.jpeg)
رواية انا وابن خالتي الجزء الثاني الفصل الخامس بقلم عمرو راشد
انا هتجوز شمس بكرا
= تتجوز مين؟
ايه مش سامعاني؟
= شمس مين دي اللي تتجوزها يا مروان،، طب وانا
اعتقد اننا اتكلمنا في الموضوع دا قبل كدا وانتي مكنش عندك اعتراض،، ايه اللي حصل بقا؟
= اللي حصل اني لسة على ذمتك،، لسة قاعدة في بيتك وانتي بتقولي هروح اتجوز،، تفرق ايه شمس دي عني؟
بتحس،، بتحس بيا لما احتاجلها،، بتعرف تسمعني لما أكون محتاج اتكلم
= ثواني بس ايه دا كله،، انت عملت كل دا امتا؟
" بص ليا ل ثواني ومن غير ما ينطق وكأنه بيحاول يستوعب السؤال بعدها بشوية رد وقال
انا هتجوز شمس بكرا زي ما قولتلك،، عايزة تيجي الفرح اهلا وسهلا،، مش عايزة خليكي في بيتك احسن
" إجابة ملهاش علاقة بالسؤال اساسا و رده خلاني اتعصب اكتر وقولتله
يا مروان افهم بقا،، شمس دي مش بني آدمة اصلا
" رد عليا بإستهتار
مش بني آدمة ازاي يعني؟
= جن،، والله العظيم دي جن وبتلعب بيك صدقني،، هي بتعمل كدا عشان تضايقني وتخط*فك مني مش اكتر
" نفس رد الفعل بتاع السؤال اللي فات،، بص ليا ل ثواني وسكت بعدها بشوية رد
انا هدخل انام عشان عندي يوم طويل بكرا،، تصبحي على خير
" ردوده غريبة،، مروان كأنه بيفصل عن الحياه ويرجع تاني،، مش ردود واحد المفروض انه بيتخانق يعني،، دخل الأوضة ونام،، دخلت وراه بعدها بشوية مستنية هارون يفوق،، بس المرادي قعدت كتير مستنياه لحد ما بدأت انام وأنا قاعدة لكن فجأه فتح عينه وقام من على السرير
هند!
= كنت فين يا هارون،، انا استنيتك كتير أوي
ماناا قولتلك لازم اشوف حل
= ولقيت؟
استدعيت واحد من قبيلتي ووافق يساعدني
= و دا هيعمل ايه؟
خلينا نشوف الاول احنا داخلين على ايه
= مش خير خالص يا هارون
واخد بالي
= مروان ناوي يتجوز شمس بكرا
عارف
= طب وبعدين؟
مفيش حل يا هند
= يعني ايه؟،، مفيش طريقة نوقف بيها شمس
شمس مش سهلة اوي كدا عشان نلاقي طريقة نحار*بها بيها بين يوم وليلة
= انت اكيد تعرفها وعارف ايه نقطة ضعفها
ملهاش عشان كدا بقولك مفيش
= و اللي انت استدعيته دا جاي يعمل ايه؟
هند انا مش غبي عشان ادخل حر*ب مع شمس واخسر أكتر من كدا،، لازم نفكر بهدوء
= مبقاش في هدوء خلاص،، هي اسرع مننا في كل حاجة واحنا واقفين مش عارفين نتحرك واكيد انت عرفت ان قاسم رفض يساعدنا
عارف ايوا
= طب ايه؟،، بقولك ايه في حاجة غريبة حصلت النهاردة
شمس جاتلك؟
= هي جاتلي اه بس مش دا المهم،، مروان وهو بيكلمني كان في حاجة غريبة كدا،، انا قولتله ان شمس دي تبقا جنية بس هو...
شمس مسيطرة عليه ب سحر هي عملاه عشان عقله يرفض أي كلمة عنها
= مش فاهمة يعني ايه؟
يعني عقله رافض اي كلام عن الجن ف مش هيستوعب وهيسكت وهيحس انك متكلمتيش وبالتالي هيرد رد غير الموضوع اللي انتو بتتكلمو فيه اساسا
= يعني احنا متحاوطين من كل ناحية
كمان انا عايز اقولك ان مروان بكرا هيكون مع شمس يعني انا هخرج منه
= يعني ايه؟
يعني انا هخرج من جسم مروان
= يعني انا كدا مش هعرف اشوفك؟
تشوفيني لا إنما ممكن تتكلمي معايا
= طب ليه مشوفكش؟
مش عايزك تخافي مني،، عايز ابقا أنا اللي بطمنك بس
= بس انا عمري ما اخاف منك
عشان مشوفتنيش،، أنتي شايفة مروان هو اللي بيكلمك
= طب وأنا اعمل ايه؟
اتعاملي مع الموضوع عادي جدا،، كأنه مش فارق معاكي عشان اي حاجة أنتي هتعمليها مش هيكون ليها لازمة وممكن تأثر تأثير سلبي
= هحاول
خلي بالك من نفسك ومتقلقيش انا جنبك وحواليكي دايما
" رجع ينام تاني وانا نمت جنبه لكن عيني معرفتش اغمضها،، فضلت صاحية لحد اذان الفجر بعدها عنيا راحت في النوم،، فوقت على صوت اغاني،، لقيته واقف قدام المراية وبيلبس البدلة،، قومت من السرير
هو ايه دا؟،، مش في بني آدمة نايمة
= نايمة ايه دلوقتي،، الساعة 2 الضهر وبعدين انا عريس محتاج أفرح،، عايز احس بقا بالفرحة بدل القر*ف اللي احنا فيه
دلوقتي انا بقيت قر*ف يا مروان،، بعد ما كنت تتمنى تتجوزني بقيت دلوقتي قر*ف
= كان زمان بقا،، الكلام دا فات عليه كتير أوي يا هند
انا مكنتش اتوقع أبدا انك ممكن تعمل كدا،، لما انت اصلا مش بتحبني اتجوزتني ليه؟
= لا خلي كلامك مظبوط بقا،، انا حبيتك يا هند ويمكن اكتر ما انتي حبتيني بس انا مش عارف حصل ايه بينا،، في حاجة غلط حصلت،، في فجوة كبيرة اوي بينا،، احنا المفروض لما اتجوزنا كنا نقرب اكتر من بعض لكن احنا بقينا بعاد اكتر يا هند
طب اسمع يا مروان كل كلامك دا ملوش لازمة قصاد اللي انت هتعمله دا،، يعني انت بتحبني و رايح تتجوز عليا،، اصدقك انا ازاي؟
= انا قولتلك الحقيقة،، عايزة تصدقي ماشي ولو مش عايزة براحتك
طب اسمع يا مروان،، انت لو اتجوزت شمس هتطلقني
= ما تخرسي بقا
" مجرد ما قال الكلمة لقيت قلم نزل على وشي
انتي بتتكلمي ومش عارفة حاجة،، مبتفكريش غير في نفسك،، كل اللي همك انتي وبس،، مفيش حاجة تهمك غير حياتك انتي وبس،، انتي مش عايزاني اتجوز عشان بتحبيني لا دا عشانك انتي،، عشان ابقا بتاعك لوحدك،، منتهى الانانية والقر*ف،، كل شوية تدو*سي أكتر وفاكرة اني مرتاح،، انا ولا مرة ارتحت من ساعة جوازنا حتى لو انا كنت بحسسك بكدا بس انا مش عارف ارتاح معاكي،، انتي غريبة،، كل حاجة بتعمليها غريبة حتى اهلك،، بس اهلك انا كنت شايفهم من الاول وعارف انهم فيهم حاجة غريبة لكن انتي بقيتي زيهم،، مبقتش اطمنلك ولا عارف ارتاح معاكي حتى يوم ما قررت افرح مش عايزاني افرح،، حتى في دي انانية يا هند
" اخد كل حاجته وخرج،، هو انا وحشة أوي كدا،، انا ممكن اكون عملت حاجة غلط بس انا مش وحشة كدا،، انا مش انانية بس عايزة اطمن،، انا عايزة احس بأمان،، في حاجات كتير عايزة احس بيها،، انا مبطلتش احبه بس انا عايزة ارتاح،، تليفوني رن لقيته بودي
ايوا يا هند
= خير يا بودي في ايه؟
مفيش انا بطمن عليكي بس
= انا تمام كويسة
صوتك فيه حاجة غريبة
= مفيش يا بودي،، ممكن تقفل دلوقتي
طب ما تحكيلي ايه مضايقك يا هند؟
= مفيش حاجة يا بودي،، اقفل بقا،، يلا مع السلامة
" قفلت لإني مكنتش مستحملة اي كلمة زيادة،، قعدت بالشكل دا كتير،، طول اليوم تقريبا ، مكنتش بحسب الوقت لحد ما فتحت تليفوني وشوفت الساعة،، كانت 10 بليل يعني في 7 ساعات ضاعو في اللاشئ،، 7 ساعات وأنا قاعدة مبعملش حاجة غير اني ساكتة لاني معنديش كلام يتقال ولا حتى عارفة افكر وقررت اختمها بالنوم،، قومت دخلت الأوضة ولسة بقفل الباب،، ضهر باب الأوضة كان فيه مراية لمحت فيها..
ياسين!!!
#بقلم : #عمرو راشد
" حبي الأول،، الحب اللي عمره ما اتنسا ولا هيتنسي،، بدأناها من فترة الطفولة لحد ما كبرنا وبقا عندي 21 سنة بس معرفناش نكمل لانه ما*ت في حادثة،، الحاجة اللي طول عمري بهرب منها حتى لقيتها قدامي دلوقتي،، الحاجة اللي مبذكرهاش حتى في بالي عشان محسش بنفس الوجع اللي حسيته يوم ما جالي خبر وفاته،، نفس الوجع اللي حسيته دلوقتي لما شوفته واقف قدامي،، دموعي نزلت تلقائي
ياسين!!!!
= ايوا ياسين يا هند
ياسين انت ازاي..
= انا لسة عايش،، انتي اللي مشيتي وسبتيني و روحتي تتجوزي
ياسين انت مي*ت
= متصدقيش حد انا قدامك عايش اهو،، تعالي معايا
فين؟
= مش عايزة ترجعي ايام زمان؟،، فاكرة يا هند؟،، فاكرة المدرسة والجوابات وامك لما عرفت انك بتقابليني كل يوم بعد المدرسة في مدخل العمارة
" ابتسمت
فاكرة
= طب فاكرة السندوتشات اللي كنتي بتجبيها ليا
عشان كنت مهمل ومش بتجيب اكل معاك،، في طفل ميجيبش معاه سندوتشات؟
= مكنتش بجوع بس انا ولا مرة هونت عليكي
كنت ببقا عايزاك تاخد سندوتشاتي كمان
= مش عايزة ترجعي أيامنا مع بعض بقا؟
ازاي؟
" مد ايده ليا
تعالي معايا
" مديت ايدي ولسة همسك ايده لكن فجأه الاوضة بدأت تتهز وكأن في زلزال وفجأة سمعت صوت مرعب بيقول
هل اخبروك ان هارون بداخل هذا المنزل؟؟،، ارحل ولا تعود مرة اخرى و إلا سأقسم رأسك إلى نصفين
" الابتسامة اللي كانت على وش ياسين اختفت واتحولت ل رعب وخوف وقال
العفو والسماح يا سيدي
" وفجأة اختفى وسمعت بعدها صوت مروان
مكنتش اعرف موضوع ياسين دا
" بدأت أتلفت حواليا و ابص في كل مكان لكن صوت مروان اتكلم تاني وقال
انا واقف قدامك على فكرة
= طب انت فين؟،، انا مش شايفاك
قولتلك انا مش عايزك تشوفيني،، بس ايه موضوع ياسين دا؟
" قعدت على السرير و دموعي خانتني ونزلت اكتر
ياسين دا الحكاية اللي بهرب منها بقالي كتير أوي،، بخاف حتى انطق اسمه عشان مفتكرش أي حاجة حصلت،، بخاف اقول حبيت قبل كدا عشان مفتكرش اي حاجة تخصه وكنت فاكرة ان المشكلة كدا هتتحل بس لا،، تعرف أني عرفت مروان عشان حسيته شبه ياسين،، كان نفس حنيته عليا،، بيعرف يطمني،، كان في حاجات كتير شبهه بس مكنش ياسين،، هو كان شبهه مش اكتر،، و دلوقتي ظهر تاني عشان يفكرني باللي بهرب منه بقالي سنين
= دي لعبة من الاعيب شمس،، هي بتلعب على الجانب النفسي عندك،، انا عارفها كويس
لا مش شمس بس،، أي حد ممكن يضحك عليا عادي وانا هبلة وبصدق
= انتي مش هبلة يا هند،، أنتي نضيفة وكويسة
مروان مقالش كدا
= مروان متسيطر عليه بالسحر،، متصدقيش كلامه
و بودي،، دا كمان حد مسيطر عليه؟
= بودي بيقول كدا عشان أنتي محبتيهوش،، خليكي واثقة فيا يا هند،، صدقيني انتي مفيش منك دلوقتي
انا مبقتش عارفة الاقي نفسي يا هارون
= طب تيجي نطير لحد الدور الأرضي؟
" سكت و مردتش عليه
طب ايه رأيك لو لحد التاني بس و اهو مش بعيد
= اشمعنا وافقت دلوقتي
انا اعمل اي حاجة ممكن تفرحك
= انا عايزاك جنبي
وانا جنبك دلوقتي،، نامي وانا هقرألك قرآن عشان تهدي
" نمت على السرير لكن قبل ما احط راسي على المخدة قومت وكلمته
هارون هو ازاي شمس هتتجوز مروان،، هي مش كدا هتبقا كسرت القواعد برضو؟
= قولتلك هي مسيطرة عليه،، وبتلعب معاه نفس اللعبة اللي لعبتها معاكي من شوية،، بتلعب على الجانب النفسي
يعني هتعمل ايه؟
هتشوفي بنفسك
" صحيت تاني يوم الصبح لقيت شمس قاعدة على كرسي جنب السرير و باصة من الشباك
صباحية مباركة يا عروسة
= صباح النور،، قوم عشان تفطر
" الرد كان ناشف شوية،، قومت من السرير و روحت جنبها
بصي انا عارف اني نمت امبارح ومعملناش حاجة بس يا حبيبتي اليوم كان تقيل وانا كنت تعبان اوي
= ايه الكلام دا!!!،، لا احنا عملنا ليلة دخلتنا بشكل طبيعي بس حضرتك بقا اللي مكملتش
مكملتش يعني ايه مش فاهم؟
= دي حاجة مش محتاجة تفسير يا مروان
طب فهميني انا عملت ايه بالظبط؟
= ماهو دي المشكلة انك معملتش حاجة
خالص؟
= خالص
يعني ايه
= مروان انت عندك مشكلة جن*سية و لازم نروح ل دكتور!!
