رواية الخطيئة الفصل الثامن بقلم اخصائي رعب
وانا طالع من المستشفى لقيت مراد
أدامي بيركب عربيته.......
ندهت عليه بس أول ماشفني ركب العربية وجرى ، ركبت عربيتى بسرعة وطلعت وراه،
كنت عايز ألحقه عشان لو لسه مقتلش مراته أقنعه مايعملش كده، بس هو كان بيهرب مني، فضلت ماشي وراه بالعربية بس عرف يهرب منى وسط الزحمة.....
كل اللي قدرت أعمله اني أخذت نمرة العربية.....
روحت على البيت وقعدت أفكر هو ليه مراد كان مختفي كل ده؟؟
وليه هرب مني؟؟
ممكن يكون قتل مراته عشان كده خايف مني وخايف لأوصله......
بس أنا لازم أعرف
طلعت التليفون عشان اتصل بحسن، بس قبل ما يرد قفلت.....
مكنتش عايز أسمع صوته رغم انى عارف انه عمل كده مع عمرو عشان خايف عليا، بس انا عمري ماهسامحه لو عمرو مات.....
شويه ولقيت زينب بتكلمني بتسألنى على حاجة في الشغل
رديت عليها وقلتلها سيبي كل اللي في إيدك دلوقتى وهديكى رقم عربية تروحى المرور تسألي عليها، وبعدين افتكرت ان ممكن يكون التليفون متراقب
قلتلها خلاص انا هنزل أشوفها وهعدي عليكى في المكتب...
رحت المرور وكشفت على رقم العربية بس الغريب ان العربية مش بإسم مراد، كانت بإسم واحد اسمه سالم الطوخي
الطوخي !!!!
انا الاسم ده سمعته قبل كده، بس مش فاكر فين وامتى......
عرفت من المرور العنوان...
طلعت على المكتب وكنت عايز اكلم حسن عشان يجمعلى معلومات عنه بس مرضيتش اكلمه
وصلت المكتب وانا عمال افكر ليه سالم غير اسمه لما جالي وقالي اسمه مراد؟؟
ولا دي مش عربيته هو اصلا
وليه لما شفني هرب مني؟؟
انا مش مرتاح للموضوع ده ولازم اعرف ايه اللى بيحصل.....
فضلت أفكر لحد مازينب دخلت عليا وقعدت تسألني على الشغل وانا مش مركز معاها......
وبعدين قلتلها سيبي الشغل دلوقتى عشان عايزك في شغل تاني ،هو المفروض حسن هو اللى بيعمل الشغل ده بس حسن مش موجود.....
قالتلي شغل ايه؟؟؟
جبت ورقة وكتبت فيها
الاسم سالم الطوخي
العنوان كذا كذا
رقم العربية كذا
واديتها الورقة وقلتلها عايزك تجمعي كل المعلومات عن الشخص ده.....
بصت زينب في الورقة وبعدين بصيتلى بإستغراب وكأنها عايزة تقولي انا مش هعرف أعمل كده
حطت الورقة على المكتب
وقالتلي "أستاذ آدم ،انا......"
قلتلها زينب، القضية دي مهمة جدا بالنسبلي وانتى الوحيدة اللي هتساعدينى فيها
إبتسمت وكان باين عليها انها فرحانة انى كلفتها بمهمة كبيرة زى دي وقالتلي هحاول إن شاء الله
قلتلها لأ.....انتى متحاوليش
انت تجيبى كل المعلومات والنهارده يازينب، مفيش وقت.......
خذي من المكتب الفلوس اللي انتى عايزاها عشان تساعدك فى جمع المعلومات
"زينب، المحامي الشاطر هو اللي يعرف يجيب المعلومة اللي محتاجها بأي طريقة "
قالتلي النهارده هتكون المعلومات عند حضرتك
خرجت زينب وانا كنت بحضر نفسي عشان أنزل وأروح عالبيت،لان زمان الولاد صحيوا.....
بس قبل ما أنزل لقيت حسن داخل عليا المكتب،قمت من على الكرسي ورحت مسكته من القميص وقلتله انت ايه اللي جابك هنا؟؟
قالي انا جيت عشان أطمن عليك وأعرفك ان عمرو لسه عايش
قلتله انت تحمد ربنا انه لسه عايش وسبته ورحت على المكتب وسندت عليه واديت حسن ظهري
وقلتله "عمرو لو مات يبقى احنا انتهينا"
قرب مني حسن ووقف جنبي وقالى
"بالعكس عمرو لو فضل عايش كده يبقى احنا انتهينا "
عدلت نفسي ووقفت أدامه وبصتله....
قالي أيوه ياأستاذ، انا شايف ان عمرو لازم يموت عشان احنا نفضل عايشين
فضلت باصص في عينه وقربت منه ،وقلتله من امتى ياحسن وانت اللي بتشوف إيه اللي مفروض يتعمل؟؟
من امتى وانت بتتعداني في حاجة؟؟
قالى بكل ثقة من ساعة ماانت كلمتيني وقلتلي انك مش عارف تتصرف ازاي....
صدمتك انك قتلت مدام أميره ظلم مخلياك مش عارف تفكر،بس صدقني لما تهدأ وتفوق من اللي انت فيه هتعرف ان اكبر غلطة اننا نسيبه عايش،
فكر يااستاذ آدم قبل فوات الاوان......
وخذ بعضه ومشى وقبل مايخرج ندهت عليه
"حسن"
لف وبصلى
قلتله عمرو لو مات، انا هقتلك......
فضل باصصلى شوية ومردش وبعدها خرج......
قعدت على الكرسي ولعت سيجارة وبدأت أفكر
هو حسن بيعمل ليه كده؟؟
فعلا بيحبني لدرجة انه عايز يقتل عشاني؟؟؟
ولا هو جواه قاتل بس مكنش لاقى الفرصة ولقاها معايا؟؟
ولا حسن بيعمل كده لسبب تاني انا معرفوش؟؟
خلصت السيجارة ونزلت على البيت لقيت العيال لسه نايمين استنيتهم لحد ماصحيوا، وقعدت معاهم شوية واتصلت بأمل وقالتلي انها قاعده في المستشفى وحالة عمرو لسه زي ما هي مفيش جديد،
قفلت مع أمل على صوت جرس الباب، قمت افتح لقيتها زينب....
دخلت قعدت وسلمت على العيال قلتلها عرفتي توصلي لحاجة عن سالم الطوخي؟؟
قالتلي جمعت شوية معلومات وقلت أبلغ حضرتك بها، لو عايزني اكمل هكمل
قلتلها عرفتى ايه؟؟
قالتلى سالم الطوخي صاحب معرض عربيات، بس المعرض ده ستار للشغل التاني
سألتها شغل ايه؟؟
قالتلى سمعت انه تاجر مخدرات وكان محبوس قبل كده، وعنده اخ اتحكم عليه بالاعدام فى قضية قتل من سنتين، وبنته بقالها ٦ شهور مريضة في مستشفى الامل
قلتلها دي نفس المستشفى اللي فيها عمرو!!
قالتلي عمرو مين؟؟
قلتلها كملي كملي
قالتلي بس كده....
قلتلها طب ومراته؟؟
قالتلي مراته ميتة من فتره كبيرة بس معرفش إذا كان اتجوز تاني ولا لأ؟؟
قلتلها تمام...
وبعدين سألتها انتى عرفتة تجيبى المعلومات دي كلها ازاي؟؟
ابتسمت وقالتلي المحامي الشاطر هو اللي يعرف يجيب المعلومة اللي محتاجها بأي طريقة......
ابتسمت انا كمان وقلتلها تمام.....
قالتلي انا اخذت ٢٥٠٠ جنيه من المكتب ودفعت منها لبواب عمارة سالم ولواحد صاحب اخويا عشان ساعدوني في المعلومات دي واتبقى الف جنيه اسيبها لحضرتك في المكتب ولا تأخذها دلوقتى
قلتلها لأ.....خذيها ليكى
لسه هتتكلم قلتلها ده حقك ومتتكلميش كتير،
ابتسمت وسكتت
قلتلها روحي على طول وخذي بكرة أجازه
قالتلي لأ انا مش هروح انا هقعد مع مريم وفارس شوية.....
والعيال كانوا عايزينها تقعد معهم...
قلتلها ماشي وسبتها ودخلت أوضتى وبدأت أفكر في المعلومات اللي معايا
مراد مراته ميته من فترة كبيرة وهو قايلى ان مراته بتخونه!!
بنته في المستشفى وهو قايلى ان عنده ولد!!
اسمه سالم وهو قايلى اسمه مراد!!! وتاجر مخدرات....
تاجر مخدرات!!!!
قمت لبست هدومى بسرعة ونزلت على طول على المعلم ياسر القناوى تاجر المخدرات اللي قبلت قضيته زمان لانه بطل واللى دفعلى مبلغ كبير.......
وصلت لحد عنده في المحل، سلم عليا وحضني وكان فرحان جدا انه شفنى....
سألته انت تعرف واحد إسمه سالم الطوخي؟؟
قالي اه اعرفه
قلتله تعرف ايه عنه؟؟
قالي كان شغال صبي من ١٠ سنين، وبعدين شغل دماغه وفتح لنفسه شغل، وعمل اسم .....
قلتله طب انا عايزه
قالي طب لو في مشكلة قولى وأنا اخلصهالك بكلمة
قلتله لأ أنا عايزك تخطفه....
سكت المعلم ياسر وقالي أخطفه!!!
دي مشكلة كبيرة للدرجة دي؟؟
قلتله مفيش مشكلة ولا حاجة أنا عايز اتكلم معاه،
بس بالوضع اللي هو فيه ده هبقى قاعد معاه وانا أقل منه ،لكن لما يكون تحت إيدي هبقى بتكلم معه وهو اللي أقل منى،
هتعرف تجيبه ولا أفكر انا فى طريقة اجيبه بيها؟؟
رد ياسر وقالي انت شلت رقبتى قبل كده من الموت وأى حاجة تطلبها هتبقى اقل من حقك.....
كتبت للمعلم ياسر عنوان الشاليه اللي حسن كان مأجره وقلت له انا عايزه في العنوان ده....
قالي متقلقش يا استاذ آدم يومين بالضبط هيكون عندك...
قلتله لأ بكرة يكون عندى،
الوقت مش في صالحي
قالي تمام....
روحت البيت قعدت شويه مع الولاد وزينب...
كنت محتاج انى اقعد معاهم لأني حسيت انهم هيوحشوني جدا الفترة اللي جاية، كنت عايز اشبع منهم.....
زينب روحت وانا نمت وأول ما صحيت تاني يوم رحت على الشاليه، وفضلت مستني لحد مالقيت ٢ من رجالة المعلم ياسر داخلين ومعهم مراد متكتف ومتغمى...
قلتلهم سيبوه هنا واخرجوا
اخدت مراد وخليته يقعد على رُكبه وانا جبت كرسي وقعدت أدامه وشلت اللزق اللي على بقه وشلت القماشه من على عينيه،
وأول ماشفني ضحك....
ضحك بصوت عالي.......
فضلت باصصله لحد مايخلص ضحك وأول كلمه قالهالي
" آدم، أنا بجد معجب بيك"
ده انا اتعلمت منك ياراجل.......
ابتسم وقالي بصراحة أبهرتنى يا استاذ آدم والابتسامة اللى على وشه اختفت وقالي ولا اقولك ياسفاح آدم؟؟؟
ابتسمت وقلتله قول اللي انت عايزه يا مراد ولا اقولك يا سالم؟؟
ضحك وقالي طب مادام عرفت انا مين مش خايف من اللي انت بتعمله معايا ده؟؟؟؟
ضحكت وقلتله طب ما انت كمان عارف انا مين، ازاي بتسألنى سؤال زي ده؟؟؟
قالي بس انا مش زي اللي انت قتلتهم، انا موتى هيفتح عليك أبواب جهنم
قلتله ومين قال انى هقتلك، انا جايبك اتكلم معك وهسيبك تعيش، بس لو قلت الحقيقة،
وقبل ما اسأل لقيت سالم ضحك وقالي
"انت كده كده هتسيبني"
بس أنا هقولك الحقيقة لانى عايزك تعرفها..
"" انا جيتلك من سنتين عشان قضية مراد الطوخى، فاكر الاسم ده ؟؟
فضلت ساكت ومستنيه يكمل....
قالي مراد اخويا قتل مراته لأنها خاينة، وجيتلك أكثر من مرة عشان تقبل قضيته، وانت رفضت تقابلني حتى... لأنك سمعت اني شغال في المخدرات وسبت أخويا يموت لمجرد انه اخويا.....
انا كان ممكن أموتك من زمان، بس قررت انى أخليك تحس نفس الإحساس قبل ماأسلمك للبوليس عشان تتعدم، زي مااخويا اتعدم.....
عدلت نفسي وسألته عرفت منين انى عقيم؟؟؟
ضحك وقالي انا معرفتش .....
انا اللي خليتك عقيم........
انت بقالك سنتين هدير السكرتيرة بتحطلك في القهوه بتاعتك نقط من دواء معين بيسبب العقم .....
اتصدمت لما سمعت اسم هدير بس سكت عشان يكمل كلامه....
قالي انا جيت عملتلك الحوار اللي عملته عشان اخلي فكرة الخيانة في دماغك بس...
وكنت هزق عليك بنت تقول ان الولد اللي معها ده ابنك عشان تجبرك انك تعمل تحاليل، وتكتشف ساعتها انك عقيم، بس انت الصراحة قصرت عليا الطريق خالص، وكلامي لوحده كان كفيل انه يخليك تروح تكشف،
طبعا مع المكالمات اللي كانت بتيجي لمراتك......
صحيح يا آدم، مصعبتش عليك وانت بتدبحها، كان شكلها عامل ازاي؟؟ قولي....
فضل ساكت مستني مني رد، بس انا كنت هادئ جدا ومتمالك أعصابي
قلتله يعني عشان رفضت قضية اخوك خلتنى اقتل مراتى؟؟!!
قالي لأ.......
الكلام ده يقوله أي محامي عادي، لكن انت عارف ان حياة اخويا كانت في إيديك وانت اخترت انه يموت لانه قتل مراته الخاينة، وكان لازم تعيش اللى أخويا عاشه.....
فضلت هادى وقربت منه وقلتله يعني انت خليتني اشك في مراتي وأقتلها وأقتل اتنين بعدها وكنت هقتل تانى، كل ده عشان خاطر اخوك؟؟؟؟
قالي لأ ....انا معملتش كل ده، انا كل اللي عملته خليتك تشك في مراتك أما الباقي كله انت اللي عملت لوحدك.....
بس بصراحة انت أبدعت يا آدم.....
فلت مني أكثر من مرة
مرة لما قتلت مراتك من غير ولا دليل، وانا بلغت عن مكان الجثة يمكن تكون سبت حاجة تدل عليك بس انت طلعت سليم ومحدش شكك فيك حتى....
ومرة لما قتلت دينا، انت اللي بلغت البوليس قبل ما أبلغ عليك ولبستها لغيرك....
اتفاجئت بيك لما قاتلت رشا، بس بصراحة كنت مستمتع من اللي انت بتعمله......
ومرة لما خطفت عادل انا كنت مراقبك وكنت مستني اتأكد انك قتلته، بس اتفاجئت لما لقيته خرج...
اتفاجئت اكثر لما عرفت انك خطفت عمرو.......
بس عارف أكبر مفاجأه بالنسبالي لحد دلوقتي هي ايه؟؟؟
هي انت يا آدم !!!!!
صدقني انا كنت مستمتع وانا حاسس اني قدرت أضحك على واحد شبهك والحاجة الوحيدة اللي معملتش حسابها هى الصدفة اللي خلتك تشوفي
بس كويس برضو عشان كنت عايزك تعرف انا عملت معك ايه، وليه؟؟
قلتله بكل ثقة بس انت لو استنيت عمرك كله مكنتش هتعرف تسلمنى للبوليس.....
ابتسم وقالي بصراحة انت عندك حق....
عشان كده قررت انى أقلتلك....
ولأن اسلوبك في الجريمة عجبني، انا اتعلمت منك.....
اديت هدير سم عشان تحطه في القهوة بس هي خافت .....
فقررت انى اقتلك بطريقة تانية،
وابتسم وقالى شفت تلميذك بقى بيفكر شبهك ازاي!!!
قربت منه وقلتله بصوت واطي
"انت مريض"
ضحك بصوت عالي وقالي
"وانت اللي سليم يا آدم "
وكمل ضحك....
رغم محاولات سالم المتكررة انه ينرفزني الا انى كنت هادي جدا
يمكن عشان ارتحت لمافهمت
اويمكن عشان كنت عارف انى هقتله بعد ما يخلص كلامه...
قمت جبت السكينة وقعدت أدامه
قلتله إديني سبب واحد يخليني أسيبك تعيش
كشر وقالي بصوت قوى
أنا مش مراتك هتقتلها وتدفنها ومحدش يعرف عنك حاجة....
انا عندي رجالة وعندي عيلة كبيرة مش هتسيب اللي ضحك عليا وجبني هنا
ولا هيسيبوك انت عايش ولا هيسيبوا ولادك حتى........
حطيت السكينة على الارض أدامي
لقيته ابتسم لانه افتكر انى خفت...
ولعت سيجارة وقلتله انا مستعد ألبس عيلتك كلها قواضي....
انا مستعد ألبس حد منهم جريمة قتلك انت شخصيا .....
ولو حد من عيالي حصله حاجة فاعرف ان بنتك اللي في المستشفى هي اللي هتدفع التمن....
عندك سبب تانى يخليني أسيبك تعيش؟؟؟
قالى انا حتى لو مت، انت هتموت بعدي
انا كنت قريب منك وهفضل قريب منك، حتى بعد ماأموت....
مسكت السكينة من على الارض وقلتله عارف ياسالم....
أنا بعد ماعرفت اني قتلت مراتي ظلم ،وانا قررت اني مش هقتل تاني لأي سبب.......
وجبتك هنا عشان اتكلم معاك واعرف انت مين وليه عملت معايا كده؟؟؟
بس من اول ما بدأت كلامك وانا بدأت جوايا الرغبة انى أقتلك وبعد ماخلصت كلامك بقيت متأكد اني لازم اعمل كده......
قمت وقفت أدام سليم وفضلت باصصله وبدأ الخوف يظهر على وشه وقالي "آدم انت بتحسب كل حاجة قبل ما تعملها..."
لازم تفهم ان موتى مش هيعدي بالساهل......
فضل يقول كلام كتير وتهديدات، بس انا كنت شايف في عنيه الخوف.....
بدأت ألف حواليه وهو قاعد على الارض...
وقلتله أنا عارف ان انا اللي قتلت مراتي بنفسي وكل حاجة عملتها بعد كده عملتها لوحدي، بس انت حاسبتني على رفضى لقضية اخوك و اعتبرتني ان انا اللي قتلته.....
انا كمان هحاسبك على كلامك اللي خلاني أقتل مراتي و هعتبرك ان انت اللي قلتها......
هحاسبك على اولادي اللي كنت هاموتهم.....
هحاسبك على كل حاجه حصلتلي، وكل حاجه انا عملتها .......
لأن كلامك كان دايما بيتردد فى ودنى، انت كنت معايا في كل خطوة......
انت عامل زي الشيطان
لأ لأ ....
انت فعلا شيطان.......
وقفت أدامه ووطيت عشان تبقى عيني فى عينه بالضبط وقلتله بصوت واطي
"النوع اللي زيك مينفعش يفضل عايش وسطنا"
" لازم نخلص منه "
ابتسم وقالى
"أنا وأنت نوع واحد يا آدم"
قلتله متقلقش أنا عارف ان نهايتى قربت....
بس انت نهايتك دلوقتى ياسالم، وقبل ما أحط السكينة على رقبته، لقيت إيد مسكت إيدي
ببص لقيتها اميرة.....
قالتلى آدم، انت مش قلت انك مش هتقتل تاني......
سيبه يمشي ياآدم
قلتلها انا هقتله عشانك انتى ....
قالتلي وانا مش عايزاك تقتل تاني
فضلت باصصلها وقلتلها ولا انا عايز..... بس لازم.......
شلت إيديها من على إيدى وحطيت السكينة على رقبت سالم......
يتبع........
متقولش توقعك ايه
قول انت عايز ايه(آدم يقتله ولا يسيبه يعيش؟؟)
بدل ماتدور وتبحث علي الروايات خليها علي تليفونك وحمل تطبيقنا
