رواية موقف السيارات الفصل الحادى عشر بقلم حسام يونس
اتصلت سهام بالمدرسه ..وأخذت ميعاد مع مدير المدرسه.
وفى الميعاد المحدد ذهبت هناك ...وكان فى انتظارها المدير فى مكتبه.
سهام عرفته بنفسها وسبب الزياره
المدير ...نورتينا يا دكتوره.
سهام ..ميرسى لحضرتك...كنت عاوزه اعرف ايه اللى حصل بالظبط.
المدير ...الحقيقه استاذ اشرف مميز جدا خلقأ ومهانيا...ولكن فى يوم الاخصائيه الاجتماعيه أحضرت لى فيديو وقالت الفيديو ده منتشر بين الطلبه للاستاذ اشرف ومعاه تلميذه عندنا فى المدرسه
شوفت الفيديو ولاحظت أنه مفهوش حاجه ولكن بعض الصور بتقول أنهم على علاقه أو شئ ما يربطهم.
فكان لازم احوله للتحقيق.
سهام...تفتكر واحد زى اشرف مشهود له بالكفأه خلقا ومهنيا...ممكن يكون فى الوضع ده.
المدير....الصراحه لا وقلت كده فى التحقيق بس انتى عارفه أننا فى مدرسه بنات وكان لازم اخد القرار ده علشان اخلى مسؤليتى.
سهام...مفهوم ...ممكن اقابل المشرف الاجتماعى .
المدير ...اكيد طبعا ...ثم داس على زر الجرس الموجود على المكتب.
دخلت فراشه المدرسه ...فقال المدير لها
خدى الدكتورة لأبله هدى تقابلها.
سهام ...شكرا لحضرتك
وتحركت سهام وراء الفراشه إلى مكتب هدى ...وعرفتها سهام بنفسها وشرحت لها سبب الزياره.
هدى ..الصراحه يا دكتوره الاستاذ اشرف ميستهلش اللى حصل معاه ده.
سهام...ده رايك الشخصى ولا عندك معلومات.
هدى...رأى الشخصى لكن عاوزه اقولك أن فى كلام أن المقصود البنت بالصور دى
بس الموضوع اتحول ضد استاذ اشرف
سهام...ممكن توضحى قصدك
هدى ...البنت اللى فى الصور طالبه عندنا ومتفوقه وفى بنات معاها فى الفصل واخدين منها موقف.
سهام...غيرة بنات يعنى.
هدى ...بالظبط وللاسف محدش من البنات عاوز يتكلم خوف من سطوة البنات دول.
هدى ...الموضوع صعب وحرام راجل زى ده يتظلم بين البنات دول.
بس قوليلى الكلام اللى قولتيه ده ..عرفتيه ازاى.
هدى...كلام بين الدادات وبعض البنات
بس بصوره رسميه محدش عاوز يتكلم
سهام...يعنى انتى عارفه البنت اللى عملت كده .
هدى تكهنات لان البنت دى عملت كذا مشكله مع البنت اللى فى الصور مع استاذ اشرف...لكن زى ما بقولك بشكل رسمى محدش اتكلم ..البنت دى جابت شهود أنها كانت بعيد عن المكان اللى متاخده منه الصور.
سهام...ممكن نروح الفصل اللى فيه البنات دى.
هدى ...ممكن طبعا اتفضلى.
سهام انحركت معها إلى الفصل...واستاذنت هدى من المدرس وان يسمح للدكتوره بالتحدث للبنات بخصوص موضوع الاستاذ اشرف.
رحب المدرس بذلك.
سهام...ياريت تركزوا معايا فى اللى هقوله
كون أن انا ازعل أو اختلف مع زميله ليه ميوصلش الموضوع انى اضيع مستقبله
عاوزه اعرف رايكم فى استاذ اشرف
رد بعض البنات بأنه محترم جدا
سهام..طيب حد منكم عنده تعليق على شخصيته يكون سلبى.
لم يرد أحد من البنات.
الشجاعه بقى انى أعفى وانا فى عز قوتى.
بصوا انا مش بحقق ولا عاوزه اعرف مين سبب المشكله.
بس ممكن نحل الموضوع ده بكل سهوله
ثم نظرت فى أرجاء الفصل وقالت
اتمنى وبقول اتمنى أن سبب المشكله
تطلع ورقه وتكتب فيها اللى حصل وكلكم هتكتبوا رأيكم ومن هنا هنعرف نحل المشكله ومنها مش هتتعرف مين سبب المشكله يعنى لا ضرر ولا ضرار..اتفقنا
كل بنت تطلع ورقه بيضا وتكتب فيها اللى حصل من وجهة نظرها.
وبالفعل أخرج كل البنات ورقه وابتدوا يكتبوا فى الورق.
وأثناء ذلك قالت سهام ...كل اللى عاوزه أوصله انى ابرئ مظلوم وخصوصا أن رأيكم أنه نموذج مضئ للمدرس الاب
ومش معنى انى غلطت اتمدى فى الغلط...بالعكس قمه الشجاعه والنضوج انى اعمل الصح وخصوصا أن محدش يعرف انها سبب المشكله.
ثم جمعت هدى الورق من الطالبات وأعطته إلى سهام.
وانصرفا من الفصل بعدما شكرا المدرس
وعادوا إلى مكتب هدى.وظلت سهام تقلب فى الورق إلى أن ابتسمت وقالت
سهام... الحمدلله فى بنت قالت الموضوع بحذافيره واعتذرت للاستاذ اشرف فى النهايه.
هدى ..فكره ممتازه فكره الورق دى
وصلتنا للحقيقه ...نيابه عن استاذ اشرف وأسرة التدريس بشكرك يا دكتوره
سهام... الحمدلله حلينا جزء من المشكله
والباقى اعتقد سهل بس ازور أخته.
وحددت سهام ميعاد مع أخته احلام وزوجها شعبان.
وطلبت منهم سهام أن تكون المقابله فى المشفى ...حتى لا يعرف اشرف بوجودها عندهم فى المنزل.
وحضرت احلام وشعبان إلى لقاء سهام
احلام ...خير يا دكتوره قلقت من طلبك للقائى.
سهام...ليه القلق احنا هندردش شويه بس.
احلام ...تحت امرك المهم اشرف يرجع لشغله وطبيعته.
سهام...كلمينى عن علاقتك باخوكى
احلام...اشرف مش اخويا اشرف ابويا
اشرف ضحى بنفسه ومرضاش يتجوز غير لما يجوزنى انا الاول لأن بابا مات وانا مكنتش تميت العشرين.
لكنه صمم يطمن عليه الاول.
سهام ...وانت يا استاذ شعبان
شعبان...اشرف اخ بمعنى الكلمه وكفايه حبه لاولادى يفوق الخيال.
وياما وقف جانبى فى أول جوازى من احلام ...يمكن احلام متعرفش حاجه عن الكلام ده بس دى الحقيقه.
احلام ...بس فى غلطه حصلت منى بس بدون قصد قسماً بالله
سهام ...ايه هى.
احلام لما حصلت مشكله البنت اللى فى المدرسه كان اشرف فى حاله نفسيه صعبه اووى...وفكرت ابعد بنتى عن البيت لأنها السنه دى فى ثانويه عامه فبعتها عند عمتها علشان تذاكر وتبعد عن توتر خالها...لأنها كانت قاعده معاه فى الشقه الخاصه بيه علشان تذاكر بعيد عن دوشة إخوتها...الموقف ده اثر فيه اووى هو متكلمش لكنه زعل اووى لبعدها عن البيت
سهام...انتى عرضتى عليه تشترى شقته
احلام ...ابدا والله ..دى شقته وملوش مكان غيرها.
سهام....للاسف اخوكى بعد ما اتوقف عن العمل اتصاب بعقدة اضطهاد شديده .
شعبان ..والحل يا دكتوره
سهام...لازم ثقتكم فيه ترجع اكتر من الاول....والبنت ترجع البيت وتقعد معاه تانى ..ده هيسهل فى شفاه اووى.
وانتهت الجلسه وتاكدت سهام من براءه اشرف وقررت تكتب التقرير المطلوب منها...وصممت سهام على مساعدة اشرف
فى استعادة ثقه كافه المتاعملين معه
وبالفعل كتبت التقرير واوضحت مع حدث معه بتصور كامل وشرحت كذلك زيارتها للمدرسه وارفقت الورقه اللى كتبتها إحدى الطالبات.
وبالفعل عاد اشرف إلى عمله...واتفقت سهام مع المدير على أن يقوم بعمل حفلة تكريم للاستاذ اشرف ..كما عادت بنت أخته إلى الجلوس معه.
بدل ماتدور وتبحث علي الروايات خليها علي تليفونك وحمل تطبيقنا
