رواية قاسى ولكنه احبنى الفصل الثاني 2 بقلم اسراء إبراهيم

رواية قاسى ولكنه احبنى كامله جميع الفصول بقلم اسراء ابراهيم 

 اسكربت

الجزء الثاني والاخير  

اول ما لارين شافت عمار جاي عليهم اتصدمت والكلام وقف في زورها واتفاجأت بيه بيشد*ها من ايديها وبيسحبها وراه تحت نظرات يوسف اللي واقف مصدوم ،، خرج عمار برة الڤيلا ووقف اول ما لارين شدت ايديها منه  

لارين بخوف / انت واخدني علي فين انا معملتش حاجة 

عمار بغضب مبوش مبرر/ انتي ازاي تيجي هنا من غير ما تعرفيني وايه اللي جابك هنا اصلا ؟

لارين بتبرير / ده فرح صحبتي وانا هنا مش لوحدي انا مع نيرة اختك وبعدين اقولك ليه ،،انت مش ولي امري عشان اخد اذنك 

عمار بغضب من عِند لارين/ طالما قاعدة عندي تبقي مسئولة مني وياريت متقفيش قصادي عشان متندميش 

لارين خافت بس مبينتش وردت بعند / وانا مش خايفة منك وانت ملكش دعوة بيا وانا مش قاعدة عندك انا قاعدة مع عمتو وهي عارفة اني جاية هنا انا ونيرة  

عمار بغضب اكبر / انا لو شوفتك واقفة مع الشاب اللي جوة ده تاني صدقيني هخليكي تندمي انك مسمعتيش كلامي 

لارين بحد*ة / وانت مالك انا اقف مع اي حد انت مش هتحكمني 

عمار مقدرش يتحكم في نفسه فرفع ايديه عشان يضر*بها بس لارين خافت وحطت ايديها علي وشها بخوف وعمار وقتها اتعصب اكتر لما شافها خافت منه وضر*ب الشجرة اللي جمبها بايديه جامد لدرجة ان لارين اتنفضت عالصوت 

عمار بغضب/ عالعربية لحد ما اجيب نيرة ،، حاااالا يلااا

جريت لارين علي عربية عمار اول ما هو زعق جامد وركبت عربيته بخوف وهي بتعيط بحرقة وشوية وجه هو ونيرة اللي ركبت جمبها ومستغربة حالتهم هما الاتنين 

نيرة بقلق /لارين ،،مالك يا حبيبتي بس ايه اللي حصل 

لارين بصت لعمار اللي كان سايق بغضب ونفسه عالي من شدة غضبه ورجعت بصت لنيرة واترمت في حضنها وهي بتعيط وبقت نيرة تطبطب عليها لحد ما هديت وعنيها راحت بتلقائية لايد عمار اللي كان سايق بيها وشافت ايديه بتنز*ف ومتعرفش ليه قلبها و*جعها اوي 

،، وصلو الڤيلا ونزلت لارين جري وطلعت اوضتها ووراها نيرة وعمار ركن العربية ودخل الڤيلا هو كمان وقبل ما يطلع اوضته وقفته انعام بصوتها 

انعام بقلق / ايه اللي حصل يا عمار يا حبيبي ،، نيرة قالتلي انك انت ولارين اتخانقتو 

عمار بغضب / ازاي محدش يقولي انهم خارجين ورايحين فرح ؟ عالاقل عشان اكون معاهم ومحدش يضايقهم 

انعام بهدوء / دي غلطتي انا عشان نيرة قالتلي ابلغك وانا قولتلها هبقي اقولك ونسيت ،، بس مش مستاهلة انك ترعب لارين وتخليها منهارة بالشكل ده ،، يابني دي مدخلتش بيتنا بقالها 12 سنة بسبب خوفها منك ،، ليه تخليها تخاف اكتر 

عمار بتكشيرة/ بسببي انا ازاي ؟

انعام بتنهيدة/ ايوة بسببك ،، وهي صغيرة اما كانت مستخبية في اوضتك وانت زعقتلها وقتها هي خافت منك ومن وقتها عندها فوبيا وبتخاف من اي صوت عالي ومكنتش بترضي تيجي بسببك 

عمار افتكر اما لارين كانت في المطبخ وخافت وسابته وجريت علي فوق وانهاردة لما هي عصبته و رفع ايديه عشان يضر*بها وخوفها منه ساعتها ولع*ن نفسه وغبا*ءه علي تصرفه 

عمار بهدوء/ بعد اذنك يا امي ،، انا تعبان وهطلع استريح 

طلع عمار ووقف قدام اوضة لارين وكان سامع صوت عياطها ونيرة معاها ورفع ايديه عشان يخ*بط بس كان متردد بس اتشجع وخ*بط وفتحلته نيرة وعنيه راحت لارين اللي كانت بتمسح دموعها بسرعة 

عمار بهدوء لنيرة/ سيبينا شوية يا نيرة 

لارين بخوف ولهفة/ لا ،، نيرة متسيبينيش معاه عشان خاطري 

عمار لنفسه / للدرجادي خايفة مني 

عمار بجدية / سيبينا يا نيرة 

نيرة بتردد/ حاضر يا ابيه 

خرجت نيرة وقفلت الباب فقامت لارين وقفت وبصت لعمار بخوف ورجعت خطوة لورا اول ما لقته بيقرب فوقف هو مكانه بضيق 

عمار بهدوء / الشاب اللي كنتي واقفة معاه واللي قابلتيه في المول يبقي للاسف صاحبي وكان بيعاكسك لانه بتاع بنات وعنيه زايغة وعشان كدة انا اما شوفتك واقفة معاه اتعصبت ،،هو ده كل الموضوع ،، احم مكنتش اقصد اني اتعصب عليكي بس انتي عِندك اللي وصلني لكدة 

لارين بدموع/ انا معرفهوش هو لقيته بيسألني علي الكافيه في المول ورديت بكل ادب ولما لقيته في الفرح معرفتوش اصلا وكان لسة بيعرفني بنفسه اما انت جيت وخدتني 

عمار بتنهيدة / انا اسف  

لارين اتفاجأت باعتذار عمار ،، مكنتش متخيلة انه ممكن يعتذر او يقول كدة 

لارين بهدوء وهي بتاخد خطوة ناحيته/ حصل خير 

عمار بابتسامة / يعني مش زعلانة مني ؟

لارين ببراءة/ لا خلاص مش زعلانة 

عمار ابتسم وكان هيخرج بس لارين لحقته بصوتها وهي بتقرب منه واول ما عمار لف وشه اتفاجأ بيها بتقرب منه وبتمسك ايديه بحزن 

لارين بحزن/ انا اسفة لاني السبب في ان ايدك تتعو*ر 

عمار وهو بيسحب ايديه/ لا عادي بسيطة 

لارين باصرار/ ممكن تسمحلي اعالج ايدك ،،ارجوك متقولش لا 

عمار مردش بس حرك راسه بموافقة فلارين ابتسمت وجريت بسرعة وجابت القطن والمطهر وبقت تطهرله ايده وهو متابعها بهدوء واحساس جديد عليه لاول مرة يحس بيه 

لارين برقة/ انا خلصت ،، ممكن بقي تروح ترتاح وبكرة هبقي اغيرلك عليها 

عمار بابتسامة/ مش ضروري ،،تصبحي علي خير 

لارين بابتسامة / وانت من اهل الخير 

خرج عمار ولارين قفلت الباب وراه ووقفت تبتسم بسعادة بعد ما كانت بتعيط ومنهارة وقعدت تعيد احداث الوقت اللي اتكلمت فيه معاه    

.....................  

تاني يوم كانت نازلة لارين وهي بتبتسم بسعادة وبتدور بعنيها عليه وفعلا كان هو قاعد عالسفرة مع انعام ونيرة اللي كانت مستغربة حالة لارين 

لارين بابتسامة/ صباح الخير 

انعام بحب / صباح الجمال يا حبيبتي يلا اقعدي افطري 

لارين وهي بتقعد وبتبص لعمار / ازيك يا عمار ؟

عمار بابتسامة جديدة عليه/ تمام وانتي ؟

لارين بخجل/ تمام الحمدلله

كانت نيرة متابعة اللي بيحصل ومصدومة وخصوصا من عمار 

انعام بابتسامة/ متنساش انهاردة موضوع سيلا بنت عمك يا عمار ،،هي هتجيلك الشركة عشان تشوف هتعينها فين 

لارين باندفاع/ هو ممكن تاخدني معاك الشركة انهاردة يا عمار،، انا عمري ما روحت هناك ابدا قبل كدة 

عمار بابتسامة/ اكيد ،،اطلعي غيري هدومك وهستناكي 

لارين بفرحة وهي بتقوم/ بجد ،، خمس دقايق مش هتأخر ،،اوعي تمشي وتسيبني 

ضحكت انعام علي لارين وطريقتها ونيرة كانت لسة علي صدمتها 

نيرة بصدمة/ انت عملت ايه امبارح في البت ،، دي ناقص تقولك يا صاحبي 

عمار وهو بيضر*ب اخته بخفة/ خليكي في حالك انتي 

شوية ونزلت لارين اللي اول ما شافها عمار قلبه اتخ*طف وبلع ريقه بتوتر وهي كانت نازلة وعنيها متثبته عليه  

لارين بفرحة / انا خلصت يلا بينا بقي 

انعام بحب/ طيب مش هتاكلي انتي مفطرتيش 

لارين برفض/ لا مش مهم يا عمتو اما ارجع،، يلا بينا يا عمار بقي 

قام عمار وهو من جواه فرحان ان لارين مبقتش تخاف منه زي الاول وبدأت تاخد عليه واخدها في عربيته وطلعو عالشركة  

................ 

في مكتب عمار كانت قاعدة لارين وهي منبهرة بفخامة المكان وبتبص حواليها باعجاب

لارين بفرحة / مكتبك حلو اوي يا عمار ،، بجد تحسه شبهك 

عمار بشك/ شبهي ده اللي هو حلو ولا وحش ،،اوعي يكون قصدك حاجة تانية 

لارين بنفي وهي بتضحك/ لا خالص ،،قصدي انه كلاسيك وشيك زيك كدة 

عمار وهو باصص لارين بتركيز/ هو حلو عشان انتي موجودة فيه 

ابتسمت لارين بخجل وهي بتبص للارض وبعديها عمار طلب ليها فطار وعصير 

عمار بتحذير/ ارجع من الاجتماع الاقيكي اكلتي كل فطارك وشربتي العصير كمان 

لارين بابتسامة / عُلِم وينفذ يا فندم 

خرج عمار تحت نظرات لارين اللي كانت في قمة سعادتها متعرفش ليه بس هي فرحانه اوي انها مع عمار  

،، عدي حوالي ساعة وهي كانت قاعدة زهقانة لحد ما دخل عمار اخيرا فابتسمت لارين بفرحة يس ابتسامتها اختفت لما لقت معاه سيلا بنت عمه متعرفش ليه اضايقت اوي 

عمار بأسف / اتأخرت عليكي مش كدة ،،حقيقي غصب عني 

لارين بهدوء / ولا يهمك 

سيلا بضيق / ايه ده لارين ازيك،، سوري مخدتش بالي منك  

لارين ببرود/ تصدقي وانا كمان ،، يلا مش مهم 

ابتسم عمار علي كلام لارين اللي بصتله بغيظ وهي بتدور وشها 

سيلا بدلع/ طيب يا عمار ممكن تيجي معايا توريني مكان المكتب احسن ممكن اتوه 

عمار قام من مكانه وقبل ما يخرج كانت لارين حطت ايديها علي راسها وهي بتمثل التعب

لارين بتمثيل/ عمار الحقني دايخة اوي

عمار بلهفة وهو بيقرب علي لارين/ لارين مالك انتي كويسه ،، تعالي هنا علي الشازلونج ده  

سيلا بصت للارين بغيظ لانها عارفة انها بتمثل 

لارين بتعب / خليك معايا ممكن ،، انا خايفة اوي 

عمار بلهفة/ متخافيش انا معاكي مش هسيبك ،، سيلا روحي انتي وانا هكلم السكرتيرة توديكي 

مكتبك 

سيلا بغيظ/ تمام 

اول ما خرجت سيلا لارين ابتسمت بانتصار 

عمار بقلق/ طمنيني لسة دايخة ؟ تحبي اروحك 

لترين باندفاع / لالا انا بقيت كويسة ،، خليني معاك هنا 

عمار براحة/ طيب الحمد لله ،، ممكن بقي تتفرجي علي المجلات دي علي ما اشتغل شوية ونمشي سوا

لارين بموافقة / ماشي طالما هتفضل معايا هنا في المكتب 

عمار باستغراب / اومال هروح فين يعني؟

لارين بتهرب / هه ،،قصدي يعني مش هتروح اجتماعات ،، يلا روح اشتغل 

فعلا عمار رجع مكتبه وك

ان بيشتغل تحت نظرات لارين اللي كان سرحانة فيه وبتسأل نفسها ليه بتتصرف كدة معاه ،، معقول تكون حبته ؟

..........................

خلص اليوم وكان عمار ولارين مروحين وفي العربية كانت لارين بتبص من الشباك ومغمضة عنيها باستمتاع والهوا بيطير شعرها وكان متابعها عمار بابتسامة وقلب لاول مرة فرحان لوجود ونس معاه 

عمار بابتسامة / تحبي نروح ولا نروح مكان نشرب حاجة

لارين بابتسامة رقيقة/ ممكن اسألك سؤال يا عمار 

عمار بتأكيد/ طبعا اسألي 

لارين بتردد/ ليه دايما كنت بتبقي مكشر وحا*د كدة ،،تعرف اني كنت بخاف منك اوي 

عمار بعد ما وقف بالعربية / عارف وحقيقي ندمان اوي علي معاملتي ليكي قبل كدة بس انا يا لارين طلعت لقيت بابا كدة ،،عمري ما لقيت اللي يخليني اتغير واكون بطبيعتي ،، 

لارين بابتسامة/ ولاقيته ؟

عمار بتنهيدة وابتسامة جذابة/ لقيته 

لارين ابتسمت واتأكدت من احساسها وقتها انها فعلا حبته ،،امتي وازاي متعرفش بس هي حبت عمار وعشقت تفاصيله وخلاص ،، اتنهدت بعد ما خدت نفس عميق وهي مش عارفة اخرة حبها ده ايه وخصوصا انها مش عارفة ولا متأكدة من مشاعر عمار 

ناحيتها 

........................

بعد يوم قضوه جميل رجعو لارين وعمار الڤيلا واول ما دخلو اتفاجأت لارين بخليل ابوها وهو قاعد مستنيها فصرخت بفرحة وجريت عليه حضنته وبعد سلامات كتير بينهم 

خليل بابتسامة / انا خلاص يا حبيبتي جيت عشان اخدك ونسافر ونستقر برة انا يعتبر نقلت كل مشاريعي فاضل بس شوية اجراءات بسيطة ،، تعرفي انا حاولت انجز كل حاجة بسرعة عشان ارجعلك بسرعة لاني عارف انك مكنتيش عايزة تقعدي هنا

نقلت لارين عنيها بتلقائية لعمار اللي مكنش اقل من صدمتها وكانو هما الاتنين بصين لبعض وجواهم حجات كتيير اوي 

انعام بابتسامة/ يعز عليا فراقكم با خليل ،،ده انا كنت خلاص اتعودت علي وجود لارين في الڤيلا 

خليل براحة/ ما هو اكيد هنبقي ننزل زيارات يا انعام بس انتي عارفة ان معظم مشاريعي برة وانا مبقتش قد كل شوية اسافر وارجع وكمان اسيب لارين لوحدها 

نيرة بحزن/ طيب يا خالو حتي كنت استنيت شوية ،،انا لسة مشبعتش من لارين ،، دي هي صحبتي الوحيدة 

لارين كانت لسة عنيها متعلقة بعيون عمار وكانت بتقوله من جواها اتكلم وقول اي حاجة ،،معقولة هتسيبني ابعد ،، ورجعت قالت لنفسها ،، ماهو اكيد مش هفرق معاه ،، انا مجرد متطفلة في حياته ومشاعري ناحيته هو ملوش علاقة بيها 

خليل باسعجال / يلا يا لارين يا حبيبتي ،،اطلعي حضري شنطتك عشان نرجع الڤيلا ،، ويومين ان شاء الله ونسافر 

قامت لارين بحزن من غير ما تنطق وطلعت بهدوء تلم شنطتها وسابت عمار عيونه متابعاه وقلبه بيدق بع*نف وكأنه بينهره انه ازاي ساكت وسايبها تبعد عنه ،، بس ازاي وهو مش عارف مشاعرها من ناحيته ايه ،،باي حق هيقولها اقعدي   

.........................

كانت واقفة لارين وبتقفل شنطتها بعد ما لمت حاجتها ومسحت دمعة هربت من عيونها بحزن لحد ما انتبهت علي صوته من وراها 

عمار بهدوء/ خلصتي ؟

لارين بتنهيدة / ايوة خلصت وهمشي وهترتاح من تطفلي مش كدة ؟

عمار وهو بيقرب منها /ومين قالك انك لما تمشي هرتاح يا لارين

لارين بحزن وهي بتلف وتبصله / يعني عالاقل مش هتلاقي حد تزعقله ويشبط فيك وانت رايح الشغل  

عمار بتوهان وهو بيزيح خصله شعرها لورا / مش دي الحقيقة يا لارين ،، الحقيقة انك الحياه اللي رجعتلي بعد ما كانت غايبة عني ،، انا محستش بطعم اي حاجة غير بعد ما شوفتك ،، دوبتي التلج اللي علي قلبي وخلتيني احس بدقاته لاول مرة فسامحيني لاني مش هقدر اسيبك تمشي بعد كل حاجة حلوة حسيتها معاكي ،، مش هسمحلك تغيبي بعد ما رديتي فيا الروح من تاني 

لارين بدموع فرحة وهي حاطة ايديها علي وشها/ عمار انت بتتكلم جد ،، انا بالنسبالك كل ده 

عمار وهو بيملس علي خدها بايديه /واكتر يا لارين ،، صدقيني واكتر ،، انا لاول مرة هقولها ،، انا واقع في حبك يا لارين 

لارين بفرحة وهي بتمد ايديها وبتحطها علي قلب عمار / عايزاك تطمنه وتقوله اني لا يمكن هسيبه ابدا واني بس كنت محتاجة اعرف مكانتي عنده وبعد ما اتأكدت صدقني انا اللي مش هسمح ان اي حد يقربلك او يفكر ياخد مكانتي في قلبك ،، لاني بحبك يا عمار علي قد خوفي ورعبي منك حبيتك ومبقتش اعرف يعني ايه امان غير وانا جمبك 

عمار بقلب مخطوف من سحر كلمات لارين / وانا اوعدك انك هتفضلي الاولي والاخيرة في قلبي يا لارين بحبك ،، احم وعلي فكرة انا اتكلمت مع خالي وطلبت ايدك منه وكنت طالع ابلغك سواء وافقتي او لا مكنتش هخليكي تبعدي اصلا 

لارين بضحك/ حتي في الحب قاسي انت يابني حالتك ميئوس منها 

عمار ابتسم بطريقة جذابة وقرب من لارين وهمس قدام وشها / بس القاسي ده حبك انتي وقرر يتغير علشانك انتي وبس يا قلب عمار 

تمت 

#قاسي_ولكنه_احبني 

#بقلمي_اسراء_ابراهيم 

يارب الاسكربت يكون عجبكم وحبتوه واشوفكم علي خير في اسكربت جديد

انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم

لمتابعة باقي الروايه زورو قناتنا علي التليجرام من هنا