 |
رواية من الجاني القضيه الثانيه 2 الفصل الثاني 2 بقلم محمود الامينصباح الخير النهاردة الحلقة التانيه من سلسلة قضايا من الجاني؟ اتمني منكم الدعم عشان نستمر في السلسلة ... كنت نايم وما صدقت ارتحت من أرهاق الشغل.. لكن هرتاح أزاي؟.. طبيعية شغلي مفهاش كده تليفوني رن وصحاني اتعدلت وانا بقول خير ان شاء الله كان ظابط لسه منقول عندنا من كام شهر اسمه اكرم اتعدلت وانا بقول عايز اي ده فتحت الخط ورديت _ ألو ايوة يا أكرم _ آدم باشا العقيد عايز حضرتك في مكتبه حالا.. في جريمة قتل حصلت وعاوزك ضروري _ حاضر هلبس وجاي .. يا فتاح يا عليم علي الصبح اصحي علي جريمة قتل.. هو في كده في الدنيا قومت من السرير اخدت دش سريع ولبست ونزلت ركبت عربيتي واتحركت علي المديرية.. وصلت وطلعت علي طول علي مكتب العقيد سامي.. خبطت ودخلت _ صباح الخير يا فندم _ صباح النور يا آدم.. عاوزك تركز في القضية دي عشان هي قضية مش ساهلة _ انا لحد دلوقتي معرفش اي اللي حصل! _ فنانة اعتزلت من زمان لقيوها ميتة في شقتها علي الكرسي.. لكن الموضوع شكله فيه شبهه جنائية عشان الفنانة دي كانت بتتلقي رسايل تهديد من مجهول من فترة قريبة.. وبالرغم من ده اخوها نفي كلامها وقال ان اخته بيجلها هلاوس بسبب مهدأ بتاخده ومفيش حد بيبعت رسايل _ اممم.. يعني لو الرسايل دي كانت موجوده يبقي كده دي جريمة قتل _ وحتي لو مش موجوده.. الطب الشرعي والمعمل الجنائي هناك هتروح وتشوف وصلوا لايه بالظبط _ تمام يا فندم.. هتحرك حالا ... اتحركت علي موقع الحادث.. عمارة راقية في حي راقي جداً.. العمارة ليها شركة آمن مش مجرد حارس عمارة طلعت الشقة اللي كانت في الدور التاني شقة المجني عليها وخليني اختار ليها اسم مستعار واقول نورهان باب الشقه مفتوح والطب الشرعي وخبراء من المعمل الجنائي جوه لفحص الأدلة ورفع البصمات دخلت الشقة.. شقة كبيرة بصيت على باب الشقة مكنش فيه كسر ولا اي حاجة الباب سليم وده يوضح ان المجرم مكسرش الكلون عشان يدخل يعني معاه مفتاح وكده الشك في ناس جوه مش بره ده طبعاً مجرد انطباع لما دخلت لقيت جثة الفنانة علي كرسي في الصالون.. ولقيت الظابط أكرم واقف مع بنت في العشرينات كده وكانت بتعيط.. قربت منهم أتكلم أكرم وقال _ حمد الله على السلامة يا فندم.. دي جميلة كان بتخدم الفنانة قبل ما تموت _ اممم.. اهلا يا جميلة عاوزك تهدي كده عشان نعرف مين اللي قتل الفنانة ونجيب حقها لقيت جميلة برقت وقلتلي _ قتل!... هي ممتتش موتة طبيعية _ حتي الان مش عارفين بس الارجح انها اتقتلت .. في الوقت ده كان الطب الشرعي والمعمل الجنائي خلصوا والكلام المبدئي توجد شبهه جنائية في الموضوع وقالوا هنوفيكم بالتقرير والادلة في اقرب وقت ... وبدأت التحقيق في القضية المشتبه فيهم ٣ عشان هما اللي معاهم نسخة من مفتاح الشقة ومش بس كده عشان التحريات اللي عملنها الاول هو شقيق المجني عليها مصطفى مصطفى كان دايما في مشاكل مع اخته نورهان اللي اكبر منه ب٥ سنين والمشاكل سببها الفلوس مصطفى مضيع كل فلوسه علي السهرات والشرب وكان بيطلب دايما من اخته فلوس وكانت بترفض وفي اخر مرة زارها قالها انه هيرفع عليها قضية حجر التاني هو عبد الباسط حارس الامن بتاع بليل وعلاقته بالمجني عليها علاقة عطف منها.. ظروف عبد الباسط صعبة خصوصا ان والدته في المستشفى بتغسل كلي ودايما مدام نورهان كانت بتديله فلوس لكن ده خلي عبد الباسط يتجرأ ويطلب منها مبلغ كبير عشان علاج والدته وللاسف رفضت التالت هي جميلة الخدامة.. خصوصا ان المعاملة كانت وحشه جداً من مدام نورهان.. وكانت دايما بتقول عليها انها حرامية وجاية هنا عشان تسرقها ... استنيت تقرير الطب الشرعي والمعمل الجنائي.. لحد ما وصل وزي ما توقعنا... المجني عليها تم خنقها بسلك مطاط وتم كتم النفس حتي الموت والادلة اللي جمعها المعمل تتمثل في تليفون المجني عليها اللي اثبت من خلال صور ليها عليه ان في عقد اتسرق من مدام نورهان.. عشان لما دور خبراء المعمل الجنائي لقيوا الصندوق اللي ظاهر في الصور لكنه كان فاضي ... وبدأنا التحقيق بالاستاذ مصطفى _ أستاذ مصطفى البقاء لله.. سؤالين كده عشان تروح _ سبحان من له الدوام اتفضل.. _ كانت اي علاقتك بأختك مدام نورهان؟ _ علاقة عادية جداً.. وبعدين انا متهم بحاجة _ اه انت مشتبه فيه.. عشان انت كنت في مشاكل دايما مع مدام نورهان بسبب الفلوس وهددتها انك هتحطها في دار رعاية _ لا طبعاً انا مستحيل اعمل كده.. اه في خلافات بس متوصلش اني اقتلها ... المتهم التاني عبد الباسط حارس الامن _ اهلا يا عبد الباسط.. اخبارك اي؟ _ الحمدلله بخير مستورة _ انت عارف انك متهم بقتل مدام نورهان؟ _ انا يا باشا... انا معرفش اعمل كده والله ما اعرف _ يعني انت ممكن تكون فكرت تخلص منها عشان تسرق العقد الغالي عشان علاج والدتك خصوصا انها رفضت تساعدك _ لا يباشا هي ساعدتني كتير بس فلوس العملية كانت كتير وهي قلتلي انها مش عاوزة تحرجني بس معاها شويه مشاكل كده ولما تحلها هتديني الفلوس _ ما انت ممكن تكون مصبرتش علي انها تديك الفلوس وقررت تاخدها بنفسك _ والله ما حصل يباشا.. والله ما حصل ... المتهم التالت جميلة الخدامة _ انا مقدر ان الست نورهان كانت غالية عليكي بس انا عاوزك تهدي _ كانت غالية عليا اوي والله _ بس هي كانت بتعاملك وحش مش كده _ مقدرة ده عشان اللي حصل انها كانت مترشحة لفيلم كبير وبعد ما اتفقوا معاها رجعوا في الاتفاق الموضوع تعبها وخلاها تاخد الحبوب المهدئة _ طيب انتي عارفة انك في دايرة الاشتباه يا جميلة؟ _ يلهوي يا بيه انا مستحيل اعمل كده.. مستحيل _ اممم عموما هنشوف ... انتظرت تقرير الصفة التشريحية واللي كان فيه مفاجأة ان المجني عليها تم تخديرها عن طريق حباية في فنجان قهوة قبل الخنق وهنا الشك كان في جميلة لكن مع تفريغ كاميرات المراقبة جميلة نزلت من العمارة في توقيت الجريمة واللي طلع العمارة الاستاذ مصطفى بس مطولش فوق ونزل.. وبعدها عبد الباسط ساب مكانه وطلع فوق بس في تفصيلة صغيرة هتخلي في شك في التلاتة العمارة ليها باب خلفي ومفيش هناك كاميرات ... انا بالنسبالي عرفت من الجاني .. تفتكروا انتوا من الجاااني؟ .... انتظروا الحل الساعة ١١ مساءا.. ومنتظر التوقعات ... #محمودالأمين حل القضيه الثانيه من هنا |
تعليقات
