رواية عشق على حد السيف كاملة بقلم زينب مصطفى

وقفت زهره امام المرآه الصغيره المكسوره المعلقه في غرفتها القديمه ذات الفراش المهترئ
وهي تتأكد من هيئتها بوجهها البيضاوي ذو البشره البيضاء الصافيه والخالي من اي نوع من انواع الزينه وعينيها الخضراء الواسعه ذات الرموش الكثيفه
التي يظهر عليها قلة النوم و التعب و الاجهاد الشديد وشعرها الاصفر الغجري الناعم الطويل المشدود بشده للخلف على هيئة كعكه كبيره مثبته بشده لتعطي لها مظهر متزمت

تنهدت زهره بتعب وهي تتأمل بنطالها الجينز الاسود القديم المهترئ والقميص الذي بهت لونه من تكرار غسيله وهي تجلس وترتدي الحزاء الرياضي القديم وهي تحدثه بتشجيع

= إجمد كده لحد اخر الشهر و أوعدك
هرحمك وأغيرك

ليعلو صوت ضجيج وصراخ بالخارج
لتتنهد بتعب
= شكلة كل يوم ..إستعنا على الشقى بالله
فتحت زهره باب غرفتها لتجد اختها غير الشقيقه الصغرى سالي والتي تصغرها بعامين تتألم وتصرخ و زوجة اخيها تشدها من شعرها بشده وهي تحاول اخذ شئ من يدها
زهره بصوت عالي وقاسي
= جرى ايه ياست انتي ماسكه البت من شعرها كده ليه

إنتفضت زوجة شقيقهم صفيه وهي تضع يدها بخصرها
= وانتي ايه دخلك أخت جوزي وبربيها دخلك انتي ايه
اقتربت منها زهره بخطر وهي ترفع كم القميص بطريقه موحيه
= سيبي شعر البت والا ورحمة امي هجيب شعرك انتي تحت رجلي

صفيه وهي تبتلع ريقها بخوف
= أديني سبت شعرها يعني شعر السفيره عزيزه وطالما قلبك عليها اوي كده خليها تديني الفلوس اللي سرقتها من أوضتي
نظرت زهره لاختها باستفهام
لتطرق سالي وجهها في الارض بطريقه فهمت منها انها قد سرقت فعلا

زهره وهي ترفع صوتها لتغطي على فعلة شقيقتها
= احترمي نفسك احنا معندناش حد حرامي روحي شوفي وديتيهم فين وجايه ترمي بلاكي على الغلبانه دي

صفيه وهي تلوي شفتيها بسخريه
= غلبانه ..دي غلبانه ..دي شيطانه وبعدين انتو هتاخدوني في دوكه انتوا الاتنين انا عاوزه فلوسي

تنهدت زهره بقلة حيله
= بس خلاص هتفضحينا فلوسك اد ايه

صفيه وهي تقول بانتصار
= ميه وخمسين جنيه

اخرجت زهره المال من جيب بنطالها الخلفي وهي تتنهد بضيق
= خدي الفلوس اهيه وسيبيها عشان تروح كليتها
صفيه وهي تأخذ المال من يد زهره وتتركهم و تخرج
= اعوذو بالله عيله حراميه ونصابين كانت جوازه مهببه

زهره وهي تحاول تمالك نفسها
= لو بس مكنش عندي شغل وخايفه أتاخر عليه كنت عرفتك مقامك يابنت بياع البليله

لتنظر لاختها ذات الملامح الرقيقه بلون بشرتها الخمريه و ملامح وجهها الارستقراطيه الجميله
وشعرها الاسود الناعم الذي يصل طوله لكتفيها وقامتها الطويله الرشيقه
= بذمتك مش مكسوفه من نفسك هي وصلت تسرقي من صفيه انتي عارفه لو قالت لاخوكي هيعمل فينا ايه

سالي وهي تضحك بخبث
= مش هتقدر تقوله عشان هي مخبيه الفلوس دي من وراه ولو عرف هياخدهم منها
وبعدين يا زهره انا قلتلك اني عاوزه اطلع رحله مع أصحابي في الجامعه وانتي طنشتي

زهره وهي تتنهد بضيق
= انتي عارفه ان لو كان معايا فلوس كنت اديتك وعموما مينفعش تسرقي فلوس غيرك عشان تنفذي الي نفسك فيه
لتتابع بفروغ صبر
خلاص يلا البسي واجهزي عشان جامعتك وكمان قبل ما أخوكي يرجع من عند شلة الانس الي سهران عندها

سالي وهي تمط شفتيها بقلة اكتراث
= يرجع وألا ميرجعش هو حر انا مش فاهمه بيعمل كده ليه

مضيع فلوسك وشغلك على سهراته والشله الي مصاحبها ..دا انتي بتشتغلي تلات شغلانات ومش مكفيه مصاريفه مش قادر ينسى العز والغنى الي كان عايش فيه زمان ولسه بيتصرف كأنه امين بيه المليونيرالكبير
لتتابع بتأفف
انا مش عارفه انتي متحملاه على ايه دا حايلا ابن جوز امك الله يرحمها انا لو منك اسيبه واطفش

ربطت زهره حذائها الرياضي المهترئ وهي تتنهد
= انا مستحملاه عشانك انتي.. انتي اخته وكل مابيتكلم بيقول اختي وانا حر فيها ويهددني بيكي ..
وانا عارفه ومتأكده انك مش هتقدري عليه لوحدك
هيستفرد بيكي ويبيعك لاول واحد يرميله قرشين
عرفتي انا متحملاه ليه..
وبطلي كلام عليه زمانه راجع ولو سمع كلامك هيدور فينا الضرب ذي كل مره
المره الي فاتت كان هيكسر دراعي لولا اني قدرت اهرب منه خلينا نبعد عن شره احسن

مررت سالي مشط صغير في شعرها ووضعت القليل من احمر الشفاه و هي تقول باستعجال
= طب يلا بينا انا جهزت خلاص

أغلقت زهره باب الشقه خلفها وهي تقول بمرح
= طبعا يلا بينا... مستعجله عاوزه تلحقي تشوفي الامور ابو عربيه مرسيدس
سالي بمرح
= اسكتي يا اختي عنده حتت عربيه تهبل لما بشوفها قلبي بيرفرف

عقدت زهره حاجبيها بدهشه
= انتي بتحبيه والا بتحبي عربيته
لتتابع بريبه
وبعدين واحد وسيم وغني ومن عيله ذي مابتقولي ايه الي هيخليه يسيب كل البنات الي حواليه ويبصلك

سالي بضيق وهي تشير لتاكسي
= وميبوصليش ليه يعني ما أنا قدامك أهوه حلوه وذي القمر وأنا وراه لحد ما أوقعه فيا
لتضيف برجاء
زهره عشان خاطري بلاش كلامك الي بيحبطني ده خليني أحاول اخرج من الفقر والقرف الي عايشين فيه

زهره وهي تستعد لركوب الاتوبيس
= اهم حاجه تاخدي بالك من نفسك الي ذي ده بيبصو للناس من فوق متخليهوش يضحك عليكي فهماني
اه...ووحياة ابوكي خفي من ركوب التكسيات شويه

سالي وهي تضحك وتصعد للتاكسي باستعجال
= معلش يا كوكي عشان البرستيج ميبوظش

صعدت زهره بسرعه للاتوبيس الممتلئ على اخره وحشرت نفسها بين الركاب لتتوه في افكارها و عيناها تدمع وهي تدعي بحزن
= يارب ساعدني بأي مبلغ اقدر افتح بيه مشروع وأخد اختي وابعد لتدمع عيناها وهي تتزكر ماحدث في فجر الامس

فلاش باك

استيقظت زهره من النوم فجرا وهي تشعر بحاجتها الشديده لشرب الماء
لتتوجه للمطبخ المعتم وهي تفتح صنبور المياه وترفع الكوب على فمها بعطش لتتفاجأ بمن يحتضنها بشده من الخلف
زهره وهي تصرخ برعب
= حرامي الحقوني

لتتفاجأ بمهاجمها يضع يده على فمها يحاول كتم صراخها وهو يقول بغضب
= اخرسي يابنت الكلب هتفضحينا

لتشعر بالرعب الشديد وهي تتعرف الى صوت امين ابن زوج والدتها الراحله
لتحاول التخلص برعب من يده التي تضمها اليه من الخلف بطريقه مقززه وهو يقبل عنقها من الخلف بالقوه بشهوه منفره
لتثني يدها وترجعها بقوه للخلف وتصدم يدها بمعدته بشده
لتفلت من بين يديه وهو يتألم بشده
وتقوم هي بسحب سكين من على الرف المعلق امامها وتقوم بتهديده به وهي تبتعد للخلف
= عارف لو قربت مني مره تانيه السكينه دي هتكون في قلبك

حاول امين مهاجمتها مره اخرى الا انه تراجع عند رؤيتها تشير ناحيته بالسكين وهي تصرخ بشده بصوت مرتفع
= صفيه ..يا صفيه تعالي امين عاوزك

نظر امين لزهره بشهوه وهو يقول بتحدي
= بقى بتصاحي صفيه عشان تنجدك من ايديا ..ماشي بس يكون في علمك إن الي انا عاوزه هيتم إن مكانش النهارده هيبقى بكره او بعده انا مش مستعجل هتروحي مني فين

زهره بتحدي وهي تحارب رعبها منه
= نجوم السما اقرب ليك من انك تلمسني ويوم ماتحاول تعملها هيبقى اخر يوم في عمرك

امين بتهكم
= ايه لسه مستنيه الجربوع الي اتجوزتيه من ورايا يرجعلك من تاني

زهره بعنف وهي تشعر انها على وشك غرس السكين في قلبه
= اخرس متجبش سيرته على لسانك سيف عمره ماكان جربوع و انت عارف كويس ان انت السبب في كل الي حصل بينا

امين وهو يضحك بسخريه شديده
= ايه كنت عاوزاني اوافق على جوازك من ابن السواق الي كان طمعان في فلوسك

امتلئت عين زهره بالدموع وهي تجيب بارتعاش
= إنت فاكر الناس كلها ذيك طماعه وبتجري ورى الفلوس ..
سيف عمره ماطمع في فلوسي وانت عارف كده كويس ..سيف كان بيحبني وانا كمان...

ليقاطعها امين بقسوه
= انتي كمان كنتي بتحبيه واتجوزتيه في السر من غير موافقتي وكانت النتيجه ايه
سافر وسابك متعلقه ذي البيت الوقف
لا منه خدك معاه ولا منه طلقك
سابك مرميه من غير مايسأل فيكي
وإنتي كنتي.....
لتقاطعه زهره وهي تشعر بيد تعتصر قلبها بالم
= سيف سافر وسابني لما انت اجبرتني أهينه
واقوله اني ندمانه اني اتجوزته لانه مش من مستوايا
سيف سابني لما خلتني اهينه قدام امه الي هي تعتبر كل عيلته وكل حياته واقوله اني جايلي عريس من مستوايا وانه لازم لما يختار ..يختار من طبقته خليتني اطلب منه الطلاق وأهينه وانا روحي فيه عشان انقذه من السجن و انقذه من القضيه الي كنت عاوز تلفقها له
ضحك امين بغرور
= عشان تعرفي امين شديد وقوي وقادر أد إيه
كنت عامله قضية اختلاس انما إيه تخليه يقضي حياته كلها في السجن بس فلت منها ابن اللذينه معرفش قدر يخرج منها اذاي..
بس على الاقل اتبهدله شويه في السجن لحد ما قدر يثبت برائته

ضغطت زهره على السكين بقوه وهي وتتمنى ان تطعنه به
= وده يثبت أد ايه انت انسان حقير و ندل خليتني اهين كرامته واطلب منه الطلاق علشان متسجنوش و أوافق إني اتخطب لغيره وانا لسه على زمته وفي الاخر برضه لفقتله القضيه وحاولت تسجنه

امين بسخريه
= كان لازم يتربى ويتعلم ميبوصش لفوق لاسياده
وكان لازم يفهم ان ده مصير اي حد يبص لحاجه مش بتاعته وانا كنت حريص اني اعرفه ان كل الي هوه فيه ده كان عقاب بسبب جوازه منك

زهره وهي تقول بتعب
= وأهو سافر وسابلك البلد كلها ..
وانت ربنا عاقبك وخسرت كل الفلوس الي عندك
حتى فلوسي انا واختك خسرتها في القمار والجري ورى الستات و بقيت ساكن في حاره يوم تلاقي تاكل وعشره متلاقيش والا انت فاكر نفسك لسه امين بيه ابن البشوات ذي ما كنت بتقول

امين وقد انتفخت اوداجه من شدة الغضب
= انا امين بيه وهفضل امين بيه غصب عنك وعن الكلب الي اتجوزتيه من ورايا وانتي هتيجي راكعه تحت رجلي والي عاوزه هيتم سواء برضاكي او غصب عنك
ليتحرك ناحيتها بتصميم وهو ينوي تكملة مابدأه
وتصرخ زهره بخوف بصوت مرتفع تنادي على صفيه مره اخرى وهي تجري ناحية غرفتها وتغلقها من الداخل بالمفتاح
= يا صفيه ..يا صفيه ما تيجي تشوفي جوزك عاوز ايه
خرجت صفيه من غرفة النوم وهي تفرك عينيها بنعاس
= عاوز ايه يا امين هو ده وقت حد يطلب حاجه فيه

امين وهو ينظر لباب غرفة نوم زهره بغضب
= روحي اتخمدي كملي نومك انا خارج اسهر بره

ليخرج من باب الشقه وهو يغلقه خلفه بعنف
مطت صفيه شفتيها وهي تقول بعدم اكتراث
= يا باي... كويس انه خرج خليني اعرف انام براحتي

استمعت زهره بارتياح لخروجه الغاضب وهي تتنهد بتعب ودموعها تتساقط
= يارب انا تعبت ومبقتش قادره ومش عارفه اعمل ايه
لتستلقي على السرير وهي تبكي بشده حتى غلبها النوم والتعب

*عوده للوقت الحالي

نزلت زهره من الاتوبيس المزدحم الذي وقف بالقرب من مكان عملها بالفندق الراقي
الذي يحتل الواجهه الرئيسيه في احد الشوارع الراقيه بمدينة القاهره
لتدخل من باب العاملين الى المطبخ وتلبس الذي الموحد للعاملين بالمطبخ
وهي تنظر بتعب لاكوام الاطباق والحلل والاكواب المكدسين امامها وتبدء في جليهم بهمه وهي تسرح في ما ينتظرها عند عودتها للمنزل

انتبهت زهره على صوت مدير المطعم الفخم التابع للفندق
وهو يقول بجديه شديده
= المطعم كله محجوز النهارده لحفلة استقبال رجل اعمال كبير شخصيه مهمه Vip ويهمنا اننا نكون في افضل حالتنا قدامه
عشان كده مفيش اجازات او اذن انصراف وكله هيشتغل النهارده شفت زياده يعني مفيش حد هيراوح النهارده

شعرت زهره بالتوتر وهي تتوجه لمدير
المطعم
= لو سمحت يا فؤاد بيه بس انا مش هقدر اشتغل شفتين انا عندي شغل تاني مقدرش أتأخر عنه

فؤاد بصرامه
= الي مش هيشتغل شفتين في يوم مهم ذي ده للفندق يتفضل ياخد حسابه ويمشي ويعتبر نفسه مرفود انا مش مسئول عن شغلك التاني
لتتراجع زهره للخلف بتوتر وهي تقف بجانب الاطباق
= خلاص يا فندم انا هاخد اجازه من شغلي التاني
ليتجاهلها ويخرج من المطبخ دون الرد عليها
زهره وهي تأخذ هاتفها المحمول القديم وتتصل على عملها الاخر
= اعوذو بالله هقولهم ايه دلوقت

مر بعض الوقت وهي تتكلم في الهاتف برجاء حتى استطاعت الحصول على اجازه
لتتنهد براحه
= الحمد لله اتحلت و وافقو على الاجازه
لتبدء في عملها بنشاط والمكان يتحول من حولها لخلية من العمل المتواصل
والتحضيرات المستمره لحفل الاستقبال
الذي سيقام في المساء
مر الوقت سريعا حتى ابتدء توافد المدعويين على الحفل
واذدادت وتيرة العمل سرعه وشده
مسحت زهره عرقها بتعب وهي تلمع احد الكئوس الكريستاليه
وزميلتها بالعمل نوال تقف بجانبها تستلم منها الكئوس
وتضعها فوق صينيه كبيره استعدادا لنقلها الى الداخل
زهره بتعب
= بقينا نص الليل هي الحفله دي مش هتخلص والا ايه

نوال بتهكم
= تخلص ايه دي لسه بادئه وشكلها هتستمر للفجر

زهره بفزع
= يعني ايه احنا هنفضل مطحونين في الشغل ده للفجر

نوال بتعب
= أهو يوم وهيعدي المهم عرفيهم في البيت انك هتتأخري عشان ميئلئوش عليكي

ليرتفع رنين هاتف زهره فجأه ويظهر اسم امين على شاشته القديمه

زهره وهي تنظر للشاشه بكره
= أعوذو بالله وده عاوز ايه دلوقت
انا هطلع اكلمه بره عشان المدير ميخدش باله واشم شوية هوى اصلي حاسه اني مخنوقه

ربتت نوال على كتف زهره بتعاطف
= روحي بس متتأخريش ولو حد سئل عليكي هقول انك في الحمام

خرجت زهره من باب العاملين الذي يقع في شارع جانبي ضيق وهي تتحدث في الهاتف
زهره بكره
= نعم عاوز ايه مش قلتلك متتصلش بيا وانا في الشغل

امين بغضب
= انتي فكراها سايبه والا ايه في واحده محترمه تقعد للوقت المتأخر ده بره البيت

زهره بسخريه
= سيبك من دور المحترم الي مش لايق عليك ده وقول انت عاوز ايه علطول

امين وهو يضحك بصوت مرتفع
= محدش فاهمني قدك يا زوز وعشان كده هاموت عليكي

زهره بغضب
= موته لما تاخدك ان شاء الله

امين بغضب
= لمي لسانك يابنت اعتدال والاا وحشك الضرب والجلد بالحزام

زهره بقهر و عينيها تلتمع بالدموع المحبوسه
= عاوز ايه خلصني بتتصل بيا ليه

امين بعجرفه
= عاوز فلوس انا واقف قدام باب المطعم والمكان كله متقفل بالبادي جاردات ومش عارف ادخل

زهره بفزع
= تدخل فين انت عاوز توديني في داهيه ..انا مش لسه عطياك فلوس امبارح لحقت تخلصهم

امين بغضب
= خلصو ..انتي هتحسبيني والا ايه هتجيبي فلوس والا اعملك فضيحه هنا

زهره بقلة حيله
= لف وتعالى من الشارع الصغير الي في ضهر الفندق هتلاقيني واقفه مستنياك
مرت دقائق وزهره تتلفت حولها بقلق
حتى رأته قادم بعنجهيه تجاهها
اسرعت زهره ناحيته وهي تمد يدها اليه بالنقود
= خد واتفضل من هنا قبل ما حد يشوفك وأترفد

نظر امين باستنكار للمال في يده وهو يتكلم بصوت عالي
= خمسين جنيه ودول اعمل بيهم ايه دول ميجوش حق كاس واحد

زهره بخوف وهي تمد يدها لداخل صدرها تخرج منه مئة جنيه
= وطي صوتك بلاش فضايح واتفضل مية جنيه أهي كمان بس يلا امشي من هنا قبل ما حد يشوفك

أخذ امين المال من يدها وهو ينظر
للمكان الذي اخرجت منه المال بشهوه
وهو يحاول الاقتراب منها
= مش هتغيري رأيك بقى وتعملي الي انا عاوزه بمزاجك بدل الضرب والبهدله

زهره وهي تبعده عنها بقسوه
= نجوم السما اقربلك يا حيوان

ليصفعها امين على وجهها بشده ويختل توازنها وتسقط على الارض بقسوه بجوار صندوق كبير للقمامه
ويتركها امين و يغادر وهو يقول بغضب
= الحيوان ده هيربيكي يا بنت اعتدال وبرضه هتعملي الي انا عاوزه برضاكي
غصب عنك هتعمليه

حاولت زهره أكثر من مره النهوض بتعب الا انها فشلت لتجد يد تمتد اليها فتمسكت بها تحاول النهوض لتسمع صوت يقول بسخريه وتهكم
= اول لقاء ما بينا بعد اربع سنين وألائيكي في المكان المناسب ليكي بالظبط
ليشتد صوته بقسوه
= مرميه في الزباله
شهقت زهره بصدمه و هي ترفع وجهها بلهفه
لتصطدم عينيها بعينين تنظران لها بكراهيه شديدة و قسوه

لتتساقط الدموع على وجنتيها بدون ارادتها و هي تقول بعدم تصديق
= سيف......