

تقدمت ودكيت الجرص بابهم عاليه 

و٣ طلاكات

......منوووو

......اني

.........فتحت الباب ام هادي مره وسطه تشتغل عدهم خادمه صفنت ابوجهي كانه عرفتني

منو

......خاله اني سراب

........ياعيني خطيبة وسام يابعد روحي والله شبهت عليج.... حليانه

ولو من يومج احليوه

اشلونج خاله

....الحمد لله هله بيج يمه اتفضلي

......موجوده ام وسام جيت اعزيه

....اي فوتي كلهم جوه

افتخار.......منو ام هادي

.......عيني ...وسكتت

.....السلام عليكم...االبقيه بحياتج خاله

......ظلت افتخار .... فاهيه وساكته من شافتني....

حسام.....اتقدم اهلا سراب اشلونج

.....الحمد لله البقيه بحياتك

......تفضلي اكعدي...كانت مرت اخوهه لافتخار كاعده يمه هاي خوش مره اعرفه

اشلونج يمه سراب شخبارج

.....على الله خاله اني بالصدفه شفت النعي على المحل وعرفت

عمو عزيز غالي عليه ومثل ابويه

كنت اعتبره هوايه انقهرت 

.....تسلمين يمه

افتخار ساكته وتباوعلي ومبين عليه مكسوره اني اعرف جانت كلش اتحب عمي ...ردت احجيه

.....خاله اشلون صحتج انت زينه

افتخار....الحمد لله راح الجان يصبرني على فراك وسام ...اخخخخ ياعزيز....وبجت

نزلت ادموعي لا اراديا وبجيت وياهه

حسام....ماما كافي صحتج ارحمي

نفسج

.....شسوي بحيلي واعزازي بعيدين عليه

سراب......خاله وسام انشالله يرجع

راح يرجعون الاسرى عن قريب

افتخار...رفعت راسه ونشفت ادموعه

وتباوع على ايدي

بعدج لابسه الحلقه

مرت اخوهه كالت.....اصيله سراب 

اللتفتت افتخار..وخزرته

حسام....

راديغير الموضوع

صحيح يرجعون منو يكول 

سراب.....اكو ناس تحجي وحتى انطوهه بلاخبار رجع الصليب الاحمر يتفاوض حتى يغلق ملف الاسرى

وانشالله يرجع

حسام......انشالله سمعتي ماما

افتخار...اي سمعت

شفت الجو مشحون وتاكدت ماعدهم خبر منه كلت كافي 

اترخصت وطلعت

وصلني حسام للباب ...اشكرج سراب رغم 

الصار بعدج تنتظري الوسام

.....طول هاي السنين ماسمعت اي خبر عنه

.....لا والله تدرين مرض ابويه كله من قهره على وسام

..... اكيد ....شنسوي الله كريم

ودعته الحسام ورجعت 

البيتنه.....

رافد....

يابه ماطول كلكم ملتمين عدي موضوع وياكم

قاسم ......كول اشعندك

......يابه اني اريد اخطب لبنى بنت عمي

......شوف جان كلبي حاس وره هاي الزياره اكو أنه

.....يابه اني ولبنى ما انه علاقه بالمشاكل البينكم 

اني رايده وهيه خوش ابنيه

اميره....مالكيت غير بنت فوزيه

رافد......يمه احنه معلينه بالعداوه البينكم اني رايد لبني 

رائد.....انت لشوكت اتفكر بس ابنفسك منيلك افلوس الزواج 

......اني مارايد منكم بس تخطبولي

واني اشتغل والم للزواج

وباوع السراب كانه يكله ساعديني

سراب.....يابه شنو ليش ساكت 

.....انت شتكولين يريدني احط ايدي ابأيد الاكل حقي وخلاني طول هلسنين احفر بضافري حتى اعيشكم وكبركم

سراب.....

يابه لبنى ورافد ماالهم ذنب

بالسوى عمي بيك

........ادري مااله ذنب بس مراح يرتاح محد يعرف محمد ابكدي

رافد.....يعني شيسوي ...يابه الله يخليك وافق واخطبه وكلشي ما ريد بعد

سراب......اول مره اشوف ابويه ساكت وهادء بس هم ما كال اموافق لو لا

رائد....عوفه هسه وبعدين ارجع افتح الموضوع ويا لا تضغط عليه تره بعده مريض

عفتهم وصعدت الغرفتي اعصاب

اني اعرف ابويه راح يطلع روحي

كلبت بقمصاني كلت اطلع للكهوه

شويه لكيتهن ما مضروبات اوتي

صحت

شهد...شهددددد 

......ها رافد

.......ليش ما كاويه قمصاني من البارحه كتلج

اظلين طايحة حظ لشوكت

شهد.....عندي امتحان وما كدرت والله

........هسه اشككهن الكتبج واعلمج

اشلون تعوفين القمصان وتقرين

......وخر شنو اشككهن

......شالت ايدي وجريته من شعرهه وسطرتهه راشدي

والله الا اربيج من جديد

صعد رائد وسراب على حس الصياح والبجي

رائد.....لك انت اظل حقير ليش اتمد ايدك عليه

رافد.....لا تغلط احترم نفسك

وكبت اصياح بين الاخوه

رافد طلع من البيت اعصاب ما يشوف بعيونه

رائد.....بدت رحمة الله راح يظل

يوميه مشكله ما طول ابويه ما موافق 

سراب....رافد ما يرتاح الا يجيب اجله لابويه ان شي اعرفه اشگد اناني ويحب نفسه هو هو

سراب....

افكار تتعارك ابراسي اخاف ازوج

ويجيني هو وزوجته .... لا 

لا ميسويه وسام اني متاكده هو منتظرني مثل ما اني انتظره

ما انام من غير ما اتكلب وتنزل دمعتي محتاره بحالي مر الشهر والشهرين وهذا الثالث وماكو اخبار ولا سمعت اسير اجه

تعبت اعصابي خابت آمالي اشوف الدنيا من حولي تتحرك الا اني واكفه اراوح ابمكاني

يمكن صحيح كلام ابويه اذا اجه وسام شيسوي بيه اذا اكبر ...حتى يجوز ما يصير بعد عندي اطفال

اكيد هو هم فكر بلافكر بي العمر

وغفيت وسط الحسبات والهم

بالحلم شفت نفسي لابسه بدله

وناس اهوايه واني ادور بيناتهم على وسام

يسالوني اشلونه وسام

اكلهم لابس دشداشه بيضه 

وادور بين الشباب...وفجأه من بعيد شفته كمت اصيح عليه وسام تعال

تعال

اشوفه بده يقترب عليه واني فرحانه لان لكيته

ومن وصل يمي مد ايده ولزم ايدي

بس تغير وجهه مو وسام ....هذا ليث...اشجابه اهنا

بالحلم

انقهرت وبجيت

كتله انت ليث شلون اجيت لهنا

كال اجيت على مودج

كتله لا اني اريد وسام وين راح

ورجعت اركض وادور عليه

فزيت....

ارجف وعركانه وحلكي يابس كانه صدك جنت اركض

كمت شربت مي وباوعت الساعه ٥

رحت اتوضيت الصلاة الصبح

كملت صلاه سجدت اشكي وابجي الرب العالمين 

حتى بالحلم ما ان امل ننجمع

يبين مكتوب علينه الفراك

بدلت وطلعت الدوامي روتين قاتل 

الهي نفسي الى درجة التعب حتى 

ميبقى وقت عندي افكر

اجتني اريج وبشرتني ابن عمه 

خطب

كانت فرحانه 

اريج ومروان اني كنت السبب بتعارفهم وجمعتهم ....وربطهم حب نظيف والحقيقه الاثنين يستاهلون السعاد

سراب....تعالي احجيلي منو خطب

اريج......ولج طلع يحب وحده متعرف عليه جديد

وراح يزوج هذا الشهر

....اي بلكت يفك منج

....عمي تعارك ويه ابويه يگله بنتك فرقتنه

وابويه زعل واجه شبعني رزايل

....ههههه كلشي يهون لعيون مروان

.....اي والله عاد اتفقنه وره زواج ابن عمي راح يتقدملي انشالله

.....اي هاي الاخبار الحلوه 

الله يتمملچ على خير

.....

رجعت للبيت بليل كان خميس

كعدت اشويه ويه اهلي ونفس الموضوع صار اشهر نحجي بي 

خطوبة رافد 

الابويه رافض يمشي العمي ويناسبه

ورافد الكل ساعه امسوي هوسه وصياح بالبيت ساعه ويه شهد ساعه ويه عقيل ساعه ويه امي على مود الاكل يتحجج

اني عفتهم ورحت نمت اليوم كلش تعبت دوام ورجعت ويه اريج

للسوك افترينه وشتريت ملابس

الي ولشهد واكيد اذكر شيماء واولاده

          الفصل الحادي عشر من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال