.jpeg)
رواية انا وابن خالتي الجزء الثاني الفصل التاسع بقلم عمرو راشد
السلام عليكم ورحمه الله وبركاته
= هو انت جايب مصطفى حسني ينقذنا ولا ايه
عيب يا هند،، عيب مينفعش تقولي كدا
= خلاص انا سكت اهو
" هارون بص له وقاله
اتكلم عادي بلغة المصريين يا شاهر
" ثواني بالظبط ولقيته بيقول
مساء الفل يا جماعة عاملين ايه
" بصيت ل هارون وقولتله
هو انت جايبلنا حمادة سلطان هنا ولا ايه
= في ايه يا هند.. هو دا اللي لقيته
" قاطع كلامنا شاهر اللي بالمناسبة كان شكله بشر عادي شعره كان اسود وناعم،، بشرته لونها ابيض،، عنيه لونها عسلي وبرضو فيها لمعة غريبة
ايه يا عم هارون انت جايبنا نتهزق هنا ولا ايه
= معلش يا شاهر هي لسة متعرفكش
" هارون بص ليا وقالي
بصي يا هند احنا معندناش حل غير دا،، شاهر هو املنا الأخير يإما شمس هتقضي علينا
" شاهر قطع كلامنا
يا جماعة انا اسف لو هقطع اللحظة السعيدة دي بس احنا لازم نمشي من هنا عشان المكان مش أمان
" هارون غمض عينه وانا بدأت احس بنفس الدوخة،، غمضت عيني أنا كمان لثواني ولما فتحت لقيتنا في بيت خالتي،، هارون اتحرك من جنبي و وقف جنب شاهر وبدأ يشاور على عبدالله و امي وخالتي
اسمع يا شاهر دول يبقو اهل هند،، دي خالة هند و دا ابنها بودي
= ايه؟
بودي
= دا اسم؟
لا محل اقامة،، ركز معايا يا شاهر
= و دي تبقا ام
بسم الله ما شاء الله
= انا مش جايبك ترقيها،، ركز شوية،، انت هتبقا موجود هنا وتتعامل على اساس انك صاحب بودي
ايه؟
= انك صاحب الزفت دا،، اوعا تقع بالكلام قدام اي حد،، خلي كلامك محدود عشان محدش يشك فيك،، فهمت؟
فهمت
= انا هفوق بودي الاول لانه هو اللي عارف الموضوع كله من البداية
لا سيبلي انا الموضوع دا
" شاهر قرب من عبدالله و خبط على كتفه وقاله
صباح الخير
" عبدالله فتح عينه وقام
صباح النور،، مين حضرتك؟
" شاهر رد عليه ب ابتسامة ومد ايده للسلام
معاك شاهر
= لا والله مش معايا
لا قصدي معاك شاهر
= ايوا انا مش معايا
يا فندم انا اسمي شاهر
= انا اسف جدا مكنتش فاهم،، بس شاهر دا اسم غريب أوي
على اساس ان اسمك وليد يعني،، انت اسمك دودي
= دودي ايه حضرتك،، أنا اسمي بودي
ما انا قولت دودي
" عبدالله قام وقف وقالي
هو مين دا يا هند؟
= دا واحد جاي يساعدنا يا عبدالله،، هارون استدعاه
استدعاه منين؟
" هارون قاطعني و رد هو على عبدالله
من قبيلتي اكيد يعني
= احنا بيتنا أتحول وبقا مخزن ل عالم الجن ولا ايه
انا بعمل كدا عشان اساعدكو يا عبدالله
= تساعدنا ازاي يعني؟
انت اكيد شوفت اللي شمس عملته امبارح
= شوفت
بس متعرفش انها استدعت قبيلتي كلها عشان تحا*ربنا عشان كدا لازم شاهر يكون معانا خصوصا بعد موت قاسم
= وهو شاهر دا بيعرف يعمل ايه؟
" شاهر حط ايده على كتف عبدالله وقاله
اظن عيب اوي لما اكون في بيتك يا اخ دودي وتستهزق بيا يا ابو الواجب
" عبدالله اتعصب وصوته بقا عالي
يا عم انا اسمي بودي
= ايوا ما انا قولت دودي
" هارون دخل بينهم
شاهر انا قولتلك اتكلم عادي لكن هتعمل فيها سعد الصغير أقسمت بالله هرجعك على جهنم
" هارون بص ليا وقالي
تعالي يا هند عشان عايزك جوا
" مشينا خطوتين و وقفنا لما سمعنا صوت شاهر
اول مولود يبقا اسمه شاهر اتفقنا ولا ايه
" هارون بص ل شاهر و زعق بصوت عالي
شاهر!!
= هو أنا قولت حاجة غلط؟
كلامنا بعدين
= طب خلاص ادخل انت،، وأنا والاخ دودي قاعدين مستنيين النونة متتأخروش علينا بقا
#بقلم : #عمرو راشد
" هند دخلت مع هارون الاوضة وانا فضلت قاعد مع الكائن الغريب دا اللي جه قعد جنبي وبدأ يكلمني
قولي بقا يا اخ دودي انت بتشتغل ايه؟
= انت ليه مش عايز تقتنع اني اسمي بودي مش دودي
مختلفناش يعني
= لا اختلفنا و اسكت بقا عشان انا صدعت
لا حول ولا قوة الا بالله
= انت بتقول ايه؟،، هو انت مش المفروض جن؟
جن ايوا
= وهو الجن بيقول لا حول ولا قوة الا بالله
ايوا عادي ما احنا بنعبد ربنا
= بتعبدوه ازاي يعني؟
هو مش انت مسلم؟
= ايوا مسلم
وانا كمان مسلم
= قول والله
والله
= يعني انت مسلم وبتستغفر عادي و بتصلي وكدا
والله ايوا
= و هارون؟
مسلم برضو
= انا اول مرة اسمع ان في حاجة اسمها جن مسلم الصراحة
شوف يا اخ دودي..
= يادي النيلة الزفت،، متناديش عليا خالص،، اتكلم علطول
ربنا عز وجل بيقول في كتابه الكريم " وما خلقت الجن والانس الا ليعبدون " صدق الله العظيم،، يعني احنا كمان بنعبد ربنا سبحانه وتعالى زي البشر المسلمين بالظبط طمعا في الفوز بالجنة والعيش في نعيم الله عز وجل،، فهمت
= وشمس دي مسلمة برضو؟
مسلمة اه بس خطياها كتير،، احنا شبهكو بالظبط،، في مسلمين عندنا ملتزمين وفي اللي عنده اخطاء بس بيحاول يلتزم،، وفي اللي زي شمس مسلمة بالاسم بس لكن بتتبع ابليس وعايزة يبقا ليها السيطرة العظمى
= وحب هارون ل هند دا مش حرام؟
قولتلك أحنا مش كلنا زي بعض،، محدش فينا كامل يا اخ دودي
= وانت بقا بتساعد هارون ليه؟
اصل انت مشوفتش قبيلتنا شكلها ايه،، هارون دا كان الوحيد اللي كويس في قبيلتنا،، عيبه الوحيد انه كان بيحب شمس،، أنا و هارون شبه بعض عشان كدا دايما منبوذين من القبيلة عندنا عشان احنا مش شبههم
= طب وشمس ممكن فعلا تأذ*ينا؟
لو مقدر ليك ان يحصلك حاجة هتحصل،، شمس متقدرش تعمل حاجة غير ب ارادة ربنا حتى لو الجن كله اجتمع على اذ*يتك،، اطمن
= انا خايف على اهلي
متقلقش هارون عارف هيعمل ايه كويس
= طب احنا مش هنفوق امي و خالتي ولا هنسيبهم كدا
عادي يا دودي براحتك
= انت لو قولتلي دودي قدامهم..
" عنيه قلبت للون الأحمر وقال
هتعمل ايه؟
= هسكت،، هسكت ومش هتكلم
طب صحيهم يلا
" اتحركت وقومت عشان اصحيهم وفعلا فاقو،، امي سألت
احنا رجعنا البيت امتا يا بودي؟
= من شوية يا امي وأنتي و خالتي كنتو تعبانين وبتستريحو
" بعدها خالتي اتكلمت
طب انت و امك رجعتو بيتكو،، أنا جيت معاكو ليه؟
= أنتي نسيتي يا خالتي ولا ايه.. انتي قولتي مش هتسيبي امي لوحدها وخدتي هند ومروان و جينا كلنا هنا
كمان هند و مروان معانا؟،، ومين اللي قاعد مبتسم هناك دا؟
" كانت بتشاور على شاهر اللي اتحرك من مكانه وقام ومد ايده عشان يسلم
معاكي شاهر
= لا والله يا ابني مش معايا،، باين نسيته في البيت
هو ايه دا؟
= الشاحن
" شاهر بص ليا
هي خفة الدم وراثة في العيلة دي ولا ايه
" رجع يكلم خالتي تاني
يا امي لا انا اسمي شاهر
= شاهر!!،، هو دا اسم يا ابني؟
عادي يعني يا امي
" امي قاطعته و اتكلمت
عادي ازاي يعني،، مفيش حد اسمه شاهر
= جرا ايه يا صفاء ما تخليني ساكت
صفاء!!،، انت اتجننت دا انا قد امك
= متعرفيش تبقي قد امي اصلا،، أنا امي عمرها فوق الالف سنة
الف سنة!!
" تدخلت أنا بسرعة عشان انهي الموقف دا
خلاص يا امي شاهر ميقصدش
= هو مين دا أصلا؟
واحد صاحبي وجاي يقعد عندي يومين
= وبيته هو فين؟
موجود بس هو عنده خلافات مع اهله
= بقولك ايه تعالى معايا
" امي سحبتني من ايدي و دخلنا الأوضة بتاعتها
في ايه يا امي؟
= انا اللي عايزة افهم في ايه؟
مفيش حاجة،، هيكون في ايه يعني؟
= لا مش عليا انا الكلام دا،، الكلام دا تروح تعمله على خالتك منى مش أنا يا عبدالله
قصدك ايه يعني؟
= لما افتح عيني كل شوية و الاقي نفسي في بيت غير التاني مرة عند خالتك ومرة هنا،، وأنا كل دا مش فاكراه أصلا يبقا في حاجة غلط
لا يا امي مفيش حاجة غلط
= انت متأكد ان اللي مع هند دا مروان؟
لا مش مروان
= هارون مش كدا؟
اه هارون
= و دا جه امتا و ازاي؟
من بدري،، هند استدعته عشان كانت بتشوف حاجات غريبة
= واكيد طبعا انت اللي ساعدتها
انا مكنتش اعرف حاجة
= وهو انت عبيطة وهصدق الكلام دا،، انت طول عمرك لازقلها وعارف كل اسرارها،، عايز تفهمني انك مكنتش تعرف انها هتعمل كدا؟
لا مكنتش أعرف وياريت كفاية بقا اللي حضرتك بتعمليه دا
= وهو أنا لسة عملت حاجة،، أنا لسة هعمل
احنا دلوقتي بنحاول نصلح الغلط اللي أنتي عملتيه اصلا ف الموضوع مش مستحمل أي غلط منك تاني
= وانا غلطت ف ايه،، كل دا عشان كنت عايزة اجوزك البت اللي بتحبها
قصدك تأ*ذي البت اللي بحبها،، انتي عملتي دا بمزاجك انتي وانا غلطي اني سكت
= انا غلطانة فعلا،، كان لازم اسيبك قلبك محرو*ق عشان هند اتجوزت وسابتك
انا اللي كان قلبي محرو*ق مش انتي،، أنا مطلبتش منك مساعدة،، انتي اللي استغليتي الموقف وضعفي ساعتها وقررتي تعملي اللي في دماغك
= عشان مين؟؟،، ماهو عشانك
انا مش الشماعة اللي هتعلقي عليها غلطك يا امي،، الايام كانت هتعدي وكنت هنسا وهتجوز و اعيش حياتي
= وهو انت كدا عايش حياتك؟
اه عايش حياتي ومبسوط كمان،، بس مبسوط عشان فوقت من اللي كنت فيه
= انت لا يمكن تكون ابني،، انت مش عبدالله
ولا أنتي ينفع تكوني ام ولا خالة حتى
= اخرس
" ساعتها لقيت قلم نزل على وشي،، الصدمة اللي كان فيها كانت اشد من القلم لان تقريبا دي اول مرة امي تضر*بني،، حاولت اكتم غضبي جوايا وسكت وخرجت من الأوضة
" دخلت قعدت جنبه على السرير
في ايه يا هارون،، كنت عايزني ف ايه؟
= هو قاسم ما*ت ليه؟
مش فاهمة؟
= قاسم اه كان عايز يساعدنا بس هو مش خطر أوي على شمس بالشكل دا
عايز تقول ايه يعني؟
= كدا يبقا قاسم عرف حاجة تخلينا نوقف شمس
عشان كدا شمس قررت تقت*له
= اولا يا هند الجن ملوش سلطة انه يقت*ل حد،، احنا بنكون اداه مش اكتر
ازاي يعني؟
= يعني مثلا ممكن نغيب عقله ونحركه احنا لحد ما يبقا واقف على سور البلكونة وبالتالي هو هيقع لكن نقت*ل احنا بنفسنا لا
طيب ماشي أنا فاهمة بس مطلوب مني ايه بقا؟
= احنا لازم ندخل بيت قاسم تاني!!
