 |
رواية فرعون الجزء الثالث 3 الفصل العاشر 10 بقلم ريناد يوسففرعون 3 البارت العاشر 10 غريب صحى وهو فعربيته واكتشف ان النهار طلع من بدرى وهو بيبص فساعته واتعدل وفرك وشه بتعب وهو شايف الناس رايحه جايه على اشغالها .. نزل من الكرسى الورانى وقعد قدام وساق على العماره اللى ساكن فيها وطلب من ام مصطفى انها تجيب اتنين ينضفو الشقه ويتخلصو من اى حاجه حريمى فوق فالشقه ويرجعو الشقه على العفش بس .. مفيهاش غير بس هدومه هو، وغير كده هتتحاسب لو طلع وشاف حاجه باقيه من اللى قال عليه ... مقدرش يطلع الشقه مره تانيه قبل مايتأكد انه تخلص من اى حاجه تخص اميره فيها والشقه تنضف حتى من ريحتها اللى اول مادخل الشقه خنقته ومستحملش يقعد فيها ... غريب لو حد فيوم من الايام قله انه هييجى يوم ويكره حد الكره دا كله مكانش صدق .. لكن النهارده هو وصل لمرحله فالكره بسبب اميره يمكن محدش وصلها قبل منه والكره فقلبه تخطى اعلى الدرجات .. راح على المستشفى لعم طه يطمن عليه بعد مافطر على عربية فول فالشارع... وزعل جدا لما شاف حالة عم طه المتأخره وغمض عنيه بألم لانه حس ان الراجل الطيب دا مش هيستحمل بحالته دى كتير ..وهيرحل عن الدنيا وهو مش سايب وراه غير كلمه طيبه قالها لحد فيوم او زكرى حلوه ليه فقلب حد يفضل يدعيله بيها دعوه كل ماييجى على باله ودا الميراث الحقيقي اللى المفروض كل الناس تتسابق عشان تجمعه مش الفلوس ابدااا... رجع غريب على سينا بعد مارد اخيرا على قاسم اللى حرق التليفون عليه...وبعدها اتصل طمن ابوه ماهر عليه اللى بقا حاسس انه بيضغط على اعصابه جدا فالفتره الاخيره وهو فسن غلط فيه اى ضغط او انفعال وزعلان عليه جدا لكن مش بأيده .. دخل على مكتبه بلهفه واول حاجه عملها فتح اللاب توب على الصوره وابتسم وهو شايف ضحكتها اللى بتحلى فعينه الدنيا مهما كان طعمها مر ..وفتح الدرج بتاع مكتبه بالمفتاح وطلع الضفيره وضمها بشوق زى كل مره وهو حاسس بتفاؤل وامل وهو قدامهم مش عارف ايه سببه لكن كل اللى عارفه فاللحظه دى انه حاسس ان روحه اتحررت من لعنه ...من عمل سفلى كان معموله بالقهر ومتسلط عليه شيطان اسمه اميره ... فالاثناء دى باب المكتب خبط غريب :ادخل ايوب دخل واتكلم بابتسامه :حمدالله على سلامتك ياباشا نورت مكتبك ...قالها وهو بيتقدم ويحط كباية عصير لمون قدام غريب على المكتب .. غريب :متشكر ياايوب .. ولسه بيمد ايده هياخد كباية العصير تليفونه رن بص فيه شاف رقم واحد من رجالته المكلفين بمراقبة وحده من المناطق الساحليه .. رد عليه غريب بسرعه .. ايوه اتكلم يبنى شوفت حاجه ؟ :يباشا انا لاحظت حاجه ...فيه زوديك بقاله ٣ ايام واقف هنا فخليج العقبه وكل يوم صاحبه بيطلع بيه بيوصل لمكان فيه زوديك تانى بنفس الحجم والشكل بيقف جمبه شويه وحتى مش بيكلمو بعض وبعد حوالى ساعه يرجع الزوديك لمكانه ويركن فنفس المكان ... والراجل ينزل ويروح على كامب فيه ٥ افراد متأجرينه وكلهم رجاله مفيش معاهم ستات غريب هز دماغه وهو مبتسم ابتسامه خفيفه ...طيب بص انتا تفضل مراقب كل حاجه وانا فاسرع وقت عندك . قفل معاه وبص لايوب :ايوب انا ماشى ولو اى حد سألك عليا تقول انى رجعت القاهره تانى سامع . ايوب :اوامر سعادتك ياباشا . غريب خرج واخد عربيته وراح ركنها فمكان بعيد عن القسم وراح على العقبه وتحديدا المكان اللى قله عليه بركات الراجل بتاعه هناك... بعد ساعتين ...غريب بينزل المنظار من على عنيه وبعدها اخد نفس طويل من سجارته قبل مايرميها ويدهسها برجله ويرجع يرفع المنظار تانى على عنيه وهو بيقول لبركات ... الزوديك دا بتاع حد من سكان المنطقه هنا ولا دى اول مره حد يشوفه فالمكان ؟ الراجل :لا مش بتاع حد من السكان لكن مش اول مره نشوفه هنا ..الزوديك دا بييجى ٣ مرات فالسنه وكل مره بيقعد اسبوع فنفس المكان ويعمل نفس الروتين وعشان المنطقه سياحيه محدش يقدر يسأل حد انتا بتعمل ايه هنا طالما قاعد فحاله ومبيأذيش حد محدش كان واخد باله ليه ودى اول مره انا آخد بالى للحكايه دى لما سيادتك نبهتنى لحكاية المخدرات دى والا قبل كده كنت فاكر صاحبه جايبه سياحه فعلا . ... غريب اداله المنظار وطلع تليفونه واتصل برقم ... غريب :ايوه يبنى ..تشوفلى غواص من عندنا يكون ممتاز وتخليه يكلمنى فاسرع وقت سامع ...هقفل دلوقتى ومش هستنى كتير وتكون بترن عليا والغواص جمبك . وبالفعل قفل ومكملش نص ساعه وشاف الرقم بيتصل عليه مره تانيه .. غريب رد عليه :ايوه فين؟ ...طيب حلو اديهونى ... ايوه يبنى ...عايزك تجيب معاك شوية ناس لكن يكونو محترفين غطس وتيجى للمكان اللى هقولك عليه وتعمل انك بتعلمهم دايفينج ومتنساش تكون فيهم وحده ست ولا اتنين عشان الموضوع يبان سياحه عادى ولما تيجى هنا هفهمك تعمل ايه كويس ... رجع حط المنظار على عنيه ونزله بملل وهو شايف حالة السكون اللى فالمكان ومفيش اى حاجه مش طبيعيه ونفخ وهو بيبص لبركات جمبه :ايه يبنى انتا مفيش عندك اكل فالخرابه اللى قاعد فيها دى ..حاجه تتشرب اى حاجه تدل ان المكان دا ساكنه بنى آدمين ؟ بركات:حالا هنزل اشتري ياباشا ...وهم عشان ينزل لكن وقفه صوت غريب :استنى يبنى ..خد دول ..واداه فلوس . بركات:معايا فلوس ياباشا خير الداخليه مغرقنا . غريب :امسك بس وكتر هات حاجه تقعد يومين ولا حاجه مش عايزك كل شويه تخرج وتدخل مش عايز الناس تقلق منك وهات قاروصة سجاير معاك . بركات :متقلقش ياباشا انا الناس هنا كلهم متعودين انى دايما بتنقل فكل مكان وهيقلقو فحالة لومشافونيش وفيهم اللى هييجى يسأل عليا عشان كده انا هتعامل طبيعى عشان محدش يشك فحاجه . غريب :ممتاز ...طب يلا انجز عشان ترجع بسرعه عشان دى آخر سجاره فالعلبه ولو اتاخرت عليا هولع فيك بدال مولع فالسجاره سامع بركات اخد الفلوس من ايد غريب ونزل جرى يجيب لغريب باشا اللى هو عايزه لانه متأكد ان غريب لما بيقول كلمه مش بتبقى مجرد تهديد . على الليل وصل الغواص ومعاه ٤ افراد ٢ ستات و٢ رجاله وحجزو كامب وباليل الغطاس اتسحب منهم وراح للمكان اللى وصفهوله غريب واللى هو بيت بركات ... غريب :ادخل تعالا ..مراد اسمك مش كده ؟ مراد :مظبوط سيادتك . غريب :تعالا اقعد يامراد ...بعد ماقعد مراد غريب قعد قدامه وجاب ورقه وقلم وابتدا يرسم وهو بيتكلم ومراد بيسمعه بكل تركيز . غريب :هتاخد الناس اللى جبتهم معاك وتروح تعمل انكم بتعملو ضايفينج هناك ...هتاخد معدات الغطس من المحل اللى عنده الحجات دى ...هتخلى حد من اللى معاك هو اللى يديهم بطاقته وبركات هيساعدكم ويضمنكم تأجرو مركب صغير لانه من سكان المنطقه هنا ودى حاجه سهله عليه هتروحو المنطقه دى ..وعمل دايره على مكان مرسوم على الورقه ...هتنزلو كلكم هنا لكن انتا هتسيبهم وتتحرك على المكان دا من تحت الميه وتاخد معاك كاميرا بركات هيوفرهالك وتصورلى كل حاجه فالمكان وتاخد بالك لانه احتمال كبير هتلاقى غطاسين فالمكان ده ..وخلى بالك محدش من اللى معاك يعرف انتا رايح فين ولا يمشى وراك وانتا رايح .. هتخلص كل اللى طلبته منك وهترجع تانى للمكان اللى فيه زمايلك وطبعا مش هوصيك محدش خالص يشوف الكاميرا معاك حتى اصحابك اللى هيغطسو معاك ...هتقولى ازاى هقولك دى بتاعتك انتا بقا .. هتفضل معايا على تليفون بمجرد مااديك الامر تنفذ فورا .. مراد :تمام سيادتك ..اى اوامر تانيه ؟ غريب :كل امر هييجى فوقته خليك مستعد ومنتبه كويس ومش هوصيك على الحرص . مراد :متقلقش حضرتك دى مش اول مره بعمل حاجه زى دى او اشارك فعمليه . غريب :جايز تكون مش اول مره لكن خد بالك المره دى اكبر واخطر من كل مره ... مراد مشى بعد ماحفظ التعليمات كلها وغريب فهم بركات هيعمل ايه بكره مع مراد وجماعته ... طول الليل غريب فضل مراقب الزوديك من شيش الشباك بتاع اوضة بركات ومنامش طول الليل ... بعد اذان الفجر لاحظ ان فيه مركب اتحركت عليها ٣ رجاله قدر يشوفهم من خلال كاميرا حراريه والمركب دى وقفت على مسافه بعيده من الزوديك واتنين من اللى عليها نزلو الميه ...فضلو تحت الميه ساعه وبعدها رجعو للمركب والمركب ابتدت تتحرك للشط مره تانيه .. غريب اول مالمركب اتحركت ادى امر لبركات انه ينزل فورا يراقب المركب دى من بعيد واول ماللى عليها ينزلو يطلع يفتشها من غير ماحد يلمحه .. نزل بركات ونفذ اوامر غريب ورجع وهو محمل باخبار اول ماغريب سمعها ابتسم ابتسامه واسعه لما اتأكد ان تخمينه طلع صح .. غريب : بركات هو الزوديك بيتحرك الساعه كام كل يوم ؟ بركات :ملهوش وقت محدد بس هو بيتحرك فالنهار وقدام انظار كل الناس . غريب :امممم ...وطلع تليفونه وادى امر لمراد انه يتحرك هو وجماعته ونزل بركات من بيته عشان يساعدهم .... بركات ...بركات دا شاب سنه ٢٨ سنه ملوش اهل شغلته الوحيده تسهيل احتياجات سياح المنطقه من وسائل مواصلات وحجز اماكن وغيرها ..تقريبا زى احمد السقا فى فيلم شورت وفانيلا وكاب ...ولذلك فالجهاز لما حبو يجندو حد من اهل البلد دى ملقوش انسب منه ميلفتش النظر ليه ويقدر يتحرك بحريه وحافظ المنطقه شبر شبر .. نزل بركات وبالفعل خلصلهم كل حاجه ووفرلهم كل طلباتهم واحتياجاتهم ورجع تانى ...معداش وقت كبير والزوديك اتحرك حتى قبل مايلحق مراد يوصل للمنطقه اللى هو فيها ... مراد وصل للمكان واتفاجأ وهو بيشوف المكان واخده الذهول وهو بيصور اللى شايفه واللى كان حياه تحت الميه ... والاغرب هو حفره مربعه محاطه باسوار من حديد لما قرب منها مراد اتضح انها طريق او نفق تحت ارض الخليج ...بيودى فين او بيجيب منين ميعرفش وخاف يدخل واكتفى بالتصوير من قريب ورجع لما حس انه فمكان خطير جدا وممكن غلطه وحده تخسره حياته لو حد شافه ...خبى الكاميرا فالشنطه الصغيره اللى كانت معاه ورجع على المركب واخد جماعته ورجعو على الكامب بتاعهم ... غريب كان متابعهم وعرف انهم رجعو واللانش كمان رجع لكن الغريبه ان الزوديك اول مارجع رجاله نزلو سحبوه من الميه وحملوه على عربيه نقل وطلعت بيه وهما فيها .. غريب ضرب بايده على الحيطه جمبه لما خاف ان المهربين يكونو لاحظو او شكو فحاجه وعشان كده اخلو المكان ... غريب بلغ باوصاف العربيه وطلب مراقبتها من اقرب لجنه هتعدى عليها من بعيد لبعيد ومراقبة كل فرد عليها ومعرفة جميع المعلومات عنه .. بعد نص الليل ولما مراد حس ان البلد سكنت اتحرك على غريب واخد معاه الكاميرا وادهالو وغريب ابتدا يشوف كل الصور اللى عليها وهو مذهول نفس ذهول مراد وهو بيصورها ... غريب بفرحه :كنت خايف يكونو كشفونا لكن الحمد لله ..مراد خد الجماعه انتا وارجعو ...بركات هتستمر فالمراقبه واول يوم يظهر فيه الزودياك فالخليج مره تانيه تعرفنى فلحظتها سامع ... الاتنين هزو دماغهم بالموافقه ... مراد قام ومشى وبركات قعد قدام غريب ...ممكن اشوف الصور دى ياباشا ؟ غريب :ليه بركات :نفسى اشوف اللى شوفته وخلاك اتصدمت وبعدها فرحت اوى كده ... غريب :شوف من غير فهم مش هيخليك تدى اى ردة فعل .. بركات :ومين قال لسعادتك مش هفهم ..طب دنا بفهمها وهى طايره ...غريب ابتسم ومردش عليه وقفل الكاميرا واخدها واتحرك عشان يمشى .. بركات :رايح فين ياباشا ؟ غريب :رايح للمكتب واى مستجدات تبلغنى علطول .. رجع غريب واول حاجه عملها بعت الصور لقاسم اللى اول ماوصلتله الصور رن فورا على غريب .. غريب :كنت متأكد مش هتستحمل المفاجأه . قاسم :اولاد اللعيبه القرود ... غريب :حاجه متخطرش على بال الجن الازرق قاسم :ولا الاحمر ولا البنفسجى ولا اى جن من اى لون ...يعنى احنا طول الوقت بندور تحت الارض عالبر وفوق الميه فالبحر وهما عاملين انفاقهم تحت الارض وتحت الميه كمان ؟ دماغ شغاله مش بتنام . غريب :لا ولا طريقة النقل تاخد نوبل فالاختراع ...شفت الحبال اللى فالصوره عندك دى بيستخدموها فنقل البضاعه بعد مايتقلوها بالدوشم الحديد عشان متطفوش على سطح الميه ...وكمان الدوشم دى ليها دور تانى ..انها تشد الحبل لورا بعيد عن الزودياك عشان ميتلفش على الموتور ..ودا اللى بيخلى حركة الزودياك بطيئه وهو رايح وسريعه وهو جاى .. قاسم :وبكده دخول البضاعه واستلامها وتوزيعها كله بيتم من تحت الميه بالغواصين وفوق الميه الهدوء والسكينه ..عاملين بطن الزير ولاد اللزينه . غريب :بس خساره النهارده كان آخر يوم فنقل آخر دفعه وهنضطر اننا نستنى ٤ شهور تانى لغاية مايدخلو شحنه جديده عشان نمسكهم .. قاسم :طيب وليه ممسكتهمش بآخر كميه وكنت فجرت النفق وقبضت على المهربين دول وقفلنا القضيه ؟ غريب :هتفضل طول عمرك غشيم ومبتبصش غير تحت رجليك وبس .. هستفاد ايه لما اقبض على كام واحد من بلدى واحبسهم واسيب اللى بيدخلو البلد احرار يفكرو تانى فكذا طريقه عشان يدخلو بيها سموم يضيعو بيها شبابنا وهينجحو وهيعرفو ... لكن لما يتقبض عليهم متلبسين وهما على ارضنا وجوا حدودنا نعرف مانساوم عليهم بلدهم ونطلب منها اللى احنا عايزينه فسبيل تحريرهم . قاسم :تفتكر الدوله اياها هى اللى بتدخلنا منها الحاجه ؟ غريب :يبنى خليج العقبه دا هو المنفذ الوحيد لاسرائ**يل والاردن على البحر الاحمر ...وطبعا مش محتاجه ذكاء عشان نعرف الضربه جيالنا منين . قاسم :انا من رأيي النفق دا ميتفجرش غير بعد ماندخل منه لبلدهم ونوجهلهم ضربه تخليهم يفوقو ويرجعو يفتكرو مصر تقدر تعمل فيهم ايه .. غريب :دى حاجه ممكن تهدد الامن الوطنى ومنقدرش نعمل حاجه زى دى من غير مانلجأ للقيادات العليا فالدوله واللى اكيد هيرفضو فالفتره دى اى حاجه تهدد استقرار مصر فالوقت الحالى واللى يدوب الناس بدأت تحس بيه . قاسم :بس انا برضو شايف ان النفق دا ثروه قوميه وحرام تدميره باى شكل من الاشكال . غريب :النفق دا زى مانتا بتفكر تهدد بيه امن دوله نفس الدوله دى ممكن تبيدك من خلاله ياغبى ... هو انتا فكرك ان النفق دا معمول عشان تدخل منه مخدرات وبس ؟ ... لا ياحبيبي نفق بتدخل منه حاجه بالحجم دا ومعمول بالذكاء دا واكيد اتصرف عليه مبلغ يعدى دوله فقيره من تحت خط الفقر ...هدفه اكبر من شوية مخدرات تدخل من خلاله بكتيير اوووى ... متستبعدش انهم من خلاله يكونو مراقبين كل المنطقه وبيستعدو يدونا الضربه القاضيه على غفله فأى وقت .. وصدقنى تدميرنا لنفق هما تعبو عليه بالشكل دا دى فحد زاتها ضربه توجعهم اكتر من اللى انتا عايز تعمله ... يلا بقا روح نام اخدت وقت كتير ...اكلمك بعد اربع شهور ...قالها وقفل السكه فوش قاسم ولم الحاجه اللى على المكتب واخد علبة السجاير والولاعه وراح على مكانه الخاص تحت السما يراقب نجمته اللى فالسما ويحلم احلام يقظه بنجمته اللى على الارض . ************ عند قاسم خلص مع غريب ورن على جوهرته ... جواهر :ايوه ياقاسم ياحبيبي قاسم :حبك برص مبترديش علطول ليه ..افضل ارن ٣ مرات لغاية ماتردى ؟ فاكره نفسك مين فالبلد انتى ولا بنت مين عشان قاسم العو يرن عليكى ٣ مرات مترديش ؟ جواهر :ههههههه انا حبيبة قاسم العو ومن حقى اتغر بنفسى ... قاسم :ايوه تتغرى بيا مش عليا ... عموما يلا سامحتك ...حلا واركان عاملين ايه ؟ جواهر :هيلحقو يعملو ايه وانتا سايبهم من ساعات ...بخير طبعا وزى الفل اركان نايم وحلا صاحيه وبترضع الهانم اهى ومسهرانى ... قاسم :تسهرك وتمرمطك زى ماهى عايزه دى بنت قاسم العو دى ياماما تعمل اللى يعجبها وتتدلع براحتها حبيبة ابوها ... جواهر :اهلاااااا لا بقولك ايه انا شكلى هبداء اغير من البنت دى لو استمريت تدلعها كده ولو غرت منها هعاملها معاملة مرات الاب صدقنى انا بحذرك اهو ... قاسم :تعرفى انى ممكن ادخلك انتى وعيلتك كلها السجن واعذبكم واقلع ضوافركم واخزق عنيكم لو بس حسيت انك دايقتى بنتى فيوم من الايام ... جواهر :بقا كده ! قاسم :ايون بقا كده ...وتعالى هنا قوليلى هترجعى شقتك امتا ؟ عايزين نخاوى الواد اركان بقا بدال ماهو قاعد وحيد ياعين ابوه كده . قاسم لسه هيكمل كلام لقى الخط اتقفل فوشه ضحك بخفه وحط التليفون جمبه على السرير ونام . ************** اما عند ليل نجمه :ماما بكره الميس قالتلى اجيب بابا معايا . ليل :ليه اكده ؟ نجمه :مش اعرف ...بس هو فيه ولد وهو ماشى جمبى خبط فأيدى كده جامد لوووحده ...ووقع على الارض لوووووحده ...وطلع دم من بقه وسنته اتكسرت .. ردت عليها ليل ورحاب فنفس واحد ..لوووووحده . ليل :يامرى منك يامحراق الشر يامرى ..عملك ايه الواد اللى كسرتى سنانه وخلتيه اترم ديه ياحزنى . نجمه :انا مش كسرت بقول لوحده لوحده ..ربنا عمل فيه كده عشان هو قلى ياسوده . رحاب :من امتا بقينا بنكذب يانجمه ...احنا مش قولنا طول مااحنا عاملين الحاجه نقولها ومنخافش عشان ربنا ميحاسبناش ٣ مرات ...مره عشان عملنا حاجه غلط ..ومره عشان كذبنا ...والمره التالته عشان مخوفناش منه فالمرتين الاولانين ؟ نجمه :ايوه انا وقعته ..وضربته .. وقعدت فوق ضهره وقعدت اتنطط وبعد ماقمت ضربته برجلى ..كده ..كده ...كده ..وفضلت تمثل برجلها ضربته ازاى .. ليل :شلوحتى الواد يعنى ...الله اكبر طيب ليه يبتى مش قولنا لما حد يعملنا حاجه نقول للميس عليه وهى تعاقبه ! نجمه :قولتلها كتير وكل مره تقوله بس وهو مش بيسكت وبرضو بيقولى سوده ويضحك الكلاس كله عليا ..اسيبه ؟ رحاب :رحت مديله ...جدعه يابت طول ماملقتيش حد جابلك حقك خوديه بايدك ..وطول ماللى قدامك غلطان فيكى ادبيه ومتخافيش ... وبعدين انتى سوده ازاى يعنى الاعمى ابن الاعمى ده ... نجمه :انا دلوقتى مش خايفه انا المس قالتلى هاتى باباكى معاكى وانا قولتلها عنديش بابا ..قالتلى باباكى مسافر قولتلها لا فوق عند ربنا .. ليل بسرعه :اسم الله بعد الشر ...ليه قولتى اكده يانجمه ..مين قالك قولى على ابوكى اكده ؟ نجمه :كل حد معندوش اب زيي لما حد بيسألهم بيقول بابا راح عند ربنا ..وانا معنديش بابا يبقا راح معاهم عند ربنا . ليل :له اوعى تقولى على ابوكى اكده مره تانيه . نجمه :يعنى بابا مش عند ربنا ؟ طيب هو فين ..وليه مش بييجى عشان يشوفنى واشوفه ويبقى عندى بابا زى البنات صحباتى ... كل يوم ببهاتهم يجو ياخدوهم ويشيلوهم على كتافهم وصحباتى يبقو مبسوطين ...لو بابا مش عند ربنا قوليله ييجى عشان اركب فوق كتافه وابقا طويله زى صحباتى ياماما .. رحاب بصت لليل بصة عتب لانها ياما قالتلها البنت لازم هتحتاج لابوها فيوم من الايام ..وان حرمانه من بنته من الكبائر وهتتحاسب عليه حساب عسير وان ربنا ميرضاش بده وحرمه فى كتابه العزيز لما قال فى كتابه العزيز ..((لا يحل لهن ان يكتمن ما خلق الله فى ارحامهن ان كن يؤمن بالله واليوم الآخر ) وانه لازم هييجى وقت وتسأل بنته عليه واستعدى عشان اليوم دا وحضرى نفسك وشوفى هتقوليلها ايه ...لكن ليل مكنتش تتوقع ان اليوم دا هييجى بسرعه اوى كده . ليل فضلت ساكته ونجمه سالتها وهى حاطه ايديها الاتنين على خدودها :يعنى مش هروح تانى الحضانه عشان الميس قالتلى هاتى ولى امرك يأمه متجيش .. رحاب :لا ياقلبي هتروحى متروحيش ازاى انا بكره هروح معاكى واشوف حكاية الولد دا ايه .. نجمه :احلى رحااااب ..وجريت اترمت فحضنها ... اماليل ففضلت سرحانه وبتفكر فنجمه اللى لو كان ابوها معاها كانت هتبقى اسعد البنات كلهم وهى بتتباها بيه وسطهم ومش هتلاقى وسط الابهات كلهم اب زيييه . رحاب اخدت نجمه ودخلت بيها اوضة رحاب يلعبو شويه ورحاب سألتها :اسمه ايه بقا الولد اللى علمتى عليه دا يانونه . نجمه :اسمه اررركان . ********* اما فى الفيلا . جواهر بتتكلم فى التليفون ومره وحده بعدت السماعه عن ودنها لما قاسم زعق فيها ...ابن مين دا اللى متخرشم وراجع سنته مكسوره ... مين اللى عمل فابنى كده انطقى . جواهر :معرفش بيقول بنت معاه فالحضانه . قاسم :كمااااان بنت! ..يعنى اللى علمت على حظابط اركان العو بنت ؟ هو فين اديهونى عايز اعرف بنت مين دى اللى هتتحبس هى واهلها كلهم دفعه وحده اديهووونى . جواهر :مش هيعرف يكلمك ولا هتفهمه عشان بوقه وارم وسنته مزاولاه .. قاسم :بااظ يعنى ...ابنى بااااظ واللى بوظته بنت ..سلام اقفلى انا جايلكم وبكره هروح اعلق البنت دى من شعرها ...وانتى تتفضلى ياهانم تلمى هدومك وعيالك وترجعى على شقتك كفايه كده انا عايز عيالى جمبى وعايز ارجع من الشغل الاقيكم فالبيت .. جواهر :خلينا لاخر الشهر وحياتى ياقاسم ماما بتساعدنى فحلا واركان هنا بيلعب مع عيال جده ماهر ومبسوط .. قاسم :اهو انا محدش قاهرنى غير جده ماهر وشماته فابنى وفيا ..بزمتك مش رقص لما شاف اركان متعور . جواهر : ياقاسم حرام عليك دا زعل على الولد جدا وفضل يزعق ويقول ازاى الولد يتعمل فيه كده والحضانه دى لازم حد يحاسب اللى فيها ولازم حد يقدم فيهم شكوى . قاسم :بس بيرقص من جواه انا متأكد ....اصله اكيد ماصدق حد يخلصله تار عياله من ابنى تلاقى الفرحه مش سايعاه عارفه انا . اكيد دلوقتى لامم عياله وبيغنو على ابنى لابد من يوم محتوم تترد فيه المظالم ..ابيض على كل مظلوم اسود على كل ظالم.. وللحكايه بقيه ...... بقلم /ريناد يوسف رينووو💖 لكم منى اجمل باقات الزهور 🌼🌻🌺🌹🌸💐 الفصل الحادي عشر من هنا |
بدل ماتدور وتبحث علي الروايات خليها علي تليفونك وحمل تطبيقنا
