 |
| قصة صيدلية الموت |
انا صيدلى شاطر من 15 سنة كنت بحب بنوتة لدرجة الجنون وكنت عارف اهلها كلهم واخواتها البنات واخوها الصغير اللى تقريبا كان متعلق بيا وملازمنى طول الوقت ، وبعد 3 سنين حب بينى وبينها حصل لي ظروف فى البيت ، والدى توفى ووالدتى جالها مرض ما فبقيت انا متكفل ماليا بكل شئ ، فى الاول وقفت جنبى وساندتنى بدرجة كبيرة انى اقف واصمد واعدى كل اللى بيحصلى بسلام ، لكن دايما البدايات مبتكونش ابدا زى النهايات ، بعد فترة من انشغالى بمرض والدتى عرفت صدفة انها اتعرفت على شاب جارنا فى نفس المنطقة تقريبا واصبح ملازمها بدرجة كبيرة ، لما سمعت كده اتجننت وواجهتها وكانت النتيجة بعد غضب وزعيق مستمر اننا انفصلنا عن بعض ، النار قادت فى قلبى بعد يومين فقط من اخر حديث بينا لما شوفتها ماشية معاه والفرحة اللى فى قلبها مالية عنيها ولاكأنى كنت شئ فى حياتها ، وبعد ايام جت اختها الصيدلية وطلبت مني دوا لوالدتها واديتلها فعلا الدوا ، لكن وهي خارجة بالصدفة وبحسن نية عزمتنى على فرح حبيبتى على ابن الجيران اللى كانت ماشية معاه ، طبعا خدت الصدمة فى ذهول وقولتلها الف مبروك وانا بتقطع من جوايا وفى اللحظة دى الشيطان بدأ يلعب فى دماغى ويقولى انى لازم انتقم منها ، وقررت طبعا ان الانتقام اللى هعمله ميضرنيش فى شئ وانى احاول بقدر الامكان مأذيش نفسى بسببها هي فى نظرى انسانة متستاهلش ، بعد يوم او اتنين جه اخوها الصغير طالب كريمات تفتيح من اللى بتاخدها العروسة ليوم جوازها ، عندنا منها فى الصيدلية كتير ، قولت لاخوها اقعد واديته الموبايل بتاعى يلعب فيه شوية عقبال مااجبله الكريمات بتاعتها ، خدت علب الكريمات ودخلت معمل الصيدلية ، وضفت عليها خليط من الفيروسات اللى بيدخل فى علاج السرطان والايدز وماشابه ، وعملتلها كوكتيل محترم ، انا نفسى مكنتش اعرف نتيجته ايه ، اول مرة اجرب الخليط ده ، وفعلا البنت اتجوزت وعدى اسبوع بالتحديد وسمعت صراخ وصوت عالى من عند اهلها عرفت ساعتها انه الخبر اليقين اللى هيشفى غليلى ، طبعا طلعت بسرعة وبدهشة قولتلهم
=فى ايه ، ايه اللى حصل ؟
والدتها مردتش عليا غير بجملة واحدة
..هدير ماتت ياحسن ، هدير ماتت ياحسن
والدتها مردتش عليا غير بجملة واحدة
..هدير ماتت ياحسن ، هدير ماتت ياحسن
احساسى بالذنب مكدبش عليكم مكنش جامد وده اللى خلى جوزها اللى كان يعرف الحكاية القديمة اللى بنا طردنى وسط كل الموجودين ، حسيت باهانة فظيعة ، بس معلش انا عرفت هاخد حقى منه ازاى ، اخته الجميلة فى الوقت ده بقت صاحبتى اوى بس انا بقى مش هموتها انا هحسره عليها الاول علشان بعد كده يحرم ياخد حاجة مش بتاعته وكمان انه يهينى دى حاجة متحتملش بالنسبالى ، فى الميعاد الاول اللى بنا اعترفتلى بحبها ليا وانا كمان بادلتها نفس الشعور واعترفتلها بحبى ليها وساعتها صارحتنى بكل حاجة ، وان اد ايه اخوها بيكرهنى وبيتمنالى الاذى ومش بس كده ده محرج عليها تماما انها تشترى حاجة من عندى من الصيدلية او حتى تفكر تتكلم معايا، وده كان اقرب طريق ليا علشان احسره واعيشه فى قهر طول عمره ، وقررت استخدم البنت دى فى القضاء عليهم تدريجياً ، طبعا انا مش مستعجل وكنت متأكد ان فرصة الانتقام هتجيلي لحد عندى.
وفى اليوم الموعود لقيتها جاية بتجرى على الصيدلية وكنت خلاص بقفل وماشى وكانت الساعة تقريبا 12 بليل ، قالتلى ان والدتها تعبانة ومحتاجة انسولين لان السكر مش متظبط عندها والعلاج خلص من البيت ، بصراحة مقدرتش افوت فرصة زى كده انى احسره على اغلى ماليه فى الدنيا ، وحطيتله الكوكتيل الفيروسى الجميل بداخل فيال الانسولين لكن حطيته المرة دى بنسبة خفيفة كنت عايز الامر يبان طبيعى ، انها اتصابت بالامراض نتيجة سنها الكبير، والست اتحسنت وجت البنت وشكرتنى جدا فى اليوم اللى بعده وقالتلى ان اخوها اللى شغال فى مصلحة الجمارك ، هيبات بره يومين ودى برضو كانت فرصة كبيرة بالنسبالى انى اختلى بالبنت واعيشه فى حسرة وقهرة وعار طول عمره ، واتفقت معاها انها تجيلي بالليل بعد ماتحط لوالدتها المنوم على طول ، واول مادقت الساعة 12 بالليل لقيتها جايالى وبإبتسامتى المعهودة استقبلتها ودخلنا جوه المعمل وعملنا كل حاجة ممكن تتخيلوها بعد مااخدت منى وعد بالجواز، واستمرينا على الموضوع ده ايام ورا ايام ، بننتهز الفرص علشان نبقى لوحدنا وهي كمان كانت مقبلة على الموضوع بشكل غير طبيعى لحد ماجتلى فى يوم بخبرين، الاول ان والدتها تعبانة جدا وشبه بتحضر والثانى انها حامل فى الشهر التالت ومش عارفة تعمل ايه ، طبعا صبرتها بعد ماقولتلها لازم موضوع والدتها يمر الاول على خير وبعد كده نقدر نتكلم مع اخوها ، بعد يومين بالتحديد والدتها توفت وكانت ايام صعبة عليهم وشوفت بعينى انكسار وحسرة اخوها اللى مقدرش يرفع عينه فى عينى فى العزا ، انا نسيت اقولكم انى حضرته انا برضو ابن اصول وافهم فى الواجب ، ومش بس علشان اعمل الواجب لا ، ده كمان علشان اطمن البنت اكتر ان ممكن الموضوع بينى وبين اخوها يتساوى والمشاكل اللى بنا تنتهى، والحقيقة بعدها بأيام حسيت انه عايز كده ، موت والدته كان مأثر عليه بشكل كبير وكأنه كان عايز يصالح كل خصومه علشان لما يموت يبقى ميت على نضيف ، انا برضو ابن حلال ومش هضيع عليه فرصة انه يتصالح معايا، فى يوم لقيته عدى عليا فى الصيدلية ورمى السلام وطلب مكنة حلاقة لدقنه وانا بكل ابتسامة اديتله المكنة وكمان خدته بالحضن وواسيته على فراق والدته ، وهو بكى فى حضنى وكأنه بيترجانى انى اسامحه على اللى عمله معايا بعد ماخد حبيبة عمرى اللى كنت بتمناها من دنيتى وعايش بس علشانها، بس بما انه مبيفهمش فى معنى الحب ، واضح كمان انه مبيفهمش معنى الكره وممكن يوصل الانسان لإيه ، الكره يخلى الملاك شيطان ، والطيب شرير، والمؤدب سافل، والباقى على الحياة بيبيعها ، وده حالى دلوقتى بعد مااتكسرت على ايديه .
يوم روا يوم بيعدى وبطن اخته بتكبر وتحاول تدارى وتتحججله مرة انا عندى انتفاخ ومرة اصل الدورة الشهرية بتاعتى عملالى تقلصات ، المهم بتحاول تنفد من سؤاله اللى اصبح متتالى انتى بطنك مالها عاملة كده ليه تعالى نروح نكشف ليكون فى ميكروب فى معدتك، ماهو غلبان بقى ميعرفش ان انا السبب فى كل ده .
الجزء الثاني والاخير من هنا
