رواية اتجوزني عشان اربيله ابنه الفصل السابع عشر 17 بقلم رحاب القاضي

_

ــــــــــــــــــــــــــــــــــــــــــــــ 

_قبل معتز ومريم ما يدخلو المطعم مسك ايدها معتز وقال.. 

معتز

استني هنا قبل ما ندخل في حاجات لازم تاخدي بالك منها عشان ما نزعلش مع بعض واخرجك تاني.. 

مريم بثقه

عارفه عارفه ما اضحكش مع حد وما اهزرش مع حد صوتي يبقي واطي وافضل جنبك و.. 

معتز

استني اييه ده الكلام ده تعمليه وانتي طالعه مع فريده وهي بتنقيلك عريس.. 

مريم بعصبيه

هو مش انت المفروض تقولي كده عشان انت بتغير عليا يعني.. 

معتز

مين المتخلف اللي فهمك ان الغيره بتبقي كده واني احبسك واكبت حريتك وانتي قاعده جنبي ومعايا. 

مريم 

يعني انت عندك اهزر مع حد عادي واضحك عادي انت بقرون يالا صح.. 

معتز 

يا غبيه انا قصدي اضحكي وهزري مع حازم ونيره براحتك ما انتي قدامي وحازم ده اخويا وبعدين انا واثق فيكي انك بتعرفي تخلي بالك من حدودك كويس، بس برضو عايز اعرف مين اللي فهمك ان الغيره كده.. 

مريم بثقه 

الرويات اللي بقرأها علي الفيس.. 

معتز ضرب كف بالتاني

الله يخربيت الرويات وبيتك يا شيخه، ما الرويات دي اكيد هي اللي خلتك تثقي في واحد زباله زي سيف وفي الاخر اداكي علي قفاكي.. 

مريم يغيظ 

مش احسن ما يبقي وشي فقر وما يعشليش نسوان.. 

معتز ابتسم

هو احنا وصلت بينا اننا بنعاير بعض باحزانا وخوزيقنا.. 

مريم 

انا قولت من الاول كانت صدفه منيله ومعرفه تعر

معتز

طيب بصي يا عره، البنت اللي جوه دي عيلتها اتدمرت ونفسيتها زفت، يعني اللسان اللي طوله عشرين متر يتنفض ويتلم وقلة الذوق تتركن علي جنب  مفهوم.. 

مريم مسكته من هدومه وقالت

خدت عليا اووي انت يالا، مش معني اني اديتك فرصه انك هتسوق فيها والله انا وحده ما فارق معاها حد.. 

معتز 

بس نروح البيت ونشوف الكلام ده كويس اتنيلي قدامي.. 

مريم 

ابو شكل اللي يخرج معاك تاني يا فقر.. 

معتز بغيظ 

بوومه متجوز بووومه..

_وبعد شويه كانت مريم وحازم بيهزرو ويضحكو ونيره ومعتز ساكتين... 

مريم

هو انا اسمع ان بتجيلكم قضيات غريبه بس مش بالشكل ده.. 

معتز

اسمها قواضي يا حبيبتي.. 

مريم

خلاص عرفنا انك كنت بتنجح في العربي وانت صغير، كل شويه عمال تعدل عليا.. 

حازم

سيبك منه وتعالي احكيلك عليه اغرب مشكله جات عندنا القسم وكانت من نصيب جوزك.. 

مريم بحماس 

احكي احكي.. 

حازم

كان راجل كبير تقريبا عمره فوق السبعين سنه وكان معاه موبيل حديث باعته ليه ابنه اللي مسافر بره، المهم الموبيل باظ ولما سأل حد قالو انه اتفيرس، الراجل يسكت لا ياخد الفون المستشفي ويصمم يعالجوه وافتكر ان جاتله كورونا.. 

ضحكو كلهم ومعتز كمل وقال

وقتها الراجل ده عمل مشكله مع الدكاتره وجالي وانا حرفيا ما كنتش عارف اتصرف معاه ازاي فكلمت البيه التافهه وهو قاله انه هيعالج الموبيل... 

نيره 

ايوه الفون ده اللي انت جيبته لعمر اخويا عشان يصلحه وما رضيتش تديه تمنه.. 

معتز

ااه يا حيوان مش عملت فيها شهم وقولت انك هتصلحه من جيبك.. 

حازم بص بغيظ لنيره وقال

يعني من الصبح ساكته وحبكت دلوقتي تتكلمي.. 

مريم 

هشش اسكت جبهتك قاعده علي حجري خلاص.. 

حازم 

طيب خلي بالك منها بقي شكلها هتطول عندك في القعده دي.. 

ضحكت مريم وقرب منها معتز وقال بغيظ

اتلمي بضحكة الرقاصه دي، وبعدين انا جايبك تتكلمي مع البنت الغلبانه دي مش تتسهوكي مع التافه ده.. 

مريم 

ايه ده ميزو انت بتغير عليا، مش كان من شويه انا واثق فيكي وحازم ده اخوكي.. 

معتز بحده 

جاتك خوت في دماغك واتلميي وسنانك اللي فرحانه بيهم دول ما يبانوش تاني لحد ما نروح بدل ما تروحي من غيرهم.. 

مريم. بصوت عالي

جرا ايه يالاا انت ما تحترم نفسك بقي انا سكتالك من الصبح.. 

حازم 

ايه يا معتز باشا فين الهيبه والكاريزما؟.. 

معتز بغيظ 

لما هتتجوز هتعرف هي فين يا حبيبي.. 

بص حازم لنيره بضيق وقال

هي مش باينلها جواز احنا هنقضيها نكد علي طول.. 

وقفت نيره وقالت 

انا رايحه الحمام بعد اذنكم.. 

وقفت مريم وقالت

استني يا نيره انا جايه معاكي.. 

ومشيت مريم ونيره وقال معتز 

اهدي شويه وقدر ظروف البنت مش كده يا ابني.. 

حازم بسخريه

الصبح جالها واحد لحد البيت ولما سالتها يبقي مين قالتلي زميلها في الجامعه واني ماليش دعوه بيها.. 

معتز بحزن 

هي اللي حصلها مش قليل وتلاقيها مش عارفه بتعمل ايه، المهم انت خليك جنبيها وما تسيبهاش يا حازم ده لو بتحبها بجد، وبعدين قولي هو ايه اللي حصل في قضية اخوها.. 

حازم اتنهد وقال

اخد خمسه وعشرين سنه سجن.. 

معتز

تقيله برضو عمره خلاص ضاع.. 

حازم

ربنا يهونها عليه هو كمان، اختار يخبي الحقيقه اللي لا هو ولا نيره راضين يتكلمو عنها.. هما اتاخرو ليه في الحما؟.... 

معتز بقلق

تكونش مريم بلعت البنت جوه.. 

_في الحمام كانت واقفه مريم بتظبط في شعرها وقالتلها نيره.. 

نيره 

انتي حلوه اووي علي فكره وجوزك شكله بيحبك اووي.. 

ابتسمت مريم وقالتلها

شكرا، بصي انا مش بعرف ارد علي الكلام الحلو، بس حتة جوزي دي فمش عارفه اصدقك فيها ولا لا.. 

نيره

هو انتي شاكه انه مش بيحبك؟.. 

مريم بضيق

اوقات بحس انه بيحبني جدا، واوقات تانيه بكون بكدب كل كلمه بيقولها وكل احساس جوايا.. 

نيره 

بصي هو انا هقولك اللي شوفته، هو في نظره كده بيبصلك بيها بحس انه... مش عارفه بس هو باين انه بيحبك اووي والله من نظراته ليكي ومن ضحكته اللي بتبان لما انتي بتضحكي.. 

مريم 

ثواني يا عسل انتي هو انتي قاعده مركزه مع جوزي اوي كده ليه... 

نيره بتوتر

ها لا والله انا ما اقصدش حاجه، واسفه لو دايقتك.. 

مريم 

لا عادي ولا يهمك انا بهزر انتي خوفتي ليه كده، بقولك ايه انا سمعت حازم وهو بيقول انك بتدرسي في تجاره.. 

نيره

ايوه انا في سنه تانيه.. 

مريم 

طيب انا عايزاكي تشتغلي معايا في الحضانه اللي بشتغل فيها، تدربي في الحسابات وبمرتب كويس.... 

نيره 

والله ياريت انا اصلا حاسه ان مصاريفي تقلت اووي علي حازم وخالتوو.. 

مريم 

اوكي انا هديكي رقمي عشان نسيت الفون بتاعي وبكره كلميني وهقولك علي المعاد عشان نروح للمديره مع بعض... 

نيره

شكرا اووي يا مريم انا مش عارفه اقولك ايه؟.. 

مريم 

يبقي ما تقوليش مدام مش عارفة.. 

_ضحكت نيره وبعدين طلعو كملو السهره بتاعتهم.. 

ــــــــــــــــــــــــــــــــــــــــــــــ 

_في بيت فخري، دخل يوسف اوضته وذق ندي جوه فوقعت علي الارض... 

ندي بخوف 

في ايه يا يوسف جايبني كده من بيت ابويا ليه؟.. 

يوسف 

محدش غيرك يعرف موضوع امي انتي بقي قولتيه لمين، ولا تكوني انتي اللي متفقه مع الظابط عليا عشان تنقليله اخباري.. 

ندي 

والله العظيم انا مش فاهمه انت بتتكلم عن ايه؟.. 

يوسف بعصبيه

قولتي لمين علي اللي حصل لامي، حكيتي السر اللي امنتك عليه لمين انطقييي.. 

ندي ببكاء

ورحمة امي ما حكيته لحد ولا قولت لحد حاجه.. 

يوسف 

اومال هو عرف منين انا هتجنن.. 

ندي بقلق 

طيب اهدي وفهمني في ايه، انا مش متعوده اشوفك كده؟.. 

حضنها يوسف وهو بيعيط وقال

انا تعبت اووي يا ندي ولا اي حاجه في حياتي عرفت اختارها امي وابويا وشغلي كل حاحه بتحصل انا اتحطيت فيها غصب عني، انتي الحاجه الوحيده اللي انا اختارتها اوعي تسبيني او تتخلي عني.. 

نزلت دموع ندي وقالت 

مش هسيبك يا يوسف انا هفضل معاك... 

ــــــــــــــــــــــــــــــــــــــــــــــ 

_بعد ما رجعت نيره وحازم البيت كانت نيره داخله شقة خالتها بس حازم مسك ايدها وقال.. 

حازم

استني انا عايز اعرف مين الولد اللي كان هنا الصبح؟.. 

اتوترت نيره وقالت

قولتلك حاجه ما تخصكش.. 

زعق فيها وقال

ما تجننيش عليكي لان الموضوع ده ما يخصش حد غيري، انتي نفسك ما تخصيش حد غيري وانا مستني اسمع منك ومش عايز اعرف بطريقه تانيه.. 

نيره ببكاء

سيبني في حالي يا حازم والله انا فيا اللي مكفيني.. 

_قبل ما يرد عليها فتحت ناهد الباب وقالت بقلق لما شافت نيره بتعيط.. 

ناهد

في ايه مالك يا نيره، انت عملتلها ايه يا حازم؟.. 

حازم بضيق 

ما عملتش حاجه يا ماما.. 

ناهد بحده 

ازاي ده وانا سمعاك بتزعق فيها وهي دلوقتي بتعيط... 

حازم بص لنيره بحزن وقال

اهي الهانم عندك اسأليها.. 

_خلص كلامه وطلع شقته فوق، ونيره دخلت اوضتها بسرعه وقفلت علي نفسها وفضلت تعيط وقالت وهي بتمسك السلسله اللي جابهالها حازم زمان لما قالها انه بيحبها وكان وقتها لسه في كلية الشرطه وقالت لنفسها ببكاء.. 

نيره

انا اسفه يا حازم بس انا ما بقتش نيره القديمه وانت مالكش ذنب في كل اللي انا فيه وبعمله ده.. 

ــــــــــــــــــــــــــــــــــــــــــــــ 

_في شقة معتز طلعت مريم من اوضة اياد وقالت.. 

مريم 

انا مستحيل اخرج تاني واسيبه لوحده، طنط الفت قالتلي انه من لما صحي وهو بيعيط عليا وبالعافيه خليته ينام... 

معتز بحزن 

علاقتي بـ اياد باظت خالص يا مريم، اليوم اللي انتي مشيتي فيه طلع هنا يدور عليكي وافتكرني خليتك تسبيه وقالي انه بيكرهني.. 

مريم 

هو انت كنت بتتخانق مع مامته قدامه صح؟.. 

معتز

لاسف ايوه، كنت بحاول ابعده عن المشاكل دي علي قد ما اقدر بس ما عرفتش.. 

مريم

هو فاكر عشان بيشوفنا بنتخانق انك هتبعدني عنه، انت حاول بس تقرب منه وتلعب معاه وتهتم بيه شويه وهيرجع يحبك.. 

معتز 

طيب ده بالنسبه لاياد بالنسبالك انتي بقي ايه الدنيا.. 

مريم بقلق

ايه ده انت ازاي اتحولت كده ما انت كنت كويس.. 

معتز قرب منها وقال

اعمل ايه بقي عشان تحبيني يا شيخه طلعتي عين امي معاكي.. 

مريم 

شغلي سفا*ح الجيزه.. 

معتز

ايه علاقة ده باللي انا بكلمك فيه؟.. 

مريم 

عايزه اسمع الحلقه الجديده... 

معتز

ابقي اسمعيها بكره عندي شغل وعايز انام.. 

مريم

خلاص هشوفها لوحدي تصبح علي خير.. 

معتز مسك ايدها وخلاها تقف وقال

لا ما احنا هنشوفها بكره مع بعض لما ارجع من. الشغل.. 

مريم بقلق

بس انا مش عايزه انام، ولو نمت انا هروح انام عند اياد... 

معتز بخبث

ده كان زمان اصل الفرصه اللي انتي اديتهالي دي لازم يكون فيها شوية اثاره.. 

مريم بتوتر

لاا انا ممكن اسحبها عادي لو ما احترمتش نفسك.. 

معتز 

تعالي بس عايز اوريكي حاجه جوه.. 

مريم 

هو انا عبيطه هتضحك عليا، مش هدخل.. 

شالها معتز وقال

يخربيت دماغ امك الناشفه، ما فيش مره تقولي فيها حاضر.. 

مريم بخوف

معتز نزلني والله ههزعل بجد.. 

_دخل بيها الاوضه بتاعته وقفل الباب برجله ونزلها ووقف قدامها وقال بجديه... 

معتز

نزلتك اهو اهدي بقي وما تخافيش انا مش هعمل حاجه غصب عنك، انا بس جايبلك حاجه وعايز اديهالك.. 

مريم بضيق

حاجة ايه دي؟.. 

_راح معتز وفتح الدرج بتاع الكومدينو وطلع علبه صغيره، ووقف قدامها تاني وفتحها وكان فيها خاتم الماظ.. 

معتز

شبكتك يا مريم.. 

بصتله وهي مش مصدقه اللي عمله وقالت

بكاام ده؟.. 

ضحك غصب عنه وقال

بطلة العالم في الفصلان والله.. 

مريم 

لا بجد بكام ده غالي اووي، انا مش هقدر اخده.. 

معتز بهدوء

يا غبيه انتي مراتي يعني مافيش حاجه في الدنيا دي تغلي عليكي.. 

مريم

بس يعني انا هعمل بيه ايه هو حلو اووي بس انا مش متعوده البس الحاجات دي.. 

معتز 

الخاتم ده اتجوزت بيه تيته وكان شبكتها، واخدته ماما بعدها وكان شبكتها برضو و.. 

مريم بضيق

وكان بتاع مراتك القديمه ودلوقتي دوري.. 

معتز

مستعجله علي طول ما فيش صبر، ملك زمان ما رصيتش تاخده وقالت انها مش هتاخد شبكه مستعمله، وماما نسيت تديه ليكي ففرحنا او كتب الكتاب اللي عملنااه واديتهولي انا وقالتلي اقدمهولك لما احس انك بتحبيني.. 

مريم 

وانت دلوقتي حاسس اني بحبك.. 

معتز

شوفتي الجمله اللي قولتيها دي، هبقي اسعد واحد في الدنيا لو قولتي اخر كلمه فيها بس.. 

_اخدت منه الخاتم وراحت نامت علي السرير وقالت.. 

مريم 

تصبح علي خير اطفي النور وتعالي نام عشان عندك شغل.. 

معتز ابتسم وقال

ده بجد انتي هتنامي هنا؟!.. 

مريم 

لا جايه اخد لفه هنا وماشيه، انت عبيط يا ابني ما انا نمت خلاص.. 

طفي النور وراح نام جنبيها وقال بصوت واطي

والله العظيم بحبك وعمري ما حبيت غيرك.. 

مريم 

يعني ما حبيتش مراتك الاولي؟.. 

معتز

لا حبيتها بس كان حب عشره وزعلت عليها جدا لما ماتت وكنت ناوي ما اتجوزش اصلا بعدها، لحد ما شوفتك وكل حاجه في حياتي اتغيرت وعرفت معني الحب اللي بجد.. 

ابتسمت مريم اوي وقالت

طيب بحيث كده بقي تصبح علي خير يا ابو اياد.. 

معتز بخبث

هو انا ممكن احضنك عادي وانام ولا ا... 

مريم بحده 

هتتخمد بادبك ولا اقوم امشي.. 

ضحك معتز وقال

ههه لا خلاص انا ما صدقت ان حصل تطور في ام العلاقه دي.. 

ــــــــــــــــــــــــــــــــــــــــــــــ 

ـ تاني يوم الصبح طلع فاروق من اوضته، واتكلم في الموبيل بصوت واطي وقال.. 

فاروق 

ايوه يا حبيبتي انا ساعه بالكتير وهجيلك.

زيزي

طيب بسرعه يا بيبي عشان انت وحشتني اووي.. 

فاروق

وانتي كمان يا وحشتيني اووي.. 

الفت بحده من ورااه 

هي مين دي اللي وحشتك يا فاروق.. 

فاروق علي صوته وقال

وانتي كمان يا جني يا حبيبتي وحشتيني، طيب سلميلي علي جدو وقوليلو جدو فاروق جايلك كمان شويه.. 

وقفل الموبيل وقال لالفت 

في ايه يا الفت وقفالي كده ليه؟.. 

الفت بسخريه

انا مش هسالك بتكلم مين، بس احب اقولك ان الكدب مالوش رجلين ياا.. يا جدوو.. 

فاروق

لا يا هانم انا مش كداب انتي اللي كبرتي وخرفتي والعيشه معاكي بقيت تقرف.. 

وقفت الفت وزعقت فيه وقالت

وانا طول عمري عايشه معاك في قرف، هو انا مستغربه خيانتك دلوقتي ليه ما انت طول عمرك بتخوني.. 

_طلعت الخدامه وخبطت علي مريم ومعتز.. 

قامت مريم وقالت لمعتز اللي نايم جنبيها

معتز انت يا ابني.. 

معتز

جهزي الفطار يا ملك وصحيني.. 

مسكت المخده وضربته بيها وقالت

يارب ملك تاخدك عندها واخلص يا غيبوبه، اتنيل قووم افتح معايا.. 

معتز بضبق 

والله مش قصدي اغلط في اسمك بس.. 

مريم 

عادي يا معتز دماغي اكبر من كده ودي كات مراتك وكانت مكاني سنين كتير، المهم قوم افتح.. 

معتزز

يعني انتي خايفه تقومي تفتحي.. 

مريم

ايوه خايفه افرض كان حد من رجالة فخري.. 

معتز 

طيب قايم اهوو.. 

_فتح معتز الباب ومريم كانت وراه ولقيو الخدامه.. 

معتز

في ايه يا بنتي علي الصبح كده؟.. 

الخدامه 

هو حضرتك مش سامع الهانم والباشا بيتخانقو جامد تحت والموضوع شكله هيكبر.. 

اتنهد معتز بضيق وقال 

مريم خليكي مع اياد عشان لو صحي، وانا هنزل اشوف في ايه؟.. 

مريم

ماشي وابقي تعالي طمني.. 

_دخلت مريم وقعدت في الصاله ومسكت موبيلها وقالت لنفسها.. 

مريم 

انت فينك من امبارح مش فاكراك خالص.. 

_اول ما فتحته شافت الرسايل اللي باعتها ليها سيف من رقم غريب، واول شافت صور البنت اللي معتز في العربيه دموعها نزلت و.. 

ــــــــــــــــــــــــــــــــــــــــــــــ 

_في كافي علي النيل دخلت نيره وقعدت قدام سيف اللي قالها.. 

سيف

اي سر انك تقابليني الصبح بدري كده؟.. 

نيره

عشان مش عايزه حد يشوفني معاك، واللي عايزه تفهمه انا هفهمه ليك دلوقتي.. 

سيف

ايووه انتي مين بقي وليه دخلتي حياتي.. 

نيره بخبث

انا صاحبة نور عبدالرحمن. 

سيف

مين نور عبد الرحمن دي؟.. 

نيره بسخريه

ايه لحقت تنساها ده معداش كام شهر علي موتها، اللي كنت متجوزها عرفي واتخليت عنها.. 

سيف بغيظ 

وهي اللي بعتاكي بقي، ده انا هوديكي وهوديها في ستين داهيه.. 

نيره بدموع 

هي راحت خلاص فيها، نور اخوها قتلها بعد ما عرف انها علي علاقه بواحد ومامتها ماتت بحسرتها واخوها هيقضي عمره كله في السجن.. 

سيف بصدمه 

انتي بتقولي ايه اكيد بتهزري.. 

نيره بحقد 

حضرتك دمرت عيله كامله، قفلت بيت كان مفتوح وكله سعاده خليته ضلمه ومهجور، ضعيت ناس كتير اكيد زي نور، انت متحمل نفسك كده انا كان نفسي اموتك واخد حقها بس قولت كده هرحمك عقاب ربنا ليك هيكون ابشع من الموت علي كل اللي عملته في نور وغيرها انت شيطان. يا سيف.. 

_قالت كلامها وسابته ومشيت وهو دموعه نزلت علي. وشه بندم وكل اللي ظهر في باله نور وحبها ليه وانها كانت بتنفذ كل اللي بيقولها عليه وهي مصدقااه وواثقه فيه.. 

_فا يا تارا ايه اللي هيحصل لسيف؟.... 

ــــــــــــــــــــــــــــــــــــــــــــــ 

_اما في شقة الفت وفاروق نزل معتز بسرعه ووقف بينهم وقال بقلق.. 

معتز 

يا جماعه في ايه علي الصبح مش كده؟.. 

فاروق بحده

اسأل امك اللي كبرت وخرفت.. 

بص معتز لباباه بحده، والفت قالت

اطلع يا معتز شقتك ما فيش حاجه يا حبيبي... 

فاروق بعصبيه 

لا في قول لامك تبطل حركات العيال اللي بتعملها دي، مش في كل حاجه بعملها تشك فيا.. 

معتز بضيق 

خلاص يا ماما عشان خاطري، ما فيش حاحه تستاهل زعلك ولا دموعك.. 

فاروق شد معتز من بدراعه وقال بحده

تقصد ايه يا ولد انت كمان بكلامك ده، انت نسبيت اني ابوك ولازم تحترم نفسك وانت بتتكلم.. 

معتز بحده 

وانا حضرتك ما قولتش حاجه انا بحاول اطيب خاطر امي.. 

الفت ببكاء

ابنك ما بقاش صغير ومابقاش في حاجه تستخبي، بس هي كلمه يا فاروق قدام ابنك اهوو الفت اللي كانت زمان تلمك من حضن كل وحده شويه وتعدي القرف بتاعك خلاص زهقت وكبرت زي ما انت بتقول مش هتخان منك علي كبر كمان..ولو طلعت فهلا بتخوني وغلاوة معتز وابنه عندي انا ما هقعد معاك دقيقه واحده.. اطلع شقتك يا معتز وقول لمراتك ما فيش حاجه وافطرو فوق لوحدكم النهارده.. 

خلصت كلامها ودخلت اوضتها، وفاروق ساب البيت ومشي، ومعتز طلع شقته وكان مدايق جدا بسبب اللي بيحصل بين باياه ومامته ده.. واول ما دخل لقي مريم قاعده مدايقه.. قعد جنبيها وقال... 

معتز

لو سمحتي يا مريم بلاش اي اسأله دلوقتي انا مخنوق لوحدي.. 

وقفت مريم قدامه وقالت بجمود

طلقني.. 

بصلها بحده وقام وقف وقال

في ايه انتي كمان الجنان هيشتغل علي الصبح.. 

مريم بدموع 

لا جنان ولا غيره طلبي بسيط جدا طلقني.. 

معتز اتنهد وقال

اسكتي يا مريم عشان انا والله ماسك اعصابي بالعافيه وبلاش تيجي فيكي انتي المره دي.. 

مريم بعصبيه 

انت ما بتفهمش انا لا بفرق معايا اعصابك ولا اي حاجه اما عايزه اطلق، عشان مش هعيش مع واحد زيك خاين وكداب... 

معتز بحده 

ايوه عقدك هتطلع عليا انا بقي.. 

ضحكت بسخريه وقالت

هعهههه بقيت عقدي دلوقتي، عقدي دي سببها اني وثقت في اتنين وسخين انت وهو.. 

ضربها بالقلم وقال

ما تتلمي بقي علي الصبح.. 

حطت ايدها علي وشها وبصتله بصدمه، وقبل ما تتكلم سمعو صوت اياد اللي واقف عند اوضته بيعيط وخايف جدا.. 

معتز بغيظ وعصبيه مسكها من دراعها جامد وقال

عجبك كده ياريت تكوني ارتاحتي يا مريم انا بجد زهقت منك ومن تصرفاتك دي،شايفه ابني بقي بيكرهني بسببك انتي يارتك ما ظهرتي في حياتي اصلا..... 

_خلص كلامه وذقها جامد فوقعت علي الكنبه وهو اخد مفاتيح عربيته ونزل.. 

_تفتكرو بقي ايه اللي هيحصل؟...