 |
رواية فرعون الجزء الثاني 2 الفصل الرابع عشر 14 بقلم ريناد يوسففرعون 2 البارت الرابع عشر 14 قاسم وجواهر وصلو شرم ونزلو فالاوتيل وقاسم اخدها ونزلو يتمشو شويه قاسم :متمدى ياجواهر مالك بتتلكعى كده ليه ! جواهر :ياقاسم كفايه لف حرام عليك رجليا فئفئت وطلعلى كالو فرجلى خلينا نرجع الاوتيل .. قاسم :لا لسه شويه ربع البلد لسه فاضل مشفنهوش ،مهو اصل انا مش هروح بيكى غير وانتى مفرهده من كتر المشى ،عشان لما نوصل اوضتنا تكونى اتهديتى شويه وتبطلى مصارعة التيران اللى بتعمليها دى كل اما اقربلك ... جواهر :.............. قاسم :برضو ساكته ومش بتردى عليا ! ياجواهر انا عايزك تصارحينى بكل حاجه وانا هتفهم ظروفك والله ... يعنى مفهاش حاجه لما تقولى ياقاسم انا ملبوسه وعليا عفريت وهو اللى بيعمل كده لما تقربلى ، هخليكى تجيبيه ونقعد احنا التلاته ونوصل لحل مع بعض ... هقوله سيبلهالى يوم وانتا يوم ..وانا ياعم فيومه همشى واسيبلكم الشقه خالص .، لكن شغل الانانيه والسلبطه بتاعته دى متنفعش معايا اه قوليلو كده .. جواهر بصت لقاسم وعنيها دمعت قاسم بخضه :ايه بتعيطى ليه قالك هيموتنى صح؟ قوليلو قاسم اسف بسرعه بسرعه . جواهر اتنهدت تنهيده من قلبها خلت قاسم ملامحه اتغيرت من الهزار والضحك للألم والحزن على حبيبته اللى بتتألم قصاده ومش قادر يعرف سبب الالم دا ايه .... جواهر كتفت اديها على صدرها ومشيت من جمب قاسم وهى باصه قدامها على المجهول ،وقاسم ثوانى وحصلها ومشى جمبها ،والاتنين ساكتين من بعدها محدش نطق مع التاني بحرف . ********* ليل جابت لغريب كباية عصير بناء على طلبه وقدمتهاله وهو طلب منها تمسكهاله فأيده وعملت كده . غريب بأبتسامه :ليل ممكن تروحى مع ناديه تساعدو ماما تغير هدومها وتنزلوها عشان نروح للدكتور ؟ ليل :تحت امرك ياسى غريب . غريب :متشكر اوى ياليل بتعبك معايا . ليل :تعبك راحه ياسى غريب ..يلا ياناديه بينا . ناديه طول الوقت مراقبه غريب وتعابير وشه والسعاده اللى باينه عليه وهو بيتكلم مع ليل ،وقامت اول ماليل اتكلمت تخطتها وطلعت على فوق قدامها من غير ماتنطق بكلمه .. ليل طلعت وراها وجهزو سميه ونزلوها هما الاتنين ووصلوها العربيه وطلعوها وناديه طلعت معاها فالكرسى الورانى وغريب قعد قدام جمب عم طه .. غريب :بقولك ايه ياليل ماتيجى معانا ربما ناديه تحتاج مساعده هى وماما .. ردت ناديه بسرعه وبعنف :لا ملوش داعى انا كفايه، هى هتيجى تعمل ايه ملهاش لزوم جيتها ؟ ليل مشيت بسرعه وكسوف من رد ناديه عليها ورجعت على الفيلا من غير كلام .. ناديه : يلا اطلع ياعم طه . غريب سكت وباين على ملامحه الديق ومتكلمش طول الطريق وسميه بصت لناديه بصة عتب ناديه فهمتها ، لكنها بصت على الطريق وتجاهلت نظرات امها خالص . غريب طلع تليفونه وفتحه ببصمة الصوت واتصل على نادر وطلب منه يروحلهم عند الدكتور واداله العنوان ونادر بالفعل اتحرك ووصل قبلهم واستناهم هناك . ناديه فالطريق مستحملتش زعل غريب منها واتكلمت بنفاذ صبر : ايه ياغريبو هتفضل زعلان وقالب وشك كده كتير ؟ انا من وجهة نظرى مش شايفه انى غلطت يعنى ، انا قلت انى مش محتاجه مساعده وان الموضوع مش مستاهل بس ...واصلا الموضوع كله مفيهوش حاجه تزعل كده . غريب :لأ ياناديه وجهة نظرك غلط ، وعلى فكره انا مطلبتش من ليل انها تيجى معانا بغرض مساعدتك انتى وماما وبس، انا كنت حابب انها تخرج وتغير جو وتشوف الدنيا ،وخصوصا ان بقالها كتير محبوسه بين اربع حيطان، وكمان صحبتها الوحيده سابتها وفضلت لوحدها ... الوحده صعبه جدا ياناديه ميحسش بيها الا اللى جربها وعشان كده ليل صعبانه عليا جدا .. ناديه :اذا كان على الوحده فليل متعوده عليها ومن يومها وهى لوحدها ،يعنى مش حاجه جديده ، واذا كان على صعبانه عليك دى نبقى نعملها رحله مخصوص للست ليل ونفسحها ونبسطها ونضيع الوحده اللى هى عايشه فيها ... سميه :ناديه ! ناديه سكتت ورجعت بصت على الشباك بضيق . غريب هز دماغه بعدم تصديق :سيبيها ياماما انا اصلا مستغرب مين اللى بتتكلم بالاسلوب والقسوه دى ، دى اكيد مش ناديه دى وحده تانيه بس انا عشان اعمى مش شايفها .. ناديه بندم :غريبو والله انا مقصدتش ازعلك انا .... غريب :خلاص ياناديه اسكتى لو سمحتى .. ناديه بصت لسميه اللى هزتلها دماغها بعدم رضا و ناديه عنيها رغرغت ورجعت بصت لغريب اللى ملامحه اتغيرت كليا بعد الكلام دا، وحتى عم طه شافته باصصلها بصة لوم فالمرايه والكل زعلان منها وهى شايفه انها معملتش حاجه لكل دا.. وصلو العياده ونزلو وناديه سندت امها وعم طه اصر انه يمسك ايد غريب ويطلعه لان المكان غريب عليه واول مره يدخله ... وصلو صالة الانتظار ولقو نادر مستنيهم وغريب طلب من طه السواق انه يرجع الفيلا عشان باباه عاوزه فمشوار مهم وهما هيرجعو مع نادر فعربيته. شويه ودخلو سميه اوضه عشان يفكولها الجبس وكلهم دخلو معاها وغريب قعد جمبها على كرسى وفضل ماسك ايدها طول ماهما بيفتحو الجبس ومسابهاش .. بعد ماخلصو الدكتور طلب منهم يعملو اشعه على رجل سميه عشان يطمنو ان كل حاجه تمام . سميه نزلت من على السرير لكن اول ماحطت رجلها على الارض حست بألم فظيع ومقدرتش تخطى خطوه وحده وقعدت تانى .. الدكتور بيطمنهم :دا عادى هتفضلى حاسه بالالم دا فتره بسيطه وهيروح مع الحركه، ووحده وحده رجلك هترجع لحركتها الطبيعيه، متنسيش انه كسر مضاعف وصعب شويه .. غريب :نادر شيل ماما وديها اوضة الاشعه لو سمحت .. الدكتور :انا هروح وابعتلها عامل بكرسى متحرك مفيش داعى تتعبو .. وخرج لكنهم استنو شويه كتار ومفيش حد جه .. نادر قام وقف بعد ماكان باصص فتليفونه قفله وحطه فجيبه :الظاهر محدش جاى والواحد مش طايق قعدة العياده دى تعالى انا هوديكى للاشعه ... وشال امه وراح بيها على الاوضه عملت الاشعه والموضوع مأخدش وقت وشالها عشان يرجعها ،وهو راجع امه مدت ايدها ومشتها على خده بحنان وهمستله : وحشتنى اوى يانادر . نادر وقف وغمض عنيه للمسة امه لثوانى استسلم فيها لمشاعره واشتياقة لحنانها وضمها لصدره اكتر وهى حاوطت رقابته بحب ورفعت دماغها شمت ريحته وغمضت ودمعه نزلت من عنيها .. نادر فتح وبص لامه ورجع افتكر كل حاجه عملتها وافتكر خسارته لاخوه دياب بسببها ،وخسارة غريب لنور عنيه وحالة ابوه ومشى بيها بخطوات سريعه، وملامحه اتكست بغضب خلى سميه تبعد اديها من ححوالين رقابته بخوف ... اثناء ما هما ماشيين فالطرقه لقو عامل جايب كرسى وجاى عليهم :معلش اتأخرت عليكم مكنش فيه كرسى فاضى استنيت لما فضى وجبته ... نادر اتخطاه ومردش عليه ووصل عند الاوضه وبصلهم : انا هنزل وانزلها فالعربيه، تطلع الاشعه وروها للدكتور وحصلونى على تحت ... ونزل و العياده كانت فالدور التانى واول ماوصل العربيه طلب من امه سميه تفتح الباب وعملت كده وهو دخلها بالراحه ووقف سند على العربيه ولبس نضارته وربع اديه وهو باصص للفراغ ،وسميه مشالتش عنيها من عليه ومش ملاحقه على الدموع اللى نازلين منها. شويه وغريب وناديه نزلو سوا ناديه كانت ماسكه الاشعه بأيد، وبتحاول تمسك ايد غريب بالايد التانيه، لكنه كان بيشد ايده منها وبيمشى لوحده بمساعدة عصايته ،ودا خلاها هتتجنن عشان غريب اول مره يعاملها كده، وفضلت تسأل نفسها كذا مره هى عملت ايه لدا كله وكل مره مكنتش شايفه انها عملت حاجه تستاهل . ركبو العربيه وراجعين على الفيلا والكل ساكت محدش نطق بكلمه مع التانى طول الطريق .. ********** فى الفيلا ماهر :عم طه عاوزك تروح البلد لداده سميره وتجيبها معاك ولو رفضت ولا اتحججت بأى حجه تشيلها هيلا بيلا وتحطها فالعربيه غصب عنها وتجيبها وتيجى سامع ؟ طه :امرك ياماهر بيه عن اذن حضرتك .. ماهر :روح علطول عشان تلحقو تيجو قبل الليل ... طه :حاضر ...واتحرك من قدام ماهر راح ركب عربيته واتوجه على بلد سميره .. جميله دخلت المطبخ شافت ليل واقفه بتطبخ والخدامين بيساعدوها لكن هى اللى واقفه على البوتاجاز جميله :الله الله على الروايح الحلوه اللى قالبه الفيلا دى ...بتعملى ايه ياشيف ليل ! ليل :لقيت حالى فاضيه ولقيتك مقعداشى قولت اتسلى فطبيخ الغدا لغاية ماتاجى ياخاله .. جميله :تسلم ايدك ياحبيبتى ريحة الاكل جابتنى من اوضتى طايره ، بنت جنه بصحيح ...وقال ايه تقولى علمينى ياخالتى جميله ..دانتى اللى تعلمينى ليل : وه كل ديه من الريحه !طيب استنى لما الوكل يطيب وتدوقيه مش يمكن طعمه غير ريحته . جميله :لأ طبعا الحاجه الوحشه متطلعش منها ريحه حلوه ابدا ..والحلو ميعملش الا الحلو اللى زيه . ليل :ربنا يخليكى ياخاله جميله ويجبر بخاطرك ...والله منا عارفه من غيرك انتى و جواهر كنت هعمل ايه ولا هروح وين . جميله :متقوليش كده ياليل انتى فغلاوة جواهر بالظبط عندى وربنا اللى يعلم ...وجميل جنه امك هيفضل دين فرقابتى لحد مااموت . ليل :ربنا يديكى طولة العمر والصحه يارب .. جميله طبطبت على خد ليل بحنان وبعدها راحت على الحلل تفتح فيهم وتشوف ليل عامله ايه ريحته بالجمال دا .. غريب ونادر وناديه وسميه وصلو الفيلا نادر نزل وشال سميه ودخلها الفيلا وهيطلع بيها لفوق .. غريب :نادر متطلعش ماما فوق هنتغدى كلنا مع بعض النهارده . نادر نزل سميه وقعدها على اقرب كنبه واللى كانت قاعده عليها ناديه . غريب سابهم وراح على اوضة باباه خبط على الباب ودخل بعد ماماهر اذنله بالدخول .. ماهر :حمدالله بسلامتك ياحبيبي غريب :الله يسلمك يابابا وراح قعد جمبه على السرير ، ماهر بصله وديق عنيه لما شاف غريب مش قاعد على بعضه .. ماهر :عاوز تقول ايه ياغريب ومتأكد انه هيدايقنى ومتردد تقوله .. غريب بضحكه :دايما فاقسنى انتا . ماهر :عيب عليك دنا بابا . غريب :طب بص بقا يابابا ، ماما سميه هتتغدى معانا وهتكون معانا كل يوم على السفره فبعد اذنك مش عاوز حضرتك تدايقها بكلمه او تحسسها انها مش مرغوب فيها وسطنا .. ماهر :ياغريب بس انا مطلقها ومينفعش نجتمع انا وهى فمكان واحد وبعدين بصراحه غير دا ودا انا مش طايق اشوف الانسانه دى قدامى ولا حتى بستحمل اسمع سيرتها عاوزنى استحمل اقعد وهى فوشى ٣ مرات فاليوم ازاى يعنى ؟ غريب :اولا حكاية حرام وحلال دى اظن حضرتك لما فضلت سنين مش معتبرها زوجه وهاجرها ومش معترف بان ليها اى حقوق عليك كزوجه فدا حرمانيته اكبر واقوى ... وبعدين فيه مابينكم اولاد ..وبعدين كمان حضرتك لازم تستحمل وجودها عشان خاطر نادر وناديه ، صدقنى يابابا هما اه مش باين عليهم انهم بيتعذبو من بعدهم عنها ولا مقاطعتهم ليها مأثره فيهم بس اللى جواهم غير كده صدقنى انا اكتر واحد عارف وحاسس باللى جواهم ماهر :عاوز توصل لايه ياغريب بالظبط ؟ يكون فعلمك انا وسميه من رابع المستحيلات اننا نرجع لبعض عشان تبقا فاهم بس وتخلى دا قدام عنيك دايما .. غريب :متقلقش وهى كمان رأيها نفس رأي حضرتك وموقفها نفس موقفك . ماهر اتنهد :اعمل اللى يريحك ياغريب عموما انا هاكل فاوضتى ومش هقعد على السفره تانى ..هاه ارتحت . غريب :لأ طبعا مش هو دا الحل ، كده نادر وناديه هيحملو ماما سميه سبب انعزالك لوحدك وبكده الفجوه اللى عايزينها تنسد مابينهم هتكبر اكتر ..لو سمحت يابابا مشى كل حاجه عادى وتجاهل وجودها وبس مش عايز منك اكتر من كده عشان خاطرى . ماهر : حاضر ياغريب عشان خاطرك انتا انا مستعد اعمل اى حاجه .. غريب بفرحه :ربنا يخليك ليا يااجمل اب فالدنيا .. ماهر طبطب على رجل غريب بحب وغريب قام وطلع من الاوضه وهو فرحان لان كل حبايبه هيتجمعو على سفره وحده وكمان اللى مضاعف فرحته ان ليل هتكون معاهم على نفس السفره .. ********* غريب نادى على نادر سميه قالتله انه دخل اوضتهم خبط ودخل الاوضه وقفل الباب وراه وقعد جمب نادر على السرير .. غريب :نادر ..نادر ا انتا لحقت نمت يبنى ؟ نادر بتنهيده :لا ياحبيبي لسه صاحى . غريب :وايه نبرة الشجن اللى فصوتك دى ..ايه يابنى الحب مبهدلك اوى كده ولا ايه ؟ انا كنت باسمعهم بيقولو الحب بهدله برضو .ايه البنت بتتقل عليك ولا ايه ؟ نادر :تقل ايه بس ياغريب انا لسه فمرحلة اقولها مقولهاش ومكلمتهاش لحد دلوقتى . غريب :يابرود قلبك يااخى طب ومستنى ايه لحد دلوقتى ؟ ياكش واحد يسبقك ويكلمها ويصارحها بحبه قبلك ويخطفها وتقعد انتا تغنى ظلموه .. نادر اتعدل بسرعه وقعد على السرير :تفتكر ممكن دا يحصل . غريب :وايه اللى مش هيممكنه كل حاجه ممكن وجايز فالدنيا دى . نادر بلهفه :طب بقولك ايه ياغريب فيه حد بينده عليك بره روح شوف عاوزك ليه بسرعه ... غريب :والله! توزيعه دى صح ؟ نادر :ايوه صح واخرج بسرعه خلينى الحق اكلم البنت واحجز قلبها قبل ماحد تانى يسبقنى قلقتنى ..هتخرج ولا اتكلم قدامك غريب بضحكه :لا وعلى ايه خارج ياعم ربنا امر بالستر ... غريب خرج ونادر اتصل بسرعه على اميره وهو جرس واحد ولقاها بترد عليه بصوتها الانثوى الجميل ..الووو نادر :اميره ؟ اميره :ايوه مين معايا ؟ نادر :انا نادر يااميره اميره :اهلا نادر ، اخباركم عاملين ايه ، طبعا مش هسألك جبت نمرتى منين لانك اكيد اخدتها من ناديه شيئ بديهى طبعا .. نادر : اولا احنا الحمد لله بخير ، ثانيا اه اخدته من ناديه، ثالثا هو انتى ادايقتى عشان كلمتك ؟ اميره :لا وهدايق ليه عادى يعنى ... نادر :طب الحمد لله .. فترة سكوت وتوتر مابين الاتنين قطعها نادر :اميره انا .. وبعدها سمع اميره بتكلم مريم امها.. دا نادر ياماما ...اه بيقول كلهم تمام ...خدى معاكى اهو ...نادر انحرج من مريم والموقف اللى اميره حطته فيه لكنه فرح جدا لانها مكذبتش على امها وقالتلها علطول بمنتهى الصدق مين اللى بيكلمها، ودا دليل على انها مبتخبيش حاجه على امها ودا علاها فنظره كتير ... مريم:ايوه يانادر اخبارك ياحبيبي واخبار اللى عندك كلهم . نادر :احنا تمام ياطنط الحمد لله حضرتك عامله ايه وكلكم عاملين ايه .. مريم :احنا كلنا بخير ياحبيبي الحمد لله .. نادر :طنط حضرتك اكيد بتسألى نفسك انا متصل بأميره ليه ...بصى انا هكلمك بصراحه...انا حاسس بمشاعر ناحية بنت حضرتك واتصلت بيها عشان اقولها كده واصارحها بمشاعرى، واشوفها لو كانت بتبادلنى نفس الشعور ولا لأ ...وطبعا غرضى شريف . مريم بأعجاب لصراحة نادر واخلاقه :اه بس اميره لسه بدرى على الكلام دا دى لسه فتانيه كليه وقدامها لسه سنتين ومينفعش انها ترتبط دلوقتى خالص .. نادر :ياطنط بس اعرف مشاعرها الاول وان فيه قبول، وكل حاجه محلوله بعد كده ومش هنختلف بأذن الله .. مريم :طيب معاك اميره اهى اتكلم معاها وشوفو الدنيا فيها ايه ... وادت التليفون لاميره وهى مبتسمه وخرجت وقفلت الباب وراها . اميره :ايوه يانادر .. نادر :اظن سمعتى كلامى مع والدتك يااميره . اميره :ايوه سمعتك وانتا بتعترف لماما بحبك ليا قبل ماتعترفلى انا شخصيا ... نادر :محبتش انها تاخد فكره وحشه عنى او عنك من البدايه وحبيت كل حاجه تكون فالنور وقدام الكل ... اميره انا بحبك وعايز اتجوزك على سنة الله ورسوله .. اميره :خبط لزق كده ! نادر :ايوه خبط لزق كده قولتى ايه ؟ اميره :ايوه بس الموضوع دا مش فأيدى لوحدى اكيد كل حاجه فايد بابا وماما فالاول وفالاخر يعنى .. نادر :بس انتى قوليلى ان فيه قبول وطمنى قلبي وسيبي الباقى عليا انا .... وكمل بلهفه هاه قولتى ايه ؟ اميره بخجل :خلى قلبك يطمن ...وقفلت السكه بسرعه ... نادر بفرحه :بجد يااميره ...الو....اميره ....يامجنونه ...الو ياترانك اميره وافقت ...والنبى لمزغرت لنفسى ...لولولولولولى ************* جميله بصت لقت ليل تقريبا طبخت وخلصت كل حاجه :طيب ياليل اساعدك فأيه مش عاوزه اى مساعده منى ؟ ليل :له ياخاله تسلميلى انى خلاص يعتبر خلصت كل حاجه وموطيه عالوكل عشان يطيب على نار هاديه ويبقى اطعم والذ .. جميله :طيب ياحبيبتى مدام كده انا هروح اشوف عمك ماهر لو عايز حاجه واجيلك ... ليل :براحتك خالص ياخاله متشغليش بالك انى هغرف فمعاد الغدا وانادم عليكى ارتاحى انتى بس ومتعوليش هم حاجه واصل .. جميله :ربنا يخليكى ياليل ويريح قلبك يارب ....وسابتها وراحت لماهر سألته لو عايز حاجه قالها متشكر مش عايز اى حاجه هنام شويه وابقي صحينى على الغدا ... خرجت جميله راحت على اوضتها ومنسيتش وهى ماشيه تدى لسميه نظره ناريه قبل ماتتخطاها . جميله دخلت الاوضه وقعدت على السرير وسمعت تليفونها بيرن راحت عليه بسرعه مفكره جواهر هى اللى بتتصل طلعت ماجده ام قاسم .. جميله : السلام عليكم . ماجده :وعليكم السلام عامله ايه ياجميله ياحبيبتى وكل اللى عندك عاملين ايه .. جميله :بخير ياحبيبتى انتو عاملين ايه .. ماجده الحمد لله فنعمه ...وبعدها اتكلمت بتردد ...أاااجميله هى جواهر اتكلمت معاكى فحاجه كده ولا كده ولا قالتلك فيه حاجه مدايقاها هى وقاسم ولا حاجه ؟ جميله بقلق :لا ابدا بالعكس انا كلمتهم يوم الصباحيه عالضهر وقاسم اللى رد عليا وقالى جواهر فالحمام وطمنى ان كل حاجه تمام ..ليه فيه حاجه حصلت معاهم ولا ايه ؟ ماجده :لا ابدا بس وهما مسافرين النهارده الصبح اتهيألى ان شكلهم مش مظبوط وكان باين انهم مدايقين .فقولت اطمن منك اكيد لو فيه حاجه حصلت جواهر هتكون حكتهالك . جميله :لا والله جواهر مقالتش اى حاجه وانا مش راضيه اتصل بيهم اخاف يقولو عليا مزعجه لكن بعد كلامك اللى قلقنى دا هقفل معاكى واكلمهم حالا .. ماجده :اه ياريت ياحبيبتى ويارب ميكون فيه حاجه واكون متوهمه .. جميله :يارب ياماجده ...طيب سلام هرن على جواهر . ماجده :مع السلامه ياحبيبتى . جميله قفلت السكه مع ماجده وطلعت رقم جواهر ورنت عليها ... جواهر شافت التليفون وبصت لقاسم ولفت عليه التليفون وشاف اسم ماما . قاسم :تحبى تردى انتى ولا ارد انا .. جواهر :لا هرد انا عشان اطمنها عليا وكمان عشان وحشتنى مع انى متوتره اوى . قاسم :افتحى وردى عليها عادى وحتى تعالى نتصور كام صوره ابعتيهوملها عشان تطمنيها وتفرحيها ... جواهر هزت دماغها بموافقه وقعدت على السور اللى كان جمبها وفتحت الاسبيكر :ايوه ياماما واحشانى اوى ياحبيبتى .. جميله :عامله ايه ياقلب ماما وعامل ايه معاكى الولد قاسم دا اوعى يكون مزعلك املص ودانه .. قاسم بصوت واطى:والله محد عاوز يتملص ودانه غير بنتك ياشيخه .. جواهر :لا ابدا ياماما دا قاسم دا احن واحد فالدنيا مش ممكن يزعلنى وانا مش ممكن هزعل منه فيوم من الايام . جميله :ربنا يسعدكم ياحبيبتى ...انتو فين فالاوتيل ؟ جواهر :لا احنا بره خرجنا نتفسح شويه ..تحبى تكلمى قاسم ؟ خدى معاكى اهو .. قاسم :جميلة الجميلات وملكة الحموات .عامله ايه ياحماتى . جميله :عامل ايه يابكاش انتا ... قاسم :انا زى الفل بس زعلان منك اوى على فكره .. جميله :ياخبر ..ليه عملتلك ايه انا ؟ قاسم :يعنى تكلمى بنتك وتسأليها لو كنت مزعلها هتملصيلى ودانى وانا اكلمك متسألنيش وتقوليلى لو هى مزعلاك املصلك ودانها؟ ...ايه هى ودانى تايهالكم ملهاش حد يسأل عليها لو اتملصت ؟ عموما خليكو تيجو ناحية ودانى كده وانا اجبلكم موده تعيش معاكم تتوبكم عن كل ذنوبكم وسيئات حياتكم ... جميله بضحك :لا انا كده اطمنت عليكم ربنا يسعدكم ياحبيبي ...يلا هسيبكم تكملو فسحتكم مع السلامه . قاسم وجواهر فنفس واحد ...مع السلامه ..وقفلو السكه وبصو لبعض قبل ماقاسم يمد التليفون لجواهر تاخده ويكملو طريقهم للفندق .. ********* ماهر حاول ينام زى ماقال لجميله لكنه معرفش مسك التليفون وبعت رساله لموده ... شرنقه موده :ايون ماهر :بتعملى ايه ؟ موده :مبعملش قاعده فاوضتى بقرا مجله .. ماهر :ياترى مجلة ايه اللى استهوت فكر شرنقه هانم دى ؟ موده :لأ هتضحك عليا ماهر :لا مش هضحك بس قولى يمكن تعجبنى واشتريها بعد كده او اقولك هاتيها وانتى جايه هنا المره الجايه اقراها ... موده :مجلة ميكى 🙈 ماهر :😂😂😂😂 موده :مش قولت مش هتضحك 😡😡 ماهر :معلش ياشرنوقه غصب عنى بس يعنى انتى مش شايفه ان مواضيع المجله دى كبيره على سنك شويتين !! موده :على فكره انا مدمنة مجلة ميكى وكل مجلات الاطفال وبحب الحكايات اللى فيها جدا ولحد دلوقتى بصدقها وبعيش فيها كمان واضحك عليا براحتك بقا. ماهر :طيب تعرفى ان دا وان دل فيدل على حاجه وحده ...وهى ان قلبك لسه قلب طفله صغنونه ولسه فيه براءة الطفوله .. موده :ودى حاجه حلوه ولا وحشه يعنى ؟ ماهر :اكيد حاجه حلوه طبعا ... موده :طيب . ماهر :طيب ايه .. موده :طيب خلاص صدقت ان دى حاجه حلوه .. ماهر :طيب سلام اسيبك انا مع ميكى وبطوط قراءة ممتعه ويارب تعرفى تحلى اللغز 😂 موده :برضو بتضحك ...طيب ماشى ..سلام ارجع لميكى حبيبى مش بيضحك عليا ... ماهر خلص وقفل التليفون وحاول ينام لكنه معرفش وجواه حاجه بتلومه على احساس الارتياح اللى بيحس بيه دا لما بيتكلم مع موده لكنه عشان يتغلب على الحاجه دى ابتدا يقنع نفسه انه بيعتبرها زى بنته وانه بيتكلم معاها كاب او صديق مش اكتر ، لكن برضو فيه حاجه جواه رافضه الحجه دى .... غمض عنيه وجاتله صورة اميره قدامه ودا خلى احساسه بالذنب يتضاعف وهو حاسس انه خانها حتى بأحساسه بالراحه فالكلام مع وحده غيرها مهما كانت طبيعة علاقته بيها... حط ايده على عنيه وفرك وشه واتنهد وهو عازم انه لازم يروح شقته هو واميره فأقرب وقت ويتكلم معاها ويطمنها ان مكانها فقلبه مفيش حد يقدر ياخده ...لكنه ميعرفش انه لازم يثبت دا لنفسه الاول، مش راضى يقتنع ويصدق انه بييجى على الانسان وقت بيحتاج فيه حد جمبه، روحه بتطلب روح تانيه ترتبط بيها لان حتى الارواح بتحس بالوحده . ******** حسنيه مرات محروس مالك يازوزو ليكى مده عتلفى وتدورى حواليا زى الفروجه اللى عليها بيضه ومتلاعه مش عارفه تبيضها فين ، حاسه فيه حديت على لسانك بش خشمك مقادرش يطلعو ...قولى متخافيش انى عارفه ومتوكده انك وراكى نصيبه سوده .. زوزو :برغم طولة لسانك اللى عامل زى المبرد دا الا انى بقالى فتره عاوزه اقولك ومش عارفه اقولك ايه ولا اقولك ازاى بس ضميرى تعبنى اوى ومبقتش عارفه انام الليل حسنيه :ايه الحديت اللى خافناه فعبك ومخلى ضميرك تاعبك ديه ..قولى لعبتى الفار فعبى وقلبتى كيانى انطوقى بسرعه .. زوزو :بصى ياحسنيه ...خدى بالك من بنتك عشان محرو....وقبل ماتكمل سمعت صرخه من محروس اللى كان على اول السلم من فوق بالكرسى بتاعه وسامع كلام زوزو مع حسنيه : حسنياااااه تعالى شوفى بتك وقعت من فوق السرير ومش قادر اشيلها من الارض . حسنيه جريت لفوق واخدت زوزو فوشها وهى بتصرخ بأسم جواهر وزوزو بلعت ريقها بخوف وهى شايفه محروس بيبصلها وغضب الكون مرسوم على وشه وملامحه وهى اصلا من ساعة ماشافت اللى بيعمله مع بنته وهى مش بتشوفه غير فهيئة شيطان حتى ملامحه اتغيرت فعينها وكأنه ابليس متجسد فهيئة بنى آدم ... اتحرك محروس بالكرسى بتاعه على اوضته وساب زوزو بتهرب بعنيها فأى مكان متفاديه البصه عليه ودخل ورا حسنيه وقفل الباب وراه .. حسنيه بأستغراب لانها لقت البنت نايمه على السرير :مهى البت على السرير اهى ولا واقعه ولا حاجه يامحروس !امال عترجف قلبي عليها ليه ؟ محروس قرب منها واتكلم بنبرة حنيه اول مره يتكلم بيها .. بصى ياحسنيه ...انتى طبعا شايفه وضعى وظروفى وحالتى واللى بقيت عليه ...واشهدلك انك طلعتى بت اصول واستحملتينى وصنتينى وصنتى بيتى ...وانى لو لفيت الدنيا بعرضها وطولها مش هلاقى ضافرك ياام بتى ياغاليه .. حسنيه بأستغراب وفرحه من كلام محروس الحلو اللى اول مره يتكلمه معاها من يوم مااتجوزها :ربنا يخليك ليا يامحروس ويجبر بخاطرك ...لكن برضك مقولتليش كدبت عليا ليه وقولتلى البت وقعت وهى موقعتش ؟ محروس :انى كنت عاوز ابعدك عن الحربايه اللى اسمها زوزو مرت اخوى محمد ...المره دى عاوزك تحرصى منيها زين قوى ياحسنيه، دى مش رايدالنا اى خير، وليها فتره عماله تزن على دماغ اخوى وامى انى خلاص مليش عازه فالبيت ،ومعجبش قرش من بره ،وعاوزاهم يرمونى بره البيت انى وانتى والبت المسكينه دى، وعاوزه تكوش على البيت كله لحالها ... انى كذا مره اسمعها بالليل تودود لاخوى محمد وتسلط فيه عشان يطير ورانا ،ولما ملقتش فايده قالتله طب حتى نمشو مرته من البيت هى وبتها وهو يقعد اهى تخف مصاريف وكل وشرب من على راسنا .... مع انى شايفك بتخدمى اللى فالبيت كلهم خدمة العبد للسيد لكن دى آخرت المتمه واخر خدمة الغز علقه ... حسنيه : كلام ايه ديه وبعدين انتا ليك نايب فالبيت والارض وفكل حاجه ..هى سبهلله يعنى ولا ايه ؟ محروس :ياحسنيه الارض والبيت وكل حاجه بأسم اخوى محمد، والحق عاوز العفى اللى يطالب بيه ويدافع عنه وشوفة عينك انا ولا بقيت عفى ولا ليا عازه خالص، ولا اقدر اجيب حق من حد ... حسنيه :طب وهنعملو ايه دلوك ؟ محروس :هى عارفه انك انتى وبتى قوتى، وهتحاول بأى طريقه تبعدكم عنى عشان تهد قوتى وتدمرنى ببعدكم عنى ... انى عاوزك متصدقيش اى حاجه تقولهالك عليا ،ولا تسمعى كلامها فأى حاجه واصل، ومن اهنه ورايح راسك براسها وخدمة البيت تشيلى يدك منها، وكل مره تخدم حالها وعيالها ... منا مرتى مش خدامة اللى خلفوهم وياريت فالاخر حاقين خدمتها ليهم ... من اهنه ورايح انتى ست الستات وستهم كلهم فاهمه ...واى حد يكلمك فيهم تاجى تقوليلى حتى لو امى سامعه . حسنيه حست بأن الدنيا نصفتها لاول مره من يوم مادخلت البيت دا واول مره حد يتحامالها ويحسسها انها ست الستات والحد دا مين ..محروس جوزها زات نفسه! ... طارت من الفرحه وراحت على محروس قعدت قدامه وميلت على ايده باستها وهو رفع ايده التانيه وشد الطرحه من على دماغها عشان ينزل شعرها الحريري على عنيها ويمد ايده يتلمس خصلاته ويبص لحسنيه بنظره حطمت كل حصونها وبعدها رفع وشها بأيده وقومها عشان تقعد على رجله وتكون فمستواه ويبتدى يدخلها بلمساته وكلامه المعسول لعالم من السعاده الوهميه المؤقته وبسهوله قدر يعملها غسيل مخ كامل .... محروس نايم على السرير وحسنيه نايمه على دراعه وشعرها مفرود .. محروس وهو بيلعب فشعرها :عتفكرى فأيه حسنيه :عفكر لو كنا فبيت لحالنا مع بتنا لوحدينا وانى اكون ست البيت كله لا وحده تتأمر علي ولا وحده تقدر تطلعنى منيه ولا وحده تصحينى من الفجور اخبز واطبخ وانفخ لكتيبه ،وانى كل اللى معاى جوز وبت وحده لقمه صغيره تكفينا ورغيف عيش ناكلو فيه احنا التنين اليوم بطوله ... محروس قرب منها وباس دماغها :احلامك اوامر يام جواهر من بكره هشوف حكاية البيت لحالنا دى واعمل المستحيل عشان يحصل .. وبص بعيد وهو بيقول لنفسه :الظاهر مقداميش حل غير اكده ..اصل بت المحروق دى مهتسكتش انى عارف ، مهى من يوم ماشافت البت مسوحه على حجرى وهى عينها مش عتنزل من على خرم باب الاوضه وشافت وعرفت كل حاجه ولازمن الحق اتغدى بيها قبل ماتتعشى بياو اخد بعضى وابعد عن وشها خالص ..صوح انى مهددها بالسيديهايه وهى طول الوكت كانت خايفه وكاشه ..بس يمكن فكرت وعرفت ان السديهايه دى فيها موتى زى مافيها موتها وفهمت انى مهقدرش اوريها لحد وهترجع تشم نفسها عليا من تانى بت المحروق . ******* فى الفيلا . فميعاد الغدا ليل ابتدت تغرف وتودى على السفره وراحت نادت لجميله اللى كانت بتتكلم مع ماجده وتطمنها بعد مااطمنت على جواهر وقاسم جميله قفلت مع ماجده وطلعت لقت ليل محضره السفره ومنظر الاكل يجنن ،دخلت اوضة ماهر عشان تصحيه يتغدى وطلبت من ناديه تدخل تدى خبر لنادر ، اما غريب فكان قاعد طول الوقت جمب سميه بيتكلمو مع بعض وراحو قعدو على السفره بمساعدة ليل لسميه والكل اتجمع وليل كمان قعدت معاهم .. غريب :ريحة الاكل النهارده تجنن ياعمتو تسلم ايدك .. جميله :دوق وهقولك فالاخر الاكل يجنن ليه النهارده .. ليل لما جت تقعد ملقتش كرسى فاضى غير الكرسى اللى جمب غريب وراحت قعدت عليه واول ماقعدت غرفت طبق لغريب وحطتله فيه من كل حاجه وحطته قدامه ... ناديه كانت على الكرسى اللى جمب غريب من الناحيه التانيه وهى كمان عملت لغريب طبق وبعد ماخلصت بصت لليل .. ليل لو سمحتى شيلى طبقك من قدام غريب عشان انا عملتله طبق وانا عارفه هو بيحب ايه ومبيحبش ايه . ليل مدت ايدها تاخد الطبق بكسوف لكن ايد غريب سبقتها وهى بتتحط على الطبق وبيوجه كلامه لناديه : لأ هاكل من الطبق اللى عملته ليل كلى انتى ياناديه من الطبق بتاعك . ناديه قعدت مكانها وحطت الطبق قدامها وابتدت تاكل وهى مراقبه غريب اللى بيطلب اى حاجه محتاجها من ليل وهى مش معبرها خالص .. ماهر :الاكل يجنن ياجوجو ، مش هتقولى سر الخلطه السريه فالاكل النهارده ايه ؟ جميله :سر الخلطه النهارده عند ليل لان كل الاكل دا عمايل ايديها لوحدها . الكل بص لليل اللى ارتبكت وسابت المعلقه من ايدها بكسوف وبصت للارض .. نادر :تسلم ايدك ياشيف ليل الاكل تحفه جدا.. ليل هزت دماغها من غير ماتتكلم وبعدها ناديه وجهتلها الكلام : بصى بقى ياليل من هنا ورايح انتى متعمليش حاجه غير انك تطبخيلنا الاكل كل يوم يعنى من النهارده انتى الطباخه الرسميه بتاعت الفيلا .. غريب بضيق من طريقة كلام اخته ناديه مع ليل :بجد تسلم ايديكى ياليل ياريت فعلا تتواضعى وكل يوم تاكلينا اكل بالروعه والطعامه دى من تحت ايدك. ليل :والله ياجماعه انتو خجلتونى ، وليكم عليا طالما وكلى عجبكم اكده كل يوم هطبخلكم بيدى ... ليل فضلت متابعه الكل وهما بياكلو ومبسوطه جدا لرد فعلهم لكن سعادتها الحقيقيه كانت بتكمن فأعجاب شخص واحد بس بطبيخها وهى مراقبه استمتاعه بيه ..غريب . سميه مراقبه كل اللى بيحصل حواليها وبتاكل فى سكوت تام ومن وقت للتانى تلاحظ نظرات جميله اللى حاسه انها شعاع ليزر بيحاول يخترق جسمها ويحرق كل اعضائه. نادر :الحمد لله .. بجد تسلم ايديكى مره تانيه ياليل .. ليل :الف صحه على قلبك يانادر بيه ..انى عامله ام على تحب اجيبلك منها دلوكيت ولا تخليها كمان هبابه . نادر :لأ خليها كمان ساعه كده تكون المعده فضيت شويه وهاتى ام علي وابنها علي معاها وهاكلهم هما الاتنين ..اصلى مش هفوت اى اكله من ايدك انتى بالزات بعد كده ... ليل ابتسمت على كلامه وقامت بعد ماشبعت بس من كمية الكلام الحلو اللى سمعته النهارده واداها طاقه ايجابيه لسنه لقدام . ********** الكل فضلو قاعدين مع بعض، ناديه ونادر فتليفوناتهم ،وجميله وماهر بيتكلمو مع بعض ،وغريب وسميه مع بعض ،مفيش غير ليل اللى قاعده وسطهم ساكته، عنيها طول الوقت محاوطه غريب وبترصد كل حرف بيخرج من بوقه وكل ابتسامه تترسم على شفايفه بهيام ... على المغرب قامت ليل وجابتلهم ام على اللى عملتها واكلوها ومبقتش سامعه طول ماهما بياكلو غير همهمات الاعجاب وكلمات الثناء على الطعم اللى اخدهم كلهم فحته تانيه من حلاوته .. غريب بعدها نادا على اخوه نادر :نادر ...لو سمحت شيل ماما طلعها فوق فاوضتها ترتاح شويه تعبت من القعده الطويله النهارده . نادر قام من غير كلام شال امه وطلعها اوضتها وحطها على السرير وادور عشان يمشى اتفاجأ بسميه بتمسك ايده .... سميه :نادرخليك معايا شويه ممكن ؟.. ********** ناديه طول الوقت بتحاول تفك زعل غريب منها لكنها بتفشل لغاية ماجربت الورقه الرابحه واللى خلت غريب فعلا فك ورجع يضحك ويهزر معاها من تانى ،وهى انها تتكلم مع ليل بأسلوب حلو وتضحك معاها واول ماليل انطلقت معاها فالكلام غريب هو كمان دخل معاهم ولانت ملامحه فورا ، ودا خلى كل شكوك زئرده تتأكد ....ان ليل بقى ليها مكانه خاصه عند غريبووو..ومش بعيد تاخد مكانها فقلبه اثناء ماهما قاعدين دخل عم طه الفيلا ووقف قدام ماهر بعيون حمره باين عليهم البكا. ماهر :مالك ياطه وفين داده سميره مجبتهاش معاك ليه ؟ طه : نكس وشه للارض ...سميره خلاص معادتش هتيجى تانى ياماهر بيه ...الست الطيبه الحنينه ادتك عمرها ...ادعيلها بالرحمه ... نزل الخبر على الكل زى الصاعقه وخصوصا غريب اللى انتفض وقام من مكانه وزعق فى طه بعلو صوته ...بتقول ايه انتا ..مين دى اللى ماتت انتا اتجننت ؟ وللحكايه بقيه ...... بقلم /ريناد رينووو ❤ لكم منى اجمل باقات الزهور 🌹🌼🌺⚘🌼🌷🌹🌼🌺⚘🌻🙈 الفصل الخامس عشر من هنا |
تعليقات
