(الفصل الثالث)
وشاور لأتنين على المنصه فجابوا جزع خشب زى اللى الجزارين بيقطعوا عليه اللحمه وجابوا دياب اللى مكتف وحطوا راسه على الجزع وجه السياف ورفع السيف لفوق علشان ينزل على رقبة دياب... فسمعوا صرختى وأنا بقول بصوت عالى :
لا..... دياب معملش حاجه ... أنا اللى لعنت النجع ولو عايزين اللعنه تحل عنكم لازم تقتلوا الساحر الحقيقى ...... اللى هو أنا .....
عم الصمت فى المكان كله , وكل اللى كانوا فى الساحه أندهشوا و قعدوا يببصوا لبعض وبيبصولى ,لحد مادماغهم أستوعبت اللى قولته!!!
سمعت صراخ وصوت عم دياب , ببص عليه لاقيته بيحاول يفرفص من الاتنين اللى ماسكينه وحاطين راسه على جزع الخشبه وسمعته وهو بيقول :
ماتصدقهوش .. أنا اللى لعنتكم .... الواد ده مايعرفش حاجه عن السحر !!!
رفع الساحر الميكرفون, واللى عرفت بعد كده أن أسمه الساحر " خزاعى", وقال لاتنين من صبيانه اللى واقفين فوق المنصه وهو بيشاور عليا :
هاتوه هنا فوق المنصه...
فنزلوا علشان يجيبونى ويطلعونى فوق المنصه , فشدونى من دراعاتى من وسط الناس اللى كانت بتوسع لهم الطريق .
طلعونى على المنصه وفضلوا ماسكين دراعاتى !!!
قرب الساحر " خزاعى " الميكرفون من بوقى وقالى :
أحكى قدام الناس أيه اللى حصل ؟!!
فحكتله على الكتاب النحاسى وعلى العزيمة اللى قرأتها ونقلت الحمى اللى عندى للبلد كلها
,قعد يلعب فى ذقنه الطويله وهوه بيفكر
وقالى :
طيب روح يابنى هات الكتاب ده..
فأعترض حد من الأشراف اللى قاعدين على كراسى المنصه وقال وهو بيكح وصوته مبحوح:
أنت هتسيبه ياخزاعى !!! الواد بيقولك أنه هو اللى لعنا كلنا!!! وهتسيبه يروح يجيب الكتاب ,أفرض هرب !!!
فرد عليه خزاعى الساحر وقال :
لو كان عايز يهرب كان هرب من بدرى أنما هو اللى أعترف على نفسه علشان ينقذ عم دياب
وبص للأتنين اللى ماسكنى من دراعاتى فسابونى .
وبصلى وقالى :
روح يابنى هات الكتاب وتعالا !!
نطيت من على المنصه و جريت على بيت عم دياب وطفشت القفل و باب الأوضه وجيبت الكتاب ورجعت جرى على المنصه , وصلت المنصه وأنا بنهج جامد ومش قادر أخد نفسى
وقلت لخزاعى الساحر :
أهو الكتاب ووفتحت الكتاب وقلتله
دى الحته اللى قري....
خطف من أيدى الكتاب وقلب فيه بسرعه , وعينه بظت لقدام لوهله من كتر الدهشه, بس دارى أندهاشه اللى على وشه بسرعه وغيره بملامح اللى مش مهتم وحط الكتاب فى جعبته وقال فى الميكرفون :
ده كتاب تاريخ يابنى !!!... بيتكلم عن تاريخ الجن !!! , مفيهوش أى تعزيمة مرض .. وبعدين يابنى اللعنه اللى على البلد دى تعزيمه كبيره ومش أى ساحر يعملها لازم يكون ساحر قديم ومحترف وكمان التعزيمه دى بتاخد وقت كبير علشان تتعمل ممكن تاخدلها شهر .. مش قراية دقيقتين فى كتاب تاريخ وأنت عيان!!!
وقال للناس الواد مايعرفش حاجه عن السحر غير بداياته وأستحاله يكون عمل اللعنه دى , وبص للسياف
وقاله :
خلص يابنى !! كفايه تضييع وقت ....
السياف مكدبش خبر ونزل بالسيف على رقبة عم دياب وقطع راسه...
قطعها!!!
..................................................................................................................................................................................................
الوقت وقف فى اللحظه دى !! شوفت راس عمى دياب وهى بتنفصل عن جسمه وبتترزع على خشب المنصه !!! الصوت ده عمرى ماهنساه!!! عمرى ماهنسى آخر رمشة عين فى راسه المقطوعه , كانت كأنه بيقولى :
دخلت الأوضه ليه يا ناير ؟!!!
كل الناس أنفضت بعد كمان ما حرقوا جثته!!!
أنا الوحيد اللى فضلت فوق المنصه نايم على بطنى ووشى على خشب المنصه وحاضن دم عم دياب اللى نشف وشربه الخشب بسرعه أوى !!!
ببكى وبعيط بحرقه على عمى دياب ومش عارف أبطل ومش عايز أبطل
الساعه كانت وصلت 3 الفجر ,سمعت صوت تكتة خشب المنصه وصوت كأن رجلين طالعه المنصه , بعد كده سمعت كأن حد بيجرجر كرسى فوق المنصه , حط الكرسى قدامى وقعد فرفعت عينى أشوف مين ده !!!
لقيت شاب تقريبا فى سنى , لابس قميص وبنطلون وشه مكانش باين فى الضلمه , بس شعره طويل وناعم زى الحريم .
قومت من نومتى على بطنى وعدلت قعدتى علشان أشوف ملامحه , لقيته أبيض وسيم عينه واسعه ولونها غريب مايل للون الأزرق
بصلى وقال :
أزيك ياناير ؟!!!
مردتش عليه وفضلت باصصله
لف بعينه على الساحه الكبيره والمنصه وضيق عينه كأنه بيفتكر وقال :
تعرف ياناير المشهد ده أتكرر من 18 سنه , فره كبير ودور برد, موت تقريبا نص البلد وحرقوا الساحر برده , فما تلومش على الناس ياناير !!
قولتله بأستغراب :
أنت مين ؟
قاللى :
طيب ماتيجى نأجل التعارف شويه , لحد مانلحق ورث عمك دياب
قولته :
ورث ؟!!
قالى :
أها ورث عمك دياب من كتب السحر و التحضير و العلاج واللى هتتحرق بكره مع بيته , هو أنت ماتعرفش ؟!! مش أهل النجع هيحرقوا بيت دياب بكره الصبح !!
وشدنى من أيدى بقوه لدرجه خلت جسمى يتصلب طوله لوحده !!!
وقالى :
تعالى ورايا ....
مشيت وراه وروحنا ناحية بيت عم دياب , دخلنا البيت وبعدها دخلنا على الأوضه
قولتله :
الكتب كتيير أوى ومش هنلحق ننقلها كلها قبل الصبح !!
فقالى :
هنحملها على الحمار اللى بره!!!!
قولتله :
حمار!!!؟ حمارأيه!! أحنا جايين مشى من غير حم...
قطعت كلامى لما بصيت قدام البيت ولقيت حمار واقف على الباب مربوط فى عربيه كارو!!!
حملت معاه الكتب على العربية وطلعت من بيت عم دياب
لمحت سكان النجع جايين من بعيد وفى أيد كل واحد شعلة نار وجاى يرميها على بيت دياب الساحر !!
خدنى على حته متطرفه خالص فى النجع عند الجبال ,وودانى عند كهف محفور جوه جبل و قعدنا ننزل الكتب من على الحمار جوه الكهف ,و أحنا بنزل فى الكتب حكالى قصه غريبه ومارضاش يكملها وقالى أن تكملتها عند عفاف الحفافه !!!!
رميت الكتب على الأرض وجريت ناحية بيت عفاف الحفافه ودمى كله بيغلى !!!
قعدت اخبط على الباب بتاعها جامد ففتحتلى وكان باين عليها الحمى ,
قالتلى وهى مخضوضه :
خير ياناير يابنى , بتخبط على الباب جامد ليه كده ؟!!
دخلت بيتها وقفلت الباب ورايا , وقلتلها:
أنا أبن مين يا خالتى عفاف ؟!!!
لطمت على وشها وهى بتقول :
يالهوى .... يالهوى .... مين اللى قالك ؟!!! وقالك أيه !!؟
قلتلها :
مش مهم مين , المهم الكلام اللى قاله ده صح ؟!!
دخلت جوه ورجعت بالمصحف وقالتلى :
احلف أنك مش هتجيب سيره لحد أنك عرفت , وأنك مش هتأذى حد لما أقولك واحكيلك على كل حاجه .
قلتلها بعصبيه :
فيه أيه هو ليه كلكم بتحلفونى على المصحف ؟!!!
عينها غرغرت وقالتى :
وغلاوة ربنا يابنى أحلف ...
مسكت المصحف من أيدها وحلفت علشان أخلص وأفهم
خدت نفسها بالعافيه وقالت :
أبوك مش امام الجامع , ولا كان أكتر حد محبوب فى النجع وسكتت شويه وقالت :
أبوك.. أبوك كان ساحر النجع الساحر نمير , أكتر حد مكروه فى النجع وأكتر حد أذى ناس فى النجع و كان بيسحرلهم بالسحر الأسود لحد ما فى يوم قامت فره ودور برد جامد فى النجع كله ومات فيها يجى نص البلد وعرفوا أن أبوك اللى ورا اللعنه دى !!!!
الناس قامت وراحت لابوك وهددوه لو مشالش اللعنه هيحرقوا بيته , فرمى أبوك تعزيمه على البيت علشان اللى يقرب من البيت يموت وبالفعل فيه 3 ماتوا من تعزيمة الحمايه
فالناس هاجوا أكتر وجابوا ساحر من بره النجع فك التعزيمه اللى على البيت , ولما فكوا التعزيمه اللى على البيت , كل واحد من النجع رمى شعلة نار على بيت أبوك فحرقوا بيته وقتلوه وقتلوا مراته اللى هى أختى وعياله .
لما طلعت من الأنقاض , الناس كانت عايزه تقتلك أنت كمان , لولا أن الحج فكرى العياط قالهم انها معجزة وحذرهم انهم لو قتلوك يبقى أما بيخالفوا أرادة ربنا وساعتها ربنا هيعاقبنهم عقاب عسير!!!
أو بيخالفوا أرادة الجن اللى مسخرهم ابوك وساعتها هتصيبهم لعنه تانيه أكبر !!!
فأتفقوا يسيبوك عايش , بس رفضوا أنى أنا أو عمك دياب نربيك ......
فبصتلها بأستغراب
فقالتلى وهى بتهزراسها :
أها عمك دياب يبقى عمك أخو أبوك ... وأهالى النجع رفضوا أنك تتربى معايا أو معاه علشان متعرفش أصلك فى يوم وتفكر تروح تنتقم ...
وكلهم برده رفضوا ياخدوك فى بيتهم ... محدش هيربى أبن ساحر أذاه فى يوم يبنى.. فطلع الحاج فكرى بفكرة أنهم يعملوا قرعه وكل واحد فى النجع يربيك سنه !!!, علشان تتربى وسطينا وماتفكرش فى يوم تأذينا , ووصى أننا ننسى حكاية ناير أبن " نمير الساحر "ونبدلها بقصة ناير أبن الحاج" طلب "أمام الجامع .
ومكنوش هيحطونا أنا وعمك دياب فى القرعه لولا عمك دياب أصر أسامينا تتحط فى القرعه بعد ماحرمونا من حق تربيتك , كان شايف أننا على الأقل لينا حق نربيك سنه زيهم ووافقوا بعد ما اقنعهم برده الحاج فكرى العياطى ......
كنت بسمعها وأنا راسى ببيدق فيها الدم من الغيظ والكره وعرفت ليه كانوا بيعاملونى بالسخره !!!.. وضحكت على نفسى ... اللى كانت مصدقه أن الناس الواطيه اللى فى النجع دول قال أيه !! ممكن يتخانقوا علشان يتبنوا أبن امام جامع عندهم ويربوه وسط عيالهم !!!!
عرفت ليه أندهشوا لما القرعه جات على دياب الساحر !! خافوا من أبن الساحر.... ليتعلم السحر وياخد بتار أبوه وامه واخواته اللى حرقوهم !!!
وقفت فجأه وقررت أمشى من بيت خالتى عفاف , شدتنى خالتى عفاف من هدومى وقالتلى وعينيها بتسح عياط :
ناير أنت حلفت على المصحف , أبوك خد عقابه ويستاهله علشان هو اللى أذى الناس يابنى
فقولتلها وانا بصرخ فى وشها وبعيط:
وأنا أبويا أذى الناس من نفسه !!! ولا هم اللى كانوا بيجيله علشان يعملوا أعمال لبعض ويأذوا بعض .. أبويا كان سلاحهم اللى اذوا بيه نفسهم , الأصول يحاسبوا نفسهم , ولو أبويا يستاهل اللى جراله .. أخواتى ذنبهم أيه ياخاله عفاف !!!... مراته اللى هى أختك وأمى ذنبها أيه !!!! وانا ذنبى أيه أتربى خدام فى بيوت الناس اللى قتلوا أبويا!!!
وزيحت أيدها من هدومى بغلظه وغضب , وجريت ناحية باب بيتها علشان أخرج
فضلت تمسك فيا وتشدنى من هدومى وتترجانى أنى معملش حاجه , شيلت أيدها من عليا وزقتها جامد فوقعت على الأرض , بالرغم من ده فضلت تمسك فى رجلى علشان ماطلعش من بيتها وفضلت تكح جامد وهيا ماسكه رجلى , وبعدين قطعت النفس لفتره , شيلتها بسرعه وحطتها على السرير فلقتها بتأن وبتقولى وعينيها لسه بتسح عياط :
أنت اللى لسه فاضل ياناير ...ماتموتش أنت كمان يابنى
قعدت معاها على السرير وخدت بالى منها أكلتها واديتها الدوا ولما نامت طلعت قعدت قدام باب بيتها .
لمحت الشاب أياه جاى من بعيد , وفجأه لقيته جمبى !!!
وبيقولى : أيه رأيك نتعرف دلوقتى !!؟
أنا نصير واحد من الجان اللى كانوا تحت أمرة أجدادك وأبوك وعمك ، ودلوقتى انت ..
هتاخد بتار أبوك !!!؟
يومى مش مبطل مفاجأت !!! عمى دياب أتقتل !!! أبويا الساحر نمير !!! والجن بتاعه قدامى !!
قولتله :
تشرفنا ... بس أنا مبفكرش فى الأنتقام , ومش همشى فى طريق السحر تانى مهما حصل ..مش هأذى حد تانى مهما حصل .. تقدر تنصرف دلوقتى انت حر...
فقالى:
براحتك لو مش عايز تنتقم , بس أنا مش بنصرف أنا ورث .. ولو اتجنبتنى أو اتجاهلتنى مش هسيبك وهشربك من عذابى كاسات و اللى هتخليك تجنن ويذهب عقلك !!
قربت منه وحطيت عينى فى عينه وقولته بتحدى وبقوة ساحر مخضرم :
لما تيجى تكلم سيدك تكلمه بأحترام والا أنا اللى هسقيك من عذابى كاسات !!
فقريت تعزيمه معينه أنهتها بجملة الطاعه لله ... الطاعه لله ..خلت ملامحه تتغير وتتحول للدهشه والخوف , ووشه طبق ومسك راسه من قوة الصداع , واترجانى اوقف اللى بقوله ونكس راسه ليا وبعدين أختفى !!!
دخلت أطمنت على خالتى عفاف وخدت نفسى وطلعت بره النجع خالص و بعدت.....
روحت قعدت فى نجع تانى بعيد عن نجع الشرفاء , اهله مايعرفوش عنى حاجه , ودورت على شغل وسكن ليا وحاولت أرمى كل اللى حصل ورا ضهرى وأكمل حياتى اللى جايه بنى آدم جديد فى مكان تانى !!
عشت فى نجع الأكارم واللى ناسه كانوا كلهم كرم ,دخلونى وسطهم وحبونى بعد مالقونى بفهم فى كل حاجه وبتقنها كمان , نجاره ماشى , حداده شغال , بناية بيت او محل مايضرش , وفضلت على كده ليا أوضه صغيره بسرير واحد وشغال فى أى حاجه فى النجع .
بعدت عن أى حاجه ليها علاقه بالسحر الا حاجه واحده بس غرابى "غداف" صديقى الوحيد اللى بثق فيه والوحيد اللى بتكلم معاه , وكنت ببعته يطير لنجع الشرفا , علشان أطمن على خالتى عفاف والدكتور عمر وأشوفهم لما يوحشونى بعينه ... عين غرابى " غداف ".
عدت 4 سنين كان فيهم الرابط بينى وبين نجع الشرفا غرابى بس.....
يوم وأنا فى سوق "الكبير" وده سوق بيتجمع فيه كل اهالى نجع "الأكارم" علشان يجيبوا احتياجتهم من التجار اللى بيلفوا النجوع واللى بيبيعوا البقول زى الفول والعدس و كمان الزيوت و التوابل وغيره وغيره , وبيبقى فيه سحره بيجوا يعملوا فقرات ترفيه بيرقصوا تعابين وبيعملوا مراهنات على مصارعه الديوك...
وفيه سحره رحاله ودول بيبقى اغلبيتهم نصابين بيقنعوا الناس أن عليهم أعمال ويأخدوا منهم فلوس ودهب علشان يبطلوا الأعمال دى , السحره دول بيبقوا قاعدين فى خيم على أطراف السوق .
وانا فى السوق لفت نظرى ناس متجمعه وصوت واحده بتصوت وبتستنجد بالناس يلحقوا أبوها اللى واقع جمبها على الأرض لونه شاحب وبيتشنج!!! ....
قرب منها ساحر نصاب من أياهم وخلى الناس يشيلوا أبوها على الخيمه بتاعته , فشالوه وراحوا بيه على الخيمه ووراهم بنته .
حطوه فى الخيمه وطلعوا وسابوا البنت و أبوها فى خيمة الساحر .
قربت من الخيمه ولفيت حواليها لحد مالقيت حته مفتوحه أعرف أبص منها على اللى بيحصل جوا..
لقيت الساحر بيدى للراجل العجوز عشب فى بوقه فبدأ يفوق شويه , قرا عليه شوية حاجات
ولقيته بيقول للبنت ولأبوها اللى لسه دايخ ومش واعى :
أبوكى معمله عمل سفلى قوى وهوريكى دلوقتى بعينك العمل اللى معمله !!
وراح جاب حله وحطها على النار قدامها وملى الحله مايه ,وحط في الميه اللى فى الحله لون احمر خلى لون الميه كله أحمر زى الدم , خد شعره بيضه من شعر راس أبوها ورماها فى الميه الحمرا اللى فى الحله وغطاها وسابها على النار وقرى شوية حاجات , و رفع غطا الحله
أندهشت البنت وفتحت بوقها لما لقت حجاب أبيض ملفوف على شكل مثلث صغير جوه الميه الحمرا اللى فى الحله !!!!
فقالها الساحر :
شوفتى بعينك العمل اللى معمول لابوكى ؟!! , علشان نبطل العمل ده محتاجين 30 جرام من الذهب والأ أبوكى يومين بالظبط وهيموت لاقدر الله ..
البنت من لهفتها على أبوها قالته :
هجرى أجيب الصيغه اللى فى البيت وأجى.
ووقفت ولفت ضهرها وقالت للساحر :
بس اللى فى البيت مايكفيش 30 جرام !!!!
فالنصاب قالها :
هاتى كل الذهب اللى فى البيت وتعالى نوزن ونشوف وأن شاء الله خير !!
سابت أبوها فى الخيمه مع الساحر وطلعت تجرى تجيب الصيغه ..
فشدتها من أيديها وقولتلها :
أستنى يا...
فشدت أيدها من أيدى وهى بتقول :
سيب ايدى ياراجل انت.... انت مجنون !!!
قولتها :
أبوكى زى الفل والساحر اللى جوه دا نصاب ...
برده فضلت تشد ايدها من أيدى وهى بتقولى :
بقولك سيبنى أبويا بيموت !!
قولتلها :
والله مابيموت ولا حاجه !!
وشرحتلها خدعة الساحر و هى انه الحجاب اللى شافته فى الميه كان ملزوق ومتثبت بغراء فى غطا الحله علشان لما الميه اللى فى الحله تغلى من النار , تقوم تسيح الغرا اللى ماسك الحجاب فى الغطا , ويقع الحجاب فى الميه , فتفكره حجاب معمول لابوها
وأثبتلها أن كل كلامى صح لما شدتها و دخلت الخيمه على الساحر وقبل مايتكلم ناولته بوكس فى وشه وقع على الأرض ..
وروحت ناحية الحله ورفعت الغطا و وريتها مكان الغرا اللى فى الغطا , بصت للساحر وتفت عليه وحاولت تسند أبوها فساعدتها ووصلته معاها لحد البيت ,وجريت روحت للعطار اللى فى السوق جبت مية كافور وعصارة نبته "السذاب" ورجعت بيتها وخبطت على الباب ففتحت
قولتلها تغلى مية الكافور بسرعه فى طبق , وعلى ماراحت تغلى مية الكافور , كنت أنا سقيت أبوها من عصارة السذاب .
جابت الطبق اللى فيه مية الكافور بتغلى قربتها من مناخير أبوها وخليته يستنشق بخارها ,
شويه وعطس كام عطسه ورا بعض , بعدهم والحمد لله فاق أكتر ونادى على أسمها وقال :
ليلى !!!
أطمنت عليه وفهمتها أن اللى عنده ده صرع مش جن راكبه !!!
وأنها لازم كل يوم تخليه يشرب عصير تفاح طازه ويسف عيدان قرنفل مع العسل وياكل بصل نيى ويشرب مية الحمص المسلوق بعد ماتحليه بالعسل و قولتلها انى ممكن أبقى أجى بكره و أشقرعليه وأطمنها لو عايزه ؟!!
بصتلى بعينها الواسعه وأبتسمت فبانت غمازات فى خدودها وقالتى وهى بتحرك صوابعها فى خصل شعرها الطويل الفاحم :
شكرا يا.....
قولتلها :
أسمى ناير وهبقى أجى بكره علشان أطمن على عمى ....
فقالتلى وهى بتبص على أبوها :
صادق .. عمك صادق
روحتلها تانى يوم وضبطت نفسى ولبست الحته اللى على الحبل وحطيت على شعرى فازلين وخدت معايا قرنقل وعسل وبرتقان علشان تغلى قشره لابوها , وحبة ورد لزوم الشياكه .
خبطت على الباب وانا مبتسم , ففتحلى الباب أبوها !!!
واقف قدامى بسم الله ماشاء الله عليه زى القرد !!! , لقيته بيبص عليا وعلى الورد اللى فى أيدى بأستغراب وهوه بيقولى :
أنت مين يابنى ...
فسمعت صوتها جاى من جوه البيت بتقوله :
مين برا يابابا ..
وجت ناحية الباب ووسعت أبوها اللى كان سادد الباب ولسه بيبصلى من فوق لتحت
زاحت ابوها بحنيه وقالته :
ده ناير اللى حكتلك عنه أمبارح , فلقيت وشه اتعدل شويه وأبتسملى وقال :
لامؤاخده يبنى ... أتفضل أدخل ..
دخلت البيت وقلتله :
والله ياعم صادق أنا كنت جاى أطمن عليك , وكنت جايبلك حبة الورد دول علشان تغليهم وتشربهم .... الحمد لله بقيت كويس أهوه فهستأذن انا ..
قالى :
عيب يابنى لازم تقعد تتغدى معانا وتشرب الشاى !!
وبص لليلى وشاورلها براسه على المطبخ .
اتغديت معاهم وشربت الشاى واستأذنت عشان اروح
خرجت من بيت ليلى وانا بفكر فيها حسيت بشعور غريب نحيتها .. معقول اكون بدئت اح...
قطع تفكيرى فجأة الساحر اللى ضربته فى السوق ، لقيته بيهجم عليا هو و ٣ تانيين ..ثبتونى وشدوا درعاتى الاتنين على صخره
ونزل الساحر بالسيف على درعاتى وقطعهم !!!!
