رواية قربان الجن الفصل التاسع بقلم محمود حمدى
فاتت الرسالة بتاعت جمالات وثريا على نغم وكأنها مكافأة لها عن الرسالتين اللى راح ضحيتهم سليمان و رنا
صحيت من نومها وهى بمزاج احسن شوية
اكيد منسيتش رنا ولا نسيت سليمان بس كطفلة فرحت اكتر ب اخر حاجة شافتها قدامها
لكن فتحت نغم عنيها على جدتها قاعدة على كرسى جنب سرير نغم وبصالها وكأنها كانت مستنياها تصحى
وفى نفس الوقت كان الجن المرافق ل نغم موجودين فى الاوضة
جن من اللى واقفين قرر يكلم نغم ..شكلك النهاردة يانغم احسن من الايام اللى فاتت
نغم ساكتة وقلقانة تتكلم وده علشان جدتها قاعدة ومينفعش تعرف او تاخد بالها ان في حاجة غريبة بتحصل مع نغم
الجن ..مش هتسمعنا ولا هتسمعك ردى على كلامى اللى بقوله
نغم..اه انا كويسة اوى النهاردة ومبسوطة انى عملت حاجة تفرح حد تانى
شكرا اوى ليكم
الجن ..مش هتجيلك رسايل تانية يانغم بس ده مش علطول ده لوقت معين تقدرى فيه تستوعبى اللى بتشوفيه وتقدرى تستحمليه
هنكون معاكى وحواليكي
ممكن فى حلمك تشوفى مكان حاجة بتدورى عليها او حد تعرفيه بيدور عليها
هتصحى تلاقى الحاجة دى موجودة فى المكان اللى حلمتى بيه
ولو مش حاجتك هتعرفى مكان اللى بيدور على الحاجة اللى ضاعت منه وهتبلغيه
متخافيش مش هتشوفى حاجة تخوفك ولا متقدريش تتحمليها لكن انتى هتكونى لسه على نفس العهد ب انك متحكيش لحد اى كلمة عننا
هتشوفى حد مات بيكلمك او يحكيلك سر من اسراره يمكن يكون عايزك توصلى السر ده لحد معين
واحنا مهمتنا اننا هنعرفك مكان الشخص ده فين
هتعرفي تفسري احلام
هتلاقينا بنساعدك فى كل حاجة انتى محتاجاها
وهنفضل ملازمينك العمر كله
لكن المطلوب منك من دلوقتى انك هتعيشي لينا احنا بس فى خدمتنا وبس
مش من حقك تدخلى حد حياتك
مفيش اصحاب
متحكيش ل اى حد اى حاجة تخص حياتك لأننا احنا هنكون حياتك
وفى مرحلة من المراحل ويمكن مش هتكون بعيدة
هتلاقى الجواز بيخبط على بابك
واللى مطلوب منك انك ترفضى وتقفلي الباب ده نهائي
لأننا مش هنسيبك تعيشي فى حياة حد غيرنا
انتى ملكنا احنا واحنا بس اللى هنقرر ايه اللى تعمليه وايه اللى مش هتعمليه
وده يا نغم علشان انتى لسه مش قادرة تتحملى رسايلنا ولا اللى بتشوفيه
والكلام اللى سمعتيه امر واجب التنفيذ
وقبل ما ترد نغم بموافقة او رفض
كانوا اختفوا من قدامها ..طيب ايه ده مش يستنوا ارد عليهم
طيب افهم الحاجات اللى مفهمتهاش من كلامهم
بس مش مهم انا موافقة على اللى اتقال اكيد احسن بكتير من اللى بشوفه وكويس اوى ان اخر رسالة شوفتها كانت حلوة وقدرت فيها اساعد حد
الجدة ...كل ده يانغم قاعدة ومسلمتيش عليا اد كده تيتة مش وحشاكى
نغم افتكرت انها شافت جدتها من بدرى ومكلمتهاش ولا سلمت عليها
نغم..تيتة ياحبيبتى انا اسفة كنت لسه بفوق من النوم
وحشتينى اوى ياتيتة بقالك كتير مش بتيجى ليه
الجدة ..جدتك كبرت بقى يا قطة ومبقيتش بقدر على مشواركم انتم اللى بكرة تيجوا بقى تعيشوا معاية
نغم..طيب يا تيتة ما تيجى انتى عيشي معانا احسن نامى معاية هنا انا اوضتى كبيرة
بصي سريرى كبير ازاى هنام انا وانتى جنب بعض
ولو هتضايقي خلاص اخلى بابا يجيبلى سرير تانى زى بتاع اخواتى وانام انا عليه وانتى نامى فى سريرى
ولو عايزة تنامى انتى على السرير الجديد ماشى انا موافقة بس خليكي قاعدة معاية
الجدة..انتى ياقطة كلامك جميل زيك وشك الحلو ده
بس مينفعش اسيب بيتى
انا كمان سريرى جميل لما تيجى عندى هنيمك جنبى عليه
نغم..خلاص خدينى معاكى وانتى مروحة هقعد معاكي واونسك واعملك كل حاجة عايزاها
الجدة ..وهتسيبي القطة اللى انا جيباها معاية ليكي
نغم..قطة ..بجد .. ياحبيبتى يا تيتة انتى احلى تيتة فى الدنيا
الجدة طلعت القطة من صندوق خشب صغير
كانت قطة سيامى شكلها جميل
نغم... ايه الجمال ده كله ..القطة دى حلوة اوى يا تيتة وجميلة
الجدة ..اه يانغم شوفتيها حلوة ازاى
عايزاكى تخلى بالك منها وتحافظى عليها علشان انا جيبهالك مخصوص من بيتها اللى عاشت فيه طول عمرها ومخرجتش منه ابدا غير ليكي هنا
نغم..يا حرام يا تيتة يعنى هى معندهاش بيت ولا عندها ماما وبابا
الجدة ..لا يا حبيبتى معندهاش ..انتى بقى هتخلى بالك منها ومتخليش حد فى اخواتك يضربها ولا يزعلها دى غلبانة خالص
بس خلى بالك يا نغم بلاش تشم ريحة ابوكى
وهنا دخلت الام فسكتت الجدة وحاولت تخبى القطة جنبها
الام..ايه يا نغم
عاملة ايه دلوقتى ؟
نغم ..انا كويسة اوى يا ماما ..خلاص مش هشوف كوابيس تانى
متخافيش عليا
وبكرة هروح مدرستى
وبلاش تزعلي مني ومن الكلام اللى قولته انا دلوقتى لما اطلع هصالح بابا كمان
الام..انتى بنتنا الجميلة يانغم احنا منقدرش نزعل منك بس مينفعش تتكلمى مع بابا وماما بالطريقة دى
نغم ..انا اسفة معلش انا بس كنت خايفة علشان كده قولت كلام مينفعش اقوله وحضنت نغم امها وقالتلها انا اسفة
الام..كويس ياحبيبتى انك بقيتى احسن يلا قومى بقى من السرير كفاية كسل كده وتعالى اقعدى معانا شوية
نغم..حاضر هغير بيجامتى واطلع اصالح بابا
خرجت الام
نغم..ايه يا تيته انتى لسه زعلانة من ماما
الجدة ..دى حاجات كبار يا نغم عيب تتكلمى فيها
نغم..انا هصالحكم يا تيتة على بعض
الجدة .. متبقيش تقوليلها انى انا اللى جيبتلك القطة علشان متضايقش وتمشيها
نغم..طيب اقولها جت منين القطة دى يا تيتة
الجدة..قوليلها لقتيها دخلت من شباك اوضتك
نغم..حاضر يا تيتة
الجدة ..عارفة يا نغم القطة دى كان عندها عيلة كبيرة اوى ساكنة فى بيت عمك
كانوا فيه غيرها هي 12 قطة عيلتها الكبيرة اللى عمرهم ما خرجوا من البيت ده
لكن ابوكى بقى طمع علشان كانت سلالتهم غالية اوى وحاول كتير انه يبيعهم لكن مكانش بيعرف يطلعهم من البيت بتاع عمك
وكان علطول يتخانق مع عمك علشان يخليه ياخدهم ويبيعهم لكن عمك كان مش بيوافق ويقوله لاء حرام مينفعش اسيبك تعمل كده هو ده مكانهم ومش هخليهم يمشوا منه
وكانت امك بتحاول كتير تقنع مرات عمك انها تهرب القطط وعمك مش موجود لكن مرات عمك كانت مش بتوافق ابدا
لحد ما فى يوم اتخانق عمك خناقة كبيرة اوى مع ابوكى وصلت انهم يمسكوا فى بعض وكان عمك طيب مش بيحب المشاكل
لكن ابوكى كان متغاظ منه اوى انه واقف بينه وبين الفلوس اللى هيكسبها لو باع القطط دى وكان بيضرب عمك كأنه عدوه مش اخوه كان ميعرفش انى نايمة جوة فى اوضة عمك علشان مراته كانت عند اهلها
وقبل م اخرج من الاوضة سمعت صوت هبدة على الارض
حسيت فيها ان قلبى هو اللى اتهبد
ولما خرجت من الاوضة كان عمك مرمى على الارض سايح فى دمه يا نغم وابوكى كان خرج جرى من البيت
بقى ويلي ابنى اللى سايح فى دمه و ويلي ابنى اللى هيتحبس لو اتعرف ان هو الىل عمل كده بقيت اكتم لعمك الدم ومش راضي يقف وهو فى دنيا تانية مش بينطق بقيت احاول افوقه واقوم امسح البيت علشان ميبقاش في اى حاجة تقول ان ابوكى كان عند عمك
حتى جسم عمك بقيت عمالة امسح فيه واخلى بصمات ايدي على كل جسمه وهدومه واول ما لقيت عمك بيحرك دماغه بقيت اصرخ على الناس ينجدونى
الناس اتلمت على صوتى وجروا بعمك على المستشفى والخبر لما وصل ل ابوكى جالنا يجرى على المستشفى ولا كأنه عامل عملة مكانش عارف انى عارفة ان هوا اللى ورا المصيبة اللى احنا فيها دى
الجيران واقفين معانا وابوكى وامك واقفين هيتجنوا مش عارفة كانوا بيتمنوا ان عمك يموت ولا كانوا خايفين عليه ولا كانوا خايفين انه يعترف على اخوه
لحد ما طلعلنا الحكيم وقالنا ان عمك الخبطة عملتله نزيف على المخ وفى غيبوبة
سيبنا عمك فى المستشفى فى الانعاش بين ايدين ربنا
وابوكى وامك حسوا الوقت ده ان عمك خلاص مات ومصيبته هتموت معاه وتدفن
روحنا كلنا وكان مينفعش اسيب مرات عمك تبات فى البيت لوحدها ماهى جاتلنا على المستشفى اول ما عرفت الخبر من الجيران
ابوكى اليوم ده قالنا ما تيجوا انتم تباتوا معانا فى البيت والصبح نطلع كلنا على المستشفى لكن عنيا مكانتش مطاوعانى ابص ناحيته حتى مش مصدقة انا ازاى مخلفة بنى ادم بالغل والحقد ده ازاى هان عليه اخوه للدرجة دى
يمكن هو مكانش قاصد يعمل فيه كده وكان ميعرفش ان الغل اللى جواه ممكن يوصله انه يقتل اخوه اليوم ده بالذات مكنتش عارفة افسر اى تصرف لأبوكى وامك التفسير المظبوط وفى نفس الوقت هو ابنى برضه اللى هخاف هو كمان يروح مني حتى لو عامل مصيبة
مرات عمك قالت لاء مش هينفع ابات برة بيتى وانا على اد م كان نفسي امسك فى رقبة ابوكى اطلع روحه فى ايدي لكن كان لازم مبينش لمرات عمك حاجة رديت وانا باصة بعيد عنه انى مش هينفع اسيبها تبات لوحدها
ورجعت البيت مع مرات عمك
واللى دخلنا ولقيناه اكدلى ان ابوكى كان للاسف متعمد يعمل اللى عمله ده فى اخوه اللى هو عمك
دخلنا لقينا القطط مش موجودة
عرفت ساعتها ان الموضوع كان مترتبله وابوكى وامك كانو عاملين حسابهم على كل اللى هيحصل ان البيت يبقى فاضى لما يتعرف ان عمك اتقتل ولا دمه سايح وكله ينشغل فيه يكون هو مرتب حاله على انه يسرق القطط دى بس عارفة يانغم لحد قبل م اموت بيوم واحد بس مكنتش اعرف مين اللى دخل بيت عمك سرق القطط لما كنا فى المستشفى .
#حكايات_نونا
يتبع
قربان الجن
#حكايات_نونا
الجزء العاشر
سمعت نغم جدتها فى كل الكلام اللى قالته وكانت مركزة فى كل حرف وعايزة توصل لحد نهاية اللى حصل لعمها
لكن اتصدمت لما ركزت فى كلمة جدتها
قبل م اموت بيوم واحد
فاقت نغم وكأنها كانت نايمة مغنطيسيا او كانت فى دنيا تانية هى ازاى مركزتش فى ان جدتها متوفية من زمان هى ازاى كانت مهتمة اوى بالكلام وبتسمعها با استمتاع وهى اصلا عارفة ان جدتها مش عايشة
كانت لسة الجدة قاعدة بنفس الثبات اللى ظهرت بيه من اول الموقف
نغم ب توتر..قبل ما تموتى..تيته انتى ميتة ..هو ازاى انتى قاعدة معاية كده وبنتكلم سوا وانتى ميتة من زمان
الجدة..علشان انتى يا نغم الوحيدة اللى اتكتبلك تعرفى الحقايق واتكتبلك توصلى الرسايل اللى انا واللى زيي ماتوا و رسايلهم ماتت معاهم
وب الاخص الرسايل اللى فيها حقوق ناس تايهة
نغم..هو انتى تيته بجد ولا انتى عفريت من العفاريت اللى بشوفها
الجدة ..لا انا جدتك يا نغم اعتبرى نفسك بتحلمى او ان اللى هقولهولك ده كان وصيتى ليكى قبل م اموت
كأن اللى بقولهولك كنت بعتاهولك فى جواب
عايزاكى تسمعى باقى كلامى
وقبل ما تخلص الجدة دخلت تانى ام نغم
يا نغم انتى كل ده مطلعتيش ليه يلا يا امى
بابا واخواتك قاعدين مستنينك تاكلى معانا وبعدين مش قولتى هصالح بابا
يلا علشان هو زعلان من اسلوبك اللى اتكلمتى بيه
نغم..انا طالعه معاكى اهو يا ماما
الام..مش قولتى هتغيري هدومك ..مغيرتيش ليه ؟ اومال قاعدة كل ده بتعملى ايه ؟
نغم ..ولا حاجة يا ماما انا بس كنت كسلانة اقوم من السرير
يلا بينا نطلع برة
طلعوا قعدوا سوا وكانت نغم دماغها فى اللى شافته وفى كلام جدتها وايه اللى كانت هتقوله وملحقتش
الام..نغم..يا نغم ..فى ايه مالك سرحانة فى ايه
نغم..معلش انا اسفة بس شكلى كده لسه عايزة انام
صح يابابا معلش انا اسفة لو اتكلمت بطريقة مش كويسة
انا بس الكوابيس اللى بشوفها كانت مخوفانى اوى ومعرفتش اعبر عن خوفى غير ب الطريقة الغلط دى
انا اسفة ممكن ماتزعلوش مني
الاب..احنا مبنزعلش منكم يا نغم
لكن الصح انى اقولك ايه اللى ممكن نقبله وايه اللى مرفوض تحت اى ظرف
مامتك وباباكى واخواتك لهم احترامهم وحتى لو زعلانين من بعض اه احنا اللى هنستحمل بعض مش حد غريب لكن ب الادب مينفعش صوتك يعلى او انك تتعصبي علينا الطريقة دى غلط وعيب مينفعش تطلع من بنت جميلة زيك
انا عايزك زى م انتى جميلة شكلا تبقى كمان اخلاقك جميلة ومؤدبة
انا مش هقبل ابدا حد يقولى بنوتك اسلوبها مش كويس ولا مش مؤدبة ولا بتتكلم مع الناس من غير ماتحترمهم
كانت نغم بتسمع كلام باباها ومش مستوعبة ان ده هو هو الشخص اللى كانت جدتها بتحكى عنه اللى ضرب اخوه وخلاه يدخل المستشفى علشان بس عايز ياخد حاجات من عنده عايز يبيعها برغم انه مالهوش حق اصلا انه ياخدها
لكن كانت خايفة نغم انها تناقشه او تسأله
الاب..فهمتي كلامى يا حبيبتى عرفتى بقى ايه اللى ينفع وايه اللى مينفعش
نغم ب هدوء.. اه يا بابا عرفت انا اسفة لو كنت غلطت وعد مني مش هكرر الغلطة دى تانى بس لو سمحتم مش عايزة حد منكم يكون زعلان مني
الام..لا يا حبيبتى واجبنا اننا نستقبل غلطك ونصلحه ليكى ماهو انتى مش هتعرفى الصح كله غير لما احيانا تقعى فى الغلط
نغم..شكرا يا ماما شكرا انكم قبلتو اسفى
الاب..طيب ايه مش حاسة انك محتاجة تروحى للدكتور ؟
نغم..لا يا بابا انا بقيت كويسة ولو اتكررت اى حاجة هبلغكم وانا هطلب اروح للدكتور
الاب..خلاص يا حبيبتى ربنا يطمنا عليكى انتى واخواتك ويبعد عنكم الشر
اكلوا كلهم مع بعض وقعدوا شوية يتكلمو ويسمعوا حكايات من باباهم شوية عن الشغل والاصحاب والجيران
ومن مامتهم شوية عن يومها بتقضيه ازاى من وقت ما بتصحى لحد ما بتنام ووقت نومهم ووقت وجودهم فى المدرسة
خلصت الحكاوى وكل واحد منهم دخل اوضته للنوم بقى
دخلت نغم اوضتها لقيت جدتها قاعدة على نفس الكرسى بنفس الثبات ونفس الوضع
نغم متفاجئتش...ايه يا تيتة روحتى فين ؟؟
الجدة ..سيبتك علشان تخرجى تقعدى مع ماما وبابا واخواتك
نغم..طيب هما ناموا خلاص عايزة اسمع باقى الحكاية يا تيتة
الجدة ..مش هتخافى يعنى ؟؟
نغم..لاء مش هخاف..انا عايزة اعرف هو عمى بابا اللى موته ولا ايه اللى حصل
الجدة ..شوفي يانغم يا بنتى انا هحكيلك كل الحكاية ومنها هتعرفي اذا كان ابوكى هو اللى موت عمك ولا لاء بس اللى عايزة اقولهولك ان عمك مات
وهو ميعرفش ان فيه حد دخل بيته فى غيابه وسرقه.. مات وهو كان بيحاول يحافظ على حق محدش غيره كان له فيه ..مات من غير ما يحكى لحد اى حاجة حصلت معاه.
عمك قعد فى المستشفى 3 شهور فى دنيا تانية غير دنيتنا كان فى غيبوبة
نروح نزوره ونشوفه لكن ولا بيفتح عنيه ولا بيتكلم وكأنه ميت كلنا كنا فاكرين انه كده خلاص هو مات بس المستشفى حطاه على اجهزة علشان بس تاخد مننا فلوس وخلاص
3 شهور كنا كل يوم اروحله انا ومرات عمك وابوكى وامك ونرجع واحنا عارفين ان مفيش جديد
لحد فى يوم مرات عمك قالتلى ان امها تعبانه وهتروح تطمن عليها بعد ما نرجع من زيارة عمك
واحنا مروحين قولت لابوكى روح وصل مراتك وتعالالى بيت اخوك علشان انا عيزاك شواية
امك قالتله خلاص روح انت مع خالتى وانا هرجع على البيت
قولتلها لا خليه بس يوصلك وانا هرجع البيت اغير هدومى واصلى يكون وصلك وييجى
وافق ابوكى وفعلا مرات عمك راحت لأمها وابوكى راح وصل امك ورجعلى
ابوكى دخل وقاللى خير يا امى عايزانى فى ايه ؟
محتاجة فلوس؟
مرات اخويا محتاجة حاجة ؟
رديت عليه قولتله اه اكيد مرات اخوك محتاجة حاجة ..محتاجة جوزها يرجع بيته تانى ..يرجع لابنه ولمراته اللى مالهمش غيره
ابوكى رد عليا قاللى ..يارب ياامى ربنا يرجعه بالسلامة لبيته ول ابنه ولينا احنا كمان
رديت قولتله انت ليك عين ..ايه يابنى البجاحة اللى انت فيها دى وازاى قلبك جامد اوى كده علشان تقدر تمثل عليا انك مالكش يد فى اللى حصل لاخوك
اتصدم ابوكى من كلامى وكأنى كشفت الغطا من على جسمه او روحه ب الاصح
رد قاللى هو ايه يا امى اللى بتقوليه ده ازاى يعنى هيكون ليا يد فى اذى اخويا هو انا وهو لينا من بعد ربنا وانتى غير بعض
يا امى ده اخويا وصاحبى وابنى الكبير مش بس اخويا
انتى ازاى تقولى عني حاجة زى دى
بتكلم الجدة ..رديت عليه وانا قلبى واجعنى
انت هتفضل تكدب لحد امتى ؟
انت متعرفش انى متأكده ان انت اللى عملت فى اخوك كده
انا سمعتك..عارف يعنى ايه سمعتك
سمعتك وانت بتخانق اخوك علشان عايز تاخد حاجته تبيعها وهو كان رافض
سمعتك لما ضربته وقبل م اطلع من الاوضة كنت جريت سيبت اخوك وجريت مش عارفة ازاى جالك قلب تسيبه مرمي وسايح فى دمه كده وتهرب
ايه مفتكرتش ان ده اخوك نفسك دمك ولحمك نفس العصب
ازاى هان عليك ده انت عيشت معاه عمرك اللى فات كله عمره ما زعلك ولا ظلمك ولا اذاك
انا سمعتك لكن قلبى وجعنى لما فكرت انطق اسمك واقول انك انت اللى عملت فيه كده
قلبى مطاوعنيش يبقى واحد مرمى فى المستشفى بين الموت والحيا والتانى يترمي فى الحبس وابقى انا اللى رميته ب ايدى
ظالمه انا ..انا عارفة انى ظالمة
ظلمت اخوك لما ابقى عارفة مين سبب رميته اللى هو فيها دى وساكتة وكاتمة جواية ومقدرتش اخدله حقه منك
علشان انت اخوه..ابنى ..حتة مني
بس مش عارفة ازاى البطن اللى شالت اخوك بطيبته وسماحة نيته
شالت واحد زيك بالجحود والغل والسواد اللى جواك ده
كان ابوكى يا نغم بيسمعنى وعيونه بترغرغ بالدموع
وانا مستنياه يطلعلى كدبة من تحت الارض علشان يحاول يفهمنى انه اكيد مش هو اللى عمل كده ومستحيل يعمل كده فى اخوه
لكن انا سمعت اللى كان اصعب عليا من كل اللى حصل
رد عليا ابوكى وقاللى ..
بدل ماتدور وتبحث علي الروايات خليها علي تليفونك وحمل تطبيقنا
