.jpeg)
رواية انا وابن خالتي الفصل الرابع بقلم عمرو راشد
نمت ازاي يا حبيبي.. بقولك انت كنت قاعد معايا امبارح.. مروان احنا دخلتنا كانت امبارح لو فاكر
= انا مش فاكر اي حاجة من الكلام دا،، انا امبارح رجعت ملقتكيش في البيت،، غيرت هدومي ونمت وبس كدا
" اتعدلت من مكاني ورديت عليه وأنا مصدومة
= نمت ازاي،، اومال مين اللي كان معايا امبارح دا
انتي متأكدة اصلا من اللي بتقوليه دا ولا شكلك كنتي بتحلمي
= ماهو انا اكيد مش مجنونة عشان معرفش افرق بين الحلم و الحقيقة.. انت امبارح كنت معايا وكنت شايفاك زي ما شايفاك دلوقتي كدا ولمستك كمان،، انا مش فاهمة ازاي انت مش فاكر
عشان انا فعلا مش فاكر اي حاجة من دي
= مروان متجننيش.. انت عايز تفهمني ان دي حاجة ممكن تتنسي عادي
لا مش عادي بس ساعات لما بيكون نفسنا في حاجة معينة ومش عارفين نعملها أو نحققها بنتخيل انها حصلتلنا فعلا بس عن طريق العالم الافتراضي اللي بيكون في دماغك زي تهيؤات كدا
= اه يعني عايز تقول اني مجنونة؟
يا حبيبتي مقصدش بس..
= طب قوم معايا بقا لو سمحت عشان اثبتلك اني مش مجنونة.. الاكل والتجهيزات اللي انت كنت عاملها امبارح اكيد لسة موجودة زي ما هي.. تعالى معايا
" قومت بسرعة وشديته من ايده وخرجنا برا الأوضة وانا بشاورله على السفرة والحاجات اللي كانت عليها
بص بقا اهو زي ما قو....
" المفاجأه ان مكنش في اي حاجة على السفرة ولا اطباق الاكل ولا الشموع.. جريت على المطبخ بسرعة لكن برضو ملقتش حاجة،، رجعت وفضلت واقفة جنبه لحد ما لمحت الشموع اللي كانت موجودة امبارح.. كانت جنب التليفزيون،، روحت جبتها
اهو بص هي دي اللي انت كنت حاططها على السفرة امبارح
= بس يا حبيبتي الشمعة دي مفيهاش ريحة اي نار
يعني ايه
= يعني عمرنا ما استعملناها أصلا،، زي ما قولتلك يا حبيبتي انتي جايز كنتي بتحلمي
يا مروان والله لا كل دا حصل بجد
= طيب نتكلم في الموضوع دا لما ارجع عشان متأخرش
" دخل و اخد دش بعدها خرج لبس هدومه ونزل،، وانا كل دا قاعدة في مكاني في الصالة متحركتش،، ماهو اكيد انا مش مجنونة و مروان معندوش زهايمر عشان ينسا كل اللي حصل دا وبعدين لو هو زهايمر فعلا مكنش قال انه رجع نام.. كان المفروض ميفتكرش حاجة اصلا،، يارب هو انا كل ما اقول أنها هتتحل ترجع تتعقد اكتر،، حاولت انسا وقومت فطرت وبعدها بدأت احضر الغدا عقبال ما مروان يرجع من الشغل،، خرجت استريح شوية لقيت خالتي بتكلمني
خلاص عشان اتجوزتي نسيتي خالتك
= وانا اقدر برضو يا قمر انتي
ماهو باين عشان كدا حتى مبتتصليش تسألي عليا
= حقك عليا يا حبيبتي بس كنت مشغولة شوية اليومين اللي فاتو دول
خير في حاجة ولا ايه؟
لا بس انتي عارفة بقا الجواز و مسؤولياته
= هو انتي لحقتي يا هند؟،، دا انتي بقالك شهرين
ماهو شهرين مش قليل برضو يا خالتو
= طب والبيه بتاعك عامل معاكي ايه
مروان كويس والله.. كلنا كويسين الحمدلله
= طب ما تيجي تقعدي معايا شوية
معلش يا خالتو والله مش هينفع النهاردة خليها يوم تاني
= اه ماهو جوزك هيمنعك عننا بقا
والله لا بس..
= مفيش بس،، كلميه وقوليله وتعالي،، انا مستنياكي
" قفلت معاها وفعلا كلمت مروان وطبعا كان الرد بتاعه معروف
لا يا هند.. انا قولت مش هتروحي هناك غير وانا معاكي أو لما ابن خالتك ميكونش هناك غير كدا لا
" رجعت اتصلت بيها تاني
شوفتي قولتلك مش هيوافق،، انا عارفة مروان كويس
= هو ايه مالو.. هو بيغير مننا ولا ايه؟
لا عادي بس هو بيحبني اقعد في البيت يعني
= خلاص يا حبيبتي مش مشكلة،، لما يوافق ابقي تعالي
" مجرد ما قفلت معاها لقيت بودي جاي يجري وقعد جنبي
هااا جاية ؟
= لا.. الزفت بتاعها موافقش
انا مش فاهم هو بيرفض ليه
= سيبه خليه يرفض براحته.. اصل دا نوع من الرجالة مبيحبش ييجي بالذوق،، قوم هاتلي العروسة من جوا
" قام دخل الأوضة وجاب العروسة وخرج.. مسكتها وعملت زي ما بعمل كل مرة واستنيتها تتصل زي كل مرة برضو.. دقيقة واتنين وتلاتة وخمسة لحد ما عدا ساعة ومفيش أي حاجة حصلت،، بصيت ل بودي بإستغراب
هو في ايه؟
= جايز يكون وافق بس هي مشغولة
وهي من امتا هند بتنشغل عننا.. طول عمرها حتى لو مشغولة بتسيب اللي في ايدها وبتيجي عندنا
= طب ما تتصلي تشوفيها
لا مقدرش.. ممكن تشك
= هتشك ف ايه بس،، جربي يا ماما مش هيحصل حاجة
" سمعت كلامه و اتصلت فعلا ب هند
ايوا يا خالتو
= ايه يا حبيبة خالتو.. انا قولت اطمن يمكن يكون غير رأيه زي كل مرة
" كنت بضحك وانا بتكلم عشان متاخدش بالها من اي حاجة.. ردت هي كمان وهي بتضحك
لا متصلش والله يا خالتو
= ماشي يا حبيبتي.. ابقي استأذني منه تاني لما يرجع وتعالي
" قفلت وبصيت ل بودي بقلق
مروان مكلمهاش
= يعني ايه بقا
مش عارفة.. جايز تكون صدفة
= صدفة ايه يا ماما هي اول مرة نستخدمها ولا ايه
قصدك المفعول راح يعني
= يا ماما دا سحر مش مضاد حيوي،، مستحيل موضوع ان مفعوله يروح دا
انا كدا بدأت اقلق
= طب هنعمل ايه؟
لازم اروح للشيخ
" الساعة كانت 8 بليل ولقيت مروان داخل من باب الشقة.. جريت عليه وحضنته
حمدالله على سلامتك يا زوجي العزيز
= الله يسلمك يا احلى و احن زوجة في الدنيا
احضرلك الاكل
= ياريت عشان جعان جدا
عقبال ما تغير هدومك اكون انا جهزت الاكل
" دخلت المطبخ وبدأت احضر الاكل وحطيته على السفرة بعدها مروان خرج وقعدنا ناكل،، كان باين عليه انه تعبان جدا ومش قادر حتى يفتح عينه،، كلامه كان قليل دا اذا كان اتكلم اصلا،، وبمجرد ما خلص اكل دخل ينام علطول،، دخلت حطيت الاطباق في المطبخ وغسلتهم.. بعدها دخلت خدت دش وغيرت هدومي ووقفت قدام المراية شوية.. كنت بتأمل ملامحي وشكلي،، بين كل فترة والتانية بحب اعمل كدا عشان اشوف مدى تأثير الفترة دي عليا كان ايه،، خلصت ولسة ببص ورايا لقيت مروان واقف.. اتخضيت
انا كنت لسة سايباك نايم في الأوضة،، صحيت امتا؟
= دلوقتي
وصحيت ليه؟
= عشانك
عشاني؟
= اه عشانك يا هند
كنت جاي شكلك تعبان أوي
= حتى لو تعبان دا ميمنعش اني اقعد معاكي شوية
غريبة يعني
= ايه الغريب فيها؟
اصلك عمرك ما عملتها
= لا من النهاردة هعمل كتير متقلقيش
ايوا وتصحا الصبح مش فاكر صح
= عادي يا هند انا ساعات بنسا شوية حاجات كدا
حتى الحاجات اللي ما بينا
= دي محفورة في قلبي عشان كدا عمري ما انساها،، استني دقيقة وجاي
" دخل الأوضة وبعدها بثواني لقيته خرج و جايب في ايده حاجة بس مخبيها ورا ضهره،، ابتسمت وقولت
ايه دا؟
= غمضي عينك
" غمضت عيني فعلا بعدها حسيت ب ايده على رقبتي
ايه رأيك؟
" فتحت عيني،، كانت سلسلة على شكل فراشة كان شكلها حلو أوي ،، لبستها حضنته
بحبك أوي يا مروان
= انا كمان بحبك أكتر يا روح قلب مروان
#بقلم : #عمرو راشد
" قضينا الليلة دي كمان مع بعض.. صحيت تاني يوم ملقتوش جنبي.. اتصلت بيه
ايه يا حبيبي انت فين ؟
= في الشغل
بدري كدا!!،، دا انت نازل حتى قبل معادك
= يا حبيبتي قولتلك امبارح اني هصحا بدري اومال انا دخلت نمت بسرعة ليه
ما انت صحيت تاني يا حبيبي
= صحيت امتا دا ؟
بعدها صحيت وقعدنا مع بعض
= لا محصلش
محصلش!!،، تاني يا مروان!!!
= طب بقولك ايه يا حبيبتي.. خلينا نتكلم لما ارجع
" قفلت معاه وقومت من السرير،، هو في ايه،، هو ازاي بينسا كل حاجة كدا،، بس لا دا مش كل حاجة،، هو بينسا حاجات معينة،، حاجات مينفعش تتنسي.. انا بجد هتجنن،، فضلت قاعدة افكر في الموضوع لاني مش عارفة اتجاهله زي امبارح لان بالشكل دا اكيد في حاجة غلط،، في الوقت دا كانت خالتي بتتصل،، تجاهلت كل مكالماتها لاني مكنتش قادرة ارد على اي حد،، بالعافية قدرت اقوم احضر الغدا لحد ما يرجع مروان وافهم منه اللي بيحصل دا ايه.. كانت برضو خالتي لسة بتتصل و برضو انا مردتش عليها لحد ما الوقت جري وبقت الساعة 6 ونص ولقيت مروان رجع،، دخل و بص ليا باستغراب
اول مرة متجيش تستقبليني يعني
= لا عادي
" جه وقعد جنبي
مالك يا نودي فيكي ايه
= مش فاهماك بصراحة يا مروان
مش فاهمة ايه يا حبيبتي
= هو امبارح حصل ايه بينا
محصلش حاجة.. انا رجعت من الشغل و كلت ونمت
= ماشي وبعدين
بعدين ايه بقولك نمت
= لا يا مروان انت صحيت بعدها
لا مش فاكر حاجة زي كدا
= انا فاكرة.. انت صحيت بأمارة لما كنت واقفة قدام المراية
يا حبيبتي هصحا ازاي وانا اساسا راجع مش قادر اقف من كتر التعب
= طب فاكر الهدية؟
هدية؟؟؟
" لما بصيت على رقبتي ملقتش السلسلة
ايوا انت جبتلي سلسلة امبارح هدية
= هند انتي بتتكلمي عن حد تاني.. دا اكيد مش انا
" قومت من مكاني وصوتي بدأ يعلى
لا ماهو انا مش مجنونة.. انا متأكدة من كل كلمة انا بقولها
" مروان قام ومسك ايدي
طب اهدي،، ممكن تقوليلي هي فين الهدية دي؟
" جريت على الأوضة وبدأت ادور في كل مكان.. كنت عاملة زي المجنونة،، لحد ما لقيت العلبة اللي كان فيها السلسلة.. مسكتها ولثواني حسيت بإنتصار.. بصيت ورايا
اهي يا مروان. اتفضل عشان تعرف اني مش مجنونة،، انا قولتلك شكلك انت اللي جالك زهايمر بدري
" كنت بضحك ولكن مكملتش الضحكة لاني سمعته بيقول
والوصل اهو موجود كمان بس الوصل مكتوب بإسمك يا هند،، انتي اللي اشتريتي السلسلة دي؟
" رديت وانا في حالة ذهول تام
ازاي؟؟
= شوفي بنفسك
" مسكت الوصل وقعدت على السرير.. فعلا اسمي مكتوب،، بس يعني ايه،، مروان قعد جنبي وطبطب عليا وقالي
حبيبتي احنا لازم نروح ل دكتور
" بصيتله وانا مش قادرة انطق.. مش عارفة اتكلم،، مش عارفة اقول ايه
أنتي بقالك يومين فيكي حاجة مش مظبوطة.. من رأيي نروح ل دكتور عشان لو في مشكلة نلحق نحلها
" رديت عليه والدموع نازلة من عيني
بس انا مش مجنونة يا ممروان
" خدني في حضنه وطبطب عليا
انتي ست العاقلين،، قط*ع لسان اللي يقول عليكي غير كدا.. احنا بس هنروح نطمن عليكي ومش عايزك تقلقي ولا تخافي من اي حاجة،، انا جنبك
" في اللحظة دي مكنش عندي اي حل غير اني انام وفعلا نمت وهو نام جنبي و اخدني في حضنه.. صحيت كانت الساعة 12 بليل.. قومت بهدوء وخرجت برا.. مسكت التليفون لقيت اكتر من 25 مكالمة من خالتي.. كنت لسة هتصل بيها لكن هي رنت تاني و التليفون في ايدي،، رديت عليها
ايوا يا خالت
= هند انتي كويسة يا حبيبتي؟
" صوتها كان مرعوب جدا
ايوا كويسة يا خالتو،، معلش انا كنت نايمة مسمعتش التليفون
= أنتي لوحدك؟
لا مروان معايا بس نايم جوا،، هو في حاجة ولا ايه قلقتيني؟
= طب البسي اي حاجة وتعالي حالا
البس ايه و آاجي ازاي يا خالتو.. الساعة 1 بليل،، قوليلي بس في ايه؟
= يا هند اللي معاكي في البيت دا مش مروان
" في نفس اللحظة لمحت خيال واقف ورايا.. بصيت بسرعة لقيت مروان واقف ومبتسم
بتكلمي مين يا هند؟
