رواية موقف سيارات الفصل التاسع والعشرون بقلم حسام يونس
بعد اسبوع فى الميعاد المحدد ذهبت سهر
الى دكتوره سهام.
اول ما دخلت سهر المشفى طلبت من فاتن فنجان قهوه ...ودخلت إلى سهام المكتب...وتوجهت مباشرة إلى البلكونه وأخرجت عليه سجائر وأخرجت سيجاره واشعلتها ...وابتسمت سهام وهى تتابع حركات سهر فى التعامل مع السيجاره
سهام...خير مالك شكلك متوتره
سهر...مرات هشام اتخنقت معاه بسببى
سهام...ليه حصل ايه
سهر ...علشان كان بيكلمنى امبارح وطولنا فى المكالمه سوا
سهام...كزوجه من حقها تزعل اكيد
سهر ..دى متخلفه هشام صديق واخ مش اكتر.
سهام...ده من وجهة نظرك وهى بتتعامل مع اللى شيفاه
سهر...هو ايه اللى شيفاه
سهام...على الأقل اهتمامه بيكى
سهر...هو الاخ ميهتمش بأخته
سهام ..يتكلم معاها ويفهمها انكم اخوات وبس.
سهر ...اتكلم كتير وانا وضحت لها ده كتير علشان كده بقول متخلفه.
سهام...اصل الحكايه شكلها غريب شويه
سهر...صدقيينى هشام صديق واخ مش اكتر
سهام ..مصدقاكى ...نكمل بقى بقيه كلامنا.
سهر ...حياتنا مشت هناك على نفس الوضع اللى قلتلك عليه كل الجديد اللى فيها خلال الكام سنه اللى قعدتهم هناك أن بقى عندى ولدين وبنت والفجوه بنا بتكبر وتقريبا عايشين مع بعض علشان الاولاد وخلاص وفترات بعدى عنه بتزيد
وهو بيستسلم للوضع ده ولكنه على فترات أن تكون بنا العلاقه الزوجيه
ومع الوقت الاولاد بتكبر وهو قرر نرجع مصر علشان جامعات الاولاد
ورجعنا مصر واشترى فيلا اول ما رجعنا
احمد الكبير كان فى تالته هندسه وسالى
فى تانيه كليه الاداب...واسامه الصغير فى أولى كليه التجاره.
ومع استقررنا فى مصر افتتح سعيد شركه شحن كبيره .وبعدها بفتره حدث حدث جلل فى حياتنا
سهام...حصل ايه
سهر...سالى بنتى كان ليها زميله فى الجامعه البنت دى جيتلى البيت فى يوم وكانت سالى فى الوقت ده فى الجامعه
البنت دى كان اسمها ايناس
ايناس...انا جيت لحضرتك متعمده سالى متكنش هنا لان اللى هقوله لحضرتك صعب اقوله قدمها
سهر...خير مالها سالى طمنينى يا بنتى
ايناس...سالى بخير يا طنط الموضوع يخص استاذ سعيد والدها
سهر ...ماله سعيد قولى
ايناس ..الصراحه كنت مزنوقه فى مبلغ بسيط كده ورحت قابلته فى الشركه علشان اطلب منه المبلغ...ادهولى الصراحه مشكور...بس بعد حوالى اسبوع كده كلمنى على تليفونى وطلب اروحله المكتب علشان عاوزنى فى موضوع
سهر ...وهو جاب رقمك منين
ايناس....اخده منى وقت ما طلبت منه الفلوس..المهم روحتله المكتب..وفجأنى وطلب منى الجواز
سهر...ده اتجنن ولا ايه ده انتى قد بنته
ايناس....اتفاجات الصراحه ومبقتش عارفه اقوله ايه...ولما لاقنى ملبوخه قدامه...قلى هجبلك شقه تمليك هتكون مهرك ...ولو حابه نتجوز عرفى انا على استعداد.
حبيت اهرب من الموقف قلتله هفكر وارد عليك....وطبعا الموضوع بالنسبالى مرفوض...وانا اكلت معاكم عيش وملح
وعمرى ما كنت خائنه.
واستاذنت ومشيت وطلبت منى اعالج الموضوع ووعدت ترد المبلغ اللى اخدته منه فى اقرب فرصه.
مشيت البنت وانا ضغطى على ومش عارفه اتصرف ازاى وهل اقول للاولاد ولا لا مكنتش عارفه اتصرف ازاى ...خصوصا أن بابا كان اتوفى واخويا واختى لا حول ليهم ولا قوه.
وقررت اتكلم معاه الاول يمكن رواية البنت مش صحيحه.
وبعد ما اتعشينا فتح التلفزيون وقعد قدامه فجمعت شتات نفسى وقلتله عاوزه اتكلم معاك شويه .
سعيد ...خير فى ايه
سهر...انت صحيح عرضت على ايناس صاحبة سالى الجواز
سعيد...هى قالتلك ايه بالظبط
سهر...قالت انك عرضت عليها الجواز
سعيد...اه حصل وفيها ايه
سهر....دى فى سن بنتك ...انت مش فاهم كده كويس....وبعدين هو انا قصرت معاك فى ايه علشان تتجوز عليه
سعيد...لو عاوزه تطلقى معنديش مانع
سهر...بقى دى آخرة عشرتى معاك
سعيد....بصى بقى نتكلم بصراحه انا اجلا عاجلا هطلقك...مش مريحانى فى عشرتك...وبعدين انا بطلب شرع ربنا مش بهلس.
سهر...وعيالك مش عامل حسابهم ..وعمرى اللى ضاع معاك ملوش اى غلاوه عندك
سعيد ..اولا انتى عيشتى احلا عيشه اى ست تتمناها....رغم انك مكنتيش مريحانى ....ثانيا ولادى مالهم مهم عايشين احسن عيشه وبيتعلموه احسن تعليم...سبونى بقى اعيش الكام يوم اللى فاضللنى .
سهر...يعنى ده اخر كلام عندك
سعيد ..ومفيش كلام غيره...ومن هنا ورايح نامى مع بنتك لحد ما اجهز شقه فى العماره الجديده اللى اشترتها
وكل اول شهر مصروف البيت ومصروف العيال هيكون عندك.
سهر...سعيد انت بايعنى اووى كده
سعيد...الصراحه مشفتش معاكى راحه
وكنت صابر عشان العيال كانت صغيره
دلوقت خلاص كبروا وانا زهقت من عشرتك كفايه كده اوووى عليه .
سبته ودموعى مغرقه وشى وروحت اودة سالى انام معاها.
مكنش قدامى حل الا انى اقول للاولاد يمكن يصغطوا عليه ويرجع عن اللى فى دماغه ده.
سهام...وقتها كنتى عارفه أنه ممكن ينفذ تهديده ده
سهر....مكنش تهديد لأن ده سعيد اللى عرفته فى الغربه للاسف الفلوس مقويه قلبه...وانسالت الدموع من عينيها بغزاره
سهام....طيب أهدى وكفايه كده النهارده لحد ما تهدى واشوفك كمان اسبوع
بدل ماتدور وتبحث علي الروايات خليها علي تليفونك وحمل تطبيقنا
