قصة النداهة كامله
كام مرة سمعت حد بينادي بإسمك ولما تروح تشوف مين ماتلاقيش حد ؟!
كتير مش كدة ؟!
جايز عشان انت في المدينة فالموضوع بالنسبالك بيعدي عادي ، لكن الحقيقة عندنا الوضع مختلف جدا !
من ساعة ماوعيت ع الدنيا وانا اسمع عنها ، حذروني كتير منها ، وياما حكولي أساطيرها ، بالنسبالي الحدوتة كانت بتنتهي بكلمة ملتوتة لما ستي تسألنا في الاخر عن رأينا !
الحكاية بالنسبالي كانت مملة أوي ، تخاريف عواجيز مش أكتر ، محاولة لصنع شبح وهمي عشان يرعبوا بيه الأطفال ، مجرد وهم زي أبو رجل مسلوخة وأمنا الغولة !
هي كمان كانت بالنسبالي وهم ، مش مصدقه ولا ناوي أصدقه !
بالعقل كدة إية اللي يخليني أصدق وجود كائن "النداهه " من أساسه؟!
كبرت وأنا حالف لتمرد ع اسطورة النداهه اللي بيخاف منها الشنبات قبل الاطفال !
كنت بنزل بالليل قريب من الترعة أو الزرع وأنادي عليها بأعلي صوت عشان أأكد للكل إنها موجودة بس في خيالهم !
وكنت برجع بيتنا بأبتسامة أنتصار بوزعها ع أهل البلد مخلوطة بشماته في غبائهم ومعتقداتهم وأساطيرهم!
من فترة كنت مخلص شغلي بالليل متأخر عشان الشركة اللي شغال فيها كانت بتعمل جرد ، مش متعود على السهر ، بس غصب عني أحنا في أخر السنة ولازم نعمل الجرد دة !
متعود في طريقي وأنا مروح من الشغل أعدي ع زرع الذرة بتاع عم محسن ، كل حاجة شكلها متغير ، حتي الترعة لونها صافي جداا !
جايز عشان هي كانت قاعدة عليها ومدلدلة رجلها في المية ، أجمل بنت شوفتها في حياتي ،شعرها طويل جدااا لدرجة ان ضهرها مش باين من طوله ، كله كوم وصوتها وهي بتغني كوم تاني !
كانت زي الحلم وفجأة مشيت وسط الزرع و اختفت ، ماعرفش اسمها ، ماعرفش ساكنة فين ، ولا عارف أي حاجة عنها ، كل اللي أعرفه إنها سحرتني بيها !
كل يوم في نفس المعاد كنت بروح أدور عليها مش بلاقيها .
ماليش سيرة في البلد غير عنها ، بدور عليها في كل مكان ، حكيت لسيد اخويا ، سيد اللي ماليش غيره في الدنيا بعد موت أبويا من سنة !
من حبه ليا ومن خوفه عليا أصر إنه يجي معايا في نفس المكان يمكن نلاقيها !
روحنا وبردو مالقينهاش ، الموضوع انتشر في البلد ، البلد كلها كانت متأكدة إنها النداهه ورجعت عشان تاخد واحد من أهل البلد معاها وتختفى بيه ،إلا أنا ، أنا الوحيد اللي متأكد إنها بنت عادية وإن النداهه وهم وبس !
لحد اليوم المشؤم روحت زي مابروح كل ليلة بس سيد كان معايا وظهرتلنا وغنت وبدأت تنده علينا أنا وسيد بأسمينا !
في لحظة حسيت ان في حاجة غلط ، ملامحها بتتبدل ، شعرها بيطول، جسمها بيظهر وبيختفي في أقل من ثانية ، سيد بيتحرك من مكانه رايحلها ، حاولت أشده وأبعده عنها بس ماقدرتش ،كإنه متخدر ، سيد بدأ يشدني معاه ، قدرت أفلت منه وأجري ، سيد راحلها وخدته وأختفت ، ماحستش بنفسي غير وأنا بصرخ بأعلى صوتي ، كل البلد خرجت من بيوتها ، كانوا متأكدين إنها النداهه وخلاص خدت سيد ومش هيرجع تاني ، أنا اللي ضيعت أخويا ، كان لازم أسمع كلامهم وأصدق إن النداهه مش وهم ،النداهه حقيقة !
...............................
صدقتوني مش كدة ؟!😊
عشان اغبياء وبتصدقوا التخاريف ، غباء أهل البلد بردو كان في نفس المستوى ، ودة ساعدني إني أقتل سيد وأدفنه في خرابه وأفبرك قصة النداهة ، كنت متأكد إنهم هيصدقوني عشان كانوا عارفين إني مش بصدق تخاريفهم !
مش مهم ،أهم حاجة إن سيد رايح ومش هيرجع تاني ، البلد كلها أتأكدت إن النداهه خطفت سيد والقضية اتقفلت، وانا أخدت الأرض بتاعه ابويا تاني ، سيد كان جشع كان واكل حقي ، عشان كدة كان لازم أرجع حقي ، وحقي ماكنش هيرجع غير بموته !
بس خلي بالك النداهه مش قصة النداهه ممكن تكون حقيقة ، جايز انا حظي حلو وماطلعتليش ، بس ممكن تطلعلك !
لو ماشي في يوم ولاقيت حد بينادي بإسمك أجري بسرعة وماتبصش وراك ، ماتبصش 😊
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
