.jpeg)
رواية انا وابن خالتي الجزء الثاني الفصل الاول بقلم عمرو راشد
كلمة واحدة ومش هكررها،، مين دي يا مروان؟
= دي هتكون مراتي يا هند
نهارك مش فايت،، انت ناوي تتجوز عليا؟
= وفيها ايه،، دي حاجة لا عيب ولا حرام
" بس الموضوع مبدأش من هنا،، الموضوع بدأ من ساعة ما اخترت سعادتي،، اخترت اني اعيش مبسوطة ساعتها مفكرتش انا هعيش مع جن ولا انس بس المهم اني اكون مبسوطة،، انا هند فاكريني،، انا واحدة اهلها د*مرو حياتها بحجة انهم عايزين مصلحتها،، حياتها خربت من اول يوم جواز ،، دخلت في قصص وحكايات كتير مكنش ليا علاقة بيها بس في وسط دا كله قابلته،، هارون
شكرا على التوصيلة
= هارون؟
انتي كنتي مستنية حد تاني ولا ايه؟
" دخلت في حضنه
وحشتني أوي
= انتي كمان وحشتيني جدا
انا مش مصدقة نفسي انك رجعت ليا تاني
= انا موجود من بدري وعمري ما سيبتك يا هند
طب قوم،، قوم عايزين نعمل حاجات كتير أوي
= حاجات زي ايه مثلا
اي حاجة،، انا عايزة اعيش معاك كل لحظة،، استمتع بكل حاجة وانا جنبك
= اهدي بس،، انا عارف انك متحمسة شوية بس متنسيش اني ليا وقت محدد على الأرض وانا مش هينفع اكسر القوانين تاني
" شغفي وحماسي راح وقعدت جنبه بحزن وبصتله
هو انت كنت فين،، ليه سيبتني ؟
= غصب عني يا هند،، انا كان لازم اسيبك عشان احميكي
تحميني من مين؟
= من قبيلتي ولا أنتي نسيتي اللي حصل؟
بس مش انا السبب في اللي حصل
= بس انا خرجت عن قوانينهم وعملت حاجات مكنش ينفع تتعمل
" مسكت ايده
طيب انسا كل اللي فات.. احنا عايزين نبدأ من جديد وننسا اي حاجة حصلت،، انا عايزة ابدأ معاك حياه جديدة،، حياه مفيهاش خوف،، نفسي اعيش مطمنة يا هارون،، عايزة احس بالامان،، عايزة احس اني مش لوحدي
= انتي عمرك ما كنتي لوحدك يا هند،، انا دايما جنبك ومستعد اعمل اي حاجة عشانك
بس انا لسة خايفة يا هارون
= متخلقش اللي يخليكي تخافي وانا موجود،، اطمني مفيش حاجة هتحصل تاني
طب قوم يلا عشان تاخد دش لحد ما ارجعلك
= رايحة فين
هنزل اجيب شوية طلبات من السوبر ماركت
= لازم دلوقتي يعني
مش هتأخر عليك يا حبيبي
= تحبي انزل معاكي أو انزل انا مكانك وتخليكي انتي هنا
لا يا حبيبي مش مستاهلة،، اعمل بس زي ما قولتلك وانا مش هتأخر
" غيرت هدومي ونزلت.. كنت مبسوطة،، لا مش مبسوطة،، انا كنت طايرة من الفرحة،، أخيرا عرفت اختار حاجة انا عايزاها.. عرفت آاخد حاجة من الدنيا بس في نفس الوقت فرحتي مش كاملة،، حاسة بقلق عشان انا عارفة ان مفيش حاجة حلوة بتكمل للاخر ولكن برضو عارفة ان هارون مش هيسيبني،، هو شعور غريب بس المهم اني فرحانة،، خلصت واشتريت كل الطلبات من السوبر ماركت و خرجت.. بس وانا ماشية في الشارع لمحت اتنين واقفين على جنب،، شكلهم كانو شاربين حاجة،،
ايه دا ايه دا،، بص اللي جاي هناك دا
" اللي كان واقف معاه بص ليا وقال
ما تيجي نوصلك يا قمر بدل ما تروحي لوحدك
" الخوف ضر*ب قلبي ومشيت اسرع خصوصا بعد ما لمحتهم ماشيين ورايا،، بسرعة خرجت تليفوني من الشنطة واتصلت ب مروان مرة واتنين لحد ما رد
في ايه يا هند
= الحقني يا هارون،، في اتنين ماشيين ورايا وبيعاكسوني،، انا خايفة أوي.. تعالى بسرعة
حصل
= بتقول ايه؟،، الو
" ساعتها سمعت صوت غريب ورايا،، صوت استغاثة او حد بيصرخ بس صرخته مكتومة،، بصيت ورايا بخوف لقيت هارون ماسك الاتنين و رافعهم فوق بإيده.. عينيه كانت كلها غضب واتكلم ساعتها وقال بصوت مرعب
كيف تجرؤ؟
" كانو بيتخنقو وهما في ايده،، روحهم هتطلع،، ساعتها جريت عليه
هارون خلاص سيبهم عشان خاطري،، بلاش تأ*ذي حد يا هارون
" بص ليا.. عينيه كانت لونها احمر وشكلها يخوف.. رد عليا وقالي
كما تشائي
" وقعو هما الاتنين من ايده،، بعدها عينيه رجعت لطبيعتها تاني وقرب مني و خدني في حضنه
انا دايما موجود،، انا دايما جنبك
= بحبك يا هارون،، بحبك أوي
طب يلا بينا نرجع بقا،، كفاية تأخير لحد كدا
" مشينا لحد باب البيت،، وقفت قدامه وبصتله وقولتله
بقولك ايه،، ايه رأيك لو تاخدني على ضهرك و تطير بيا لحد الشقة فوق بدل الاسانسير
" بدأ يضحك بهستيرية
نطير؟
= ايوا فيها ايه،، مش انت جن وانا اسمع يعني ان الجن بيطير عادي
ايوا عادي بس مش هينفع
= ليه بقا؟
عشان أولا مينفعش حد يشوفنا بالشكل دا،، ثانيا اي حاجة هعملها وهستخدم فيها قدراتي هيكون فيها ضرر على مروان
= ضرر ازاي يعني مش فاهمة؟
جسم مروان نفسه هيتعب لانه مش هيستحمل كمية الطاقة اللي انا هحتاجها عشان اقدر استخدم قدراتي
= بس انت لسة عامل كدا من شوية
كان عشانك،، وعشانك أنتي انا اعمل أي حاجة حتى لو على حساب مروان
= يعني مروان كدا ممكن يتعب
لا هو انا معملتش حاجة اصلا عشان يتعب
= بالشكل دا ومعملتش حاجة
ايوا معملتش حاجة،، انا اقدر اعمل أكتر من كدا بكتير أوي
= انا مجرد ما قفلت لقيتك قدامي
هو المفروض لما تقوليلي ان في حد بيضايقك اجيلك ازاي؟
= ازاي؟
طاير طبعا
" ابتسمت واتنططت على الأرض من الفرحة
يعني انت بتطير بجد؟،، طب خلاص ايه رأيك بقا لو تاخدني على ضهرك وتطير بيا لحد الدور الرابع بس
= اسكتي يا هند و اطلعي قدامي يلا
طب لحد التاني،، حتة صغيرة اهي ومش هناخد وقت
= انتي هتطلعي قدامي دلوقتي ولا اطلع انا واسيبك
" طبعا سمعت كلامه وطلعت ودخلنا الشقة
بص انا هدخل اغير هدومي و اجيلك علطول تكون انت جهزت فيلم حلو نسهر عليه
= طب بسرعة
#بقلم : #عمرو راشد
" دخلت غيرت هدومي ولبست قميص نوم احمر قصير وعليه روب شفاف.. فردت شعري وحطيت ميكب خفيف مع برفيوم لطيف،، خرجت من الأوضة لقيته قاعد وقدامه عصير وفشار وشيبسي و سناكس كتير أوي،، قام وقف اول ما شافني وقرب مني وهو باصصلي وعنيه هتطلع قلوب
انتي ازاي حلوة اوي كدا؟
= حلوة أوي؟
احلى منك مشوفتش
= انا حلوة بس عشان انت معايا وجنبي يا هارون
وقبل كدا؟
= كنت عادية جدا زي أي واحدة
بس أنتي مش زي اي واحدة يا هند،، أنتي غير اي واحدة واحلى من اي واحدة
= بحبك يا هارون
" دخلت في حضنه،، حضنته بكل قوتي اللي بملكها كأني طفلة وبتمسك في أبوها عشان ميمشيش ويسيبها،، اتكلم وانا لسة جوا حضنه وقالي
انتي محتاجة الفيلم دا؟
= بصراحة لا
انا كمان شايف كدا
" خرجني من حضنه وشالني و دخلنا الأوضة،، صحيت تاني يوم،، كان هو نايم جنبي،، قربت منه و بو*سته من خده
هارو...
" لكن لحقت نفسي قبل ما اكمل الاسم و افتكرت انه مش هارون
مروان،، مروان اصحا
= سبيني يا هند شوية
اصحا يلا كفاية نوم
" اتعدل وقام وهو بيتكلم بعصبية
عايزة ايه يا هند؟
= اصحا بقا كفاية نوم،، انت وحشتني
ايه وحشتك يعني،، بلاش انام؟
= لا نام براحتك
ولما هو انام براحتي،، بتصحيني ليه من الاول اصلا
= خلاص يا مروان انا اسفة اتفضل نام
انام ايه بقا بعد القرف دا
= هو ايه اللي قرف،، انا عملت ايه لكل دا؟
معملتيش حاجة،، أنتي مبتعمليش اي حاجة
= لا فهمني معلش انا عملت ايه
يعني احنا امبارح روحنا سوا عند امك عشان نفطر وفجأة كدا تسبيني وتنزلي وبعدها برضو فجأه وحشتك وعاملالي مفاجأه وعايزاني ارجع البيت ولما ارجع متبقيش موجودة واقعد استناكي لحد ما انام
= مش فاهمة برضو فين المشكلة؟
المشكلة انك عايزة كل حاجة على مزاجك،، تروحي عند خالتك بمزاجك ونقعد عندها بمزاجك برضو ونمشي بمزاجك ونرجع البيت بمزاجك كأنك انتي الراجل مش انا،، عايزة الدنيا كلها تمشي على مزاجك عشان بس انتي عايزة كدا لكن انا مش مهم
= مروان انت فاهم غلط،، انا لو كنت بعمل اي حاجة ف انا بعملها عشانك انت
بس بقا كفاية الكلام دا عشان انا شبعت منه،، انتي مبتعمليش حاجة عشان حد،، انتي كل اللي يهمك نفسك وبس
= انا يا مروان؟؟؟
ايوا انتي
" اخد نفس عميق وبعدها كمل كلام
بصي يا هند من الاخر كدا انا حاسس ان في حاجة غلط،، في حاجة انا مش قادر افهمها ولا عارف افهمها وتعبت من كتر ماانا بحاول افهم ومش عارف،، هند انا حاسس اننا بنبعد عن بعض،، احنا مش عارفين نرجع زي الاول ولا حتى عارفين نصلح،، احسن حل يا هند اننا نتطلق!!
= نتطلق!
صدقيني مفيش حل تاني،، انا تعبت و أظن كمان انك تعبتي يبقا كفاية لحد كدا وكل واحد يستريح بقا
" سكت وقعدت على السرير،، مش عارفة ارد اقول ايه.. هو عنده حق اكيد بس برضو هو مش فاهم حاجة،، الحكاية عنده ناقصة وانا مش هينفع افهمه،، بدأ يغير هدومه ونزل وسابني لوحدي،، خرجت قعدت في الصالة بفكر ومش عارفة اتصرف ازاي او اعمل ايه،، مروان مينفعش يمشي لانه لو مشي هارون كمان هيبعد عني،، انا حاسة اني أنانية بس دا من حقي،، من حقي احارب على الشخص اللي انا حبيته،، بس مش على حساب حد تاني،، انا متلخبطة ومش عارفة افكر،، الساعة دقت 6 المغرب و لقيت مروان داخل من باب الشقة،، شافني بس متكلمش ولا نطق بأي كلمة،، دخل على الأوضة ونام،، فضلت قاعدة بفرك في صوابعي مستنياه ييجي لحد ما لقيته واقف قدامي،، قومت وقفت وجريت بسرعة عليه
هارون الحقني،، مروان عايز يطلقني
= مش دي المشكلة يا هند،، في حاجة اهم من كدا بكتير
مفيش اهم من كدا،، بقولك مروان هيمشي وكدا انا مش هعرف اشوفك
= انتي لو مسمعتنيش دلوقتي مش هتعرفي تشوفيني ولا تشوفي مروان
" كان اول مرة يكون متعصب ويكلمني بالطريقة دي
في ايه يا هارون؟
= شمس جات ورايا
شمس مين
= واحدة من قبيلتي كانت بتحبني ومن ساعة اللي حصل دا وانا بعدت عنها تماما و..
ثانية واحدة بس عشان انا مش فاهمة،، انت قصدك ايه
= شمس جاية تنت*قم يا هند
مني؟
= من اي حد كان سبب في بعدي عنها
بس انت خلاص مش عايزها
= احنا معندناش الكلام دا،، عندنا في قوانين وطالما اعترفنا لبعض بالحب يبقا لازم نتجوز
طب وبعدين؟
" لقيته بص على باب الشقة و رجع يبصلي
باب الشقة هيخبط دلوقتي،، خلي بالك يا هند.. خلي بالك من نفسك
= انت هتروح فين،، انت هتسيبني؟
مروان هيصحا حالا،، خلي بالك من نفسك
" مشي لحد الأوضة و دخل وقفل الباب عليه،، بعد دقيقتين بالظبط باب الشقة خبط بس بطريقة غريبة،، كان بيخبط بطريقة منتظمة،، 3 خبطات ورا بعض بإنتظام،، حسيت ان مفاصل جسمي كلها سايبة ومش قادرة اتحكم في نفسي،، حاولت اتحرك على الباب عشان افتح لكن لقيت باب الأوضة اتفتح ومروان خارج منه
استني يا هند هفتح انا
" وفتح باب الشقة وشوفتها.. رحب بيها و دخلت،، بنت جميلة في العشرينات،، شعرها اصفر ،، عنيها عسلي أو مش عسلي،، هي لون عنيها غريب زي لون عيون القطط،، عنيها فيها لمعة غريبة جدا كأنها بتنور،، دخلت وقعدت على الكرسي وانا كل دا في دنيا تانية لحد ما حسيت ب مروان
هند،، يا هند
= ايه يا مروان
بكلمك مبترديش
= معلش كنت سرحانة
طيب احب اعرفك،، شمس
" لقيتها ابتسمت ليا،، بس ابتسامتها مش مريحة،، قامت وقفت وسلمت عليا،، بعدها هو شاور عليا وقال
و دي هند اللي حكيتلك عنها
" وقفت قدامه وقولتله
مين دي يا مروان؟
= مش وقته،، ادخلي اعملي حاجة نشربها الأول
قولي مين دي الاول اللي داخلة بيتي وانا معرفهاش وانت مرحب بيها أوي كدا،، مين دي؟
= بعدين يا هند
لا مش بعدين ومش هكرر سؤالي،، مين دي يا مروان
" صوتي كان بدأ يعلى.. ابتسم ليا وقالي
دي هتكون مراتي يا هند
= نهارك مش فايت،، انت ناوي تتجوز عليا؟
بالظبط كدا
= قول كدا بقا،، قول انك كنت عايز تطلقني عشان تتجوز الهانم
وفيها ايه،، انا مش بعمل حاجة عيب ولا حرام
= مروان انت مش فاهم حاجة،، دي مش...
" شمس قاطعتني وقالت
مش ايه يا حبيبتي،، ايه اول مرة تشوفي راجل بيتجوز على مراته ولا انتي زعلانة عشان معرفتيش تملي عينه
= بلاش أنتي عشان انا عارفة انتي دخلتي هنا ازاي
هكون دخلت ازاي،، مانا قدامك اهو داخلة من الباب
" رجعت ابص على مروان وكلمته
مروان افهم اللي انت بتعمله دا غلط
" لكنه بدأ يحط ايده على دماغه بعدها رجع قعد على الكنبة،، ساعتها شمس قربت مني ومسكت ايدي بقوة
هو انتي كنتي فاكرة انك هترجعي هارون ليكي واحنا هنسيبك ونسكت،، دا انتي حسابك تقيل معانا اوي يا هند،، اوعدك يا هند انك عمرك ما هتشوفي خير تاني
" لمحت من وراها مروان واقف بس لا دا مش مروان،، لقيته اتكلم وقال
نورتي الارض يا شمس!!
