 |
رواية كبير العيله الفصل السابع والعشرون 27 بقلم احكي ياشهرزادرواية كبير العيلة - منى لطفي الحلقة السابعة و العشرون حدقت ثلاث أزواج من الأعين المذهولة برؤوف وهو يخبرهم بقرار الجد بتحديد موعد الزفاف، كانت سلمى أول من أفاق من دهشته لتتكلم بغير تصديق: - إزاي يا بابا حضرتك توافق على حاجة زي كدا؟.. جدي على عيني وراسي بس تحديد ميعاد الفرح أعتقد دا شيء يخصني أنا وشهاب بالدرجة الأولى؟.. وإحنا إللي نحدد الوقت المناسب لينا إحنا الاتنين. نظر إليها رؤوف بإبتسامة صغيرة وأجاب وهو على علم بإجابتها مسبقا: - ويا ترى إيه هو الميعاد المناسب ليكي يا سلمى؟.. لأن شهاب موافق على قرار الحاج. اضطربت سلمى قليلا لتجيب بعدها وهى تفرك يديها بتوتر: - بصراحة يا بابا حضرتك عارف الظروف إللي مرّينا بيها اليومين دول، وعشان أكون صادقة مع حضرتك.. أنا مش هقدر أتجوز في الميعاد اللي جدي حدده. تحدثت ألفت بلهجة الأم الحانية: - سلمى حبيبتي.. إحنا كلنا عارفين ومقدرين حالتك النفسية وبالذات الظروف إللي إنتي مريتي بيها، وأنا بصراحة في الموضوع دا شايفة ان جدكم معاه حق!. نظرت إليها كلا من سلمى وسلافة بإستنكار في حين ابتسم رؤوف لتردف مانعة أي منهما مقاطعتها: - بالراحة بس قبل ما تتسرعوا في الكلام، إنتي يا سلمى للأسف كنت فاكراكي أقوى من كدا، فين إيمانك يا بنتي؟.. " قل لن يصيبنا إلا ما كتب الله لنا".. صدق الله العظيم، أنا مقدر حزنك على المرحوم، لكن ليه ما تبصيش من ناحية تانية؟... المرحوم في حكم الشهيد.. ودا جزاؤه كبير أوي عند ربنا، شوفي هو كان هيموت في ساعته دي ويومه دا، لكن مش يمكن كان يموت مع حامد رشوان؟.. يعني عاصي لربه؟.. لكن هو مات وهو بيدافع عن عرض وشرف، شوفتي ربك رحيم بيه أكتر من نفسه إزاي؟.. وبعدين الفرح دا الشيء الطبيعي بعد كتب الكتاب، لأنكم فعلا في حكم المتجوزين وأنا بصراحة ضد أن المواضيع دي تطول، صدقوني حبايبي.. بيحصل خلافات ومشاكل على أقل حاجة، فأنا شايفة أننا نتوكل على ربنا ولو أني حاسة اننا هنتزنق في الوقت، إحنا لسّه ما جهزناش حاجة، أنا صحيح كنت بجهزكم من وانتم صغيرين لكن برضه فيه حاجات ناقصة، إيه رأيك في كلامي يا رؤوف؟.. أشاد رؤوف برأيها قائلا: - عين العقل كلامك يا ألفت....، ثم نظر إلى إبنتيه وتابع: - شوفوا يا بنات.. أنا بصراحة مش شايف معنى أنكم رافضين، خصوصا وانكم ما قولتوش ايه٦ هو الميعاد إللي يناسبكم.. صح؟.. يعني أنا أفهم إنكم تقولوا لا مثلا عاوزين على الأقل شهر نخلص فيه حاجتنا، لكن أنتم اعترضتم من غير ما تقولوا البديل، يبقى دا رفض لمجرد الرفض بقى ولا إيه؟.. سلمى بهدوء: - لا طبعا يا بابا، بس بعد إذنك لازم نكون مهيئين نفسيًّا لحاجة زي كدا، أنا معاكي يا ماما في كل اللي بتقوليه بس أنا في الاول والآخر بشر مش ملاك، وأكيد بامر بلحظات ضعف.. بستغفر ربنا طبعا كل ما بييجي في بالي إني السبب في إللي حصل لأحمد، بس أنا نفسيا دلوقتي عاوزة أبعد وبس، عاوزة أنسى إللي حصل، وفي نفس الوقت عاوزة لما أبتدي جوازي أكون زي أي عروسة، بفرحة وأمل وأنا ملهوفة وفرحانه مش جوايا حزن وضيق!.. جوازي لازم يكون شيء أنا ملهوفة عليه مش دوا طعمه مر ولازم أخده عشان أخفّ!.. تنهدت ألفت بعمق ونظرت إلى رؤوف وتساءلت: - إيه رأيك يا رؤوف في كلام بنتك؟.. نظر رؤوف بهدوء إلى زوجته وقال: - سلمى ليها وجهة نظر طبعا تُحترم، بس عشان تكوني عارفة يا سلمى – ووجه تتمة حديثه إلى سلمى – هو دا السبب تحديدا إللي خلّا جدك يستعجل في تحديد ميعاد الفرح!.. إللي قاله بالحرف الواحد لازم حاجة تخرج سلمى من إللي هى فيه، وطبعا مفيش أكتر من حياة جديدة مع جوزك تبتديها وإنتي كلك فرح وأمل وتفاؤل، عشان كدا أنا باضم صوتي لصوت جدك... لتقفز سلافة هاتفة بإنفعال: - بس بعد إذنك يا بابا أنا مش موافقة.. زفر روؤف فهو يعلم مدى قلة صبر إبنته الصغرى وعنادها الشديد، تحدث رؤوف بهدوء نسبي: - وأنتي رافضة ليه يا سلافة؟.. أجابت سلافة: - بصراحة كدا يا بابا أنا مش عارفة إيه وجه الإستعجال؟.. أنا حاسة زي ما نكون بنجري حوالين نفسنا؟.. الموضوع من أوله وجري، جري، جري.. من لحظة ما خطبونا عشان نتفاجئ إنه كتب كتاب وبعدين هوب.. هوب دلوقتي عاوزين فرح والحِجّة نفسية سلمى!....، لتوجه حديثها بعد ذلك إلى سلمى مردفة: - إنتي يا بنتي إنتي نفسيتك هتتعدل بعد الفرح؟.. معقول!.. دا إحنا بحالتنا دي عاملين زي إللي بينط في البحر وهو مش بيعرف يعوم!.. وبصراحة يا بابا حتى لو سلمى وافقت.. أنا رافضة. رؤوف ساخرا: - ولما تعرفي أن غيث موافق ومصمم إنه الفرح يكون في الميعاد إللي جدك حدده.. هتعملي إيه؟.. برقت عينا سلافة بعزم وقالت: - أنا هتكلم معاه، فيها إيه دي؟!.. لتنفذ قولها في التو واللحظة وهى تستأذن بالإنصراف متجهة إلى الخارج حيث غيث، في حين نهضت سلمى وقالت بهدوئها المعتاد: - بعد إذنك يا بابا.. أنا محتاجة أتكلم مع جدي عبد الحميد، بيتهيألي جدي لو اقتنع بوجهة نظري هو بس إللي يقدر يقنع الكل.. ثم انصرفت هى أيضا في حين نظرت ألفت الى رؤوف وقالت بإبتسامة: - البنات كبروا يا أبو البنات وكل واحدة فيهم عاوزة تتصرف بطريقتها هى. روؤف بفخر أبويّ: - سيبيهم يا ألفت، مع أني موافق الحاج في كل إللي قاله لكن ما تتصوريش وانا شايفهم وكل واحدة عاوزة تثبت وجهة نظرها أنا حاسس بالفخر ازاي، بناتي ليهم شخصية ورأي وبيفرضوا شخصيتهم دي على إللي قدامهم ولازم إللي يواجههم يعمل لهم ألف حساب، ويعرف أنهم مش عشان خاطر بنات يبقى مالهومش رأي ولا يبقى أؤمر تُطاع، وأنا متأكد إنه الحاج هيقدر يِّفهمهُم كويّس ويقنعهم كمان. ---------------------------------- كان الجد يجلس في مكانه المفضل في الحديقة تحت سقيفة العنب حينما اتجهت إليه سلمى، سلّمت عليه مقبلة ظهر يده كما سلّمت على جدتها، رحب بها الجد مهللا وقال وهو يشير إليها لتجلس بجواره على الأريكة الخيزران: - يا مرحب يا مرحب بالدكتورة، كيفك يا بنيتيّ؟.. إن شالله زينة؟.. جلست سلمى وأجابت بإبتسامة: - الحمد لله يا جدي ربنا يخليك. قالت الجدة وهى تمد يدها بكوب الشاي للجد: - فينك يا دَكتورة، جدتك ما اتوحشتهاش؟!.. أجابت سلمى بنفي قاطع: - لا طبعا ازاي يا جدتي، معلهش أنا عارفة إني مقصرة بس.. ليقاطعها الجد رافعا يده باسطا راحتها: - ما بسّش يا بنيْتي، إنتي عمريكي ما تجصري إمعانا، إنتي ولد الغالي، جدتك ما جصدهاشي حاجة.. إنتي بس بتتوحشينا فبنبجى رايدين نجعودا إمعاكي.. أكدت الجدة قائلة: - عندك حج يا حاج، إنتي غالية حدانا جوي جوي يا بنيتي وربنا يعلم، غلاوتك إنتي وخيتِك وأُميكي من غلاوة ولدي رؤوف إسم الله عليه.. قالت سلمى بإبتسامة: - وحضرتك وجدي غاليين علينا أوي أوي يا جدتي. نظر عبد الحميد بإبتسامة ماكرة وقال وقد أخبره حدسه بسبب حضور حفيدته لرؤيته: - إيه يا بنيتي، شايف حديت على وشّك.. خير يا دَكتورة؟.. سحبت سلمى نفسا عميقا قبل أن تلتفت بكليّتها إلى جدها وهى تقول بهدوء نسبي شابه توتر ملحوظ: - بعد إذنك يا جدي.. بابا قال لنا إن حضرتك قررت أنه الفرح يكون على أول الشهر إللي جاي، يعني كمان اسبوعين تقريبا كدا أن شاء الله.. نظرت إليها الجدة بتساؤل ولم تتكلم في حين إبتسم الجد وأجابها بحكمة: - أول هام أني ما جررتش.. أني حددت!.. انتوا عاجدين أديلكو أكتر من شهرين، ومش لساتكم عتعرفوا بعض، دا غير إنه العرسان جاهزين، يبجى إيه المانع انكو تتجوزوا وخير البر عاجله؟.. زفرت سلمى بعمق وقالت: - اسمح لي يا جدي أنا هاكون صريحة مع حضرتك... أنا يعني حضرتك عارف أكيد الظروف إللي مرِّينا بيها، أنا نفسيا مش قادرة أبتدي حياة جديدة، على الأقل دلوقتي، محتاجة وقت أجمّع فيه نفسي كويّس عشان لما أبتدي حياتي مع شهاب أبتديه وأنا عاوزة كدا مش عايزة أحس إني كنت مجبرة!.. قال الجد بحنكته: - طب خليني إمعاكي يا دَكتورة.. دلوك أنتوا مش كاتبين اكتابكم بجالكوم كم شهر؟.. وإللي أنا شايفه يجول أنكم مش لسه عتتعرفوا على بعض، وحكاية الظروف إللي مريتي بيها ديّ عاوز أجولك إنه هي الظروف ديْ إللي خليتني أنجز في موضوع الفرح، لأنه كيف ما جولتي إنتي لازمن تطلعي من إللي إنتي فيه ديِه.. وديِه مش هياجي غير لمن عجلك ينشغل بحاجة تانية خالص، بجوازك وحياتك الجَديدة، وبعدين يا بنيتي أنا خلاص العمر مبجاش فيه جاد إللي راح.. رايد أفرح بأحفادي جبل ما ربنا سبحانه وتعالى ياخد أمانته، تستكتري فيا الفرحة يا بنت الغالي؟.. هتفت سلمى نافية بحرارة: - أبدا يا جدي، بعد الشر عليك، ربنا يديك الصحة وطولة العمر حضرتك وجدتي.. لتهتف الجدة بنزق: - وبعدهالك يا حاج.. أني مش جايلالك ما تجيبيش السيرة ديْ تاني؟.. ربنا يعطيك طولة العمر ويجعل يومي جبل يومك جول آمين.. ابتسمت سلمى وأرادت إضفاء بعض المرح على الجلسة فقالت وهى تغمز جدها: - اللاه اللاه.. أقوم أنا بقى، حاسة أنا بقيت عزول وأنا مش واخدة بالي!.. لتصدح ضحكة الحاج فيما أنبتها الجدة قائلة: - باه.. أنتي يا سلمى اتجولي إكده؟.. لو سلافة كنت جولت مش امهم اتعودنا على طبعها في الغشمرة.. لكن إنتي... قال الجد: - عشان تبجي عارفة يا فاطنة سلمى عنديها خفة دم كيف سلافة تمام.. ضحكت سلمى وقالت: - تسلم يا جدي، بس أنا ما أجيش في سلافة حاجة.. الجدة بحنان: - ربنا يخليكو لبعض، المهم يا بنيتي دلوك.. وافجي يا نضري إنه الفرح يبجى في الميعاد إللي جدّك جال عليه، وعشان تبجي عارفة.. عمر جدك ما جال كلمة وحَدْ وجّعها الأرض واصل، لكن لأنكم عنديه حاجة تانية فعشان إكده ما رايدشي يكون غصب عنيكي أنتي وأختك. نظرت سلمى إلى الجد وقالت بإبتسامة: - ما عاش ولا كان إللي يوقع كلمة ليك يا حاج عبد الحميد، بس أنا بعد إذنك ليا طلب صغير... تبادل الجد والجدة نظرات التساؤل وسط إبتسامة فرح يخالطها الريبة!!.. ---------------------------------------------------- اتجهت سلافة إلى مكان وجود غيث في حظيرة الخيول حيث سألت عليه فأرشدوها إلى مكانه، كان غيث يمتطي فرسا أسودا عربيّا ضخما يتريّض به في مساره حينما لمحها تقبل عليه من بعيد، فإتجه إليها ليقف بجانبها جاذبا لجام الفرس بقوة ليوقفه ليصهل الأخير احتجاجاً، نظر إليها من مكانه فوق صهوة الجواد وقال بإبتسامة: - إيه الصدف السعيدة ديْ.. يا ترى على فين العزم إن شاء الله؟.. ظللت سلافة عينيها بيدها وأجابته وهى ترفع رأسها لتتطلع إليه: - أنا عاوزاك في كلمتين يا غيث. قطب غيث وقد استشعر الجدية في كلامها، ليسارع بالترجل من فوق صهوة الفرس، ويمسك بلجامه قائلا: - خير يا بنت العم. سلافة وهى تنظر إليه وقد أنزلت يدها جانبا: - خير إن شاء الله.. نادى غيث على السائس ليسلمه لجام الفرس ثم دفعها براحته فوق ظهرها بخفة ليوجهها إلى السير إلى منطقة مظللة بعيدا عن أشعة الشمس القوية وهو يقول: - خير يا بت عمي؟.. جلجتيني.. وقفا أسفل شجرة سنديان ضخمة تميل بأوراقها حولهما، نظرت إليه سلافة وهى تحاول أن تشحذ قوتها ثم أجابت بما تملكه من ثبات: - بابا قال لنا على قرار جدي بخصوص ميعاد الفرح.. قطب غيث وقد شعر أن تتمة حديثها لن تعجبه وقال: - وبعدين؟.. لعقت شفتيها الجافتين بطرف لسانها الوردي لترطبهما وأجابت بعد أن سحبت نفسا عميقا: - أنا مش موافقة يا غيث!.. من الآخر مش فاهمة إيه وجه الإستعجال بالظبط؟.. إحنا مش مخطوبين بقالنا سنة ولا أتنين، إحنا بقالنا كام شهر بس، ومن الآخر أنا مش جاهزة إننا نتجوز دلوقتي!.. ساد الصمت بعد إنتهائها من حديثها الجاد والذي اصطبغ بنبرة تحد، عقد غيث ساعديه السمراوين أمام صدره وطالعها بنظرات مبهمة، فيما أشاحت هى بعينيها بعيدا عنه، كان غيث أول من خرق الصمت السائد قائلا بهدوء كالهدوء الذي يسبق العاصفة: - طيب ممكن أعرِف يا بت عمي إنتي هتبجي جاهزة ميتى بالظبط عشان جوازنا؟.. سلافة وهى تطالعه بثقة: - بصراحة معرفش لسه يا غيث، لكن كل إللي أعرفه إني مش هاقدر أتجوز في الميعاد إللي جدي حدده، أصلا المفروض انه الميعاد دا انا وانت إللي نحدده، إحنا أدرى الناس بالوقت إللي هنكون مستعدين فيه!.. ابتسم غيث بسخرية قائلا: - عجيبة!.. ما إنتي لساتك يا بنت الناس عتجولي ما عاوزاشي دلوكيت خالص ومعرفش إيه، يبجى منين ديِه ومنين إحنا إللي نحددوا اميعاد الفرح؟.. وبعدين أنا جولتلك جبل سابج أنه متى ما اتطمنا على ليث والموضوع خولص بالسلامة اننا هنتمم الزواج، صوح ولا لاه؟.. شعرت سلافة بالتوتر وأن غيث قد حشرها في الزاوية بأسئلته المفرطة فهتفت بحدة: - هو تحقيق ولا إيه يا غيث؟.. مش المفروض أنا العروسة؟.. يعني أنا اكتر واحدة لازم تكون موافقة على ميعاد الفرح، وانا باقولك يا غيث الميعاد مش مناسبني، وقت قليل جدا وأنا لسة مش مستعدة!... أسدل غيث ذراعيه بجانبه وقلّدها ساخرا: - وميتى على إكده عتكون عروستنا مستعدة للفرح؟.. هزت كتفيها بلا مبالاة وأجابت بثقة وبرود علمت بعدها مدى خطئها في إستفزاز غيث: - من الآخر كدا مش قبل.. ست شهور!!.. ليهتف غيث عاليا: - كيييف!!!!!!!!!، 6 شهور؟!!، انجنيتي إياك!!، ست شهور إيه ديْ! واقترب منها في حين تراجعت هى عدة خطوات إلى الوراء وهى تحذره شاهرة سبابتها أمامه: - بقولك إيه يا غيث... إوعى تقرب مني، أنا مش نعجة انت شاريها من سوق التلات مالهاش رأي، أنا بني آدمة، وليا رأي, وموضوع جوازي دا ما يهمش حد قد ما يهمني أنا!... وقف غيث أمامها لتصطدم بجذع النخلة خلفها فشهقة بخفة في حين مال عليها مجيبا بإستهزاء واضح فيما عيناه تغشاهما نظرة خيبة الأمل الواضحة: - معلهش يا بت عمي.. فيه طرف تاني إيهمه موضوع زواجك... – لتنظر إليه مقطبة بريبة فيتابع بنصف إبتسامة سخرية تشوبها المرارة – العريس!.. إللي هوَّ أنا يا... عروسة!.. حاولت سلافة امتصاص غضبه الواضح والذي تعبر عنه عيناه بوضوح فقالت: - اسمعني يا غيث... ليسارع بإمساك يدها التي كانت تشير بها إليه ليشبك أصابعهما سوية وهو يقول بجدية بالغة: - لاه يا بت عمي.. اسمعيني أنتي، أنى كنت بأعد الأيام لجل اليوم ديه ما ياجي، وجت ما جدي حدد الميعاد كنت حاسس بجلبي كانُّه عيطير من الفرحة، خلاص ما بجاش غير أيام وتكوني امعايا، معتبعديش عن عينيا التنتيين واصل، كنت فاكر إنك عتفرحي كيف ما اعملت، لكن واضح إنه أني بس إللي كنت ملهوف عليكي يا بت العم. استطاع غيث إشعارها بالذنب ليبدأ ضميرها في تأنيبها وتقريعها بعنف، فما حجتها القوية في رفضها ميعاد الزفاف، فسلمى تملك تبريرا مقنعا وهو حالتها النفسية السيئة، ولكن هى.. ما السبب الذي تملكه للإعتراض؟.. وبدلا من أن تصارحه بتخوفّها من اتمام الزفاف سريعا وهي لم تقض معه المدة الكافية التي تجعلها تعتاد طباعه جيدا إذ بها تتصرف وفقا لشخصيتها المجنونة وانفعالها الصبياني وترمي برفضها في وجهه لمجرد الرفض فقط كما سبق وواجهها أبوها بذلك!.. كانت تسترق النظر إليه بطرف عينيها بينما تعض على باطن شفتها السفلى في حين كان غيث يرنو إليها بطرفه وهو يعلم تماما فحوى الأفكار التي تدور في هذا الرأس الصغير العنيد، هو يعلم سلافة تماما كراحة يده، عرف أنها أبدا لن تأتي بسياسة الأمر الواقع، ليأتيها من ناحية أخرى.. ألا وهي تأنيب الضمير!.. ومن النظرات المترددة التي ترمقه بها وهي تحسبه غافلا عنها يكاد يجزم أنها تراجع نفسها بشأن قولها الأحمق ذاك الذي رمته في وجهه من أنها ترفض إتمام الزواج في الموعد الذي حدده الجد، أتمزح؟.. هو يكاد يصاب بنوبة قلبية من فرط فرحته لقرب زفافهما حيث يجمعهما مكان واحد، وهى تفكر كيف تقنعه بأن يؤجل ميعاد الزفاف، تبّا له ألف مرة لو وافقها على جنونها، ولتحمد ربها أن الجد قد قرر الموعد في غضون أيام، فلو لم يتدخل أحد في ذلك لكان سارع هو بالإلحاح في إتمام الزفاف ولو اعترض أحد لكان خطفها تماما كما فعل في السابق كي يقنعها بالإرتباط به، فمن الواضح أنه أمام سلافة لا يوجد حلّا آخر سوى اختطفاها!!!.. حيث يطير منه عقله الراجح والذي يتصف به ليحل بدلا منه بعضا من جنونها اللذيذ، وكم يحب هو هذا الجنون الذي يضفي على حياته الراكدة بهجة لا تقاوم!.. تحدثت سلافة وشعور الذنب يزداد بداخلها: - غيث أنا مش عاوزاك تزعل مني، غيث إحنا ما لحقناش نتعود على بعض، إحنا محتاجين وقت نعرف بعض فيه أكتر و... ليقاطعها وقد ترك يدها ليمسك بوجهها بغتة ويحيطه براحتيه الخشنتين فيما يميل عليها ليتيه بين دخاني عينيها هامسا بخشونة: - نتعودوا على بعض؟.. فِكرك أني لحد دلوك معرفتكيش يا بنت عمي؟.. أني مفيش حاجة فيكي إلا وحفظتها، عارف ميتة بتكوني غضبانة من عجدة حواجبك وزمّتك الـ خشمك كيف الصغار، عارف ميتة بتكوني فرحانه وعيونك بتتفطط تفطيط من فرحتك، عارف ميتة بتكوني رايده حاجة وتجعدي اتلفي عليها وكأن إللي جدامك ديه مش عيفهم إنتي رايدة إيه؟.. سلافة.. أني لو اختبروني فيكي عاخد الدَّكتوراة وبإمتياز كومان!... كانت سلافة تطالعه بإنبهار طوال حديثه، فيما حمرة جذابة انتشرت في وجهها كله حتى منابت شعرها ما جعل وجهها آية في الجمال، وشعرت بدقات قلبها وهي تطرق عاليا، لم تكن تعتقد أنها قد أصبحت كالكتاب المفتوح بالنسبة لغيث هكذا، ربّاه.. أنّى له أن يعلم عنها كل هذه الأمور الدقيقة وبمثل هذه السهولة والوضوح؟.. هى تشعر به وقد أصبح أقرب إليها من أنفاسها، انتبهت من شرودها على ضغط ذراعيه اللتان تسللتا إليها ليحيطا بخصرها الدقيق فيقربها إليه بينما مال عليها لتلفحها أنفاسه الحارة وهو يتساءل فيما تتيه هي في فحم عينيه المشتعل: - لسّاكي برضيكي جلجانة من جوازنا يا حبة الجلب؟.. تاهت في عينيه، لترد بهزة نفي بسيطة من رأسها وكأنها منومة مغناطيسيا، ولكن هزة النفي هذه كانت أكثر من كافية لغيث ليسارع بإحتوائها بين ذراعيه يود إدخالها بين ضلوعه وهو يهتف بحرارة: - بحبك يا جلب غيث...، ولم يمهلها الرد إذ سارع بإقتطاف ثغرها الوردي في قبلة طويلة عميقة أودعها حبه وعشقه اللامتناهي لها، حتى أذ تركها لتستطيع التنفس همس لها وهو يسند ذقنه الغير حليق إلى جبهتها فيما يحاول جاهدا إلتقاط أنفاسه الثائرة: - هاعد الايام بالساعة والدجيجة لحدت يوم الفرح، وربنا يصبرني اليومين دول.. لتسارع بدفعه بخفة وتجيبه وهى تبتعد عنه بخطوات رشيقة: - اعمل حسابك إنك مش عتشوفني واصل اليومين دول، عن إذنك يا ولد عمي.. لتسارع بالإبتعاد فيما ينادي عليها ليقف مراقبا ظلها إلى أن اختفى فابتسم وهمس: - مجنونة، بس بموت في اجنانك..، ليقطب فجأة ليستوعب الآن فقط كلمتها من أنه لن يراها لحين موعد الزفاف فيسارع بالركض خلفها وهو يهتف: - تعالي إهنه، كيف مش عشوفك يعني؟... وجفي يا سلافة!.. وسارع بالركض خلفها بغيّة اللحاق بها..... ************************* ********************** وقفت ووجهها بلون ثمرة الفراولة الطازجة، أشار إليها ليث بسبابته لتقترب، عضت باطن خدها بينما تقترب بوجل، أشار إلى صدره العار وهو يقول بمرح مشاغب مفتعلا الجدية: - يعني إنتي دلوك مش عتغيري ع الجرح؟.. خلاص أشيع الواد صابر يجيب ممرضة من المشتشفى، دام انك مش رايدة اتغيري لي عليه... قطبت بشدة فيما طار خجلها أدراج الرياح وهى تسمع إقتراحه الوقح هذا، لتقترب منه وتتناول الحقيبة التي تحتوي على أدوات غيار الجرح هاتفة بخشونة: - باه.. ممرضة؟.. لاه يا نضري.. عغير لك أني.... ودفعته في كتفه بقوة ليقع جالسا فوق الفراش خلفه وهو يهتف بإستنكار، فيما شمّرت عن ساعديها وبدأت في تنظيف الجرح واستبدال الرباط الطبي بآخر نظيف، كانت أنفاسها اللاهثة تلفحه وهى تقوم بربط الشاش الطبي، بينما تتابعها عيناه كالصقر وما أن انتهت وقد ألصقت اللاصق الطبي بنجاح حتى هتفت بظفر: - اهاه... ولا أجدعها اممرضة تعرف تعمل إللي أني اعملته. ما ان أنهت عبارتها حتى سارع بإحاطتها بذراعه ليرفعها فوقه بينما يميل فوق الفراش خلفه فشهقت بعجب ليدفعها بخفة وبحركة خفيفة لتحل مكانه هى فوق الفراش فيما يشرف هو عليها بينما رائحتها الأنثوية الخاصة تُسكره فيهتف بعد أن نفذ صبره تماما بحرارة قوية: - وأني جبت آخر يا سلسبيلي.. همّت بالكلام ليُسكتها مبتلعا كلماتها.. معتصرا فمها في قبلة حارة تحوّلت تدريجيًّا إلى عناق طويل، عنيف، متطلب، حيث أبحرا إلى عالم عشقهما العميق ليغوصا فيه وقد تشبثا ببعضهما البعض وكأن حياة أحدهما تتوقف على حياة الآخر!.. بعد وقت طويل كانت سلسبيل تفترش برأسها صدر ليث، همس ليث بخشونة وهو يقبّل قمة رأسها: - عارفة يا سلسبيل.. – اكتفت بإصدار صوت همهمة صغيرة فتابع بإبتسامة جذلى – نفسي اتدنيكي بين دراعاتي إكده، لو طولت ما عسبكيش اتفارجيني دجيجة واحدة، عمري ما حسيت بالسعادة إكده، سعادتي في وجودك جنبي وجصاد عيني يا سلسبيلي. رفعت سلسبيل رأسها وطبعت قبلة رقيقة على ذقن ليث الخشن قبل أن تهمس برجاء من عسل عينيها المصفى: - ليث فيه حاجة رايدة عسعلك فيها.. هبط بعينيه إليها وقال بإبتسامة: - اسعلي يا بت عمي..، تساءلت برجاء هامس: - انت فعلا كان جوازك من بت الفرطوس ديْ ع الورج إو بس! زفر ليث بضيق فاعتدلت في رقدتها لتنهض على ساعديها وقالت وهى تميل فوقه ناظرة إليه ترجوه بعينيها فيما توسدت يدها صدره فوق خافقه تماما وهى تردف بإستعطاف: - طمّني يا ليث، أني عجلي هيشت منّي، انت فعلا ما جربتش منيها واصل؟.. زفر ليث بضيق قبل أن ينظر إليها وهو يجيبها بجدية: - سلسبيل من ميتة وأني بكدب في احاجة؟.. لو كان ديِه حوصل ما عاخفيش منيكي وعجول حوصل، لكن أبدا عمري ما لمستها خير.. شر، اطمّنتي؟.. أني بس بدي أعرِف ليه سؤالاتك ديْ، أنتي إكده بتكدبيني يا بت عمي. لتسارع بوضع راحتها فوق فمه وهي تشهق معترضة: - لا عِشت ولا كونت يا نضر عيني، أني بس.. أصلها.... حثّها ليث على التكملة قائلا: - أصلها إيه كمّليْ.. هتفت بحنق وهى تدير وجهها جانبا: - حلوة جوي يا ليث ومتغندرة إكده وشايفه نفْسَهَا، ديه غازيّة يا ولد عمي يعني تِعرف كيف اتجيب الراجل ليها، وأني.. بغار يا ولد عمي، بتجيد فيا النار كل ما ياجي ببالي انه ممكن واحدة تانية إتفكر فيك ولو بينها وبين نفسيها!.. صدحت ضحكة ليث عاليا فضربته سلسبيل بقبضتيها الصغيرتين فوق صدره وهي تهتف بإستنكار: - عتضحك عليّ يا ليث، طيب وخّر عنِّي، أني عاوزة أجوم من إهنه.. ليحاصرها بذراعيه وهو يقول فيما يضغطها أقرب اليه: - أوخّر؟!.. مجنونة إنتيْ!.. أوخّر كيف وأني ما صدجت انك تحسي بجلبي؟.. أهملك كيف وإنتي بتجولي إنك بتغيري علي، يعني بتحبيني؟.. أفوتك كيف وإنتي في الموكان إللي يا ما حلمت اتكوني فيه؟.. جاري إهنه، بين يدِّيني التنيين، تجومي تجولي بعّد؟!.. وبعدين فيه حاجة غلوبت أجولك عليها وأعيد وأزيد فيها... كل الحريم إف كفة وإنتي لوحدك إف كفة، وبرضيكي كفّتك إنتي الرابحة يا سلسبيلي، لأنك خدتي جلبي امعاكي من زمان، من وجت ما كونتيْ بضفيرة وبتجري حواليّ، سرجتيه يا سلسبيل وما عاودش موطرحه إلا لمن اتزوجتك وبجيتي مَرَتيْ، وجتها بس حسيت انه جلبي رد لي تاني، إوعاكي اتحطي نفسيكي في كفة واحدة مع أي حرمة تانية، مرت الليث مالهاش زيّ ومفيش ضوفر حرمة تانية تسواها. لتغشى عينيها طبقة شفافة من الدموع وقد لمست الصدق في كلماته وهمست بصوت متحشرج: - بحبك يا ولد عمي، ربنا ايخليك ليّ يا ليثي، وما عيحرمني منيك واصل.. زادت دقات قلبه وهو يسمع إعترافها اللا مشروط بحبه ومال عليها متمتما بصوت أجش: - بجول إيه.. ما تاجي انكمل الحديت إللي كنا بنجوله من إشويْ. لتعض على باطن خدها وتهمس بخجل يلون وجنتيها: - إحنا كنا بنجول إيه؟.., ليهبط عليها هاتفا بخشونة: - بسيطة.. عفكرك جوامك!!!!!!!!!!!!.... **ليراجع معها ليث كلما سبق وأن قالاه وبالكلمة والحرف الواحد.. (فيس بيرقّص حواجبه وبيغمز بمكر)** ************************* *********************** دلفت سلمى إلى غرفة الجلوس وهى تمسك بمرفق جدها، لتجد الجميع وقد اجتمعوا، ألقى الجد السلام، فيما اتجهت الجدة إلى المطبخ لتأمر الخادمة بإحضار الشاي وقطع الكعك البيتي الذي كانت قد صنعته ألفت في وقت سابق، جلس الجد ليحذو الباقين حذوه وكانوا قد قاموا إحتراما له، انخرط الجميع في أحاديث جانبية لينتهز شهاب الفرصة ويميل على سلمى التي جلس بجوارها هامسا: - مبروك يا عروسة، فرحنا بعد أسبوعين، جهزي نفسك، عشان تبقي تقوليلي عاوزة تسافري مصر، انسي. نظرت إليه بخبث وهى تقول بهمس مماثل بإغاظة وإبتسامة استفزاز أثارت ريبته تعتلي فمها الصغير: - ومين إللي قال إن شاء الله إني مش هسافر؟.. شهاب بثقة: - جدي!.. أنا متأكد أنه مش هيوافق، ولا هتعملي حاجة من وراه؟.. رفعت سلمى حاجبها بتحد وهي تجيبه بصوت منخفض: - لا طبعا، بس مين إللي قال لك إنه مش هيوافق؟.. قطب سائلا: - يعني إيه؟..., نظرت إليه بتحد قبل أن تثير انتباه جدها قائلة بنعومة: - انت موافق يا جدي على كلامي صح؟.. ليقول الجد هاتفا بتأكيد: - اكيد يا بتّي...، ليلتفت إلى سلافة وهو يشير إليها لتقترب، فنهضت واتجهت إليه لتجلس بجواره من الناحية الأخرى فيحتويها بذراعه قائلا بإبتسامة: - كيفها حبيبة جدها؟.. يعني لا بتتحدتي ولا بتهزري كيف ما كونتي، إيه فيه حاجة مزعلتك يا حبيبة جدك؟.. سلافة بنفي قاطع وهى تحيط عنق جدها بذراعيها وبدلالها الطفولي أجابت: - لا طبعا يا بابا جدو، ربنا ما يحرمني منك أنت وماما ستو.. وقبلت لحيته البيضاء لتعلو ضحكات الجد فيما أردفت سلافة بجدية زائفة: - هو طبعا موضوع الفرح دا بس... ليقطب الجد متسائلا فيما أمسك الباقين أنفاسهم بينما عض غيث على قبضة يده ناظرا لها بلوم لتكمل بمكر: - لكن والله ما هي راجعة، بقى جدو حبيبي يجول كلمة ومعتمشيشي؟.. تمشي على رجابينا كلّاتنا يا كَبيرنا.. لم يستطع الجالسون كتم ضحكاتهم التي صدحت عاليا في حين كانت الجدة تدلف وهي تقول بإبتسامة واسعة: - ما تضحكونا امعاكم... أجاب الجد وصدى ضحكته لا يزال في صوته: - عجولك إيه بس يا أم عتمان، بنت ولدك رؤوف رجعت الضحكة للدار إهنه من تاني، الحمد لله أني كنت عامل إحساب اليوم إللي عيتزوج فيه غيث وشهاب وبنيت لهم كل واحد منيهم دور كامل فوجينا، عشان ميهملوناشي واصل.. إبتسم الجميع إلا واحدة.. كانت إبتسامتها صفراء بينما الغل والكراهية والحقد يتأكلآنها من الداخل.. لتعكر صفو الجلسة المرحة بقولها الخبيث الذي هبّ عليهم كريح خبيثة: - وإنتي إن شاء الله ما كونتيشي رايدة الفرح ايكون في الميعاد إللي حدده جدّك ولا إيه؟.. غريبة.. البنتة كلاتها ما بتصدج تتزوج، وإنتي إيه.. لا يكون ولدنا مش عاجبك!.. ليصمت الجميع وكأن على رؤوسهم الطير، فيرمقها عثمان زوجها بنظرات غضب نارية، بينما تحدجها الجدة بسخط، وينظر إليها غيث وشهاب بلوم، فيما تتبادل ألفت مع رؤوف نظرات ريبة وقلق من حماة إبنتيهما المستقبلية، وأخيرا لينظر إليها الجد بغموض، لتكون سلافة اول من خرق الصمت فتجيب بإبتسامة استفزاز أثارت غيظ راوية وحنقها: - بس إحنا مش أي بنات يا طنط – مشددة على كلمة طنط وهي تمط شفتيها- احنا بنات روؤف الخولي.. إللي طول عمرهم حلم لأي واحد.. لا إحنا خايفين نعنس ولا يفوتنا القطر، يعني من الآخر ولاد عمنا أكيد ماما ستو داعيالهم في ليلة القدر أنهم يناسبوا عيلة الخولي.. أكبر عيلة في البلد.. صح يا ماما ستو؟.. ** متجاهلة عن قصد ان تقول ان أمهم هي التي دعت لهم فهى تعلم تماما ان امهم ابعد من ان تدعي تبلك دعوة وايضا كي تثير غيظها أكثر وأكثر لعلها تموت حسرة وكمدا العجوز أم منقار تلك!! **.. كان الجد من أجاب وقد أُعجب بسرعة بديهة حفيدته والتي كان لإندفاعها في هذه اللحظة الفائدة في تحجيم تلك العقربة الحيزبون: - صوح يا بنت الخولي، بناتنا هديّة ما عندّيهاشي إلا للي يستحجّها، ومافيشي غير أولاد الخولي إللي يستحجُّوا بنات الخولي.. ثم عمد إلى تغيير الحديث مردفا للجدة: - فينو الشاي يا أم عتمان.. ليقاطعه دخول الخادمة بصينية الشاي، لتمر بين الجالسين لتقديم الشاي وقطع الكعك، وبعد انصرافها قال الجد بهدوء: - عتسافروا ميتة يا رؤوف يا ولدي؟.. ليسعل غيث وهو يرتشف الشاي بينما ينزل شهاب قدح الشاي الذي كان على وشك الإحتساء منه فيما يجيب رؤوف بهدوء: - الصبح إن شاء الله يا حاج، يدوب عشان نلحق نخلص إللي ورانا.. قطب عثمان فيما استمع غيث وشهاب إلى سؤال والدهما: - عتسافروا يا خويْ؟.. ليه؟.. أجاب رؤوف بإبتسامة: - عشان البنات يلحقوا يجهزوا حالهم يا أبوغيث، فرحهم قرّب.. أنت ناسي؟.. لتميل سلمى إلى شهاب الذي كان يحدق في وجه عمه مدهوشا وتهمس له بمكر: - عرفت بقى أني برضه هسافر وبموافقة جدي نفسه، بالعكس بقى.. دا اقتنع على طول أول ما قولت له أننا لازم نسافر عشان نلحق نجهز إللي عاوزينه، عشان.. الفرح يا ابن عمي.. قبض بقوة على قدحه حتى كاد يُكسر، ثم وضعه جانبا قبل أن يلتفت إليها وهو يهمس من بين أسنانه: - أنتي بترديهالي يا سلمى؟.. طيب إيه رأيك بقى.. رجلي على رجلك، وابقي امنعيني أني آجي معاكي!!!! لتحدق فيه فاغرة فاها غير مصدقة لما قاله هذا المتهور!.. كيف بالله عليه سيرافقهم في سفرهم، هى تريد فسحة من الوقت لتعتاد على فكرة زواجهما المرتقب وهو لا يريد إعطائها حتى هذه المساحة الضيقة من الحرية، وحانت منها نظرة استنجاد إلى الجد والذي أدرك بفطنته أن حفيده لن يسلّم بسهولة بأمر سفرها، وكأن حدسه قد أخبره أنه قد يقدم على عملا مجنونا كاللحاق بها فعلا صوته آمرا: - وانت يا غيث أنت وشهاب.. ليلتفت الجميع إلى الجد الذي تابع: - عاوز فرح سبع ليالي، عاوزكم تدعوا الكل، ديِه فرح أحفاد الخولي، انت يا غيث تخلّص شغل الديوان وانت يا شهاب شوف المزرعة ناجصها إيه انتوا بجالكو وجت طويل بعيد عن أشغالكم عشان تتفرغوا للعرايس.. قبض شهاب على يده في حنق بينما ألقت سلمى إلى جدها بنظرة شكر، فيما نظر غيث إلى سلافة التي رفعت حاجبها بإغاظة له ليرمقها بنظرة متوعدة وحدها تعلم معناها... كانت راوية تجلس تراقب النظرات المتبادلة بين ولديْها وابنتيْ عمهما، لتهمس بشرِّ في نفسها: - كأنك لعنة يا ألفت أنتي وبناتك وصابت رجالة عيلة الخولي، ما في راجل في العيلة إلا وطويتوه تحت اجناحكم، لكن اوعاكي تفتكري أنك نجحتي يا ألفت أنتي وبناتك وعتاخدوا الكل في صفكم، أني ليكي يا ألفت بالمرصاد، ما أكونش أني راوية أما خليت أعيالي يخلصوا منيكي الجديم والجديد، بناتك عتدفع التمن يا ألفت، وديه عهدن عليْ!... وبرقت عيناها بشرِّ مستطير، ولكن لم يغب ذلك البريق الخبيث عن عيني الجد اليقظتين، وفي وقت لاحق نادى عثمان إبنه بعد أن انصرف الجميع، ليطلب منه الجلوس إليه، ثم نظر إليه قائلا بحزم وهو يستند إلى عصاه العاجية: - عتمان يا ولدي.. عتبتك مايلة... إعدلها!!.. قطب عثمان لبرهة.. ثم احمرت أذناه خجلا من والده وحنقا مما قصده من أفعال زوجته وإهانتها المستترة لابنتيْ شقيقه فأجاب: - ولا يهمك يا حاج...، ثم انتفض واقفا وهمّ بالذهاب حينما أردف الجد بحكمة وجدية: - جَوِّمها يا ولديْ.. لكن حاسب تِكْسِرْها، وخلِّي بالك... ديِه المرة التانيّة.. والتالتة.. تابتة يا عتمان... لو ما عرفت تجَوِّمها.. يبجى مالهاش غير أنك... إتغيّرها!!!!!!! الفصل الثامن والعشرون من هنا |
تعليقات
