.jpeg)
رواية انا وابن خالتي الجزء الثاني الفصل العاشر بقلم عمرو راشد
احنا لازم ندخل بيت قاسم تاني جايز نلاقي أي حاجة هناك
= ازاي دا البوليس اكيد هناك والبيت هيكون مقفول
ماهو احنا مش هندخل من الباب
= اومال هندخل منين؟
" لقيته ابتسم وغمض عينه،، حسيت ساعتها أني دايخة وغمضت عيني،، لما فتحت لقيت نفسي جوا في مكان ضلمة مفيش فيه اي مصدر للضوء،، فجأه لقيت نور ابيض ظهر قدامي ينور الطريق وصوت بيقول
اتحركي يا هند
" مشيت خطوات ناحية الأوضة بتاعته اللي كان بيقعد فيها،، دخلت لقيتها كلها لونها اسود كأنها اتحر*قت و اتفحمت،، لكن مفيش اي حاجة في الأوضة،، بدأت ادور وحتى أنا معرفش انا بدور على ايه،، الكنبة بتاعته كانت موجودة،، لسة بحاول احركها والغريب أنها اتحركت بسهولة معايا،، لقيت ورقة لونها اسود شكلها غريب،، لسة كنت هفتحها لكن لقيتها اتشدت من ايدي بسرعة،، بصيت قدامي لقيتها واقفة و باصة ليا بغضب
مش بتاعتك دي يا هند
= هو انتي مش ناوية تسبينا في حالنا بقا ولا ايه
دا انتو متعتي يا هند،، ازاي عايزاني اسيبكو بسهولة كدا؟
= طب انا بحذرك ابعدي عني وعن اهلي
يإما هتعملي ايه؟،، تقدري تعملي ايه أصلا يا هند؟
= انا معايا ربنا اللي أقوى منك ومن أي حد
سبحانه وتعالى قادر على كل شئ،، عندك حق بس ربنا بيساعد الناس اللي قريبة منه بس يا هند،، الناس اللي مبتغلطش،، مبتعملش حاجة حرام
" بصيت في الأرض وسكت معرفتش ارد،، لكن بسرعة لقيت ايدي اتكتفت،، مش عارفة احركها،، في قوى خفية مسيطرة على ايدي و مكتفاها،، حاولت بكل قوتي افك ايدي ونجحت في دا بالفعل،، بصيت على شمس لقيتها مصدومة أني عرفت افك ايدي،، عنيها اتحولت وبقا لونها احمر بلون الد*م،، عنيها طالع منها نار و بتقرب مني،، رجعت خطوتين ل ورا لكن في ثانية المشهد اتبدل و لقيت نفسي في بيت خالتي تاني وهارون واقف قدامي
ايه اللي بيحصل،، انت كنت فين؟
= الورقة،، الورقة فين؟
مع شمس
= احنا في مصيبة دلوقتي
" خرج برا الأوضة وهو متعصب وانا خرجت وراه لقينا شاهر قاعد مع امي
بس الشاي بلبن بتاعك جميل يا شاهر،، انت بتعرف تعمل ايه تاني بقا؟
= كل حاجة يا ام هند والله الحمدلله يعني
لا دا انت تعمل الغدا النهاردة بقا
" هارون مشي خطوتين ووقف قدام شاهر واتعصب عليه
أنتي يا خالتي،، قومي يا خالتي احنا في مصيبة
= في ايه؟،، مصيبة ايه بعد الشر؟
هو احنا هنا بنعمل ايه أصلا؟
= في ايه يا هارون مالك متعصب كدا ليه؟
" امي قاطعتهم وقالت باستغراب
هارون!!،، هارون مين
" شاهر رد عليها
هارون مين يا ام هند
= انت قولت هارون دلوقتي
لا مقولتش،، أنا قولتله يا مروان
= لا قولت هارون أنا متأكدة
ايوا استني انا هفهمك،، هو عشان مروان و هارون شبه بعض ف انتي ممكن تسمعيهم غلط
= مين هارون دا أصلا؟
دا... دا دلع مروان
= دلع مروان يبقا هارون ازاي يعني؟
على اساس يعني عايز يعمل فيها هارون الرشيد ويتجوز واحدة واتنين وأربعة وهو أصلا مش قادر على واحدة
" هارون شد شاهر من ايده
اسكت لأنك بتتكلم عني
" امي اتكلمت وقالت
انا مش فاهمة منك حاجة يا شاهر،، أنا قايمة داخلة اوضتي
" امي قامت و دخلت الأوضة ومجرد ما قفلت الباب هارون اتكلم
يعني مش كفاية سايبني لوحدي اخطط واعمل كل حاجة كمان بتغلط قدامها،، انت عايز تعمل فينا ايه اكتر من كدا؟
= وهو انت طلبت مني ايه وانا معملتوش؟
متستناش اني اطلب،، المفروض انك جاي تساعدني يعني يبقا عندك حلول
= وانا هخمن يعني؟
انت الكلام مش نافع معاك
= قولي بس انت عايز ايه وانا هعمله؟
احنا لقينا ورقة فيها طلسم نقدر نوقف بيها شمس
= وهي فين الورقة دي؟
شمس خدتها
= بجد والله شمس خدتها،، اممم وانت عايزني اروح ل شمس اجيبها ولا ايه
" فجأه و بدون سابق إنذار شمس ظهرت وسطنا
من غير ما تيجي يا شاهر،، أنا موجودة اهو
= بقولك ايه يا شمس انا مش نايم كويس ولما ببقا مش نايم كويس بيطلع مني حاجات غريبة،، هاتي الورقة بهدوء احسنلك
ولو مخدتش الورقة هتعمل ايه؟
لاحظي اننا اتنين وانتي لوحدك
= اتنين فين،، قصدك هند يعني،، وهي هند اللي هتساعدك يا شاهر؟
لا أنا قصدي هار...
" مكملش الجملة لان هارون مكنش موجود اساسا،، اختفى،، شمس ضحكت ضحكة مرعبة وقالت
كنت بتقول ايه يا شاهر؟
= الورقة لو عايزاها خليها معاكي،، احنا واحد يعني
اعتقد انك كنت بتهد*دني انك هتعمل افعال مش كويسة
= شوفتي بقا انك ظالماني،، انا كنت بتكلم في التليفون
بجد؟
= اصل البشر دول عليهم حاجات غريبة،، تخيلي عاملين سماعات جديدة اسمها اير بودز مش بتبان لما تلبسيها يا شمس،، انتي مقاسك كام عشان اجيبلك واحدة؟
لا هارون عرف يختار الحقيقة
= انا قولتله كدا والله،، فعلا هند زي القمر
بتحب الهزار انت يا شاهر
= عشان انا لو اتكلمت بجد هد*فنك مكانك
انت يا شاهر هتقدر تتحمل نتيجة كلامك دا؟
= والله انا خايف انك أنتي اللي متتحمليش
" شمس ظهر ليها قرون و طولها بدأ يزيد لدرجة أنها كانت واصلة للسقف،، في اللحظة دي شاهر اختفى،، شمس اتقدمت خطوتين وبدأت تبص حواليها لكن في اللحظة دي شاهر ظهر وراها بس بشكل غريب تماما،، ساب الجسم البشري اللي كان فيه وبقا شبه قبيلته،، أكتر حاجة كانت بتميزه هي كورة النار اللي في ايده اللي في ثانية رماها على شمس،، بدأت تصرخ بصوت مرعب و بصت ل شاهر،، في اللحظة دي هارون ظهر ورا شمس وماسك سيف حاد و غر*ز السيف في ضهر شمس،، صوتها اتغير وبقت بتصرخ بصوت مرعب جدا،، صوتها يكاد يكون حرك البيت وفي ثانية اختفت،، في اللحظة دي هارون و شاهر رجعو لطبيعتهم وجسمهم البشري،، هارون جري عليا وقالي
انتي كويسة؟
= كويسة،، انت كنت فين؟
كنت بحاول اعطل باقي القبيلة انهم ميدخلوش البيت
= هما كانو برا؟
كانو جايين مع شمس
= انا مش فاهمة حاجة،، اخرتها ايه يا هارون؟
وجودي بقا خطر يا هند،، مبقاش ينفع اكون موجود في جسم مروان او حتى برا،، وجودي على الأرض بقا خطر عليكو
= ازاي بس؟،، انت لو مش موجود الله اعلم كان هيحصلنا ايه
انا لازم ارجع العالم بتاعي يا هند
= وانا يا هارون،، هتسيبني؟
أكتر من كدا هأذ*يكي ولا ايه يا شاهر؟
" شاهر قرب مننا وقال
شاهر ايه،، انت عايزنا نرجع بعد اللي احنا عملناه في شمس دا؟
= خلينا نواجه غلطنا
غلطك انت لوحدك يا هارون،، احنا لو رجعنا هنتسجن،، أنا مش هرجع
= انت متعرفش انك بتستهلك الجسم البشري اللي انت فيه يعني طول ما انت عايش هتفضل محتاج جسم بشري عشان تعرف تعيش
= العالم مليان ناس اشكال وأنواع،، اقدر اتشكل في اي حد
وليه نأ*ذي الناس؟
= كنت قولت كدا لما قررت تنزل الارض و تحب هند
وانا مفكرتش ساعتها هيحصل ايه،، بس دلوقتي بقولك احنا وجودنا غلط هنا
= انا مش هرجع يا هارون،، عايز ترجع ارجع لوحدك
#بقلم : #عمرو راشد
" هارون بص ليا وسكت و دخل الأوضة،، قعدت على الكنبة افكر في اللي بيحصل،، منكرش ان هارون عنده حق بس في نفس الوقت هو لو مشي ممكن تحصل مصايب،، شاهر كان قاعد جنبي ساكت،، حاولت اتكلم أنا معاه
بس انت عجبتني على فكرة،، عملت كام حركة حلوين بجد
= شكرا
لا برافو يعني انا مكنتش فاكراك كدا
= دا الطبيعي والمتوقع من الجن ولا انتي رأيك ايه؟
صح
" عبدالله خرج من اوضته و قعد جنب شاهر
بقولك ايه يا دودي سيبني دلوقتي انا مضايق
= ما تولع يا عم،، هو أنا اتكلمت اصلا وبعدين قولتلك الف مرة اسمي بودي
ما انا قولت دودي
" دخلت بينهم عشان اهديهم شوية
خلاص يا بودي هو بيهزر معاك
" كان نفسي انهي الخناقة لكن شاهر رد عليا
انا مبهزرش على فكرة،، أنا بتكلم بجد
= خلاص بقا يا شاهر
شاهر بقا وحش دلوقتي محدش طايقه،، تمام انا همشي
" شاهر اختفى من وسطنا،، وعبدالله قرب مني وقال
بقا دا منظر جن،، هارون بتاعك دا شكله جابلنا مصيبة
= حرام عليك انت مشوفتش شاهر عمل ايه من شوية
ايه عمل ايه يا ترى؟
= سيبك بس دلوقتي منه،، أنا لقيت ورقة فيها حاجة نقدر نوقف بيها شمس بس شمس خدتها مني وحاليا هي مش معايا،، معندكش اي طريقة نقدر نرجع بيها الورقة؟
مش عارف يا هند والله،، الموضوع صعب
= فكر معايا طيب
زمانها حر*قتها أصلا،، وهي شمس هتشيل معاها ورقة ممكن تقضي عليها ليه؟
= انا تعبت من التفكير ومبقتش عارفة اعمل ايه
و هارون رأيه ايه؟
= هارون عايز يمشي
بعد ما بقينا في الورطة دي عايز يسيبنا ويمشي
= بس شاهر رافض و ان شاء الله انا هحاول أقنعه
غلطك دا هنحاسب عليه كلنا يا هند،، ربنا يستر
" دخلت الأوضة لقيت مروان نايم،، نمت جنبه،، من كتر التفكير والإرهاق نمت بسرعة،، فوقت في نص الليل كانت الساعة 2،، ملقتش مروان جنبي،، حسيت ب صوت انفاس حواليا،، الأوضة كانت حر بشكل مبالغ فيه،، حاولت اتحرك لكن لقيت رجلي اتكتفت وفجأة شمس ظهرت قدامي،، ومعاها كائنات زي اللي شوفتهم قبل كدا كلهم بيحاوطوني،، وشمس لسة واقفة
فكرت كتير لقيت ان الحل الوحيد ان روحك تكون ملكي،، هو دا اللي هيجيب هارون تحت رجلي،، متقلقيش أنتي هتكوني مبسوطة أوي معايا
" كنت عايزة اصرخ لكن معرفتش،، مش عارفة انطق،، لساني مبينطقش،، شمس قربت خطوتين مني وأنا بحاول اصرخ لكن فجأه سمعت صوت صرخات جاية من برا الأوضة وفجأة الباب اتفتح و مروان دخل
امك واقفة على سور البلكونة عايزة ترمي نفسها،، قومي معايا بسرعة!!!
بدل ماتدور وتبحث علي الروايات خليها علي تليفونك وحمل تطبيقنا
