 |
رواية نهاية أحزاني الفصل الرابع 4 بقلم عادل عبد اللهالحلقة الرابعة الاغرب من ظهور القطة بوسي المفاجئ هو اننا واحنا ماسكين خالتي علشان تسيبها و مش تدبحها . كانت بوسي واقفة علي مسافة مننا وبتبص علينا وفجأة نزلت الدموع من عنيها .ببص في عنين بوسي لقيت دموعها دم !!!!!!! مسكت بوسي وشيلتها علي ايدي ومسكت منديل ومسحت دموعها .علشان اعرف الدم ده منين . معقول ده !! ده فعلا دم في المنديل !! ببص في عنيها مش فيها اي اثر لجرح . شادي مسك السكين من خالتي وقالها حرام عليكي يا عمتي بلاش تدبحيها دي مهما كانت روح . دخلت انا اعمل قهوة لشادي قالي بلاش قهوة خليها عصير لمون احسن يهدي اعصابنا بعد اللي حصل ده . عملت لشادي العصير وقدمته له وقعدت وكنت ماسكة بوسي علي رجلي وخالتي بتبصلها نظرة توعد .والقطة كانت خايفة منها اوي . بعد شوية نزلت القطة من علي رجلي واتكلمت انا وشادي عليها مستغربين ازاي بتظهر فجأة وازاي بتختفي فجأة بدون تفسير والمفروض انها ماتت !!!!!!! شوية حسينا برائحة دخان بصينا حوالينا في كل مكان في المطبخ مفيش اي دخان لكن فجأة ظهر الدخان من اوضة بابا وخالتي . دخلنا الاوضة بسرعه شوفنا دولاب الهدوم مولع نار . حاولنا كلنا نطفي النار اكتر من عشر دقايق وكل ما نطفي النار من مكان تظهر في مكان تاني في الدولاب لحد ما انطفت النار خالص . بصينا لبعض كلنا مستغربين مش عارفين النار جت في الدولاب منين !!! خرجنا الهدوم من الدولاب لكن العجيب ان هدوم خالتي كلها اتحرقت لكن هدوم بابا اللي في نفس الدولاب مش لمستها النار خالص . خالتي قعدت تبكي علي هدومها اللي اتحرقت كلها . لكن انا وشادي واخواتي كنا مستغربين اللي حصل !!! ازاي الدولاب اتحرق ومنين جت فيه النار ؟ !!! وليه هدوم خالتي بس هي اللي اتحرقت ؟ !!!!!! شادي قال لخالتي خلي بالك بلاش تفكري تأذي القطة علشان ممكن تكون هي اللي بتعمل كده . خالتي قالتله ان اتجننت يا ابن اخويا ولا اي ؟ قطة اي اللي هتولع في الدولاب ؟ قالها اومال تفسري اللي حصل بأيه ؟ وليه هدومك انتي بالذات اللي اتحرقت ؟؟ انا سمعت كتير ان القطط بتكون مسكونة بارواح . بعدها بابا رجع البيت وحكينا له اللي حصل .بابا كان مش مصدق كل كلامنا وقالنا اكيد في سبب للنار دي وكان فاكر اننا بنكدب عليه . في الليلة دي بابا دخل الحمام بالليل وهو في الحمام النور انقطع .خرج من الحمام ودخل الاوضة ينام ولما نام علي السرير اتفاجئ ان خالتي مش موجودة جنبه !! نادي عليها كتير ومش ردت عليه . ولما النور رجع كان بيدور علي خالتي في الشقة كلها ولكنه مش شافها في اي مكان . بابا من ذهوله و خوفه صحانا كلنا من النوم . كلنا كنا مذهولين !! خالتي راحت فين ؟ باب الشقة مقفول بالمفتاح والشبابيك كلها مقفوله .غير اننا ساكنين في دور عالي صعب حد يدخل او يخرج من الشقة . اسماء اختي فضلت تبكي علي مامتها اللي اختفت فجأة بدون تفسير !!!!! قعدنا لحد الصبح في ذهول وحيرة من اختفاء خالتي العجيب .واسماء اختي بتبكي وبابا مش عارف يتصرف ازاي .اما قطتي بوسي كانت بتلعب وبتنط من مكان لمكان زي ما تكون فرحانه . طلع النهار واحنا قاعدين وبابا مش راح الشغل وبعدين اتصل بخالي ابو شادي وقاله علي اللي حصل وسأله يتصرف ازاي لانه حاسس ان تفكيره انشل من الموقف . خالي قاله انا جايلك حالا .وفعلا بعد وقت صغير خالي وشادي ومرات خالي كانوا عندنا ومش مصدقين اللي حصل .شادي الوحيد اللي كان هادي وقال يا جماعة تفسير كل اللي حصل بسبب القطة .هي اللي عملت كل ده .اكيد القطة دي فيها جن . بابا قال لخالي تعالي ننزل نعمل بلاغ في الشرطة باللي حصل .لكن خالي قاله لو روحت وقولتلهم كلامك ده هيقولوا عليك مجنون .الحل الوحيد دلوقتي اننا نجيب حد من اللي بيفهموا في الحاجات دي وهو هيدلنا نعمل اي . نزل بابا وخالي وراحوا لواحد بيفهم في المواضيع دي . رجعوا بعد ساعتين تقريبا ومعاهم راجل اسمه عم مصباح . لكن لما رجعوا كان في انتظارهم مفاجأة ؟؟؟؟؟؟ اثناء بابا وخالي كانوا في الشارع كنت قاعدة انا واخواتي ومرات خالي بنتكلم وبنحاول نلاقي تفسير للي بيحصل فجأة شفنا خالتي خارجة من باب الاوضة !!!!!!!!!! كلنا بصينا لها مستغربين .واسماء جريت عليها واترمت في حضنها . مرات خالي سألتها كنتي فين ؟ ردت عليها انها كانت نايمة . قولنلها نايمة ازاي دا احنا من قبل الفجر بندور عليكي في كل مكان وبابا كان بينادي عليكي وانتي كأنك مش موجودة خالص . قالتلنا انا معرفش حاجة من اللي بتقولو عليها دي لكن الغريبة اني صحيت من النوم لقيت نفسي كنت نايمة تحت السرير !!!!! طبعا لما رجع بابا وخالي ومعاهم عم مصباح اندهشوا لما شافوا خالتي موجودة وحكيت لهم علي اللي حصل . عم مصباح سألها من وقت ما نامت لحد ما صحيت حسيت بايه او حلمت بايه ؟ خالتي قالتله انها مش حسيت بحاجة خالص لكنها شافت احلام كتير اوي مش فاكرة منها حاجة دلوقتي . عم مصباح طلب يشوف الدولاب اللي انحرق .وفعلا دخل مع بابا وخالتي وشاف الدولاب . عم مصباح قالنا ان المكان ده في ارواح جاية بغرض الانتقام .اكيد حد من اهل البيت أذاهم في حاجة وجايين ينتقموا منه . بابا قاله طب والحل اي يا عم مصباح ؟ قاله انا هعمل جلسة النهاردة بعد العشا وفي نهايتها ان شاء الله كل حاجة هتبقي تمام . عم مصباح عمل الجلسه وكان بيبص في عنينا وهو بيقرأ كلام غريب . كان بيبص في عين كل واحد فينا نظرة غريبة اوي . وفي نهاية الجلسة قال ان المطلوب من اهل البيت هي الزوجة يقصد خالتي . خالتي اترعبت خصوصا لما قال انهم مش هيسيبوها في حالها الا لما ينتقموا منها اشد انتقام . خالتي بعد كلامه رعبها زاد وظهر عليها الخوف اوي لكن عم مصباح قالها متخافيش انا هبعدهم عنك نهائي قبل ما امشي من البيت ده دلوقتي . بابا قاله اه في عرضك خلصنا من الموضوع ده وانا هديلك الفلوس اللي تطلبها بس نرتاح من الهم ده . عم مصباح قال لبابا انا عاوز المدام خمس دقايق علي انفراد . بابا استغرب اوي وقاله وليه علي انفراد ؟ مينفعش نكون كلنا موجودين او واحد علي الاقل معاها ؟ عم مصباح قاله لاء مينفعش .وبعدين مادام مش مأمني مدخلني بيتك ليه ؟ وقام اخد حاجاته وكان عاوز يمشي .لكن بابا قاله مش قصدي حاجة انا كنت بسال بس .اتفضل استريح واحنا كلنا هنسيبكم هنا لوحدكم . قاله لاء هنا مش هينفع .لازم مكان مقفول . دخل عم مصباح اوضة نوم بابا ومعاه خالتي وقفل الباب .......... يتبع الفصل الخامس من هنا |
بدل ماتدور وتبحث علي الروايات خليها علي تليفونك وحمل تطبيقنا
