.jpeg)
رواية انا وابن خالتي الفصل السادس بقلم عمرو راشد
يا هند فوقي ابو*س ايدك.. ايه اللي حصلك بس؟
" فتحت عيني ببطئ لقيته قاعد جنبي.. اتفزعت وقومت من مكاني
ابعد عني متقربش مني،، ابعد
= حاضر بس اهدي
اطلع برا انا عايزة اقعد لوحدي
= طب قوليلي مالك بس يا حبيبتي
بقولك اطلع برا يا مروان بدل ما اسيبلك البيت و امشي
= خلاص انا خارج يا حبيبتي،، اهدي أنتي بس وهتبقي كويسة وانا هدخل كمان شوية اطمن عليكي
" خرج وقفل الباب وراه.. هو في ايه،، هو اللي انا كنت فيه دا حقيقة؟،، حقيقة صح مش حلم
فلاش باك
الله في ايه يا مروان؟
= بس انا مش مروان يا هند،، انا هارون واظن انتي عارفة كل حاجة بلاش نضحك على بعض
" ساعتها حسيت ان الدنيا كلها بتلف بيا و مستحملتش دقيقة كمان و اغمى علي ،، قبل ما افقد الوعي شوفته وهو داخل اوضة النوم ومن بعدها محستش بأي حاجة
باااك
" طب اعمل ايه،، امشي ولا اخليني في البيت،، يعني هو أنا لو مشيت مش هيعرف يوصلي ماهو اكيد هيعرف،، يارب اتصرف ازاي،، انا مش عارفة افكر،، بصيت في الساعة لقيتها 1 بليل،، رجعت على السرير ونمت عليه ولكن كنت حاسة بكل حاجة،، الوقت عدا والنوم غلب عليا،، وشوفته تاني في الحلم
انا مش مروان يا هند،، انا هارون
" صحيت مفزوعة لقيت مروان واقف قدامي.. اول ما صحيت هو رجع ل ورا وقال بقلق
انا كنت داخل اطمن عليكي قبل ما انزل
" حاولت ابتسم
انزل يا حبيبي روح على شغلك،، انا كويسة
= طب تحبي اوصلك عند مامتك تقعدي عندها لحد ما ارجع او اكلمها هي تيجي تقعد معانا يومين
لا ملوش لازمة،، بلاش نقلقها
= طيب يا حبيبتي انا هحاول آاخد اجازة واقعد معاكي لحد ما تبقي كويسة
انا كويسة يا مروان مفيش حاجة،، اطمن
" لما نزل انا قومت وخرجت قعدت برا بعد محاولات اني ارجع انام تاني ولكن معرفتش،، نمت على الكنبة والتليفزيون مفتوح قدامي وفضلت على الحال دا لحد اذان الضهر لحد ما لقيت رسالة من بودي
جوزك عندك؟
" استغربت من الرسالة ولكن رديت عليه
لا
" شافها ومردش لكن سمعت بعدها ب دقيقتين جرس الباب بيرن،، قومت افتح لقيته بودي ،، فتحتله وكان لسة هيدخل لكن رجع تاني ووقف برا
متأكدة انه مش هنا؟
= في ايه يا بودي،، قولتلك مروان نزل من بدري
" دخل وأنا قفلت الباب وراه و دخلت قعدت معاه على الكنبة
انتي ازاي جايلك قلب تقعدي معاه في بيت واحد
= قصدك مين
بلاش استعباط يا هند،، اللي معاكي دا مش مروان،، وعلى فكرة هو جالنا البيت امبارح وكان هيمو*تني وهد*دنا اننا نبعد عنك ومنحاولش نوقفه
= طب هو عايز ايه
عايزك أنتي طبعا
= هو قال كدا؟
ايوا قال،، اسمعي كلامي يا هند وقومي البسي وتعالي معايا لحد ما نشوف حل
= بس انا مش همشي يا بودي،، انا لازم اعرف هو عايز مني ايه،، اعرف هو جه منين أصلا
الفضول دا نهايته مش حلوة يا هند،، انا خايف عليكي
= هو لو كان عايز يأذ*يني يا بودي ماهو كان عملها،، تفتكر يعني هو هيخاف؟
برضو لازم تخافي
= بس هو ليه جالكو انتو،، اشمعنا انت وخالتي؟
مش عارف،، ممكن عشان حاولنا نحذرك منه
= لا لا ثواني،، خالتي كلمتني من يومين وقالتلي اهرب لان مروان مش طبيعي،، هي عرفت منين بقا؟
" لقيته مش عارف يجمع الكلام و باين عليه انه عارف حاجة فعلا
انت مخبي عليا ايه يا بودي؟
= هخبي ايه يعني يا هند،، مش مخبي حاجة
لو انت فعلا خايف عليا قول في ايه انا معرفوش،، قولي عشان ابقا عارفة كل حاجة وساعتها اقدر أقرر هعمل ايه
= انا هحكيلك بس وحياه اي حاجة بينا ما تزعلي مننا
" بدأ يحكي وأنا قاعدة قدامه كأني مش موجودة او في عالم تاني،، مخي مش عارف يستوعب اللي بيقوله،، مصدومة لدرجة اني مش عارفة آاخد اي رد فعل
بتعملولي سحر،، طب ليه وعشان ايه،، كل دا عشان متجوزش مروان
= يا هند انا عارف ان اللي امي عملته غلط بس هي والله كانت عايزة تطمن عليكي،، مش عايزاكي تبعدي عننا عشان كدا كانت عايزانا نتجوز
ودا مبرر فعلا انها تكون عايزة تأذ*يني وتخر*ب حياتي،، تحول جوزي ل جن ولا عفريت ولا الله اعلم هو ايه أصلا وبعدها تقولي انها كانت عايزة مصلحتي،، انتو ازاي عملتو فيا كدا،، جالك قلب يا بودي تأذ*يني انا،، انا هند اللي متربيين سوا وعيشنا مع بعض وكبرنا مع بعض،، جالك قلب تأذ*يني؟؟؟؟
= انا والله ما كنت اعرف ان كل دا هيحصل،، انا اسف يا هند،، والله انا ما كنت عايز اعمل كدا أصلا،، انتي عارفاني كويس يا هند
كنت عارفاك لكن دلوقتي انت أكدتلي اني معرفش أي حاجة حتى عن اقرب الناس ليا
= طيب أنتي معاكي حق في كل اللي بتقوليه و معاكي حق تعملي اكتر من كدا كمان بس وحياه اي حاجة حلوة بينا خلينا نأجل ونشوف الكارثة اللي احنا فيها،، انا عارف انه صعب بس عشان خاطري أنتي لازم تقبلي
تخيل ان الناس اللي انا عيشت معاها عمري كله عايزة تأ*ذيني والشخص اللي مش من الدنيا أصلا ولا اعرف هو جاي منين كان بيحبني
= عشان خاطري مش وقته الكلام دا،، عشان خاطري يا هند تعالي معانا للشيخ خلينا نعرف نعدي المشكلة اللي احنا فيها
" زعقت فيه وقومت وقفت
انا مش رايحة لأي حد ولا عايزة اعرفكو تاني،، انت فاهم ولا لا
= هنروح يا هند،، انا مش هسيبك تتأ*ذي بسببي،، هنروح وبعد ما المشكلة تخلص اعملي اللي أنتي عايزاه حتى لو هتضر*بيني بالنار انا موافق بس نعدي من المشكلة دي عشان خاطري يا هند،، خليني أحاول اصلح الغلط اللي انا عملته
#بقلم : #عمرو راشد
" كلامه كان مقنع وعشان كدا قررت اوافق و اروح معاه.. دخلت لبست ونزلنا روحنا عند الشيخ اللي بيقولو عليه.. كانت خالتي واقفة مستنية قدام باب البيت واول ما شافتني جريت عليا وكانت عايزة تحضني لكن انا بعدت عنها
ايه يا حبيبتي مالك انتي كويسة؟
= انا جيت بس عشان محتاجة افهم حاجات كتير لكن دا مش معناه اننا هنرجع زي الاول
نرجع زي الاول ازاي يعني؟
= اسألي ابنك
" دخلنا كلنا البيت وفضلنا قاعدين منتظرين دورنا،، كان في ناس كتيرة موجودة في المكان.. عدت ساعة لحد ما دخلنا جوا عنده،، كنت فاكرة اني هشوف راجل كبير و دقنه بيضا و لابس جلابية ولكن كل دا اتغير بمجرد ما شوفته لان شكله كان شخص عادي جدا زينا.. لابس بدلة دقنه خفيفة وشكله يبان انه محترم ومش زي الشيوخ التانية،، دخلنا واول ما شافني ابتسم وقالي
اتفضلي يا هند
" استغربت وسألته
انت عارف اسمي؟
= طبعا انا اعرف كل حاجة
وايه اللي انت تعرفه كمان؟
= السؤال ميبقاش كدا يا هند،، قصدك ايه اللي انتي عايزة تعرفيه كمان؟
انا مش عايزة اعرف حاجة
= يبقا انتي بتضحكي على نفسك،، لان مفيش سبب تاني انك تيجي هنا غير دا
وانت بقا دخلت جوايا وعرفت انا جاية هنا ليه؟
= من غير ما ادخل جواكي يا هند،، انا اعرف اشوف اللي قدامي كويس
وشايف ايه بقا؟
= شايف انك مش هادية ولحد دلوقتي مش مقررة هتعملي ايه،، متلخبطة بالإضافة كمان ان في اعجاب منك
اعجاب مني انا!!!
= هو دا اللي باين قدامي،، بصي يا بنتي انا هنصحك وانتي ليكي الحرية انك تسمعي نصيحتي او لا،، هارون مش سهل ومش بعيد يكون سامعنا دلوقتي اصلا،، هارون جرئ وجرأته دي هي اللي خلته يخرج من العروسة ويدخل في جوزك مروان،، والمفروض انه بيحبك،، والمفروض كمان ان قبيلته قلبت عليه وبيهاجموه،، نصيحة مني اهربي وسيبي البيت وخليني انا اتعامل معاه،، هارون لو اتمكن من جوزك مش هنعرف نسيطر عليه مهما عملنا
بس هو لحد دلوقتي معملش ليا اي حاجة وحشة
= ومش هيعمل لانه بيحبك بس اخر الحب دا ايه يا هند،، هتروحي تعيشي معاه في العالم ولا هو اللي يسيطر على جوزك ويعيش معاكي في العالم بتاعك وساعتها انتي تنسي مروان لانه مش هيرجع تاني
" عيوني دمعت وقولت
انا مش عارفة اعمل ايه،، انا حاسة اني بحبه
= صدقيني يا بنتي لو قبلتي بالوضع دا هتعيشي طول عمرك و أنتي ضميرك بيو*جعك على اللي هتعمليه في جوزك
بس هارون حاجة تانية.. هارون كان بيصلح اللي بيني وبين مروان،، هو مش عايز يأذ*ينا
= كونه انه يخرج من العروسة ويدخل في جوزك دا اكبر خطر ويثبتلك انه ممكن يعمل حاجات تانية كتير عشان كدا بقولك هو مش الشخص اللي أنتي بتشوفيه،، ويكون في علمك ان قبيلة هارون لو واحد منهم بس ظهرلك هيخلي حياتك جح*يم،، لأنهم اكيد مش هيسكتو وبعد ما هيزهقو من محاولاتهم مع هارون هينزلو على الأرض وهيظهرو ليكي
طب انا مطلوب مني اعمل ايه
= تهربي ومجرد ما هتخرجي من الشقة هدخل انا وبإذن الرحمن الموضوع هيخلص
وهارون؟
= هيتحرق
" مش عارفة دا طبيعي ولا لأ بس انا حسيت ان قلبي اتقبض مجرد ما سمعت الكلمة
دا مش حب يا هند،، اوعي تصدقي نفسك عشان لو صدقتي الله اعلم ايه اللي ممكن يحصل
" مشينا من عنده،، خالتي و بودي كانو بيتكلمو معايا بس انا في دنيا تانية تماما،، هو دا طبيعي اني اكون بحب جن ولا دا مش حب زي ما الشيخ قال،، ممكن اكون انا معجبة باللي بيعمله بس مش بيه هو،، والله ما عارفة،، انا محتارة أوي ومش عارفة اعمل ايه،، ركبت تاكسي و رجعت البيت،، طول الطريق وأنا بفكر لحد ما قررت اني لازم اتكلم معاه،، لازم اتكلم مع هارون،، رجعت البيت كانت الساعة 6 ونص،، دخلت جوا لقيت مروان نايم،، غيرت هدومي وخرجت قعدت برا في الصالة عدا ربع ساعة وحسيت باللي واقف ورايا وبيحط ايده على كتفي
هند
= كنت مستنياك
" جه وقعد قدامي
اظن انك عارفة كل حاجة دلوقتي
= ممكن افهم أنت عايز مني ايه؟
انا بحبك يا هند
= والحب دا اخرته ايه؟
انا لما حبيتك مفكرتش هيكون اخرته،، انا حبيتك من غير ما افكر في العواقب اللي ممكن تحصل ليا بسبب الحب دا،، انا الحب ممنوع في العالم بتاعي يا هند،، انا قبيلتي كلها غضبانة بسبب اني حبيت واحدة من الأرض ورغم دا انا لسة موجود معاكي عشان انا بجد بحبك،، انا اتحديت كتير صعبة ومستعد اتحدى اي حاجة عشانك انتي بس يا هند
" كلامه خلاني اتلخبط أكتر،، ضربات قلبي بدأت تزيد خصوصا لما مسك ايدي
انتي عايزاني امشي؟
" دموعي نزلت غصب عني لكن هو مسحهم وطبطب عليا
انتي غالية اوي يا هند ومقامك غالي عندي،، صعب عليا اشوف دموعك بتنزل
= بس انا مش عارفة اعمل ايه
اعملي اللي قلبك بيقولك عليه،، لازم تختاري يا هند وبسرعة عشان...،، عشان انا وقتي مبقاش كتير على الأرض
= يعني ممكن تمشي؟
مش هيكون بإرادتي صدقيني،، انا عارف انك روحتي ل قاسم وعارف كمان هو قالك ايه،، القرار في ايدك يا هند
" قام من قدامي ولسة هيدخل الأوضة لكن فجأه الباب خبط لقيته بص ليا وعنيه كانت كلها غضب وقالي
متفتحيش الباب يا هند،، متفتحيش الباب،، اللي برا دول مش اهلك،، فاهماني!!!
بدل ماتدور وتبحث علي الروايات خليها علي تليفونك وحمل تطبيقنا
