رواية نهاية أحزاني الفصل السادس 6 بقلم عادل عبد الله

رواية نهاية أحزاني الفصل السادس 6 بقلم عادل عبد الله 

 الحلقة السادسة 
 فجأة افتكرت شادي وافتكرت اني لازم ارجع له كل الهدايا اللي هداني بيها .ومن الهدايا دي كانت بوسي !!
بصيت لبوسي وقولتلها معلش يا بوسبوس النهارده اخر يوم ليكي هنا معايا لازم ارجعك لشادي علشان احنا خلاص فسخنا الخطوبة وهو اللي هداني بيكي .
بوسي بصت لي وجريت فتحت دولابي وجابت صورة ماما الله يرحمها .
عرفت ان بوسي عاوزة تقولي حاجة بس انا لسه مش فاهمة عاوزة تقولي اي .
بوسي علي كتفي وتحط ايديها علي شعري كأنها بتطبطب عليا .
فهمت ان بوسي عاوزة تقولي انها بتحبني زي ماما .وانها مش عاوزاني ارجعها لشادي .
بقبت محتارة اعمل اي ؟ انا بحب بوسي اوي ومش قادرة استغني عنها وهي كمان بتحبني حب مش عادي ومش عاوزة تسيبني لكن المفروض ارجعها لشادي .
شادي خلاص باعني وفسخ خطوبتنا .لكن انا مش عارفة اي اللي غيره من ناحيتي فجأة كده !!! 
بسرعه افتكرت المية اللي كانت قدام باب الشقة وان ممكن تكون خالتي عملت سحر علشان تفسخ خطوبتنا .
يعني شادي ملوش ذنب .لكن انا مش معقول اتمسك به وهو مش عاوز يكمل معايا .
خالتي دي منها لله طول عمرها بتعذبني ومش بتحبني ولا بتحب ليا الخير .
افتكرت كمان لما اسماء اختي راحت لشادي البيت وفضلت قاعدة معاه فترة طويلة و دارت عليا انها راحت هناك وشادي كمان داري عليا .
مش عارفه اعمل اي اتمسك بخطيبي حبيبي ولا استسلم للي بيحصل ده .
افضل حل اني اقول لبابا علي كلام شادي وارجع له الهدايا ماعدا بوسي هعمل نفسي اني نسيت انها هدية منه .لحد ما اشوف شادي هيعمل اي .
بابا واخواتي رجعوا البيت .قولت لبابا علي كلام شادي معايا واديتله الهدايا يرجعهاله وكان واضح عليا الحزن والتوتر .
بابا قالي طيب اهدي وانا هكلم شادي واشوف في اي .بس لما اطمن علي خالتك الاول .
اسماء كانت قاعدة وواضح عليها انها فرحانه من اللي حصل .
لما روحنا تاني يوم لخالتي المستشفي بوسي رفضت تروح معايا عند خالتي .
ولما روحنا المستشفي عرفنا ان خالتي فاقت من الغيبوبة لكن المفاجأة انها في حالة شرود تام ومش بتسمع حد ومش بتتكلم مع اي حد خالص وكأنها في دنيا تانية غير اللي احنا عايشين فيها .
بابا كلم الدكتور وسأله عن حالة خالتي .الدكتور قاله انه مش هيقدر يشخص الحالة دلوقتي .
انا عارفة ان الشماته حرام لكن انا مش هقدر انكر اني حسيت ان ربنا بينتقم ليا منها بسبب كل اللي عملته ولسه بتعمله معايا .والعذاب اللي شوفته منها .
وهناك في المستشفي شادي وخالي ومرات خالي راحوا يطمنوا علي خالتي وانا هناك .
اول ما شوفته خرجت علطول من الغرفة وقعدت بره بعيد .
بعد ربع ساعة شوفت بابا اخد شادي علي جنب وفضلوا يتكلموا اكتر من نص ساعة .بعدها شادي وخالي ومامته مشيوا .
بابا قالي المفروض ان خالتك محتاجة مرافق معاها في المستشفي وانتي عارفة الشغل اللي ورايا واختك واحوكي لسه صغيرين .عاوزك تسهري معاها الليلة دي علي ما اشوف حد تاني يبدل معاكي .
كنت عاوزه اسأله عن كلامه مع شادي لكني اتكسفت اسأل .
لكن بابا قالي انا شايف السؤال في عنيكي .يا بنتي كل شئ قسمة ونصيب . شوفي انتي مستقبلك ومذاكرتك و اجلي الكلام في الموضوع ده دلوقتي لحد ما اعصابكم انتوا الاتنين تهدا .
بابا خرج وجاب ليا انا وخالتي اكل كتير وعصاير وقالي خدي الحاجات دي معاكي و اداني فلوس كمان قالي علشان لو احتجتي اي حاجة .
مشيوا كلهم وسابوني لوحدي .مسكت موبايلي وقعدت العب عليه وانا كل تفكيري في شادي وهل هنرجع تاني لبعض ولا كده قصتنا خلصت .
وكل شوية افتح الرسايل اللي كنا بتكتبها لبعض واقراها .
الممرضة جات قالتلي انتي بنت المريضة دي ؟ قولتلها ايوه .قالت لي تعالي اكليها علشان رافضة تاكل خالص طول اليوم .
دخلت معاها عند خالتي .كانت سرحانه خالص وانا بكلمها ومش سمعاني .
حاولت اكلها اي حاجه رفضت .لحد ما قدمتلها طبق شوربة وافقت .
ولسه بديها اول ملعقة بايدي لقيتها صرخت في وشي وفضلت تقول : دم ....دم ......الدم في الطبق .
الممرضة جت علي صوتها وفنحت الاوضة وسألتني في اي ؟ قولتلها اللي حصل . الممرضة حاولت تهديها مفيش فايدة راحت قالت للدكتور .
الدكتور اعطاها حقنة مهدئة فورا علشان تهديها .
خرجت قعدت برة الغرفة مع الممرضة وقعدنا نتكلم انا وهي ولتعرفنا علي بعض وحكيت لها علي قطتي بوسي .وبعدين الممرضة مشيت وراحت تشوف شغلها .
قعدت لوحدي و افتكرت بوسي وقولت لنفسي وحشتني اوي بوسي يا ريتها كانت جت معايا .
ببص قدامي لقيت بوسي .ضحكت اوي وقولت لاء بقه كده اما انا اتجننت خلاص او ان ده خداع بصري وبوسي مش قدامي .
فضلت بوسي طول الليل قاعده معايا لحد الصبح لما راح بابا المستشفي ومعاه اخواتي وحكيتله علي اللي حصل بالليل .
بابا قالي هي بوسي جت منين ؟ ضحكت وقولتله مش عارفه يابابا .اسألها يمكن تقولك .
اخدت بوسي معايا و رجعت البيت .و اخدتها في حضني ونمت .
نمت طول النهار وصحيت علي المغرب اكلت واخدت بوسي ونزلت اروح لخالتي المستشفي وكان بابا وعمرو اخويغ بره البيت ومفيش حد في البيت الا اسماء .
ولسه بركب تاكسي اروح به المستشفي شوفت شادي داخل شارعنا !!!!!
استغربت اوي !!! هو شادي رايح فين دلوقتي ؟؟ ده مفيش حد في البيت الا اسماء وحدها !!!!!!!!!!

يتبع ...........

الفصل السابع من هنا

بدل ماتدور وتبحث علي الروايات خليها علي تليفونك وحمل تطبيقنا

تعديل المقال