رواية روح أيوب الفصل الخامس عشر بقلم رحبة
-يا ربي!
قولتها لنفسي وأنا ببص للورق على المكتب ومش عارفة أخلص المادة!
مادة اسمها لوحده من ٤ كلمات !ليه؟!
-اهدي يا روح
هتعدي بإذن الله وربنا هيكرمك بإذن الله
سميت الله وقاعدة أكمل مذاكرة وأحمل ورق تاني عشان أبعته للمكتبة -لقد وقعنا في الطب بجد الحمدلله-
-روح
اتكلمت وأنا لسه باصه للورق
-ايوا يا ماما
-فيه عريس كلم باباكي وعايز ييجي يقعد معاكي ،الموضوع بقاله كام يوم بس بابا كان بيسأل عليه الاول وبعدين يفاتحك
اي رأيك؟
مكنتش مركزة أوي ، مديالها انتباهي لكن عقلي
مشغولة باللي قدامي وسامعه سيرة بابا في الموضوع فرديت من غير وعي مني للي اتقال كله
-ماشي يا ماما
-بجد؟يعني موافقة؟
بصيت باستغراب
-تمام اعملي اللي انت عايزاه
-ربنا يفرحك يا رب يا حبيبتي هروح بقا أبلغ بابا
اي الفرحة دي !
رجعت أكمل المادة اللي مش راضية تخلص دي
في وسط م أنا بذاكر كلامها رجع اتردد في دماغي دي
-عريس!
هي قالت عريس ؟
وأنا قولت تمام؟!
يا ربي!
-يا ماما
طلعت وأنا بنادي عليها
ماما عريس اي اللي بتقولي اي؟
-اي يا روح مش قولتي تمام أبوكي اداله معاد خلاص ومتخافيش يوم معندكيش فيه امتحان
رديت وأنا شويه وهعيط
-مينفعش يتلغي قوليله كانت مغيبة
-نعم يا حبيبتي بتقولي حاجه ؟
-الله يسترك
-يا رب
لكن مينفعش خلاص
جهزي نفسك هييجي يوم الخميس ان شاء الله
امم
خير ان شاء الله
آه بنقعد نقول امته يجي الشخص اللي ينتشلني من المذاكرة بس هيجي بجد والا اي ؟!
عدت الأيام ويوم الخميس دا كان آخر يوم امتحانات مش المفروض أرتاح جايبين عريس ليا ليه؟!
-جهزتي يا حبيبتي ؟
-ايوا يا حبيبتي
هو اسمه اي ؟
-أيوب ،بشمهندس أيوب
-مهندس، حلو !
-يلا
هروح أأكد على الحلويات
كملت تجهيز
لبست دريس نبيتي شكله عسول وخمار بيج
وكان شكلي واو اللهم بارك
يعني حتى لو دا حصل من غير وعي مني لكن الله أعلم يمكن يكون هو نصيبي فأحب أفتكر اليوم دا وأنا حلوة !
ماما نادتني عشان أخرج
خرجت قعدت معاهم شويه لحد م بابا سابنا لوحدنا لكن هما شايفنا يعني
-السلام عليكم
-وعليكم السلام
-تحبي تتكلمي والا أتكلم أنا؟
بصيتله
-أحب أسمعك
ابتسم واتكلم
-أنا أيوب القاضي ، مهندس وعندي شركة صغيرة أنا وصاحبي وبنسعى الحمدلله ،عندي أخت صغيرة في الكلية ووالدي ووالدتي ان شاء الله تتعرفي عليهم لو حصل نصيب
الحمدلله بصلي وحافظ قرآن وبحاول أبقى مسلم ملتزم بتعاليم دينه
-ربنا يوفقك يا رب
أنا اسمي روح ، في كلية طب بيطري في آخر سنة
وبرضه بحاول أقرب من ربنا
مكنتش عارفه أقول اي !
بيقولوا اي في الاوقات دي ؟
هرتجل بقا
فضلنا ساكتين شويه بعدين قولت
-اي رأيك في عمل المرأة؟
بصلي شويه بعدين قال
-مفيهوش مشكلة طول ما هي ملتزمة بالضوابط
-اللي هي ؟
-يعني ملتزمه بحجابها الشرعي وبضوابط الاختلاط وبتتقي ربنا في معاملاتها
وكمان ميأثرش على البيت فيما بعد ان شاء الله
-الضوابط ومعاك فيها لكن البيت مش هتساعد فيه؟
-أكيد ان شاء الله هساعد باللي هقدر عليه لكن خلينا متفقين المسؤلية بتبقى أكتر على الست
-ممكن
سكتنا تاني
يا ربي !
-قولي عايز تتجوز ليه؟
بصلي وضحك
-فيه حاجه تضحك في كلامي؟
-متعصبة ليه بس ؟
-أنا هادية اهوه!
لو مضايق ممكن ننهي الحوار دا وأقوم أمشي
-استهدي بالله بس
مش مضايق ولا حاجه بس بتسكتي وبتطلعي بأسئلة متوقعتهاش
-طب رد طيب
-بصي يا روح واسمحيلي أقولك باسمك
أنا مش هقولك كلام روايات بس كل اللي هقولهولك إني عايز أهدى ،الحياة كدا كدا بيحصل فيها مشاكل بس عايز يبقالي حد يبقالي ونس وسكن وشريكي في كل خطوة بإذن الله في عفو وعافيه ،يبقى بيحاول معايا نبني بيت يرضي ربنا وناخد بايد بعض مبقاش بحاول لوحدي ويبقى البيت هادي مش قصدي الهدوء بمعناه الظاهر لكن هادي في روحه ويا رب تبقى انتِ
سكت!
امم،شكلنا هنفكر بجد
كلام جميل يا رب يبقى صادق
-في سؤال تاني والا اي ؟
ضحكت
-لا متقلقش
لو حابب اسأل انت
-أنا اتقدمت قبل كدا وباباكي قالي إنه رافضة الجواز دلوقت لكني حاولت تاني وربنا كرمني بشوفتك اهوه
اي اللي اتغير بقا؟
-عايز الصراحة؟
-محبش غيرها
-كنت مُغيَّبة
قال بعدم فهم
-ايه؟!
-بجد مكنتش مركزة وقولت تمام ومش عارفة اي وعلى م فوقت كانوا ادوك معاد خلاص
يعني الامتحانات بتعمل أكتر من كدا بإذن الله
-إجابة غير متوقعة !
ضحكت وسكتنا
قال وهو بيجهز عشان يقوم
-أنا مش مستعجل خدي وقتك لكن عايزك تعرفي إن بإذن الله لو لينا نصيب سوا فأنا هحاول أطمنك على اد م أقدر وهتقي ربنا فيكي بإذن الله وربنا يقدرني وأكون لك زي ما بتتمني في خير وعافية يا رب
قال كدا وقام يسلم على بابا
وأنا لسه واقفة عند كلامه
شكلي هتجوز والا اي ؟!
قومت وراه واحنا بنوصله لباب
بابا دخل يجيب المفاتيح عشان ينزل معاه وفضلنا واقفين على الباب
-متتأخريش عليا في الرد
-مش من شويه كانت خدي راحتك؟
-متاخديهاش أوي يعني
-مع السلامة يا بشمهندس
-مع السلامة يا دكتورة!
