رواية الخطيئة الفصل الخامس بقلم اخصائي رعب
قعدت أفكر في الدهب اللي اتسرق من رشا بعد ماقتلتها ومين اللي سرقه،
تعبت من كتر التفكير ونمت
تاني يوم رحت المكتب شربت القهوة لحد ماحسن وصل ،واديته كل المعلومات عن الشاب اللي كان بيجي لرشا قبل ما تعرفني،
قالي طب وموضوع عادل؟؟
قلت له لأ... سيب موضوع عادل دلوقتي خالص مش هينفع اعمل أي حاجه إلا اما أعرف ايه اللي بيحصل بالضبط.....
قالي تمام ، بس هو في واحده برا عايز تقابلك، قلتله دخلها
خرج حسن ودخلت بنت في العشرين من عمرها جميلة جدا وباين عليها الكسوف، مش عارف ليه اول ماشفتها تخليتها وانا بقتلها.....
سلمت عليا وقلتلها خير ايه هي قضيتك؟؟
قالتلي لا انا مش زبونة،انا إسمي زينب وكنت جاية عشان اشتغل،
انا لسه مخلصة كلية حقوق من سنتين بتقدير جيد ، وكنت قاعده فالبيت بس حالتنا المادية بقت صعبة شوية لان ابويا قعد من الشغل،
فأنا قررت اشتغل وأساعده، وعارفة إن حضرتك محامي كبير وهتعلم من حضرتك اللي يخليني محامية شاطرة انا كمان..
(زينب كان شكلها زى الملايكة وهدوءها وكسوفها ونظره الحزن اللي في عينيها كانت طبيعية جدا مش مصطنعة)
قلتلها مفيش مشكلة هتنزلي معايا تدريب وهجيبلك مكتب جنب مكتب حسن،
قالتلي شكرا، مش عارف أقول لحضرتك إيه......
ومكنش باين عليها إنها مبسوطة، قلتلها هتأخذي مرتب ١٥٠٠ جنيه
بس بعد كده هيزيد على حسب شغلك..
ابتسمت ابتسامة حزينة برضو وشكرتني ومشيت بعد ماعرفت مواعيد الشغل.....
نزلت أخذت العربية بتاعتي وفضلت ألف في الشوارع عشان أشوف إذا كان في حد بيراقبني ولا لأ
وفضلت ألف بس ملاحظتش حاجة وبدأت اميل أكثر لاحتمال ان اللي سرق دهب رشا هو الشاب اللي كان يعرفها....
عدي إسبوع ولقيت حسن جايبلي معلومات عن عشيق رشا بس مكنش فى حاجة مش طبيعية تخليني اشك فيه....
وقررت انى أعمل محاولة اخيرة..
وجبت رقم غريب وبعتله رسالة نصها
"انا شفتك وانت بتقتل مدام رشا وبتسرق فلوسها ،ولو مجتش تقابلني في الكافية اللي جنب بيتها كمان ساعتين ومعاك 5000 جنيه، أنا هسلم البوليس الفيديو بتاعك وانت بتسرقها"
كنت مستني اشوف رد فعله
هل فعلا هو اللي سرقها وهيخاف ويجى يقابلني ولا هو مالوش علاقة بالموضوع.....
قلت لحسن يروح الكافية كمان ساعتين يشوف هيجي ولا لأ ....
وبعد ساعتين لقيت حسن بيتصل بيا وبيقولى انه وصل وشكله قاعد مستنيك،
ارتحت جدا لماعرفت ان هو اللي سرق، وارتحت كمان لانه مكنش موجود ساعة ماقتلت رشا والا كان زمانه بيساوهمني
دلوقتى..
ده غير انه لو كان موجود مع رشا ساعتها كنت هلاحظ توترها او ارتباكها ...
قفلت مع حسن واتصلت بعمرو وقلتله هعدي عليك في البيت عشان عايز أشوف العيال، وعايزك في موضوع...
قالي تمام مستنيك ،
وصلت عنده وحكيتله كل حاجة ،قلتله ان كان في شاب بشوفه دايما نازل من عندها ولما سألت أميره الله يرحمها قالتلى ده قريبها
شفت الشاب ده قبل الحادثة بيومين نازل من عندها و كنت شاكك بس مرضيتش أقولك لحد ماأتاكد، وعرفت اوصل لرقمه وبعتله الرسالة دي ........
وهو خاف ونزل عشان يقابلني
سكت عمرو شوية وقالى بس ده مش دليل،
قلتله ماأنا عارف ان ده مش دليل
انا بس بعرفك مين هو اللي قتلها، وانت بقى تعمل تحرياتك وطريقتك في القبض عليه، بس قبل اي خطوة تأخذ إذن النيابة، مش عايزين القضية يبقى فيها غلطة، ولو احتجت حاجه كلمني برضو،
أنا دورت ورا قضية رشا لاني كنت شاكك ان اللي قتلها هو اللي قتل أميره بس دلوقتى إتاكدت إنه مش هو .....
فرح عمرو ان قضية رشا خلاص هتقفل،وقالي متقلقش أنا مش ناسي موضوع أميره،
قلتله ولا انا كمان وغالبا وصلت لخيط ممكن يوصلنى للقاتل..
عمرو قالي خيط ايه؟؟
قلتله مش دلوقتى لما اتأكد
قالي طب عرفني عشان أفكر معاك قلتله لأ سيبني براحتي بس،وانا لو احتاجت حاجة هقولك
قالي" آدم، لوعرفت توصله هتسلمه للبوليس والقانون هو اللي هيرجع حقها،متعملش انت حاجة "
ابتسمت وقلتله متقلقش أوصله بس الأول
سبته مشيت وكنت مرتاح نفسياً لان قضية رشا خلاص هتتقفل
وإتاكدت ان مفيش حد مراقبني وبكده يبقى مش ناقص غير عادل....
روحت البيت وبدأت افكر بهدوء إزاي هقتل عادل....
حطيت أدامي كل المعلومات اللي أعرفها عنه، سافر يشتغل في الكويت من ٣ سنين ورجع عشان يتجوز خطيبته ويسافر تاني،
أبوه متوفى وأخته لسه في ثانوي وعايشة مع أمها وعادل هو اللي بيصرف عليهم......
سرحت شوية وفكرت في مصير اخته وامه بعد ماأقتل عادل....
بس اللي قطع تفكيرى نظرة أميره وهي بتعيط عشان أسيبها تعيش، وانا قتلتها، وحلفت انى لازم أقتل عادل مهما كانت النتيجة، اما اخته وامه ممكن ابعتلهم مرتب شهري يعيشوا منه ،بس عادل فلازم يموت...
المشكلة ان كل اللى قتلتهم كانت تجمعني بيهم علاقة فكان سهل عليا أدبر مكان القتل والطريقة
اما عادل فانا معرفهوش هقتله ازاي؟؟
فكرت في السبب اللي خلى عادل يسافر من بلد لبلد تانيه (الشغل)
وهو ده نفس السبب اللي هيخلي عادل يجي لحد عندي ،
كلمت حسن وقلتله يسافر الساحل ويأجر شاليه فى حته بعيد عن التجمعات شوية ....
وقلتله يعمل صفحة على فيسبوك بإسم شركة وهمية طالبه محاسب والسن من كذا كذا .....
وخليته يحط كل المواصفات اللي تنطبق على عادل
وقلتله هتعرف تخليه يشوف الإعلان ده؟؟
حسن قالي متقلقش انا معايا الفيس بتاعه وبتاع كل اللي حواليه وهخلي الإعلان يوصله بأي طريقة
قلتله تمام، وأول مايشوفه ويبعتلك رسالة قوله على معاد المقابلة واديله عنوان يكون قريب من الشالية اللي انت هتأجره
قالي تمام وقفل ....
فضلت مستني يومين لحد ما حسن كلمني وقالي ان عادل بعتلى رسالة بيسأل عن التفاصيل وانا اديته ميعاد المقابلة بكره الساعة ١٠ الصبح
قلتله تمام، حضر نفسك عشان هتسافر معايا
وفعلا سافرنا في نفس اليوم وعملنا يافطة بإسم الشركة على باب الشالية وحطيت مكتب في داخله الباب وكراسي وحضرنا نفسنا
وقبل الساعة ١٠ كان حسن قاعد على المكتب كأنه سكرتير
وانا قاعد مستني كأنى بقدم على شغل زى عادل، بس كنت لابس كاب ونظارة ومغير في شكلي عشان لو عادل يعرفني....
اتصل عادل بحسن وسأله على عنوان الشركة لانه وصل ومش لاقي حاجة في العنوان اللي معاه
حسن قاله العنوان الصحيح وقفل
(طبعا حسن مقلش لعادل العنوان الصحيح من الأول عشان لو عادل قال لحد من اللي حواليه العنوان هيبقى فى خطر علينا لما عادل يختفى)
وصل عادل ومحسش بأي حاجة غريبة
قعد جنبى،وبعد شوية سألت حسن هو المدير هيتاخر؟؟
قالي لأ متقلقش زمانه على وصول
حسن قدملنا انا وعادل علبتين عصير بس علبة عادل كانت محقونه بمخدر، اخذت العلبة وشربت على طول عشان أشجع عادل يشرب...
وفعلا شرب وبعد ماداخ خالص
قلت لحسن يشيل اليفطة ويخرج برا ويكون قريب عشان لو احتاجته اكلمه....
مشي حسن وانا ربطت عادل بحبل وعملت كوباية شاي وولعت سيجارة واستنيته لحد مافاق وأول ما فتح عينه قالى بإستغراب انت مين؟؟
كان باين عليه الخوف....
قمت من مكاني وسحبت كرسي عشان أبقى أدامه وقربت منه وابتسمت وقلتله بصوت واطي
" انا اللي هقتلك"
حسيت بخوف في عينيه وطريقته..
وقالي بصوت مقطع تقتلني ليه؟؟
هو انت مين اصلا ؟؟
وتعرفني منين؟؟
فضلت ساكت وباصصله
قالي انت لو عايز فلوس انا معايا وممكن أديك اللي انت عايزه .....
بس ايه اللي هتستفاده من قتلى؟؟
قلتله انت مش عارفني؟؟
ركز كده شوية
قالي لأ، انا معرفش انت مين
ضحكت وقلتله انا أبقى أبو ولادك
فضل عادل مستغرب، وقالي ولادى مين؟؟
وابوهم ازاي؟؟
انت اكيد مجنون ياأما تقصد حد تاني
قلتله لأ انا اقصدك انت
فاكر أميره ياعادل؟؟
سكت شويه وقالي أميره مين؟؟
قمت جبت السكينة ورجعت قعدت تانى أدامه وقلتله أميره جارتك فاكرها؟
قالي ايوه فاكرها مالها أميره؟؟
ابتسمت وقلتله انا قتلتها عشان خانتني معاك، وهقتلك انت كمان....
قالى انت جبت الكلام ده منين
أميرة مراتك انا معرفش عنها اي حاجة من ساعه ما اتخطبت،
ومشفتهاش من ساعتها الا مرة واحده في فرح واحدة جارتنا ،سلمت عليها وماوقفتش معاها اكثر من دقيقة، انت اكيد غلطان يا استاذ...
قلتله غلطان!!!
غلطان ازاي وانا اصلا مابخلفش وعندي ولدين؟!
سكت شوية وقالي مراتك خانتك وضحكت عليك، دي مشكلتك انت انا مالي؟؟
لماسمعت كلمة مراتك خانتك ضربته بالقلم ووقع على الارض
نزلتله على الارض وقلتله بصوت عالي
"خانتني معاك وهقتلك زي ما اقتلتها"
قالي هتقتلنى وانت مش متأكد ان انا اللي عملت كده؟؟
وتسيب اللي عملت كده عايش؟؟
رغم انى كنت متنرفز، وكنت خلاص هقتله بس حسيت ان كلامه صح، قومته من على الارض وحطيت السكينة على رقبته وقلتله انا قتلت أميره عشان مرضيتش تقولى الحقيقه، ولو كانت قالت اللي حصل كان ممكن سبتها، وانت كمان عندك أخر فرصه ترد على سؤالي بصراحة وساعتها ممكن أفكر انى أسيبك...
كنت بحاول اطمئنه بس عشان اتأكد ان هو اللي عمل كده قبل ماأقتله وسألته الولاد دول ولادك انت؟؟
سكت شويه وكان بيفكر.....
وقالي انا مستعد اعمل تحليل dna عشان اثبتلك انهم مش ولادي
حسيت بالثقة فى كلامه رغم ان السكينة على رقبته ...
وفي نفس الوقت حسيت بالخوف ان اقتله من غير ماأتأكد ...
شلت السكينة من على رقبته واتصلت بحسن وقلتله يجي ويخليه قاعد معاه لحد ماأنزل اسكندرية وأرجع
واخذت من عادل عينة من شعره وسافرت،رحت على العيال على طول عند خالتها وأخذتهم وطلعت على المعمل ،وطلبت اعمل تحليل dna وإديتهم شعر عادل، على أساس انه شعري انا...
بس الدكتوره طلبت منى عينة حديثة وانا رفضت وقولتلها دى عينة حديثة.....
حسيت ان الدكتورة مستغربة انى جايب العينة بالشكل ده
أخذت الشعر وأخذت من العيال عينات وقالتلى النتيجة كمان ٤ أيام
روحت العيال وكلمت حسن وقلتله يخليه قاعد مع عادل لحد ما اقوله هنعمل ايه.......
اتعاملت طبيعي جدا ال ٤ أيام دول، كنت بروح الشغل عادي بس مكنتش بشتغل ،كنت بقول لزينب تعمل ايه وتتصرف إزاي وهي كانت ذكية جدا وبتفهم بسرعة...
عرفت من عمرو ان عشيق رشا خلاص اتقبض عليه ولقوا معاه الدهب،والقضية خلاص اتقفلت...
فكرت بعد ما اخلص اللى انا فيه ده هبقى ابعتله محامي عشان يتحبس بس مايتحكمش عليه بالاعدام
عدوا ال٤ أيام و رحت اشوف نتيجة التحليل وإتصدمت لما الدكتورة قالتلى ان العينات غير متطابقه !!!!!
يعني ايه؟؟!
يعنى الولاد مش ولاد عادل؟؟!
يعنى كنت هقتل واحد ظلم واسيب اللى عمل كده عايش؟!!
فضلت ساكت وسرحان والدكتورة لاحظت الصدمة على وشى وعشان تهون عليا قالتلي ممكن تكون في حاجة غلط فى العينات
ممكن نعمل تحليل تاني
قلتلها لأ خلاص مالوش لزوم
قالتلى صدقني مش هنخسر حاجة
وكانت مصممة....
سبتها تأخد منى عينة رغم انى عارف ان أنا عقيم بس عشان متلاحظش حاجة وتشك فى تصرفاتى....
خلصت ونزلت طلعت على الساحل على طول
وأنا في الطريق عمال أفكر لو مش عادل، يبقى أميرة عملت كده مع مين؟؟
بدأت أشك في كل اللي حواليا وبعدين فكرت انا هعمل ايه في عادل بعد ماعرفت انه بريء؟؟؟
لو سبته هيطلع يقول كل حاجة حصلت وهيبلغ عني وانى قتلت أميره، ولو قتلته هبقى أول مرة بقتل واحد مالوش ذنب....
واحد بيصرف على امه واخته وغلطته الوحيدة هو انى شكيت فيه.
بس دى مش غلطته هو، دى غلطتى أنا
ليه هو اللي يدفع تمنها؟
وصلت الساحل ولسه ما اخذتش قرار هعمل ايه فى عادل....
دخلت الشاليه ولقيت حسن مستنينى وعادل مربوط أدامه
وأول ماعادل شفني قالي بكل ثقة إتاكدت ان ماليش ذنب؟؟ قلتله أنا إتاكدت،
بس انت برضو لازم تموت، انت عرفت حاجات كثير وبمجرد ماهتخرج من هنا هتبلغ عنى
قالي والله ما هبلغ عنك....
وهأنسى اصلا انى شفتك أو أعرفك، بس سيبني أمشي......
فضلت ساكت وباصصله
قالي أمي وأختي ملهمش حد غيري
وبدأت الثقة اللي فيه تتحول لخوف لانه فهم ان حياته قصاد حياتى
فضلت ساكت بفكر هعمل ايه
ولقيت حسن بيقولي أنا عارف انه ملوش ذنب، بس لو خرج من هنا هتبقى حياتك في خطر، احنا لازم نموته
بصيت لحسن وانا بسمع كلامه
وبعدها بصيت لعادل وهو عمال يتحايل عليا ويفكرني بأمه واخته، ويحلف انه مش هجيب سيرة لحد
مسكت السكينة ومشيت ناحية عادل وقربت منه.......
يتبع......
١- الولاد يبقوا ولاد مين؟
٢-آدم هيقتل عادل ولا هيسبه؟
رد فى كومنت 😍
بدل ماتدور وتبحث علي الروايات خليها علي تليفونك وحمل تطبيقنا
