 |
رواية فرعون الفصل السادس عشر 16 بقلم ريناد يوسففرعون البارت السادس عشر 16 بقلم /ريناد ❤ ماهر النهارده اليوم الرابع لغريب فى المستشفى والحمدلله حالته اتحسنت والدكتور قال ممكن تاخدوه يكمل علاجه فى البيت بس بشرط الراحه التامه والبعد عن اى ضغوط نفسيه . فكرت انى آخده على أكتر مكان متاكد انه هيرتاح فيه ...اصل الفيلا وسميه بالنسبه لغريب دلوقتى هما مستنقع الضغوط النفسيه .. دخلت عليه الاوضه ولقيته كالعاده نايم وضهره للباب لكنى متأكد انه صاحى ..قربت منه وقعدت جمبه وقلتله : ايه بقا هنفضل نتهرب من بابا كتير...ناوى تخبى نفسك منى لغاية امتا ياغريب ؟ غريب :اتنفست بصوت عالى ومردتش عليه ماهر :طيب الدكتور كتبلك على خروج وهتكمل علاجك فالبيت ... غريب :........... ماهر :طيب ايه رايك هاخدك تشوف امك مش نفسك تشوفها ياغريب .. غريب :اتنفضت فمكانى ولفيت رقابتى اتأكد من اللى سمعته ..لقيت بابا ابتسم واتكالى على عنيه بحركه بيأكد فيها كلامه انا سألته بلهفه .. ازاى ده ؟! هى امى عايشه ! ماهر: لا ياحبيبي امك ميته بس صورها وحاجتها وكل زكرياتها محتفظ بيها في مكان خاص بينا.. وكل ماتوحشني بروحلها واتكلم معاها واحكيلها واقولها علي كل حاجه... واعرفها كل حاجه عنك وبحس انها سامعاني..... هاه ايه رأيك بقاا نروح هناك.. وهناخد داده سميره تفضل معاك هناك.. وانا هقعد معاك علطول ومش هسيبك... قولت ايه. غريب: وهي دي محتاجه سؤال يعني؟ اكيد طبعا انا مليش مكان فالفيلا دلوقتي.. ماهر: اوعي تقول كده الفيلا بتاعتي وكل حاجه ملكي ليك حق فيها. غريب: انا مش بدور على حقوق انا كل اللي عاوزه مكان اعيش فيه. ماهر هز دماغه بالم على حالة الغربه اللي بقا حاسس بيها ابنه وهو فوسط اهله. خلص ماهر كل اوراق الخروج واخد غريب وداده سميره وراح بيهم لمحراب حبه وهو فرحان عشان حاسس ان اميره هتشوف غريب وهو راجل وتفرح بيه وغريب كمان يشوف صورة امه ويتعرف عليها. وصلو الشقه ودخل ماهر ساند غريب هو وداده سميره. غريب : معرفش ليه اول مادخلت الشقه دي حسيت براحه غريبه؛ مش مبالغه بس فعلا جاني احساس اني بانتمي للمكان دا..... بصيت حواليا وشفت صورة وحده ست بالحجم الطبيعي متعلقه علي الحيطه.. سبتهم ورحت وقفت قدامها ولقيت صورتي وانا صغير متعلقه فوق الصوره علي صدر الست اللي في الصوره.. دققت فيها وشفتها ...ملامح هاديه، مريحه، ابتسامتها ولمعة عيونها تحسسك ان الدنيا حلوة ،تحس وانتا قدامها ان الصوره فيها حياه .. بصيت لبابا شاورلى بدماغه عرفت ان دى صورة امى ..قلبى دق بسرعه .. قربت اكتر ولمست وشها ومشيت ايدي علي كل تفاصيلها ونزلت بلمساتي ووقفت عند قلبها....قولتلها انا متأكد انك لو كنتى عايشه كنت بقيت اغلي حد هنا.. مشيت ايدي علي صورتي اللي علي صدرها وقلتلها: تعرفي انا نفسي فأيه دلوقتي....نفسي لو كنت قادر اترمى فحضنك فاللحظه دي... والله لو هموت بعدها مش مهم....انا مشتاقلك ومحتاجلك اوي ياامي اوي.. نزلت دموعي وانا بتخيل امي قدامي دلوقتي بشحمها ولحمها.... بصيت ورايا لقيت ابويا دموعه نازله وساند ضهره علي الباب وباصصلي بنظره مش قادر اصنفها: ندم؛ الم؛احساس بالذنب مش عارف بس اللي عارفه كويس انه بيتألم زيي ويمكن اكتر مني....بصيت لداده سميره لقيتها مغطيه وشها بطرف طرحتها ومفيش،غير كتافها بتتهز من البكا... قلتلها خديني ارتاح ياداده حاسس ان الدنيا لفت بيا... جت سندتني وبابا جه جري سندني من الناحيت التانيه ودخلوني اوضه صغيره بالنسبه لاوضتي اللي فالفيلا لكني حسيت فيها براحه نفسيه . وصلت السرير واتمددت عليه وطلبت من داده سميره انها تجيبلي الشنطه اللي فيها حاجتي من بره وراحت تجيبها.. ماهر:طيب هروح انا اجيب اكل وشوية لوازم للمطبخ ...وبالمره هعدي علي الفيلا اجيبلك هدوم... عاوز حاجه معينه اجيبهالك معايا؟ غريب: هاتلي فرشه ومعجون معاك يابابا لوسمحت وياريت تجيبلي شنطتي البني اللي جبتها من المدرسه معايا عشان فيها حجاتي الضروريه كلها. ماهر : حاضر ياحبيبي من عنيا .. بابا خرج ودخلت داده سميره وحطت الشنطه جمبي علي السرير. وقالتلى انا هشوف حال الشقه واشوف هنحتاج ايه عشان اخلي ماهر بيه يجيبه...عاوز حاجه ياغريب غريب:لا ياداده شكرا اتفضلي انتي. خرجت داده سميره وانا فتحت شنطتي وخرجت الاجنده اللي بقيت بحس وانا بقرا فيها ان ماما هي اللي بتكلمني بصوتها الحنين وبعد ماشفت صورتها هقدر اتخيلها صوت وصوره كانها قاعده قدامي وبتحكيلي.... اميره: اتصل عليا ماهر بالليل واضطريت اني استنى هو اللى يتصل بيا عشان انا معنديش ليه رقم فاسكندريه وإلا كنت كلمته مليون مره... اطمنت عليه واطمن عليا واستأذنته اني اروح لمريم اقعد عندها اليومين الباقيين لغاية مايرجع ووافق علطول.... بس أمني اني آخد معايه كرتونة عصير الرمان اللى جايبهالى واشرب منها علطول عشان يبقي مطمن عليا. قلتله حاضر قلي وعد قولتله وعد.... كلمت مريم وقلتلها اني جايلها وهفضل معاها يومين كاملين وهي طارت من الفرح... قفلت السكه معاها وقمت عشان أستحمي وافطر والبس واروحلها... هي كده كده هتروح الشغل يعني هفضل قاعده لوحدي مستنياها....يلا بس احسن مااقعد فالشقه هنا.... ملحقتش اقوم ورن التليفون... مريم...بقولك انا اجزت النهارده عشان اقعد معاكي اطول وقت ممكن... ولو كنتي مفطرتيش تعالي نفطر سوا انا لسه مفطرتش...هعملك شوية فول من اللي وصي عليهم لقمان... قلتلها وهو كذلك بس حضري بصل اخضر عشان هانتقم.. قالتلي لأ البصل دا تجيبيه سيادتك وانتي جايه وتجيبي طعميه سخنه كمان. قلتلها علم وينفذ يافندم...قفلت معاها وقمت بنشاط استحميت بسرعه بسرعه ولبست ونزلت جررري... نزلت قبل البيت اشتريت بصل وطعميه ...وانا قدام العماره ولسه هطلع افتكرت اني مجبتش معايا العصير...ضربت جبينى بكف ايدي ورجعت للسوبر ماركت واشتريت عصير ليا ولمريم ورجعت....اصلي وعدت حبيبي مقدرش . طلعتلها وفطرنا وقعدنا واتكلمنا كل الكلام المتخزن عندنا لما تعبنا.... اقترحت علي مريم نروح العصر لماما فريده عالدار عشان وحشتني اوي ونفسي اشوفها.... قالتلي انتي كمان واحشاها اوي وزعلانه منك عشان نسيتيها كل المده دى بس قالتلي مقولكيش انها زعلانه عشان تشوف انتي هتفضلي اد ايه مش هتسالي فيها.... قلتلها ياااخبر كله الا زعل ماما فريده انا النهارده هروحلها واصالحها وابوس الايادي كمان.. مريم يومها مبطلتش كلام كانها مش عاوزه تفوت لحظه متتكلمش معايا فيها... بصتلها وحسيت اد ايه هي حاسه بالوحده من بعدي...طب انا عندي ماهر، هي عندها مين وانا كنت كل اصحابها واهلها... بصراحه صعبت عليا اوي وفكرت لو نقلت قريب مني نقدر نكون اغلب الوقت مع بعض وخصوصا لماماهر يكون فشغله او فبيته التاني... لكن المسافه بين المنطقه اللي انا ساكنه فيها والمطعم اللي بتشتغل فيه مريم طويله؛ وكده مرتبها يضيع فالمواصلات... وعشان تسيب الشغل اللي بقالها سنين فيه وبقا ليها مكانه خاصه عند صاحب المطعم وبيعتبرها زي بنته وكل الشغالين معاها بيحبوبها ويحترموها وتدور على غيره..صعبه بصراحه... ملقتش حل غير انى اقنع ماهر نتنقل احنا هنا او حتي يشوفلنا شقه ايجار فنفس العماره دي....ايووووه هو دا احسن حل.... مريم نغزتني بالمعلقه فدراعي وهي بتزعق: هييييى رحتي فين بقالي ساعه بكلمك وانتي مسوحه علي نفسك... قُطع الحب وسنينه اللى بيبهدل الناس كده . حضنتها وبوستها وقلتلها...معاكي ياروحي وهفضل طول عمري معاكي... ضحكت وحضنتني وهمست فودني.. اتعاصتي صلصه من المعلقه متزعليش.... بعدتها وبصيت علي هدومي لقيتها كلها صلصه بصتلها وبرقتلها...قالتلي علفكره قبل ماتتهوري علي رأي المثل. لعمصة الصلصه محبه... قلتها دا مثل معفن من اختراعك انتي دا....اوعي كده خليني اغسلها قبل ماتبقع...زقيتها ودخلت الحمام وبقيت اغسل واشتم عليها وهي تضحك. اذن العصر ولبسنا ورحنا لماما فريده لقيتها زعلانه مني جداااا وبالعافيه صالحتها...بس الصراحه هي عندها حق برضو ،حبي لماهر نساني الدنيا وبعدني عن كل حبايبي وخلاني طلعت واطيه قدامهم.. استحملت بقا وابل الشتيمه من ماما فريده وانا ساكته ومريم فرحانه فيا *********** اليوم التالت لماهر النهارده وكلمني قالى عدي علي ايدك 6 ساعات وبعدها هكون عندك استنيني .. يااااااااي ماهر رااااااجع من السفرررر.. حسبت الست ساعات لقيته هيوصل عالمغرب وكمان قلي انه هيقعد معايا اسبووووع بحاله ليل نهار عشان قال لمراته انه هيقعد فاسكندريه عشر ايام.... مريم كانت فالشغل وانا اول ماقلي كده لبست وجيت طيرررران علي شقتي ..فرحااانه وعاوزه ارقص.. عاوزه اغني...عاوزه .! انا عاوزه ايه؟ عاوزه اعمل حجات كتتتير اوووي هروح كوافير واحضر كل الاكل اللي بيحبه حبيبي وهلبسله اللون النبيتي اللي بيعشقه عليا... هملا الشقه شموع...هعيشه واعيش معااااه احلي ليله.....وياسااااعه بالوقت اجري خلي الحبيب ييجي بدري ....... هقوم بقا يدوووب الحق... *********** النهارده ليا اسبوووع مكتبتش حاجه فالاجندده...مش هوصف الايام دي غير بكلمتين...اسبوع فالجنه...كنت بنام واصحي علي انفاس حبيبي مكنتش بنام غير علي صدره.. طول الوقت حاضنين بعض علطووول دافن دماغه فرقابتي ويشم فيها ويمسك خصله من شعري ويشمها... بقا ادمان عنده الحركه دى .... لاحظت فآخر يوم فالاجازه مشالش عينه من عليا....بيدقق فكل شبر فيا ... حسيته بيحفر صورتى جوا عنيه ... رحت المطبخ جبت كبايه ميه ورجعت بشرب بصيتله لقيته سرحان قلتله بيفكر فايه حبيبي.... جاوبني وهو لسه سرحان...بفكر ازاي هنعيش من غير بعض...انا الكبايه وقعت من ايدي وشهقت وحطيت ايدي علي قلبي... وهو هنا انتبهلي وقام مسكني بلهفه وبعدني عن القزاز وقعدني جمبه... قلتله بخوف تقصد ايه نعيش من غير بعض ياماهر !.... قلي انتي فهمتي ايه ياهبله انتى ! انا قصدي لما ارجع للفيلا وابعد عنك.... اصلك متعرفيش انا اتعودت علي وجودك جمبي ازاي. ارتحت شويه واترميت فحضنه وهو لف اديه حواليا واتنهد.....لكن مش عارفه ليه حسيت بنغزه فقلبي وحسيت اني لسه خايفه مش عارفه ليه... قام ماهر وابتدا يلم فالقزاز المتكسر بأديه بالراحه ،وانا حاطه ايدي علي قلبي وبراقبه وهو بيلم القزاز ولما خلص بص للقزاز المتكسر وفضل يتأمله شويه وبعدين راح رماه وغسل اديه ، وانا قمت نشفت الارض من الميه...بس انا حاسه ماهر مخبي حاجه عليا....صحيح مبقاليش مده كبيره معاه بس انا بعرف ماهر حاسس بايه من عيونه...مش هقول غير ربنا يستر وميكونش واقع فمشكله فى شغله ولا بيته التاني. غريب: قفلت الاجنده بعد ماعلمت الصفحه اول ماسمعت صوت بابا وحطيتها تحت المخده....اتفتح الباب مره وحده علي آخره ودخلت ناديه من الباب زي الصاروخ وطلعت السرير ونطت عليا وحتي علي دراعي المكسور وفضلت تبوس فيا جامد وانا اضحك وحضنتها بدراعي السليم... بابا دخل وراها وحط الشنطه جمبى على السرير وقال : طلعت بالعربيه بعد ماخرجت من الفيلا وفنص الطريق طلعتلي العفريته دي مره وحده من الدواسه اللي ورا ،خضتني خلتني كنت هعمل حادثه... من قبل مااتكلم قالتلي عارفه انك رايح لغريب فالمشتسفي وهروح معاك يعني هروح يامه انتا كمان مش هتبقى بابا وهزعل منك زى مازعلانه من ماما ... فجبتها وامرى لله .. غريب :انتا جبتلى احلى حاجه فالدنيا ... نزل بابا يجيب باقى الحاجه من العربيه وناديه فضلت فحضنى وتبوس فيا وتبوس فدراعي المجبس وكل شويه تقولى بيوجعك واقولها لا . بابا بعد ماجاب باقى الحاجه اتصل على ماما سميه قلها ان ناديه معاه وانها هتفضل معاه كام يوم وقفل السكه علطول من غير حتى مايستنى ترد عليه .. وقف فباب الاوضه وبصلنا شويه وهو مبتسم وبعدين قلى : انا رايح الشركه ياغريب همضى شوية اوراق واجى بسرعه وكمان اجيب هدوم نوم للبرنسيس ناديه ... ناديه عملتله باي ورمتله بوسه فالهوا وهو ردهالها ومشى وهى بصت لايدى وقالتلى بتوجعك ؟ قلتلها لا ... قامت تتنطط وتلف فالشقه زى الفراشه وتكتشف كل شبر فيها وجات تجرى وطلعت على السرير وهى بتنهج .. ناديه :مين اللى فالصورة بره دى ياغريبووو غريب :دى ماما اميره ياناديه مامتى . ناديه :انتا جبتلك ماما تانيه لما ماما سميه مرضيتش تبقا مامتك صح . قلتلها :انا مجبتهاش هى امى من الاول . ناديه :انا مش فاهم ؟ غريب :اولا اسمها فاهمه ه ه ه مش فاهم قلتلك الف مره انتى بننننت ..ثانيا هى امى يعنى هى اللى ولدتنى يعنى انا جيت من بطنها .. وبعد ماولدتنى ماتت وماما سميه هى اللى بقت ماما بعد كده . ناديه :بس اقولك حاجه ...مامتك الاولنيه احلى من ماما سميه خساره انها ماتت . غريب :فعلا خساره ....بصيت لناديه لقيتها بترفع الفلنه بتاعتها وبصت على بطنها ...وبعدين قالتلى ...هو النونو بيدخل البطن ازاى ؟! سكت وفكرت شويه وبعدين قلتلها : عارفه الكبسوله البلاستيك دى اللى بتبقى لونين فبعض ، اهو النونو بيبقا جوا كبسوله وبيكون صغنن جدااا تبلعها الست تدوب الكبسوله البلاستيك ويخرج النونو منها ويفضل قاعد جوا معدتها وياكل ويشرب من اللى هى بتاكله ويكبر وبعدين تولده ... ناديه : وبتولده ازاى؟ غريب :معرفش. ناديه :طب وليه الراجل ميبلعش كبسولة النونو ويولد هو كمان ؟! غريب :عشان حجات كتير اوى مش هينفع اقولهالك واتفضلى روحى لداده سميره اقعدى معاها ...يلا . ناديه مدت بوزها بزعل ونزلت من على السرير وراحت لداده سميره وهى زعلانه .....مهو اصل هقولها ايه دى انا ؟! ايه الغلب دا . مددت ع السرير ولسه هغمض عنيا لقيت ناديه باصالى بدماغها من الباب وقالتلى: طب هقعد جمبك ومش هسأل على حاجه تانى . مديتلها ايدي وهى جت جرى طلعت عالسرير ونامت على دراعى وحضنتنى بأيدها من وسطى ونمنا سوا .. ******** مؤمن روحت من عند عم طاهر وقعدت مع نفسي فالتايه وانابسأل نفسي ...ايه الورطه اللى ورطت نفسك فيها دى ياد يامؤمن ..؟ كيف هقدر اصطبح واتمسى بوش بت طاهر دى كل يوم ؟ فركت وشى بايدى وبعدين رفعت عينى وبصيت حواليا عالتايه وحيطانها المشققه وقلت لنفسى .. بس هيبقى حداى بيت له حيطان شديده تحمينى من برد الشتا وسقف يمنع عنى شمس الصيف ونارها . وكمان هيكون حداى قيراطين وابقا صاحب ملك ومحدش يقدر بعد اكده يقول عليا نقوله ولا يعايرنى بقلة اصلى ....بكفياك يامؤمن عشت طول عمرك رحال كيف الطير المهاجر ... تعبت وجه الوكت اللى لازمن احط فيه على ارض واعشش واعيش .... يبقا لازمن تغمض عينك عن الشكل وامرك لله . ********* ليل تانى يوم من جية عريس الغفله طلعنا انى وامى ورحنا بيت جواهر حكيتلها عن اللى حصل وخضة العريس اول ماشافنى وهى تسمع وتضحك لما كانت هتموت من الضحك .. ليل :عتضحكى انتى والراجل قطع الخلف بسببى ياعينى ....منا كمان غلطانه مكنش المفروض ادخل عليه مره وحده اكده . جواهر ردت من وسط ضحكها : امال كنتى عاوزه تدخلى عليه كيف ياحظى ؟ تمدى رجلك وتصبرى شويه وتمدى يدك وتدخلى حته حته !😂 ضحكت معاها وكل مااسكت افتكر منظر مؤمن وارجع اضحك وجواهر تضحك معاى ... بس جواهر بطلت ضحك فجأه وملامحها اتقلبت وقالتلى : طب وعلى اكده ياليل لو اتجوزتى هقدر اشوفك تانى ؟ يعنى هتقدرى تروحى وتاجى عليا كيف دلوك اكده ؟ قلتلها :مش عارفه والله ياجواهر ..بس يعنى هو انتى شفتى العريس عاود تانى ! دا مش بعيد بعد ماشافنى يكون خد حاجته وهد تايته وطفش من البلد كلها 😂. *خدت قعدتى مع جواهر وامى خلصت اللى وراها وندهت عليا وروحنا .... اول ما وصلنا لقينا ابوى قاعد على المصطبه اللى قدام الباب واول ماشافنا جا علينا بسرعه وشكله فرحان وقال لامى : مؤمن رضى بليل وبعتلى مع حامد عشان احددله معاد قريب للجواز .. جنه :ياكرمك يارب ..بس ايه بسرعه ديه هو سلق بيض ولا ايه دا جواز ودى الحيله ياطاهر ...يعنى لازمن فالاول نرشو البيت شوية جير عشان الحيطان تتجلى ونبعتو نجيبولهم اوضة نوم من البندر ... واهم من ديه كله انى لازمن الم حريم البلد كلياتهم واخبز بسكوت ومنقوش وافرح وافرح حبايبى ... طاهر :وهنجيبو منين لده كله ياجنه . جنه :متخافش من حاجه يابو ليل مرتك يدها مش مخرومه وعتعرف تحافظ عالقرش زين وعامله حساب اليوم ديه وبحوشله من زمان قوى ...اماااال دى ليل يابو ليل فرحة عمرنا ... وكمان لو الفلوس قصرت نبيعلنا غنمتين ونكمل بيهم . طاهر :ربنا يخليكى ليا ياجنتى يااصيلة ياشيالة همومى ... جنه :ويخليك لينا ويديمك خيمه تضلل علينا ياغالى .. ابوى وامى بصولى وحضنونى هما الاتنين مع بعض وكل واحد حبنى من خد وهما عيباركولى .. طاهر :يعنى ارد عليه اقوله ميته الجواز ؟...بس مش عاوزين نطولو على الراجل احسن يطفش مننا ياجنه . جنه :له متخافش مهيطفشش بص هى ليل فاضلها ٤شهور وتتم ١٣سنه تكملهم ونعقدولها ...بس عاوزاك من هنا لوكتها كل يوم تجيبه اهنه وانى هحمر واشمر ونوكلو وندادو ونحادو وهو هيلبد متخافش ... طاهر :زى بعضو مفيش قول من بعد قولك يام ليل ... ********** جميله ليل رجعت تيجى لجواهر ومن ساعتها نفسيت جواهر رجعت اتحسنت من تانى وانا كمان ارتحت وانا شايفاها مبسوطه ... لكنى اليومين دول قلقانه من تصرفات محمد معايا ..اتصالاته قلت خالص ..وردوده عليا بقت مختصره وحاساه مش طبيعى ودا شاغلنى عليه اووى ...دا حتى ميعاد اجازته عدى من ٥ شهور ومنزلش وقلى مرضيوش يدونى اجازه ...من امته مش بيرضو يدوه اجازه ؟ قلت محدش هيريح قلبى غير محروس ..اول مايتصل بامه هكلمه واسأله ايه اللى بيحصل مع محمد وهو مش هيخبى عنى وهيقول علطول .. لكنه له فتره متصلش هو كمان .. فيوم قاعدين كلنا بالليل بنتفرج على مسلسل الساعه ٨ ورن التليفون ردت سلفتى وكان محروس ... جريت على التليفون عشان اكلمه واساله على اخوه لكن مبروكه بقا ليها رأى تانى .. زعقت فيا وقالتلى : ايييه رامحه عالتلفون ليه انتى ؟... جوزك دا كمان ورامحه تكلميه قبل الكل وتقعدى تودوديله وتخليه تحت باطك وتنسيه امه وتكوشى عليه ؟ اتنفضى غورى من قدامى قبل ماانوم العكاز دا فراسك افلقها نصين ... غورى جميله :ياامى انا هسأله عن اخوه بس . مبروكه : ولا تسأليه ولا يسألك و محن النسوان ده تبطليه ... اصل انى فهماكى زين ..شفتيه راح الكويت وربنا فتح عليه قلتى لما الف عليه واجيبله وحده من قرايبى بت عمى ولا بت خالى تعيش معاى فالعز ديه ونعملو رباطيه مع بعض ونخربوها ...له ياحبيبتى طمنى حالك محروس مش هخيبه خيبة محمد ... جميله :يلهوى عليا وعلى سنينى ! خلاص ياماما مش عاوزه اكلمه ولا هسأل على حاجه .. مبروكه :احسن برضو ..يلا فَسحى من قدامى .. رحت قعدت جمب جواهر وميلت عليها ووشوشتها ... بت ياجواهر روحى سلمى على عمك محروس واساليه عن ابوكى وهو بيحبك لو فيه حاجه هيقولك علطول. جواهر : انى اصلا اول ماسمعت سيرته جسمى قشعر ..كمان جايه امى تقولى كلميه ! قلتلها :له يمه انى لا هكلم ولا اسلم ولا هسأل عن حاجه ابوى زين وعيكلمنا ومفيهوش حاجه .. قرصتنى امى فدراعى قرصه واعره وقالتلى : ايه قلة ادبك دى ياجواهر! .من امته بتقوليلى على حاجه لا ؟طب قومى اعملى اللى قولتلك عليه والا قسما عظما هيبقا ليا معاكى تصرف تانى خالص .. قمت غصب عنى ورحت وقفت جمب ستى وهى اما شافتنى قالت لمحروس ... جواهر جمبى اهى عاوزه تسلم عليك ...خد معاك اهى ...ايوه منا عارفه حبيبة قلبك ليل متتوحشهاش ليه ..وناولتنى السماعه .. حطيت السماعه على ودنى وسمعت صوته بيقول كيفك ياجواهر ورجعت افتكرت كل حاجه كان بيعملها معايا ...معدتى قلبت وكنت هرمى السماعه من يدى، لكن بصيت لامى لقيتها بتزغرلى ...دوست على نفسى وقلتله...ابوى فيه ايه حاجه حاصلانه معاه ياعمى .. محروس :آباااااى يعنى مكلمانى تسألى على ابوكى مش علي انى ...مكنش العشم ياجوجو ...عموما ياستى ابوكى زين وزى الفل ...واقولك حاجه كمان ابوكى اتجوز ....وهيجيبها وجايلكم قريب ...هاااه تحبى تبشرى امك انتى ولا ابشرها انى .هههههههههه وللحكايه بقيه ..... لكم منى اجمل باقات الزهور 🌹⚘ بقلم /ريناد رينووو❤ الفصل السابع عشر من هنا |
تعليقات
