رواية كتاب الشيطان الفصل الثالث بقلم اخصائى رعب
ببص لقيت زهرة هي اللي واقفة عند الباب ، واقفة ساكتة وبصالي !!!
قلتلها زهرة انتى ايه اللي مصحيكى؟؟!!
قفلت الباب ومشيت بإتجاهى وهي ساكتة بس كانت بتزوم ومع كل خطوة بتمشيها ناحيتي كان صوتها عمال يزيد "ممممممم مممممم""
نورت النور وقمت وقفت وقلتلها انتى ما بترديش عليا ليه؟؟؟
وايه الاصوات اللي بتعمليها دي؟؟
تجاهلت كلامي ليها وكأنها مش سامعاني وسابتني ودخلت على مي بنتنا.......
قعدت جنبها وفضلت باصلها وبتمشي إيديها على شعرها ولسه عمالة تعمل الصوت الغريب ده !!!
أنا كنت خايف على البنت ، خصوصا ان زهرة باين عليها انها مش طبيعية
فضلت ساكت ومراقب الموقف لحد ما لقيت زهرة بتشيل البنت وطالعة برا الاوضة.....
طلعت أجري عليها وقفت أدامها وقلتلها واخذة البنت ورايحة فين؟؟؟
فضلت بصالى وصوتها عمال يزيد، زعقتلها بصوت عالى وقلتلها سيبي البنت وردي عليا
لقيتها سابت البنت من إيديها ولولا إني لحقتها في أخر لحظة كان زمانها اتهبدت على الارض.....
بس اللي وقعت على الارض هي زهرة وبدأ جسمها يتخشب
وصوابعها عملت شكل غريب !
ورقبتها اتعوجت !
وجسمها كله بدأ يتهز في الارض !
انا حسيتها بتموت ، طلعت اجري عليها ومى بنتى كانت قامت من الأرض وطلعت تجري على أمها
بس زهرة كانت متخشبة بصورة غريبة، ماكنتش قادرة تحرك دراعها حتى....
فضلت على الحالة دي وانا مش عارف أعمل ايه؟!!!!
لحد ما لقيت رقبتها لفت مرة واحدة وبقت باصة لمى بنتي.....
وبدون اي مقدمات زقت مي بدراعها بكل قوة.....
مى اتنطرت من مكانها وخبطت في السرير،
طلعت أجري عليها ، انا افتكرتها ماتت - مي كانت ٤ سنين يعني متستحملش ضربة زي دي - بس الحمد لله لقيتها سليمة محصلهاش حاجة، كانت بتعيط بس......
حضنتها وطلعتها برا الاوضة بسرعة وقفلت الباب ، فضلت مي تعيط وتنادي على أمها ، رغم ان أمها هي اللي ضربتها.....
فضلت أطبطب عليها وقلتلها معلش ماما تعبانة شوية وانا لازم أدخل وأشوفها ، خليكى انتى هنا ما تتحركش من مكانك ، فضلت مى تعيط وماسكة في إيدي ، انا مش عارف ليه خفت أسيبها لوحدها رغم انى عارف انها مش هيجرلها حاجة......
صوت زهرة بدأ يزيد وانا مش عارف ايه اللي بيحصلها جوا!!!
انا ماينفعش أسيبها كده ، انا لازم أدخل أشوفها .......
سبت مى ورحت فتحت الاوضة ودخلت وقفت جنب الباب ، لقيت زهرة لسه على الارض ولسه جسمها متخشب وصوابعها ورقبتها لسه متخشبة.....
كانت بتقول كلام بصوت مكتوم مش فاهم منه حاجة بس طريقة كلامها وجسمها اللي بيتهز كنت حاسسها بتتخانق مع حد.......
أنا كنت قلقان من شكلها بس كان لازم أروح أشوفها ، وقبل ما اتحرك لقيت جسمها ساب وفك والرعشة اللي كانت بتهز جسمها اختفت والصوت كمان اختفى،
حسيتها رجعت طبيعية.......
فضلت عنيها تتحرك في الاوضة وكأنها باصة على حاجة عمالة تلف حوالينا ، وثبتت علي نقطة معينة في السقف وفضلت مركزة فيها......
ببص على السقف عشان اشوفها مركزة في ايه ملقيتش حاجة ولقيت باب الاوضة اللي انا واقف جنبه اتقفل مرة واحدة معرفش مين اللي قفله؟!!!
مستحيل تكون مى لان الباب اتقفل بقوة، لفيت بإتجاه الباب عشان افتحه واشوف مين اللي قفله كده ، بس للاسف الباب ماكنش بيفتح ، فضلت أتعافى على الأوكرة أكتر وبحاول معاها بكل قوة، بس الباب زي ما يكون مقفول بالمفتاح و سامع صوت مي بتعيط برا ندهت عليها وقلتلها مي انتى كويسة ماكنتش بترد عليا وكانت بتعيط بس.....
زهرة بدأت تتشنج تاني وصرخت صرخة قوية بصوت عالي......
طلعت أجري عليها ومسكها من دراعها وفضلت اسالها مالك يا زهرة؟؟
فيكى ايه؟؟؟
لحد ما جسمها ساب خالص وفقدت الوعى تماما ، احساس غريب وانا ماسك جسمها اللي عامل زي الحديد وبيلين بالتدريج عشان يرجع لطبيعته تاني، كأن كان في حد جواها وطلع منها !!!!!
شلتها من على الارض نيمتها على السرير ومكنتش سامع اي صوت حواليا غير صوت بنتى بتعيط و بتخبط على الباب....
جريت على الباب عشان افتحلها والغريب ان الباب اتفتح عادى من أول مرة....
حضنتها وقلتلها ما تخافيش ماما خلاص خفت بس نايمة شوية عشان ترتاح ، رحت لزهرة عشان اتأكد انها بتتنفس وان نبضها شغال وانها فاقدة الوعي او نايمة....
في كل الاحوال مكنتش عايز أصحيها او بصراحة اكتر انا كنت خايف أصحيها وما صدقت انها نامت، اخذت مى وطلعنا برا الاوضة، لقيت حد بيخبط على الباب.....
رحت فتحت لقيت مدام سعاد جارتنا بتقولي خير يا أستاذ يوسف انا سمعت حد بيصرخ؟!
مكنتش عارف أرد اقولها ايه ، فكرت بسرعة وقلتلها دي زهرة شافت كابوس ، انتى عارفه من يوم ما حسام مات وهي أحلامها كوابيس...
قالتلى طب ينفع أدخل اطمن عليها؟
قلتلها معلش هي نامت دلوقتى ، بكرا الصبح عدي عليها ان شاء الله
قالتلي ماشي ومشيت....
جبت كرسي حطيته أدام باب الاوضة اللي فيها زهرة وسبته مفتوح ، أخذت مي في حضنى وقعدت على الكرسي وعيني على زهرة عشان لو حصلت اي حاجة أسيب مي على الكرسي و أدخل الاوضة وأقفل الباب بسرعة.......
فضلت مراقبها ، بس كانت في نوم عميق حتى مى بنتى نامت وهى فى حضنى......
الجو بقى طبيعي تماما وبدأت أعصابي تهدأ ، وسألت نفسي هو ايه اللي بيحصل؟؟؟
أول مرة زهرة صوتها اتغير قلت أكيد تهيؤات
الكبريت اللي اتطفى والولاعة اللي ماكنتش بتولع قلت اكيد بسبب الهواء
طب باب الاوضة اللي اتقفل لوحده بسبب الهواء برضو؟؟؟!!!
والحاجات الغريبة اللي بتعملها زهرة كل ده تهيؤات؟!!!
مكنتش عايز أشرب سجاير عشان البنت اللي نايمة على كتفى بس مكنتش قادر ، ولعت سيجارة و حاولت أرد بالعقل على الأسئلة اللي بتدور في دماغي....
اكيد انا اللي قفلت الباب من غير ما أحس لان كان جسمي سخن ساعتها بسبب الجري والحركة
وأكيد اللي عملته زهرة له علاقة بمرض نفسي ، انا كنت سامع ان نوبات الصرع بيحصل فيها كده....
المشكلة ان كل الاحتمالات اللي انا حاطتها ومصدقها هي احتمالات ضعيفة والاحتمال الأقوى اللي انا مش عايز أصدقه او افكر فيه حتى هو ان كل اللي بيحصل ده له علاقة بالكتاب اللي انا شايله في الدرج .......
بس حتى لو الكتاب هو السبب فأنا كده كده هخلص منه بكرا....
تعبت من كتر التفكير ونمت على الكرسي ، صحيت على إيد بتخبط على كتفي ،
بفتح عيني لقيت زهرة واقفه جنبى!!!!
قمت وقفت بسرعة وكلبشت في البنت اكتر وفضلت باصصلها...
سألتني بصوت طبيعي جدا انت ايه اللي نايمك انت ومي على الكرسي؟؟!
وايه اللي جابني هنا في أوضتها؟؟
هو ايه اللي حصل؟؟؟
قلتلها يعني انت مش فاكرة حاجة؟
قالتلي حاجة زي ايه؟
أنا أخر حاجة فاكرها لما سبتنى وخرجت وانا حاولت انام بس انا كنت في اوضتي مش هنا!!!!
سبتها ورحت نيمت البنت على السرير ورجعت لزهرة وهي واقفة بصالي بإستغراب والفضول هيقتلها وعايزة تعرف في ايه؟؟!
قربت من زهرة وقولتلها انتى تعبانة ولازم بكرا نروح للدكتور
قالتلي تعبانة عندي ايه؟
وايه اللي حصل يا يوسف؟
فضلت ساكت وهي عينيها بدأت تدمع وسألتنى تاني
"يوسف انا تعبانة عندي ايه؟"
حضنتها وقلتلها مفيش حاجة انتى أعصابك تعبانة شوية من ساعة موت حسام الله يرحمه، والدكتور هيكتبلك على شوية مهدئات عشان ترتاحي
زهرة كانت خايفة وبتعيط ورغم انى مكنتش طايقها بسبب اللي هي عملته، بس كانت صعبانة عليا اخذتها ودخلنا ننام مع مي
بقيت نايم في النص وحاضن مي عشان خايف عليها من زهرة
أنا ماكنش جايلي نوم وفضلت صاحي على عكس زهرة اللى نامت على طول وكأنها تعبانة او مجهدة ومحتاجة تنام ......
عدي اليوم الغريب ده على خير ، دخلت استحميت عشان أفوق لانى مطبق من امبارح....
وانا داخل الحمام شفت جركن اللبن وكنت عايز أفضيه في الحوض بس استحرمت، وقلت انا هأخذه وانا نازل وأديه للبواب....
خلصت الدش بسرعه لأني كنت خايف اسيب مى مع زهرة وأول ما طلعت لقيت زهرة أدامي وبتقولي انا ضربت مي ازاى؟!!!
انا سألتها دلوقتى وهي قالتلى انى ضربتها امبارح ، انا عملت ايه يا يوسف؟؟؟
قلتلها انتى إمبارح اتشنجتى وزقتيها وانتى مش في وعيك، وبعدين أغمي عليكى
دمعت زهرة وقالتلي انا مش فاكرة أي حاجة
قلتلها ما أنا عارف يا زهرة وإحنا النهاردة هنروح للدكتور عشان كده، ماتقلقيش كل حاجة ليها حل....
قربت زهرة مني وسألتنى بصوت واطي
"انت ناوي تحرق الكتاب؟"
قلتلها آه يا زهرة هحرقه
قالتلى طب انا خايفة وهفضل عايشة طول عمري خايفة لو حرقته، هاتوا أديه لحنان أختي أو انت سيبه مع أى حد او سيبه في أي حته وأمشى بس ما تحرقهوش يا يوسف ...
الحقيقة مش زهرة بس اللي كانت خايفة من حرق الكتاب ، انا كمان كانت جوايا رهبة بعد اللي حصل امبارح وقلتلها ماشي يا زهرة هحاول اتصرف فيه بأي طريقة غير الحرق.....
ابتسمت زهرة وحسيت ان الروح ردت فيها وقالتلي شكرا يا يوسف انا كده هبقى مطمنة....
قلتلهت أدخلى خذي دش عشان ننزل ونروح للدكتور
قالتلي ماشي وسابتنى و قبل ما تدخل الحمام ، لفت وقالتلي طب انت شايل الكتاب فين؟؟
وحسيت بلمعة بسيطة في عنيها
قلتلها شايله في الدرج
قالتلي ماشي ودخلت الحمام وقفلت...
أنا الشك بدأ يتملكنى وحسيت ان ممكن تكون زهرة أخذت الكتاب امبارح قبل ما تصحيني....
رحت جرى على الدرج وفتحته بس لقيت الكتب زي ما هي ومرضيتش أخذ الكتاب أرميه دلوقتى عشان مش عايز زهرة تشوفه تاني ،
قفلت الدرج ورحت لبست هدومي واستنتها لحد ما خرجت ولبست هدومها وأخذت مى ودتها عند سعاد جارتنا ونزلنا انا وزهرة وروحنا على مستشفى دكتور أسامة ، فضلنا قاعدين شوية برا وبعدها دخلنا....
سألها الدكتور بتشتكى من ايه ؟؟
رديت انا عليه وقلتله هي امبارح اتشنجت وجسمها اتخشب وكانت مركزها عينيها على حاجة.....
الدكتور قالي دي أعراض مرض الصرع انقباض في العضلات بشكل مفاجئ وممكن يتسبب في سقوط الشخص وبتحصل رعشة وتشنجات من دقيقة لدقيقتين، وممكن تصرخ في بداية النوبة
قلتله ايوا فعلا هي صرخت وبعدها جسمها اتشنج وأغمى عليها......
بص الدكتور لزهرة وقالها لما فقتى كنتى حاسه بإرهاق وصداع ؟
قالتله ايوا أنا كنت مصدعة جدا...
الدكتور قالي دى حالة صرع واضحة، هي المدام اتعرضت لحادث أو بتعانى من مرض معين؟؟
قلتله لأ معندهاش حاجة، بس ابننا مات من سنة والموضوع ده مأثر فيها جامد .....
رد الدكتور أسباب الصرع ممكن تكون ورم في الدماغ او سكتة دماغية او صدمة قوية، عموما متقلقش يا أستاذ يوسف ، اتفضل انت برا وسبنى أتكلم مع مدام زهرة شوية
قلتله ماشي وطلعت قعدت برا، وكنت فرحان جدا....
المفروض أي حد مكاني يعرف ان مراته تعبانة هيزعل ، بس انا كنت فرحان لان احتمال المرض أهون بكتير من الهواجس اللي كانت في دماغي .....
فضلت قاعد برا حوالي نصف ساعة وفجأه سمعت الدكتور بيصرخ!!!!!
طلعت أجري أنا والممرضة وفتحت الباب لقيت......
يتبع......
بدل ماتدور وتبحث علي الروايات خليها علي تليفونك وحمل تطبيقنا
